အခန်း ၂၈၀

အခန်း (၂၈၀) ရွှမ်ယွမ်ဇီကို အောင်နိုင်ခြင်း

"ဈေးလမ်းအတွက် နေရာကို ငါ ရွေးပြီးသွားပြီ..."

"ယွီရွှေခရိုင်ကို ငါ နှစ်ခေါက် ရောက်ဖူးတယ် သေချာစဉ်းစားပြီးတဲ့နောက်မှာ ထန်ရှန်းလမ်းကို ငါ ရွေးလိုက်တယ်..."

"ထန်ရှန်းလမ်းက ခရိုင်မြို့တော်ရဲ့ အဓိကလမ်းမကြီး မြောက်ဘက်နဲ့ ယွီရွှေမြစ်ရဲ့ တောင်ဘက်မှာ ရှိတယ် စစ်ပွဲတွေကြောင့် အဲ့ဒီလမ်းပေါ်က အိမ်တော်တော်များများ ပျက်စီးသွားခဲ့ပြီး အများစုက ယခင်မင်းဆက်က ခရိုင်အစိုးရ အရာရှိတွေရဲ့ အိမ်တွေဖြစ်တယ် ဒါကြောင့် စစ်ပွဲအပြီးမှာ ခရိုင်အစိုးရက အဲ့ဒါတွေအားလုံးကို သိမ်းဆည်းပြီး ဘဏ္ဍာတိုက်ထဲ ထည့်လိုက်တာ..."

"မင်းနဲ့ ပူးပေါင်းရတဲ့ အကြောင်းရင်းက သဘာဝကျကျပဲ မင်းရဲ့ ချင်းပေါင်စံအိမ်မှာရှိတဲ့ အထူးအဆင့်အတန်းကြောင့်ပဲ ချင်းပေါင်စံအိမ်က ရှေ့ထွက်ပြီး ဒီမြေဂရန်တွေကို ဝယ်ယူသရွေ့ ထန်ရှန်းလမ်း တစ်ခုလုံးကို ဝယ်လို့ရပြီ ပြီးရင် ငါ့ဆန္ဒအတိုင်း အရည်အချင်းပြည့်မီတဲ့ ဈေးလမ်းအဖြစ် ပြောင်းလဲလို့ရပြီ..."

ရွှမ်ယွမ်ဇီက ဈေးလမ်း၏ အနှစ်သာရကို သဘောပေါက်သွားသည်ကို မြင်လိုက်ရသောအခါ ကျောက်လင်က သူ၏ ကိုယ်ပိုင်အကြံအစည်များကို ရဲရဲဝင့်ဝင့် မျှဝေလိုက်၏။

ကျောက်လင်တွင် ငွေအမြောက်အမြား ရှိပေသည်။

သို့သော်လည်း ကျောက်လင်၌ ခရိုင်အစိုးရထံမှ သိမ်းဆည်းခံထားရသော ဆိုင်ခန်းများနှင့် အိမ်ဂရန်များကို ပြန်လည်ဝယ်ယူရန် အဆက်အသွယ် သို့မဟုတ် ဩဇာလွှမ်းမိုးမှု မရှိတော့ပေ။

ကျောက်လင်သည် ချင်းပေါင်စံအိမ်၏ အထူးအဆင့်အတန်းကို တန်ဖိုးထားသောကြောင့် ချင်းပေါင်စံအိမ်အား မိတ်ဖက်အဖြစ် ရွေးချယ်ခဲ့ခြင်းဖြစ်၏။

ရွှမ်ယွမ်မိသားစုသည် ဟုန်ယွမ်ကျီ ထီးနန်းတက်လှမ်းနိုင်ရန် ကူညီပေးခဲ့ပြီး ၎င်းတို့နှင့် ထိုက်တန်သော ဆုလာဘ်ကို ရရှိခဲ့ကြသည်။ ရွှမ်ယွမ်မိသားစု၏ မျိုးနွယ်ခွဲများနှင့် အဆက်အနွယ် အသီးသီးသည် မင်းဆက်တစ်ခုလုံးအနှံ့ ချင်းပေါင်စံအိမ် ဆိုင်ခွဲများကို ဖွင့်လှစ်ခဲ့ကြ၏။

