အခန်း ၁၉၀၆

အခန်း (၁၉၀၆) လီမျိုးနွယ်စုကို အရှက်ခွဲခြင်း

လီချန်းယွမ်နှင့် အခြားကျွမ်းကျင်သူအများအပြား မိုင်ထောင်ချီဝေးကွာသောနေရာသို့ ထွက်ခွာသွားကြောင်း အတည်ပြုပြီးနောက် ချူးယွင်ဖန်း စတင်လှုပ်ရှားလိုက်သည်။

"ဖွဲ့စည်းပုံအတားအဆီးကို အသက်သွင်းလိုက်"

ချူးယွင်ဖန်းက လက်စည်းတံဆိပ်တစ်ခုကို ဖော်ဆောင်လိုက်သောအခါ လီမျိုးနွယ်စု စံအိမ်တော်ပတ်လည်ရှိ ဟင်းလင်းပြင် တုန်ခါလာ၍ ခဏအတွင်း စံအိမ်တစ်ခုလုံးကို ဝန်းရံထားသည့် ဧရာမအတားအဆီးတစ်ခု ဖြစ်ပေါ်လာသည်။ ဤရုတ်ခြည်းပြောင်းလဲမှုသည် လီမျိုးနွယ်စုစံအိမ်ရှိ ကျွမ်းကျင်သူများ၏ အာရုံကို ချက်ချင်းဆွဲဆောင်သွားကာ ဒေါသတကြီး ဟိန်းဟောက်သံများ ပေါ်ထွက်လာစေ၏။

"ဘယ်သူလဲ"

"မင်းတို့က ကိုယ့်သေတွင်းကို ကိုယ်တူးပြီး တိုးဝင်လာတာပဲ"

ယခုအချိန်တွင် လီမျိုးနွယ်စုစံအိမ်တော်သည် မြို့တစ်မြို့လုံး၏ အာရုံစိုက်ရာ ဗဟိုချက်ဖြစ်၍ ဤကဲ့သို့ ပြောင်းလဲမှုအရ တစ်စုံတစ်ဦးက စတင်လှုပ်ရှားလိုက်ပြီဖြစ်ကြောင်း သိသာထင်ရှားသည်။

"တစ်ယောက်ယောက်ကတော့ စလှုပ်ရှားနေပြီ"

မရေတွက်နိုင်သော နတ်အာရုံများ ချက်ချင်းပင် လွှမ်းခြုံရောက်ရှိလာ၏။ ထိုအခိုက်တွင် လမ်းမကြီး၏ အဆုံး၌ လက်ထဲတွင် ကျိုင်းရှည်တစ်ချောင်း ကိုင်ဆောင်ကာ လျှောက်လှမ်းလာသော အရပ်နှစ်မီတာခန့်ရှိသည့် လူလတ်ပိုင်းအရွယ် အမျိုးသားတစ်ဦးကို လူတိုင်း မြင်တွေ့လိုက်ရသည်။ ထိုလူသည် လျင်မြန်စွာ ရွေ့လျားလာခဲ့ရာ ခဏအတွင်း လီမျိုးနွယ်စုစံအိမ်တော်ရှေ့သို့ ရောက်ရှိလာသည်။ ထိုအခါ လီမျိုးနွယ်စုစံအိမ်အရှေ့တွင်လည်း လူရိပ်များစွာ ပေါ်ထွက်လာခဲ့ရာ ၎င်းတို့သည် လီမျိုးနွယ်စု၏ ကျွမ်းကျင်သူများ ဖြစ်ကြသည်။ လီချန်းယွမ်နှင့်အတူ ရှေးဟောင်းအမွေအနှစ်ဂူဆီ ကျွမ်းကျင်သူအများအပြား လိုက်ပါသွားကြသော်လည်း ကျန်ရှိနေသောသူများသည်လည်း ရန်စလာသူများကို ခြောက်လှန့်နိုင်ရန် လုံလောက်သော အင်အားရှိပေသည်။ ထိုအုပ်စု၏ ခေါင်းဆောင်သည် အိမ်တော်ထိန်းအဘိုးအို ဖြစ်သည်။

"မင်းက ဘယ်သူလဲ။ လီမျိုးနွယ်စုကို ဆန့်ကျင်ဖို့ ကြံစည်နေတာလား" အိမ်တော်ထိန်းအဘိုးအို၏ အမူအရာသည် အလွန်တည်ကြည်လေးနက်နေသည်။

