အခန်း ၂၁၆၂
Vol. 217 Ch. 2162
အခန်း (၂၁၆၂) ဒါက တကယ့်ကို လူကို အနိုင်ကျင့်လွန်းတာပဲ
လူအုပ်ကြီးက အတန်ငယ် တုန်လှုပ်သွားခဲ့ရပြီး၊ ၎င်းတို့၏ မျက်ဝန်းများက ဖန့်ချန်နှင့် တုန်းဖန်းဟို့၏ ကိုယ်ပေါ်သို့ အပြန်အလှန် ကူးပြောင်းလျက် မပြတ် ဝေ့ယမ်းကြည့်ရှုနေကြတော့သည်။
သူတို့က ဖန့်ချန်နှင့် တုန်းဖန်းဟို့တို့အကြား တစ်စုံတစ်ခုသော ပုဂ္ဂိုလ်ရေးဆိုင်ရာ အငြိုးအတေးများ ရှိနေခဲ့သဖြင့်၊ ထို့ကြောင့်သာ တုန်းဖန်းဟို့က ဖန့်ချန်အား ကောင်းကင်ငါးပါး စစ်တလင်းအတွင်းသို့ ဝင်ရောက်ခြင်းမပြုရန် တားဆီးနေခြင်း ဖြစ်လိမ့်မည်ဟု ထင်မှတ်နေကြခြင်း ဖြစ်သည်။
ကျိလင်း၏ စိတ်အမူအရာက လှုပ်ရှားသွားခဲ့ပြီး၊ အလျင်အမြန်ပင် တုန်းဖန်းဟို့၏ထံသို့ အသံလှိုင်းဖြင့် သတင်းပို့လျက် မေးမြန်းလိုက်သည်။
“အစ်ကို တုန်းဖန်း…… ဒါက ဘာဖြစ်တာလဲဗျာ ”
တုန်းဖန်းဟို့က ကျိလင်းအား ဂရုစိုက်မနေဘဲ၊ လေးနက်တည်ကြည်သော မျက်ဝန်းများဖြင့် ဖန့်ချန်ကိုသာ စိုက်ကြည့်နေရင်း။
“ဒီတစ်ခေါက်မှာတော့ မင်း ကောင်းကင်ငါးပါး စစ်တလင်းထဲကို မဝင်တာ အကောင်းဆုံးပဲ ”
“ထိုက်ဟောက်ဝေက တိန့်ဆွေ့နတ်ဘုရားရောင်ခြည်ကို နားလည်သဘောပေါက်သွားခဲ့ပြီ၊ တစ်ဦးချင်း တိုက်ခိုက်တဲ့ အခါကျရင် မင်းရဲ့ ကျင့်ကြံခြင်း အောက်ခြေအခြေခံက သူ့ထက် ပိုပြီးတော့ ခိုင်မာတောင့်တင်းနေပါစေဦးတော့၊ နတ်ဘုရားစွမ်းရည်က သူ့ထက် ပိုပြီးတော့ ထက်မြက်စူးရှနေပါစေဦးတော့၊ မင်းအနေနဲ့ ဘာအားသာချက်မှ ရရှိမှာ မဟုတ်ဘူး၊ အဲဒီအစား မုချဧကန် ရှုံးနိမ့်သွားရလိမ့်မယ် ”
ဝုန်း
တုန်းဖန်းဟို့၏ စကားလုံးများက၊ ကွင်းပြင်အတွင်း ရှိနေကြသည့် လူသားမျိုးနွယ်စုမှ သူတော်စင်များအားလုံးကို ပြိုင်တူ ထိတ်လန့်တုန်လှုပ်သွားစေခဲ့တော့သည်။
ယခုမှ ရောက်ရှိလာကြသည့် တောင်တန်းအသီးသီးမှ မဟာစီနီယာ တပည့်ကြီးများသာလျှင် မလှုပ်မယှက် တည်ငြိမ်လျက် ရှိနေကြသည်။
သူတို့က ဤသတင်းစကားကို စောစောစီးစီးပင် ကြားသိထားခဲ့ကြရပြီး ဖြစ်ပေသည်။
