အခန်း ၁၅၆

အပိုင်း (၁၅၆)

ဝိန်းယွီသည် မြင်းလှည်း အရှိန်ပြင်းစွာ ပြေးနှင်နေချိန်တွင် မြင်းလှည်းနံရံ၌ တပ်ဆင်ထားသော ကြေးဝါမီးအိမ်စင်ကို လက်တစ်ဖက်ဖြင့် တင်းကျပ်စွာ ဆုပ်ကိုင်ထားစ်၏။

လမ်းu မညီညာသောကြောင့် ဖြစ်ပေလိမ့်မည်။ မြင်းလှည်းမောင်းနှင်နေသော ဝေ့စစ်သည်ကလည်း မြင်းများကို ကျာပွတ်ဖြင့် အဆက်မပြတ် ရိုက်နှက်နေသောကြောင့် ဝိန်းယွီသည် ထိုင်ခုံပေါ်မှ ပြုတ်ကျလုမတတ် အကြိမ်ကြိမ် ယိမ်းထိုးသွားခဲ့ရသည်။

ယခင်က မြားများကြောင့် ပျက်စီးသွားသော ပြတင်းပေါက်ကြီးu ပွင့်ဟနေပြီး အရိုးခိုက်မတတ် အေးစက်သော လေစိမ်းများ ဝင်ရောက်လာသဖြင့် မီးအိမ်စင်ကို ဆုပ်ကိုင်ထားသော လက်ချောင်းငါးချောင်းသည် အေးခဲနာကျင်နေပြီး အရိုးအဆစ်များကြားတွင် အပ်ဖြင့် ထိုးဆွနေသကဲ့သို့ ခံစားနေရ၏။

သူမသည် သစ်သားသေတ္တာကို ကာကွယ်ရန်နှင့် အအေးဒဏ်ကို ခုခံရန် အခြားလက်တစ်ဖက်ဖြင့် ဝတ်ရုံကို တင်းကျပ်စွာ ဆွဲစေ့ထားလိုက်သည်။ သူမသည် မျက်မှောင်ကြုတ်ထားပြီး ပြတင်းပေါက်မှတစ်ဆင့် မြင်းလှည်း၏ ဘယ်ညာတွင် လိုက်ပါလာသော ဝေ့စစ်တပ်မှ မြင်းစီးသူရဲကောင်း အနည်းငယ်က နောက်သို့လှည့်ကာ အဆက်မပြတ် မြားပစ်နေကြသည်ကို မြင်တွေ့လိုက်ရသည်။ နောက်ဘက်မှလည်း မြားများက ရှေ့သို့ ပျံသန်းလာကြသည်။

သူမသည် နောက်မှ လိုက်လာသူများကို သေချာမမြင်ရသလို ထိခိုက်ဒဏ်ရာရမှု အခြေအနေများကိုလည်း မသိရှိပေ။ သို့သော် ဘယ်ညာနှစ်ဖက်ရှိ မြင်းစီးသူရဲကောင်းများသည် အဆက်မပြတ် လျော့နည်းလာနေပြီး အခါအားလျော်စွာ မြင်းစီးသူရဲကောင်းများ သို့မဟုတ် စစ်မြင်းများ မြားမှန်ကာ ပြတင်းပေါက်၏ မြင်ကွင်းထဲမှ ပျောက်ကွယ်သွားကြသည်။

အနောက်ဘက်ရှိ မြင်းလှည်းနံရံနှင့် ခေါင်မိုးဆီမှ ချွန်ထက်သောအရာတစ်ခုခုဖြင့် ချိတ်တွယ်ပွတ်တိုက်သံကို ရုတ်တရက် ကြားလိုက်ရပြီး ထိုအသံက နားထဲသို့ ဝင်ရောက်လာကာ သွားကျိန်းမတတ်ပင်။

ကံကောင်းထောက်မစွာဖြင့် မြင်းလှည်းခေါင်မိုးပေါ်ရှိ မိုးကာစအောက်တွင် သံပြားတစ်လွှာ ဖုံးအုပ်ထားပုံရသဖြင့် လွှဲပစ်လိုက်သော ချွန်ထက်သည့်အရာသည် ချိတ်တွယ်ရန် နေရာမရခဲ့ပေ။

သို့သော် ဒေါင် ဟူသော စူးရှသောအသံနှင့်အတူ သိမ်းငှက်လက်သည်းသဏ္ဍာန် ချိတ်တစ်ခုက တံခါးရွက်မရှိတော့သော ပြတင်းပေါက်ကို တင်းကျပ်စွာ ချိတ်ဆွဲသွားလေသည်။

ဖေစုန့်၏ သိမ်းငှက်အမဲလိုက်ခွေးများက ဤသိမ်းငှက်လက်သည်းချိတ်ကို မည်သို့အသုံးပြုကြောင်း ဝိန်းယွီ မြင်ဖူးထားသည်။ ထိုအခိုက်အတန့်တွင် သူမ၏ နှလုံးခုန်နှုန်းသည် အလွန်မြန်ဆန်နေသော်လည်း တည်ငြိမ်စွာပင် သစ်သားသေတ္တာနှင့် ဝတ်ရုံကို ဆုပ်ကိုင်ထားသော လက်တစ်ဖက်ကို ဖြေလျှော့လိုက်ပြီး ဆံထိုးကို တင်းကျပ်စွာ ဆုပ်ကိုင်ထားလိုက်သည်။

အရှေ့ဘက် မြင်းလှည်းနံရံဆီမှလည်း သိမ်းငှက်လက်သည်းချိတ်ဖြင့် ခိုင်မြဲစွာ ချိတ်ဆွဲလိုက်သံကို ကြားလိုက်ရပြီး တစ်ဖက်ပြတင်းပေါက်ကို ဖြတ်သွားသော တင်းမာနေသည့် သံမဏိကြိုးကိုပင် သူမ မြင်လိုက်ရ၏။

သိမ်းငှက်အမဲလိုက်ခွေးတစ်ယောက်က အရှေ့တွင် မြင်းလှည်းမောင်းနေသော ဝေ့စစ်သည်ကို ရင်ဆိုင်ရန်ဖြစ်ပြီး အခြားသိမ်းငှက်အမဲလိုက်ခွေးတစ်ယောက်က မြင်းလှည်းထဲသို့ တိုက်ရိုက်ဝင်ရောက်ကာ သူမကို ရှင်းလင်းရန် ရည်ရွယ်ထားကြောင်း သိသာထင်ရှားနေသည်။

