အခန်း ၂၀၀

အပိုင်း (၂၀၀)

ယွီကျိယွမ်၏ နှလုံးသားသည် နာကျင်မှုနှင့် အမုန်းတရားတို့ကြားတွင် ဆွဲဖြဲခံနေရ၏။ မည်သည့် သဲလွန်စကိုမျှ မပေါ်လွင်စေရန် သူက သူ၏ခံစားချက်များကို အသည်းအသန် ဖုံးကွယ်ထားခဲ့ရပြီး လွှမ်းမိုးနေသော ဖိနှိပ်မှုများကြောင့် ရူးသွပ်လုနီးပါး ဖြစ်နေခဲ့သည်။ သူ၏ လက်ချောင်းများက လက်ဖဝါးများထဲသို့ စူးဝင်နေပြီး ထွက်လာသော သွေးများက သူ၏ အင်္ကျီလက်အတွင်းပိုင်းကို အရောင်ရင့်ရင့် စွန်းထင်းသွားစေ၏။

သူက အသားကို အစိမ်းလိုက် ဝါးစားတော့မည့် အကြည့်မျိုးဖြင့် ရှောင်းလိကို စိုက်ကြည့်ကာ ပြောလိုက်လေသည်။ "အဓိပ္ပါယ်မရှိတာတွေ ပြောနေတုန်းပဲလား။ သခင်လေးနဲ့ ခရိုင်မင်းသမီးကို ဒုက္ခပေးခဲ့တဲ့ မင်းလို သစ္စာဖောက် လူယုတ်မာက အရေခွံခွာပြီး အရှင်လတ်လတ် ပြုတ်သတ်တဲ့ အပြစ်ဒဏ်မျိုး ခံသင့်တယ်"

ရှောင်းလိက သူ၏ မျက်လုံးများကို အေးစက်ပျင်းရိစွာ ပင့်ကြည့်လိုက်၏။

"သမက်တော်နဲ့ ခရိုင်မင်းသမီး သေဆုံးရတာက အကြံပေးအမတ်ယွီ မင်းကြောင့် မဟုတ်ဘူးလား"

သူ့အကြည့်ထဲမှ ဖိအားနှင့် စူးရှမှုတို့က မည်သူ့ကိုမျှ မျက်လုံးချင်း မဆုံရဲအောင် ပြုလုပ်ထားသော်လည်း သူ၏ လေသံကမူ အမြဲတမ်းလိုလို ပေါ့ပါးနေဆဲ။

"စိတ်မပူပါနဲ့၊ အကြံပေးအမတ်ယွီကို အရေခွံခွာပြီး အရှင်လတ်လတ် ပြုတ်တဲ့အခါ အဆိပ်ခတ်သူယွီနဲ့ အိုးတစ်လုံးတည်းမှာ ပြုတ်ပြီး သားအဖနှစ်ယောက် သွေးသားချင်း ပြန်လည် ပေါင်းစည်းပေးမယ်လို့ ဒီနယ်စားက အာမခံတယ်"

ဤစကားများက ထိုနေရာရှိ လူတိုင်း၏ နှလုံးသားကို အတွင်းနက်နက်ထဲမှ ထိုးထွက်လာသည့် အေးစိမ့်စိမ့် ခံစားချက်ကို ဖြစ်စေတော့သည်။

ယွီကျိယွမ်သည်လည်း ရှောင်းလိ၏ အကြည့်ကြောင့် လန့်ဖျပ်သွားပြီး အခိုက်တန့် စကားပြောရန် မေ့လျော့သွားခဲ့သည်။ ရှောင်းလိက သူ၏ လက်ညှိုးနှင့် လက်ခလယ်ကြားတွင် စာတစ်စောင်ကို မြှောက်ကိုင်လိုက်ပြီး ခပ်အေးအေး မေးလိုက်၏။

"အကြံပေးအမတ်ယွီက ဒီစာကို မှတ်မိလား"

အနီးတွင် ရပ်နေသော ကျန်းဟွိုင်က ရှောင်းလိ၏ လက်ထဲမှ စာကို သတိထားမိသွားပြီး မျက်နှာအမူအရာ အနည်းငယ် ပြောင်းလဲသွားသော်လည်း မည်သူမျှ သတိမထားမိခင် ချက်ချင်း ဖုံးကွယ်လိုက်သည်။ ယွီကျိယွမ်က ရှောင်းလိ၏ လက်ထဲရှိ စာအိတ်ကို အသေအချာ စိုက်ကြည့်နေပြီး စာက အစစ်အမှန် ဟုတ်မဟုတ် စဉ်းစားနေသယောင်ပင်။ မကြာမီတွင် သူက ဆုံးဖြတ်ချက် တစ်ခု ချလိုက်ပုံရပြီး နှာခေါင်းရှုံ့ကာ ပြောလိုက်လေသည်။

"ပထမတုန်းက ဖေစစ်တပ်က ဓားပြတစ်ယောက်ကို ဖမ်းပြီး ငါ့ကို အပြစ်ပုံချဖို့ ကျရှုံးသွားတာလေ။ အခုကျတော့ အဓိပ္ပါယ်မရှိတဲ့ စာတစ်စောင်နဲ့ ငါ့ကို အပြစ်ထပ်ပေးချင်နေတာလား"

ရှောင်းလိက ခပ်အေးအေးပင် မျက်ခုံးပင့်လိုက်ပြီး စာကို သူ၏ဘေးရှိ အစောင့်တစ်ဦးထံ ကမ်းပေးလိုက်၏။

"ဖတ်ပြလိုက်"

အစောင့်က စာကို ယူလိုက်ပြီး အတွင်းမှ စာရွက်ကို ထုတ်ကာ စတင် ဖတ်ပြလိုက်သည်။

"လေးစားရပါသော ဖခင်ကြီးထံသို့၊ ကျိုးကျိုးမှာ ကျွန်တော်တို့ ခွဲခွာခဲ့ကြတာ ၅နှစ် ရှိသွားပါပြီ။ ဖခင်ကြီး ကျန်းမာပါစေလို့ ရိုသေစွာ ဆုတောင်းလိုက်ပါတယ်။ ဆောင်းလယ်ကာလမှာ ဆရာနဲ့အတူ ခရီးဝေးထွက်လာရင်း ချင်းကျိုးမှာ ဆီးနှင်းတွေ အသည်းအသန် ကျတာနဲ့ ကြုံခဲ့ရတယ်။ ဒုက္ခသည်တွေက သူတို့ရဲ့ ကလေးတွေနဲ့အတူ တောင်းရမ်းနေကြတာကို မြင်တော့ ကျွန်တော့်အတွက် ဆန်ပြုတ်ရဖို့ သူဌေးတွေရဲ့ တံခါးတိုင်းကို ဖခင်ကြီး ခေါက်ပြီး တောင်းရမ်းခဲ့ရတာကို ပြန်အမှတ်ရမိတယ်။ ကျွန်တော့် နှလုံးသားတွေ နာကျင်ရပြီး စိတ်ဝိညာဉ်တွေလည်း မှေးမှိန်လာခဲ့တယ်..."

