အခန်း ၁၉၉

အပိုင်း (၁၉၉.၁)

ဝေ့ကျိုး။

"...အဲ့ဒီ လူယုတ်မာက ခရိုင်မင်းသမီးနဲ့ သခင်လေးကို အဲ့ဒီလို ရက်ရက်စက်စက် သတ်ဖြတ်ပြီးတာနဲ့ စစ်သူကြီးဝေ့ထုံနဲ့ ပြင်းပြင်းထန်ထန် တိုက်ခိုက်ပြီး မြို့ထဲကနေ ထွက်ပြေးသွားခဲ့တယ်" ယွီကျိယွမ်သည် လက်တင်ကုလားထိုင်ပေါ်တွင် ထိုင်နေရင်း စကားအနည်းငယ် ပြောပြီးနောက် ဆက်တိုက် ချောင်းဆိုးနေလေ၏။

ရှောင်းလိ၏ ကန်ချက်ကြောင့် သူ၏နံရိုးများစွာ ကျိုးသွားခဲ့ပြီး ကလီစာများကိုပါ ထိခိုက်သွားစေခဲ့ပြီး အချိန်တိုအတွင်း ပြန်လည်သက်သာလာရန် မလွယ်ချေ။ အသံအနည်းငယ် ကျယ်ကျယ်ပြောလိုက်လျှင်ပင် သူ့ရင်ဘတ်ကို စူးရှစွာ နာကျင်သွားစေ၏။

မျက်နှာတစ်ခုလုံး ဖြူရော်လျက်ရှိသော ယွီကျိယွမ်သည် ပင်မစစ်တပ်နှင့်အတူ မြို့ထဲသို့ ယခုလေးတင် ပြန်လည်ရောက်ရှိလာသော ယွမ်ဖန်းကို ဆက်ပြောလိုက်သည်။

"စစ်သူကြီးဝေ့အန်း ကိစ္စကတော့... အဲ့ဒီနေ့က သခင်လေးရဲ့ ဝိညာဉ်ကမ္ပည်းတိုင်ရှေ့မှာ သူနဲ့ သခင်မကြီးတို့ အငြင်းပွားခဲ့ကြတယ်။ သခင်မကြီးရဲ့ ပြစ်တင်ဆုံးမခံရပြီးတဲ့နောက်မှာ သူက ရှက်ရွံ့သွားပြီး သူ့ရဲ့စစ်မိန့်တံဆိပ်ပြားကို အပ်နှံကာ အကျဉ်းချခံဖို့ တောင်းဆိုခဲ့တယ်"

ယွမ်ဖန်းသည် ဝေ့အန်းနှင့် ရင်းနှီးသော မိတ်ဆွေများဖြစ်ကြပြီး ဝေ့ချီရှန်းက ရှောင်းလိကို ထောင်ချလိုက်ချိန်တွင် ရှောင်းလိကို လွှတ်ပေးရန် တောင်းဆိုခဲ့ပြီးမှ ဝေ့ထုံနှင့် ပွတ်တိုက်မှုများ ရှိခဲ့ဖူးသည်။ သူ၏မိတ်ဆွေ ဝေ့အန်းမှာ စစ်မိန့်တံဆိပ်ပြား ရုပ်သိမ်းခံရကာ ထောင်ကျနေပြီး လော့ယန်ကို တိုက်ခိုက်ခဲ့သော သူ၏ကိုယ်ပိုင်တပ်ဖွဲ့များမှလွဲ၍ ဝေ့မိသားစု၏ တပ်ဖွဲ့အများစုမှာ ယခုအခါ ဝေ့ထုံ၏ ကွပ်ကဲမှုအောက်သို့ ရောက်ရှိနေပြီဖြစ်ကြောင်း သိလိုက်ရသောအခါ ယွမ်ဖန်းသည် ရှင်းလင်းချက်တစ်ခု တောင်းခံရန် ဝေ့ရှန်းထံသို့ သွားရောက်လိုခဲ့သည်။

သို့သော် ဝေ့ချီရှန်း သေဆုံးပြီးနောက် ဝမ်းနည်းပူဆွေးလွန်းသဖြင့် မကြာမီမှာပင် ဝေ့ရှန်းမှာ လေဖြတ်သွားခဲ့ကြောင်း သူ့ကို အသိပေးခဲ့ကြသည်။ ခင်ပွန်းဖြစ်သူကို ဆုံးရှုံးလိုက်ရပြီးနောက် သခင်မကြီးဝေ့သည် သူမ၏ သားသမီးနှစ်ဦးစလုံးကိုပါ ထပ်မံဆုံးရှုံးလိုက်ရသဖြင့် အိမ်တော်ကိစ္စများကို မစီမံနိုင်တော့ချေ။ ယခုအခါ ဝေ့အိမ်တော်ရှိ ကိစ္စရပ်အားလုံးကို ယွီကျိယွမ်ကသာ ကိုင်တွယ်ဖြေရှင်းနေရသည်။

သက်ရှိထင်ရှား ရှိစဉ်က ဝေ့ဖိန်ကျင်းသည် သူ့ကို အောင်မြင်မှုများစွာ ရရှိစေရန် ကူညီပေးခဲ့သော ယွီကျိယွမ်အပေါ် အလွန် အားထားခဲ့သည်။ ဝေ့ကျာမင်၏ နာရေးတွင် ဖြစ်ပွားခဲ့သော ပြဿနာအပြီး၌ ရှောင်းလိကို ချက်ချင်း ဖမ်းဆီးခဲ့သူမှာလည်း ယွီကျိယွမ်ပင် ဖြစ်သည်။ ဝေ့မိသားစုမှ စစ်သူကြီးများနှင့်လည်း ဆက်ဆံရေးကောင်းမွန်သဖြင့် သူက ဝေ့ရှန်းကိုယ်စား အိမ်တော်ကိစ္စများကို ယာယီ ကိုင်တွယ်ဖြေရှင်းနေခြင်းအပေါ် မည်သူကမျှ ကန့်ကွက်ခြင်း မရှိခဲ့ကြချေ။

ယွမ်ဖန်းမှာ ရွေးချယ်စရာ မရှိတော့ဘဲ ထိုနေ့က အဖြစ်အပျက်များကို သူ့ကိုသာ မေးမြန်းလိုက်ရတော့သည်။ သူ၏ ရှင်းပြချက်ကို နားထောင်ပြီးနောက် ယွမ်ဖန်းသည် အလွန်အမင်း ဝမ်းနည်းပူဆွေးဟန်ဖြင့် သက်ပြင်းချလိုက်၏။

"နယ်စားမင်း ကွယ်လွန်သွားတာတောင် မကြာသေးဘူး၊ သခင်လေးနဲ့ ခရိုင်မင်းသမီးက ဘယ်လိုလုပ်ပြီး..."

ယွီကျိယွမ်သည် ယွမ်ဖန်း၏ မျက်နှာအမူအရာကို သတိဖြင့် အကဲခတ်လိုက်ပြီး နှစ်ချက်သုံးချက်မျှ ချောင်းဆိုးလိုက်ကာ အားနည်းသောအသံဖြင့် ပြောလိုက်၏။

"မာကျားလျန်မှာ စစ်သူကြီးကို ကယ်တင်ခဲ့တုန်းက အဲ့ဒီလူယုတ်မာရှောင်းက တကယ်ပဲ သူရဲကောင်းဆန်ခဲ့တာလား၊ ဒါမှမဟုတ် လျန်စစ်စခန်းရဲ့ အမိန့်ပေးချက်အရ စစ်သူကြီးအပေါ် အသက်ကယ်ကျေးဇူးကို အသုံးချပြီး ကျွန်တော်တို့ဝေ့စစ်စခန်းထဲကို ဝင်ရောက်လာဖို့ အစကတည်းက ဟန်ဆောင်နေခဲ့တာလားဆိုတာ မသေချာသေးဘူး။ ဒါပေမဲ့ ရှောင်းလိက သူတို့ကို ဘယ်တုန်းကမှ သစ္စာမဖောက်ခဲ့ဘူးဆိုတာကို သက်သေပြဖို့အတွက် လျန်စစ်စခန်းက တမင်သက်သက် ရှင်းလင်းချက် ထုတ်ခဲ့ပြီး ဖေစုန့်ရဲ့ သွေးခွဲတဲ့ အကြံအစည်ထဲ ပါသွားလို့ အဲ့ဒီလူယုတ်မာကို မှားပြီး သတ်မိလုနီးပါး ဖြစ်ခဲ့တယ်လို့ ပြောလာကြတယ်။ တကယ့်ကို ရယ်စရာကောင်းလိုက်တာ! ဒီလောက် ကြီးမားတဲ့ ရန်ငြိုးတွေ ရှိနေတာတောင် ပြီးခဲ့တဲ့နှစ်က ဟန့်ယန်မင်းသမီး အဲ့ဒီရှောင်းလက်ထဲကို ကျရောက်သွားချိန်မှာ နယ်စားမင်း မသိအောင် သူ့ရဲ့ အဆင့်အတန်းကို တမင် ဖုံးကွယ်ပေးထားခဲ့တယ်လေ..."

ယွီကျိယွမ်၏ မျက်နှာပေါ်တွင် နက်ရှိုင်းသော နာကျင်မှုများ ပေါ်လွင်နေ၏။ "အခုတော့ အဲ့ဒီလူယုတ်မာက ကျွန်တော်တို့မြောက်ပိုင်းဝေ့ကို ဒီလို ကပ်ဘေးကြီး ဆိုက်ရောက်စေခဲ့ပြီ။ တကယ်လို့ သူက လျန်စစ်စခန်းဆီ တကယ်ပဲ ပြန်သွားခဲ့မယ်ဆိုရင် အရင်က သံသယဖြစ်စရာတွေ အကုန်လုံး အတည်ဖြစ်သွားမှာပဲ! လျန်စစ်စခန်းနဲ့ အဲ့ဒီလူယုတ်မာရှောင်း နှစ်ယောက်လုံးက ဒါကို နားလည်ထားလို့ပဲ လျန်စစ်စခန်းက သူတို့ရှင်းလင်းချက် ထုတ်ပြီးတဲ့နောက်မှာ ရှောင်းကို သူတို့စခန်းဆီ ပြန်လာဖို့ ဟန်ဆောင်ဖိတ်ခေါ်ဖို့အတွက် သံတမန်တွေ စေလွှတ်ခဲ့တာ။ ဒါက သူတို့ရဲ့ ဟန့်ယန်မင်းသမီးရဲ့ သဘောထားကြီးမှုနဲ့ အတိတ်က အမှားတွေကို ရင်ဆိုင်ရဲတဲ့ ဖြောင့်မတ်တည်ကြည်မှုကို ပြသဖို့ သက်သက်ပဲ။ အဲ့ဒီကတစ်ဆင့် ယန်မျိုးနွယ်စုဝင်တွေနဲ့ တောင်ပိုင်းနယ်စပ်က ပညာရှင်တွေက ဝိန်းမိသားစုရဲ့ အာဏာရှင်ဆန်မှုကို ကူညီဖြေရှင်းပေးဖို့ အကြောင်းပြချက် ခိုင်လုံသွားအောင် လုပ်လိုက်တာပဲ"

"ပြီးတော့ အဲ့ဒီရှောင်းက လျန်စစ်စခန်းကို ပြန်ဖို့ ငြင်းဆန်လိုက်တဲ့အခါ တခြားသူတွေက လျန်စစ်စခန်းရဲ့ အဆိပ်ခတ်ဖို့ ကြိုးစားခဲ့တဲ့ ကိစ္စကို မေးခွန်းထုတ်လို့ မရအောင် ဖြစ်သွားမှာ မဟုတ်ဘူးလား။ တကယ့်ကို အချိတ်အဆက်မိတဲ့ ပြဇာတ်ပါပဲ။ လျန်စစ်စခန်းနဲ့ အဲ့ဒီလူယုတ်မာရှောင်းတို့က ဒီပြဇာတ်တစ်ခုလုံးကို ပြီးပြည့်စုံအောင် ဖန်တီးထားခဲ့တာပဲ!"

စိတ်လှုပ်ရှားစွာ ပြောဆိုလိုက်သဖြင့် ယွီကျိယွမ်သည် သူ၏ဒဏ်ရာများကို ပိုဆိုးသွားစေကာ ပါးစပ်ကို အုပ်လျက် နောက်တစ်ကြိမ် အပြင်းအထန် ချောင်းဆိုးနေပြန်သည်။

အသက်ကို ပြန်လည်ရှူရှိုက်ပြီးနောက် သူသည် ဖြူဖပ်ဖြူရော် မျက်နှာဖြင့် ယွမ်ဖန်းကို ဦးညွှတ်လိုက်သည်။

"စစ်သူကြီးက စစ်သူကြီးဝေ့အန်းလိုပဲ သစ္စာတရားကို တန်ဖိုးထားတဲ့သူဆိုတာကို ကျွန်တော်မျိုး သိပါတယ်။ ဒါပေမဲ့ အဲ့ဒီရှောင်းက ဝေ့မိသားစုကို ဒုက္ခပေးဖို့အတွက် ခင်ဗျားတို့ နှစ်ယောက်လုံးရဲ့ ဂုဏ်သိက္ခာကို အသုံးချခဲ့တာ ဖြစ်နိုင်တယ်"

ယွမ်ဖန်း၏ မျက်နှာပေါ်တွင် မြိုသိပ်ထားသော ဒေါသများကို တွေ့ရပြီး အောင်မြင်စွာ ဖျောင်းဖျခံလိုက်ရပုံ ပေါ်သော်လည်း သူက မေးခွန်းတစ်ခု ထပ်မေးလိုက်၏။

"ဝေ့ရှန်းက ဘယ်အချိန်က လေဖြတ်သွားတာလဲ"

ဤကိစ္စကို ပြောလိုက်သောအခါ ယွီကျိယွမ်၏ မျက်နှာအမူအရာမှာ ပိုနာကျင်ကာ ဒေါသထွက်သွားဟန် ရှိလေသည်။ သူက သက်ပြင်းချလိုက်၏။

"စစ်သူကြီးက ရှေ့တန်းမှာ အဝေးကြီး ရောက်နေတော့ သိမှာ မဟုတ်ဘူး။ အဲ့ဒီသစ္စာဖောက်ရှောင်းက နယ်စားမင်းက သူ့ကို ဝံပုလွေမြင်းတပ်ကိုပဲ ပေးပြီး မြောက်ပိုင်းနယ်စပ်ရဲ့ ဘဏ္ဍာရေးအာဏာကို သခင်လေးရဲ့ လက်ထဲမှာ ချန်ထားခဲ့တာကို မကျေမနပ်ဖြစ်ပြီး နယ်စားမင်းရဲ့ နာရေးမှာ သူ့ရဲ့ လက်အောက်ငယ်သားတွေကို တမင်သက်သက် ပြဿနာရှာခိုင်းခဲ့တယ်။ သူတို့က ဂါရဝပြုဖို့ လာကြတဲ့ ကုန်သည်အသင်းခေါင်းဆောင်တွေကို ကိုယ်ထိလက်ရောက် ကျူးလွန်ပြီး သခင်လေးကို အရှက်ခွဲခဲ့ကြတာလေ။ ပြီးတော့ အဲ့ဒီအခွင့်အရေးကို ယူပြီး မြောက်ပိုင်းနယ်စပ် တစ်ခုလုံးက ကုန်သည်အသင်းတွေကို ထိန်းချုပ်ခွင့် တောင်းဆိုခဲ့တယ်။ အိမ်တော်ထိန်းချုပ် ဝေ့ရှန်းက ဒီကိစ္စပြီးတော့ ဒေါသထွက်ပြီး နာမကျန်း ဖြစ်သွားခဲ့တာပဲ"

ယွမ်ဖန်းသည် နောက်ဆုံးတွင် သူ၏ ကုလားထိုင်လက်တန်းကို အားပြင်းပြင်းဖြင့် ထုချလိုက်ပြီး ပူဆွေးဒေါသတကြီးဖြင့် ဟိန်းဟောက်လိုက်တော့သည်။

"အခုကြည့်ရတာ အဲ့ဒီတုန်းက အိမ်ထဲကို ဝံပုလွေသွင်းပေးခဲ့တဲ့သူက ငါကိုယ်တိုင် ဖြစ်နေပါလား!"

ယွီကျိယွမ်က အလျင်စလို ပြောလိုက်၏။ "စစ်သူကြီး... ခင်ဗျားလည်း အဲ့ဒီသစ္စာဖောက်ရှောင်းရဲ့ လှည့်စားတာကို ခံခဲ့ရတာပါ။ အခု အရေးကြီးဆုံးက မြောက်ပိုင်းဝေ့က ပြင်ပရန်တွေကို စည်းစည်းလုံးလုံးနဲ့ ရင်ဆိုင်ဖို့ပဲ! အဲ့ဒီသစ္စာဖောက်ရှောင်းက အရင်တုန်းက လူရိုင်းတွေရဲ့ နယ်မြေထဲကို ဝင်ရောက်ပြီး လူရိုင်းတွေ သူတို့ရဲ့ ပင်မစခန်းကို ပြောင်းရွှေ့သွားအောင် အတင်းအကျပ် လုပ်ပြခဲ့လို့ မြောက်ပိုင်းနယ်စပ်က လူတွေက သူ့ရဲ့ အောင်မြင်မှုတွေကို အပြိုင်အဆိုင် ချီးကျူးခဲ့ကြတယ်။ ဒါပေမဲ့ လူရိုင်းတွေရဲ့ နယ်မြေထဲက တိုက်ပွဲတွေက တကယ်တမ်း ဘယ်လို ဖြစ်ခဲ့လဲ။ သူနဲ့ သူ့လက်အောက်ငယ်သားတွေကလွဲရင် တခြားဘယ်သူက တကယ် သိလို့လဲ"

"အခု လူရိုင်းသူခိုးတွေ ပြန်ရောက်လာတာကို ကြည့်ရင် အရင်က လူရိုင်းတွေရဲ့ အင်အားကို သူ တကယ် မချေမှုန်းနိုင်ခဲ့ဘူးဆိုတာ ရှင်းနေတာပဲ! ကံကောင်းလို့ စစ်သူကြီးဝေ့ထုံက ယန်လဲ့တောင်ကို အချိန်မီ သွားရောက် ကာကွယ်နိုင်ခဲ့တယ်။ စစ်သူကြီးယွမ် ခင်ဗျားကို အမြန်ပြန်ခေါ်ရတဲ့ အကြောင်းရင်းက ယိုးကျိုးကို ကာကွယ်ဖို့နဲ့ လူရိုင်းတွေ လာတိုက်တဲ့အချိန်မှာ အဲ့ဒီသစ္စာဖောက်ရှောင်းက မင်းသမီးနဲ့ သခင်မကြီးကို ဒုက္ခပေးမှာ စိုးလို့ပါပဲ။ ပြီးတော့ မြောက်ပိုင်းနယ်စပ် ပြည်နယ်တွေကို စုစည်းပြီး သစ္စာဖောက်ရှောင်းကို အတူတူ အပြစ်ပေးဖို့နဲ့ ကောင်းကင်ဘုံက သခင်လေးနဲ့ ခရိုင်မင်းသမီးရဲ့ ဝိညာဉ်တွေကို နှစ်သိမ့်ပေးနိုင်ဖို့အတွက်ပါ!"