ဝိန်းယွီသည် သိမ်းငှက်လက်သည်းချိတ်ဖြင့် ပြတင်းပေါက်ကို ချိတ်တွယ်ထားသော နံရံဘက်မှ ကြီးမားသောအရာတစ်ခု ဆွဲငင်လိုက်သကဲ့သို့ ပြင်းထန်စွာ လှုပ်ခါသွားချိန်တွင် ကြေးဝါမီးအိမ်စင်ကို ဆုပ်ကိုင်ကာ အားပြုထရပ်လိုက်သည်။ မြင်းလှည်းအပြင်ဘက်ရှိ လူတစ်ယောက်က ပြတင်းပေါက်ကို လက်တစ်ဖက်ဖြင့် လှမ်းကိုင်လိုက်ချိန်တွင် ဆံထိုးကို ဆုပ်ကိုင်ထားသော သူမ၏လက်က အပြင်ဘက်သို့ အားကုန် ထိုးစိုက်ချလိုက်သည်။

သို့သော် မျက်နှာချင်းဆိုင်ရှိ သိမ်းငှက်အမဲလိုက်ခွေးသည် အသေခံစစ်သည်ဘဝမှ လာသူဖြစ်ပြီး ဓားသွားပေါ်တွင် သွေးလျက်ရသော နေ့ရက်များကို ဖြတ်သန်းဖူးသူဖြစ်သောကြောင့် အန္တရာယ်ကို သဘာဝအလျောက် ရှောင်ရှားနိုင်စွမ်းရှိပြီး သူ့ခန္ဓာကိုယ်ကို ချက်ချင်း နောက်သို့ ဆုတ်လိုက်၏။

တစ်ဖက်လူ၏ နားထင်ကို စိုက်ဝင်သင့်သော ထိုဆံထိုးသည် သူ၏ မျက်လုံးအောက်မှ နှာခေါင်းရိုးကို ပြင်းထန်စွာ ဖြတ်ကာ ခြစ်မိသွားပြီး သွေးရာတစ်ခု ထင်ကျန်ရစ်စေခဲ့သည်။

ထိုသိမ်းငှက်အမဲလိုက်ခွေး၏ မျက်လုံးများတွင် အမုန်းတရားများ ပြည့်နှက်သွားပြီး သူ့လက်ထဲရှိ ဓားသည် ဝိန်းယွီဆီသို့ ကျဆင်းလာတော့မည့်ဆဲဆဲတွင် မြားတစ်စင်းက သူ၏ကျောကို ရုတ်တရက် ဖောက်ဝင်သွားခဲ့သည်။

သူ့လက်သည် ပြတင်းပေါက်ကို ဆက်လက် မဆုပ်ကိုင်နိုင်တော့ဘဲ ခန္ဓာကိုယ်တစ်ခုလုံး အောက်သို့ ပြုတ်ကျသွားတော့သည်။

ဝိန်းယွီသည် ဆံထိုးကို ဆုပ်ကိုင်ကာ ပြတင်းပေါက်ကို မှီလျက် အမောတကော အသက်ရှူနေပြီး အနောက်ဘက်မှ ထုန်ချွဲ၏ အော်ခေါ်သံကို ကြားလိုက်ရသည်။

"သခင်မလေး!"

သူမသည် မင်းသမီး ဟု တိုက်ရိုက် မခေါ်ရဲပေ။ အကယ်၍ မမျှော်လင့်ထားသော ကိစ္စတစ်ခုခု ဖြစ်လာပါက ဝိန်းယွီ၏ အဆင့်အတန်း ပေါ်လွင်သွားမှာလည်း စိုးရသည်။

သူတို့ ယနေ့ လူလာလုရာတွင် ဖေစုန့်၏လူများလည်း ပါဝင်နေသောကြောင့် အောင်မြင်သည်ဖြစ်စေ၊ ကျရှုံးသည်ဖြစ်စေ ထိုအချိန်ရောက်လျှင် ဖေစုန့်က နန်ချန်ရှိ စစ်တပ်များကို ခြိမ်းခြောက်ရန် ကျန်းယွီ၏ ကိုယ်လုပ်တော်ကို ပြန်လည်လုယူကာ တောင်ပိုင်းနယ်စပ်သို့ ခေါ်ဆောင်သွားခြင်းဖြစ်သည်ဟု အခြေအနေကို အသုံးချကာ စွပ်စွဲနိုင်ပေသည်။ ထို့ပြင် ဝေ့ဖိန်ကျင်းကို လုပ်ကြံပြီး သူတို့၏ မြောက်ပိုင်းဝေ့ကို ထိုးနှက်ရန် ရည်ရွယ်သည်ဟုလည်း ပြောဆိုနိုင်ပေသည်။

ဝိန်းယွီ၏ နားထင်နှစ်ဖက်မှ ပြေကျနေသော ဆံပင်များသည် ပြင်းထန်သော လေကြောင့် ဖရိုဖရဲဖြစ်ကာ အရှေ့သို့ လွင့်မျောနေ၏။ သူမသည် အနောက်ဘက်တွင် မြင်းကို ကျာပွတ်ဖြင့် အကြိမ်ကြိမ်ရိုက်နှက်ကာ သူမဆီသို့ အပြေးအလွှား လာနေသော ထုန်ချွဲကို မြင်လိုက်ရ၏။

သူမ၏ ပခုံးပေါ်တွင် ချွန်ထက်သောအရာတစ်ခုခုဖြင့် ချိတ်ဆွဲခံထားရသော သွေးရာသုံးကြောင်း ရှိနေပြီး အစောပိုင်းက သိမ်းငှက်အမဲလိုက်ခွေးများ၏ သိမ်းငှက်လက်သည်းချိတ်ကြောင့် ပခုံးတွင် ဒဏ်ရာရထားကြောင်း သိသာထင်ရှားနေသည်။

ဝိန်းယွီသည် ဝမ်းသာလွန်း၍ မျက်ရည်ပင် ကျလုမတတ် ဖြစ်သွားပြီး ပြတင်းပေါက်ကို မှီလျက် အလောတကြီး အော်ခေါ်လိုက်သည်။

"ထုန်ချွဲ!"

