အခန်း (၉၃၁-၉၃၂)

အပိုင်း(၉၃၁) စစ်တပ်ကိုယ်စားလှယ် ကျန်းယွဲ့

"ဆရာလင်းယွမ်"

"ဆရာလင်း"

သူတို့နှစ်ယောက်သည် လင်းယွမ်ကို မြင်လိုက်ရသောအခါ အလွန်အံ့အားသင့်သွားပြီး ဝမ်းသာပီတိဖြစ်သွားကြသည်။

လင်းယွမ် ကိုယ်တိုင် ရောက်လာလိမ့်မည်ဟု သူတို့ လုံးဝ ထင်မှတ်မထားခဲ့ကြောင်း သိသာလှ၏။

နှစ်ယောက်သား အမြန်ရှေ့တိုးကာ ဆီးကြိုလိုက်ကြသည်။

လင်းယွမ်က လက်ကာပြလိုက်ပြီး မေးလိုက်သည်။ "ဂျိမ်းစ် သတင်းရပြီလား"

ဂျက်ခ်က အလျင်အမြန် ပြန်ဖြေသည်။ "ဆရာလင်း... ဂျိမ်းစ်က ကျင်းကျိုးစစ်တပ်ရဲ့ လက်ထဲမှာ ရှိနေတုန်းပါပဲ... သူတို့လူတွေလည်း ကျွန်းပေါ်မှာ ရှိနေပြီး ကျွန်တော်တို့ကို အခုချက်ချင်း ဆုံးဖြတ်ချက်ချဖို့ ဖိအားပေးနေကြတယ်"

"အခု ကျွန်းပေါ်မှာ ကျွန်တော်နဲ့ မော်လီပဲ တာဝန်ယူထားရတာဆိုတော့ အချိန်ဆွဲထားပေမဲ့ တစ်ဖက်လူကတော့ စိတ်မရှည်တော့ဘူး"

"ဂျိမ်းစ် သူတို့လက်ထဲမှာ ရှိနေတယ်ဆိုတာကို မင်းတို့ ဘယ်လို သေချာသိတာလဲ"

"သူတို့က ဂျိမ်းစ်ကို ဖမ်းထားတဲ့ ဗီဒီယို ရိုက်ပြလာတယ်" မော်လီက အမြန် ဝင်ပြောသည်။

ထိုသို့ပြောရင်း သူမက ဖုန်းတစ်လုံးကို ထုတ်ကာ လင်းယွမ်ထံသို့ ကမ်းပေးလိုက်၏။

လင်းယွမ်က ဖုန်းထဲမှ ဗီဒီယိုကို ဖွင့်ကြည့်လိုက်ရာ ဂျိမ်းစ်အား အထူးပိတ်လှောင်ခန်းတစ်ခုထဲတွင် ဖမ်းဆီးထားသည်ကို တွေ့လိုက်ရသည်။

သူသည် အားအင်ချည့်နဲ့နေသော ပုံစံဖြင့် မြေပြင်ပေါ်တွင် ထိုင်နေပြီး လက်နှင့်ခြေထောက်များတွင် သံကြိုးများ ခတ်ထားကာ မျက်နှာပေါ်၌လည်း သင်္ကေတတစ်ခုကို ရိုက်နှိပ်ထားလေသည်။

လင်းယွမ်၏ အကြည့်များ စူးရှသွားပြီး ထိုသင်္ကေတကို သေချာစွာ ကြည့်လိုက်ရာ သူ၏ မျက်နှာအမူအရာမှာ တဖြည်းဖြည်း တည်တင်းလာ၏။

"ချိတ်ပိတ် သင်္ကေတ"

ထိုသင်္ကေတသည် ချိတ်ပိတ် သင်္ကေတ ဖြစ်နေချေပြီ။

"ဆရာလင်း... ဂျိမ်းစ်ရဲ့ မျက်နှာပေါ်က သင်္ကေတက ချိတ်ပိတ် သင်္ကေတလား" မော်လီက အလျင်အမြန် မေးလိုက်သည်။

လင်းယွမ်က ခေါင်းအနည်းငယ် ညိတ်လိုက်ပြီး "ဟုတ်တယ်... ကျင်းကျိုးစစ်တပ်ကလည်း ချိတ်ပိတ် သင်္ကေတကို ပိုင်ဆိုင်ထားလိမ့်မယ်လို့ မထင်ထားဘူး... ဒါကြောင့် ဂျိမ်းစ်ရဲ့ အစွမ်းနဲ့တောင် သူတို့လက်ထဲကို ဒီလောက် အလွယ်တကူ ဖမ်းမိသွားတာကိုး" ဟု ပြောလိုက်သည်။

ဂျက်ခ်က မနေနိုင်ဘဲ "ဆရာလင်း... ချိတ်ပိတ် သင်္ကေတက ထိုက်ယန်တောင် ကျွန်းမှာပဲ သီးသန့်ရှိတာ မဟုတ်ဘူးလား" ဟု ဝင်မေးလိုက်သည်။

လင်းယွမ်က ခေါင်းခါယမ်းလိုက်သည်။ "ဘယ်ဟုတ်မှာလဲ... စွမ်းအင်ချိတ်ပိတ် ရေညှိတွေက လင်ကျောင်းမြို့မှာ အမှတ်မထင် ပေါက်နေတာပဲ ရှိတာ"

"တကယ်တော့ စွမ်းအင်ချိတ်ပိတ် ရေညှိတွေက ဘယ်နေရာမှာမဆို ပေါက်ရောက်နိုင်တယ်... ကျင်းကျိုးမှာလည်း အဲ့ဒီရေညှိတွေ ရှိနိုင်ပြီး သူတို့က ချိတ်ပိတ် သင်္ကေတရဲ့ အသုံးဝင်ပုံကို ရှာတွေ့သွားတာ ဖြစ်မယ်"

"ဒါ့အပြင် အရင်တုန်းက လင်ကျောင်းမြို့မှာ ထိုက်ယန်တောင်ရဲ့ ရန်သူတွေ မနည်းမနောရှိခဲ့တယ်... အဲ့ဒီတုန်းက သူတို့ကို ရှင်းလင်းပစ်တဲ့ အချိန်မှာ တချို့လူတွေ လွတ်သွားခဲ့ပြီး ချိတ်ပိတ် သင်္ကေတ နည်းပညာကို ယူသွားတာလည်း ဖြစ်နိုင်တယ်"

"နောက်ပြီး ကမ္ဘာမြေပေါ်က ဇီဝမျိုးစုံ မျိုးကွဲတွေ ပေါကြွယ်ဝမှုကို ထည့်တွက်ကြည့်ရင် စွမ်းအင်ချိတ်ပိတ် ရေညှိတစ်ခုတည်းကပဲ ဒီလို သင်္ကေတမျိုး ထုတ်ပေးနိုင်တာ မဟုတ်လောက်ဘူး... တခြား အပင်တွေနဲ့ သတ္တဝါတွေ သန္ဓေပြောင်းသွားရင်လည်း ဒီလိုဆင်တူတဲ့ သင်္ကေတမျိုး ထွက်လာနိုင်တာပဲ"

"ဘာပဲဖြစ်ဖြစ် ကျင်းကျိုးစစ်တပ်က ချိတ်ပိတ် သင်္ကေတကို ပိုင်ဆိုင်ထားပြီဆိုတာ ငြင်းလို့မရတဲ့ အမှန်တရားပဲ"

"ဒါဆို ကျွန်မတို့ ဘယ်လိုလုပ်ကြမလဲ" မော်လီက စိုးရိမ်တကြီး မေးလိုက်သည်။

ဂျိမ်းစ်၏ ရည်းစားဟောင်း တစ်ယောက်အနေဖြင့် သူမသည် ထိုရည်းစားဟောင်းအပေါ် စိုးရိမ်ပူပန်နေဆဲ ဖြစ်သည်။

ယခုအချိန်တွင် သူမ အလွန် စိုးရိမ်နေကြောင်း သိသာလှ၏။

လင်းယွမ်က သူမကို တစ်ချက်ကြည့်လိုက်ပြီး "ကျင်းရှီရုံလည်း ထိုက်ယန်တောင်ကနေ စွမ်းအင်ချိတ်ပိတ် အစီအရင်ကို ခိုးသွားတာပဲ မဟုတ်လား... ဒါပေမဲ့ ငါတို့ သူ့ကို သတ်ပစ်နိုင်ခဲ့တာပဲလေ" ဟု ပြောလိုက်သည်။

"စွမ်းအင်ချိတ်ပိတ် အစီအရင်က ဘယ်လောက်ပဲ အစွမ်းထက်ပြီး စစ်ပွဲတစ်ပွဲရဲ့ ရလဒ်ကိုတောင် ပြောင်းလဲပစ်နိုင်တယ် ဆိုပေမဲ့"

"အဲ့ဒါက တစ်ဖက်လူမှာလည်း စွမ်းအင်ချိတ်ပိတ် အစီအရင် မရှိမှသာ ဖြစ်နိုင်မှာလေ"