ယွမ်ဖန်းမှာ မြိုသိပ်ထားသော ဒေါသများ ပေါက်ကွဲထွက်လာသည့်နှယ် မတ်တတ်ရပ်လိုက်သည်။

"ငါ ဝေ့အန်းကို သွားတွေ့မယ်။ သခင်လေးနဲ့ ခရိုင်မင်းသမီးတို့ ရက်ရက်စက်စက် အသတ်ခံလိုက်ရတာကို မျက်စိရှေ့မှာတင် မြင်နေရပြီး မြောက်ပိုင်းနယ်စပ်မှာ လူစွမ်းလူစတွေ လိုအပ်နေတဲ့အချိန်မှာ သူက ဘယ်လိုလုပ် အရာအားလုံးကို စွန့်လွှတ်ပြီး ထောင်ထဲမှာ သနားစရာကောင်းအောင် နေနေရက်တာလဲ"

ထိုစကားကို ကြားသောအခါ ယွီကျိယွမ်သည် ခဏမျှ တုံ့ဆိုင်းသွားပြီးနောက် အခက်တွေ့နေသော မျက်နှာအမူအရာကို ပြသလိုက်၏။

"နယ်စားမင်း ကွယ်လွန်သွားပြီဖြစ်ပြီး စစ်သူကြီးဝေ့အန်းက အဲ့ဒီသစ္စာဖောက်ရှောင်းရဲ့ လက်အောက်မှာ အချိန်အကြာကြီး တာဝန်ထမ်းဆောင်ခဲ့ကာ သူ့ရဲ့ အပြည့်အဝ ယုံကြည်မှုကို ရထားခဲ့သူပါ။ အခု... သစ္စာဖောက်ရှောင်းက သခင်လေးနဲ့ ခရိုင်မင်းသမီးကို သတ်ဖြတ်ခဲ့တဲ့ ကိစ္စနဲ့ ပတ်သက်ပြီး ဖုံးကွယ်ထားတဲ့ အကြောင်းရင်းတွေ ရှိရမယ်လို့ သူက အခိုင်အမာ ပြောနေတယ်။ အဲ့ဒါကြောင့်ပဲ သခင်မကြီးကို ဒေါသထွက်စေခဲ့တာ..."

"အဓိပ္ပာယ်မရှိလိုက်တာ!" ယွမ်ဖန်းက အော်ဟစ်လိုက်သည်။ "သခင်လေးနဲ့ ခရိုင်မင်းသမီးတို့ ဒီလောက် ရက်စက်တဲ့ ကံကြမ္မာနဲ့ ရင်ဆိုင်ခဲ့ရတာတောင် ဘယ်လို သစ္စာတရားက ဒီကြီးမားလှတဲ့ ရန်ငြိုးထက် ပိုအရေးကြီးနိုင်မှာလဲ။ ငါ သူ့ကို စကားပြင်းပြင်းထန်ထန် ပြောပြီး လှုပ်နှိုးရမယ်!"

ယွမ်ဖန်း ဒေါသတကြီး ထွက်ခွာသွားပြီးနောက် ယွီကျိယွမ်သည် ခပ်ဖွဖွ နှစ်ချက်မျှ ချောင်းဆိုးလိုက်ကာ ယွမ်ဖန်း ထွက်သွားသော လမ်းဆီသို့ လေးနက်စွာ ငေးကြည့်လိုက်ပြီး သူ၏ အစောင့်များကို အမိန့်ပေးလိုက်၏။

"ထောင်ကို တစ်ယောက်ယောက် စောင့်ကြည့်ခိုင်းထား"

ခြံဝင်းအပြင်ဘက်သို့ ရောက်သည်နှင့် ယွမ်ဖန်း၏ ကိုယ်ရံတော်က အနားသို့ တိုးလာကာ တိုးတိုးလေး ပြောလိုက်သည်။

"စစ်သူကြီး... အိမ်တော်က အစေခံတွေက..."

ယွမ်ဖန်းက လက်တစ်ဖက်ကို မြှောက်ကာ ကိုယ်ရံတော်ကို စကားရပ်ရန် အချက်ပြလိုက်သည်။ သူတို့သည် အနည်းငယ် ထပ်လျှောက်သွားပြီး ဟင်းလင်းပြင်တစ်ခုသို့ ရောက်သောအခါ သူက အရှေ့ကို တည့်တည့်ကြည့်ရင်း ပြောလိုက်၏။

"ချောင်းနားထောင်မယ့်သူတွေကို သတိထား"

သူ၏အနောက် ခြေတစ်ဝက်ခန့်အကွာမှ လိုက်လာသော ကိုယ်ရံတော်သည် သတိကြီးစွာဖြင့် ခေါင်းညိတ်ပြလိုက်ပြီး ယခင်အကြောင်းအရာကို ဆက်ပြောလိုက်သည်။

"အိမ်တော်က အစေခံတွေက အဲ့ဒီနေ့က သခင်လေး လုပ်ကြံခံရတဲ့ တိကျတဲ့ အခြေအနေတွေကို သိပုံမရဘူး။ အရာအားလုံးက တိုက်ပွဲဖြစ်ပြီးတဲ့နောက်မှာ သခင်လေးဘက်က အဲ့ဒီလူကြီးမင်းယွီနဲ့ မင်းသမီးတို့ကပဲ အတည်ပြုပေးခဲ့ကြတာ"

ယွမ်ဖန်းက ထပ်ပြီး မှတ်ချက်မပေးတော့ချေ။ သူ ဝေ့အန်းကို တွေ့ရန် ထောင်ဆီသို့ သွားသောအခါ အကျဉ်းထောင် စင်္ကြံလမ်းမှ ထောင်မှူးများ ဆုတ်ခွာသွားသည်နှင့်တစ်ပြိုင်နက် ထောင်ခန်းအတွင်း အကျဉ်းကျနေသော ဝေ့အန်းကို အလွန်အမင်း နာကျင်စွာဖြင့် လှမ်းခေါ်လိုက်သည်။

"မင်း... လူမိုက်ကြီး!"

အလွတ်ဖြစ်နေသော အကျဉ်းခန်း နှစ်တန်းကြားတွင် ဤထောင့်ရှိ အခန်းတစ်ခန်းတည်း၌သာ ဝေ့အန်းကို အကျဉ်းချထားလေသည်။

နောင်တရစရာ စကားများကို ပြောဆိုနေစဉ် ဝေ့အန်း အနားသို့ တိုးလာသောအခါ ယွမ်ဖန်းသည် သူ၏ ကော်လာကို ဆွဲကိုင်ကာ အကျဉ်းခန်း၏ သစ်သားတိုင်များနှင့် ဆောင့်ဆွဲလိုက်ပြီး အော်ဟစ်လိုက်၏။

"မင်းက ယွီကျိုးကို စောင့်ကြပ်နေတာလေ! သခင်လေးနဲ့ ခရိုင်မင်းသမီးကို ဘယ်လိုလုပ်ပြီး အန္တရာယ်ဖြစ်အောင် လွှတ်ထားခဲ့ရတာလဲ။ မင်းက နယ်စားကြီးနဲ့ ထိုက်တန်ရဲ့လား"

ဤသို့ အော်ဟစ်ပြီးနောက် သူသည် ဝင်ပေါက်ဘက်သို့ နောက်တစ်ကြိမ် လှမ်းကြည့်လိုက်ပြီး လေသံကို နှိမ့်ကာ မေးလိုက်သည်။

"သခင်လေးနဲ့ ခရိုင်မင်းသမီး သေဆုံးတဲ့ ကိစ္စမှာ တကယ်တမ်း ဘာတွေ ဖြစ်ခဲ့တာလဲ"

ဝေ့အန်းသည် စိတ်ပျက်လက်ပျက်ဖြင့် ခေါင်းခါလိုက်ပြီး ယွမ်ဖန်းဘက်သို့ နှုတ်ခမ်းကို အနည်းငယ် ရွေ့ကာ ပြောလိုက်၏။

"ဝေ့မိသားစုထဲမှာ သစ္စာဖောက်တွေ ရှိနေတယ်"

သတင်းရရှိပြီး တပ်များကို ပြန်လည်ဦးဆောင်လာကတည်းက ယွမ်ဖန်းသည် တစ်ခုခု မှားယွင်းနေကြောင်း ခံစားခဲ့ရသည်။ သို့သော် သူသည် လျန်စစ်တပ်နှင့်အတူ လော့ယန်ကို တိုက်ခိုက်နေခဲ့ပြီး မြောက်ပိုင်းနယ်စပ်တွင် မရှိခဲ့သဖြင့် ထိုနေ့က တကယ်တမ်း ဘာတွေဖြစ်ခဲ့သည်ကို မသိခဲ့ချေ။

ယခုအချိန်တွင် မြောက်ပိုင်းနယ်စပ် တစ်ခုလုံးသည် ရှောင်းလိကို ဝေ့ချီရှန်း၏ မျိုးဆက်ကို သတ်ဖြတ်ကာ မြောက်ပိုင်းဝေ့ကို ထိန်းချုပ်ရန် ကြံစည်နေသော ဝံပုလွေလို ရက်စက်သည့် လူယုတ်မာအဖြစ် ပုတ်ခတ် ရှုတ်ချနေကြပြီး ဖေစုန့်ကလည်း နောက်ကွယ်မှ မီးလောင်ရာ လေပင့်ပေးကာ ပြည်သူများ၏ မကျေနပ်ချက်များကို လှုံ့ဆော်ပေးနေလေသည်။

အကယ်၍ သူကသာ ရှောင်းလိကို ခြွင်းချက်မရှိ ဆက်ကာကွယ်ပေးနေမည်ဆိုလျှင် ဒေါသထွက်နေကြသော ဝေ့စစ်သူကြီးများ၏ ဒေါသကို ပိုဆွပေးလိုက်သလို ဖြစ်သွားမည်ဖြစ်ပြီး ပူးပေါင်းကြံစည်သူများ၏ အကြံအစည်ထဲသို့ ရောက်သွားကာ သူ့ကို စစ်အာဏာ ရုပ်သိမ်းရန် အခွင့်အရေး ပေးလိုက်သလို ဖြစ်သွားပေလိမ့်မည်။

ထို့ကြောင့် ယွမ်ဖန်းမှာ သွယ်ဝိုက်သော နည်းလမ်းကို အသုံးပြုရန်မှလွဲ၍ ရွေးချယ်စရာ မရှိတော့ချေ။ သူက တိုးတိုးလေး ပြောလိုက်၏။

"ဝေ့ကျိုးကို မပြန်ခင် ငါက ဒီကိစ္စနဲ့ ပတ်သက်ပြီး ကျူကျွင်းဆီကို လျှို့ဝှက်စာတစ်စောင် ပို့ပြီး မေးခဲ့တယ်။ ကျူကျွင်းက ငါ့ကို ဘာပဲဖြစ်ဖြစ် ယွီကျိယွမ်ရဲ့ အသက်ကို ကာကွယ်ပေးရမယ်လို့ပဲ ပြန်စာပို့ခဲ့တယ်"

ဤစကားက ဝေ့အန်းကို တစ်ခုခုကို ဝိုးတဝါး သဘောပေါက်သွားစေခဲ့သည်။ သူက ပြောလိုက်၏။

"အဲ့ဒီနေ့က ကျူကျွင်းရဲ့ ဘေးမှာရှိနေတဲ့ စစ်သူကြီးကျန်းက ဒီယွီဆိုတဲ့လူက ဖေစုန့်ရဲ့ သူလျှိုပဲလို့ အော်ပြောခဲ့တယ်လို့ ငါ ကြားတယ်..."

ယွမ်ဖန်း၏ မျက်နှာအမူအရာ အနည်းငယ် ပြောင်းလဲသွား၏။ သူသည် ဝင်ပေါက်ဘက်သို့ နောက်တစ်ကြိမ် လှမ်းကြည့်လိုက်ပြီး လေသံကို နှိမ့်ကာ ပြောလိုက်သည်။

"အခု မြောက်ပိုင်းနယ်စပ် တစ်ခုလုံးက ကျူကျွင်းကို ကျိန်ဆဲနေကြတယ်။ ပူးပေါင်းကြံစည်သူတွေက မင်းကို စစ်အာဏာ အပ်နှံဖို့ ဖိအားပေးခဲ့တယ်။ အဲ့ဒီယွီဆိုတဲ့လူက အရင်တုန်းက သခင်လေးကို စစ်ရေးအောင်မြင်မှုတွေ အများကြီး ရအောင် ကူညီပေးခဲ့ပြီး သူ့ရဲ့ စကားအပြောအဆို ကောင်းမှုနဲ့ စစ်သူကြီး အများအပြားရဲ့ ထောက်ခံမှုကို ရယူထားတယ်။ သခင်မကြီးနဲ့ မင်းသမီးကလည်း သူ့ကို အပြည့်အဝ ယုံကြည်ကြတယ်။ ဝေ့ကျိုးကို အခုမှ ပြန်ရောက်လာတဲ့ ငါ့အနေနဲ့ ဒီအခြေအနေတွေအောက်မှာ သေသေချာချာ စုံစမ်းစစ်ဆေးဖို့ အဆင်မပြေဘူး။ ဒါပေမဲ့ တကယ်လို့ အဲ့ဒီယွီဆိုတဲ့လူက ဖေစုန့်ရဲ့ သူလျှိုသာ တကယ် ဖြစ်နေမယ်ဆိုရင် မင်းသမီးက..."

သူက စကားကို အဆုံးမသတ်လိုက်သော်လည်း ဝေ့အန်းသည် ယွမ်ဖန်း၏ အဓိပ္ပာယ်ကို နားလည်လိုက်လေသည်။

ရှောင်းလိအပေါ် စွပ်စွဲချက်များသည် သက်သေများဟု ဆိုကြသော ယွီကျိယွမ်နှင့် ဝမ်းဝမ်ကျိန်းတို့၏ ထွက်ဆိုချက်များမှတစ်ဆင့် လုပ်ကြံဖန်တီးထားခြင်း ဖြစ်သည်။ ယွီကျိယွမ်၏ နောက်ခံမှာ မသန့်ရှင်းဘူးဆိုလျှင် သူ့ကို ဖြေရှင်းလို့ ရနိုင်သေးသည်။ သို့သော် ဝမ်းဝမ်ကျိန်းကရော။

သူမ၏ လက်ရှိ အဆင့်အတန်းသည် ယခင် ကျင့်မင်းသမီးသက်သက် မဟုတ်တော့ဘဲ ဝေ့မိသားစု၏ တစ်ခုတည်းသော ကျန်ရစ်သည့် သွေးသားကို ကိုယ်ဝန်လွယ်ထားသော သခင်မလေးလည်း ဖြစ်နေလေသည်။

ဝေ့အန်းသည်လည်း ကိုယ်ဝန်ကို အခွင့်ကောင်းယူကာ ဝမ်းဝမ်ကျိန်းသည် ဝေ့ဖိန်ကျင်းနှင့် သူ၏နှမတို့ကို သတ်ဖြတ်သည့်အမှုတွင် ရှောင်းလိကို လုပ်ကြံစွပ်စွဲရန် ယွီကျိယွမ်အား ကူညီပေးခဲ့ပြီး ၎င်းမှတစ်ဆင့် ကလေးကို အကြောင်းပြကာ သူမ၏ အနာဂတ်အဆင့်အတန်းကို လုံခြုံစေရန် လုပ်ဆောင်ခဲ့သည်ဟု အမှန်တကယ်ပင် သံသယရှိခဲ့သည်။

မည်သို့ပင်ဆိုစေကာမူ ဝေ့ဖိန်ကျင်းသည် ဝမ်းဝမ်ကျိန်းကို မင်းသမီးတစ်ပါးကဲ့သို့ ဘယ်တုန်းကမှ မဆက်ဆံခဲ့ဘဲ အရှက်ခွဲခဲ့သည်များကို သူ ကိုယ်တိုင် မြင်တွေ့ခဲ့ရသည်။ သို့သော် အရာအားလုံးအတွက် သက်သေအထောက်အထား လိုအပ်လေသည်။

ဝမ်းဝမ်ကျိန်းနှင့် ယွီကျိယွမ်တို့က ဝေ့ဖိန်ကျင်းနှင့် သူ၏နှမကို သတ်ဖြတ်မှုဖြင့် ရှောင်းလိကို စွပ်စွဲခဲ့ကြသည်— သူတို့က အနည်းဆုံးတော့ အခင်းဖြစ်ပွားရာတွင် ရှိနေခဲ့သော သက်သေများ ဖြစ်ကြသည်။ သူက သူ၏ သံသယများကို ပွင့်ပွင့်လင်းလင်း ထုတ်ပြောလိုက်မည်ဆိုလျှင် သူ့မှာ ဘာသက်သေအထောက်အထား ရှိနေသနည်း။

ဝမ်းဝမ်ကျိန်း၏ အဆင့်အတန်း အတုကို ဖော်ထုတ်၍ မရနိုင်သလို သူမနှင့် ဝေ့ဖိန်ကျင်းတို့သည် အများရှေ့တွင် အပြန်အလှန် လေးစားမှုရှိသော ဟန်ဆောင်မှုကို အမြဲတမ်း ထိန်းသိမ်းထားခဲ့ကြသည်။ ဝမ်းဝမ်ကျိန်းသည် မမွေးဖွားသေးသော ကလေးအတွက် လမ်းခင်းပေးရန် ဝေ့ဖိန်ကျင်းကို သတ်ဖြတ်ပြီး ရှောင်းလိကို လုပ်ကြံစွပ်စွဲခဲ့သည်ဆိုသည်ကို ဘယ်သူက ယုံကြည်မည်နည်း။