ထို့နောက် သူမက အလျင်စလို မေးလိုက်သည်။ "ကျောင်းပိုင်ကော”

ဝိန်းယွီ ဘာမေးချင်သည်ကို ထုန်ချွဲက သိနေသဖြင့် ကျယ်လောင်စွာ ပြန်ဖြေလိုက်သည်။ "အစ်မကျောင်းပိုင် ဘာမှမဖြစ်ဘူး။ ဖေမိသားစုရဲ့ သိမ်းငှက်အမဲလိုက်ခွေးတွေကို သူ နောက်မှာ တားထားပေးတယ်”

ဝိန်းယွီ သက်ပြင်းတစ်ချက် ချလိုက်နိုင်ရုံသာ ရှိသေးချိန်တွင် အရှေ့ဘက် မြင်းလှည်းဦးပိုင်းတွင် မည်သို့သော အပြောင်းအလဲများ ဖြစ်ပေါ်သွားသည်ကို မသိလိုက်ရပေ။ မြင်းလှည်းကြီး ပြင်းထန်စွာ လှုပ်ခါသွားသည်ကိုသာ သူမ ခံစားလိုက်ရပြီး ပြတင်းပေါက်အနားကွပ်ကို အသေအလဲ ဆုပ်ကိုင်ထားမှသာ မြင်းလှည်းကြမ်းပြင်ပေါ်သို့ မပြုတ်ကျဘဲ နေနိုင်ခဲ့သည်။ လေထဲတွင် ပေါက်ကွဲသံကို ကြားလိုက်ရပြီး သူမ မော့ကြည့်လိုက်သောအခါ မစိမ်းသက်လှသော အချက်ပြမီးကျည်တစ်ခု ပေါက်ကွဲသွားသည်ကို မြင်လိုက်ရ၏။

ထိုအချိန်တွင် အနောက်ဘက်ရှိ သစ်သားမြင်းလှည်းတံခါးကိုလည်း လူတစ်ယောက်က ခြေထောက်ဖြင့် ကြမ်းတမ်းစွာ ကန်ဖွင့်လိုက်လေသည်။

သူမ အံ့ဩတကြီး နောက်သို့ လှည့်ကြည့်လိုက်သောအခါ အစောပိုင်းက သိမ်းငှက်လက်သည်းချိတ်၏ သံမဏိကြိုးအတိုင်း မြင်းလှည်းဦးပိုင်းသို့ တွယ်တက်သွားခဲ့သော ထိုသိမ်းငှက်အမဲလိုက်ခွေးသည် သွေးများ စီးကျနေသော ဓားကို ကိုင်ဆောင်ထားပြီး သားကောင်ကို ဖမ်းမိသွားသကဲ့သို့ ပျော်ရွှင်ကာ ထူးဆန်းသော အကြည့်များဖြင့် သူမကို စိုက်ကြည့်နေသည်ကို တွေ့လိုက်ရသည်။

ထိုအကြည့်ကြောင့် ဝိန်းယွီ၏ ဦးရေပြားမှာ ထုံကျဉ်သွားတော့သည်။ သူ့အနောက်တွင် မြင်းလှည်းမောင်းသူ ဝေ့စစ်သည်၏ အလောင်းက လဲကျနေပြီး သူ၏ခြေရင်းတွင် အသုံးပြုပြီးသား အချက်ပြမီးကျည် ဝါးကျည်တောက်တစ်ခု ကျနေသည်။

အစောပိုင်းက ထိုအချက်ပြမီးကျည်ကို သူက ပစ်လွှတ်လိုက်တာ ရှင်းလင်းနေသည်။

ဝိန်းယွီသည် ပြတင်းပေါက်အနားကွပ်ကို လက်တစ်ဖက်ဖြင့် တင်းကျပ်စွာ ဆုပ်ကိုင်ထားသည်။ မျက်နှာဖုံးဇာပဝါ မကျွတ်သေးသော်လည်း အရိုးခိုက်မတတ် အေးစက်သော လေပြင်းများ တိုက်ခတ်နေမှုအောက်တွင် သူမ၏မျက်နှာမှာ ပြတင်းပေါက်အပြင်ဘက်တွင် အများအပြား ကျဆင်းနေသော နှင်းသစ်များကဲ့သို့ ဖြူရော်နေကြောင်းကို မြင်တွေ့နိုင်ဆဲ။ သို့သော် သူမ၏ မျက်လုံးတစ်စုံကတော့ တည်ငြိမ်နေဆဲပင်။

မျက်နှာချင်းဆိုင်ရှိ လူက ဓားကို မြှောက်ကာ သူမထံသို့ ထိုးစိုက်ရန် လာချိန်တွင် သူမသည် ကျယ်ဝန်းသော အင်္ကျီလက်အောက်တွင် ဖုံးကွယ်ထားပြီး ဆံထိုးကို ကိုင်ဆောင်ထားသည့် အခြားလက်တစ်ဖက်ကို ရုတ်တရက် မြှောက်လိုက်ကာ သေရမည်ဆိုလျှင်တောင် တစ်ဖက်လူကို အဖော်ခေါ်သွားမည့် ရည်ရွယ်ချက်မျိုး အပြည့်အဝ ရှိနေ၏။

သို့သော် ပြတင်းပေါက်ဆီမှ ရုတ်တရက် ကျယ်လောင်သော အသံတစ်ခု ထွက်ပေါ်လာပြီးနောက် ချက်ချင်းပင် လက်နက်ချင်း ရိုက်ခတ်သွားသော စူးရှသောအသံကို ကြားလိုက်ရသည်။

ထိုအရာက အစောပိုင်းက သိမ်းငှက်အမဲလိုက်ခွေး ချန်ရစ်ခဲ့သော သံမဏိကြိုးကို ဆွဲကာ ခုန်ပျံဝင်ရောက်လာသည့် ထုန်ချွဲပင်။

ဝိန်းယွီထံသို့ ထိုးစိုက်လာသော ထိုသိမ်းငှက်အမဲလိုက်ခွေး၏ ဓားသွားကို သူမက ဓားဖြင့် ဝှေ့ယမ်းကာကွယ်လိုက်ပြီးနောက် ပြတင်းပေါက်ကို မှီလျက် ခုန်ဝင်လာခဲ့သည်။ သိမ်းငှက်လက်သည်းချိတ်ကြောင့် ပခုံးပေါ်မှ အသားတစ်စ ကွာကျသွားသည့် ဒဏ်ရာကို လုံးဝ ဂရုမစိုက်ဘဲ ထိုသိမ်းငှက်အမဲလိုက်ခွေးကို သူမ၏ ဓားသွားဖြင့် ပြင်းထန်စွာ ခုတ်ထစ်တိုက်ခိုက်လိုက်ပြီး မျက်စိမပါသော ဓားများကြောင့် ဝိန်းယွီကို မထိခိုက်စေရန် ထိုသိမ်းငှက်အမဲလိုက်ခွေးကို မြင်းလှည်းတံခါးအပြင်ဘက်သို့ အောင်မြင်စွာ ဖိအားပေး မောင်းထုတ်နိုင်ခဲ့သည်။