အစောင့်က စာကြောင်းတစ်ကြောင်းစီ ဖတ်ပြနေစဉ် ယွီကျိယွမ်၏ မျက်နှာက ပိုလို့ပင် ဖြူရော်လာခဲ့၏။ အဆုံးတွင်တော့ သူ့နှုတ်ခမ်းများက ထိန်းမရအောင် တုန်ယင်နေတော့သည်။ ဤသည်ကား သူက ယွီကျင်းဝမ်ထံ ရေးသားခဲ့သော စာဖြစ်ကြောင်း ယုံမှားသံသယဖြစ်ဖွယ် မရှိပေ။

ရှောင်းလိက လက်တစ်ဖက်ကို မြှောက်ပြလိုက်ရာ အစောင့်က ဖတ်နေသည့်စာကို ရပ်တန့်လိုက်၏။ ရှောင်းလိက မော့ကြည့်ပြီး ယွီကျိယွမ်ကို မေးလိုက်သည်။

"ဒီစာက ရှောင်ကျင်း ၁၃နှစ် ဆောင်းနှောင်းပိုင်းမှာ ရေးခဲ့တာ။ ငါတို့ ဆက်ဖတ်ပြရဦးမလား"

ယွီကျိယွမ်က အံကြိတ်ထားပြီး စကားတစ်ခွန်းမှ မဟနိုင်ခဲ့ချေ။ ရှောင်းလိ၏ လက်ထဲတွင် သူနှင့် ယွီကျင်းဝမ်တို့ကြား အပြန်အလှန် ပေးပို့ခဲ့သော စာများ မည်မျှရှိနေသေးသည်ကို မသေချာသဖြင့် သူ့စိတ်ထဲတွင် ရှုပ်ထွေးပွေလီနေတော့သည်။ ရှောင်းလိက သူ့အတွေးများကို ဖတ်နိုင်သည့်အလား ပေါ့ပေါ့ပါးပါး ပြောလိုက်၏။

"အကြံပေးအမတ်ယွီ... မင်းပြန်ပို့ခဲ့တဲ့ စာတိုင်းကို သေတ္တာတစ်လုံးထဲမှာ သေသေချာချာ သိမ်းဆည်းထားတာကို ကြည့်ရင် မင်းအဖေက မင်းကို အရမ်းလွမ်းဆွတ်နေခဲ့တာ ဖြစ်လိမ့်မယ်"

ထိုသို့ပြောနေစဉ် အခြားအစောင့်တစ်ဦးက ခမ်းနားသော ပိုးထည်သေတ္တာတစ်လုံးကို ကိုင်ကာ ရှေ့သို့ ထွက်လာခဲ့သည်။ ရှောင်းလိက ၎င်းကို ယူလိုက်ပြီး ဇောက်ထိုးလှန်ချကာ ခပ်အေးအေး ပြောလိုက်၏။

"အကြံပေးအမတ်ယွီက အရာအားလုံးကို ဆက်ပြီး ငြင်းဆိုနိုင်ပါတယ်။ ဒီနယ်စားက လူတစ်ယောက်ကို စာတစ်စောင်ချင်းစီ အသံထွက်ဖတ်ပြခိုင်းလိုက်မယ်"

ပိုးထည်သေတ္တာထဲမှ စာများက မြေပြင်ပေါ်တွင် နှင်းပွင့်များသဖွယ် ပြန့်ကျဲသွားခဲ့သည်။ ပြန့်ကျဲနေသော စာများကို မြင်လိုက်ရသောအခါ ယွီကျိယွမ်၏ မျက်နှာအမူအရာက ပိုလို့ပင် ပြာနှမ်းသွားပြီး သူ၏ ခြေလှမ်းများပင် ယိုင်လဲလုနီးပါး ဖြစ်သွားခဲ့၏။ မြို့ရိုးထက်တွင် ဆူညံပွက်လောရိုက်သွားတော့သည်။

ညှဉ်းပန်းနှိပ်စက်သည့် စင်ဘက်မှ ခပ်သဲ့သဲ့ လှုပ်ရှားမှုတစ်ခု ထွက်ပေါ်လာပုံရသည်။ ရှောင်းလိက လှမ်းကြည့်လိုက်ပြီး သူ၏ မျက်နှာအမူအရာက အနည်းငယ် အံ့ဩသွားပုံရကာ ပြောလိုက်လေသည်။

"သူ အသက်ရှင်နေသေးတာလား"

ထို့နောက် သရော်လှောင်ပြောင်သည့် အရိပ်အယောင်ဖြင့် သူက ဆက်ပြောလိုက်၏။ "ဒီကစားပွဲက ပြီးသွားပြီ။ သူ့ကို အသက်ရှင်ခွင့်ပေးထားလည်း ဘာမှ အသုံးမဝင်တော့ဘူး"

သူ၏ ရေခဲတမျှ အေးစက်နေသော မျက်လုံးများက မည်းနက်နက်ရှိုင်းနေပြီး မျက်နှာထားတင်းတင်းဖြင့် ပါးကွပ်သားအား ပေါ့ပေါ့ပါးပါး အမိန့်ပေးလိုက်သည်။

"သူ့ကို အရှင်လတ်လတ် ဆက်ပြီး အရေခွံခွာလိုက်"

အချက်ပြလိုက်သည်နှင့်တစ်ပြိုင်နက် ပါးကွပ်သားက သံကြိုးများကို ဆွဲယူလိုက်ပြီး စင်ပေါ်တွင် အင်္ဂါချို့တဲ့နေပြီဖြစ်သော ယွီကျင်းဝမ်အား ဆက်လက် အရေခွံခွာရန် ပြင်ဆင်လိုက်၏။ သို့သော် မြို့ရိုးမျှော်စင်ပေါ်မှ အလွန်တရာ ကြေကွဲဖွယ်ကောင်းသော အော်ဟစ်သံတစ်ခု ထွက်ပေါ်လာခဲ့သည်။

