အခန်း ၁၃၆

အခန်း ၁၃၆ - ထိုက်တန်၏ လှုပ်ရှားမှု။

"ဖူလန်ဒါ သေသွားပြီဟုတ်လား။ငါ ပြောသားပဲ ရှီလိုင်ခဲအကယ်ဒမီဆိုတာ ယုံကြည်လို့ မရဘူး။"

ကောင်းကင်တူ အင်ပါယာ နန်းတော်အတွင်းတွင် အသက် ၁၇၁၈ နှစ်အရွယ် လူငယ်တစ်ဦးက ဝမ်းသာအားရ ပြောလိုက်သည်။

သူသည် ကောင်းကင်တူ အင်ပါယာ၏ စတုတ္ထမြောက် မင်းသားရွှဲ့ပန်ဖြစ်သည်။ အနာဂတ်တွင် သူသည် ထန်စန်းကို ဆရာအဖြစ် တင်မြှောက်ပြီး ဧကရာဇ် ဖြစ်လာမည့်သူ ဖြစ်သည်။ သို့သော် လက်ရှိတွင်မူ ရှီလိုင်ခဲအကယ်ဒမီ၏ တိုက်မုပိုင်ကြောင့် အကြီးအကျယ် အရိုက်ခံထားရသဖြင့် အငြိုးအတေးကြီးနေသူ ဖြစ်သည်။

ရှောင်ချန်ယွီက ရှီလိုင်ခဲကို သင်ခန်းစာပေးလိုက်သည့်အတွက် ရွှဲ့ပန်မှာ အလွန်ပင် ကျေနပ်နေသည်။

"ရှီလိုင်ခဲအကယ်ဒမီက ဂုဏ်တွေသာ ဖော်နေတာ စွမ်းအားက ဒီလောက်ပဲကိုး အဲ့ဒီအစား ငါ ရှောင်ချန်ယွီကိုသာ ဆရာတင်ရင် မကောင်းဘူးလား။"

"သူက ဒီလောက် သန်မာတာ ငါ့ကို ရာဇပလ္လင် ပြန်ရအောင်တောင် ကူညီနိုင်မှာပေါ့။"

ရွှဲ့ပန်၏ မျက်လုံးများတွင် စူးရှသော အရောင်တစ်ချက် လက်သွားသည်။ သူသည် လူရှေ့တွင် ပျော်ပါးနေသူအဖြစ် ဟန်ဆောင်သော်လည်း အမှန်တကယ်တွင် အလွန်လိမ္မာပါးနပ်သူ ဖြစ်သည်။

ထန်စန်းထက်ပင် ရှောင်ချန်ယွီကို ပို၍ စိတ်ဝင်စားလာပြီ ဖြစ်သည်။

ထိုအချိန်တွင် ခွန်အာမျိုးနွယ်စု ၏ နယ်မြေ၌ ဂေါ်ဇီလာကဲ့သို့ ကြံ့ခိုင်သော လူကြီးတစ်ဦးသည် မထီမဲ့မြင် ပြုံးလိုက်သည်။ သူသည် ထိုမျိုးနွယ်စု၏ ခေါင်းဆောင် ထိုက်တန်*ဖြစ်ပြီး ရှီလိုင်ခဲကျောင်းသား ထိုက်လုံ၏ အဘိုးဖြစ်သည်။

ထိုက်တန်မှာ ထန်ဟောက်နှင့် ရင်းနှီးသူဖြစ်ပြီး ထန်စန်းကို သခင်ငယ်အဖြစ် အသိအမှတ်ပြုထားသူ ဖြစ်သည်။ သို့သော် ဖူလန်ဒါနှင့် ကျောက်ဝူကျိတို့ သေဆုံးသွားသည်ကို ကြားသောအခါ သူ အဘယ်ကြောင့် လှောင်ရယ်နေသနည်း။

အကြောင်းမှာ ထိုက်တန်သည် ကျောက်ဝူကျိနှင့် အတိတ်က အငြိုးအတေး ရှိနေသောကြောင့် ဖြစ်သည်။ ငယ်စဉ်က ကျောက်ဝူကျိသည် ထိုက်တန်၏ ညီငယ်ကို ထိခိုက်စေခဲ့သဖြင့် ထိုက်တန်က လိုက်လံတိုက်ခိုက်ခဲ့ရာ ကျောက်ဝူကျိမှာ ရှီလိုင်ခဲအကယ်ဒမီသို့ ပုန်းခိုခဲ့ရခြင်း ဖြစ်သည်။

ထိုက်တန်သည် ရှီလိုင်ခဲမှ ဖူလန်ဒါ ရှိနေသဖြင့်သာ ကျောက်ဝူကျိကို ဘာမှ မလုပ်နိုင်ခဲ့ခြင်း ဖြစ်သည်။ ယခု သူတို့ သေဆုံးသွားသဖြင့် ထိုက်တန်မှာ အလွန်ဝမ်းမြောက်နေသည်။

သို့သော် ထိုက်တန်သည် ရှောင်ချန်ယွီကိုလည်း သဘောမကျပေ။ အကြောင်းမှာ မကြာသေးမီက ရှောင်ချန်ယွီသည် သူ၏ မြေးဖြစ်သူ ထိုက်လုံကို ရိုက်ထားသောကြောင့် ဖြစ်သည်။

"ကျောက်ဝူကျိနဲ့ ဖူလန်ဒါတို့က သူတို့အသုံးမကျလို့ သေတာ။ ရှောင်ချန်ယွီဆိုတဲ့ ကောင်လေးကိုတော့ ငါကိုယ်တိုင် သွားတွေ့မှ ဖြစ်မယ်။"

ထိုက်တန်၏ မျက်လုံးများတွင် အလင်းရောင် တစ်ချက်လက်သွားသည်။ ထန်စန်းထံမှ ရှောင်ချန်ယွီကို ရှင်းပေးရန် တောင်းဆိုချက် ရရှိထားသည့်အပြင်ပင်လယ်နတ်ဘုရား၏ ကမ်းလှမ်းချက်လည်း ရှိနေသည်။ ရှောင်ချန်ယွီကို သတ်နိုင်ပါက ပင်လယ်နတ်ဘုရား၏ ကောင်းချီးကို ရရှိကာ သူကိုယ်တိုင်လည်း ထိပ်တန်းတုံ့လောအဆင့်သို့ တက်လှမ်းနိုင်မည် ဖြစ်သည်။

"ရှောင်ချန်ယွီက ကောင်လေးတစ်ယောက်ပါပဲ။ သူ့ကို သတ်ပြီး ပင်လယ်နတ်ဘုရားရဲ့ ကောင်းချီးကို ရလိုက်ရင် ဒါဟာ အမြတ်ထွက်တဲ့ အရောင်းအဝယ်ပဲ။"

ကမ္ဘာလောက၏ လှုပ်ရှားမှုတိုင်းမှာ အမြတ်အစွန်းအတွက်သာ ဖြစ်သည်။ ရှောင်ချန်ယွီနှင့် အငြိုးရှိသည်ဖြစ်စေ မရှိသည်ဖြစ်စေ ဤလုပ်ငန်းကို သူ လုပ်ဆောင်ရမည်ဖြစ်သည်။

ထိုက်တန်သည် ရှောင်ချန်ယွီကို ရင်ဆိုင်ရန် ပြင်ဆင်လိုက်တော့သည်။