"အခု နှစ်ဖက်စလုံးမှာ စွမ်းအင်ချိတ်ပိတ် အစီအရင် ရှိနေပြီဆိုတော့ ကျန်တာကတော့ သေချာပေါက် ဓားချင်းယှဉ်ခုတ်ပြီး စစ်ခင်းရုံပဲပေါ့"

"အခု မင်းတို့ ကျင်းကျိုးစစ်တပ်ရဲ့ အခြေအနေ အတိအကျကို စုံစမ်းလို့ရပြီလား... သူတို့ရဲ့ အဓိကစခန်းက ဘယ်မှာလဲ... လူဘယ်လောက်ရှိလဲ... ခေါင်းဆောင်က ဘယ်သူလဲ... မျိုးရိုးဗီဇ ပြန်လည်ဖွဲ့စည်းခြင်း အဆင့်ရှိတဲ့ အစွမ်းပိုင်ရှင် ဘယ်လောက်ရှိလဲ"

လင်းယွမ်က သူတို့နှစ်ဦးကို မေးလိုက်၏။

မော်လီနှင့် ဂျက်ခ်တို့၏ မျက်နှာတွင် ခါးသီးသော အမူအရာများ ပေါ်လာပြီး ဂျက်ခ်က "ဆရာလင်း... သူတို့က ဂျိမ်းစ်ကို သဲလွန်စမကျန်အောင် ဖမ်းသွားတာဆိုတော့ အခုအချိန်ထိ ဂျိမ်းစ် ဘယ်မှာ အဖမ်းခံထားရလဲဆိုတာ ကျွန်တော်တို့ မသိရသေးပါဘူး" ဟု ပြောလိုက်သည်။

"သူတို့ရဲ့ အဓိကစခန်း ဘယ်မှာရှိလဲဆိုတာကိုတောင် မသိရပါဘူး... အခုလောလောဆယ် ဘာသဲလွန်စမှ မရှိသေးဘူး"

မော်လီကလည်း နာကျင်စွာဖြင့် "ကျွန်မတို့ လူအင်အားအများကြီးလွှတ်ပြီး လိုက်ရှာခဲ့ပါတယ်... ဒါပေမဲ့ တစ်ဖက်လူက အရမ်းကို ပုန်းလျှိုးကွယ်လျှိုး နေနိုင်လွန်းတယ်... အခု ကျွန်းပေါ်မှာ စစ်တပ်ဘက်က စေ့စပ်ရေးကိုယ်စားလှယ် တစ်ယောက်ပဲ ရှိပြီး တခြား ဘယ်သူ့ကိုမှ ရှာမတွေ့ပါဘူး" ဟု ပြောလိုက်သည်။

ထိုစကားကို ကြားလိုက်ရသောအခါ လင်းယွမ်က ရုတ်တရက် ရယ်မောလိုက်ပြီး "ဒီလိုကိုး" ဟု ဆိုလိုက်သည်။

"ဒီလိုဆိုရင် သူတို့ဆီမှာ လူအင်အား သိပ်မရှိလောက်ဘူး"

မော်လီနှင့် ဂျက်ခ်တို့ ကြောင်သွားကြပြီး လင်းယွမ်ကို အမြန် ကြည့်လိုက်ကြ၏။

"ဆရာလင်း... အဲ့ဒါ ဘာကို ဆိုလိုတာလဲ" မော်လီက အလျင်အမြန် မေးလိုက်သည်။

လင်းယွမ်၏ မျက်ဝန်းများ အရောင်လက်သွားပြီး "တစ်ဖက်လူကသာ တကယ်ကို အင်အားကြီးမားနေမယ်ဆိုရင် ဒီလိုမျိုး ပုန်းလျှိုးကွယ်လျှိုး လုပ်နေမှာ မဟုတ်ဘူး" ဟု ပြောလိုက်သည်။

"သူတို့ ပုန်းနေရတဲ့ အကြောင်းရင်းက သူတို့ရဲ့ အင်အားက သိပ်မကြီးလို့ပဲ... မင်းတို့နဲ့ မျက်နှာချင်းဆိုင် စစ်ခင်းဖို့တောင် မရဲလို့ နေမှာပေါ့"

"အခု ဂျိမ်းစ်ကို ဖမ်းပြီး ခိုက်ရီနည်းပညာကို ခြိမ်းခြောက်တာက သူတို့အတွက် အရင်းအနှီး အနည်းဆုံး နည်းလမ်းပဲ"

"ဒါပေမဲ့ ကျွန်မတို့ ဂျိမ်းစ်ကို ရှာမတွေ့သရွေ့ သူတို့ရဲ့ ခြိမ်းခြောက်မှုကို ခံနေရမှာပဲလေ" မော်လီက မနေနိုင်ဘဲ ပြောလိုက်သည်။

"ဂျိမ်းစ်ကို ဒီတိုင်း ပစ်ထားလို့မှ မရတာ" မော်လီက လင်းယွမ်ကို ကြည့်ကာ စိုးရိမ်တကြီး မေးလိုက်သည်။

လင်းယွမ်က ခေါင်းခါယမ်းလိုက်ပြီး "သေချာပေါက် ပစ်မထားပါဘူး" ဟု ပြန်ဖြေသည်။

"ဒီလိုလုပ်... မင်းတို့ ငါ့ကို အဲ့ဒီ ကျင်းကျိုးစစ်တပ်ရဲ့ ကိုယ်စားလှယ်နဲ့ တွေ့ပေး... ငါ သူ့ကို စကားပြောကြည့်မယ်"

မော်လီနှင့် ဂျက်ခ်တို့ အမြန် ခေါင်းညိတ်လိုက်ကြပြီးနောက် နှစ်ယောက်သား လင်းယွမ်အား ကျွန်းပေါ်ရှိ ဧည့်ခန်းမဆောင်သို့ အမြန် ခေါ်ဆောင်သွားကြသည်။

ထို့နောက် ဂျက်ခ်က ကျင်းကျိုးစစ်တပ်မှ လူကို ချက်ချင်း သွားခေါ်ခိုင်းလိုက်၏။

မော်လီသည် လင်းယွမ်၏ ဘေးတွင် ရပ်နေရင်း "ဆရာလင်း... ဒီစစ်တပ်ကလူက အရမ်း မောက်မာတယ်... အရင်က ကျွန်မတို့နဲ့ တွေ့တုန်းကလည်း အမြဲတမ်း ဆရာကြီးပုံစံ ဖမ်းနေတာ" ဟု လေသံတိုးတိုးဖြင့် သတိပေးလိုက်သည်။

လင်းယွမ်က ခေါင်းအနည်းငယ် ညိတ်လိုက်ပြီး "ဒါဆိုလည်း သူ ဘယ်လို ဆရာကြီးပုံစံ ဖမ်းမလဲဆိုတာ ငါ ကြည့်ရသေးတာပေါ့" ဟု အေးတိအေးစက် ပြောလိုက်သည်။

မကြာမီမှာပင် ပိန်ပိန်ပါးပါး ကိုယ်လုံးကိုယ်ပေါက်ဖြင့် စစ်ဝတ်စုံ ဝတ်ဆင်ထားသော အမျိုးသားတစ်ဦးကို ခေါ်ဆောင်လာသည်ကို တွေ့လိုက်ရသည်။

ထိုသူသည် စစ်ဝတ်စုံကို ဝတ်ဆင်ထားသော်လည်း သူ၏ အသွင်အပြင် တစ်ခုလုံးက ရမ်းကားပြီး တာဝန်မဲ့ပုံပေါက်နေလေသည်။

သူ၏ ဆံပင်ပုံစံသည်လည်း စစ်သားများကဲ့သို့ ဆံပင်တိုတို မဟုတ်ဘဲ ကျစ်ဆံမြီး ကျစ်ထားကာ ဆံပင်အရောင်မှာလည်း အပြာရောင်ဘက် သန်းနေ၏။

လင်းယွမ်က ထိုသူကို အထက်အောက် သေချာစွာ အကဲခတ်လိုက်သည်။

ထိုသူ၏ အသက်မှာ သုံးဆယ်အောက် ခန့်သာ ရှိသေးပြီး မျက်လုံးများထဲတွင် ပါးနပ်ကောက်ကျစ်သော အရိပ်အယောင်များ ပေါ်လွင်နေသည်။

ဧည့်ခန်းမထဲသို့ ဝင်လာပြီးနောက် သူသည် ပတ်ဝန်းကျင်ကို အကဲခတ်ကြည့်ရှုနေပြီး သူ၏ အမူအရာမှာ မောက်မာနေကာ မျက်လုံးများ အရောင်လက်သွားပြီးနောက် မကြာမီမှာပင် လင်းယွမ်ကို လှမ်းကြည့်လိုက်လေသည်။