"ရပ်လိုက်စမ်း"

မျှော်စင်ပေါ်ရှိ လူတိုင်းမှာ အေးခဲသွားကြ၏။ ယွီကျိယွမ်က မြို့ရိုးအကာအကွယ်ကို မှီထားပြီး တုန်ယင်နေသော နှုတ်ခမ်းများနှင့် သွေးထွက်မတတ် နီရဲနေသော မျက်လုံးများဖြင့် အောက်သို့ ငုံ့ကြည့်ကာ ပြောလိုက်လေသည်။

"ညှဉ်းပန်းနှိပ်စက်တာကို ရပ်လိုက်"

ယခင်က သူသည် အရာအားလုံးကို ရင်းနှီးထားခဲ့ပြီး ယွီကျင်းဝမ် အရေခွံခွာခံရကာ အရှင်လတ်လတ် ပြုတ်ခံနေရသည်ကို စောင့်ကြည့်ရင်း ယွီကျင်းဝမ် သေဆုံးသည်အထိ တောင့်ခံထားနိုင်ပါက မိမိ၏ အသက်ရှင်သန်မှုကို သေချာစေလိမ့်မည်ဟု ယုံကြည်ထားခဲ့သည်။

ယခုတော့ ဤအရာအားလုံးက ရှောင်းလိ၏ ရက်စက်သော ကစားပွဲတစ်ခုသာ ဖြစ်ကြောင်း သူ သဘောပေါက်သွားခဲ့ပြီ။

ဖေစစ်တပ်အတွက် သူလျှိုလုပ်ခဲ့သည့် သက်သေအထောက်အထားများကို ရှောင်းလိက အစောကြီးကတည်းက ပိုင်ဆိုင်ထားခဲ့သော်လည်း တမင်သက်သက် ဖုံးကွယ်ထားခဲ့သည်။ အားလုံးမှာ ဖခင်ဖြစ်သူ၏ ကြောက်မက်ဖွယ် သေဆုံးမှုထက် သူ၏ အသက်ရှင်သန်မှုကို ရွေးချယ်သည်ကို စောင့်ကြည့်ရန် — အသက်နှင့် သေဆုံးမှုကြားမှ သူ၏ သနားစဖွယ် ရုန်းကန်မှု၊ သူ၏ လုံးဝ ဂုဏ်သိက္ခာကျဆင်းမှုကို မျက်မြင်ကိုယ်တွေ့ ကြုံတွေ့ရန်အတွက်သာ ဖြစ်ပေသည်။

သူ၏ စိတ်ဝိညာဉ်မှာ လုံးဝ ဖရိုဖရဲဖြစ်သွားပြီး ယွီကျင်းဝမ် အသက်ရှင်နေသေးကြောင်း သိလိုက်ရခြင်းက အရေခွံခွာနေသည်ကို စောင့်ကြည့်နေစဉ် သူ ဖိနှိပ်ထားခဲ့သော ခံစားချက်များ၏ ပြင်းထန်သော တန်ပြန်သက်ရောက်မှုကို ဖြစ်ပေါ်စေခဲ့၏။ နာကျင်မှုနှင့် အပြစ်ရှိစိတ်တို့ လွှမ်းမိုးသွားသဖြင့် သူက အသံဩဩဖြင့် ငိုကြွေးလိုက်လေသည်။

"အဖေ—"

အချိန်အတန်ကြာသည်အထိ လေတိုက်သံကသာ တိတ်ဆိတ်မှုကို ဖြိုခွဲနေခဲ့သည်။

ရှောင်းလိမှာ နောက်ထပ် စကားလုံးများ မလိုအပ်တော့ချေ။ ဝေ့အဖွဲ့က သူ့အပေါ် ပုံချထားခဲ့သော စွပ်စွဲမှုများသည် ယွီကျိယွမ်က သူ့ဖခင်ကို အသိအမှတ်ပြုလိုက်သည့် အခိုက်အတန့်တွင် မြေမှုန့်အဖြစ် ပြိုလဲသွားခဲ့ပြီ ဖြစ်သည်။

တီးတိုးရေရွတ်သံများ ထွက်ပေါ်လာပြီးနောက် မျှော်စင်မှာ နောက်တစ်ကြိမ် လုံးဝကို တိတ်ဆိတ်သွားပြန်၏။

တင်းကျပ်စွာ ကြိုးတုပ်ခံထားရသော ယွီကျိယွမ်က မြို့တံခါးဆီသို့ အစောင့်အကြပ်ဖြင့် ခေါ်ဆောင်သွားခံရပြီး ရှောင်းလိထံ လွှဲပြောင်းပေးခြင်း ခံလိုက်ရသည်။ ရှောင်းလိအား အပြစ်ပုံချခံရခြင်း ဖြစ်ကြောင်း ယွမ်ဖန်းက အစောကြီးကတည်းက သိထားခဲ့သော်လည်း မည်သို့ တောင်းပန်ရမည်၊ မြောက်ပိုင်းဝေ့သို့ ပြန်လာရန် မည်သို့ တောင်းဆိုရမည်ကို မသေချာဘဲ ကြီးမားသော ရှက်ရွံ့မှုကို ခံစားနေရဆဲပင်။

ယွီကျိယွမ်က အသည်းအသန် ရှေ့သို့ တိုးသွားကာ ဝမ်းနည်းပူဆွေးသော အသံဖြင့် "အဖေ" ဟု အော်ဟစ်ရင်း စင်တွင် ချည်နှောင်ခံထားရသော ယွီကျင်းဝမ်အား စကားပြောရန် ကြိုးစားလိုက်သည်။ သို့သော် သူ့အနောက်က သံချပ်ကာဝတ် စစ်သည်က ကြိုးကို အပြင်းအထန် ဆွဲလိုက်ပြီး သူ၏ လှုပ်ရှားမှုကို ဟန့်တားလိုက်၏။ ခလုတ်တိုက်မိသွားသဖြင့် သူသည် ရှေ့သို့ ဆက်မတိုးနိုင်တော့ဘဲ အက်ကွဲနေသော ငိုကြွေးသံများကိုသာ ဆက်လက် အော်ဟစ်နေတော့သည်။

"အဖေ... အဖေ"

