မီကာအဆင့်မြှင့်တင်ရေး (၁)

အများသုံးနားနေဆောင်၏ ဆိုဖာပေါ်တွင် ချီလီသည် သူ၏စတိုင်အတိုင်း ပန်းပွင့်အကျီကို ဝတ်ထားသည်။ သူသည် စိတ်လှုပ်ရှားစွာဖြင့် စားပွဲပေါ်သို့ အီလက်ထရွန်နစ်ကတ်အချို့ကို ရိုက်ချလိုက်သည်၊၊

“အေ့စ်တစ်စုံကွ။ ဒါကိုနိုင်အောင်ကစားလေ။ ဟားဟား၊ လုချန်... မင်း ဘာကတ်တွေ ဝှက်ထားတာလဲ။ လော့ယန်... ဟန်ဆောင်မနေနဲ့တော့… မြန်မြန်ချလိုက်စမ်းပါ”

လုချန်က သူ၏လက်ထဲရှိ ပြန့်ကျဲနေသော ကတ်အနည်းငယ်ကို ကြည့်ကာ မျက်မှောင်ကြုတ်လိုက်ပြီး လော့ယန်ကမူ တင်းမာသောအမူအရာဖြင့် သူ၏မျက်မှန်ကို ပင့်တင်ကာ ကတ်များကို မည်သို့ထုတ်ရမည်ကို တွက်ချက်နေသကဲ့သို့ သူ၏လက်ချောင်းများက ဟိုလိုဂရမ်ကတ်စားပွဲပေါ်တွင် ရွေ့လျားနေသည်။

အခြားတစ်ဖက်တွင် ရှီဇီနှင့် ရှောင်ချင်းတို့က ယာယီအားဖြင့် အခန်းတစ်ခုတည်းတွင်နေထိုင်ကြသည်။ ရှောင်ချင်းသည် လူနေမှုဘဝအတွက် လိုအပ်ချက်အနည်းငယ်သာရှိပြီး နေရာအတည်ပြုပြီးနောက်တွင် ကောင်းကင်အမိုးခုံးရထားပေါ်ရှိ သီးသန့်အားကစားခန်းမဆီသို့ ထွက်ခွာသွားခဲ့သည်။ ရှီဇီတစ်ဦးတည်းသာ စိတ်ရှည်လက်ရှည်ဖြင့် အခန်းကိုသန့်ရှင်းရေးလုပ်ကာ ကြယ်သင်္ဘော၏ နူးညံ့သောကော်ဇောပေါ်တွင် ဒူးထောက်၍ ခေါက်ထားသော အဝတ်အစားတစ်ခုချင်းစီကို စမတ်ဗီရိုထဲသို့ ဂရုတစိုက် ထည့်သွင်းနေသည်။

ပစ္စည်းကိရိယာအစုံလင်ရှိသော အားကစားခန်းမအတွင်းရှိကိရိယာများသည် အေးစက်သောအလင်းရောင်ဖြင့် တောက်ပနေသည်။ ရှောင်ချင်းနှင့် နန်ကျင်းတို့သည် ထိုနေရာတွင် လေ့ကျင့်ခန်းလုပ်နေကြသည်။ နန်ကျင်းသည် ကျယ်ဝန်းသော ပေါင်းစပ်အလေးမခုံပေါ်တွင် လှဲလျောင်းနေပြီး သူမ၏ လက်မောင်းများထက် ပိုမိုထူထဲသော သတ္တုစပ်အလေးတုံးတန်းကို အခိုင်အမာဆုပ်ကိုင်ထားကာ အစွန်းတစ်ဖက်စီတွင် လေးလံသော ပေါင်းစပ်အလေးတုံးများကို တပ်ဆင်ထားသည်။ သူမသည် သက်ပြင်းတစ်ချက်ကို အားယူရှိုက်ကာ မလိုက်ရာ သူမ၏ ပခုံးနှင့် ကျောပြင်ကြွက်သားများသည် ချက်ချင်းပင် လှိုင်းတွန့်သဏ္ဍာန် ရုန်းကြွလာသည်။ သူမ၏ တည်ငြိမ်ပြီး သန်မာသော လက်မောင်းများသည် စံချိန်မီပြီး ပေါက်ကွဲအားကောင်းသော လှုပ်ရှားမှုဖြင့် ကီလိုဂရမ် ၅၀၀ ရှိသော အလေးတုံးကြီးကို စင်ပေါ်မှ တွန်းတင်လိုက်ကာ ဤအံ့ဖွယ်ခွန်အားလေ့ကျင့်ခန်းကို ထပ်ခါတလဲလဲပြုလုပ်နေသည်။

ဒုန်း...