သူ၏ မျက်ဝန်းထဲတွင် အံ့အားသင့်သွားသည့် အရိပ်အယောင် တစ်ချက် ဖြတ်ပြေးသွားပြီး ဤတစ်ကြိမ် သူ့ကို လာတွေ့သည့် အဓိကလူမှာ မည်သူဖြစ်ကြောင်း သိသာစွာ ဆုံးဖြတ်နိုင်သွားသည်။

"ဟက်ဟက်... မင်းတို့ ခိုက်ရီနည်းပညာက ဘာသဘောလဲ... ငါ ဒီကို ရောက်နေတာ နှစ်ရက်ရှိနေပြီ... မင်းတို့ သေသေချာချာ ပူးပေါင်းမှာလား မပူးပေါင်းဘူးလားဆိုတာ တိတိကျကျ တစ်ခွန်းတည်း ပြောစမ်းပါ"

"မင်းတို့ရဲ့ ခေါင်းဆောင် ဂျိမ်းစ်က ငါတို့လက်ထဲမှာ ရှိနေသေးတယ်ဆိုတာကိုတော့ မမေ့နဲ့နော်... တကယ်လို့ မပူးပေါင်းဘူးဆိုရင်တော့ ငါတို့ ကျင်းကျိုးစစ်တပ်ဘက်က မျက်နှာပြောင်တိုက်တယ်လို့ မပြောနဲ့"

သူသည် ခြိမ်းခြောက်သည့် စကားများကို ဗြောင်ကျကျပင် ထုတ်ပြောလာလေသည်။

မော်လီနှင့် ဂျက်ခ်တို့၏ မျက်နှာများ ချက်ချင်း မှုန်ကုပ်သွားပြီး ဂျက်ခ်က သူ၏ လက်သီးကိုပင် ကျစ်ကျစ်ပါအောင် ဆုပ်ထားလိုက်သည်။

ခိုက်ရီနည်းပညာ၏ နံပါတ်နှစ် ခေါင်းဆောင် တစ်ယောက်အနေဖြင့် သူ ဘယ်တုန်းကမှ ဤကဲ့သို့ ခြိမ်းခြောက်ခြင်း မခံခဲ့ရဖူးပေ။

သို့သော် ဂျိမ်းစ်က တစ်ဖက်လူ၏ လက်ထဲတွင် ရှိနေသောကြောင့် သူ အမှန်တကယ်ပင် ပြန်လည် မခုခံနိုင်ပေ။

သူက လင်းယွမ်ဘက်သို့ လှည့်ကြည့်လိုက်ပြီး လင်းယွမ် မည်သို့ တုံ့ပြန်မည်ကို သိချင်နေသည်။

အကယ်၍ ဆရာလင်းကသာ တစ်ခွန်း အမိန့်ပေးလိုက်လျှင် သူသည် ရှေ့ရှိ စစ်တပ်က လူမိုက်ကို မဆိုင်းမတွ ပြေးဝင် သတ်ပစ်မည်မှာ သေချာသည်။

လင်းယွမ်၏ မျက်နှာအမူအရာမှာ အေးဆေးတည်ငြိမ်နေပြီး ဒေါသထွက်နေသည့် အရိပ်အယောင် တစ်စုံတစ်ရာမျှ မရှိပေ။

သူက "မင်း နာမည် ဘယ်လိုခေါ်လဲ" ဟုသာ ခပ်အေးအေး မေးလိုက်သည်။

စောစောက မောက်မာနေခဲ့သော စစ်တပ်မှ လူငယ်မှာ ချက်ချင်း ကြောင်သွားပြီးနောက် မျက်ခုံးပင့်လိုက်ကာ "မင်းက ဘယ်သူလဲ... စုန်းမ... လင်းနို့... မင်းတို့နှစ်ယောက်က ဆုံးဖြတ်ချက် မချနိုင်တော့ဘူးလား... ဒါကြောင့် တပည့်တစ်ယောက်ကို ခေါ်ထုတ်လာတာလား" ဟု ပြောလိုက်သည်။

"ရိုင်းစိုင်းလိုက်တာ" ဂျက်ခ်က ချက်ချင်း ဒေါသတကြီး အော်ဟစ်လိုက်ပြီး သူ၏ မျက်နှာပေါ်တွင် သတ်ဖြတ်ချင်သည့် အရိပ်အယောင်များ ဖြတ်ပြေးသွား၏။

မော်လီ၏ မျက်ဝန်းများမှာလည်း ချက်ချင်း စူးရှလာပြီး သတ်ဖြတ်ချင်စိတ်များ ပေါ်ထွက်လာသည်။

သူတို့နှစ်ဦး၏ ဤကဲ့သို့သော အမူအရာများကြောင့် စစ်တပ်မှ လူငယ်မှာ ချက်ချင်း ရင်ထိတ်သွားပြီး သူ၏ မျက်နှာ အနည်းငယ် ပျက်သွားသည်။

လင်းယွမ်က လက်ကို မြှောက်ကာ သူတို့နှစ်ဦးကို တိတ်တိတ်နေရန် အချက်ပြလိုက်သည်။

သူက အေးတိအေးစက်ဖြင့် "ငါ့နာမည်က လင်းယွမ်... ဟန်ဆောင်ပန်ဆောင်တွေလုပ်မနေနဲ့... စမ်းသပ်နေစရာလည်း မလိုဘူး... ခိုက်ရီနည်းပညာက လူတွေအကုန်လုံး ငါ့စကားကိုပဲ နားထောင်ကြတာ" ဟု ပြောလိုက်သည်။

"မင်းတို့ ဂျိမ်းစ်ကို ဖမ်းထားလည်း ဘာမှ အသုံးမဝင်ဘူး... ကိစ္စတစ်ခု ဆွေးနွေးချင်ရင် ငါနဲ့ပဲ ဆွေးနွေးရလိမ့်မယ်"

"အခု မင်းရဲ့ နာမည်ကို ပြော"

စစ်တပ်မှ လူငယ်က မျက်လုံးများကို မှေးလိုက်ပြီး လင်းယွမ်ကို သေချာစွာ အကဲခတ်ကြည့်လိုက်ကာ ရုတ်တရက် ရယ်မောလိုက်ပြီး "သြော်... လင်းယွမ်ဆိုတာကိုး... ငါ ခန့်မှန်းတာ မမှားဘူးဆိုရင် မင်းက လင်ကျောင်းမြို့ ထိုက်ယန်တောင် ခိုလှုံရေးစခန်းကပဲ မဟုတ်လား" ဟု ပြောလိုက်သည်။

"ဟက်ဟက်... ဒါဆိုလည်း ကိုယ့်ကိုယ်ကိုယ် မိတ်ဆက်ပေးရတာပေါ့... ငါက ကျင်းကျိုးစစ်တိုင်းဒေသကြီး အမှတ်(၁၃) တပ်ရင်းက တပ်ရင်းမှူး လီဟူရဲ့ လက်အောက်ငယ်သား ကျန်းယွဲ့ ပဲ"

လင်းယွမ်က နားထောင်ပြီးနောက် "မင်းက ကျင်းကျိုးစစ်တပ်မှာ ဘာရာထူးလဲ" ဟု ခပ်အေးအေး မေးလိုက်သည်။

ကျန်းယွဲ့၏ မျက်နှာအမူအရာ တောင့်တင်းသွားပြီး သူက အေးတိအေးစက်ဖြင့် "ဒါကို ပြောဖို့ မလိုတော့ပါဘူး... လင်းယွမ်... မင်းသာ ပူးပေါင်းချင်ရင် ငါတို့ဘက်က တောင်းဆိုချက်ကို သဘောတူလိုက်ရုံပဲ... ကျန်တာတွေကို သိပ်မမေးတာ အကောင်းဆုံးပဲ" ဟု ပြန်ဖြေသည်။

လင်းယွမ်၏ မျက်နှာအမူအရာမှာ တည်ငြိမ်နေဆဲဖြစ်ပြီး "ငါက သဘောမတူဘူးဆိုရင်ရော" ဟု မေးလိုက်၏။

ကျန်းယွဲ့သည် ထိုစကားကို ကြားလိုက်ရသောအခါ ချက်ချင်း မျက်နှာထား တင်းမာသွားပြီး အေးစက်သောအသံဖြင့် "သဘောမတူဘူး... ဟက်ဟက်... ဒါဆိုရင်တော့ လက်စွမ်းပြပြီးမှပဲ အဖြေရှာရတာပေါ့" ဟု ပြောလိုက်သည်။

"ဂျိမ်းစ်ရဲ့ အသက်က မင်းတို့ရဲ့ ဆုံးဖြတ်ချက် တစ်ချက်တည်းပေါ်မှာပဲ မူတည်တယ်"

ဤသည်မှာ ဗြောင်ကျကျ ခြိမ်းခြောက်လိုက်ခြင်းပင် ဖြစ်သည်။

လင်းယွမ်က ထရပ်လိုက်ပြီး "အော်... ဒါဆို မင်း ဒီကနေ အသက်ရှင်လျက် ပြန်ထွက်သွားနိုင်မယ်လို့ ထင်နေတာလား" ဟု ခပ်အေးအေး ပြောလိုက်သည်။