ယွီကျင်းဝမ် အရေခွံခွာခံရသည်ကို စောင့်ကြည့်ခဲ့သော သူ၏ ယခင်က ရက်စက်မှုအတွက် ငိုကြွေးရင်း သူက တောင်းပန်နေခဲ့သည်။ သို့သော် ဖရိုဖရဲဖြစ်နေပြီး သွေးများ ပေကျံကာ ခေါင်းငိုက်စိုက်ကျနေသော ပုံရိပ်က တစ်လျှောက်လုံး မည်သည့် တုံ့ပြန်မှုမျှ မပေးခဲ့ချေ။ ရှောင်းလိက သူ၏ စစ်မြင်းပေါ်တွင် မားမားမတ်မတ် ထိုင်လျက် အေးစက်စွာ စောင့်ကြည့်နေပြီး ပြောလိုက်လေသည်။

"အကြံပေးအမတ်ယွီကို မိဘကျေးဇူးသိတတ်တဲ့ သားတစ်ယောက်အဖြစ် မြင်ရတာ ရှားပါးလှပါတယ်။ ဒီလို မြတ်နိုးမှုက နောက်ကျသွားတာတော့ နှမြောစရာပဲ။ မင်းက သူ့ကို အသိအမှတ်ပြုဖို့ ငြင်းဆန်နေချိန်မှာ မင်းအဖေက အရေခွံခွာခံရတဲ့ ဒဏ်နဲ့ သေဆုံးသွားခဲ့ပြီ"

သူ့မျက်နှာအမူအရာက ရေခဲတမျှ အေးစက်နေပြီး သူ၏ မည်းနက်နေသော စစ်မြင်းက မြေပြင်ပေါ်တွင် ပြန့်ကျဲနေသော စာများကို မြေမှုန့်များအဖြစ် နင်းခြေကာ မငြိမ်မသက် ခွာစုံပေါက်နေ၏။ ရှောင်းလိ၏ စကားကို ကြားသောအခါ ယွီကျိယွမ်မှာ တောင့်တင်းသွားတော့သည်။ သူသည် ရှောင်းလိကို ဖြည်းဖြည်းချင်း မော့ကြည့်လိုက်ပြီးနောက် ကျနေသော စာများကို သတိပြုမိသွား၏— ထိုစာအိတ်များပေါ်တွင် ဖြစ်ကတတ်ဆန်း ရေးခြစ်ထားသော စာလုံးများ ပါရှိပြီး မည်သည့်စာကမျှ သူနှင့် ယွီကျင်းဝမ်တို့ကြားမှ လျှို့ဝှက် စာပေးစာယူများနှင့် မကိုက်ညီခဲ့ချေ။

အဝေးရှိ မျှော်စင်ပေါ်မှနေ၍ သူက လက်ရေးကို ခွဲခြားမသိနိုင်ခဲ့ပေ။ ရှောင်းလိက ယွီကျင်းဝမ်ထံသို့ သူရေးခဲ့သော စာတစ်စောင်ထဲမှ အကြောင်းအရာများကို ရွတ်ပြခဲ့သဖြင့် သူတို့၏ ဆက်သွယ်မှုအားလုံး သိမ်းဆည်းခံလိုက်ရပြီဟု သူ့ကို ယုံကြည်သွားစေခဲ့သည်။ ရုတ်တရက် နားလည်သွားသည့်အလား ယွီကျိယွမ်၏ လည်ချောင်းက လှုပ်ရှားသွားပြီး သွေးကြောများ ယှက်သန်းနေသော သူ၏ မျက်လုံးများပေါ်သို့ ဖရိုဖရဲ ဆံပင်များ ကျဆင်းလာ၏။ သူက အခက်အခဲဖြင့် အဆိပ်ပြင်းစွာ ပြောလိုက်လေသည်။

"စာတွေက... အတုတွေပဲလား"

"မင်း ငါ့ကို လှည့်စားခဲ့တယ်"

ရှောင်းလိ၏ အတည်ပြုချက်ကို သူ မလိုအပ်တော့ပေ။ အဖြေကို သူ သိနှင့်နေပြီးသားပင်။ ထိုအခိုက်အတန့်တွင် သူသည် လုံးဝ ဒေါသထွက်သွားပြီး အရူးတစ်ယောက်ကဲ့သို့ ရှောင်းလိထံသို့ အတင်းအကျပ် ပြေးဝင်ရန် ကြိုးစားလိုက်၏။ သို့သော် သူ့အနောက်က ကျားအစောင့် နှစ်ဦးက ကြိုးများကို လျင်မြန်စွာ တင်းကျပ်လိုက်သဖြင့် သူ၏ အသည်းအသန် ရုန်းကန်မှုများကြားတွင် ခလုတ်တိုက်ကာ လဲကျသွားစေခဲ့သည်။ သွေးကြောများ ယှက်သန်းနေသော မျက်လုံးများဖြင့် ရှောင်းလိထံသို့ တွားသွားရန် ကြိုးစားနေဆဲ ဖြစ်သော်လည်း နောက်ဆုံးတွင် သူ၏အနောက်ရှိ သံချပ်ကာဝတ် စစ်သည်များက သူ့ကို မြဲမြံစွာ ဖိချထားလိုက်သည်။

မျက်နှာနှင့် ပါးစပ်တွင် ဖုန်မှုန့်များနှင့် ရွှံ့များ ဖုံးလွှမ်းသွားသည်အထိ ရုန်းကန်ရင်း သူက ရှောင်းလိကို မေးခွန်းထုတ်လိုက်လေသည်။

"မင်းဆီမှာ တခြား ဘယ်စာမှ မရှိဘူး မဟုတ်လား"

ရှောင်းလိက သူ့ကို အေးစက်စွာ စောင့်ကြည့်ရင်း ပြောလိုက်လေသည်။

"ဖေစစ်တပ်ရဲ့ ကွပ်ကဲရေးတဲထဲကို ဒီနယ်စား ဝင်စီးတုန်းက အဆိပ်ခတ်သူယွီ မီးရှို့နေတဲ့ စာသေတ္တာထဲမှာ မီးမလောင်ကျွမ်းဘဲ ကျန်နေခဲ့တဲ့ ငါ အခုလေးတင် မင်းကို ဖတ်ပြခဲ့တဲ့ စာတစ်ဝက်ပဲ ပါတာ"

ဤအဖြေက ယွီကျိယွမ်အတွက် နောက်ဆုံးဖြစ်ပြီး သေစေနိုင်လောက်သော ထိုးနှက်ချက် ဖြစ်ကြောင်း သံသယဖြစ်ဖွယ် မရှိပေ။ ရုတ်တရက် သူသည် အရူးတစ်ယောက်လို အော်ဟစ်ရယ်မောလိုက်ရာ ထိုအသံက လူသူကင်းမဲ့ပြီး နာကျင်ရသည့်ပုံ ပေါက်နေကာ မြေကြီးပေါ်သို့ သူ၏ ခေါင်းကို စတင် ဆောင့်ချလိုက်တော့သည်။