အကယ်၍ ဝေ့ဖိန်ကျင်းသာ သက်ရှိထင်ရှား ရှိနေသေးလျှင် သူတို့၏ ကလေးသည် အမွေဆက်ခံခွင့် ရဦးမည် မဟုတ်ပါလား။ ထို့အပြင် လအနည်းငယ်အတွင်းမှာပင် ဝေ့ချီရှန်း၏ မျိုးဆက်မှာ ဝမ်းဝမ်ကျိန်းနှင့် ဝေ့သခင်မကြီးသာ ကျန်ရှိတော့ပြီး အချင်းချင်း မှီခိုနေရသော ဆင်းရဲဒုက္ခရောက်နေသည့် ချွေးမနှင့် ယောက္ခမတို့သာ ဖြစ်သွားခဲ့သည်။ အကယ်၍ သူက ဝမ်းဝမ်ကျိန်းကို ဆက်သံသယဝင်နေမည်ဆိုလျှင် သူသည် ရှောင်းလိကို အပြစ်ကင်းစင်စေရန် မိဘမဲ့နှင့် မုဆိုးမများကို အသုံးချနေသည်ဟု မြင်ခံရမည့်အပြင် ဝေ့မိသားစုက ထောက်ခံထားသော ယခင်ကျင့်မင်းသမီးကိုပင် လုပ်ကြံစွပ်စွဲနေသည်ဟု သတ်မှတ်ခံရမည် မဟုတ်ပါလား။

စစ်မိန့်တံဆိပ်ပြားကို အပ်နှံရန် ဖိအားပေးခံရပြီးနောက် အကျဉ်းထောင်တွင်း ရောက်ရှိနေစဉ် ရက်များအတွင်း ဝေ့အန်းသည် အရာများစွာကို နားလည်သဘောပေါက်လာခဲ့လေသည်။

ထိုနေ့က ဝေ့ထုံ ဦးဆောင်သော ဝေ့စစ်အုပ်စုဟောင်းသည် ရှောင်းလိကို လူသတ်သမားအဖြစ် အခိုင်အမာ ယုံကြည်ခဲ့ကြခြင်းမှာ အဓိကအားဖြင့် ဝေ့အစောင့်တပ်ဟောင်းများထဲမှ အများအပြားသည် သူ့အပေါ် အချိန်ကြာမြင့်စွာ မကျေမနပ် ဖြစ်နေခဲ့သောကြောင့်ပင်။ မကြာသေးမီက စစ်ဘက်ဆိုင်ရာ သံချပ်ကာဝတ်စုံများ ဝယ်ယူရာတွင် ရှောင်းလိ၏ လက်အောက်ငယ်သားများက ဝေ့ချီရှန်း၏ နာရေးတွင် ပြဿနာရှာခဲ့ကြသဖြင့် ရှောင်းလိသည် ဝေ့ဖိန်ကျင်းကို လုံးဝ လွှမ်းမိုးသွားပြီဖြစ်ကြောင်း သူတို့ နားလည်သွားစေခဲ့သည်။

ယခင်ကျင့်မင်းသမီး၏ ကြင်ယာတော်ဟု ဆိုကြသော ဝေ့ဖိန်ကျင်းသည် အများမြင်အောင် ပြသထားသော ရုပ်သေးရုပ် တစ်ရုပ်သာ ဖြစ်လေသည်။ သူတို့သည် ဝေ့မိသားစုအပေါ် မည်မျှပင် သစ္စာရှိပါစေ ရှောင်းလိ၏ လက်အောက်ရှိ လူများကိုတော့ ဘယ်သောအခါမှ ကျော်ဖြတ်နိုင်မည် မဟုတ်ချေ။

ထို့ကြောင့် ဝေ့မိသားစု၏ သခင်မလေး ဝမ်းဝမ်ကျိန်းနှင့် ဝေ့ဖိန်ကျင်း၏ ယုံကြည်ရသော လက်ထောက် ဖြစ်သူ ယွီကျိယွမ်တို့ ကိုယ်တိုင်က ရှောင်းလိကို စွပ်စွဲလာသောအခါ ယင်းက ရှောင်းလိကို ဖြုတ်ချရန် သူတို့အတွက် ပြီးပြည့်စုံသော အကြောင်းပြချက်တစ်ခု ဖြစ်သွားခဲ့သည်။ ဝေ့ဖိန်ကျင်း၏ သေဆုံးမှုက သံသယဖြစ်ဖွယ် ကောင်းနေလျှင်ပင် သူတို့က မျက်ကွယ်ပြုထားရန် ရွေးချယ်ခဲ့ကြသည်။

မည်သို့ပင်ဆိုစေကာမူ ဤလှုပ်ရှားမှုသည် သစ္စာတရားကြောင့် မဟုတ်ဘဲ ကိုယ်ကျိုးစီးပွားကြောင့်သာ မောင်းနှင်နေခြင်း ဖြစ်သည်။

ဝေ့အန်းသည် ချမ်းစိမ့်မှုနှင့် ပင်ပန်းနွမ်းနယ်မှုကိုသာ ခံစားနေရ၏။ ရှုပ်ထွေးသော မျက်နှာအမူအရာဖြင့် သူက ပြောလိုက်သည်။

"တကယ်လို့ မင်းသမီးအတုက ဖေစစ်စခန်းရဲ့ သူလျှိုနဲ့ ပူးပေါင်းကြံစည်တာလောက်ပဲဆိုရင် ဖြေရှင်းလို့ ရနိုင်သေးတယ်— သူလျှိုကို ရှင်းပစ်ပြီး မင်းသမီးအတုကို အကျယ်ချုပ် ချထားလိုက်ရုံပဲ။ ငါ ကြောက်တာက... နယ်စားမင်း ကွယ်လွန်သွားပြီးနောက် ဩဇာအာဏာတွေ လျော့ကျသွားပြီး စစ်သူကြီးတွေက ကိုယ့်အကျိုးအတွက် ကိုယ်စီ အကြံအစည်တွေ ထုတ်လာကြမှာကိုပဲ..."

"နယ်စားမင်းမှာ သူလျှိုကို ဖော်ထုတ်ဖို့ နည်းလမ်းရှိနိုင်ပေမဲ့ ပြဿနာရှာဖို့ အခွင့်အရေးကို ယူနေတဲ့သူတွေက သူတို့ကိုယ်သူတို့ ထိန်းချုပ်နိုင်မလားဆိုတာကတော့ နောက်ထပ် ကိစ္စတစ်ခုပဲ။ ဒီအဖြစ်အပျက်က နယ်စားမင်းကို သေချာပေါက် စိတ်ဓာတ်ကျသွားစေမှာပဲ။ တကယ်လို့ သူကသာ မြောက်ပိုင်းဝေ့ကို စွန့်လွှတ်လိုက်မယ်ဆိုရင် တကယ့် ကပ်ဘေးကြီးက ဆိုက်ရောက်လာတော့မှာ! နယ်စားမင်းက တစ်ချိန်တုန်းက ဒီရှေ့ဆက်ရမယ့်လမ်းကို ကြိုးကြိုးစားစား ပုံဖော်ပေးခဲ့တာ တကယ်ကို နှမြောစရာကောင်းတာပဲ..."

ယွမ်ဖန်းသည်လည်း ဝမ်းနည်းမှုလှိုင်းတံပိုးတစ်ခုကို ခံစားလိုက်ရသည်။

သူသေဆုံးပြီးနောက် ဝေ့ဖိန်ကျင်းသည် ဝေ့စစ်အုပ်စုဟောင်းကို ထိန်းချုပ်နိုင်မည် မဟုတ်သလို မြောက်ပိုင်းနယ်စပ်ကိုလည်း ကာကွယ်နိုင်မည် မဟုတ်ကြောင်း ဝေ့ချီရှန်း သိထားခဲ့သဖြင့် အရာအားလုံးကို ရှောင်းလိထံ လွှဲပြောင်းပေးခဲ့ပြီး ဝေ့ဖိန်ကျင်းကို ပူပင်သောကကင်းသော အထက်တန်းလွှာ တစ်ဦးအဖြစ် နေထိုင်စေရန် ရည်ရွယ်ခဲ့သည်။ သို့သော် ဤအစီအစဉ်သည် နောက်ဆုံးတွင် ဖျက်ဆီးခံလိုက်ရလေပြီ။

ဝေ့အန်းသည် စစ်အာဏာကို အပ်နှံရန် ဖိအားပေးခံရခြင်းမှာ ဝေ့ထုံနှင့် ဝေ့စစ်သူကြီးများက ဝေ့ဖိန်ကျင်းအတွက် တရားမျှတမှုကို ရှာဖွေလိုသောကြောင့် မဟုတ်ဘဲ သူတို့ကိုယ်တိုင် အာဏာကို သိမ်းပိုက်လိုသောကြောင့်ပင်။

ဝေ့ချီရှန်း သက်ရှိထင်ရှား ရှိစဉ်က မြောက်ပိုင်းနယ်စပ်ရှိ သူ၏ ဩဇာတိက္ကမသည် ဆယ်စုနှစ်တစ်ခုကျော်ကြာ တည်ဆောက်ထားခဲ့ခြင်း ဖြစ်သည်။ ဝေ့စစ်စခန်း တစ်ခုလုံးကို သူက လေ့ကျင့်သင်ကြားပေးခဲ့ပြီး ရာထူးတိုးမြှင့်ခြင်းများမှာလည်း ရှင်းလင်းပြတ်သားသဖြင့် ဘယ်သူကမှ သူ့ကို မဆန့်ကျင်ဝံ့ခဲ့ချေ။

သို့သော် ရှောင်းလိက မြောက်ပိုင်းဝေ့ကို လွှဲပြောင်းရယူပြီးနောက်တွင် သူ့မှာ ကိုယ်ပိုင် သစ္စာခံတပ်ဖွဲ့များနှင့် သူနှင့်အတူ အသေခံတိုက်ပွဲဝင်ခဲ့ကြသော ရဲရင့်သည့် စစ်သူကြီးများစွာ ရှိနေနှင့်ပြီး ဖြစ်သည်။ သူက အကျိုးစီးပွားများကို မည်မျှပင် မျှတအောင် ချိန်ညှိပေးပါစေ အချို့သော ဝေ့စစ်သူကြီးများကတော့ ဝေ့မိသားစုအပေါ် တိုက်ရိုက် သစ္စာစောင့်သိခြင်းက ပိုမိုကောင်းမွန်သော အနာဂတ်ကို ပေးစွမ်းနိုင်သည်ဟု ယုံကြည်နေဆဲပင်။

ဝမ်းဝမ်ကျိန်းနှင့် ယွီကျိယွမ်တို့ ဖန်တီးလိုက်သည့် အကြောင်းပြချက်နှင့်အတူ လက်ရှိ ရှောင်းလိကို ပုတ်ခတ်ရှုတ်ချနေသူများထဲတွင် လူဘယ်နှစ်ယောက်က ဟန်ဆောင်ပြီး မသိကျိုးကျွန်ပြုနေကြကာ လူဘယ်နှစ်ယောက်က တကယ်တမ်း သွေးထိုးလှုံ့ဆော်ခံခဲ့ရသည်ကို ခွဲခြားသိမြင်ရန် မဖြစ်နိုင်တော့ချေ...

ယွမ်ဖန်းက မျက်လုံးများကို မှိတ်လိုက်ပြီး ပြောလိုက်တော့သည်။ "အဲ့ဒီ လူယုတ်မာတွေကို ငါတို့ အမြစ်ပြတ် ရှင်းလင်းပြီးတဲ့နောက်မှာ နယ်စားမင်းဆီကို ငါ ကိုယ်တိုင် တောင်းပန်ပြီး မြောက်ပိုင်းဝေ့ကို ပြန်လာဖို့ တောင်းဆိုပါ့မယ်"

...

အပိုင်း (၁၉၉.၂)

ဝေ့အိမ်တော်။

အစေခံတစ်ယောက်သည် လက်ဖက်ရည်ဗန်းကို ကိုင်ဆောင်လျက် ဝင်ရောက်လာ၏။ စားပွဲတွင် စာရွက်စာတမ်းများကို ကိုင်တွယ်ဖြေရှင်းနေသော ယွီကျိယွမ်သည် ခြေသံများကို ကြားသော်လည်း ခေါင်းမော့မကြည့်ခဲ့ချေ။ "အဲ့ဒီယွမ်ဆိုတဲ့ကောင်က ထောင်ထဲမှာ ဝေ့အန်းကို သွားတွေ့တုန်းက ဘာတွေပြောခဲ့သေးလဲ"

အစေခံသည် တိတ်ဆိတ်နေသော်လည်း ခြေသံများက ပိုနီးကပ်လာခဲ့၏။

ယွီကျိယွမ်သည် စိတ်ထဲတွင် တစ်မျိုးဖြစ်သွားပြီး မော့ကြည့်လိုက်သောအခါ အစေခံ၏ အင်္ကျီလက်ထဲမှ အေးစက်နေသော သံမဏိလက်နက်၏ အလင်းရောင်ကို မြင်တွေ့လိုက်ရသည်။ သူ၏ မျက်လုံးများက စူးရှသွားပြီး မင်သွေးကျောက်ကို ချက်ချင်း ကောက်ယူကာ ဝင်ရောက်လာသူကို ပစ်ပေါက်လိုက်၏။

အစေခံအဖြစ် ဟန်ဆောင်ထားသော သိမ်းငှက်အမဲလိုက်ခွေးသည် ရှောင်တိမ်းလိုက်ချိန်တွင် မင်ရည်များ ပန်းထွက်သွားတော့သည်။ ပြုတ်ကျသွားသော ဗန်းထဲမှ လက်ဖက်ရည်ပန်းကန်များ ကွဲအက်သွားသံသည် မင်သွေးကျောက် ပြုတ်ကျသံနှင့် ရောယှက်သွားပြီး အခန်းတစ်ခုလုံး ဖရိုဖရဲ ဖြစ်သွားတော့သည်။

ထိုအချိန်လေးကို အခွင့်ကောင်းယူ၍ ယွီကျိယွမ်သည် ကုလားထိုင်တစ်လုံးကို ကန်ချလိုက်ပြီး တံခါးဆီသို့ ပြေးသွားရင်း အော်ဟစ်လိုက်လေသည်။ "အစောင့်တွေ... လုပ်ကြံတဲ့သူရှိတယ်"

အလွန်အမင်း ထိတ်လန့်ကြောက်ရွံ့မှုကြောင့် သူ၏ စိတ်အာရုံများသည် ခဏတာ မူးဝေသွားပြီး သူ့ခြေလက်များသည်လည်း ရေခဲလို အေးစက်သွားတော့၏။

သူက မြောက်ပိုင်းဝေ့မှာ နေရာတကျ အခြေချနိုင်ခဲ့ပြီးတဲ့နောက် သူ့ကို ကာကွယ်ဖို့နဲ့ ကူညီဖို့ ဖေစုန့် လွှတ်လိုက်တဲ့ သိမ်းငှက်အမဲလိုက်ခွေးတွေက ဘာဖြစ်လို့ ရုတ်တရက် လူသတ်ချင်စိတ် ပေါက်သွားရတာလဲ။

ယွီကျိယွမ် ထွက်ပြေးသွားသည်ကို မြင်သောအခါ သိမ်းငှက်အမဲလိုက်ခွေးသည် ဘာမှဂရုမစိုက်ဘဲ အင်္ကျီလက်ထဲတွင် ဝှက်ထားသော ဓားမြှောင်ကို ဆွဲထုတ်ကာ သူ့ဆီသို့ တည်ငြိမ်စွာ ဆက်လက် လျှောက်လာခဲ့သည်။

တံခါးက ဆွဲဖွင့်ခံလိုက်ရသည်။ ယွီကျိယွမ်သည် နောက်တစ်ကြိမ် အကူအညီတောင်းရန် မအော်နိုင်ခင်မှာပင် ခြံဝင်းအပြင်ဘက်တွင် စောင့်ကြပ်နေသော သိမ်းငှက်အမဲလိုက်ခွေး တစ်စုသည်လည်း သူတို့၏ ခါးကြားမှ ဓားများကို ဆွဲထုတ်ကာ သူ့ကို ချိန်ရွယ်ထားသည်ကို မြင်တွေ့လိုက်ရ၏။

ယွီကျိယွမ်သည် နောက်သို့ ဆုတ်လိုက်ပြီး ဖြူရော်နေသော မျက်နှာဖြင့် ဖြစ်ပျက်နေသည်များကို မယုံကြည်နိုင်သည့်အလား သိမ်းငှက်အမဲလိုက်ခွေးများကို လက်ညှိုးထိုးကာ အော်ဟစ်လိုက်လေသည်။ "မင်းတို့တွေ ပုန်ကန်နေကြတာလား။ မင်းတို့ကို ဘယ်သူက အဲသတ္တိတွေ ပေးထားတာလဲ"

သိမ်းငှက်အမဲလိုက်ခွေးများသည် တိတ်ဆိတ်နေပြီး ဓားများကို မြှောက်ကာ တစ်လှမ်းချင်း ရှေ့သို့ တိုးလာကြသည်။

နောက်သို့ ဆုတ်လာသည်နှင့်အမျှ အလွန်အမင်း ထိတ်လန့်ကြောက်ရွံ့မှုနှင့် မယုံကြည်နိုင်မှုတို့ကြား ရုန်းကန်နေရသော ယွီကျိယွမ်၏ မျက်နှာအမူအရာတွင် မျှော်လင့်ချက် ကင်းမဲ့ခြင်းမှ ပေါက်ဖွားလာသော ရူးသွပ်မှု အရိပ်အယောင် အနည်းငယ် ပေါ်ထွက်လာခဲ့၏။ သူက စူးရှစွာ အော်ဟစ်လိုက်သည်။ "ငါနဲ့ ငါ့အဖေက အမတ်ချုပ်အတွက် ထူးချွန်တဲ့ တာဝန်တွေကို ထမ်းဆောင်ခဲ့တာကွ။ မင်းတို့က ငါ့ကို ဘယ်လိုလုပ် သတ်ရဲရတာလဲ"