မြင်းလှည်းကို မောင်းနှင်မည့်သူ မရှိတော့သော်လည်း လူနှစ်ယောက်က မြင်းလှည်းဦးပိုင်းတွင် အပြန်အလှန် တိုက်ခိုက်နေကြပြီး ဓားသွားများက အခါအားလျော်စွာ ကန့်လန့်ဖြတ်သစ်သားတန်းပေါ်သို့ ကျရောက်နေသဖြင့် လန့်သွားသော မြင်းများသည် လေးဖက်လေးသို့ဖြင့် အသက်လုကာ အရှိန်ပြင်းစွာ ဆက်ပြေးနေတောသည်။

ဝိန်းယွီသည် ခန္ဓာကိုယ်ကို တည်ငြိမ်စေရန် ပြတင်းပေါက်အနားကွပ်ကို တင်းကျပ်စွာ ဆုပ်ကိုင်ထားရပြီး ရှေ့သို့သွားကာ ကူညီရန်လည်း နည်းလမ်းမရှိပေ။ သူမက ပြတင်းပေါက်မှတစ်ဆင့် နောက်သို့ လှမ်းကြည့်လိုက်သောအခါ အချက်ပြမီးကျည်ကို ရှာဖွေပြီးနောက် ထပ်မံ လိုက်ပါလာသော သိမ်းငှက်အမဲလိုက်ခွေး မြင်းစီးသူရဲကောင်း ဆယ်ဂဏန်းကျော်ကို မြင်လိုက်ရသဖြင့် အခြေအနေ မဟန်တော့ကြောင်း ချက်ချင်း ခံစားလိုက်ရသည်။

ထုန်ချွဲသည်လည်း အရှိန်ပြင်းစွာ ပြေးနှင်လာသော မြင်းခွာသံများကြောင့် အာရုံလွဲသွားပြီး ခဏတာ အာရုံစိုက်မှု လျော့ရဲသွားချိန်တွင် တစ်ဖက်လူက အခွင့်အရေးကို ဖမ်းဆုပ်သွားသဖြင့် သူမ၏ ခန္ဓာကိုယ်တစ်ခုလုံးသည် အရှေ့ခန်းရှိ သစ်သားပြားအစွန်းတွင် ပြုတ်ကျသွားခဲ့သည်။ သူမ၏ ခေါင်းတစ်ဝက်ခန့်သည် မြင်းလှည်းအပြင်ဘက်သို့ ကျနေပြီး အနောက်သို့ လှမ်းကြည့်လိုက်လျှင် တဖြည်းဖြည်း နီးကပ်လာနေသော ထိုသိမ်းငှက်အမဲလိုက်ခွေး ဆယ်ဂဏန်းကျော်ကို မြင်တွေ့နိုင်၏။

သူမသည် သွားများမှ သွေးထွက်လာမတတ် အံကြိတ်ထားပြီး မိမိထံသို့ ပြင်းထန်စွာ ဖိချလာသော တစ်ဖက်လူ၏ ဓားသွားကို လက်မောင်းနှစ်ဖက်၏ အင်အားဖြင့်သာ ဓားကိုယ်ထည်ကို အသုံးပြု၍ ကာကွယ်ထားရကာ လည်ပင်းဘေးမှ သွေးကြောများပင် ထောင်ထနေ၏။ သူမ၏ မျက်လုံးထောင့်မှနေ၍ ဤသိမ်းငှက်အမဲလိုက်ခွေးက အစောပိုင်းတွင် အရှေ့ခန်းမြင်းလှည်းနံရံဆီသို့ လွှဲပစ်ထားခဲ့သော သိမ်းငှက်လက်သည်းချိတ်ကို မြင်လိုက်ရပြီး ဝိန်းယွီက မြင်းလှည်းနံရံကို ကိုင်တွယ်ကာ အပြင်သို့ ထွက်လာပြီး လက်တစ်ဖက်တွင် ဆံထိုးကို ကိုင်ဆောင်ထားသည်ကိုလည်း တွေ့လိုက်ရသည်။

ထုန်ချွဲသည် ခန္ဓာကိုယ်တွင်းရှိ နောက်ဆုံးကျန်ရှိနေသော အားအင်များကို ဆွဲထုတ်လိုက်ကာ ခေါင်းကို ရုတ်တရက် ဘေးသို့ ယိမ်းလိုက်ပြီး ထိုသိမ်းငှက်အမဲလိုက်ခွေး၏ လက်ထဲရှိ ဓားသွားကို သွေးသားများဖြင့် ရွှဲနစ်နေပြီဖြစ်သော သူမ၏ ပခုံးတစ်ဝက်အတွင်းသို့ ဖိဝင်သွားစေရန် ခွင့်ပြုလိုက်သည်။ ဘေးရှိ သိမ်းငှက်လက်သည်းချိတ်၏ သံမဏိကြိုးကို ဆွဲယူကာ ထိုသိမ်းငှက်အမဲလိုက်ခွေး၏ လည်ပင်းကို ရစ်ပတ်လိုက်ပြီးနောက် ခြေထောက်ဖြင့် ပြင်းထန်စွာ နင်းချလိုက်သည်တွင် ထိုသိမ်းငှက်အမဲလိုက်ခွေးနှင့်အတူ မြင်းလှည်းပေါ်မှ တိုက်ရိုက် လိမ့်ကျသွားတော့သည်။ သူမက အော်ဟစ်လိုက်သည်။

"သခင်မလေး... မြင်းလှည်းမောင်းပြီး ထွက်ပြေးတော့!"