"အဲ့ဒီလိုကိုး... အဲ့ဒီလိုကိုး... ငါက လူမိုက်ပဲ။ ဒီလို လှည့်စားတဲ့ အကြံအစည်နဲ့ ကိုယ့်ကိုယ်ကိုယ် ဖွင့်ချမိအောင် အရူးလုပ်ခံရတာပဲ"

ဤသို့ ပြောပြီးနောက် ယွီကျင်းဝမ် အရှင်လတ်လတ် အရေခွံခွာခံရပြီး သေဆုံးသွားခဲ့သည့် ညှဉ်းပန်းနှိပ်စက်သည့် စင်ဘက်သို့ လှမ်းကြည့်လိုက်ပြီးနောက်တွင် မျက်လုံးများမှ မျက်ရည်များ ထိန်းမရအောင် စီးကျလာပြီး အဆိပ်ပြင်းစွာ ဟိန်းဟောက်လိုက်လေသည်။

"ရှောင်းလိ... ရက်စက်တဲ့ နေရာမှာ ငါ့အဖေနဲ့ငါက မင်းထက် အများကြီး နိမ့်ကျနေတာပဲ"

ရှောင်းလိက မြင်းပေါ်တွင် မြင့်မားစွာ ထိုင်လျက် နှုတ်ဆိတ်နေ၏။ ယနေ့အပြီးတွင် သူ၏ ရက်စက်ကြမ်းကြုတ်မှု ဂုဏ်သတင်းက မြောက်ပိုင်းနယ်စပ် တစ်ခုလုံးတွင် ပဲ့တင်ထပ်သွားလိမ့်မည်။ သို့သော် ၎င်းက သူ အတိအကျ လိုချင်ခဲ့သော အရာပင်။

ယွီကျိယွမ်ကို မကြာမီမှာပင် သံချပ်ကာဝတ် စစ်သည်များက ပါးစပ်ပိတ်လိုက်ကြသည်။ ယွမ်ဖန်းက ရှောင်းလိထံသို့ တလေးတနက် ဦးညွှတ်လိုက်ပြီး လက်နှစ်ဖက်ကို ယှက်ကာ လေးနက်စွာ တောင်းဆိုလိုက်လေသည်။

"မြောက်ပိုင်းဝေ့ကို ပြန်လာဖို့ နယ်စားကို ကျွန်တော် တောင်းဆိုပါတယ်"

သူ့အနောက်က စစ်သည်များကလည်း လိုက်လုပ်ကြကာ ဦးညွှတ်ပြီး လက်နှစ်ဖက်ကို ယှက်လျက် အရိုအသေ ပေးလိုက်ကြ၏။ သို့သော် ရှောင်းလိက သူတို့ကို တစ်ချက်မျှသာ လှမ်းကြည့်လိုက်ပြီး မြင်းကို လှည့်ကာ ထွက်ခွာသွားခဲ့သည်။ သူ၏ အနက်ရောင် ဝတ်ရုံက မြင်းအနောက်တွင် တွဲလောင်းကျနေပြီး နေရောင်အောက်တွင် အနက်ရောင် ပိုးသားကဲ့သို့ တောက်ပနေ၏။

ဤသည်ကို မြင်သောအခါ ကျန်းဟူနှင့် အခြားသူများမှာ နောက်ထပ် စကားလုံးများ မလိုအပ်တော့ဘဲ အေးစက်စွာ နှာခေါင်းရှုံ့လိုက်ပြီး မြင်းများကို တစ်ယောက်ပြီးတစ်ယောက် လှည့်လိုက်ကြသည်။ ကျန်းဟွိုင်က မြင်းစီးထွက်ခွာသွားစဉ် ယွမ်ဖန်းအား ပြောလိုက်လေသည်။

"မင်းတို့ ဝေ့မျိုးနွယ်စုက ထောက်ခံထားတဲ့ ယခင် ကျင့်မင်းသမီးက ဖေစစ်တပ်က ဒီသူလျှိုနဲ့ ပူးပေါင်းပြီး ငါတို့နယ်စားက ရှော့ပျန်းနယ်စားရဲ့ ကလေးတွေကို သတ်တယ်လို့ မတရား စွပ်စွဲခဲ့တယ်။ ဒါ့အပြင် ဝေ့စစ်သူကြီးတွေက နယ်စားရဲ့ အသက်ကို ယူဖို့ ကြိုးစားခဲ့ကြတယ်"

သူက ခေတ္တရပ်လိုက်ပြီး သူ၏ လေသံတွင် သရော်လှောင်ပြောင်မှုများ ရောယှက်နေ၏။

"စစ်သူကြီးယွမ်... အခုတော့ ငါတို့နယ်စားကို မြောက်ပိုင်းဝေ့ဆီ ပြန်ကြိုဆိုချင်နေတာလား။ ကိုယ့်ကိုယ်ကိုယ် ဒုက္ခမပေးမိအောင် သတိထားပါ"

သူ၏ "ငါတို့" ဆိုသည့် စကားလုံး အသုံးပြုမှုက အတော်လေး အဓိပ္ပါယ်ရှိပြီး မမြင်ရသော ကွဲကွာမှု မျဉ်းကြောင်းတစ်ခုကို ဆွဲထားသည့်အလားပင်။ ယွမ်ဖန်းက သူ့ခါးကို ပိုနှိမ့်ချထားလိုက်၏။ ယွီကျိယွမ် ဖော်ထုတ်ခံလိုက်ရပြီ ဖြစ်သဖြင့် ထိုနေ့က ယွီကျိယွမ်နှင့် ပူးပေါင်းကြံစည်ခဲ့သော ဝမ်းဝမ်ကျိန်းသည်လည်း သေချာပေါက် ပါဝင်ပတ်သက်နေလိမ့်မည်။ သို့သော် ဝမ်းဝမ်ကျိန်း၏ အများပြည်သူဆိုင်ရာ အဆင့်အတန်းမှာ မြောက်ပိုင်းဝေ့အတွက် တာ့လျန်တွင် ဝိန်းယွီကဲ့သို့ပင် ဖြစ်သည်။ လက်အောက်ငယ်သား တစ်ဦးအနေဖြင့် သူက ဝမ်းဝမ်ကျိန်း၏ အမှားများကို ပွင့်ပွင့်လင်းလင်း မထောက်ပြနိုင်ဘဲ အနည်းငယ် ရှက်ရွံ့စွာဖြင့်သာ ပြောလိုက်လေသည်။