အမှန်တကယ်တွင် ရွှမ်ယွမ်မိသားစုက မဟာချင်မင်းဆက်၏ သက်စောင့်ကြိုးကို ထိန်းချုပ်ထားခြင်းဖြစ်သည်။

ထို့ကြောင့် ရွှမ်ယွမ်ဇီ၏ ဝင်ရောက်စွက်ဖက်မှုဖြင့် ယွီရွှေခရိုင်၏ ခရိုင်အစိုးရသည် သူမအား မျက်နှာသာပေးရမည်ဖြစ်ပြီး ထန်ရှန်းလမ်းပေါ်ရှိ အိမ်များနှင့် ဆိုင်ခန်းများအားလုံး၏ မြေဂရန်များကို ရောင်းချပေးရမည် ဖြစ်၏။

"ရှင်ဆိုလိုတာက ထန်ရှန်းလမ်းပေါ်က မြေဂရန်တွေအားလုံးကို ကျွန်မ ဝယ်ရမယ်ဆိုတဲ့ သဘောလား..."

ရွှမ်ယွမ်ဇီက တည်ငြိမ်စွာဖြင့် မေးလိုက်သည်။

ကျောက်လင်က ခေါင်းညိတ်ပြလိုက်၏။

"ငါ ကျောက်လင်က ဒီမြေဂရန်တွေ အားလုံးကို ငါ့ကိုယ်ပိုင်ငွေနဲ့ ဝယ်နိုင်တယ် ဒါပေါ့ မင်းကလည်း မြေဂရန်တချို့ကို ဝယ်ချင်တယ်ဆိုရင်လည်း ရပါတယ်..."

"ဒါပေမဲ့ ငါ့မှာ စည်းကမ်းချက် တစ်ခုတော့ရှိတယ် မြေပိုင်ဆိုင်ခွင့်ရဲ့ အနည်းဆုံး ထက်ဝက်ကို ငါ့ဆီ ရောင်းပေးရမယ်..."

ကျောက်လင်က ပြုံးလိုက်သည်။

ဤအချိန်တွင် ရွှမ်ယွမ်ဇီသည် ဈေးလမ်း ဖန်တီးရခြင်း၏ ကျောက်လင်၏ ရည်ရွယ်ချက်ကို အပြည့်အဝ နားလည်သွားပြီဖြစ်ကာ ကျောက်လင်၏ စိတ်ပိုင်းဖြတ်ထားမှုကိုလည်း သိရှိသွားခဲ့၏။

ဤအရာက အလွန်ကြီးမားသော စီးပွားရေး စီမံကိန်းတစ်ခုဖြစ်သည်။

ထန်ရှန်းလမ်းက တစ်မိုင်ခန့် ရှည်လျားပြီး လမ်း၏ တစ်ဖက်တစ်ချက်စီရှိ အိမ်များနှင့် ဆိုင်ခန်းများအတွက် မြေဂရန် အခု ၂၀၀ ခန့် ရှိပေသည်။

မြေဂရန်တစ်ခုလျှင် ငွေပြား ၁,၀၀၀ ကျသင့်မည်ဖြစ်ရာ စုစုပေါင်း ငွေပြား နှစ်သိန်းခန့် ဖြစ်၏။

နောက်ပိုင်းတွင် ထန်ရှန်လမ်းကို ပြန်လည်တည်ဆောက်မည့် ကုန်ကျစရိတ် အပါအဝင် အနည်းဆုံး ငွေပြား သုံးသိန်းကို ပြင်ဆင်ထားသင့်သည်။

တစ်နည်းအားဖြင့် ထန်ရှန်း ဈေးလမ်းကို ဖွင့်လှစ်ရန်အတွက် ကနဦး ရင်းနှီးမြှုပ်နှံမှုအဖြစ် ငွေပြား ငါးသိန်း လိုအပ်ပေသည်။

ရွှမ်ယွမ်ဇီက နားလည်သွားပြီးနောက် သူမသည် ကျောက်လင်ကို အံ့အားသင့်စွာဖြင့် ကြည့်လိုက်၏။