တစ်စုံတစ်ယောက်က နင်းမိလိုက်သဖြင့် ကြွေပန်းအိုးကွဲသံသည် အနောက်ဘက်မှ ထွက်ပေါ်လာသည်။ ယွီကျိယွမ်သည် လှည့်ကြည့်လိုက်သောအခါ သူ့ကို လုပ်ကြံရန် ကြိုးစားခဲ့သော သိမ်းငှက်အမဲလိုက်ခွေးမှာ ယခုအခါ ခြေ ၂ လှမ်းခန့် အကွာသို့ ရောက်ရှိနေလေသည်။ ထိုသူက ပြောလိုက်လေသည်။ "အဲ့ဒီတုန်းက သူ့ကို ဖော်ထုတ်ခဲ့လို့ ရှောင်းလိက မင်းအပေါ် ရန်ငြိုးထားနေတယ်။ ဒါပေါ့လေ မင်းက အဲ့ဒီသစ္စာဖောက်ရှောင်းရဲ့ လက်ချက်နဲ့ သေရမှာပေါ့"

ထိုသို့ပြောပြီးသည်နှင့် သူသည် ဓားမြှောင်ဖြင့် သူ့ကို တည့်တည့် ထိုးချလိုက်တော့သည်။

ယွီကျိယွမ်သည် ထိတ်လန့်တကြားဖြင့် "ကယ်ကြပါဦး" ဟု နောက်တစ်ကြိမ် အော်ဟစ်ကာ အချိုးမကျစွာ ရှောင်တိမ်းလိုက်သည်။ သို့သော် ဒဏ်ရာရထားပြီးဖြစ်သော စစ်ဗျူဟာမှူး တစ်ယောက်အနေဖြင့် အသက်လုကာ ရှောင်တိမ်းလိုက်သော်လည်း ဓားမြှောင်ကို သေစေနိုင်သော နေရာမှ လွဲသွားစေရန်သာ တတ်နိုင်ခဲ့ပြီး သူ့ပခုံးကျောဘက်ကို ထိုးစိုက်ခံလိုက်ရသည်။

သူသည် နံရံတွင် ကပ်ထားသော နှင်းဆီသစ်သား အရာရှိကုလားထိုင်ပေါ်သို့ လဲကျသွားတော့သည်။ သူ့ပခုံးပေါ်က ဒဏ်ရာမှ သွေးများ ပန်းထွက်လာပြီး အသေကောင်လို ဖြူဖပ်ဖြူရော် ဖြစ်နေသော သူ့မျက်နှာပေါ်တွင် ချွေးအေးများ ဖုံးလွှမ်းသွားခဲ့သည်။ ထိုအခိုက်အတန့်တွင် သူသည် အကြောင်းအရာများစွာကို သဘောပေါက်သွားသယောင်။

ထိုဓားချက်က သူ့ကို ချက်ချင်း မသေစေခဲ့သဖြင့် သိမ်းငှက်အမဲလိုက်ခွေးသည် စိတ်ပျက်စွာ စုပ်သပ်လိုက်ချိန်တွင် ယွီကျိယွမ်က ခက်ခဲစွာဖြင့် ပြောလိုက်၏။ "ငါ့... ငါ့အဖေ တစ်ခုခုများ ဖြစ်သွားလို့လား"

သိမ်းငှက်အမဲလိုက်ခွေးက ပြန်ပြောလိုက်၏။ "အမတ်ချုပ် ရွေးချယ်ပေးလိုက်တဲ့ လမ်းက မင်းရော မင်းအဖေအတွက်ပါ ကောင်းဖို့အတွက်ပဲ"

သူက ယွီကျိယွမ်၏ ကျောမှ ဓားမြှောင်ကို ဆွဲထုတ်ကာ နောက်တစ်ကြိမ် ထိုးရန် ပြင်လိုက်ချိန်တွင် မြားတစ်သုတ်သည် အခန်းထဲသို့ ပစ်ခတ်ဝင်ရောက်လာတော့၏။

အခန်းထဲရှိ သိမ်းငှက်အမဲလိုက်ခွေးများသည် သူတို့၏ ဓားများဖြင့် မြားများကို အသည်းအသန် ကာကွယ်လိုက်ကြ၏။ ဓားမြှောင်ကိုင်ထားသော သူသည် မြားများကို ရှောင်တိမ်းနေစဉ်မှာပင် ယွီကျိယွမ်၏ အသက်ကို နှုတ်ယူရန် ကြိုးစားနေဆဲပင်။ သို့သော် နောက်ထပ်မြားတစ်စင်းသည် ပွင့်ဟနေသော ပြတင်းပေါက်မှတစ်ဆင့် ပျံသန်းလာပြီး ထိုသိမ်းငှက်အမဲလိုက်ခွေး၏ ရင်ဘတ်ကို တည့်မတ်စွာ ထိမှန်သွားခဲ့သည်။ နောက်ဆုံးတွင် သူသည် သွေးများ အန်ကျလာပြီး လဲကျသွားတော့သည်။

ယွမ်ဖန်းသည် သူ၏ လေးကို သိမ်းလိုက်ပြီး ဒူးလေးများနှင့် ဓားများကို ကိုင်ဆောင်ထားသော သူ့အနောက်မှ သံချပ်ကာစစ်သည်များကို အချက်ပြလိုက်၏။ "လုပ်ကြံတဲ့သူတွေကို မြန်မြန်ဖမ်းပြီး သခင်ကြီးယွီကို ကယ်တင်ကြ"

သံချပ်ကာစစ်သည် တစ်အုပ်သည် အခန်းထဲသို့ ဝင်ရောက်လာကြသည်။ အထဲရှိ သိမ်းငှက်အမဲလိုက်ခွေးများသည် မဆုတ်ခွာခင် ယွီကျိယွမ်ကို သတ်ဖြတ်ရန် ရည်ရွယ်ထားဆဲ ဖြစ်သော်လည်း ယွမ်ဖန်း၏ လေးပစ်စွမ်းရည်မှာ အလွန် ပြောင်မြောက်လှပေရာ ယွီကျိယွမ်ထံသို့ ဓားရွယ်လိုက်သူတိုင်းသည် သူ၏ လေးကြိုးမှတစ်ဆင့် ပစ်ခတ်ခံလိုက်ရလေသည်။

သံချပ်ကာစစ်သည်များက ယွီကျိယွမ်ကို သိမ်းငှက်အမဲလိုက်ခွေးများနှင့် ခွဲထုတ်လိုက်သည်နှင့် တစ်ပြိုင်နက် လုပ်ကြံသူများမှာ နောက်ထပ် အခွင့်အရေး မရရှိတော့ချေ။

ယွီကျိယွမ်ကို မသတ်နိုင်တော့ကြောင်း မြင်သောအခါ သိမ်းငှက်အမဲလိုက်ခွေးများသည် အတင်း ဖောက်ထွက်ကာ ထွက်ပြေးရန်မှလွဲ၍ ရွေးချယ်စရာ မရှိတော့ပေ။ သူတို့သည် တံခါးကို အလွယ်တကူ ဖောက်ထွက်နိုင်ခဲ့သော်လည်း ခြံဝင်းထဲတွင်တော့ မိုးရွာသကဲ့သို့ ကျဆင်းလာသော မြားများကြောင့် နီးပါးအားလုံး ပစ်သတ်ခံလိုက်ရသည်။

အသက်ရှူနေသေးပြီး သံချပ်ကာစစ်သည်များ၏ ဖမ်းဆီးခြင်းကို ခံရသူများသည်လည်း စစ်သည်များက ယွမ်ဖန်းထံသို့ အသက်ရှင်ကျန်ရစ်သူများ ရှိကြောင်း လှမ်းအော်လိုက်သည်နှင့် တစ်ပြိုင်နက် သူတို့၏ အဆိပ်အိတ်များကို ချက်ချင်း ကိုက်ခွဲကာ ကိုယ့်ကိုယ်ကိုယ် အဆုံးစီရင်သွားခဲ့ကြ၏။

ပါးစပ်မှ သွေးမည်းများ စီးကျလျက် လဲကျသွားသော သိမ်းငှက်အမဲလိုက်ခွေးများကို ကြည့်ရင်း ယွမ်ဖန်း၏ မျက်နှာအမူအရာမှာ ခက်ထန်နေတော့သည်။

ရှောင်းလိ၏ ပြန်စာကို ရရှိပြီးကတည်းက သူသည် ယွီကျိယွမ်ကို လျှို့ဝှက်စွာ စောင့်ကြည့်ရန် လူများကို စေခိုင်းထားခဲ့သည်။

ယနေ့ ဝေ့အိမ်တော်သို့ သွားရောက်ကာ ယွီကျိယွမ်ကို တွေ့ဆုံခြင်းသည် သူ့ကို စမ်းသပ်ရန်ဖြစ်သလို ဝေ့အန်းကိုလည်း ပွင့်ပွင့်လင်းလင်း သွားရောက်တွေ့ဆုံရန် ဖြစ်လေသည်။ ထောင်မှ ထွက်ခွာလာပြီးနောက် ယွီကျိယွမ်ဘက်မှ ပုံမှန်မဟုတ်သော လှုပ်ရှားမှု သတင်းကို ရရှိခဲ့ပြီး သူ့လူများနှင့်အတူ အလျင်အမြန် ရောက်ရှိလာခဲ့ခြင်း ဖြစ်သည်။

အစောပိုင်းက အိမ်ဆီသို့ ပစ်ခတ်ခဲ့သော မြားများသည် သိမ်းငှက်အမဲလိုက်ခွေးများကို ခြိမ်းခြောက်ရန် ရည်ရွယ်ပြီး သံချပ်ကာစစ်သည်များကို ယွီကျိယွမ်အား တင်းကြပ်စွာ ဝန်းရံထားစေကာ သိမ်းငှက်အမဲလိုက်ခွေးများကို လွတ်ပေးလိုက်ခြင်းဖြစ်သည်။ ဤသည်မှာ သိမ်းငှက်အမဲလိုက်ခွေးများအနေဖြင့် မျှော်လင့်ချက် ကင်းမဲ့စွာဖြင့် ယွီကျိယွမ်ကို အန္တရာယ်မပြုနိုင်တော့အောင် သေချာလုပ်ဆောင်လိုက်ခြင်းလည်း ဖြစ်လေသည်။

သူသည် အနည်းဆုံး တစ်ယောက်လောက်ကိုတော့ အရှင်ဖမ်းနိုင်လိမ့်မည်ဟု ကနဦးက တွေးထင်ထားခဲ့သော်လည်း မမျှော်လင့်ဘဲ ဤသိမ်းငှက်အမဲလိုက်ခွေးများက အဖမ်းခံရပြီးနောက် ချက်ချင်းပင် အဆိပ်သောက်ကာ သေဆုံးသွားခဲ့ကြသည်။

သူသည် သိမ်းငှက်အမဲလိုက်ခွေးများကို အရင်ဆုံး ဖယ်ရှားရန် သူ့လက်အောက်ငယ်သားများကို အချက်ပြလိုက်သည်။ အခန်းထဲသို့ ဝင်ရောက်သွားသောအခါ ယွီကျိယွမ်သည် အရာရှိကုလားထိုင်ပေါ်တွင် ဖရိုဖရဲ လဲကျနေသည်ကို မြင်တွေ့လိုက်ရ၏။ ကျောဘက်မှ ပြင်းထန်စွာ သွေးထွက်နေသဖြင့် သူ မှီနေသော ကုလားထိုင်၏ ခြေထောက်များသည် သွေးရောင်လွှမ်းနေလေသည်။

ယွမ်ဖန်းကို မြင်သောအခါ ယွီကျိယွမ်သည် မျက်ခွံများကို အားနည်းစွာ ပင့်တင်လိုက်ပြီး ခက်ခဲစွာ အသက်ရှူရင်း "အိမ်တော်ထဲမှာ လူယုတ်မာတွေ ပုန်းအောင်းနေလိမ့်မယ်လို့ ကျွန်တော် ဘယ်တုန်းကမှ မထင်ထားခဲ့ဘူး။ စစ်သူကြီးယွမ်သာ မရှိရင် ကျွန်တော် သေချာပေါက် အသက်ပါသွားလောက်ပြီ"

ယွမ်ဖန်းသည် အိမ်တော်မှ သမားတော်ကို သွားခေါ်ရန် တစ်စုံတစ်ယောက်ကို ချက်ချင်း အမိန့်ပေးလိုက်ပြီးနောက် ဖုံးကွယ်ထားသော ဒေါသနှင့် စိုးရိမ်ပူပန်မှုတို့ကို ဟန်ဆောင်ပြသကာ ပြောလိုက်လေသည်။ "ဒါက လုံးဝကို ရိုင်းစိုင်းလွန်းတယ်။ နယ်စားမင်းရဲ့ အိမ်တော်ထဲကို လူသတ်ဖို့ ပွင့်ပွင့်လင်းလင်း ဝင်ရောက်လာရဲတယ်ပေါ့! ကံကောင်းလို့ အဲ့ဒီသူခိုးတွေ ခြံဝင်းထဲကနေ ထွက်ပြေးသွားတဲ့အချိန်မှာ တစ်ယောက်ကို အရှင်ဖမ်းမိလိုက်တယ်။ တရားခံကို စစ်ဆေးပြီးတာနဲ့ မိတ်ဆွေအတွက် ကျွန်တော် သေချာပေါက် တရားမျှတမှု ရှာပေးပါ့မယ်"

ဖြူရော်ကာ အားနည်းနေသော ယွီကျိယွမ်သည် သူ၏ ကျေးဇူးတင်စိတ်ကို ဖော်ပြလိုက်၏။

မကြာမီမှာပင် အိမ်တော်သမားတော် ရောက်ရှိလာသည်။ ယွီကျိယွမ်၏ ဒဏ်ရာများကို ခဏလောက် စစ်ဆေးပြီးနောက် ယွီကျိယွမ်ကို ကုတင်ပေါ်သို့ သယ်ဆောင်သွားခိုင်းလိုက်သည်။

ဒဏ်ရာဟောင်းများ မကျက်သေးဘဲ ဒဏ်ရာသစ်များ ထပ်တိုးလာသဖြင့် သူ၏ လက်ရှိ အခြေအနေမှာ အကောင်းဘက်မှ ရှုမြင်ဖို့ရာ မဖြစ်နိုင်ချေ။

ယွမ်ဖန်းသည် ယွီကျိယွမ်ကို ကာကွယ်ရန် အစောင့်အကြပ်များကို တင်းတင်းကြပ်ကြပ် ချထားခဲ့ပြီး တရားခံကို စစ်ဆေးမည်ဆိုသော အကြောင်းပြချက်ဖြင့် ထွက်ခွာလာခဲ့၏။

ခြံဝင်းအပြင်ဘက်သို့ ရောက်သည်နှင့် သူ၏ မျက်နှာအမူအရာသည် ထပ်မံ၍ ခက်ထန်သွားတော့သည်။

ဝေ့အိမ်တော်အတွင်းသို့ လုပ်ကြံသူ အများအပြား ဝင်ရောက်လာခြင်းသည် တကယ်ကို နားလည်ရခက်လှသည်။

ဤလူများက ယွီကျိယွမ်ကို သတ်ချင်နေကြပြီး ရှောင်းလိကလည်း ဤအကြောင်းကို စောစောစီးစီး သိထားပုံရခြင်းက ယွမ်ဖန်းကို ပိုလို့ပင် တွေဝေသွားစေခဲ့သည်။

တကယ်လို့ ယွီကျိယွမ်က ဖေစုန့်ရဲ့ သူလျှိုဆိုရင် ဒီလုပ်ကြံသူတွေကို သူ့ကိုသတ်ဖို့ ဘယ်သူက အမိန့်ပေးခဲ့တာလဲ။

သူသည် ယွီကျိယွမ်၏ တုံ့ပြန်မှုကို အကဲခတ်ရန် လုပ်ကြံသူ တစ်ဦး အသက်ရှင်နေသေးကြောင်း တမင်သက်သက် ပြောပြခဲ့သော်လည်း ယွီကျိယွမ်သည် တကယ်ပဲ မသိတာလား သို့မဟုတ် အလွန် နက်နဲစွာ ကြံစည်တတ်လွန်းသလား မသိနိုင်ဘဲ မည်သည့် အားနည်းချက်ကိုမျှ မပြသခဲ့ချေ။

သူ့အနောက်မှ လိုက်လာသော ကိုယ်ရံတော်ကို အမိန့်ပေးလိုက်သည်။ "ဖမ်းမိထားတဲ့သူကို နယ်စားမင်းအိမ်တော်ရဲ့ မြေအောက်ခန်းမှာ ထိန်းသိမ်းထားတယ်လို့ သတင်းဖြန့်လိုက်။ ညဘက် လုံခြုံရေးမှာ အားနည်းချက် နည်းနည်း ချန်ထားခဲ့"

—

အခန်းထဲတွင် သွေးထွက်လွန်မှုကြောင့် ယွီကျိယွမ်၏ မျက်နှာသည် မတရားကို ဖြူရော်နေဆဲပင်။

သမားတော် ထွက်သွားပြီးနောက် သူ ခက်ခဲစွာ ထိန်းသိမ်းထားခဲ့ရသော နူးညံ့တည်ငြိမ်သည့် အမူအရာသည် လုံးဝ ပျောက်ကွယ်သွားပြီး အဆုံးမရှိသော နာကြည်းမှုနှင့် ခါးသီးမှုတို့ကသာ နေရာယူလာခဲ့သည်။

ကုတင်ခေါင်းရင်းရှိ ခေါင်းအုံးပျော့ကို မှီကာ သူသည် အခန်း၏ မျက်နှာစာ တစ်ခုဆီသို့ စူးစိုက်စွာ ငေးကြည့်နေ၏။ မကြာမီ သူ၏ မျက်လုံးများတွင် မျက်ရည်များ ဝဲလာပြီး နှုတ်ခမ်းထောင့်များဆီသို့ စီးကျလာတော့သည်။

သူက မြောက်ပိုင်းဝေ့ကို ဖျက်ဆီးဖို့ ဖေစုန့်ကို ကူညီပေးခဲ့တယ်။ ဖေစုန့်က သူ့ကို သေချင်စရာ အကြောင်းမရှိဘူး။

ဒါပေမဲ့ သူ့ဆီ တာဝန်ချထားတဲ့ သိမ်းငှက်အမဲလိုက်ခွေးတွေက ဒီအမိန့်ကို အကောင်အထည် ဖော်ခဲ့တယ်ဆိုတော့ သူ ဆက်အသက်ရှင်နေတာက အစီအစဉ်တစ်ခုလုံးကို အန္တရာယ်ရှိစေနိုင်တယ်လို့ ဆိုလိုတာပဲ။

ဒီအကြံအစည်ကို ဖော်ထုတ်နိုင်တဲ့ တစ်ခုတည်းသောအရာက ဖေစစ်စခန်းအတွက် သူလျှိုတစ်ယောက်ဆိုတဲ့ သူ့ရဲ့ သရုပ်မှန် ပေါ်ပေါက်သွားတာပဲ။

သူ မြောက်ပိုင်းဝေ့ကို ဝင်ရောက်လာချိန်တုန်းက ဖေစစ်စခန်းက သူ့ရဲ့ အတိတ်ခြေရာအားလုံးကို ဖျက်ပစ်ဖို့ ကူညီပေးပြီးသားပဲ။ သူ့ရဲ့ နောက်ခံအကြောင်းအရာက လုံလောက်အောင် "သန့်ရှင်း" နေခဲ့တယ်။

— မြောက်ပိုင်းနယ်စပ်ရှိ ဟိုင်ကျောင်းတော်တွင် နှစ်ပေါင်းများစွာ ပညာသင်ကြားခဲ့သော သာမန်အရပ်သားတစ်ဦး၏ သား။ ပညာသင်ကြားပြီးစီးပြီးနောက် ဝေ့ဖိန်ကျင်း စစ်ဗျူဟာမှူးများ စုဆောင်းနေချိန်တွင် နယ်စားမင်း၏ အသေးစား စာမေးပွဲကို အောင်မြင်ခဲ့ပြီး သူ၏ အကြံပေးများထဲမှ တစ်ဦး ဖြစ်လာခဲ့သည်။

ဟိုင်ကျောင်းတော်ရှိ လေးစားရသော ဆရာကြီးရှန်းပင်လျှင် သူ၏ ဆရာသမား ဖြစ်ခဲ့သည်။

သူ့ကို ဖော်ထုတ်နိုင်မယ့် တစ်ခုတည်းသော ကျန်ရှိနေတဲ့ သဲလွန်စက သူ့အဖေပဲ

ဖေစုန့် သူ့ကို သတ်ဖို့ အမိန့်ပေးရတဲ့ တစ်ခုတည်းသော အကြောင်းရင်းက အခု သူ့ရဲ့ အဖေဟာ ရှောင်းလိရဲ့ လက်ထဲကို ရောက်နေလို့ပဲ!