ကျန်းယွဲ့က အေးစက်စွာ ရယ်မောလိုက်ပြီး "ငါက လာရဲမှတော့ အသက်ရှင်လျက် ပြန်ထွက်သွားဖို့ စဉ်းစားမထားပါဘူး" ဟု ပြောလိုက်၏။

"ငါ့လို အမည်မသိ အဆင့်နိမ့်ကောင်တစ်ယောက်ရဲ့ အသက်က ခိုက်ရီနည်းပညာရဲ့ ခေါင်းဆောင်ကြီးရဲ့ အသက်နဲ့ ယှဉ်လိုက်ရင် ဘာများ အရေးပါလို့လဲ"

"ငါ့အသက် တစ်ချောင်းနဲ့ ဂျိမ်းစ်ရဲ့ အသက် တစ်ချောင်း လဲရတာ ဘယ်လိုတွက်တွက် တန်ပါတယ်"

သူက လင်းယွမ်ကို စူးစူးရဲရဲ စိုက်ကြည့်နေပြီး လင်းယွမ်၏ ရင်ထဲမှ အမှန်တကယ် တွေးတောနေသည့် အကြံအစည်များကို သိနိုင်ရန် ကြိုးစားနေသည်။

သာမန်လူတစ်ယောက်သာ ဆိုပါက သူ၏ ဤကဲ့သို့ ခြိမ်းခြောက်မှုကို ခံရလျှင် သေချာပေါက် ထိတ်လန့် ပြာယာခတ်သွားမည် ဖြစ်သည်။

တစ်ဖက်လူက ဂျိမ်းစ်၏ အသက်ကို အမှန်တကယ် ဂရုမစိုက်မှသာ ထိုသို့ မဖြစ်မည်။

သို့သော် ထိုသို့ ဖြစ်နိုင်ပါမည်လား။

ဂျိမ်းစ်သည် တစ်ဖက်လူ၏ ခန့်အပ်မှုဖြင့် ခိုက်ရီနည်းပညာ၏ ခေါင်းဆောင် ဖြစ်လာခဲ့ရာ တစ်ဖက်လူ၏ စိတ်ထဲတွင် သူ၏ နေရာသည် သေချာပေါက် နိမ့်ကျနေမည် မဟုတ်ပေ။ မည်သို့လုပ်၍ အမှန်တကယ် ဂရုမစိုက်ဘဲ နေမည်နည်း။

သို့သော် သူ မည်သို့ပင် ကြည့်စေကာမူ လင်းယွမ်ထံမှ မည်သည့် စိတ်ခံစားမှု အရိပ်အယောင်မျှ ထွက်ပေါ်လာခြင်း မရှိပေ။

သူက အေးတိအေးစက်ဖြင့် "ဒီလိုဆိုမှတော့ ဘာမှ ပြောစရာ မလိုတော့ဘူး... မော်လီ... သူ့ကို သတ်လိုက်တော့" ဟု ပြောလိုက်သည်။

မော်လီသည် ရုတ်တရက် ထရပ်လိုက်ပြီး ကျန်းယွဲ့ဆီသို့ အပြေးအလွှား ပြေးဝင်သွားသည်။

ကျန်းယွဲ့၏ မျက်နှာ ချက်ချင်း ပျက်သွားပြီး မယုံကြည်နိုင်လောက်အောင် ဒေါသတကြီးဖြင့် လင်းယွမ်ကို စိုက်ကြည့်ကာ သူ၏ ခန္ဓာကိုယ်ကို အမြန် နောက်သို့ ဆုတ်လိုက်၏။

သို့သော် သူ၏ အလျင် မည်မျှပင် မြန်ဆန်နေပါစေ... ကြိုတင် ပြင်ဆင်ထားသော မော်လီနှင့် မည်သို့ ယှဉ်နိုင်ပါမည်နည်း။

ပတ်ဝန်းကျင်ရှိ ဟင်းလင်းပြင်တွင် ရုတ်တရက် အရိပ်များ တွန့်လိမ်သွားသည်ကို တွေ့လိုက်ရပြီး ကျန်းယွဲ့ နောက်သို့ တစ်လှမ်း ဆုတ်လိုက်သည်နှင့် ချက်ချင်းပင် အရိပ်ထဲသို့ ကျွံဝင်သွားလေသည်။

ထို့နောက် သူသည် အရိပ်များ၏ ရစ်ပတ်ခြင်းကို ချက်ချင်း ခံလိုက်ရပြီး ထိုအရိပ်များသည် မရေမတွက်နိုင်သော အမှောင် စပါးအုံးမြွေကြီးများအလား သူ၏ ခန္ဓာကိုယ်ကို အတင်းအဓမ္မ ဝါးမျိုကာ အရိပ်ထဲတွင် ဖမ်းလှောင်ထားလိုက်သည်။

ကျန်းယွဲ့သည် မည်သို့ပင် ရုန်းကန်နေပါစေ ထိုအရိပ်ထဲမှ လွတ်မြောက်အောင် မခုန်ထွက်နိုင်တော့ပေ။

သူ၏ မျက်နှာမှာ အလွန်တရာ အရုပ်ဆိုး အကျည်းတန်သွားပြီး "စစ်တပ်နှစ်ခု ရင်ဆိုင်ရာမှာ သံတမန်ကို မသတ်ရဘူးဆိုတဲ့ စည်းကမ်း ရှိတယ်လေ... လင်းယွမ်... မင်းက ဒီလောက် စည်းကမ်းကိုတောင် နားမလည်ဘူးလား" ဟု အော်ဟစ်လိုက်သည်။

လင်းယွမ်က အေးစက်စွာ ရယ်မောလိုက်ပြီး "မင်းတို့လူတွေက ငါ့လက်အောက်ငယ်သားကို ခိုးကြောင်ခိုးဝှက် တိုက်ခိုက်ပြီးမှ... အခု ငါ့ကို လာပြီး စည်းကမ်းတွေ အကြောင်း ပြောနေတာလား" ဟု ဆိုလိုက်သည်။

"မင်း ဒီမှာ ကြွားလုံးထုတ်ပြီး မောက်မာနေတာ နှစ်ရက်ရှိသွားပြီ မဟုတ်လား... ဂျိမ်းစ်ကို ဖမ်းထားတာနဲ့ ခိုက်ရီနည်းပညာကို အပိုင်စီးနိုင်ပြီလို့ တကယ် ထင်နေတာလား"

"ငတုံး... မင်း မလာခင်က ခိုက်ရီနည်းပညာမှာ အခု ဘယ်သူက ဆုံးဖြတ်ချက်ချနေလဲဆိုတာကို စုံစမ်းမကြည့်ဘူးလား"

"ဒီလိုနည်းလမ်းသုံးပြီး ပူးပေါင်းဖို့ ခြိမ်းခြောက်ရဲသေးတယ်... ဟက်ဟက်... အစကတော့ မင်းတို့နဲ့ နတ်ဘုရားနိုင်ငံတော်တို့ ကြားက စစ်ပွဲကို ငါ စိတ်မဝင်စားခဲ့ပါဘူး"

"ဒါပေမဲ့ အခု ကြည့်ရတာတော့ မင်းတို့လို လူစုနဲ့ ပူးပေါင်းမယ့်အစား နတ်ဘုရားနိုင်ငံတော်နဲ့ ပူးပေါင်းတာက ပိုကောင်းလိမ့်မယ်"

ကျန်းယွဲ့၏ မျက်နှာ ချက်ချင်း ပြောင်းလဲသွားပြီး အံ့သြမှုနှင့် ဒေါသတို့ ရောယှက်ကာ "မင်း လုပ်ရဲလား" ဟု အော်ဟစ်လိုက်သည်။

"နတ်ဘုရားနိုင်ငံတော်ဆိုတာ မိစ္ဆာဂိုဏ်းအဖွဲ့အစည်းပဲ... မင်းတို့က ဒီလိုအဖွဲ့အစည်းနဲ့ မဟာမိတ်ဖွဲ့ရင် မင်းတို့လည်း မိစ္ဆာဂိုဏ်းရဲ့ လုပ်ရပ်ကို လုပ်တာပဲ"

"ငါတို့ ကျင်းကျိုးစစ်တပ်က နိုင်ငံတော်ကို ကိုယ်စားပြုတာ... မင်းတို့က ပုန်ကန်ချင်နေတာလား"

လင်းယွမ်က မအောင့်နိုင်ဘဲ ရယ်မောလိုက်ပြီး "အကုန်လုံး အဓိပ္ပာယ်မရှိတဲ့ စကားတွေချည်းပဲ... မင်း ငါ့ကို ပြောစမ်းပါဦး... အခုချိန်မှာ နိုင်ငံတော် ဆိုတာ ရှိသေးလို့လား... ဒီ ရေပေါ်ကျွန်းတွေ၊ လေပေါ်ကျွန်းတွေမှာ ပိုင်ဆိုင်ခွင့် ဆိုတာ ရှိသေးလို့လား" ဟု ပြောလိုက်သည်။

"နောက်ပြီး မင်းတို့က နိုင်ငံတော်ကို ကိုယ်စားပြုနိုင်တယ် ဟုတ်လား... ငါကတောင် နိုင်ငံတော်ကို ကိုယ်စားပြုတယ်လို့ ပြောလို့ရသေးတယ်... မင်းတို့က ဘာများ အရေးပါလို့လဲ"

ဆက်ရန်...