ယခုအချိန်တွင် နန်ကျင်းက ကိရိယာကို ချထားလိုက်ပြီး ဘေးနားရှိ အပြေးစက်ပေါ်မှ ရှောင်ချင်းကို လှမ်းပြောလိုက်သည်၊၊

“ကိုယ်ကာယလေ့ကျင့်တာက စွမ်းအားရှင်တွေရဲ့ ခြေလက်အင်္ဂါတွေကို မြှင့်တင်ရာမှာ အများကြီး အထောက်အကူပြုတယ်၊၊ ဖီးနစ်က ဒါကို သက်သေပြပြီးပြီ၊၊ တက်တက်ကြွကြွလေ့ကျင့်တာက မျိုးရိုးဗီဇဆင့်ကဲပြောင်းလဲမှုကို ဒီဘက်ဦးတည်ချက်အတိုင်း လမ်းညွှန်ပေးလိမ့်မယ်”

ထိုစကားကို ကြားသောအခါ ရှောင်ချင်းက သူမ၏မျက်မှောင်အနည်းငယ်ကြုတ်ပြီး အပြေးစက်၏ အရှိန်ကို အမြင့်ဆုံးသို့ ချိန်ညှိလိုက်သည်။

ပင်မကွပ်ကဲမှုခန်း၏ အောက်တွင် မိုနီကာသည် ကျယ်ပြန့်သော မြင်ကွင်းရှိသည့် သီးသန့်ကျယ်ဝန်းသော အခန်းတစ်ခုကို ရရှိထားသည်။ ပြတင်းပေါက်အပြင်ဘက်တွင်မူ စီးဆင်းနေသော ဂလက်ဆီတစ်ခု ရှိနေသည်။ သူမသည် ဗလာကျင်းနေသောကိုယ်ဖြင့် နူးညံ့သောကော်ဇောပေါ်တွင် ခြေဗလာဖြင့် မတ်တတ်ရပ်နေပြီး အဆုံးမဲ့ငြိမ်းချမ်းမှုနှင့် လွတ်လပ်မှုကို ခံစားနေသည်။ လက်တစ်ဖက်တွင် သွေးကဲ့သို့ ရဲရဲနီနေသော ဝိုင်ခွက်ကို ကိုင်ထားပြီး အခြားလက်တစ်ဖက်၏ လက်ချောင်းထိပ်များက လေထဲတွင် ပြေပြစ်စွာ ရွေ့လျားနေသည်။ သူမ၏ တိတ်ဆိတ်သောထိန်းချုပ်မှုအောက်တွင် ရှေ့ရှိ သေးငယ်သောဧရိယာတစ်ခုက ထူးဆန်းသော လေထုပုံပျက်ယွင်းမှုကိုပြသလာပြီး မြင့်မားသောကြိမ်နှုန်းတုန်ခါမှုများကြောင့် လေမော်လီကျူးများပွတ်တိုက်မိကာ အနားသို့ကပ်မှသာ သတိပြုမိနိုင်သော တိုးညင်းသည့် မြည်ဟည်းသံတစ်ခုထွက်ပေါ်လာသည်။

ဝိုင်ခွက်ထဲရှိ အနီရောင်အရည်များသည် အနည်းငယ်လှုပ်ရှားသွားပြီး ပြတင်းပေါက်အပြင်ဘက်မှ ကြယ်ရောင်များနှင့် သူမ၏မျက်ဝန်းထဲမှ စီးမျောနေသော အလင်းရောင်ကို ရောင်ပြန်ဟပ်နေသည်။

“ကမ္ဘာကြီးသာ ပျက်စီးမသွားရင် ဒါက တကယ်ကို ကောင်းမွန်တဲ့ အနားယူဖို့နေရာတစ်ခုဖြစ်လာမှာပဲ”

…

[ဝါးမျိုမှုအောင်မြင်သည်၊ ယန္တရားရင်းမြစ်အမှတ် +၁၁၀၀၊ ယန္တရားဝါးမျိုကျွမ်းကျင်မှု +၂၃၀]

ဝူး...