ရှောင်းလိက သူ့အဖေ၏ အသက်နှင့် သူ့ကို ခြိမ်းခြောက်ပြီး နောက်ဆုံးတွင် သူလျှိုတစ်ယောက်အဖြစ် ဖြောင့်ချက်ပေးရန် အတင်းအကျပ် ခိုင်းစေမှာကို ဖေစုန့်က စိုးရိမ်နေခဲ့သည်။ သူ၏ အရင်က အကြံအစည်များ အကုန်လုံး သဲထဲရေသွန် ဖြစ်သွားခဲ့သဖြင့် သူက ရှောင်းလိကို သတ်ဖို့ ဆုံးဖြတ်လိုက်၏။ ဘာပဲဖြစ်ဖြစ် ရှောင်းလိ သေသွားခဲ့လျှင် သူက ဖေစုန့်၏ အဖေကို ဖမ်းမိခဲ့လျှင်တောင် အလကားပင် ဖြစ်သွားလိမ့်မည်။

ဝေ့ဖိန်ကျင်းတို့မောင်နှမကို သေဆုံးစေခဲ့သော ပြစ်မှုသည် ရှောင်းလိ၏ ခေါင်းပေါ်တွင် ကျရောက်နေဆဲဖြစ်ပြီး မြောက်ပိုင်းနယ်စပ်မှ ပြည်သူများကလည်း သူ့ကို ဆက်ပြီး ဆဲဆိုရှုတ်ချနေကြလိမ့်မည်။

ဖေစုန့်သည် မိမိ၏အဖေကိုပါ သတ်ရန် တစ်စုံတစ်ယောက်ကို စေလွှတ်မည့် အရေးပေါ်အစီအစဉ်များ ပြုလုပ်ထားခြင်း ရှိမရှိကို ယွီကျိယွမ် မသိခဲ့သော်လည်း ရှောင်းလိကတော့ သူ့ကို ဆန့်ကျင်ထွက်ဆိုနိုင်သော "သက်သေ"သည် သူတို့ တွေ့ဆုံချိန်တွင် အသက်ရှင်နေစေရန် သေချာစေရေးအတွက် သူ၏အဖေကို တင်းကြပ်စွာ ကာကွယ်ရန် လူများကို သေချာပေါက် စေလွှတ်ထားလိမ့်မည်။

သူသည် နာကျင်စွာဖြင့် အံကြိတ်လိုက်သောအခါ သူ၏ နှုတ်ခမ်းကြားသို့ စိမ့်ဝင်လာသော အရည်များသည် သည်းမခံနိုင်လောက်အောင် ငန်နေခဲ့၏။

စောင်ကို ဆုပ်ကိုင်ထားသော သူ့လက်ဆစ်များသည်လည်း အားဖြင့်ညစ်ထားသောကြောင့် ဖြူဆွတ်နေခဲ့သည်။

သူ မသေချင်ဘူး။

အဖေ... အဖေက သူ့ကို ကာကွယ်ဖို့ သေလမ်းကို ရွေးချယ်သွားနိုင်တယ်။

ထိုသို့တွေးမိချိန်တွင် နီရဲကာ အမုန်းတရားများ ပြည့်နှက်နေသော သူ့က်လုံးများသည် တဖြည်းဖြည်း ရက်စက်ကြမ်းကြုတ်မှုများဖြင့် စူးရှလာခဲ့၏။

ဖေစုန့်က သူတို့ သားအဖနှစ်ယောက်လုံးကို စွန့်ပစ်ခဲ့ပြီပဲ။ အဖေက ရှောင်းလိရဲ့ လက်ထဲကနေ ထပ်ပြီး လွတ်မြောက်နိုင်ဖို့ဆိုတာ မဖြစ်နိုင်တော့ဘူး။ အသက်ရှင်ဖို့ မျှော်လင့်ချက် ရှိနေတဲ့၊ အသက်ရှင်သင့်တဲ့ တစ်ဦးတည်းသောသူက သူပဲ!

လမင်းသည် ကောင်းကင်ယံတွင် မြင့်မားစွာ သာနေပြီး တောရိုင်းလွင်ပြင်ထဲတွင် မီးပုံတစ်ခုက တဖြောက်ဖြောက် မြည်ကာ တောက်လောင်နေသည်။

ကျန်းဟွိုင်သည် မီးသွေးဖြစ်နေသော သစ်ကိုင်းကျိုးတစ်ခုကို အသုံးပြုကာ မြေကြီးပေါ်တွင် ရေးဆွဲထားသော ရိုးရှင်းသည့် မြေပုံတစ်ခုကို ညွှန်ပြပြီး ရှောင်းလိကို ပြောလိုက်သည်။ "မြောက်ပိုင်းနယ်စပ်မှာ နယ်စားမင်းကို တိုက်ခိုက်ဖို့ အော်ဟစ်သံတွေက ပြင်းထန်နေပေမဲ့ တကယ်တမ်း ဘယ်သူမှ ဦးမဆောင်ရဲကြသေးဘူး။ ဝေ့ထုန်က လက်ရှိမှာ ယန်းလဲ့တောင်မှာ ဝေ့တပ်ဖွဲ့တွေနဲ့ တပ်စွဲထားတယ်။ ကျွန်တော်တို့ရဲ့ အပေါ့စား မြင်းတပ်က လေးလံတဲ့ ရိက္ခာတွေ သယ်မလာဘူးလေ။ တကယ်လို့ ပြည်နယ်တွေကို ဖြတ်သွားတဲ့ လမ်းငယ်လေးတွေကနေ သွားမယ်ဆိုရင် ဖြတ်လမ်းကနေတစ်ဆင့် နောက်ဆုံးထားပြီး မနက်ဖြန် နေ့လယ်လောက်ဆိုရင် ယွီကျိုးကို ရောက်နိုင်တယ်"

ရှောင်းလိသည် မနီးမဝေးတွင် ထိုင်ကာ သူ၏ ဓားကို သုတ်နေ၏။ သူ၏ ချောမောသော မျက်နှာသည် မီးရောင်ကြောင့် အလင်းနှင့် အမှောင် သိသိသာသာ ကွဲပြားလျက် ရှိနေသည်။ တစ်ဝက်ခန့် မှေးစင်းထားသော သူ၏ မည်းနက်သည့် မျက်လုံးများသည် ညဉ့်ယံ၏ တစ်ဝက်ခန့်ကို သိမ်းဆည်းထားသယောင် ရှိနေပြီး ချောင်းမြောင်းနေသော သားရဲတစ်ကောင်ကဲ့သို့ သားကောင်ကို အမဲလိုက်လိုသည့် ရက်စက်ကြမ်းကြုတ်မှုကို ထုတ်လွှတ်နေလေသည်။

အဝေးမှ ခြေသံများ နီးကပ်လာခဲ့သည်။

စုန့်ချင်နှင့် ကျန်းဟူတို့သည် ယှဉ်တွဲလျက် လျှောက်လာကြ၏။ သူတို့ နီးကပ်လာသည်နှင့်အမျှ မီးရောင်အောက်တွင် သူတို့၏ စစ်ဝတ်စုံများပေါ်၌ ပေကျံနေသော သွေးကွက်များကို မြင်တွေ့လာရသည်။ သူတို့သည် ပြင်းထန်သော တိုက်ပွဲတစ်ခုကို ယခုလေးတင် ဆင်နွှဲခဲ့မှန်း သိသာလေသည်။

စုန့်ချင်က သတင်းပို့လိုက်၏။ "အကျဉ်းသား သယ်ယူပို့ဆောင်ရေးကို တိုက်ခိုက်တဲ့ နောက်ဆုံးအသုတ် သိမ်းငှက်အမဲလိုက်ခွေးတွေကို ရှင်းလင်းပြီးပါပြီ"

သူတို့နှစ်ဦးသည် မီးပုံဘေးတွင် ထိုင်ချလိုက်ကြ၏။ ကျန်းဟူက ကျိန်ဆဲလိုက်သည်။ "အဲ့ဒီသိမ်းငှက်အမဲလိုက်ခွေးတွေက အကျဉ်းသားလှည်းထဲက အဘိုးကြီးကို သူတို့လူလို့ လုံးဝ မမြင်ကြဘူး။ သူတို့ရဲ့ အရူးအမူး ပစ်ခတ်လိုက်တဲ့ မြားတွေကြောင့် လှည်းနံရံတွေတောင် ဆန်ခါပေါက် ဖြစ်သွားတယ်။ အစ်ကို(၂)က လှည်းရဲ့ နံရံလေးဘက်လုံးကို သံပြားတွေနဲ့ ကာထားဖို့ အစောကြီးကတည်းက အမိန့်ပေးထားပြီး အပေါ်မှာ လေဝင်ပေါက် နည်းနည်းပဲ ချန်ထားခဲ့လို့သာပေါ့။ မဟုတ်ရင် အဲ့ဒီအဘိုးကြီးက အခုလောက်ဆိုရင် မြားစူးနေတဲ့ အပ်ဖုံကြီး ဖြစ်နေလောက်ပြီ"

သူက လှောင်ပြုံးတစ်ဝက်ဖြင့် စကားကို အဆုံးသတ်လိုက်သည်။ "အဲ့ဒီခွေးအိုကြီးက ဖေဆိုတဲ့ခွေးဆီ သူ့အသက်ကို ရောင်းစားခဲ့တာ အခုတော့ နောင်တရနေပြီလား မသိဘူး"

ကျန်းဟွိုင်က ပြောလိုက်လေသည်။ "သူ့ရဲ့ တစ်ဦးတည်းသောသားက ယွီကျိုးမှာ ပြဿနာတွေ ဖန်တီးနေတုန်းပဲ။ တကယ်လို့ ငါသာ ဖေစုန့်ဆိုရင် နည်းလမ်းနှစ်သွယ်ပါတဲ့ အစီအစဉ်ကို သေချာပေါက် ဆွဲထားမှာပဲ။ ဒီအဘိုးကြီးယွီကို သတ်ဖို့ လူတွေ လွှတ်မယ်၊ ပြီးတော့ အဲ့ဒီလူယုတ်မာလေးယွီရဲ့ အသက်ကို နှုတ်ယူဖို့ ယွီကျိုးကိုလည်း တခြားလူတွေ လွှတ်မယ်။ ဒီအဘိုးကြီးကလည်း ဒါကို သဘောပေါက်လောက်ပါတယ်။ အခုအချိန်မှာ သူ့ရဲ့ တစ်ခုတည်းသော အတွေးက သေလမ်းကို ရှာဖို့ပဲ ဖြစ်လိမ့်မယ်"

ဘာပဲဖြစ်ဖြစ် ယွီကျင်းဝမ် သေသွားခဲ့လျှင် ရှောင်းလိသည် ယွီကျိယွမ်ကို ခြိမ်းခြောက်ရန် သူ၏အသာစီးရမှုကို ဆုံးရှုံးသွားလိမ့်မည်။

သူက ရှောင်းလိကို ကြည့်ကာ ပြုံးလျက် ပြောလိုက်၏။ "ကံကောင်းလို့ နယ်စားမင်းက သူ့ရဲ့ ပြန်စာထဲမှာ ပင်မတပ်ကြီးနဲ့အတူ စခန်းကို ပြန်လာနေတဲ့ စစ်သူကြီးယွမ်ဖန်းကို တာဝန်ပေးထားခဲ့တယ်။ မနက်ဖြန် ကျွန်တော်တို့ ယွီကျိုးကို ရောက်တဲ့အချိန်ဆိုရင် အဲ့ဒီလူယုတ်မာလေးယွီ အသက်ရှင်နေဦးမှာပါ"

ရှောင်းလိသည် တိတ်ဆိတ်နေ၏။ ကျန်းဟွိုင်၏ ရှင်းပြချက်ကို ကြားပြီးနောက် ကျန်းဟူက နောက်တစ်ကြိမ် တံတွေးထွေးလိုက်သည်။ "အဲ့ဒီခွေးဖေက အဆိပ်ရှိတဲ့ ပိုးမွှားတွေနဲ့ ကြီးပြင်းလာတာ ဖြစ်ရမယ်! သူ့နှလုံးသားက တကယ်ကို ယုတ်မာလွန်းတယ်"

စုန့်ချင်က ပြောလိုက်၏။ "ယွီသားအဖကလည်း ဘာမှ မထူးပါဘူး။ အဖေဖြစ်သူက တိုးကျန့်လျန်ရဲ့ စစ်စခန်းဆီ ခိုလှုံသယောင် ဟန်ဆောင်ပြီး မာကျားလျန် သတ်ဖြတ်မှုကို ကြိုးကိုင်ခဲ့တယ်။ သားဖြစ်သူက နယ်စားကြီးဝေ့ရဲ့ အိမ်တော်ထဲ ဝင်ရောက်ပြီး ဝေ့ချီရှန်းရဲ့ သားနဲ့ သမီးကို သေဆုံးစေခဲ့တယ်၊ ပြီးတော့ နယ်စားမင်းကို လုပ်ကြံစွပ်စွဲဖို့ သူတို့ဝေ့စစ်စခန်းက ရုပ်သေးမင်းသမီးနဲ့ ပူးပေါင်းကြံစည်ခဲ့တယ်။ အခု ငါ စိတ်ပူနေတာက မနက်ဖြန် မြို့တံခါးဝမှာ သူတို့နဲ့ ထိပ်တိုက်တွေ့တဲ့အခါ ယွီကျိယွမ်က သူ့ကိုယ်သူ ကယ်တင်ဖို့အတွက် ကိုယ့်အဖေအရင်းကို ငြင်းပယ်လိုက်မှာကိုပဲ"

ကျန်းဟူသည် သူ့ပေါင်ကို ရိုက်လိုက်ပြီး "သူက ငြင်းရဲတယ်ဆိုရင် တိုက်ပွဲရှေ့တန်းမှာတင် အဲ့ဒီသူခိုးအိုကြီးရဲ့ ခေါင်းကို ငါ ခုတ်ဖြတ်ပစ်မယ်! အဲ့ဒီကောင်စုတ်လေးက မတုန်မလှုပ် နေနိုင်လိမ့်မယ်လို့ ငါ မယုံဘူး"

ကျန်းဟွိုင်သည် မျက်မှောင်ကို အနည်းငယ် ကြုတ်လိုက်ပြီး ခဏတာ တွေးတောနေပုံရကာ ပြောလိုက်၏။ "ယွီမိသားစုရဲ့ သားအဖနှစ်ယောက်လုံးက စိတ်ပညာကို အသုံးချတဲ့နေရာမှာ ထူးချွန်ကြတယ်။ သူတို့ရဲ့ အကြံအစည်တွေ အကုန်လုံးက လူ့သဘာဝကို အသုံးချထားတာပဲ။ တိုးကျန့်လျန်က သတိထားနေပေမဲ့ အဲ့ဒီလူယုတ်မာအိုကြီးယွီရဲ့ ထောင်ချောက်ထဲကို နှာခေါင်းကနေ ဆွဲခေါ်ခံလိုက်ရတုန်းပဲ။ ယွီကျိယွမ်က ဝေ့စစ်စခန်းထဲကို ဝင်ရောက်လာပြီး ဝေ့ဖိန်ကျင်းကို တိုးတက်အောင် ကြိုးစားဖို့ အမြဲတမ်း အကြံပေးခဲ့တယ်၊ သူ့အတွက် စစ်ဗျူဟာတွေ ရေးဆွဲပေးပြီး စစ်ရေးအောင်မြင်မှုတွေ စုဆောင်းနိုင်အောင် ကူညီပေးခဲ့တယ်။ ဝေ့ချီရှန်းနဲ့ ဝေ့စစ်စခန်းက ဝါရင့်စစ်သူကြီးတွေတောင် သူ့ရဲ့ လှည့်စားတာကို ခံခဲ့ရတယ်။ တကယ်လို့ သူက ဒီတစ်ကြိမ်မှာ နယ်စားမင်းကို လုပ်ကြံစွပ်စွဲဖို့ သူ့ကိုယ်သူ မဖော်ထုတ်ခဲ့ဘူးဆိုရင် ဒီဆူးငြောင့်ကို အမြစ်ပြတ် ရှင်းထုတ်ဖို့ ကျွန်တော်တို့ အတော်လေး အားစိုက်ခဲ့ရမှာပဲ"

သူက သည်နေရာတွင် စကားရပ်သွားပြီး အခြားတစ်ခုခုကို သဘောပေါက်သွားသည့်အလား ထပ်ပြောလိုက်လေသည်။ "ဒီလိုလူမျိုးက မှတ်သားလောက်တဲ့ စိတ်ဓာတ်ကြံ့ခိုင်မှု ရှိတယ်။ ယွီကျင်းဝမ်ရဲ့ ယုတ်မာတဲ့ အကြံအစည်ကြောင့် မာကျားလျန်မှာ ဝေ့စစ်သည် ၂၀၀၀၀ တိတိ အသတ်ခံခဲ့ရတယ်။ ယွီကျိယွမ်က ဒီအဖေကို အသိအမှတ်ပြုရင်တောင် သူတို့က သေဘေးကနေ လွတ်မြောက်နိုင်မှာ မဟုတ်ဘူး။ စစ်သူကြီးစုန့် ပြောတာကို ကျွန်တော် သဘောတူတယ်— ယွီကျိယွမ်က အကြင်နာမဲ့ပြီး သူ့အဖေကို စွန့်ပယ်လိုက်ဖို့ များတယ်"

ကျန်းဟူသည် စိုးရိမ်တကြီးဖြင့် ဝင်ပြောရန် ပြင်လိုက်စဉ် ရှောင်းလိက ဘေးမှနေ၍ ပြောလိုက်လေသည်။ "သူ အသိအမှတ်ပြုလိမ့်မယ်"

လူတိုင်းသည် ရှောင်းလိကို လှည့်ကြည့်လိုက်ကြ၏။

ကျန်းဟူသည် ဝမ်းသာအားရဖြင့် ရယ်မောကာ မေးလိုက်၏။ "အစ်ကို(၂)... မင်းမှာ အစီအစဉ် ရှိနေတာလား"

ရှောင်းလိသည် ဓားကို သုတ်ပြီးသွားကာ ဓားကို အိမ်ထဲသို့ ပြန်သွင်းလိုက်ချိန်တွင် သံမဏိ၏ အေးစက်သော အလင်းရောင်သည် သူ့မျက်လုံးများတွင် ထင်ဟပ်သွားပြီး ထိုမျက်လုံးများကို ပိုအေးစက်ကာ နက်နဲသွားစေလေသည်။ ဓားသည် တောက်လောင်ပြတ်သားသော အသံတစ်ခုနှင့်အတူ ဓားအိမ်အတွင်းသို့ လျှောကျသွားတော့သည်။

...