အပိုင်း(၉၃၂) စေ့စပ်ဆွေးနွေးခြင်း

"မင်း... ခွေးမသား ရဲတင်းလှချည်လား... ဒီလိုစကားမျိုး ပြောထွက်ရဲတယ်ပေါ့"

"မင်းတို့လို အရပ်ဘက် ခိုလှုံရေးစခန်းလေးကများ နိုင်ငံတော်ကို ကိုယ်စားပြုတယ်လို့ ပြောရဲသေးတယ်... မင်းတို့က ထိုက်တန်လို့လား"

ကျန်းယွဲ့က အမျက်ဒေါသထွက်ကာ ချက်ချင်း အော်ငေါက်လိုက်သည်။

၎င်းက ကျင်းကျိုးစစ်တပ်အတွက် ဂုဏ်သိက္ခာဆယ်ခြင်း ဖြစ်ပြီး၊ သူတို့သာလျှင် နိုင်ငံတော်၏ တရားဝင်အာဏာပိုင်များ ဖြစ်သည်။

သို့သော် လင်းယွမ်ကမူ ပေါ့ပေါ့ပါးပါးပင် အေးစက်စွာ ပြုံးလိုက်ပြီး "ငါတို့က အရပ်ဘက် ခိုလှုံရေးစခန်းပါလို့ ဘယ်သူက ပြောလဲ"

"လင်ကျန်းမြို့မှာလည်း စစ်ဒေသရှိတယ်ဆိုတာ မင်း မသိဘူးလား"

ကျန်းယွဲ့၏ မျက်လုံးအိမ်များ ကျဉ်းမြောင်းသွားပြီး အံ့သြဒေါသတကြီးဖြင့် မေးလိုက်သည်။ "မင်းတို့က လင်ကျန်းမြို့ ကွမ်ဖူစစ်ဒေသကလား"

လင်းယွမ်က ဂရုမစိုက်ဘဲ အပိုစကားများ မပြောတော့ဘဲ လက်ဝှေ့ယမ်းပြလိုက်သည်။ "စလိုက်တော့"

"မော်လီ... ငါပဲ လုပ်လိုက်မယ်"

ဘေးနားရှိ ဂျက်ခ်က ခက်ထန်စွာ ရယ်မောလိုက်ပြီး သူ၏ခန္ဓာကိုယ်က ချက်ချင်း ခုန်အုပ်လာသည်။

ကျန်းယွဲ့၏ မျက်လုံးများ ကျဉ်းမြောင်းသွားပြီး အော်ဟစ်လိုက်သည်။ "အားလုံးက စစ်တပ်ကလူတွေချည်းပဲ... ဒီလောက်ထိ ရက်ရက်စက်စက် လုပ်ဖို့ မလိုပါဘူးကွ"

"လင်းယွမ်... ငါတို့ ကျင်းကျိုးစစ်တပ်က တခြား စစ်ဒေသကြီးတွေနဲ့ ဆက်သွယ်နေတယ်... နိုင်ငံတော်ရဲ့ စည်းမျဉ်းစည်းကမ်းတွေကို ပြန်လည်တည်ဆောက်ပြီး နိုင်ငံတော်ရဲ့ ကြီးကျယ်ခမ်းနားမှုကို ပြန်လည်ယူဆောင်လာချင်လို့ပါ"

"မင်းက ကွမ်ဖူစစ်ဒေသက ဖြစ်နေမှတော့ အရပ်ဘက်အဖွဲ့အစည်းတွေနဲ့ ဘာလို့ လာပြီး ရောနှောနေရတာလဲ"

"အားလုံး အတူတူ ပူးပေါင်းပြီး နတ်ဘုရားနိုင်ငံတော်ကို သိမ်းပိုက်ကြမယ်... အဲ့ဒီနောက် ကျန်းနန်ပြည်နယ်နဲ့ ယွီကျိုးပြည်နယ်က မင်းတို့အပိုင်း... ကျင်းကျိုးဘက်က ငါတို့အပိုင်း... တစ်ယောက်နဲ့တစ်ယောက် အနှောင့်အယှက်မပေးဘဲ ဒီရေလွှမ်းမိုးနေတဲ့ ကမ္ဘာကြီးကို အတူတကွ အုပ်ချုပ်ကြရင် ပိုမကောင်းဘူးလား"

သူက တကယ်ကို လျှာသွက်ပြီး စကားပြောကောင်းလွန်းလှသည်။

အကယ်၍ လင်းယွမ်သာ ကွမ်ဖူစစ်ဒေသက လူစစ်စစ်ဖြစ်နေမည်ဆိုလျှင် သူ တကယ်ပဲ တွေဝေသွားလောက်သည်။

သို့သော် ဝမ်းနည်းစရာကောင်းသည်မှာ လင်းယွမ်က ထိုသူမျိုး မဟုတ်ပေ။

သူက ကွမ်ဖူစစ်ဒေသက လူမဟုတ်သည့်အပြင် ကွမ်ဖူစစ်ဒေသကို ဖျက်ဆီးပစ်ခဲ့သူပင် ဖြစ်သည်။

သေချာသည်မှာ ကျန်းယွီကျန်းနှင့် ဖုန်းကျန့်ကုန်းတို့က သူ့လက်အောက်တွင် အလုပ်လုပ်နေဆဲ ဖြစ်သောကြောင့် လင်းယွမ်အနေဖြင့် ကွမ်ဖူစစ်ဒေသဟူသော အမည်နာမကို သူ၏ ထိုက်ယန်တောင် ခိုလှုံရေးစခန်းအတွက် အတင်းအဓမ္မ တပ်ဆင်ယူမည်ဆိုလျှင်လည်း မရနိုင်စရာ အကြောင်းမရှိပေ။

သို့သော် လင်းယွမ်က ဤကျန်းယွဲ့၏ မောက်မာရိုင်းစိုင်းသော ပုံစံကို မျက်စိနောက်နေသလို၊ ကျင်းကျိုးစစ်တပ်၏ လုပ်ရပ်များကိုလည်း ပို၍ အမြင်ကတ်နေခြင်း ဖြစ်သည်။

ပူးပေါင်းချင်တယ်ဆိုရင် ပွင့်ပွင့်လင်းလင်း လာဆွေးနွေးလို့ မရဘူးလား။

အရင်ဆုံး ခိုးကြောင်ခိုးဝှက် တိုက်ခိုက်ပြီးမှ ခြိမ်းခြောက်ဖို့ လုပ်နေရသလား။

လင်းယွမ် သဘောတူမည်ဆိုလျှင် ထူးဆန်းနေပေလိမ့်မည်။

ဤကိစ္စ၏ အဓိက အကြောင်းရင်းမှာ ကျင်းကျိုးစစ်ဒေသမှ လူများသည် ခိုက်ရီနည်းပညာ သာမက တောင်ပိုင်းရှိ ခိုလှုံရေးစခန်း အဖွဲ့အစည်းများ အားလုံးကို အရေးမစိုက်ခြင်းပင် ဖြစ်သည်။

ခိုက်ရီနည်းပညာကို အလွယ်တကူ ခြယ်လှယ်နိုင်သည်ဟု ထင်နေကြပြီး ပူးပေါင်းဆောင်ရွက်ရန် အရည်အချင်းမရှိဟု သတ်မှတ်ထားကြသည်။

ထို့ကြောင့်ပင် ဂျိမ်းစ်ကို တိုက်ရိုက် ဝင်ဖမ်းသွားပြီးနောက် ခြိမ်းခြောက် အကျပ်ကိုင်ရန် ထွက်လာခဲ့ကြခြင်း ဖြစ်သည်။

ဂျက်ခ်က လင်းယွမ်ကို တစ်ချက် လှမ်းကြည့်လိုက်ပြီး လင်းယွမ်က ဂရုမစိုက်သည်ကို မြင်သောအခါ ချက်ချင်း ခက်ထန်စွာ ရယ်မောလိုက်ကာ ကျန်းယွဲ့ရှေ့သို့ လျင်မြန်စွာ ရောက်ရှိလာသည်။

လက်တစ်ဖက်ဖြင့် ကျန်းယွဲ့၏ လည်ပင်းကို အတင်းဆွဲညှစ်လိုက်ပြီး ပါးစပ်ဟကာ သူ၏ သွေးများကို စုပ်ယူရန် ပြင်လိုက်သည်။

ကျန်းယွဲ့၏ မျက်နှာမှာ ချက်ချင်း ဖြူရော်သွားပြီး သူ့ရှေ့မှ လင်း ဆိုသောလူက သူ့ကို တကယ်သတ်မည်ဆိုတာ သတိထားမိလိုက်သည်။