ဤမျှကြီးမားသော စီးပွားရေး သဘောတူညီချက်တစ်ခုကို လက်ခံရန်အတွက် အလွန်ကြီးမားသော သတ္တိများ လိုအပ်ပေသည်။

ခေတ္တမျှ ရွှမ်ယွမ်ဇီမှာ အနည်းငယ် မှင်တက်သွားသည်။ သူမသည် ကျောက်လင်အပေါ် အနည်းငယ် စွဲလမ်းသွားမိကြောင်းကို သတိပြုမိလိုက်၏။ ကျောက်လင်၏ ရှေ့တွင် စီးပွားရေး ပါရမီရှင်တစ်ဦးဖြစ်သော သူမသည် ဈေးသည်ငယ်လေး တစ်ယောက်လိုသာ ဖြစ်နေသည်။

"မိသားစု စည်းမျဉ်းတွေသာမရှိဘူးဆိုရင် ငါ ကျောက်လင်ကို လက်ထပ်လို့ရတယ်..."

ဤအချိန်တွင် ရွှမ်ယွမ်ဇီ၏ စိတ်ထဲ၌ ထိုအတွေးက ရုတ်တရက် ဝင်ရောက်လာခဲ့၏။

ရွှမ်ယွမ်ဇီက အလျင်အမြန်ပင် ပြန်လည်တည်ငြိမ်သွားသည်။

"ကျောက်လင် ကျွန်မမှာ အဲ့ဒီလောက် ငွေမရှိဘူး..."

"အဲ့ဒါဆိုရင်လည်း ထန်ရှန်းလမ်းပေါ်က မြေဂရန်တွေ အားလုံးကို ဝယ်ဖို့ ရှင့်ကို ကျွန်မ ကူညီပေးနိုင်တယ် အပြန်အလှန်အနေနဲ့ ထန်ရှန်းလမ်း မြောက်ဘက်က ဆိုင်ခန်းငါးခန်းကို ချင်းပေါင်စံအိမ်အတွက် ဆယ်နှစ် အခမဲ့ ငှားပေးရမယ်..."

"ဘယ်လိုလဲ..."

ရွှမ်ယွမ်ဇီက အလွန် ပွင့်လင်းသူလည်းဖြစ်ပြီး ယခုအခါ သူမက ကျောက်လင်နှင့် စီးပွားရေးဆန်ဆန် ညှိနှိုင်းရန် ကြိုးစားနေခြင်း ဖြစ်၏။

ကျောက်လင်က ပြုံးလိုက်သည်။

ရွှမ်ယွမ်ဇီ၏ သဘောထားက အမှန်တကယ်ပင် ပွင့်လင်းပြီး ပရော်ဖက်ရှင်နယ် ပီသပေသည်။

ချင်းပေါင်စံအိမ်က မြေဂရန်များကို ဝင်ရောက်ဝယ်ယူပေးရမည်ဖြစ်သောကြောင့် ချင်းပေါင်စံအိမ်အနေဖြင့် အကျိုးအမြတ်အချို့ ရရှိသင့်သည်မှာ သဘာဝပင်ဖြစ်၏။

အခြားသူများက မိမိအတွက် အခမဲ့လုပ်ပေးလိမ့်မည်ဟု မျှော်လင့်ထား၍ မရပေ။

"မင်းက မြေဂရန်တွေ အားလုံးကို ဝယ်ပေးနိုင်သရွေ့ မင်းလိုချင်တဲ့ ဆိုင်ခန်းငါးခန်းကို ငါ ပေးမယ် ပြီးတော့ အဲ့ဒါတွေကို ပြန်ဆောက်ဖို့တောင် ရန်ပုံငွေ ထုတ်ပေးဦးမယ်..."

ကျောက်လင်က ပို၍ သဘောထားကြီးပေသည်။

ငှားရမ်းမည် ဟုတ်သလား။

"ငါ မင်းကို တိုက်ရိုက်ပေးလိုက်မယ်..."