မြင်းလှည်းပေါ်တွင် လူနှစ်ယောက်၏ အလေးချိန် ရုတ်တရက် လျော့ကျသွားသဖြင့် မြင်းလှည်းအရှိန်က ချက်ချင်း မြန်ဆန်သွားသည်။ ဝိန်းယွီသည် ပြတင်းပေါက်အနားကွပ်ကို လွှတ်လိုက်ပြီး မြင်းလှည်းနံရံကို ကိုင်တွယ်ကာ တံခါးပေါက်ဆီသို့ အမြန်လျှောက်သွားလိုက်၏။ ဤအချိန်တွင် မြင်းလှည်းက ရုတ်တရက် အရှိန်တင်လိုက်သဖြင့် ဟန်ချက်ကို မထိန်းနိုင်တော့ပေ။

"ထုန်ချွဲ” သူမ အသံကုန် အော်ခေါ်လိုက်ပြီး သူမ၏ ခန္ဓာကိုယ်တစ်ခုလုံး နောက်သို့ လဲကျသွားသည်တွင် ကျောပြင်နှင့် တံတောင်ဆစ်နှစ်ဖက်စလုံး မြင်းလှည်းနံရံနှင့် ဆောင့်မိကာ စူးရှသည့်နာကျင်မှုတစ်ခု ဖြစ်လာတော့သည်။

ထုန်ချွဲ၏ ကြိုးဖြင့် လည်ပင်းကို တင်းကျပ်စွာ ရစ်ပတ်ခံရပြီး မြင်းလှည်းပေါ်မှ ဆွဲချခံရသော ထိုသိမ်းငှက်အမဲလိုက်ခွေးသည်လည်း အလွန် ရက်စက်လေသည်။ မိမိ၏အသက်ကိုပင် ဂရုမစိုက်တော့ဘဲ လက်အင်္ကျီကို ချက်ချင်း မြှောက်ကာ နောက်ဆုံးကျန်ရှိနေသော လက်ပစ်မြားအချို့ကို ပစ်လွှတ်လိုက်သည်။

ဝိန်းယွီသည် မြင်းစီးတတ်သော်လည်း မြင်းလှည်းကို တစ်ခါမှ မမောင်းနှင်ဖူးပေ။ ဤကဲ့သို့သော အလွန်အန္တရာယ်များသည့် အချိန်မျိုးတွင် သူမသည် အခြားအရာများကို ဂရုမစိုက်နိုင်တော့ချေ။ ထုန်ချွဲ နောက်ဆုံး အော်ဟစ်သွားခဲ့သော စကားကို မှတ်မိနေပြီး တစ်ကိုယ်လုံးရှိ အရိုးအဆစ်များ၏ ဆောင့်မိသော နာကျင်မှုကို ကြိတ်မှိတ်ခံစားကာ မြင်းလှည်းနံရံကိုအားပြုကာ ထရပ်လိုက်ပြီး မြင်းလှည်းမောင်းရန် အရှေ့ခန်းသို့ သွားရောက်ကာ ကျောင်းပိုင်တို့ ရောက်လာမည့်အချိန်အတွက် အနည်းနည်း အချိန်ဆွဲထားနိုင်ရန် မျှော်လင့်နေမိသည်။

လက်ပစ်မြားတစ်စင်းသည် မြင်း၏ခြေထောက်ကို အတိအကျ စိုက်ဝင်သွားခဲ့သည်။

အစကတည်းက ထိတ်လန့်နေသော မြင်း၏ နောက်ခြေထောက်သည် ကျိုးကျသွားပြီး အလန့်တကြား ခုန်ပေါက်နေသဖြင့် နောက်ဆုံးတွင် မြင်းလှည်းတစ်ခုလုံးပါ ဘေးတိုက် လဲကျသွားတော့သည်။

ချက်ချင်းပင် ဝိန်းယွီသည် မြင်းလှည်းအခန်းတစ်ခုလုံးအတွင်း မိုးကြိုးပစ်ချလိုက်သကဲ့သို့ ကမ္ဘာကြီး လည်ထွက်သွားသယောင် ခံစားလိုက်ရသည်။ သူမသည် သဘာဝအလျောက် သူမ၏ခေါင်းကို ကာကွယ်လိုက်သော်လည်း ပခုံး၊ ကျောပြင်နှင့် လက်ခြေအဆစ်အမြစ် နေရာအနှံ့အပြားသည် အဆက်မပြတ် ဆောင့်မိခြင်းကို ခံရဆဲပင်။

မြင်းလှည်းတစ်ခုလုံး မြေပြင်ပေါ်သို့ ပြင်းထန်စွာ ဆောင့်ကျသွားချိန်တွင် သူမသည် အရှိန်ကြောင့် အတူတကွ လဲကျသွားပြီး ခြေသလုံးကို ဆံထိုးဖြင့် ခြစ်မိကာ သွေးများ စီးကျလာသည်။ သူမ၏ ဝမ်းဗိုက်သည်လည်း အောက်သို့ ပြုတ်ကျသွားသော သစ်သားသေတ္တာထောင့်နှင့် ပြင်းထန်စွာ ဆောင့်မိသွားခဲ့သည်။ နာကျင်လွန်းသဖြင့် သူမ၏ မျက်နှာမှာ ဖြူရော်သွားပြီး တစ်ကိုယ်လုံးရှိ အားအင်များ ဆုံးရှုံးသွားကာ အချိန်အတန်ကြာသည်အထိ လှုပ်ရှားလို့ မရနိုင်တော့ပေ။

ရှောင်းလိသည် အချက်ပြမီးကျည်အတိုင်း လူသူကင်းမဲ့သော တောအုပ်ကြားမှ ဖြတ်လမ်းအတိုင်း လိုက်ပါလာချိန်တွင် ထုန်ချွဲက သိမ်းငှက်လက်သည်းချိတ်၏ သံမဏိကြိုးကို ဆွဲကာ ထိုမြင်းလှည်းပေါ်သို့ ခုန်ပျံတက်သွားသည်ကို မြေရိုင်းကုန်းစောင်းပေါ်မှ မြင်တွေ့လိုက်ရသည်။

အနောက်ဘက်မှ မြင်းခွာသံများသည် မိုးခြိမ်းသံကဲ့သို့ ထွက်ပေါ်လာပြီး အချက်ပြမီးကျည်ကို မြင်တွေ့ပြီးနောက် ကျန်ရှိနေသော သိမ်းငှက်အမဲလိုက်ခွေးများအားလုံးလည်း အလျင်စလို ရောက်ရှိလာကြခြင်းပင်။

သူသည် အံကြိတ်ကာ အဝေးသို့ ပြေးနှင်သွားသော မြင်းလှည်းကို တစ်ချက်ကြည့်လိုက်ပြီး နောက်ဆုံးတွင် ဆက်လက် လိုက်ပါရန် မရွေးချယ်တော့ဘဲ မြင်းကို ထိန်းချုပ်ကာ လေးကို ဆွဲတင်လိုက်၏။ ဤတောင်ကွေ့ကို အရှိန်ပြင်းစွာ ဖြတ်သန်းလာသော သိမ်းငှက်အမဲလိုက်ခွေးများကို ချိန်ရွယ်ထားလိုက်သည်။ အကြိမ်တိုင်းတွင် မြားသုံးစင်းကို တစ်ပြိုင်နက်တည်း ပစ်လွှတ်လိုက်ပြီး အရိပ်ပြဇာတ်ရုပ်များကို တဆက်တည်း ကြိုးနှင့်သီထားသကဲ့သို့ အနီးကပ်ဆုံး လိုက်ပါလာသော သိမ်းငှက်အမဲလိုက်ခွေးများကို မြင်းပေါ်မှ တစ်ယောက်ပြီးတစ်ယောက် ပစ်ချလိုက်တော့သည်။