"ဒီထဲမှာ... နားလည်မှုလွဲတာ တစ်ခုခု ရှိရမယ်။ မင်းသမီးက... နယ်စားကို သေချာပေါက် ရှင်းပြပါလိမ့်မယ်"

ကျန်းဟွိုင်က နောက်ထပ် ဘာမှမပြောတော့ဘဲ ဇက်ကြိုးကို ဆွဲလိုက်ပြီး ဆုတ်ခွာသွားသော စစ်တပ်နှင့် အမီလိုက်ရန် သူ၏ မြင်းကို အတင်းနှင်လိုက်၏။ ဖုန်တလုံးလုံး ထစေလျက် ရောက်ရှိလာခဲ့သော မြင်းစီးစစ်သည် နှစ်ထောင်မှာ ယခုအခါ အလျင်အမြန်ပင် ထွက်ခွာသွားကြပြီး မြို့တံခါးအပြင်ဘက်ရှိ ယွီကျင်းဝမ် အရှင်လတ်လတ် အရေခွံခွာခံခဲ့ရသော ညှဉ်းပန်းနှိပ်စက်သည့် စင်နှင့် ဆူပွက်နေသော အိုးကြီးကိုသာ ချန်ရစ်ထားခဲ့သည်။

ကျန်းဟွိုင်က သူတို့နှင့် လာရောက်ပူးပေါင်းရန် မြင်းစီးလာသည်ကို မြင်သောအခါ ကျန်းဟူက မကျေမနပ် ညည်းညူလိုက်လေသည်။

"စစ်ဗျူဟာမှူး... ဝေ့စစ်တပ်က လူတွေနဲ့ ဘာလို့ စကားတွေ အလဟဿ ပြောနေရတာလဲ"

"ပြောစရာရှိတာကို ရှင်းအောင် ပြောလိုက်တာပါ။ နယ်စားရဲ့ အစီအစဉ်က အန္တရာယ်များပေမယ့်လည်း အရမ်းကို ထက်မြက်ပါတယ်။ အဲ့ဒါက ယွီကျိယွမ်ကို သူ့ရဲ့ အစစ်အမှန်ကို ဖွင့်ချဖို့ ဖိအားပေးခဲ့တယ်၊ ဝေ့အဖွဲ့က တခြား သစ္စာမရှိတဲ့ အကြွင်းအကျန်တွေကို ခြောက်လှန့်ခဲ့တယ်၊ ပြီးတော့ နောက်ထပ် သက်သေပြစရာ မလိုဘဲ မှားယွင်းတဲ့ စွပ်စွဲမှုတွေ အားလုံးကို ရှင်းလင်းပစ်ခဲ့တယ်။ ဝေ့ချီရှန်းရဲ့ မျိုးဆက်က လုံးဝနီးပါး ပျောက်ကွယ်သွားပြီး မင်းသမီးအတုရဲ့ ဝမ်းဗိုက်ထဲက တစ်ဦးတည်းသော မျိုးစေ့လေးပဲ ကျန်တော့တဲ့အချိန်မှာ ဝေ့အဖွဲ့က အဲ့ဒီ ရှုပ်ထွေးနေတဲ့ အကြွင်းအကျန်တွေက လာမယ့်ရက်တွေမှာ ဘယ်လို ပြုမူရမလဲဆိုတာကို အခုလောက်ဆို နားလည်သင့်နေပြီ"

ထိုနေ့က ရှောင်းလိကို သတ်ပစ်ရန် ကြိုးပမ်းခဲ့သော ဝေ့ထုံ ဦးဆောင်သည့် ဝေ့စစ်သူကြီးများအပြင် ဝေ့ဖိန်ကျင်းတို့မောင်နှမကို ရှောင်းလိက သတ်ဖြတ်ခဲ့သည်ဟူသော စွပ်စွဲချက်များ ပျံ့နှံ့သွားပြီးနောက် ဘက်ရွေးချယ်ရန် ဆုံးဖြတ်ခဲ့ကြသော မြောက်ပိုင်းနယ်စပ်မှ အရာရှိတချို့လည်း ရှိနေခဲ့သည်။ တချို့က သူတို့၏ အပြင်ပန်း ဂုဏ်သတင်းနှင့် ဝေ့ချီရှန်း၏ ယခင်က ကျေးဇူးတရားများကြောင့် ဟန့်တားခံခဲ့ရပြီး အခြားသူများကမူ အာဏာကို ပြန်လည် နေရာချထားရန်နှင့် အကျိုးအမြတ်များကို ပြန်လည် ခွဲဝေရန် ရည်ရွယ်ခဲ့ကြသည်။ ယခုအခါ ရှောင်းလိအပေါ် စွပ်စွဲမှုများကို ရှင်းလင်းသွားပြီဖြစ်ပြီး ဖေစုန့်စစ်တပ်အတွက် သူလျှိုအဖြစ် ယွီကျိယွမ်၏ အစစ်အမှန်က လောကကြီးကို ဖွင့်ချခံလိုက်ရပြီဖြစ်ရာ အရာအားလုံး ပြောင်းပြန်လှည့်သွားသင့်ပေသည်။

ကျန်းဟွိုင်က တိုက်ရိုက်ကျရောက်နေသော နေရောင်ခြည်ကို ကာကွယ်ရန် သူ၏ ခေါက်ယပ်တောင်ကို ဖွင့်လိုက်ပြီး ပြောလိုက်လေသည်။

"စောင့်ကြည့်နေလိုက်ပါ။ အဲ့ဒီ မင်းမျိုးမင်းနွယ် မိသားစုတွေက မျက်နှာလိုမျက်နှာရ လုပ်တဲ့နေရာမှာ အတော်ဆုံးပဲ။ ရှော့ပျန်းနယ်စား သေဆုံးပြီးနောက်ပိုင်း အခြေအနေကို ရှင်းရှင်းလင်းလင်း မမြင်နိုင်ခဲ့တဲ့ လူမိုက်တွေက နယ်စားကို ဖားယားဖို့ သူတို့ရဲ့ ဦးနှောက်တွေကို မကြာခင် အလုပ်ပေးကြတော့မှာ"