ချူးယွင်ဖန်း တစ်ယောက်တည်း လာရောက်ခြင်းဖြစ်သော်လည်း အိမ်တော်ထိန်းအဘိုးအိုသည် သူ့ကို လျှော့မတွက်ပေ။ ဤကဲ့သို့ အရေးကြီးသော အချိန်တွင် လာရောက်နှောင့်ယှက်ဝံ့သူသည် အရူးမဟုတ်ပါက ခိုင်မာသော နောက်ခံတစ်ခု ရှိရမည်ကို သူ ကောင်းကောင်းသိနေသည်။ ချူးယွင်ဖန်းသည် အရူးတစ်ယောက်နှင့်မတူသောကြောင့် ခိုင်မာသော အားကိုးရာတစ်ခု ရှိနေမည်မှာ သေချာလှသည်။ ချူးယွင်ဖန်း မည်သည်ကို အားကိုးနေပါစေ အိမ်တော်ထိန်းအဘိုးအိုက သူ့ကို လျှော့တွက်မည် မဟုတ်ပေ။

"မင်းရဲ့ သခင်က ဘယ်သူလဲဆိုတာ ပြောစမ်း။ ဒါဆိုရင် မင်းရဲ့ အသက်ကို ချမ်းသာပေးမယ်" အိမ်တော်ထိန်းအဘိုးအိုက အေးစက်စွာ ပြောလိုက်သည်။

လီချန်းယွမ် စံအိမ်တော်မှ မထွက်ခွာမီတွင် အခြားသူများက လီမျိုးနွယ်စုကို အထင်မသေးစေရန် အပြင်းထန်ဆုံးသော တုံ့ပြန်မှုဖြင့် ပြန်လည်တိုက်ခိုက်ရန် အိမ်တော်ထိန်းအဘိုးအိုကို ညွှန်ကြားထားသည်။ ဤသည်မှာ နောင်တွင် ဖြစ်ပေါ်လာနိုင်သော ပဋိပက္ခကြီးများကို ရှောင်ရှားရန် အကောင်းဆုံးနည်းလမ်းဖြစ်သည်။

"ကျုပ်အသက်ကို ချမ်းသာပေးမယ် ဟုတ်လား" ချူးယွင်ဖန်းက ကျိုင်းကို ကျစ်ကျစ်ဆုပ်ကိုင်၍ ပြုံးလိုက်သည်။

"ကျုပ် ဒီကိုလာရတဲ့ ရည်ရွယ်ချက်က ခင်ဗျားတို့ကို လုယက်ဖို့ပဲ။ ခင်ဗျားတို့ဆီမှာရှိတဲ့ ဝိညာဉ်ကျောက်တုံးတွေနဲ့ အဖိုးတန်ပစ္စည်းတွေ အားလုံးကို ထုတ်လာခဲ့စမ်း။ မဟုတ်ရင် ကျုပ်ကို ရက်စက်တယ်လို့ မပြောနဲ့"

"မင်းက ကျုပ်တို့ကို လုယက်မလို့ ဟုတ်လား" အိမ်တော်ထိန်းအဘိုးအိုသည် ချူးယွင်ဖန်း၏ စကားကြောင့် ချက်ချင်းပင် ဒေါသထွက်သွားသည်။ လီမျိုးနွယ်စုကို ဤမျှအထိ အထင်သေးဝံ့သူများ တည်ရှိနေသည်။ ဤလူသည် လီမျိုးနွယ်စုကို လုံးလုံးလျားလျား လေးစားမှုမရှိဘဲ လုယက်ရန်ပင် ကြိုးစားဝံ့သည်။

"ဘယ်လောက်တောင် မောက်မာလိုက်သလဲ။ လီမျိုးနွယ်စုမှာ အင်အားမရှိဘူးလို့ မင်း ထင်နေတာလား" အိမ်တော်ထိန်းအဘိုးအိုသည် ဒေါသများဖြင့် တောက်လောင်နေသည်။

အဝေးမှ စိတ်အာရုံဖြင့် ကြည့်ရှုနေသူများလည်း တုန်လှုပ်သွားကြသည်။ ချူးယွင်ဖန်း၏ သတ္တိက အံ့ဖွယ်ကောင်းလွန်းလှ၏။ လီမျိုးနွယ်စုသည် မြစ်ကိုဖြတ်ကူးလာသော ကြောက်မက်ဖွယ် နဂါးတစ်ကောင်ကဲ့သို့ ဖြစ်တည်မှုဖြစ်သော်လည်း သူက ပစ်မှတ်ထားခဲ့သည်။ ၎င်းတို့သည် ကျွမ်းကျင်သူ အများအပြားကို ခေါ်ဆောင်၍ အရှေ့ပင်လယ်သို့ အလွန်ထင်ပေါ်စွာ ရောက်ရှိလာခဲ့သည်။ ၎င်းတို့ကို မကြည်ဖြူသူများစွာ ရှိသော်လည်း မည်သူကမျှ လှုပ်ရှားရန် မဝံ့ရဲကြပေ။ ယခုမူ ၎င်းတို့ကို တိုက်ခိုက်၍ လုယက်ရန် ကြိုးစားသူ ပေါ်ထွက်လာခဲ့သည်။