အနီးကပ်ဆုံး လိုက်ပါလာသော နောက်ဆုံး သိမ်းငှက်အမဲလိုက်ခွေးတစ်ယောက်ကို ပစ်ချလိုက်ချိန်တွင် စုန့်ချင်သည် လူများကို ဦးဆောင်ကာ မြင်းစီးလျက် တောအုပ်ထဲမှ ထွက်ပေါ်လာပြီး သူ့ကို ပြောလိုက်သည်။ "လျန်တပ်စခန်းက လူတွေ အမီလိုက်လာကြပြီ”

ရှောင်းလိသည် မျက်လုံးကို စောင်းကာ တောင်ကွေ့၏ အနောက်ဘက်သို့ တစ်ချက် ဝေ့ကြည့်လိုက်ပြီး အရှေ့ဆုံးမှနေ၍ မြင်းကို အရှိန်ပြင်းစွာ စီးနင်းလာသော ကျောင်းပိုင်ကို မြင်တွေ့လိုက်ရသည်။ သူမသည်လည်း လူများကို ဦးဆောင်ကာ မြင်းကျောပေါ်တွင် အဆက်မပြတ် မြားပစ်နေပြီး အရှေ့မှ လိုက်ပါသွားသော သိမ်းငှက်အမဲလိုက်ခွေးများကို ပစ်သတ်နေလေသည်။

သူသည် အလွန်အမင်း မကျေမနပ်ဖြစ်စွာဖြင့် လေးနှင့် မြားကို သိမ်းဆည်းလိုက်ပြီး အဝေးသို့ ထွက်ခွာသွားသော မြင်းလှည်းကို နောက်တစ်ကြိမ် လှမ်းကြည့်ချင်နေမိသည်။ ဤသို့ ကြည့်လိုက်သောအခါ အရှိန်ပြင်းစွာ သွားနေသော ထိုမြင်းလှည်းသည် အကြောင်းအရင်းကို မသိရဘဲ မြင်းက ရုတ်တရက် အလန့်တကြား ခုန်ပေါက်လာပြီး မြင်းလှည်းတစ်ခုလုံးပါ ဘေးတိုက် လဲကျကာ မြေပြင်ပေါ်သို့ ပြင်းထန်စွာ ဆောင့်ကျသွားသည်ကို မြင်တွေ့လိုက်ရ၏။

ထိုအခိုက်အတန့်တွင် ရှောင်းလိ၏ ဦးနှောက်ထဲ၌ အမှန်တကယ်ပင် ဟာလာဟင်းလင်း ဖြစ်သွားသည်။ သူ့နားထဲတွင် ဆူညံသံများသာ ကြားနေရပြီး စုန့်ချင်က သူ့ကို ဘာတွေပြောနေသည်ကို လုံးဝ ရှင်းလင်းစွာ မကြားနိုင်တော့ပေ။

"သူတို့ကို တားထားလိုက်”

ထိုစကားတစ်ခွန်းကို သူကိုယ်တိုင် ပြောလိုက်သည်ကိုသာ ကြားလိုက်ရပြီးနောက် မြင်းကို ဒုန်းစိုင်းစီးကာ ကုန်းစောင်းပေါ်မှ ခုန်ဆင်းသွားလေတော့သည်။

တစ်ကိုယ်လုံး မည်းနက်နေသော စစ်မြင်းသည် လေနှင့် နှင်းများကို ရင်ဆိုင်ကာ အရှိန်ပြင်းစွာ ပြေးနှင်နေသည်။ နားထဲတွင် လေတိုက်ခတ်သံများကိုသာ ကြားနေရပြီး မျက်နှာသည်လည်း ဓားသွားနှင့် ပြတ်ရှသွားသလို ပြင်းထန်စွာ နာကျင်နေသော်လည်း သူကတော့ အလွန်အမင်း နှေးကွေးနေသေးသည်ဟုသာ ခံစားနေရဆဲပင်။

ဘေးတိုက် လဲကျနေသော ထိုမြင်းလှည်းက မျက်စိရှေ့တွင် ရှိနေသည်မှာ ထင်ရှားသော်လည်း အပြေးအလွှား မရောက်နိုင်သေးပေ။

ထိုမြင်းလှည်းနှင့် တစ်လံခန့်သာ ကွာဝေးတော့ချိန်တွင် ရှောင်းလိသည် ဇက်ကြိုးကိုပင် အချိန်မီ မဆွဲနိုင်တော့ဘဲ မြင်းကျောပေါ်မှ တိုက်ရိုက် လိမ့်ချလိုက်တော့သည်။

သူသည် ခန္ဓာကိုယ်ပေါ်ရှိ ဖရိုဖရဲဖြစ်နေသည့်အခြေအနေကို လုံးဝ ဂရုမစိုက်နိုင်တော့ဘဲ မြင်းလှည်းရှေ့သို့ အပြေးသွားကာ ပြုတ်ကျပြီး ပုံစံပျက်ကာ ညပ်နေသော မြင်းလှည်းတံခါးကို တံခါးဘောင်နှင့်အတူ ကြမ်းတမ်းစွာ ဖြုတ်ချလိုက်သည်။ အကာအကွယ်မရှိတော့ဘဲ လေကြောင့် ဖရိုဖရဲ လွင့်ဝဲနေသော မြင်းလှည်းခန်းဆီးကို တံခါးဘောင်တွင် ဖိထားလိုက်ပြီး နီရဲနေသော မျက်လုံးများဖြင့် အထဲတွင် လဲကျနေသော လူကို စိုက်ကြည့်နေလေသည်။