တစ်ဖက်လူက သူ့ကို ခြောက်လှန့်နေသည့် အရိပ်အယောင် အနည်းငယ်မျှပင် မရှိပေ။

သူ ကပျာကယာ အော်ဟစ်လိုက်သည်။ "ဆရာလင်း... ဆရာလင်း... အားလုံးက စစ်တပ်ကလာတဲ့သူတွေချည်းပါပဲ... ကျွန်တော်တို့ ကျင်းကျိုးစစ်တပ်မှာ ခင်ဗျား သိတဲ့ လုပ်ဖော်ကိုင်ဖက်ဟောင်းတွေလည်း ရှိနိုင်တာပဲလေ... ကျွန်တော်တို့ ဒီလောက်ထိ တင်းမာနေဖို့ မလိုပါဘူး"

ဤကမ္ဘာကြီးက ကြီးမားသော လူမှုဆက်ဆံရေး အသိုင်းအဝိုင်းကြီး တစ်ခုပင် ဖြစ်သည်။

အထူးသဖြင့် နိုင်ငံတော်တွင် ဖြစ်သည်။

စစ်ဘက်လုပ်ဖော်ကိုင်ဖက် ဆက်ဆံရေးဆိုသည်မှာ လူမှုဆက်ဆံရေးများစွာထဲတွင် အခိုင်မာဆုံးသော ဆက်ဆံရေးမျိုး ဖြစ်သည်။

ကပ်ဘေးမတိုင်မီက မည်သည့်မြို့ သို့မဟုတ် မည်သည့်ခရိုင်တွင်မဆို အငြိမ်းစား စစ်မှုထမ်းများဖြင့် ဖွဲ့စည်းထားသော အဖွဲ့အစည်းများကို တွေ့မြင်နိုင်ပေသည်။

အထူးသဖြင့် အခြေခံလူတန်းစားများကြားတွင် ဤဆက်ဆံရေး ကွန်ရက်က ပို၍ပင် နီးကပ်လှသည်။

ယခု ကပ်ဘေးကြီး ရောက်ရှိလာပြီး စည်းကမ်းစနစ်များ ပြိုလဲသွားချိန်တွင် ဤလူစုက သဘာဝကျကျပင် အတက်ကြွဆုံး အဖွဲ့အစည်း ဖြစ်လာကြပေသည်။

လင်းယွမ်က ဂရုမစိုက်ဘဲ ဂျက်ခ်အား ပြောလိုက်သည်။ "ဂျက်ခ်... မင်းရဲ့ သွေးကျေးကျွန် အစွမ်း ငါ့ကို ပြစမ်းပါဦး"

ဂျက်ခ်က ချက်ချင်း ခက်ထန်စွာ ရယ်မောလိုက်ပြီး "ဆရာလင်း စိတ်ပျက်စေရပါဘူးဗျာ"

ထိုသို့ပြောပြီးနောက် သူ ပါးစပ်ဟလိုက်ရာ ချွန်ထက်သော သွားများ ထွက်ပေါ်လာပြီး ကျန်းယွဲ့ဆိုသော စစ်သား၏ ကိုယ်ပေါ်သို့ အားကုန် ကိုက်ချလိုက်သည်။

ကျန်းယွဲ့ထံမှ နာကျင်စွာ ညည်းတွားသံ တစ်ချက် ထွက်ပေါ်လာပြီးနောက် သူ၏ မျက်လုံးနှစ်လုံးမှာ မျက်စိရှေ့တွင်ပင် လျင်မြန်စွာ နီရဲလာတော့သည်။

သူ၏ ခန္ဓာကိုယ် တစ်ခုလုံးသည်လည်း လျင်မြန်စွာ တွန့်လိမ်ခြောက်ကပ်သွားလေသည်။

မကြာမီမှာပင် အရေခွံနှင့် အရိုးသာ ကျန်တော့သည့် လူခြောက်ကြီး တစ်ကောင်အဖြစ် လုံးဝ ပြောင်းလဲသွားပြီး ရေဓာတ်အားလုံး ခန်းခြောက်သွားသော သေကောင်ခြောက်ကြီး တစ်ခုအလား ဖြစ်သွားသည်။

သို့သော် ဂျက်ခ်က ပါးစပ်ကို ဖောင်းလိုက်ပြီး ထိုသေကောင်ခြောက်ကြီးထံသို့ လေမှုတ်သွင်းလိုက်သည်။

နောက်တစ်ခဏတွင် မူလက ခြောက်ကပ်နေသော ခန္ဓာကိုယ်ကြီးမှာ မျက်စိရှေ့တွင်ပင် လျင်မြန်စွာ ပြန်လည် ဖောင်းကားလာတော့သည်။

အချိန်ခဏလေးအတွင်းမှာပင် ကျန်းယွဲ့မှာ မူလပုံစံအတိုင်း ပြန်ဖြစ်သွားလေသည်။

သူ၏ မျက်လုံးနှစ်လုံး ရုတ်တရက် ပွင့်လာပြီး မျက်နှာပေါ်တွင် သွေးရောင်မရှိသည်မှလွဲ၍ ယခင်ပုံစံနှင့် တစ်ပုံစံတည်း ဖြစ်နေလေသည်။

ဂျက်ခ်က မတ်တတ်ရပ်လိုက်ပြီး သူ့ရှေ့ရှိ ကျန်းယွဲ့ကို ကျေနပ်အားရစွာ ကြည့်ရှုရင်း ရယ်မောလိုက်သည်။ "မဆိုးဘူး... ဒီကောင်က ခန္ဓာကိုယ်ကြံ့ခိုင်မှု အမျိုးအစား အစွမ်းပိုင်ရှင်ဆိုတော့ သွေးအားပြည့်ဝပြီး အတော်ကောင်းတဲ့ သွေးကျေးကျွန်ပဲ"

ကျန်းယွဲ့၏ မျက်နှာမှာ ဖြူရော်နေပြီး ယခု မျက်လုံးပွင့်လာချိန်တွင် ဂျက်ခ်အား ကြည့်လိုက်သော မျက်ဝန်းများထဲ၌ ကြောက်ရွံ့မှုများနှင့် လေးစားကြောက်ရွံ့မှုများ ပြည့်နှက်နေသည်။

"မင်း... မင်း..."

"သခင် လို့ မခေါ်သေးဘူးလား" ဂျက်ခ်က အေးစက်စွာ အော်ငေါက်လိုက်သည်။

ကျန်းယွဲ့၏ ရင်ထဲတွင် လုံးဝ ဖီဆန်၍မရနိုင်သော ကြောက်မက်ဖွယ် နာခံချင်စိတ်များ ဖြစ်ပေါ်လာပြီး သွေးကြောထဲမှနေ၍ တစ်ဖက်လူ၏ ဖိနှိပ်ချုပ်ချယ်မှုကို ခံလိုက်ရသကဲ့သို့ ဖြစ်နေသည်။

တစ်ဖက်လူက စိတ်ထဲမှ တစ်ချက်လေး တွေးလိုက်ရုံဖြင့် သူ ချက်ချင်း သေဆုံးသွားနိုင်သကဲ့သို့ ခံစားရသဖြင့် မည်သည့် ဖီဆန်မှုမျိုးကိုမျှ မလုပ်ရဲတော့ပေ။

"မင်း... မင်း ဘာလုပ်လိုက်တာလဲ... ငါ့ကို ဘာလုပ်လိုက်တာလဲ" သူက ကြောက်ရွံ့မှုကို အတင်းဖိနှိပ်ကာ ထိတ်လန့်တကြား မေးလိုက်သည်။

လင်းယွမ်သည်လည်း ဂျက်ခ်ကို စိတ်ဝင်တစား လှမ်းကြည့်လိုက်သည်။ သူ ဂျက်ခ်၏ သွေးကျေးကျွန် အစွမ်း အသုံးပြုသည်ကို ပထမဆုံးအကြိမ် မြင်ဖူးခြင်း ဖြစ်သည်။

ဂျက်ခ်က ခေါင်းငုံ့ကာ အေးစက်စွာ ရယ်မောလိုက်သည်ကို တွေ့လိုက်ရသည်။ "မင်းကို ငါက သွေးကျေးကျွန် အမှတ်အသား ထည့်သွင်းလိုက်ပြီ... အခု မင်းခန္ဓာကိုယ်ထဲမှာ စီးဆင်းနေတဲ့ သွေးတစ်စက်ချင်းစီတိုင်းက ငါ ပေးသနားထားတာတွေချည်းပဲ"

"ငါ စိတ်ထဲကနေ တစ်ချက်လေး တွေးလိုက်ရုံနဲ့ မင်း ချက်ချင်း သေသွားလိမ့်မယ်"

ကျန်းယွဲ့၏ မျက်နှာမှာ ချက်ချင်း ဖြူရော်သွားပြီး ရင်ထဲတွင်လည်း သေမတတ် ခံစားသွားရတော့သည်။