အပိုင်း (၁၉၉.၃)

(သတိပေးချက်။ ။ တကယ့်ကို ရက်စက်တဲ့ညှင်းပန်းနှိပ်စက်နည်းပါ။ အစားစားနေတုန်း မဖတ်ပါနဲ့။ လိုက်မလုပ်ပါနဲ့)

နောက်တစ်နေ့တွင် ယွီကျိယွမ်သည် သူ၏ဒဏ်ရာပတ်တီးကို လဲလှယ်လိုက်၏။ အတွင်းခံအင်္ကျီကိုသာ ဝတ်ဆင်ထားပြီး သူသည် ကုတင်ခေါင်းရင်းကို မှီကာ ထိုင်နေခဲ့ပြီး သူ၏မျက်နှာက ဖြူလျော့နေကာ မျက်ကွင်းများ ညိုမဲနေပြီး လုံးဝကို အားအင်ကုန်ခမ်းနေသည့်ပုံ ပေါ်နေသည်။

ပြီးခဲ့သောညက သူသည် တစ်ရေးမှ အိပ်မပျော်ခဲ့ပေ။

သူ့ခြံဝင်းထဲတွင် ယွမ်ဖန်း ချန်ထားရစ်ခဲ့သော အစောင့်များသည် အပေါ်ယံကြည့်လျှင် သူ့ကို ကာကွယ်ရန်အတွက် ဖြစ်သော်လည်း တစ်ဖက်တွင်တော့ သူ့ကို အကျဉ်းချထားသည့် သဘောသက်ရောက်နေ၏။

သူသည် ရှောင်းလိဘက်က စွပ်စွဲချက်များကို မည်သို့ တန်ပြန်တုံ့ပြန်ရမည်နှင့် ယွမ်ဖန်း ဖမ်းဆီးထားသော သုံ့ပန်းက ပြင်းထန်သော နှိပ်စက်မှုများအောက်တွင် သူ၏သရုပ်မှန်ကို ဝန်ခံခဲ့ပါက သူ့ကိုယ်သူ မည်သို့ ကာကွယ်ရမည်ကို တစ်ညလုံး စဉ်းစားစီစဉ်နေခဲ့သည်။

ယခုတွင် သူ့ဒဏ်ရာများ နာကျင်နေရုံသာမက တစ်ညလုံး ပြင်းပြင်းထန်ထန် တွေးတောခဲ့ရသဖြင့် ခေါင်းကလည်း တဆစ်ဆစ် ကိုက်ခဲနေလေ၏။

အစေခံတစ်ယောက်က သောက်ရန် ဆေးရည်ကို ကမ်းပေးလာသောအခါ သူသည် အားနည်းစွာဖြင့် လက်ဝှေ့ယမ်းကာ ငြင်းပယ်လိုက်ပြီး လက်တစ်ဖက်က နားထင်ကို ဖိထားလျက် နေမကောင်းသည့်ပုံ ပေါ်နေသည်။

အစေခံက ဆေးရည်ကို ကုတင်ဘေးရှိ စားပွဲငယ်လေးပေါ်တွင် တင်ထားလိုက်၏။ အပြင်ဘက်မှ အလျင်စလို လျှောက်လာသော ခြေသံများ ထွက်ပေါ်လာသည်။

ခဏအကြာတွင် သံချပ်ကာဝတ် စစ်သည်တစ်ယောက်က အလောတကြီး ဝင်ရောက်လာပြီး ယွီကျိယွမ်ဘက်သို့ လက်နှစ်ဖက်ကို ယှက်ကာ သတင်းပို့လိုက်၏။ "ယွီလူကြီးမင်း၊ ရှောင်းဆိုတဲ့လူက တောင်ဘက်တံခါးကို စစ်သည်တွေနဲ့ ဝိုင်းထားပြီး လူကြီးမင်းနဲ့ တွေ့ချင်တယ်လို့ တောင်းဆိုနေတယ်လို့ စစ်သူကြီးက သတင်းပါးလိုက်ပါတယ်"

ယွီကျိယွမ်၏ မျက်နှာက မသိမသာ ဖြူရော်သွားခဲ့သည်။ ရှောင်းလိ သည်လောက် မြန်မြန်ဆန်ဆန် ရောက်လာလိမ့်မည်ဟု သူ မမျှော်လင့်ထားခဲ့ချေ။

သူသည် အကြိမ်အနည်းငယ် ချောင်းဆိုးကာ မောဟိုက်သွားပြီး နာကျင်ဒေါသထွက်နေသယောင် ဟန်ဆောင်လျက် ပြောလိုက်၏။ "ယွမ်စစ်သူကြီးက ဝေ့ကျိုးမှာ တပ်စွဲထားတာကိုတောင် အဲ့ဒီလူယုတ်မာက တိုက်ခိုက်ရဲသေးတာလား။ နှမြောစရာကောင်းတာက ကျွန်တော့်ရဲ့ဒဏ်ရာတွေ ပြင်းထန်နေလို့ ဒီကုတင်ပေါ်ကနေတောင် မထနိုင်ဘူးဖြစ်နေတယ်။ မင်းသမီးနဲ့ သခင်လေးတို့အတွက် ကလဲ့စားချေပေးဖို့ ယွမ်စစ်သူကြီးက အဲ့ဒီ ရှောင်းသစ္စာဖောက်ကို ခေါင်းဖြတ်တာကို ကြည့်ဖို့ မြို့ရိုးမျှော်စင်ဆီကို ကျွန်တော် မသွားနိုင်ဘူး။ သခင်လေးနဲ့ မင်းသမီးကို ပူဇော်ဖို့ ရှောင်းရဲ့ ခေါင်းနဲ့အတူ သူ ပြန်လာမယ့်အချိန်ကို ဝေ့အိမ်တော်မှာ အမွှေးတိုင်ယဇ်ပလ္လင်တစ်ခု ပြင်ဆင်ပြီး စောင့်နေမယ်လို့ ယွမ်စစ်သူကြီးဆီကို ကျေးဇူးပြုပြီး သတင်းပါးပေးပါ"

သံချပ်ကာဝတ် စစ်သည်က လက်နှစ်ဖက်ကို ယှက်ကာ ထွက်ခွာသွားပြီးနောက် ယွီကျိယွမ်က အခန်းထဲရှိ အစေခံများကို အပြင်သို့ ထွက်သွားခိုင်းလိုက်သည်။ ထိုအခါမှသာ သူသည် နူးညံ့သော ခေါင်းအုံးပေါ်သို့ အားအင်ကုန်ခမ်းစွာဖြင့် မှီချလိုက်ပြီး ဝမ်းနည်းစွာဖြင့် မျက်လုံးများကို မှိတ်ထားလိုက်၏။

ရှောင်းလိက ငါ့ကို တွေ့ချင်နေတာပဲ... ငါ့အဖေက ရှောင်းလိရဲ့ လက်ထဲမှာ တကယ်ပဲ ရောက်နေတာပဲ...

သူသည် လည်ချောင်းများ ခြောက်သွေ့နေ၏။ တံတွေးကို ခက်ခက်ခဲခဲ မျိုချလိုက်ပြီး အက်ကွဲနေသော အသံဖြင့် တိုးတိုးလေး ပြောလိုက်သည်။ "အဖေ၊ ကျွန်တော့်ကို အပြစ်မတင်ပါနဲ့..."

ရှောင်းလိဘက်က စွပ်စွဲချက်များကို ရင်ဆိုင်ရသည်ဖြစ်စေ ယွမ်ဖန်း၏ အကျဉ်းထောင်ထဲရှိ သိမ်းငှက်အမဲလိုက်ခွေးထံမှ ဝန်ခံချက်များကို ရင်ဆိုင်ရသည်ဖြစ်စေ ဤအရာများအားလုံးသည် လုပ်ကြံစွပ်စွဲချက်များသာ ဖြစ်ကြောင်းကို သူက အခိုင်အမာ ငြင်းဆိုရန် အစောကြီးကတည်းက ဆုံးဖြတ်ထားခဲ့သည်။ ၎င်းသည် သူ့ကို ရှင်းလင်းပြီး မြောက်ပိုင်းဝေ့ကို သိမ်းပိုက်ထိန်းချုပ်ရန် ဖေစုန့်နှင့် ရှောင်းလိတို့၏ ရက်စက်ယုတ်မာသော အကြံအစည်တစ်ခုသာ ဖြစ်သည်ဟု ဆိုရန်ပင်။

ပြီးခဲ့သောညက လုပ်ကြံသတ်ဖြတ်ရန် ကြိုးပမ်းမှုကို အထောက်အထားအဖြစ် အသုံးပြုခြင်းဖြင့် သူ့ကိုယ်သူ အပြစ်ကင်းရှင်းကြောင်း သက်သေပြရန်က ခက်ခဲလိမ့်မည် မဟုတ်ပေ။ သို့သော် နာရီဝက်ပင် မကြာလိုက်ခင်မှာ သံချပ်ကာဝတ် စစ်သည်သည် ဖုန်တလုံးလုံးဖြင့် ပြန်လည်ရောက်ရှိလာခဲ့၏။

"ယွီလူကြီးမင်း၊ ဖေစုန့်အတွက် မာကျားလျန် အစုလိုက်အပြုံလိုက် သတ်ဖြတ်မှုကို စီစဉ်ခဲ့တဲ့ အဆိပ်ပြင်းတဲ့ ဗျူဟာမှူး ယွီကျင်းဝမ်ကို ရှောင်းစစ်တပ်က ဖမ်းဆီးထားပါတယ်။ ပြီးတော့... သူက လူကြီးမင်းရဲ့ အဖေအရင်းဖြစ်တယ်လို့ ဆိုပြီး လူကြီးမင်းကို ရှေ့တန်းမှာ တွေ့ဖို့ တောင်းဆိုနေပါတယ်။ ဖေစုန့်က လူကြီးမင်းရဲ့ လုပ်ကြံစွပ်စွဲတဲ့ အကြံအစည်တွေ ပေါ်ထွက်သွားမှာကို ကြောက်လို့ လူကြီးမင်းနောက်ကို လုပ်ကြံသူတွေ စေလွှတ်ခဲ့လောက်ပြီးပြီမလို့ မြို့ရိုးမျှော်စင်ပေါ်ကို လာဖို့ လူကြီးမင်းရဲ့ ငြင်းဆန်မှုက လူကြီးမင်းရဲ့ အပြစ်ကို သက်သေပြနေတယ်လို့လည်း သူတို့က ကြေညာထားပါတယ်။ စစ်သည်တွေက ရှောင်းစစ်တပ်ရဲ့ လုပ်ကြံစွပ်စွဲချက်တွေကို ယုံကြည်သွားမှာကို ယွမ်စစ်သူကြီးက စိုးရိမ်လို့ လူကြီးမင်းကို အဲ့ဒီကို ချက်ချင်း ခေါ်ဆောင်လာခဲ့ဖို့ ကျွန်တော့်ကို အမိန့်ပေးလိုက်ပါတယ်"

ယွီကျိယွမ်သည် သူ၏နှလုံးသားကို ဆို့နင့်သွားစေသော ဒေါသလှိုင်းလုံးကြီးတစ်ခုကို ခံစားလိုက်ရပြီး ကွဲဟနေသော ဒဏ်ရာတစ်ခုလို သူ့ရင်ဘတ်ကို ဆုတ်ဖြဲသွားစေသည့် နောက်ထပ် ချောင်းဆိုးသွားရအောင် ဖြစ်သွားစေတော့သည်။

ဤစကားများက သူပေးနိုင်သော ဆင်ခြေမှန်သမျှကို လုံးဝ ပိတ်ဆို့ပစ်လိုက်၏။

ယွမ်ဖန်းက သိမ်းငှက်အမဲလိုက်ခွေးတစ်ကောင်ကို ဖမ်းဆီးထားခဲ့ပြီး စစ်ဆေးမေးမြန်းစဉ်အတွင်း သူ၏သရုပ်မှန်ကို ထုတ်ဖော်ခဲ့ခြင်း ရှိမရှိဆိုတာက မသေချာလှချေ။

မည်သည့်အရာမှ မပေါ်ပေါက်သေးလျှင်တောင် ယွီကျိယွမ်သည် ဖေစုန့်၏ စစ်စခန်းနှင့် ပတ်သက်မှုအားလုံးကို ဖြတ်တောက်ရန် မနေ့က လုပ်ကြံသတ်ဖြတ်ရန် ကြိုးပမ်းမှုကို အသုံးပြုရန် စီစဉ်ထားခဲ့သည်။

ယခုတော့ ရှောင်းစစ်တပ်က အမှန်တရားကို ဖော်ထုတ်လိုက်လေပြီ— ထိုလုပ်ကြံသတ်ဖြတ်မှုသည် သူ့ကို နှုတ်ပိတ်ရန် ဖေစုန့်၏ ကြိုးပမ်းမှုသာဖြစ်ကြောင်းပင်။ အကယ်၍ သူက မြို့ရိုးမျှော်စင်ပေါ်တွင် သွားရောက်မပြသဘဲ ၎င်းသည် လုပ်ကြံစွပ်စွဲချက်ဖြစ်ကြောင်း အတင်းအကျပ် ပြောဆိုနေပါက သံသယများကို ဖိတ်ခေါ်သလိုသာ ဖြစ်သွားလိမ့်မည်။

သူသည် ဒေါသထွက်သွားပြီး ကုတင်ဘေးကို ပြင်းထန်စွာ ထုရိုက်လိုက်၏။ "အဓိပ္ပါယ်မရှိတာတွေ။ ငါ့အဖေက လွန်ခဲ့တဲ့ နှစ်တွေကတည်းက ဆုံးပါးသွားခဲ့ပြီ။ အဲ့ဒီ ရှောင်းဓားပြတွေက ငါ့ကို ဒီလိုမျိုး စော်ကားရဲတယ်ပေါ့လေ"

အတင်း ရုန်းကန်ထရပ်လိုက်ပြီး သူက အမိန့်ပေးလိုက်သည်။ "မြင်းလှည်း ပြင်ဆင်လိုက်။ မြို့ရိုးမျှော်စင်ဆီကို သွားမယ်"

_____

တောင်ဘက် မြို့တံခါးအပြင်ဘက်တွင်။

နေမင်းကြီးက ခေါင်းပေါ်တွင် ပူပြင်းစွာ တောက်ပနေသည်။ ဆဲရေးတိုင်းထွာမှုများကြောင့် ကျန်းဟူ၏ လည်ချောင်းက ခြောက်သွေ့နေခဲ့ပြီး သိပ်မဝေးသောနေရာတွင်တော့ တိုက်ပွဲဗျူဟာအခင်းအကျင်းရှေ့တွင် ချည်နှောင်ခံထားရသော ယွီကျင်းဝမ်သည် အကျဉ်းသားဝတ်စုံကို ဝတ်ဆင်ထားကာ ဖရိုဖရဲနှင့် အားအင်ကုန်ခမ်းနေပြီး သူ၏လျှာကို မကိုက်မိစေရန် ပါးစပ်ထဲတွင် အဝတ်စတစ်ခု ဆို့ခံထားရ၏။

မြို့ရိုးမျှော်စင်ဆီသို့ မျက်စိမှေးကြည့်ရင်း ကျန်းဟူက သူ့ဘေးရှိ စုန့်ချင်ကို ညည်းတွားလိုက်သည်။ "အစ်ကိုကြီး၊ ယွီမျိုးရိုးဆိုတဲ့ အဲ့ဒီ လိပ်ဥကောင် ထွက်လာမယ်လို့ ထင်လား"

စုန့်ချင်က သူ့ဇက်ကြိုးကို ဆွဲတင်းလိုက်၏။ "နယ်စားက သူ့ကို ထွက်ပေါက်ပိတ်သွားအောင် လုပ်လိုက်ပြီလေ။ သူ မလာဘဲ နေလို့မရဘူး"

ကျန်းဟူသည် သူတို့အနောက်က မြင်းပေါ်တွင်ထိုင်ကာ အေးစက်ပြီး လူသတ်ချင်နေသော အငွေ့အသက်များကို ထုတ်လွှတ်နေသည့် ရှောင်းလိကို ခိုးကြည့်လိုက်၏။ သူ ထပ်ပြောရန် ပြင်လိုက်စဉ်မှာပင် မြို့ရိုးမျှော်စင်ပေါ်တွင် လှုပ်ရှားမှုတစ်ခု ဖြစ်ပေါ်လာခဲ့၏။