ကျွန်းလေဆိပ်၏ ညကောင်းကင်ယံအောက်တွင် ခရီးသည်တင်လေယာဉ်ကြီးတစ်စင်းသည် ကျိုးပဲ့နေသော ၎င်း၏တောင်ပံများနှင့်အတူ ပြာအဖြစ်သို့ ပြောင်းလဲသွားခဲ့သည်။ လူသေအလောင်းများအပါအဝင် ကျန်ရှိနေသော ဇီဝဒြပ်ပစ္စည်းအားလုံးသည် တဘုတ်ဘုတ်မြည်သံနှင့်အတူ မြေပြင်ပေါ်သို့ ပြုတ်ကျသွားပြီး အနီးနားရှိ ဖုတ်ကောင်များကို လှုပ်လှုပ်ရှားရှားဖြစ်သွားစေသည်။ ၎င်းတို့သည် သံချေးတက်နေသလိုဖြစ်နေသော ၎င်းတို့၏ အဆစ်အမြစ်များကို ကွေးညွတ်လိုက်ကြရာ တဂျိဂျိမြည်သံများနှင့်အတူ အမှောင်ထဲတွင် လျင်မြန်စွာ လှုပ်ရှားလာကြသည်။ ၎င်းတို့၏ သြရှရှဟိန်းဟောက်သံများသည် လှိုင်းတံပိုးများကဲ့သို့ ထွက်ပေါ်လာသော်လည်း အသံလာရာနေရာသို့ ချဉ်းကပ်လာပြီးနောက်တွင် ပစ်မှတ်ကို ထပ်မံ၍ လွဲချော်သွားကြပြန်သဖြင့် ဆွေးမြည့်နေသော ၎င်းတို့၏ မျက်လုံးစိမ်းကြီးများဖြင့် ပတ်ဝန်းကျင်ကို လှည့်လည်ရှာဖွေနေကြသည်။

လင်းရှန်သည် ဒရုန်းတစ်စင်းပေါ်တွင် တိတ်ဆိတ်စွာ မတ်တတ်ရပ်ရင်း လေထဲတွင် ဝဲပျံနေသည်။ ယခုအချိန်တွင် သူသည် ရှေ့ရှိ လင်းထိန်နေသောစနစ်မြင်ကွင်းကို စိတ်လှုပ်ရှားနေသောမျက်ဝန်းများဖြင့် ကြည့်ရှုလိုက်သည်။

“လေယာဉ်တစ်စင်းကို ဝါးမျိုတာ ဒါပထမဆုံးပဲ၊၊ လေယာဉ်ကိုယ်ထည် ပျက်စီးနေပေမဲ့ အင်ဂျင်နဲ့ လေကြောင်းလျှပ်စစ်စနစ်တွေက ကောင်းမွန်နေသေးတော့ ယန္တရားရင်းမြစ်အမှတ်တစ်ထောင်ကျော်တောင် ရလိုက်တာပဲ...”

[လက်ရှိ ယန္တရားနှလုံးသားအဆင့် ၆ (၄၀၉၀၀/၅၀၀၀၀)]

ယန္တရားနိုးထမှု- ယန္တရားအရှင်သခင်

ယန္တရားဝါးမျိုမှု - အဆင့် ၆ (၃၁၃၀/၅၀၀၀) ဝါးမျိုမှုစွမ်းရည်ကို မြှင့်တင်ရန်

ယန္တရားထုတ်လုပ်မှု - အဆင့် ၆ (၁၅၆၀/၅၀၀၀) တည်ဆောက်မှုစွမ်းရည်ကို မြှင့်တင်ရန်

ယန္တရားနှလုံးသားအကန့်ကို ကြည့်ရင်း လင်းရှန်က သက်ပြင်းတစ်ချက်ကို အားယူရှိုက်လိုက်မိသည်၊၊