လင်းယွမ်က ထိုမြင်ကွင်းကို ကြည့်ပြီး အံ့သြချီးကျူးမိသွားသည်။

ဂျက်ခ်၏ ဤသွေးကျေးကျွန် အစွမ်းက သူ၏ ဝိညာဉ် ချုပ်နှောင်ခြင်း သင်္ကေတနှင့် အတော်လေး ဆင်တူနေသည်။

သို့သော် ကွာခြားချက်မှာ ဝိညာဉ် ချုပ်နှောင်ခြင်း သင်္ကေတက ဝိညာဉ်ကို ပစ်မှတ်ထားခြင်း ဖြစ်ပြီး၊ ဂျက်ခ်၏ သွေးကျေးကျွန် အစွမ်းကမူ ရုပ်ခန္ဓာကို သိသိသာသာ ပစ်မှတ်ထားခြင်း ဖြစ်သည်။

ဂျက်ခ်က တစ်ဖက်လူ၏ ခန္ဓာကိုယ် လုပ်ဆောင်ချက်များကို ထိန်းချုပ်နိုင်ပြီး အချိန်မရွေး အသက်ကို သတ်ပစ်နိုင်စွမ်း ရှိသည်။

သို့သော် ဝိညာဉ် စိတ်ဆန္ဒကို ထိန်းချုပ်နိုင်မှုကတော့ ထိုမျှလောက် အားမကောင်းသည့်ပုံရသည်။

အနည်းဆုံးတော့ ကျန်းယွဲ့မှာ ပြန်လည်ခုခံချင်သော စိတ်ဆန္ဒ ရှိနေသေးပြီး ဂျက်ခ်ကို နာကြည်းရမှန်း သိနေသေးသည်။

ပြန်မခုခံရဲခြင်းသာ ဖြစ်သည်။

သို့သော် ဝိညာဉ် ချုပ်နှောင်ခြင်း သင်္ကေတကမူ ရန်သူ၏ ဝိညာဉ် စိတ်ဆန္ဒပေါ်သို့ တိုက်ရိုက် သက်ရောက်စေပြီး၊ တစ်ဖက်လူ၏ တွေးခေါ်ပုံကို အတင်းအဓမ္မ ပြောင်းလဲစေကာ မိမိစကားကို အကြွင်းမဲ့ နာခံစေခြင်း ဖြစ်သည်။

၎င်းတို့နှစ်ခု၏ ရန်သူကို ထိန်းချုပ်သည့် နည်းလမ်းများ မတူညီကြသော်လည်း၊ ယုံမှားသံသယဖြစ်စရာ မလိုအောင်ပင် နှစ်ခုစလုံးက အလွန် ကြောက်မက်ဖွယ်ကောင်းသော အစွမ်းများ ဖြစ်ကြသည်။

"ဂျက်ခ်... သူ့ကို ခေါ်သွားပြီး ကျင်းကျိုးစစ်တပ်ကလူတွေ တကယ် ဘယ်မှာ ပုန်းနေကြလဲဆိုတာ သေချာ စစ်မေးလိုက်စမ်း"

"ကျင်းကျိုးစစ်တပ်ရဲ့ နေရာကို အမြန်ဆုံး ရှာဖွေပြီး ဂျိမ်းစ်ကို ကယ်ထုတ်ရမယ်"

ဂျက်ခ်က ချက်ချင်း ခေါင်းညိတ်လိုက်သည်။ "ဟုတ်ကဲ့... ဆရာလင်း"

လင်းယွမ်က မော်လီဘက်သို့ လှည့်ကြည့်ကာ ပြောလိုက်သည်။ "မော်လီ... မင်း နတ်ဘုရားနိုင်ငံတော်က လူတွေနဲ့ အဆက်အသွယ်ရအောင် နည်းလမ်းရှာပြီး စစ်တပ်က ငါတို့နဲ့ လာဆက်သွယ်နေတယ် ဆိုတာကို သူတို့ကို ပြောပြလိုက်"

မော်လီက သံသယဖြင့် မေးလိုက်သည်။ "ဆရာလင်း... သူတို့ကို ဘာလုပ်ဖို့ ရှာခိုင်းတာလဲ"

လင်းယွမ်က တည်ငြိမ်စွာ ပြောလိုက်သည်။ "နတ်ဘုရားနိုင်ငံတော်က ခုတလော တောင်ဘက်ကို ဆင်းလာနေတာ... မင်းတို့နဲ့လည်း အကြိမ်တချို့ ပွတ်တိုက်မှုတွေ ရှိခဲ့တယ်မလား"

"အခု သူတို့ကို ကျင်းကျိုးဘက်က လူတွေက ငါတို့ကို လာပြီး စည်းရုံးနေပြီလို့ ပြောလိုက်ရင်... သူတို့ စိုးရိမ်မသွားလောက်ဘူးလား"

"သူတို့သာ ဉာဏ်ကောင်းမယ်ဆိုရင် ငါတို့နဲ့ မဟာမိတ်ဖွဲ့ဖို့ လူလွှတ်ပြီး ချက်ချင်း လာဆက်သွယ်လိမ့်မယ်"

"အင်းပေါ့... သူတို့လည်း ကျင်းကျိုးစစ်တပ်လိုပဲ ငါတို့ကို အထင်သေးမယ်ဆိုရင်တော့ ငါတို့ကို တိုက်ရိုက် ဝင်တိုက်ဖို့ပဲ များတယ်"

"ဒါပေမဲ့ အဲ့ဒီလို ဖြစ်နိုင်ချေကတော့ နည်းပါတယ်... ငါတို့နဲ့ လာပြီး မဟာမိတ်ဖွဲ့ဖို့က ပိုများပါတယ်"

"အဲ့ဒီအချိန်ကျရင် သူတို့ ဘယ်လို စည်းကမ်းချက်တွေ ကမ်းလှမ်းလာနိုင်မလဲ ဆိုတာ ကြည့်ရသေးတာပေါ့"

မော်လီက သဘောပေါက်သွားပြီး အလျင်အမြန် ခေါင်းညိတ်လိုက်သည်။ "နားလည်ပါပြီ ဆရာလင်း... နတ်ဘုရားနိုင်ငံတော်က လူတွေနဲ့ သွားရောက်ဆက်သွယ်ဖို့ လူကို ချက်ချင်း လွှတ်လိုက်ပါ့မယ်"

လင်းယွမ်က ခေါင်းညိတ်လိုက်သည်။ "သွားတော့"

မော်လီနှင့် ဂျက်ခ်တို့ ထွက်သွားပြီးနောက်မှ လင်းယွမ်က ဖြည်းညင်းစွာ ထိုင်ချလိုက်သည်။

သူ မျက်လုံးများကို မှိတ်ကာ တိတ်ဆိတ်စွာဖြင့် အာရုံခံလိုက်သည်။

"ငါ ထည့်သွင်းထားတဲ့ ဝိညာဉ် ချုပ်နှောင်ခြင်း သင်္ကေတ တိုင်းရဲ့ တိကျတဲ့ နေရာကို ငါ အာရုံခံနိုင်တယ်"

"မင်းတို့တွေ တကယ် ဘယ်မှာ ပုန်းနေကြလဲဆိုတာ ငါ ကြည့်ရသေးတာပေါ့"

သူက စိတ်စွမ်းအင်များကို ထုတ်လွှတ်လိုက်ပြီး ဂျိမ်းစ်၏ ခန္ဓာကိုယ်ထဲရှိ ဝိညာဉ် ချုပ်နှောင်ခြင်း သင်္ကေတကို အာရုံခံလိုက်သည်။

သို့သော် ခဏအကြာတွင် လင်းယွမ် မျက်မှောင်ကြုတ်သွားသည်။

"မရှိဘူးလား"

သူ ခဏကြာအောင် အာရုံခံကြည့်သော်လည်း ဝိညာဉ် ချုပ်နှောင်ခြင်း သင်္ကေတ၏ မည်သည့် လှိုင်းတုန်ခါမှုကိုမျှ မခံစားရပေ။

လင်းယွမ်က မျက်မှောင်အနည်းငယ် ကြုတ်လိုက်ပြီး တစ်စုံတစ်ရာကို ချက်ချင်း တွေးမိသွားသည်။

"စွမ်းအင်ချိတ်ပိတ် အစီအရင်"

"ဟုတ်သားပဲ... ဂျိမ်းစ်က သူတို့ရဲ့ ချိတ်ပိတ် သင်္ကေတနဲ့ ခန္ဓာကိုယ်ကို ချိတ်ပိတ်ခံထားရလို့ ခန္ဓာကိုယ်ထဲက ဘယ်သန္ဓေပြောင်းစွမ်းအင်မှ လည်ပတ်ယိုစိမ့်လို့ မရတာဖြစ်မယ်"

"ငါ့ရဲ့ ဝိညာဉ် ချုပ်နှောင်ခြင်း သင်္ကေတကလည်း အဲ့ဒီ ချိတ်ပိတ် သင်္ကေတကြောင့် သူ့ခန္ဓာကိုယ်ထဲမှာ ပိတ်လှောင်ခံထားရလို့ တိကျတဲ့နေရာကို အာရုံခံလို့ မရဖြစ်နေတာပဲ"