ကျောက်လင်သည် ဈေးလမ်း စီမံကိန်းကို အမြန်ဆုံး အကောင်အထည်ဖော်နိုင်ရန် မျှော်လင့်နေ၏။

ထို့ကြောင့် ဆိုင်ခန်းငါးခန်း၏ မြေဂရန်များကို ပေးကမ်းလိုက်သည့် ကျောက်လင်၏ လုပ်ရပ်က ချင်းပေါင်စံအိမ်၏ အကျိုးစီးပွားများကို ချုပ်ကိုင်ထားရန် ရည်ရွယ်ပြီး ရွှမ်ယွမ်ဇီအား မြေဂရန်များ အားလုံးကို ရယူရာတွင် ပိုမို ကြိုးစားလုပ်ဆောင်လာစေရန် ဖန်တီးလိုက်ခြင်း ဖြစ်သည်။

"ကျောက်လင် ရှင့်ကို ကျွန်မ တကယ် ပိုပိုပြီး အထင်ကြီးလာပြီ..."

"ကောင်းပြီလေ ရှင် ထန်ရှန်းလမ်းကို လိုချင်တာလား အဲ့ဒါတွေအားလုံးကို အမြန်ဆုံး ဝယ်ပေးမယ်..."

ရွှမ်ယွမ်ဇီ ထပ်မံ အံ့အားသင့်သွားရပြန်သည်။ ကျောက်လင်က ဆိုင်ခန်းငါးခန်းအတွက် မြေဂရန်များကို သူမအား ပေးကမ်းသည်အထိ သဘောထားကြီးလိမ့်မည်ဟု သူမ မမျှော်လင့်ထားခဲ့ပေ။

အခြေအနေက ဤသို့ဖြစ်နေပြီမို့ ရွှမ်ယွမ်ဇီကလည်း သဘာဝကျကျပင် သူမ၏ သဘောထားကို ပြသရမည် ဖြစ်၏။

ဤအချိန်တွင် ကျောက်လင်က တုံ့ဆိုင်းမနေတော့ပေ။ သူက ညာလက်ဖြင့် အိတ်ကပ်ထဲသို့ နှိုက်ကာ ငွေစက္ကူတစ်ထပ်ကို ထုတ်ယူလိုက်သည်။

ပြီးခဲ့သည့်အကြိမ်က လျန်ရှီးခရိုင်ရှိ ဝမ့်ရှန်းလုံ လုပ်ကြံသတ်ဖြတ်ရေးအဖွဲ့ကို ရှင်းလင်းခဲ့ရာတွင် ကျောက်လင်သည် ငွေပြား တစ်သန်း ရရှိခဲ့၏။

ဤအချိန်တွင် ကျောက်လင်က တန်ဖိုး တစ်သောင်းစီရှိသော ငွေစက္ကူ အရွက် ၂၀ ကို ထုတ်ယူလိုက်သည်။

စုစုပေါင်း ငွေပြား နှစ်သိန်းဖြစ်၏။

"အာဇီ ဒီမှာငွေစက္ကူ နှစ်သိန်းရှိတယ် အဲ့ဒါ မင်းကို ပေးမလို့..."

"လာမယ့် ရက်အနည်းငယ်အတွင်းမှာ ထန်ရှန်းလမ်းပေါ်က မြေဂရန်တွေ အားလုံးကို မင်း ဝယ်နိုင်မယ်လို့ ငါ မျှော်လင့်တယ်..."

"ဒီငွေစက္ကူတွေက မလုံလောက်ဘူးဆိုရင် ငါ့ကို ငွေတချို့ ကြိုထုတ်ပေးထားလို့ရတယ် ပြီးမှ မင်းကို ပြန်ဆပ်မယ်လေ..."