“ဒီညထပ်လုပ်ရင် လုံလောက်သွားပါပြီ၊၊ အဆိုးဆုံးဖြစ်ရင်တောင် မနက်ဖြန်နားလို့ရပါတယ်”

ဤတစ်ကြိမ်တွင်မူ ဦးခေါင်းထက်တွင် ကျရောက်လုနီးပါးဖြစ်နေသော အန္တရာယ်၏ အငွေ့အသက်များမရှိတော့ပေ။ လင်းရှန်သည် ဤအခွင့်အရေးကို ဖမ်းဆွဲရန် အသေအချာပြင်ဆင်ထားသည်။ ဆင့်ကဲပြောင်းလဲမှုမှ အသစ်ရရှိထားသော စွမ်းအားကူးပြောင်းခြင်းနှင့် ဒရက်နော့စစ်သင်္ဘောအဆင့်ကို ဝါးမျိုရာမှ ရရှိခဲ့သော ဒဏ္ဍာရီလာစွမ်းရည်ဖြစ်သည့် စူပါအလင်းယိုင်ဓားတို့သည် ပင်လယ်ကျောက်ဆောင်ကျွန်းတွင် အလွန်အသုံးဝင်ခဲ့သည်။ လူသားတို့၏ အခြေအနေက ပိုမိုစိုးရိမ်စရာကောင်းလာသည်နှင့်အမျှ သူ၏ ယန္တရားစွမ်းအားအလားအလာကို နက်ရှိုင်းစွာ တူးဆွခြင်းက သံသယဖြစ်ဖွယ်မရှိဘဲ ဉာဏ်ကောင်းသော ရွေးချယ်မှုတစ်ခုဖြစ်ပေသည်။

သူသည် စိတ်ပိုင်းဖြတ်ပြီးနောက် ပျက်စီးနေသော ပျံသန်းရေးကိရိယာများကိုပင်မချန်ဘဲ အခြားသောလေယာဉ်ငယ်နှစ်စင်းနှင့် သယ်ယူပို့ဆောင်ရေးသင်္ဘောကိုပါ ချက်ချင်းဝါးမျိုရန် စတင်လိုက်သည်။

လင်းရှန်သည် ယန္တရားရင်းမြစ်အမှတ်များကို ဝါးမျိုရန်လိုအပ်ရုံသာမက ကြယ်နက်ပန်းပဲဖို၏ ထုတ်လုပ်မှုအစီအစဉ်များအတွက် ပိုမိုမြင့်မားသောအဆင့်ရှိသော ကုန်ကြမ်းများကိုပါ စုဆောင်းရန်လိုအပ်သောကြောင့် ဖြစ်သည်။

လက်ရှိတွင် အကျပ်အတည်းအခြေအနေ သို့မဟုတ် တိုက်ပွဲမဟုတ်သရွေ့ လင်းရှန်သည် ထုတ်လုပ်မှုအစီအစဉ် ၆ ခုလုံးကို အမြဲတမ်းအသက်သွင်းထားသည်။ သူ တည်ဆောက်ရန် လိုအပ်သောအရာများအတွက် သိသာထင်ရှားသောလိုအပ်ချက်များရှိနေသေးသည်၊၊ တည်ဆောက်မှု၊ ပြုပြင်မှု၊ သယ်ယူပို့ဆောင်မှုနှင့် ထိန်းသိမ်းမှုတို့တွင် သူ့ကို ကူညီပေးမည့် လုပ်ဆောင်ချက်စုံလင်သောဒရုန်းများစွာလိုအပ်နေပြီး လင်းရှန်သည် ယန္တရားစစ်တပ်တစ်ခုကို ပြင်ဆင်နေသည်။

ဤစစ်တပ်သည် စစ်ဆင်ရေးဗျူဟာများအတွက် တိုက်ခိုက်ရေးဒရုန်းများသက်သက်သာမဟုတ်ဘဲ ရွှန်း၏ ယန္တရားများကဲ့သို့ စစ်မှန်သောတိုက်ခိုက်ရေးယန္တရားများဖြစ်သည်။ လင်းရှန်သည် လက်ရှိတွင် လော့ယန် စမ်းသပ်ရန်အတွက် သံမဏိအရိုးစီးရီး ယန္တရား ၄ စင်းကို တည်ဆောက်ပေးထားပြီး ရလဒ်များက အတော်ပင် အလားအလာကောင်းလှသည်။