"အရင်တုန်းက သူတို့ လုပ်ခဲ့တဲ့ ယုတ်မာတာတွေ အားလုံးကို ငါ တစ်သက်လုံး မှတ်ထားမယ်"

ကျန်းဟူက ပြင်းပြင်းထန်ထန် တံတွေးထွေးချလိုက်ပြီး စောစောက ယွီကျိုး မြို့တံခါးအပြင်ဘက်က မြင်ကွင်းကို ပြန်အမှတ်ရလိုက်ရာ သူ၏ စိတ်ကို အနည်းငယ် သက်သာရာရသွားစေခဲ့သည်။ သူက ရှောင်းလိဘက်သို့ လှည့်ကာ ပြောလိုက်လေသည်။

"မနေ့ညက အစ်ကို(၂)က အဲ့ဒီယွီကောင် သေချာပေါက် ဝန်ခံလိမ့်မယ်လို့ ပြောခဲ့တာ မဆန်းပါဘူး။ အစ်ကို(၂)မှာ အစီအစဉ် ရှိပြီးသားကိုး"

ရှောင်းလိက ပြောလိုက်လေသည်။ "တစ်ခုခုတော့ ထူးဆန်းနေတယ်"

ကျန်းဟူက ရှုပ်ထွေးစွာဖြင့် မေးလိုက်၏။ "ဘာလဲ"

ရှောင်းလိ၏ မျက်နှာက နေရောင်ကြောင့် တစ်ဝက် လင်းထိန်နေပြီး တွေးတောနေစဉ် သူ၏ တွန့်ချိုးနေသော မျက်ခုံးများက ပို၍ စူးရှနေပုံပေါ်သည်။

"ဖေစုန့်က ယွီကျိယွမ်ကို သူလျှိုတစ်ယောက်အနေနဲ့ အရမ်းကို နက်နက်ရှိုင်းရှိုင်း မြှုပ်နှံထားခဲ့တာ ရှော့ပျန်းနယ်စား သေဆုံးသွားပြီးနောက်ပိုင်းမှာတောင် သူ့ကို အသုံးမပြုခဲ့ဘူး။ ဒါပေမယ့် အခုကျတော့ ဝေ့ဖိန်ကျင်းတို့မောင်နှမကို သတ်ပြီး ငါ့ကို အပြစ်ပုံချဖို့ ရုတ်တရက် အမိန့်ပေးလိုက်တယ်။ အဲ့ဒါက အသည်းအသန် လုပ်လိုက်တဲ့ လှုပ်ရှားမှုတစ်ခုနဲ့ အရမ်းတူနေတယ်"

ကျန်းဟူ၏ စိတ်က အမီမလိုက်နိုင်သဖြင့် သူ၏ဘေးရှိ စုန့်ချင်ကို ကြည့်လိုက်၏။

"ဖေစုန့်က မိုက်မဲတဲ့ လှုပ်ရှားမှုတစ်ခုကို လုပ်လိုက်တယ်လို့ ကျွန်တော်လည်း ခံစားရတယ်" ကျန်းဟွိုင်က ပြောလိုက်လေသည်။

ကျန်းဟွိုင် စကားပြောပြီးနောက် စုန့်ချင်က မေးစေ့ကို အနည်းငယ် ပင့်ပြလိုက်ရုံသာ ပြုလုပ်ပြီး ကျန်းဟူအား နားထောင်ရန် အချက်ပြလိုက်သည်။ ယခင်ညက သူ မပြောခဲ့သော အရာများကို တွေးတောရင်း ကျန်းဟွိုင်က မှတ်ချက်ချလိုက်၏။

"ဝေ့ဖိန်ကျင်းက ယွီကျိယွမ်ကို အရမ်း ယုံကြည်ခဲ့တာ။ တကယ်လို့ ဖေစုန့်က မြောက်ပိုင်းဝေ့ကို မငြိမ်မသက် ဖြစ်နေစေချင်တယ်ဆိုရင် သူက ယွီကျိယွမ်ကို သုံးပြီး နယ်စားကို ဆန့်ကျင်တိုက်ခိုက်ဖို့ ဝေ့ဖိန်ကျင်းကို ဆွဲဆောင်ခိုင်းသင့်တာ။ ဝေ့ဖိန်ကျင်းကို မလှုံ့ဆော်နိုင်ခဲ့ရင်တောင် ယွီကျိယွမ်ကို မင်းသမီးအတုနဲ့ ပူးပေါင်းကြံစည်ခိုင်းပြီး မြောက်ပိုင်းဝေ့က အရာရှိတွေကို လွှမ်းမိုးဖို့ သူ့ဝမ်းဗိုက်ထဲက ကလေးကို အသုံးပြုချင်တယ်ဆိုရင် ကလေးမွေးလာတဲ့အထိ ဒါမှမဟုတ် ယွီကျိယွမ် စစ်ရေးအာဏာ ရလာတဲ့အထိ စောင့်ပြီးမှ လှုပ်ရှားသင့်တာ"

ဝမ်းဝမ်ကျိန်းအကြောင်းကို ပြောလိုက်ချိန်တွင် ကျန်းဟွိုင်၏ မျက်လုံးများက အနည်းငယ် ကျဉ်းမြောင်းသွားခဲ့သည်။ ဝေ့ချီရှန်း၏ ဈာပနညတွင် ဝမ်းဝမ်ကျိန်းက ရှောင်းလိ၏ ဧည့်ဂေဟာသို့ တစ်ယောက်တည်း လာရောက်ခဲ့သည်။ သူမသည် ဉာဏ်ရည်ထက် ရည်မှန်းချက်များက အများကြီး ပိုကြီးမားနေသော အမျိုးသမီးတစ်ဦးဖြစ်ကြောင်း သူ သိနိုင်သဖြင့် သူမက ရှောင်းလိနှင့် သီးသန့်စကားပြောရန် တောင်းဆိုချိန်တွင် သူက မျက်လုံးများနှင့် အကြိမ်ကြိမ် သတိပေးခဲ့ခြင်း ဖြစ်သည်။