နှင်းပွင့်ငယ်များနှင့် မှိန်ဖျော့သော ကောင်းကင်အလင်းရောင်တို့သည် မြင်းလှည်းအခန်းထဲသို့ အတူတူ ဖြာကျလို့နေသည်။ သေတ္တာထဲရှိ သစ်သားပန်းပုရုပ်သည် မြင်းလှည်း လဲကျသွားစဉ်ကတည်းက ပြုတ်ကျနေခဲ့ပြီး ဝိန်းယွီ၏ ဘေးတွင် ပြန့်ကျဲနေသည်။ သူမ၏ လက်ဆစ်များတွင် ပွတ်တိုက်မိသော အရာများနှင့် ဆောင့်မိသော ဒဏ်ရာများ ပြည့်နှက်နေပြီး မျက်လုံးကို အားယူကာ ပင့်ကြည့်လိုက်သည်။ တံခါးဝတွင် ဆောင့်ကြောင့်ထိုင်နေသော လူကို ကြည့်လိုက်သောအခါ တစ်ဖက်လူက မျက်လုံးတစ်စုံကိုသာ ဖော်ပြထားသော်လည်း ဝိန်းယွီက သူ့ကို မှတ်မိသွားခဲ့သည်။

အခိုက်တန့်မှာပင် သူမကိုယ်သူမ စိတ်ကူးယဉ်ထင်ယောင်ထင်မှား ဖြစ်နေသည်ဟုပင် ထင်မှတ်သွားခဲ့၏။

သူပေးခဲ့သော နှုတ်ဆက်လက်ဆောင်ကို သတိရသွားပြီး သူမ၏ မျက်ဝန်းများ အလိုအလျောက် နီရဲလာခဲ့သည်။

"ကျွန်မ ရှင့်ကို သေသေချာချာတောင် နှုတ်မဆက်နိုင်ခဲ့ဘူး”ဟု ပြောလိုက်ချင်သော်လည်း "ကျွန်မ" ဟူသော စကားတစ်လုံးကိုသာ ပြောထွက်နိုင်ချိန်တွင် ဝမ်းဗိုက်၏ နာကျင်မှုကြောင့် အသံများ တိတ်ဆိတ်သွားခဲ့ရသည်။

ရှောင်းလိသည် သူမက ဝမ်းဗိုက်ကို လက်တစ်ဖက်ဖြင့် အုပ်ထားပြီး မျက်နှာမှာ အလွန်အမင်း ဖြူရော်နေကာ စကတ်အနားစတွင်လည်း သွေးကွက်များ စွန်းထင်းနေသည်ကို မြင်လိုက်ရသောအခါ မြင်းလှည်းတံခါးဘောင်ကို ကိုင်ထားသော လက်မှ သွေးကြောများ အလိုအလျောက် ထောင်ထလာခဲ့သည်။ ရူးသွပ်တော့မည့် ခြင်္သေ့တစ်ကောင်ကဲ့သို့ ဒေါသထွက်နေသည်မှာ ထင်ရှားနေပြီး မျက်လုံးတစ်စုံကလည်း လူကို စားတော့မည့်အလား နီရဲကာ ရက်စက်ကြမ်းကြုတ်နေ၏။

သို့သော် မျက်လုံးများထဲရှိ ခံစားချက်က သူမထက်ပင် ပိုနာကျင်နေပုံရသည်။

သူက ကိုယ့်ကိုယ်ကိုယ် ပြောနေခြင်းလား၊ ဝိန်းယွီကို ပြောနေခြင်းလားပင် ကိုယ်တိုင် မသိပေ။

"ငါ မင်းကို သူတို့လက်ထဲ မအပ်ခဲ့သင့်ဘူး”

တံခါးပေါက်တွင် ပိတ်ဆို့နေသော ပစ္စည်းများကို ဖယ်ရှားပစ်ချိန်တွင် ရင်ဘတ်ထဲမှ အလွန်အမင်း ထိတ်လန့်ကြောက်ရွံ့မှုကြောင့် ဖြစ်ပေါ်လာသော ဒေါသများက သူ့ကို ကိုယ်ပိုင်အားအင်များကို လုံးဝ မထိန်းချုပ်နိုင်အောင် ဖြစ်စေခဲ့သည်။ သူ ဘာကိုပဲ ဆုပ်ကိုင်ဆုပ်ကိုင်၊ သူ၏လက်ထဲတွင် ထိုအရာများက အစိတ်စိတ်အမွှာမွှာ ဖြစ်ကာ ပုံစံပျက်သွားလုမတတ်ပင်။ ဝိန်းယွီကို ပွေ့ချီရန် လက်လှမ်းလိုက်ချိန်မှသာ မည်သည့်ကြမ်းတမ်းသော အားအင်ကိုမှ မသုံးရဲတော့ဘဲ သူမ၏ ပခုံးနှင့် ကျောပြင်ကို ပင့်မကာ ဂရုတစိုက်ဖြင့် လူကို သယ်ထုတ်လာခဲ့သည်။

ဝိန်းယွီသည် ဒါက သူမ၏ စိတ်ကူးယဉ်ထင်ယောင်ထင်မှား မဟုတ်ကြောင်းကို နောက်ဆုံးတွင် သဘောပေါက်သွားခဲ့သည်။ မြင်းလှည်း မလဲကျခင်က ထုန်ချွဲက ထိုသိမ်းငှက်အမဲလိုက်ခွေးနှင့်အတူ မြင်းလှည်းပေါ်မှ လိမ့်ကျသွားခဲ့သော မြင်ကွင်းကို သတိရသွားပြီး ရင်ဘတ်ထဲတွင် အလွန်အမင်း နာကျင်သွားကာ အားနည်းစွာဖြင့် အလျင်စလို မေးလိုက်သည်။

"ထုန်ချွဲကော..."

ရှောင်းလိသည် သူ့ရင်ဘတ်ကို လူတစ်ယောက်က ပြင်းထန်စွာ ထိုးချလိုက်သကဲ့သို့ ခံစားလိုက်ရပြီး မွန်းကျပ်ကာ ခါးသီးနေသလို အသက်ရှူရလည်း ကျပ်နေ၏။ ရလဒ်ကို သူမအား မပြောပြပါက သူမတစ်ယောက် သေချာပေါက် စိတ်အေးနိုင်မည် မဟုတ်ကြောင်းကို သိထားသဖြင့် သူမကို အရင်ဆုံး နှစ်သိမ့်ပေးရန်သာ တတ်နိုင်တော့သည်။ သို့သော် ရူးသွပ်လုမတတ် စိုးရိမ်ပူပန်နေပြီး ဒေါသကလည်း ပေါက်ကွဲထွက်တော့မည့် အမှတ်သို့ ရောက်ရှိနေပြီဖြစ်သဖြင့် သူ၏လေသံမှာ အမှန်တကယ်ပင် အေးစက်ခက်ထန်နေ၏။

"ဒဏ်ရာရသွားတယ်၊ မသေသေးဘူး”