ဤတစ်ကြိမ်တွင် မမျှော်လင့်ဘဲ ဖက်ဒရေးရှင်းစတားဖလိ့၏ ၉၇၄ ခုခံရေးအဖွဲ့ထံမှ စစ်ဘက်သုံးရထားတစ်စင်းနှင့် ၎င်း၏ ယန္တရားတိုက်ခိုက်ရေးအုပ်စုကို ရရှိခဲ့ခြင်းက လင်းရှန်ကို အတွေးသစ်တစ်ခုပေးခဲ့သည်။

ယခင်စတားဖလိ့တိုက်ခိုက်ရေးမီကာစစ်တပ်၏ အဓိကဗဟိုချက်မှာ လူသားများဖြစ်ကြသည်၊၊ စွမ်းအားဝတ်စုံများနှင့် မီကာများသည် လူသားများကို အကျိုးပြုသည့် ကိရိယာများသာဖြစ်ကြသည်။ ဝန်ဆောင်မှုပေးသော စက်ရုပ်များအပြင် ဒရုန်းများသာလျှင် အုပ်စုလိုက်တိုက်ခိုက်နိုင်စွမ်းရှိကြသည်။

သို့သော် လက်ရှိလူသားနည်းပညာအတွက် အလွန်အရေးကြီးသောပြဿနာတစ်ခုရှိနေသည်၊၊ ၎င်းမှာ လျှပ်စီးလင်းယုန် ၂၀၀၀ အပါအဝင် ဒရုန်းအားလုံးသည် ကြီးမားထူးဆန်းသည့် သတ္တဝါများအပေါ်တွင် အနည်းငယ်အားနည်းနေခြင်းဖြစ်သည်၊၊ အုပ်စုလိုက်နည်းပညာက စွမ်းဆောင်ရည်ကို မြှင့်တင်ပေးနိုင်သော်လည်း… အမှောင်ထဲတွင် ဆင့်ကဲပြောင်းလဲလာသော ထူးဆန်းသည့် သတ္တဝါများသည် ဇီဝစွမ်းအင်ဒိုင်းများနှင့် စွမ်းအင်တိုက်ခိုက်မှုနည်းလမ်းများကို ဖော်ထုတ်လာကြပြီး အမှောင်ကျူးကျော်မှုကြောင့် သတင်းအချက်အလက်ဖိနှိမ်နိုင်စွမ်းနှင့်လည်း ပေါင်းစပ်သွားခဲ့သည်။ ကမ္ဘာပျက်ကပ်မတိုင်မီက ဒီဇိုင်းဆွဲခဲ့သော တိုက်ခိုက်ရေးဒရုန်းများသည် အလွန်မြင့်မားသော စွမ်းဆောင်ရည်အတိုင်းအတာတစ်ခုရှိနေရန် ခဲယဉ်းလှသည်။

ယခုအခါ လင်းရှန်၏ ဒရုန်းတစ်ဝက်ခန့်မှာ သူကိုယ်တိုင်ထုတ်လုပ်ထားခြင်းဖြစ်ပြီး ကျန်တစ်ဝက်မှာ အာရုဏ်ဦးမြို့တော်ရှိ ချင်ဖုန်းထံမှ သိမ်းဆည်းထားခြင်းဖြစ်သည်။ ၎င်းတို့သည် ကောင်းကင်နှင့် ပင်လယ်ပြင်ကို ဖြတ်သန်းသွားလာစဉ်အတွင်း အတော်ပင် အရေးကြီးသောအခန်းကဏ္ဍမှ ပါဝင်ခဲ့သည်မှာ အမှန်ပင်ဖြစ်သော်လည်း ထူးဆန်းသည့် သတ္တဝါများကို တိုက်ရိုက်ချေမှုန်းနိုင်သည့် ကြီးမားသောအင်အားစုတစ်ခုဖြစ်ရန်ဟူသော လင်းရှန်၏ ရည်မှန်းချက်ကိုမူ မည်သည့်အရာကမျှ မပြည့်မီသေးပေ။