"အို... ခင်ဗျားတို့က အင်အားကြီးတယ်ပေါ့လေ။ စိတ်မရှိပါနဲ့... ကျုပ်မသိခဲ့ဘူး" ချူးယွင်ဖန်းက အထင်အမြင်သေးစွာ ပြောပြီးနောက် နားကို နှိုက်ကာ အတားအဆီးအတွင်းသို့ ဝင်လာသည်။’

လီမျိုးနွယ်စုစံအိမ်အတွင်းရှိ လူတိုင်း၏ မျက်လုံးများ အရောင်တောက်သွားကာ ချူးယွင်ဖန်းကို ချက်ချင်း ဝိုင်းအုံလိုက်ကြသည်။

"သူ့ကို ဖမ်းကြစမ်း။ လီမျိုးနွယ်စုကို လာစော်ကားရင် ဘယ်လိုအဆုံးသတ်မျိုးနဲ့ ကြုံရမလဲဆိုတာ လူတိုင်းသိအောင် ပြလိုက်" အိမ်တော်ထိန်းအဘိုးအိုက ဟိန်းဟောက်လိုက်သည်။

အရပ်မျက်နှာအနှံ့မှ အင်အားကြီး ကျွမ်းကျင်သူများ ကြောက်မက်ဖွယ်ရာ အကောင်းဆုံး တိုက်ခိုက်မှုများဖြင့် ချူးယွင်ဖန်းကို တိုက်ခိုက်လာကြသည်။

"လီမျိုးနွယ်စုဆိုတာ ဘာမှမဟုတ်ပါဘူး။ ကျုပ် ဒီကိုလာတာ လီမျိုးနွယ်စုရဲ့ မျက်နှာကို ရိုက်ဖို့ဆိုတဲ့အကြောင်း ခင်ဗျားတို့ကို နားလည်စေချင်လို့" ချူးယွင်ဖန်းက လှောင်ပြောင်လိုက်သည်။

တိုက်ခိုက်မှုများသည် ပြင်းထန်သော ရေစီးကြောင်းများသဖွယ် သူ့ဆီသို့ တိုးဝင်လာသော်လည်း ချူးယွင်ဖန်းက လှည့်ပင်မကြည့်ပေ။ သူသည် လက်ထဲမှ တုတ်ကို ဝေ့ယမ်းလိုက်သည်နှင့် ထိုတိုက်ခိုက်မှုများအားလုံး ချက်ချင်းပင် အမှုန့်ဖြစ်သွားလေသည်။

ဘန်း

လီမျိုးနွယ်စုမှ ဒြပ်မဲ့အဆင့် ကျွမ်းကျင်သူတစ်ဦးသည် တုံ့ပြန်ချိန်ပင် မရလိုက်ဘဲ ဦးခေါင်းပေါက်ထွက်ကာ ချက်ချင်း သေဆုံးသွားသည်။ ချူးယွင်ဖန်းက ဤမျှဖြင့် ရပ်တန့်မသွားဘဲ ကျိုင်းကို ထပ်မံ ဝေ့ယမ်းလိုက်ပြန်သည်။

ဘုံး

လေထုတစ်ခုလုံး တုန်ခါသွား၍ ကြောက်မက်ဖွယ်ရာ ပေါက်ကွဲမှုကြီး ဖြစ်ပေါ်လာသည်။ ဤတိုက်ခိုက်မှုအောက်တွင် အနားသို့ ပျံသန်းလာသော ဒြပ်မဲ့အဆင့် ကျွမ်းကျင်သူများ ပြင်းထန်စွာ ဒဏ်ရာများရရှိ၍ အနောက်သို့ လွင့်ထွက်သွားကြသည်။ ချူးယွင်ဖန်းက တစ်ချက်တည်းဖြင့် သူ့ထံသို့ ပြေးဝင်လာသော ဒြပ်မဲ့အဆင့် ကျွမ်းကျင်သူအားလုံးကို ရှင်းလင်းပစ်လိုက်၏။ သူ ဒုတိယအကြိမ် တိုက်ခိုက်ရန်ပင် မလိုအပ်ပေ။ ဝေးကွာသောနေရာမှ စောင့်ကြည့်နေကြသော အဖွဲ့အစည်းအသီးသီးမှ ကျွမ်းကျင်သူများသည် ဤမြင်ကွင်းကို မြင်လိုက်ရသောအခါ ထိတ်လန့်တုန်လှုပ်သွားကြသည်။ အားလုံးက မွန်းစတားတစ်ကောင်ကို မြင်လိုက်ရသကဲ့သို့ ခံစားနေရသည်။