ရှောင်းလိက ရေခဲလိုအေးစက်နေသော ဝံပုလွေမျက်လုံးများကို ပင့်ကြည့်လိုက်သည်။

အစေခံများ တွဲထူထားသော ယွီကျိယွမ်က မျှော်စင်ပေါ်သို့ တက်လာခဲ့သည်။ မျှော်စင်ရင်တားအနီးတွင် ရပ်နေသော ယွမ်ဖန်းက အပေါ်ယံသဘောမျိုး ခေါင်းညိတ်ပြလိုက်ပြီး အောက်ဘက်သို့ ညွှန်ပြလိုက်၏။ "လူကြီးမင်း ကိုယ်တိုင်ပဲ ကြည့်လိုက်ပါ"

ယွီကျိယွမ်သည် အောက်ဘက်တွင် ဖြန့်ကျက်ထားသော မည်းမှောင်နေသည့် စစ်တပ်ကြီးကို ငေးကြည့်လိုက်သည်တွင် လွှမ်းမိုးနေသော သတ်ဖြတ်လိုသည့် ရည်ရွယ်ချက်ကြောင့် သူ၏နှလုံးသားက ဆို့နင့်သွားခဲ့သည်။ သားရဲကြီးတစ်ကောင်က သူ့ဆီသို့ အဟုန်ဖြင့် ပြေးဝင်လာကာ ဟိန်းဟောက်ပြီး သူ့ရင်ဘတ်ကို ဝင်တိုက်လိုက်သလို ခံစားလိုက်ရ၏။

ပြင်းထန်စူးရှသော အကြည့်တစ်ခုကို ခံစားလိုက်ရသဖြင့် သူသည် အားတင်းကာ ပြန်လည်ကြည့်ရှုလိုက်သည်။ သူတို့၏ မျက်လုံးများ ဆုံတွေ့သွားသည့် အခိုက်အတန့်တွင် သူ့စိတ်က ခဏတာ ဗလာအတိဖြစ်သွားပြီး အတွေးတစ်ခုတည်းသာ ကျန်ရစ်တော့သည်— လူသေတစ်ယောက်ကို ကြည့်နေတဲ့အကြည့်မျိုးပဲ။

ပူပြင်းလှသော နေရောင်အောက်တွင် ယွီကျိယွမ်သည် အအေးဓာတ်က ခြေဖဝါးမှစကာ ဖြတ်ပြေးသွားသည်ကို သူ့တစ်ကိုယ်လုံးကို ဝါးမြိုလိုက်သလို ခံစားလိုက်ရတော့သည်။

ရှောင်းလိသည် ဘာမှမမှူသလို နှစ်ချက်လောက် စိုက်ကြည့်နေပြီးနောက် အကြည့်လွှဲသွားခဲ့သဖြင့် ယွီကျိယွမ်၏ တောင့်တင်းနေသော ကိုယ်နေဟန်ထားက အနည်းငယ် ပြေလျော့သွားတော့၏။

ကျန်းဟူက စပြီး ကျိန်ဆဲတော့သည်။ "လိပ်ဥကောင်။ မင်းရဲ့အခွံထဲကနေ နောက်ဆုံးတော့ တွားသွားပြီး ထွက်လာပြီလား"

ထို့နောက် သူက ယွီကျင်းဝမ်ကို လက်ညှိုးထိုးလိုက်၏။ "မင်းရဲ့ သူခိုးအဖေကို မြင်လား။ ငါ့ရဲ့ အစ်ကို(၂)ကို မင်း ဘယ်လို လုပ်ကြံခဲ့သလဲဆိုတာကို ဝန်ခံ၊ မင်းရဲ့ အဘိုးကျန်းကို ဒူးထောက်ပြီး သုံးကြိမ် ဦးချလိုက်၊ အဲ့ဒီအခါကျရင် မင်းရဲ့ သူခိုးအဖေကို ရေတစ်ငုံ သောက်ခွင့်ပေးမယ်"

တင်းကျပ်စွာ ချည်နှောင်ခံထားရသော ယွီကျင်းဝမ်သည် အချိန်ကြာမြင့်စွာ ပါးစပ်ဆို့ခံထားရပြီး သူ့ကိုယ်သူ အငတ်ခံရန် အစားအစာစားခြင်းကို ငြင်းဆန်ခဲ့သည်။ သူ့ကို အသက်ရှင်စေရန် စစ်သည်များက နေ့စဉ် ဆန်ပြုတ်ကို အတင်းအကျပ် တိုက်ခဲ့ရသဖြင့် ယခုအခါ သူ၏နှုတ်ခမ်းများက ခြောက်သွေ့ကွဲအက်ကာ အရေခွံကွာနေလေသည်။

ယွီကျိယွမ်သည် သူ၏လက်ညှိုးညွှန်ရာအတိုင်း လိုက်ကြည့်လိုက်ပြီး သဘာဝကျကျပင် ယွီကျင်းဝမ်ကိုလည်း မြင်တွေ့လိုက်ရသည်။ သူ့စိတ်ကို တင်းထားလိုက်ပြီး သူက ကြေညာလိုက်၏။ "ငါ့အဖေက လွန်ခဲ့တဲ့ နှစ်တွေကတည်းက သေသွားခဲ့ပြီ။ မင်းတို့အားလုံးက ငါ့ကို လုပ်ကြံဖို့ ဖေစုန့်ရဲ့ စစ်စခန်းနဲ့ ပူးပေါင်းကြံစည်ပြီး ငါ့ရဲ့မျိုးရိုးနာမည်တူတဲ့ အောက်တန်းစား တစ်ယောက်ကို ခေါ်လာပြီး ဒီလို လုပ်ကြံစွပ်စွဲမှုနဲ့ ငါ့နာမည်ကို ဖျက်ဆီးနိုင်မယ်လို့ ထင်နေတာလား"

ထိုအရှက်ခွဲမှုကို သည်းမခံနိုင်တော့သည့်နှယ် သူသည် သူ၏ဒဏ်ရာများကို လျစ်လျူရှုကာ လက်တစ်ဖက်ကို ဆန့်ထုတ်လိုက်ပြီး သူ့ဘေးနားရှိ သူများကို အမိန့်ပေးလိုက်သည်။ "ငါ့ကို လေးတစ်လက် ယူခဲ့။ ဒီလူယုတ်မာကို ငါကိုယ်တိုင် မြားနဲ့ ပစ်သတ်မယ်"

ရှောင်းလိနှင့် တစ်ကြိမ် ဆုံတွေ့လိုက်ရုံမျှဖြင့် သူ့ကို အလွန်အမင်း တုန်လှုပ်သွားစေခဲ့ပြီ ဖြစ်သည်။

ယွီကျင်းဝမ်က ရှောင်းလိ၏ လက်ထဲတွင် အချိန်ပိုကြာလေလေ၊ သူက ပိုပြီး နှိပ်စက်ခံရလေလေ ဖြစ်မည်ကို ယွီကျိယွမ် ရှင်းလင်းစွာ သိထား၏။

ရှောင်းလိနှင့် ရင်ဆိုင်ရပြီးနောက် သူ့အတွင်းစိတ်ထဲတွင် မြင့်တက်လာသော နိမိတ်မကောင်းသည့် ခံစားချက်ကို ဖယ်ရှားရန်နှင့် သူ့ကို ထပ်မံဆင်းရဲဒုက္ခခံစားရခြင်းမှ ကင်းဝေးစေရန် မြားတစ်စင်းဖြင့် သူ့အသက်ကို အဆုံးသတ်လိုက်ခြင်းက ပိုကောင်းပေလိမ့်မည်။

မြို့ရိုးမျှော်စင်ပေါ်ရှိ သံချပ်ကာဝတ် စစ်သည်များက မသေချာမရေရာသော အကြည့်များ ဖလှယ်လိုက်ကြပြီး သူတို့၏မျက်လုံးများက ယွမ်ဖန်းဆီသို့ လှည့်သွားကြသည်။

ယွမ်ဖန်းက ပြောလိုက်၏။ "လူကြီးမင်း၊ ခင်ဗျားက ဒဏ်ရာရထားတယ်။ ဒေါသနဲ့ အလျင်စလို မလုပ်ပါနဲ့..."

သို့သော် ယွီကျိယွမ်က နောက်တစ်ကြိမ် ဟောက်လိုက်သည်။ "ငါ့ကို လေးတစ်လက် ယူခဲ့"

အောက်ဘက်ရှိ တိုက်ပွဲဗျူဟာအခင်းအကျင်းရှေ့တွင် ချည်နှောင်ခံထားရသော ယွီကျင်းဝမ်အပေါ်တွင် သူ၏အကြည့်များက စူးစိုက်လျက် ရှိနေပြီး သူ၏မျက်လုံးများက ဒေါသကြောင့် နီရဲနေသယောင်။

ထိုအခိုက်အတန့်တွင် အားနည်းစွာဖြင့် ခေါင်းငိုက်စိုက်ကျနေသော ယွီကျင်းဝမ်သည် လူတစ်ဦးကို နောက်ဆုံးအကြိမ် တွေ့မြင်ရရန် အတင်းကြိုးစားနေသည့်နှယ် မြို့ရိုးမျှော်စင်ပေါ်သို့ မော့ကြည့်လိုက်လေသည်။

မျှော်စင်အောက်ဘက်တွင် ကျန်းဟူ၊ စုန့်ချင်နှင့် အခြားသူများက ထိုမြင်ကွင်းကို ကြည့်ကာ အနည်းငယ် မျက်မှောင်ကြုတ်လိုက်ကြ၏။

ကျန်းဟွိုင်သည် မသိမသာ မျက်မှောင်ကြုတ်လိုက်ပြီး တစ်ခုခုပြောရန် ရှောင်းလိဘက်သို့ လှည့်လိုက်စဉ် ရှောင်းလိ၏ မျက်နှာအမူအရာက အနည်းငယ်မျှ ပြောင်းလဲခြင်း မရှိသည်ကို သတိပြုမိသွားသည်။

ထို့အစား သူက မြို့ရိုးမျှော်စင်ဆီသို့ အေးစက်သော လှောင်ပြောင်မှုဖြင့် လှမ်းပြောလိုက်လေသည်။ "အကြံပေးယွီက ဒီလူနဲ့ ဘာမှပတ်သက်မှု မရှိဘူးလို့ ပြောနေတယ်၊ ဒါပေမယ့် ဒီလူကိုယ်တိုင်က မာကျားလျန် တိုက်ပွဲကို ကြိုးကိုင်ခြယ်လှယ်ခဲ့ပြီး ဝေ့စစ်သည် နှစ်သောင်းရဲ့ အသက်ကို သေဆုံးစေခဲ့တယ်— ဒါက ခွင့်လွှတ်လို့မရတဲ့ စက်ဆုပ်ရွံရှာဖွယ် ရာဇဝတ်မှုပဲ။ သူ့ကို မြားတစ်စင်းတည်းနဲ့ သေခွင့်ပေးလိုက်တာက အရမ်း သနားညှာတာလွန်းရာ မကျဘူးလား"

သူက အော်ခေါ်လိုက်၏။ "ကျန်းဟူ"

ကျန်းဟူသည် ရှောင်းလိ၏ ရည်ရွယ်ချက်ကို နားမလည်သော်လည်း သူက အလျင်အမြန်နှင့် ကျယ်လောင်စွာ တုံ့ပြန်လိုက်သည်။

ရှောင်းလိက ပြောလိုက်၏။ "ဒယ်အိုးကြီး တစ်လုံး တည်လိုက်"

ရှောင်းလိ၏ အမိန့်ကြောင့် ရှုပ်ထွေးသွားသဖြင့် ကျန်းဟူက တိုးညှင်းစွာ "အာ" ဟု အသံထွက်လိုက်သော်လည်း စစ်တပ်နှစ်ခု မျက်နှာချင်းဆိုင်နေရသဖြင့် မေးခွန်းများ မေးနေရန် အချိန်မရှိချေ။ သူသည် လက်အောက်ငယ်သားများကို ချက်ချင်း လက်ဝှေ့ယမ်းပြလိုက်ပြီး ဒယ်အိုးကြီးတစ်လုံး ရှာဖွေရန် ညွှန်ကြားလိုက်၏။

ဒယ်အိုးကြီး တည်ပြီး မီးမွှေးလိုက်သောအခါ မြင်ကွင်းက လုံးဝကို အံ့အားသင့်စရာ ဖြစ်သွားခဲ့သည်။

သို့သော် ရှောင်းလိ၏ နောက်ထပ်စကားများက ထိုနေရာရှိ လူတိုင်း၏ အရိုးထဲအထိ စိမ့်ဝင်သွားသော အေးစက်မှုတစ်ခုကို ဖြစ်ပေါ်စေခဲ့၏။

သူ၏အေးစက်သော မျက်လုံးများက မျက်နှာချင်းဆိုင်ရှိ မြို့ရိုးမျှော်စင်ပေါ်သို့ စူးစိုက်ထားလျက် ပေါ့ပေါ့ပါးပါး ပြောလိုက်လေသည်။ "မာကျားလျန် တိုက်ပွဲက ငါ့ကိုလည်း အရမ်းကို ဝမ်းနည်းကြေကွဲစေခဲ့တယ်။ ငါက ဖေစုန့်ရဲ့ စစ်စခန်းနဲ့ ပူးပေါင်းကြံစည်ခဲ့တယ်ဆိုတဲ့ ကောလာဟလတွေ ရှိနေမှတော့ ဒီနေ့ ဒီဖေစုန့်ရဲ့ ဗျူဟာမှူးကို လူပုံအလယ်မှာ အပိုင်းပိုင်းခုတ်ထစ်ပြီး ပြီးရင် မြို့ပြင်က လေလွင့်ခွေးတွေကို ကျွေးဖို့ သူ့အသားကို ပြုတ်ပေးမယ်။ ဒါက မာကျားလျန်မှာ ကျဆုံးသွားခဲ့တဲ့ စစ်သည်နှစ်သောင်းရဲ့ ဝိညာဉ်တွေအတွက် နှစ်သိမ့်မှုတချို့ ပေးစွမ်းနိုင်လိမ့်မယ်"

အရှင်လတ်လတ် အသားလွှာခံရသည့်ပြစ်ဒဏ်က ရှေးခေတ်ကတည်းက တည်ရှိခဲ့သည်။

သို့သော် အနီးနားတွင် ဒယ်အိုးကြီးတစ်လုံး ဆူပွက်နေချိန်တွင် လူတစ်ယောက်ကို အပိုင်းပိုင်းခုတ်ထစ်ပြီး ပြစ်ဒဏ်ချမှတ်ခံရသူကို သူတို့၏ကိုယ်ပိုင်အသား ပြုတ်ခံနေရသည်ကို အတင်းအကျပ် ကြည့်ခိုင်းခြင်းမျိုး— ထိုကဲ့သို့သော လူမဆန်သည့် နှိပ်စက်မှုမျိုးကို ယခင်က တစ်ခါမှ အသုံးမပြုခဲ့ဖူးချေ။

ရာသီဥတုက ပူပြင်းနေပြီဖြစ်ပြီး ပြင်းထန်သော မီးတောက်များအောက်တွင် မကြာမီမှာပင် ဒယ်အိုးကြီး၏ အစွန်းများမှ ရေနွေးငွေ့များ ထွက်ပေါ်လာခဲ့၏။

ယွီကျင်းဝမ်၏ သစ်သားစင်က ဒယ်အိုးကြီးဘေးတွင် တည်ရှိနေပြီး အောက်ဘက်ရှိ လောင်ကျွမ်းနေသော ထင်းများ၏ တဖြောက်ဖြောက် မြည်သံများက သူ ကြားနိုင်လောက်အောင် နီးကပ်နေသည်။

အာဏာသားက ရှေ့သို့တက်လာပြီး သူ့အဝတ်အစားများကို ဓားဖြင့် ဖြတ်တောက်လိုက်၏။ ထိုအခိုက်အတန့်တွင် အားနည်းမှုကြောင့်ဖြစ်စေ၊ ကြောက်ရွံ့မှုကြောင့်ဖြစ်စေ သူ့မျက်နှာက ဖြူလျော့နေခဲ့သော်လည်း သူ၏အကြည့်များက မြို့ရိုးမျှော်စင်ပေါ်တွင်သာ စူးစိုက်နေဆဲပင်။

ခဏတာ ဆူညံသွားပြီးနောက် မျက်နှာချင်းဆိုင်ရှိ မြို့ရိုးမျှော်စင်က သေလူလို တိတ်ဆိတ်သွားတော့သည်။

ဝေ့စစ်သည် နှစ်သောင်း၏ သေဆုံးမှုအတွက် တာဝန်ရှိသော ကြိုးကိုင်ခြယ်လှယ်သူကို ရှောင်းလိက အရှင်လတ်လတ် အသားလွှာခံရသည့်ပြစ်ဒဏ်ဖြင့် ကွပ်မျက်ရန် ရည်ရွယ်ထား၏။ ဝေ့စစ်စခန်းတွင် သူ့ကို တားဆီးရန် အကြောင်းပြချက် မရှိခဲ့ချေ။

ယွီကျိယွမ်က မြို့ရိုးရင်တားတွင် ရပ်နေရင်း သူ၏ရင်ဘတ်မှသည် လည်ချောင်းအထိ သံချေးအရသာတစ်ခု တက်လာသည်ကို ခံစားလိုက်ရသည်။ သူသည် ၎င်းကို အသည်းအသန် ဖိနှိပ်ထားလိုက်ပြီး စာပေပညာရှင်ဝတ်ရုံ၏ ကျယ်ဝန်းသော အင်္ကျီလက်အောက်တွင် ဖုံးကွယ်ထားသော သူ့လက်သီးကို တင်းကြပ်စွာ ဆုပ်ကိုင်ထားလွန်းသဖြင့် လက်ဖဝါးက ပေါက်ပြဲသွားခဲ့သော်လည်း မည်သည့်နာကျင်မှုကိုမှ မခံစားမိခဲ့ချေ။

သူသည် ဤနှိပ်စက်မှုကို ရပ်တန့်ရန် ဝေ့စစ်စခန်းတွင် အရည်အချင်းအနည်းဆုံး လူတစ်ယောက် ဖြစ်နေသည်။