ရှောင်းလိက မြောက်ပိုင်းဝေ့ကို ခုမှ သိမ်းပိုက်ထားစဖြစ်ပြီး ဝေ့အရာရှိဟောင်း တော်တော်များများက သူ့ကို အပြည့်အဝ မကျိုးနွံသေးချေ။ အကယ်၍ ရည်မှန်းချက်ကြီးပြီး ကိုယ့်ကိုယ်ကိုယ် အထင်ကြီးနေသည့် အဲ့ဒီအမျိုးသမီးက ရှောင်းလိနှင့် ရောထွေးပြီး ပြဿနာရှာခဲ့မည်ဆိုလျှင် သူ့အတွက် အရမ်းကို အန္တရာယ်များလိမ့်မည်။ နောက်ပိုင်းတွင် ရှောင်းလိကို အပြစ်ပုံချရန် ယွီကျိယွမ်အား သူမ ကူညီခဲ့ခြင်းက သူတို့ကြားတွင် ပူးပေါင်းဆောင်ရွက်မှု တစ်ခုခု ရှိနေကြောင်း ရှင်းလင်းစွာ ဖော်ပြနေ၏။

ရှောင်းလိကို သွားတွေ့ချိန်က သူမမှာ ကိုယ်ဝန်ရှိနေပြီလား ဆိုတာကတော့ မသေချာချေ။

မင်းသမီးအတုတွင် ကိုယ်ဝန်ရှိနေသည်ဟု ကောလာဟလ ထွက်လာချိန်က သူမ၏ ကိုယ်ဝန်သွေးခုန်နှုန်းက သုံးလကျော်နေပြီဟု ဆိုကြသည်။ သို့သော် ဝိန်းယွီကလည်း သွေးခုန်နှုန်းများကို အနှောင့်အယှက် ပေးနိုင်သော ကိုယ်ဝန်အတု ဆေးများကို သောက်ခဲ့ဖူးပြီး စုန့်ချင် သိထားသော နယ်လှည့်သမားတော်က ကိုယ်ဝန်လများကို ပြောင်းလဲသွားစေနိုင်သည့် ဆေးဝါးများ ရှိကြောင်း ပြောခဲ့ဖူးသည်။

အကယ်၍ ကလေးက ဝေ့ဖိန်ကျင်း၏ ကလေး အစစ်သာဖြစ်လျှင် ထိုအချိန်က ရှောင်းလိထံသို့ သူမ၏ အလည်အပတ်က တွက်ချက်ထားသော လှုပ်ရှားမှုတစ်ခု ဖြစ်နိုင်ပေသည်။ အကယ်၍ ရှောင်းလိသာ သူမ၏ ဆွဲဆောင်မှုတွင် ကျုံးသွင်းခံခဲ့ရလျှင် ကလေးကို တစ်လစောပြီး မွေးဖွားစေနိုင်ကာ ကလေးက ရှောင်းလိ၏ ကလေးဟု သူမက အခိုင်အမာ ပြောဆိုနိုင်လိမ့်မည်။ ဝေ့ဖိန်ကျင်းကို ရုပ်သေးရုပ်အဖြစ်ထားပြီး ရှောင်းလိက သူမနှင့် ကလေးအတွက် အနာဂတ်တွင် စီစဉ်ပေးရမည့် အခြေအနေသို့ ရောက်သွားလိမ့်မည်။

တကယ်လို့ မဟုတ်ခဲ့ရင်...

ဖြစ်နိုင်ခြေ တစ်ခုက ကျန်းဟွိုင်၏ မျက်လုံးများကို ခဏတာ မည်းမှောင်သွားစေခဲ့သော်လည်း မကြာမီမှာပင် သူက သူ့ဘာသာသူ ခပ်တိုးတိုး ရေရွတ်လိုက်လေသည်။

"မဟုတ်သေးဘူး... အဲ့ဒါ မမှန်ဘူး"

ယွီကျိယွမ်၏ သတိကြီးသော သဘာဝအရ သူက ဝမ်းဝမ်ကျိန်းနှင့် မမျှော်လင့်ဘဲ ကိုယ်ဝန်ရသွားသည်အထိ လျှို့ဝှက်စွာ ပတ်သက်နေခဲ့လျှင်ပင် စစ်ရေးအာဏာ မရရှိခင် ဝေ့ဖိန်ကျင်းတို့မောင်နှမကို သတ်ဖြတ်ရန် ထိုမျှလောက် လောကြီးနေလိမ့်မည် မဟုတ်ချေ။

ဝေ့ဖိန်ကျင်း... ဝေ့ကျာမင်...

သူ့စိတ်ထဲတွင် တစ်ခုခုက လင်းလက်သွားသော်လည်း ကျန်းဟွိုင်က ထိုအတွေးကို ဖမ်းဆုပ်မထားနိုင်ခင်မှာပင် သူ၏ဘေးရှိ ကျန်းဟူက ဖြတ်ပြောကာ မေးလိုက်၏။

"စစ်ဗျူဟာမှူး... ဘာဖြစ်လို့လဲ"

အနှောင့်အယှက်ပေးခံလိုက်ရပြီးနောက် စောစောက သဲလွန်စလေးမှာ အရိပ်အယောင်မကျန် ပျောက်ကွယ်သွားခဲ့သည်။ ကျန်းဟွိုင်က သူ၏ အတွေးလမ်းကြောင်းကို ရပ်တန့်လိုက်ပြီး ပြောလိုက်လေသည်။

"ဘာမှမဖြစ်ပါဘူး"

သူက အကြောင်းအရာကို ပြောင်းလိုက်၏။

"ဖေစုန့်ရဲ့ အစီအစဉ်က မိုက်မဲပေမယ့်လည်း တကယ်ကို ယုတ်မာလွန်းတယ်။ ကံကောင်းလို့ ငါတို့ကျူကျွင်းက မြောက်ပိုင်းဝေ့မှာ သူ စိုက်ပျိုးထားတဲ့ ဒီနက်နက်ရှိုင်းရှိုင်း မြှုပ်နှံထားတဲ့ ဆူးကို ဖယ်ရှားဖို့ အခွင့်အရေး ယူနိုင်ခဲ့တယ်၊ ပြီးတော့ အဲ့ဒါက ဝေ့မိသားစုရဲ့ သစ္စာမရှိတဲ့ အရာရှိဟောင်းတွေကိုလည်း မျက်နှာပြင်ပေါ်ကို ရောက်လာစေခဲ့တယ်"

သူ၏ ပြုံးနေသော မျက်လုံးများတွင် ကျောချမ်းဖွယ် အေးစက်မှုတစ်ခု ပါဝင်နေ၏။

"ဒီပါမွှားအရာရှိတွေကို ရှင်းထုတ်ပြီးသွားရင် ငါတို့ကျူကျွင်းက မြောက်ပိုင်းနယ်စပ်ကို တကယ်ပဲ စုစည်းနိုင်သွားလိမ့်မယ်"

...