အနည်းဆုံး ဒြပ်မဲ့အဆင့်၌ ရှိနေသည့် ထိုကျင့်ကြံသူများသည် မည်သည့်အင်အားစု၌မဆို အဓိက ကျောရိုးများဖြစ်ပေ၏။ ၎င်းတို့သည် ဖန်ဆင်းရှင်အဆင့်များကို မယှဉ်နိုင်သော်လည်း လူအများအပြားဖြင့် ဖွဲ့စည်းထားသော အစုအဖွဲ့ကို ခဏတာ ခုခံနိုင်စွမ်း ရှိသင့်သည်။ ယခုကဲ့သို့ ဆိုးရွားသော အခြေအနေမျိုးဖြင့် မရှုံးနိမ့်သွားသင့်ပေ။

သို့သော် ယခုမူ ၎င်းတို့အားလုံး စုပေါင်းတိုက်ခိုက်နေသော်လည်း ချူးယွင်ဖန်း၏ ရိုက်ချက်တစ်ချက်ကိုပင် မတားဆီးနိုင်ခဲ့ပေ။ အရှေ့ပင်လယ်တွင် ကျိုင်း အသုံးပြုသော ကျွမ်းကျင်သူတစ်ဦး မည်သည့်အချိန်က ပေါ်ထွက်လာခဲ့သနည်းဟု လူအများအပြား တွေးတောနေကြသည်။ ကျိုင်းကို အသုံးပြုသော ကျွမ်းကျင်သူများ၏ အမည်များကို စဉ်းစားကြည့်သော်လည်း ထိုလူနှင့် ကိုက်ညီသူ တစ်ဦးမျှ မရှိပေ။ ဤမျှအဆင့်မြင့်သော ကျင့်ကြံသူတစ်ဦးသည် အမည်မသိသူတစ်ဦး မဖြစ်နိုင်ပေ။

'ဒီလူက တခြားတစ်နေရာက လာတာလား' လူအများက တွေးတောနေကြသည်။

မည်သို့ပင်ဆိုစေကာစေ လီမျိုးနွယ်စုကို လာရောက်ပြဿနာရှာဝံ့သူရှိနေခြင်းကို ၎င်းတို့ ဝမ်းသာနေကြသည်။ လီမျိုးနွယ်စုသည် မြစ်ကိုဖြတ်သန်းနေသော အားကောင်းသည့် နဂါးဖြစ်သော်လည်း ဒေသခံများက ၎င်းတို့အပေါ် မကျေမနပ် ဖြစ်နေသည်မှာ ကြာမြင့်ပြီဖြစ်သည်။ ယခုကဲ့သို့ တစ်စုံတစ်ဦးက လီမျိုးနွယ်စုကို လာရောက် စိန်ခေါ်ခြင်းသည် ၎င်းတို့​၏ ဆန္ဒနှင့် ထပ်တူကျပေသည်။

"မင်းကများ အတင့်ရဲပြီး လီမျိုးနွယ်စုဝင်တွေကို သတ်ရဲရတယ်လို့။ ကောင်းကင်နဲ့ မြေကြီးကြားမှာ မင်းအတွက် ပြေးစရာ မြေ မရှိတော့ဘူးကွ"

အိမ်တော်ထိန်းအဘိုးအိုသည် ချူးယွင်ဖန်းကို ကြည့်ကာ ဒေါသကြောင့် တုန်ရီနေသည်။ ကြီးမြတ်သောတရှ၏ ထိပ်တန်း စစ်ဘက်ဆိုင်ရာ မိသားစုကြီးတစ်ခုဖြစ်သည့် မိမိတို့ကို ဤမျှ လျစ်လျူရှုဝံ့သူ မည်သည့်နေရာမှ ရောက်လာသနည်းဟု သူ တွေးမရ ဖြစ်နေသည်။

"မင်းက ကျုပ်တို့ သခင် မရှိတာကို အခွင့်ကောင်းယူနေတာပဲ။ မြို့ဝန်မင်း ပြန်လာတဲ့အခါ မင်း ဘယ်ကို ပြေးမလဲဆိုတာ ကြည့်ကြသေးတာပေါ့" အိမ်တော်ထိန်းအဘိုးအိုက အော်ဟစ်လိုက်သည်။ သို့သော် သူ ဆက်မပြောနိုင်မီ ကျယ်လောင်သော ရိုက်နှက်သံကို လူတိုင်း ကြားလိုက်ရသည်။

ဖြန်း

--