ကျောက်လင်က ငွေစက္ကူများကို ကမ်းပေးကာ ပြုံး၍ ပြောလိုက်သည်။

ရွှမ်ယွမ်ဇီ ထပ်မံ အံ့အားသင့်သွားရပြန်၏။

သူမ နောက်တစ်ကြိမ် မှင်တက်သွားရသည်။ ကျောက်လင်က သူမကို တကယ်ပင် ထိုမျှလောက်အထိ ယုံကြည်နေသည်လောဟု သူမ တွေးမိသွားသည်။

ဤအရာက ငွေပြားနှစ်သိန်းပင် ဖြစ်သည်။

သူမကသာ ၎င်းကို ယူသွားမည်ဆိုလျှင် ကျောက်လင် စိတ်ပူနေမည် မဟုတ်ပါလော။

ဤအချိန်တွင် ရွှမ်ယွမ်ဇီသည် ကျောက်လင်ကို စူးစိုက်ကြည့်နေပြီး သူမ၏ မျက်လုံးများထဲတွင် ထူးခြားသော အလင်းရောင်တစ်ခု တောက်ပသွား၏။

"ကျောက်လင် ရှင်သာ ပေါင်းစည်းခြင်းနယ်ပယ်ကို ထိုးဖောက်ဝင်ရောက်နိုင်ရင် လျန်ရှီးခရိုင်မှာရှိတဲ့ ရွှမ်ယွမ်မိသားစုဆီကို ရှင့်ကို ခေါ်သွားဖို့ ကျွန်မ ဆန္ဒရှိတယ် အဲ့ဒီအချိန်ကျရင် ရှင့်အနေနဲ့ ကျွန်မရဲ့ အဘိုးကို ဆွဲဆောင်နိုင်မယ်ဆိုရင် ကျွန်မ ရှင့်ကို လက်ထပ်မယ်..."

ရုတ်တရက် ရွှမ်ယွမ်ဇီက အလွန် အလေးအနက်ထားကာ စကားတစ်ခွန်း ဆိုလိုက်သည်။

အပြန်အလှန် ဆက်ဆံမှု အများအပြား ပြုလုပ်ပြီးနောက် ရွှမ်ယွမ်ဇီသည် ကျောက်လင်ကို လူတစ်ယောက်အနေဖြင့် အပြည့်အဝ လက်ခံသွားခဲ့ပြီ ဖြစ်၏။

ပထမအချက်အနေဖြင့် ကျောက်လင်၏ ကျင့်ကြံမှုအဆင့်သည် အလျင်အမြန် တိုးတက်လာခဲ့ပြီး ကျင့်ကြံခြင်း ပါရမီရှင်များထက်ပင် ပို၍ ကြောက်မက်ဖွယ် ကောင်းနေစေသည်။

ဒုတိယအချက်အနေဖြင့် ကျောက်လင်၏ ငွေရှာနိုင်စွမ်းကလည်း မှတ်သားလောက်ဖွယ် ဖြစ်၏။ သူက ငွေပြား သိန်းရာချီကို အလွယ်တကူ ထုတ်ပေးနိုင်စွမ်း ရှိသည်။

တတိယအချက်အနေဖြင့် နယ်ခြားစောင့်တပ်သားတစ်ဦးဖြစ်သော ကျောက်လင်က ဤမျှ တိုတောင်းသော အချိန်ကာလအတွင်း မြေကွက်များစွာကို ထိန်းချုပ်ကာ အလုပ်ရုံများနှင့် စက်မှုလုပ်ငန်းများစွာကို ပိုင်ဆိုင်ပြီး လူအများအပြားကို ထောက်ပံ့ပေးနိုင်ခဲ့သည်မှာ အတော်လေးကို အံ့မခန်းဖွယ်ရာ ဖြစ်ပေသည်။

စတုတ္ထအချက်အနေဖြင့် ကျောက်လင်၏ ကိုယ်ပိုင်ဆွဲဆောင်မှုက ရွှမ်ယွမ်ဇီကို လုံးဝ ဖမ်းစားသွားခဲ့သည်။ သူမကိုယ်သူမ စီးပွားရေး ပါရမီရှင်တစ်ဦးဟု ယူဆထားသော်လည်း ဈေးလမ်းနှင့် ပတ်သက်သည့် ကျောက်လင်၏ အမြင်ကို မျက်မြင်ကိုယ်တွေ့ မြင်တွေ့ပြီးနောက်တွင် သူမကိုယ်သူမ သိမ်ငယ်သွားသလို ခံစားလိုက်ရ၏။