ငါ ဒါကို သည်းခံရမယ်။ ဒါကို သည်းခံလိုက်တာနဲ့ ရှောင်းလိက ငါ့ကို နောက်ထပ် ဘာမှ ထိန်းချုပ်နိုင်တော့မှာ မဟုတ်ဘူးဟု သူက သူ့ကိုယ်သူ ပြန်ပြောလိုက်သည်။

တစ်နေ့ကျရင် ငါ့အဖေအတွက် အဆတစ်ထောင် ကလဲ့စားချေပေးရလိမ့်မယ်။

ယွီကျင်းဝမ်ကို နောက်ထပ် အသားတစ်လွှာ လှီးဖြတ်လိုက်ပြီးနောက် အာဏာသားက ထိုအဘိုးအိုသည် နာကျင်မှုကြောင့် သူ၏လျှာကို နောက်တစ်ကြိမ် မကိုက်နိုင်လောက်အောင် အားနည်းနေပြီဖြစ်ကြောင်း အတည်ပြုလိုက်၏။ ပါးစပ်ဆို့ထားသည်ကို ဖယ်ရှားလိုက်ပြီး နှိပ်စက်စဉ်အတွင်း ယွီကျင်းဝမ်၏ အော်ဟစ်သံများက တစ်ဖက်ရန်သူကို ခြောက်လှန့်နိုင်ရန် သူက ရည်ရွယ်ခဲ့သည်။

သို့သော် အားနည်းပုံရသော ထိုအဘိုးအိုသည် သံမဏိအရိုး ရှိကြောင်း သက်သေပြခဲ့သည်။ ပါးစပ်ဆို့ကို ဖယ်ရှားလိုက်ပြီးနောက် သူ၏မေးရိုး လှုပ်ရှားနိုင်သည့် အခိုက်အတန့်တွင် သူက သူ၏ပြင်းထန်သော နာကျင်မှုကို လျစ်လျူရှုကာ အက်ကွဲသော အသံဖြင့် ပြောလိုက်လေသည်။ "ဒီအဘိုးကြီးမှာ သားတွေ မရှိဘူး။ ရှောင်ကျင်း ရှစ်နှစ်မြောက် ငတ်မွတ်ခေါင်းပါးမှုမှာ ငါ့ရဲ့ တစ်ဦးတည်းသော သားက ငတ်သေသွားခဲ့တာ။ ငါ့ကို ဒုက္ခပေးခဲ့တာက ယခင်လျန်ပဲ"

သူ၏ နောက်ဆုံးကျန်ရှိသော ခွန်အားဖြင့် သူက ရှောင်းလိ၏ အရပ်မျက်နှာဆီသို့ တံတွေးထွေးလိုက်၏။ "ယုံကျိုး ပြည့်တန်ဆာရဲ့ ဗိုက်ထဲက ထွက်လာတဲ့ ခွေးမသားလေး။ ငါ ငယ်ငယ်တုန်းက အဲ့ဒီက နာမည်ကြီး ပြည့်တန်ဆာတွေဆီကို ငါလည်း သွားခဲ့ဖူးတယ်။ အဲ့ဒီ ပြည့်တန်ဆာ မင်းအမေက ငါ့ကိုလည်း ပြုစုပေးခဲ့လောက်တယ်။ မင်းကို ဘယ်သူမှ ပိုင်ဆိုင်ကြောင်း မကြေညာမှတော့ မင်းက ငါ့ကို အဖေလို့ ခေါ်လိုက်တာက ပိုကောင်းလိမ့်မယ်"

"အိုမင်းနေတဲ့ အမှိုက်ကောင်။ မင်းကို ငါ သတ်မယ်" ကျန်းဟူက ထိုရက်စက်သော စကားကို သည်းမခံနိုင်တော့ဘဲ သူ၏ဓားကို ချက်ချင်း လှမ်းကိုင်လိုက်သော်လည်း စုန့်ချင်က သူ့ကို တားဆီးကာ အော်ပြောလိုက်လေသည်။ "ကျန်းဟူ၊ စိတ်အေးအေးထားစမ်း။ ဒီအဘိုးအိုက သေချင်လို့ ဆွပေးနေတာ"

တားဆီးခံထားရသော်လည်း ကျန်းဟူက သူ၏မျက်လုံးများ ပြူးကျယ်လုမတတ် ဒေါသတကြီး ပြန်လည် ဆဲရေးလိုက်၏။ "ညစ်ပတ်တဲ့ အဘိုးကြီး၊ စောင့်ကြည့်နေလိုက်။ မြို့ရိုးပေါ်က မင်းရဲ့ အဲ့ဒီ ခွေးသားက ငါ့ရဲ့ တူတွေနဲ့ အသားစင်းဖြစ်အောင် ထုထောင်းခံရပြီး ပေါက်စီလုပ်ပြီး ခွေးတွေကို ကျွေးတာ ခံရလိမ့်မယ်"

ယွီကျင်းဝမ်က မထီမဲ့မြင် ပြုံးလိုက်ရုံသာ ပြုံးလိုက်သည်။ "သူက မြောက်ပိုင်းဝေ့ရဲ့ ဗျူဟာမှူးပဲ။ သူ့ရဲ့ အသက်ရှင်ခြင်း ဒါမှမဟုတ် သေဆုံးခြင်းက ငါနဲ့ ဘာဆိုင်လို့လဲ။ ဝေ့စစ်စခန်းမှာ သေတဲ့သူ ပိုများလေလေ၊ ငါ ပိုပြီး ပျော်လေလေပဲ"

သေချာသည်မှာ သားအဖနှစ်ယောက်စလုံးက ပတ်သက်မှုများကို ဖြတ်တောက်ရန်နှင့် ယွီကျိယွမ်၏ အသက်ရှင်သန်မှုကို သေချာစေရန် ဤလုပ်ရပ်ကို အသည်းအသန် လုပ်ဆောင်နေကြခြင်းပင်။

ဒေါသထွက်နေသော ကျန်းဟူသည် နောက်တစ်ကြိမ် ရှေ့သို့ ပြေးထွက်သွားလုနီးပါး ဖြစ်သွားချိန်တွင် ရှောင်းလိ၏ အသံက ဖြတ်ပြောလိုက်လေသည်။ "ဓားနဲ့ ထပ်မလှီးနဲ့တော့။ အသားစိမ်းတွေ ကွာကျသွားအောင် ပူနေတဲ့ သံကြိုးတွေကို သုံးပြီး ခြစ်ချလိုက်"

သူ၏အေးစက်ပြီး နက်ရှိုင်းသော မျက်လုံးများက ပူပြင်းလှသော နေရောင်အောက်တွင်ပင် ရေခဲဖုံးနေသယောင်။

ယုံချန်ကတည်းက သူ့နောက်သို့ လိုက်ပါလာခဲ့သူများက သိထားကြသည် — ရှောင်းဟွေ့နျန်သည် သူ၏ လုံးဝ တားမြစ်ထားသော အရာတစ်ခု ဖြစ်ကြောင်းပင်။

အာဏာသားများသည် သူတို့၏ဓားများကို တုတ်ခိုင်သော သံကြိုးများဖြင့် အလျင်အမြန် အစားထိုးလိုက်ကြသည်။ ဆူပွက်နေသော ရေထဲတွင် နှစ်လိုက်ပြီးနောက် လူနှစ်ယောက်က ၎င်းတို့ကို တင်းတင်းကျပ်ကျပ် ဆွဲကာ ယွီကျင်းဝမ်၏ ခန္ဓာကိုယ်ကို စတင် ခြစ်ချလိုက်ကြ၏။

အသားများ လှီးဖြတ်ခံထားရပြီးဖြစ်ရာ ကြမ်းတမ်းသော သံကြိုးများက ပေါ်နေသော ဒဏ်ရာများကို ကြမ်းတမ်းသော ခွန်အားဖြင့် ပွတ်တိုက်သွားခြင်းက အရေပြားနှင့် အသားစိမ်းများကို ဆုတ်ဖြဲပစ်လိုက်သလို ခံစားရစေသည်။

ယွီကျင်းဝမ်သည် ပြင်းထန်သော နာကျင်မှုကြောင့် ချက်ချင်း တက်သွားပြီး အော်ဟစ်သံများက သူ၏လည်ချောင်းမှ ထိန်းမနိုင်သိမ်းမရ ထွက်ပေါ်လာတော့၏။

သူ၏ အလွန်အမင်း ပြင်းထန်လှသော နှိပ်စက်ခံရမှုတွင် သူ့အောက်ရှိ ဝတ်ရုံများက သံချေးနံ့ရနေသော နွေးထွေးသည့် အရည်များဖြင့် စိုရွှဲသွားခဲ့သည်။

နာကျင်မှုက ပြင်းထန်လွန်းသဖြင့် သူက ခန္ဓာကိုယ်ကို မထိန်းချုပ်နိုင်တော့ချေ။

ဤနည်းလမ်းက ဓားဖြင့် လှီးဖြတ်ခြင်းထက် အများကြီး သာလွန်ဆိုးရွားနေ၏။ အနည်းဆုံးတော့ ဓားများက ထက်မြက်ပြီး ဖြတ်တောက်မှုတိုင်းက သန့်ရှင်းသော နာကျင်မှုကို ပေးစွမ်းသည်။

သံကြိုးများဖြင့် ခြစ်ချခြင်းက အသားများကို ဖြည်းဖြည်းချင်း ချေမွပစ်ပြီး တစ်စစီ ဆုတ်ဖြဲပစ်ခြင်းကို ဆိုလိုသည်— ၎င်းသည် အရှင်လတ်လတ် အသားလွှာခံရသည့် နှိပ်စက်မှုထက် အဆပေါင်းများစွာ ပိုမိုဆိုးရွားသော ဆင်းရဲဒုက္ခတစ်ခု ဖြစ်သော်လည်း မြန်မြန်ဆန်ဆန် သေဆုံးခြင်းကိုတော့ တားဆီးထားသည်။

ယွီကျင်းဝမ်သည် ယခင် ပြင်းထန်သော နာကျင်မှုမှ ပြန်လည်မသက်သာလာခင်မှာပင် အာဏာသားများက သံကြိုးများကို သူ့အပေါ်သို့ နောက်တစ်ကြိမ် လွှဲချလိုက်လေပြီ။

ယွီကျင်းဝမ်သည် နောက်ထပ် ပြင်းထန်သော အော်ဟစ်သံတစ်ခုကို ထုတ်လွှတ်လိုက်ပြီး နာကျင်မှုက အလွန်ပြင်းထန်လွန်းသဖြင့် မိမိ၏လျှာကို ကိုက်ဖြတ်ကာ အသက်ကို အဆုံးသတ်လိုက်ချင်စိတ် အမှန်တကယ် ဖြစ်ပေါ်လာခဲ့၏။

သို့သော် ထိုနှိပ်စက်မှုက သူ၏ခွန်အားအားလုံးကို စုပ်ယူသွားခဲ့သည်— သူ၏လျှာကို စုတ်ပြတ်ကာ သွေးထွက်လာသည်အထိ ကိုက်ခဲခဲ့သော်လည်း သူက အဖျားကိုပင် မဖြတ်တောက်နိုင်ခဲ့ချေ။

သူ လုပ်နိုင်သမျှက ရှောင်းလိကို အရုပ်ဆိုးဆုံးနှင့် အယုတ်မာဆုံးသော ဆဲရေးတိုင်းထွာမှုများ ပြုလုပ်ရန်သာဖြစ်ပြီး သူ့စကားလုံးများက နားထောင်လို့ မရနိုင်လောက်အောင်ပင် အောက်တန်းကျနေခဲ့သည်။

သို့သော် ရှောင်းလိကတော့ ဒေါသထွက်သည့် အရိပ်အယောင် နည်းနည်းမှ မပြခဲ့ချေ။

မကြာမီ ယွီကျင်းဝမ်တွင် ကျိန်ဆဲရန် ခွန်အား မရှိတော့ပေ။

နာကျင်မှုကြောင့် ပင်ကိုယ်အသိစိတ်ဖြင့် အက်ကွဲစွာ အော်ဟစ်နေခြင်းမှလွဲ၍ သူက စကားတစ်ခွန်းမျှပင် မပြောနိုင်တော့ချေ။

နောက်ဆုံးတွင် သူသည် အော်သံပင် မထုတ်နိုင်တော့ချေ။ သံကြိုးများ အောက်ဘက်သို့ ခြစ်ချလိုက်ချိန်တွင် သူ၏ခန္ဓာကိုယ်က တဆတ်ဆတ် တုန်ယင်နေရုံသာ တတ်နိုင်တော့၏။

ပန်းထွက်လာသော သွေးများက သူ့အောက်ရှိ အဝတ်အစားများကို အစောကြီးကတည်းက နီရဲနေစေပြီးဖြစ်ကာ ပါးနီရောင် အသားစများက ကွပ်မျက်ရေးစင်မြင့်တစ်လျှောက် ပြန့်ကျဲနေသည်။

သံကြိုးများကို ဆူပွက်နေသော ရေထဲသို့ နှစ်လိုက်သောအခါ ၎င်းတို့နှင့်အတူ ပါလာသော အသားစများက ကျက်သွားပြီး အသားနံ့က လေနှင့်အတူ မြို့ရိုးဆီသို့ လွင့်ပျံလာခဲ့၏။

ယွီကျိယွမ်၏ လက်ဖဝါးများက သွေးများဖြင့် စိုရွှဲနေပြီဖြစ်ပြီး သံချေးအရသာက သူ့ပါးစပ်ထဲတွင် ပြည့်နှက်နေသည်။

ဝေ့စစ်စခန်းမှ စစ်သည်များနှင့်အတူ ကွပ်မျက်ခြင်းကို ကြည့်ရန် သူ့ကိုယ်သူ အတင်းအကျပ် ဖိအားပေးခဲ့ပြီး သူ၏အာရုံများက ထုံကျင်လုနီးပါး ဖြစ်နေ၏။

အကြိမ်ပေါင်းများစွာ ယွီကျင်းဝမ်၏ အော်ဟစ်သံများက အလွန်အမင်း ကြောက်မက်ဖွယ်ကောင်းလာသောအခါ သူက မကြည့်ရဲတော့ဘဲ အကြည့်ကို နှိမ့်ချလိုက်သည်။

သို့သော် ကျက်ပြီးသား အသားနံ့က လေထဲတွင် လွင့်ပျံလာသောအခါ သူသည် ဆက်ပြီး မထိန်းထားနိုင်တော့ချေ။ မျှော်စင်ရင်တားကို မှီလျက် သူက ကိုင်းညွတ်ကာ ပြင်းထန်စွာ အန်ချလိုက်တော့၏။

သံချပ်ကာဝတ် စစ်သည်တစ်ယောက်က သူ့ကို တွဲထူရန် ရှေ့သို့တက်လာသော်လည်း ယွီကျိယွမ်က သူ့ကို လက်ဝှေ့ယမ်းကာ ငြင်းပယ်လိုက်ပြီး ဖြူလျော့နေသော မျက်နှာဖြင့် ရှင်းပြလိုက်လေသည်။ "ဘာမှမဖြစ်ပါဘူး။ ဒီလို ကွပ်မျက်တဲ့ နည်းလမ်းမျိုးကို အရင်က တစ်ခါမှ မမြင်ဖူးလို့ပါ"

မတ်မတ်ရပ်လိုက်ပြီး သူ၏မျက်လုံးများက သွေးရောင်လွှမ်းနေလျက် သူသည် အောက်ဘက်သို့ စိုက်ကြည့်လိုက်၏။ ၎င်းသည် သူ့ကို လက်နက်ချစေရန် ဤကဲ့သို့သော ရက်စက်မှုကို အသုံးပြုခဲ့သည့် ရှောင်းလိကို ၎င်းက အောင်ပွဲတစ်ခုဖြစ်ကြောင်း ကြေညာလိုပြီး တစ်နေ့တွင် ဤဆင်းရဲဒုက္ခအားလုံးကို နှစ်ဆ ပြန်လည်ပေးဆပ်မည်ဟု ရှင်းလင်းစွာ သိစေလိုသည့်နှယ်ပင်။

သို့သော် ယွီကျိယွမ်က စကားတစ်ခွန်းမျှ မပြောနိုင်ခင်မှာပင် ရှောင်းလိက ချီးကျူးသည့်အနေဖြင့် လက်ခုပ်တီးနေလေပြီ။ "ကိုယ့်အဖေအရင်း လှီးဖြတ်သတ်ဖြတ်ခံရပြီး ပြုတ်ခံနေရတာကို မတုန်မလှုပ်ဘဲ ကြည့်နေနိုင်တာ— အကြံပေးယွီ၊ မင်းမှာ ထူးခြားတဲ့ ခံနိုင်ရည်ရှိတာပဲ။ ဒါပေမယ့် သူ့ရဲ့ နောက်ဆုံးထွက်သက်အထိ မင်းရဲ့ လေးစားရတဲ့အဖေက မင်းဆီကနေ မျက်လုံးမခွာခဲ့ဘူး။ သူ မအော်ဟစ်နိုင်တော့တဲ့ အဲ့ဒီ နောက်ဆုံးအချိန်တွေမှာ သူ့ကို ကယ်တင်ပေးဖို့ မင်းကို တိတ်တဆိတ် တောင်းပန်နေခဲ့မလားဆိုတာကို ငါ သိချင်မိတယ်"

ပူပြင်းလှသော နေရောင်အောက်တွင် ရှောင်းလိ၏ မျက်နှာသွင်ပြင်က ပိုသိသာထင်ရှားစွာ လှပနေပုံပေါ်ပြီး သူ့လေသံက လုံးဝကို တည်ငြိမ်နေခဲ့၏။

သို့သော် ထိုအခိုက်အတန့်တွင် သူ ထုတ်ဖော်ပြသခဲ့သမျှက အကန့်အသတ်မရှိသော လှောင်ပြောင်မှုနှင့် ရက်စက်ယုတ်မာမှုတို့သာ ဖြစ်သည်။

ယွီကျိယွမ်သည် မိမိ၏ဖခင်အရင်း အရှင်လတ်လတ် အသားလွှာခံရပြီး သေဆုံးသွားသည်ကို ကြည့်ကာ မည်သည့်ရွေးချယ်မှု ပြုလုပ်မည်ကို သိရှိရန်အတွက်သာ ဤရက်စက်ကြမ်းကြုတ်သော မြင်ကွင်းတစ်ခုလုံးကို ဖန်တီးထားခဲ့သည့်နှယ်ပင်။

...