လင်းယွမ်က မျက်မှောင်အနည်းငယ် ကြုတ်ကာ တွေးတောလိုက်သည်။

"ဒီကျန်းယွဲ့ရဲ့ ပါးစပ်ကနေ ကျင်းကျိုးကလူတွေ ပုန်းနေတဲ့နေရာကို အတင်းအကျပ် စစ်မေးရုံကလွဲပြီး တခြားနည်း မရှိတော့ဘူးလား"

လင်းယွမ် စဉ်းစားနေရင်း ရုတ်တရက် အကြံတစ်ခု ထွက်ပေါ်လာသည်။

သူက ချက်ချင်း မတ်တတ်ထရပ်လိုက်ပြီး အော်ခေါ်လိုက်သည်။ "လာကြစမ်း"

"ရှိပါတယ်"

"ဂျက်ခ်ကို ဟိုကျန်းယွဲ့ ပြန်ခေါ်လာခဲ့ဖို့ ပြောလိုက်"

"ဟုတ်ကဲ့ပါ"

မကြာမီမှာပင် ဂျက်ခ်က ကျန်းယွဲ့ကို နောက်တစ်ကြိမ် ပြန်လည် ခေါ်ဆောင်လာခဲ့သည်။

သို့သော် ကျန်းယွဲ့၏ ခန္ဓာကိုယ်ပေါ်တွင် ဒဏ်ရာတချို့ ရရှိနေပြီ ဖြစ်ကြောင်း တွေ့မြင်နိုင်သည်။

ဂျက်ခ်က မေးလိုက်သည်။ "ဆရာလင်း... ကျွန်တော် သူ့ကို ကျင်းကျိုးစစ်တပ်ကလူတွေရဲ့ နေရာကို အတင်းစစ်မေးတော့မလို့... ဆရာလင်းက သူ့ကို တွေ့ချင်လို့လား"

လင်းယွမ်က မေးလိုက်သည်။ "တစ်ခုခု မေးလို့ ရပြီလား"

ဂျက်ခ်က ခေါင်းခါယမ်းလိုက်သည်။ "ဒီကောင် ပါးစပ်မဟသေးဘူးဗျ"

ဘေးနားရှိ ကျန်းယွဲ့က အံကိုကြိတ်ကာ ခေါင်းမော့လာပြီး လင်းယွမ်နှင့် ဂျက်ခ်တို့ကို ဒေါသတကြီး စိုက်ကြည့်ရင်း ပြောလိုက်သည်။ "ငါ သုံးရက်အတွင်း ပြန်မရောက်ရင် ငါတို့လူတွေက မင်းတို့ရဲ့ သဘောထားကို သေချာပေါက် သိသွားလိမ့်မယ်... အဲ့ဒီအချိန်ကျရင် စစ်ကြေညာစရာမလိုဘဲ တိုက်ပွဲဖြစ်ပြီပဲ"

"မင်းတို့ ဂျိမ်းစ်ကို ကယ်ထုတ်ဖို့ဆိုတာ စိတ်ကူးတောင် မယဉ်နဲ့"

"ဆရာလင်း... ခင်ဗျား ကျွန်တော့်ကို လွှတ်ပေးလိုက်ပါ... ကျွန်တော် ပြန်သွားပြီး ကျွန်တော်တို့ တပ်ရင်းမှူးနဲ့ တိုင်ပင်ပေးလို့ ရပါတယ်... အားလုံးက စစ်တပ်ကလာတဲ့သူတွေချည်းပဲ ဆိုတော့ ပူးပေါင်းဖို့ အခြေခံတော့ ရှိနေပါသေးတယ်"

ပြောရမည်ဆိုလျှင် ဤကျန်းယွဲ့၏ စိတ်ဓာတ်ခိုင်မာမှုက အလွန် အားကောင်းလှသည်။ ဤအချိန်ရောက်နေသည်အထိ လင်းယွမ်အား ကျင်းကျိုးနှင့် ပူးပေါင်းရန် စည်းရုံးဖို့ ကြိုးစားနေဆဲ ဖြစ်သည်။

လင်းယွမ်က သူ့ကို အေးစက်စက် တစ်ချက် ကြည့်လိုက်ပြီး ပြောလိုက်သည်။ "မင်း ပြောနေစရာ မလိုပါဘူး... ငါက မင်းတို့လူတွေကို ရှာတွေ့နိုင်ပါတယ်"

ထိုစကားကို ပြောလိုက်စဉ် သူ၏ မျက်လုံးအိမ်များမှာ ထူးဆန်းနက်ရှိုင်းလာတော့သည်။

အညိုရောင် မျက်တောင်များမှာ ပယင်းရောင်သို့ လျင်မြန်စွာ ပြောင်းလဲသွားပြီး၊ လင်းယွမ်၏ အမြင်အာရုံထဲတွင် ပတ်ဝန်းကျင် ရှုခင်းများမှာ မူလအရောင်အသွေးများ ပျောက်ကွယ်သွားကာ အဖြူအမည်းအဖြစ်သို့ ပြောင်းလဲသွားလေသည်။

ဤအဖြူအမည်း ကမ္ဘာကြီးထဲတွင် ရေတွက်၍မရနိုင်သော မျဉ်းကြောင်းများက ယှက်နွယ်ကူးလူးနေကြသည်။

၎င်းတို့မှာ အကြောင်းအကျိုး မျဉ်းကြောင်းများပင် ဖြစ်သည်။

အကျိုးဆက်မျို နဂါးလင်းနို့ မျိုးရိုးဗီဇမျိုးစေ့ကို အသက်သွင်းလိုက်ပြီ ဖြစ်ရာ၊ လင်းယွမ်၏ နည်းလမ်းမှာလည်း အလွန် ရိုးရှင်းလှသည်။

တစ်ဖက်လူ၏ ကိုယ်ပေါ်ရှိ အကြောင်းအကျိုး မျဉ်းကြောင်းများကို တိုက်ရိုက် အသုံးပြုကာ တစ်ဖက်လူ၏ ပုန်းခိုရာနေရာကို ရှာဖွေခြင်းပင်။

ဤကျန်းယွဲ့က စစ်တပ်မှ စေလွှတ်လိုက်သော တမန်တော်ဖြစ်ရာ၊ သူ၏ ခန္ဓာကိုယ်ပေါ်တွင် ကျင်းကျိုးစစ်တပ်နှင့် အလွန်နက်ရှိုင်းသော အကြောင်းအကျိုး ဆက်နွယ်မှု သေချာပေါက် ရှိနေမည် ဖြစ်သည်။

သူ့ကိုယ်ပေါ်ရှိ အကြောင်းအကျိုး မျဉ်းကြောင်းများ၏ ဆက်နွယ်နေသော လမ်းကြောင်းကို ရှာတွေ့နိုင်သည်နှင့် ကျင်းကျိုးစစ်တပ်၏ နေရာကို ရှာဖွေရန်မှာ လက်တစ်ဖက် လှန်ရသကဲ့သို့ လွယ်ကူလှပေသည်။

"ဂျိမ်းစ်က ချိတ်ပိတ် သင်္ကေတနဲ့ ပိတ်လှောင်ခံထားရလို့ ဝိညာဉ် ချုပ်နှောင်ခြင်း သင်္ကေတကို အာရုံခံလို့ မရပေမဲ့... မင်း ကိုယ်ပေါ်မှာတော့ ချိတ်ပိတ် သင်္ကေတ မရှိဘူးလေ... အကြောင်းအကျိုး မျဉ်းကြောင်း မရှိဖို့ဆိုတာ မဖြစ်နိုင်ဘူး"

"မင်းနောက်ကွယ်က အဖွဲ့အစည်းက တကယ် ဘယ်မှာ ပုန်းနေလဲဆိုတာ ငါ ကြည့်ရသေးတာပေါ့"

လင်းယွမ်၏ အကြည့်များက ကျန်းယွဲ့၏ ကိုယ်ပေါ်သို့ တိုက်ရိုက် ကျရောက်သွားသည်။

သူ၏ ကိုယ်ပေါ်တွင် အကြောင်းအကျိုး မျဉ်းကြောင်းများ ယှက်နွယ်ကူးလူးနေပြီး အလွန် ရှုပ်ထွေးနေသည်ကို တွေ့လိုက်ရသည်။

သို့သော် ထိုအထဲမှ မျဉ်းကြောင်း အများစုကြီးမှာ အဝေးရှိ ဦးတည်ရာတစ်ခုတည်းဆီသို့ စုဆုံသွားနေကြသည်။

လင်းယွမ်၏ နှုတ်ခမ်းထောင့်များ အနည်းငယ် ကွေးတက်သွားပြီး ချက်ချင်း ရယ်မောလိုက်သည်။ "တွေ့ပြီ"

ဆက်ရန်...