ထို့ကြောင့် သူသည် ထူးဆန်းသည့် သတ္တဝါများကို ရင်ဆိုင်ရန်အတွက် သီးသန့်ဒီဇိုင်းထုတ်ထားသော ဒရုန်းမီကာအမျိုးအစားသစ်တစ်ခုကို ပြန်လည်ဒီဇိုင်းဆွဲရန်စီစဉ်နေသည်။ ၎င်းသည် လူသားများမောင်းနှင်ရန်မလိုအပ်ဘဲ အားကောင်းသောခံစစ်၊ အပျော့စားနှင့် အပြင်းစားသတ်ဖြတ်နိုင်စွမ်းတို့ရှိရမည်ဖြစ်ပြီး အမှောင်စွမ်းအင်ပေါင်းစည်းချိတ်ဆက်မှုနှင့် ပေါင်းစပ်ထားသော ဆက်သွယ်ရေးဗိသုကာနှင့် အနှောင့်အယှက်ဒဏ်ခံနည်းပညာတို့လည်းပါဝင်ရမည်ဖြစ်သည်။ ဤအချက်များနှင့်အတူ လင်းရှန်သည် ဤယူနစ်များကို စစ်တပ်တစ်ခုကဲ့သို့ အများအပြားထုတ်လုပ်နိုင်မည်ဖြစ်ပြီး အထူးအဆင့် သို့မဟုတ် S-Class အဆင့်ကိုပင် ခြိမ်းခြောက်နိုင်သော သံမဏိစစ်တပ်ကြီးကို တဖြည်းဖြည်းချီတက်ဖွဲ့စည်းနိုင်မည်ဖြစ်သည်။

လက်ရှိတွင် လင်းရှန်၏ ပုံကြမ်းထဲ၌ ရွှန်း၏ သံမဏိအရိုးနှင့် ACS သာ ရှိနေပြီး ၎င်းတို့အပြင် အနီရောင်ကမ္ဘာမှ ကချေသည် ၀၁ ပုံကြမ်းသာ ကျန်ရှိတော့သည်။ မီးနတ်ဘုရားနှင့် Guardian-X ကဲ့သို့သော စတားဖလိ့စီးရီးများသည် လူသားများမောင်းနှင်ရခြင်းဖြစ်သည်။ အဝေးထိန်းစနစ်အစိတ်အပိုင်းများကို ယာယီတပ်ဆင်ထားလျှင်ပင် ၎င်းက ရေတိုဖြေရှင်းချက်သာ ဖြစ်လိမ့်မည်၊ ရေရှည်ဖြေရှင်းချက် မဟုတ်ပေ။

ဤအချက်နှင့်ပတ်သက်၍ လင်းရှန်သည် ရှင်းဂျီနှင့် ဆွေးနွေးခဲ့ဖူးပြီး ယခင်က ယုဟန်မှတစ်ဆင့် အင်ပါယာပရောဂျက်အကြောင်း ရိုးရှင်းသောနားလည်မှုတစ်ခုရရှိခဲ့ဖူးသည်။ ဤကဏ္ဍတွင် အင်ပါယာပရောဂျက်၌ အမှန်တကယ်ပင် ဖွံ့ဖြိုးတိုးတက်မှုလမ်းကြောင်းနှစ်ခုရှိခဲ့သည်၊၊ တစ်ခုမှာ လူသားတို့၏ အလွန်ကြီးမားသောယန္တရားလက်နက်ဖြစ်သည့် ဖန်ကူဖြစ်ပြီး အခြားတစ်ခုမှာ သံမဏိပျားအုပ်စုဖြစ်သည်။

သို့သော်လည်း ယုဟန်သည် ဤသံမဏိပျားအုပ်စုပရောဂျက်အကြောင်းကို ရှင်းရှင်းလင်းလင်းမသိရှိခဲ့သလို မည်သည့်ယန္တရားကိုမျှလည်း ထုတ်လုပ်ခဲ့ခြင်းမရှိပေ။ ထို့ကြောင့် ခြုံငုံကြည့်လျှင် လင်းရှန်သည် သူ၏ စိတ်ကူးစိတ်သန်းများကို ပေါင်းစပ်ဖန်တီးခြင်းဖြင့်သာ ကိုယ်တိုင်ဖြေရှင်းနိုင်မည်ဖြစ်သည်။