ပဉ္စမအချက်အနေဖြင့် ကျောက်လင်၏ အနောက်တွင် ပုန်းကွယ်နေသော လျှို့ဝှက်ဆန်းကြယ်သည့် အင်အားကလည်း ရွှမ်ယွမ်ဇီကို ကျောက်လင်အပေါ် အလွန် အကောင်းမြင်စေခဲ့သည်။

သူ၏ ကိုယ်ရေးအချက်အလက် နောက်ခံ၊ မိသားစုသမိုင်းကြောင်းနှင့် အင်အားတို့အရ ကျောက်လင်သည် သူမ၏ ခင်ပွန်းဖြစ်လာရန် အကောင်းဆုံး ရွေးချယ်မှုပင်ဖြစ်ကြောင်း ရွှမ်ယွမ်ဇီ နားလည်သွားခဲ့၏။

သို့သော်လည်း ရွှမ်ယွမ်မိသားစု၏ စည်းမျဉ်းများကြောင့် ရွှမ်ယွမ်ဇီသည် လက်ရှိအချိန်တွင် ကျောက်လင်၏ လက်ထပ်ခွင့်တောင်းမှုကို လက်မခံနိုင်သော်လည်း ကျောက်လင်ကို လက်လွှတ်မခံလိုသောကြောင့် သူမက ကျောက်လင်အတွက် အခွင့်အရေးတစ်ခုကို တိုက်ယူပေးလိုခြင်းဖြစ်သည်။

အကယ်၍ ကျောက်လင်သာ ပေါင်းစည်းခြင်းနယ်ပယ်သို့ ထိုးဖောက်ဝင်ရောက်ကာ သူမ၏ အဘိုး ရွှမ်ယွမ်ခွမ်းအောက်နှင့် အဆင့်တူညီသွားမည်ဆိုပါက ကျောက်လင်သည် ရွှမ်ယွမ်ခွမ်းအောက်နှင့် ရင်ဘောင်တန်းရပ်တည်ရန် အရည်အချင်းပြည့်မီသွားမည်ဖြစ်ပြီး ရွှမ်ယွမ်ခွမ်းအောက်အား သူ၏ စိတ်ကို ပြောင်းလဲကာ ရွှမ်ယွမ်ဇီကို ကျောက်လင်နှင့် လက်ထပ်ပေးရန် တောင်းဆိုနိုင်မည်ဖြစ်၏။

"အိုး... မင်းဘာသာ ပြောတာနော်..."

"ကောင်းပြီလေ ပေါင်းစည်းခြင်းနယ်ပယ်ကို ငါ ထိုးဖောက်ဝင်ရောက်နိုင်တာနဲ့ ကိုယ်တိုင်ကိုယ်ကျလာပြီး လက်ထပ်ခွင့် တောင်းမယ်..."

ကျောက်လင်က ပြုံးလိုက်သည်။

ပေါင်းစည်းခြင်းနယ်ပယ်သို့ ထိုးဖောက်ဝင်ရောက်ရန် ကျောက်လင်အတွက် အချိန်ကြာမြင့်မည် မဟုတ်ပေ။

ကျောက်လင်နှင့် သူ၏ ဇနီးများက နေ့ရောညပါ အလုပ်လုပ်နေသရွေ့ သူတို့သည် ဆယ်စုနှစ်ချီ သို့မဟုတ် နှစ်ရာချီသော ကျင့်ကြံမှုများကို အလျင်အမြန် စုဆောင်းနိုင်ပေသည်။ ၎င်းတို့အားလုံးကို ဟောက်ယန်ကျင့်စဉ်သို့ ပေါင်းထည့်လိုက်သည့်အခါ ကျောက်လင်သည် ပေါင်းစည်းခြင်းနယ်ပယ်သို့ ထိုးဖောက်ဝင်ရောက်နိုင်မည် ဖြစ်၏။

ခုနစ်ရက်ပင်။

ကျောက်လင်သည် ခုနစ်ရက်တည်းဖြင့် ပေါင်းစည်းခြင်းနယ်ပယ်သို့ ထိုးဖောက်ဝင်ရောက်ရန် စိတ်ပိုင်းဖြတ်လိုက်သည်။