ဝိန်းယွီ၏ အတင်းအားတင်းထားသော မျက်နှာအမူအရာက တကယ်ပင် ပြေလျော့သွားခဲ့သည်။ သူ့ကို ကိုယ်တိုင်ကိုယ်ကျ မနှုတ်ဆက်နိုင်ခဲ့သော ထိုစကားများကို သတိရသွားပြီး သူ့ကို ထပ်ပြောလိုက်သည်။

"တောင်းပန်ပါတယ်”

ရှောင်းလိသည် ထူထဲသော အဖြူရောင် ကတ္တီပါဝတ်ရုံဖြင့် သူမကို လုံခြုံစွာ ဖုံးအုပ်ပေးလိုက်သည်။ မျက်လုံးများထဲတွင် နီရဲသော အငွေ့အသက်များ အလွန် ပြင်းထန်နေပြီး"စကားမပြောနဲ့”ဟု သူမကို ပြောလိုက်ပြီးနောက် သူမကို ပွေ့ချီကာ အပြင်သို့ ခြေလှမ်းကျဲကြီးများဖြင့် ထွက်သွားလေသည်။

"ငါ မင်းကို သမားတော်ဆီ အရင်ခေါ်သွားပေးမယ်။ မင်းရော မင်းဗိုက်ထဲက ကလေးရော ဘာမှဖြစ်မှာ မဟုတ်ဘူး”

မြင်းလှည်း လဲကျသွားချိန်တွင် ဝိန်းယွီ၏ ခန္ဓာကိုယ်ပေါ်၌ ဆောင့်မိသော ဒဏ်ရာများစွာ ရရှိခဲ့ပြီး ဝမ်းဗိုက်တွင် ဆောင့်မိလိုက်သော အချက်က အလွန်ပြင်းထန်လွန်းလှသဖြင့် သူမကို ယခုအချိန်အထိ စကားပြောရန် အားအင်မရှိလောက်အောင် နာကျင်နေစေဆဲပင်။

မြင်းကျောပေါ်သို့ ခေါ်ဆောင်ခံရချိန်တွင် ဝမ်းဗိုက်က လှုပ်ခါသွားသဖြင့် သူမသည် နာကျင်မှုကြောင့် နောက်တစ်ကြိမ် တင်းနေအောင် မျက်မှောင်ကြုတ်လိုက်ရသော်လည်း အားယူကာ ရှောင်းလိအား ရှင်းပြလိုက်သည်။

"ကလေး မရှိပါဘူး။ အစကတည်းက မရှိခဲ့တာပါ”

သို့သော် ရှောင်းလိသည် ထိုအလွန်အမင်း ပြင်းထန်သော ခံစားချက်များ၏ ဆွဲငင်မှုကြောင့် ဘာကိုမှ နားမဝင်နိုင်တော့ပေ။ သမားတော်ထောင်က ကိုယ်တိုင် သွေးစမ်းသပ်ပေးခဲ့သလို ဝေ့ဖိန်ကျင်းတို့ကလည်း သူမ၏ အဆင့်အတန်းကို အတည်ပြုရန်အတွက် သမားတော်ကို ရှာဖွေကာ သူမကို စစ်ဆေးခိုင်းခဲ့ရာတွင် အားလုံးက ကိုယ်ဝန်ရှိကြောင်း စစ်ဆေးတွေ့ရှိခဲ့ကြသဖြင့် ဘယ်လိုလုပ်ပြီး ကလေးမရှိဘဲ နေပါမည်နည်း။

ထို့ပြင် သူမက သည်လိုနာကျင်စွာဖြင့် ခါးနှင့် ဝမ်းဗိုက်ကို အုပ်ထားပြီး စကတ်အနားစတွင်လည်း သွေးများ ရှိနေသေးသည် မဟုတ်ပါလား။

သူမ၏ ထိုစကားက ယခုအချိန်တွင် သူ့နားထဲ၌ ထိုကလေး ပျက်ကျသွားနိုင်သည်ကို သိရှိသွားပြီးနောက် ဝမ်းနည်းကြေကွဲစွာ ပြောဆိုလိုက်သော စကားနှင့် ပိုတူနေလေသည်။

အဝေးတစ်နေရာတွင် စုန့်ချင်သည် ညီအစ်ကိုများကို ဆုတ်ခွာရန် တောတွင်းလျှို့ဝှက်အချက်ပြမှုများ လုပ်ဆောင်နေပြီး ကျောင်းပိုင်သည်လည်း ဒေါသထွက်နေသော မျက်နှာဖြင့် မြင်းကို ဒုန်းစိုင်းစီးကာ သည်ဘက်သို့ လိုက်ပါလာခဲ့သည်။

ရှောင်းလိ၏ မျက်လုံးများထဲတွင် နီရဲသော အငွေ့အသက်များ လှိမ့်တက်နေပြီး သူသည် ဘယ်တုန်းကမှ ဤမျှလောက် နောင်တမရခဲ့ဖူးကြောင်းကိုသာ ခံစားလိုက်ရသည်။

သောက်ကျိုးနည်း လွှတ်ပေးတာတွေ၊ သောက်ကျိုးနည်း တစ်ယောက်တစ်လမ်း သွားကြမယ်ဆိုတာတွေပဲ။ အကုန်လုံး သောက်ကျိုးနည်းတွေချည်းပဲ။

သူ၏ အလွန်အမင်း ဖိနှိပ်ထားသော အသက်ရှူသံက သားရဲကြီး၏ အသက်ရှူသံကဲ့သို့ လေးလံနေပြီး ဝိန်းယွီကို သူ၏ ကျယ်ဝန်းထူထဲသော ရင်ခွင်နှင့် လက်မောင်းကြားသို့ အပြည့်အဝ ထည့်သွင်းထားလိုက်သည်။ မည်သူတစ်ဦးတစ်ယောက်ကိုမှ ထပ်မံ လုယူခွင့်မပြုတော့မည့် အပြည့်အဝ ပိုင်စိုးထားသော အနေအထားတစ်ခုဖြစ်ပြီး ကျယ်ပြောလှသော လေနှင့်နှင်းများကြားသို့ မြင်းကို ဒုန်းစိုင်းစီးကာ ဝင်ရောက်သွားခဲ့ပြီး တည်ငြိမ်မှုကို အတင်းအားယူ ထိန်းသိမ်းကာ ပြောလိုက်လေသည်။

"ငါ မင်းကို သမားတော်ဆီ အရင်ခေါ်သွားပေးမယ်”

...