“တိန့်ဆွေ့နတ်ဘုရားရောင်ခြည် ဟုတ်လား ထိုက်ဟောက်ဝေဆိုတဲ့ ကောင်က ရူးသွားပြီလားဗျာ ဒီလောက်အထိ ကြီးမားတဲ့ သေလုမြောပါး အန္တရာယ်ကို စွန့်စားပြီးတော့၊ ဒီလိုမျိုး နတ်ဘုရားစွမ်းရည်ကို သွားပြီး လေ့လာဆင်ခြင်ရရိုးလား ”
“မတော်တဆ ဖြစ်သွားတာနဲ့ တစ်သက်လုံး နာလန်မထူနိုင်အောင် ပျက်စီးသွားမှာ၊ ဒါပေမဲ့ ရရှိမယ့် အကျိုးကျေးဇူးကလည်း…… စွမ်းအင်စုစည်းခြင်းနဲ့ အသက်စွမ်းအင် အဆင့်နှစ်ခုမှာပဲ ပေါ်လွင်တာလေ၊ ကမ္ဘာတည်ဆောက်ခြင်း အဆင့်ကို ရောက်သွားရင်တော့ ဒီတိန့်ဆွေ့နတ်ဘုရားရောင်ခြည်ရဲ့ စွမ်းအားက သာမန်ပဲ ဖြစ်သွားမှာကို ”
“သူက ဖန့်ချန်ကို ရင်ဆိုင်ဖို့အတွက်ပဲ၊ ဒီလိုမျိုး စွန့်စားတဲ့ ကိစ္စကို တမင်တကာ သွားလုပ်ခဲ့တာ မဟုတ်ဘူးမလား ”
“အချိန်ချင်းကတော့ မကိုက်ညီဘူးဗျ၊ အကယ်၍ လွန်ခဲ့တဲ့ နှစ်အနည်းငယ်တုန်းကမှ စတင်ပြီး ပြင်ဆင်ခဲ့တာဆိုရင်၊ ဒီလောက်အထိ မြန်မြန်ဆန်ဆန် လေ့လာဆင်ခြင်နိုင်စရာ အကြောင်းမရှိဘူး၊ ကြည့်ရတာ ရှေးယခင်ကတည်းက ဒီလိုမျိုး အကြံအစည် ရှိနေခဲ့ပြီး လမ်းသစ်ထွင်ဖို့ ကြံစည်ခဲ့တာ ဖြစ်လိမ့်မယ် ”
“ဒါလည်း ဟုတ်တာပဲ၊ အကယ်၍ ဒီနတ်ဘုရားစွမ်းရည်ကို အသုံးချပြီး နေမင်းခုနစ်ပါးခန်းမထဲကို တိုးဝင်နိုင်ခဲ့ရင်၊ လမ်းသစ်ထွင်ပြီးတော့ စင်ကြယ်သော ဗောဓိသီး အချို့ကို ရရှိနိုင်လိမ့်မယ်၊ ဒါက ကိုယ်ပိုင်အတွင်းကမ္ဘာနယ်မြေရဲ့ အောက်ခြေအခြေခံအတွက် ဆိုရင်တော့ အကျိုးကျေးဇူး အလွန်အမင်း ကြီးမားလွန်းတယ် ”
လူသားမျိုးနွယ်စုမှ စွမ်းအင်စုစည်းခြင်းအဆင့် သူတော်စင်များ၏ နှလုံးသားထဲ၌ သက်ပြင်းချမိခြင်းများ ပြည့်နှက်သွားခဲ့ရသည်။
ထိုအသက်စွမ်းအင်အဆင့် သူတော်စင်များပင်လျှင်၊ ထိုက်ဟောက်ဝေ၏ ကံတရားက အလွန်အမင်း ကောင်းမွန်လွန်းလှသည်ဟု ခံစားနေကြရပြီး၊ သံသရာတားမြစ်နယ်မြေ၏ ညှဉ်းပန်းနှိပ်စက်မှုကြောင့် သေဆုံးမသွားခဲ့ရဘဲ၊ အဲဒီအစား ကာလဦးပိုင်းတွင် အစွမ်းထက်ပြီး အလယ်ပိုင်းနှင့် နောက်ပိုင်းကာလများတွင် အားနည်းသည့် တားမြစ်နယ်မြေ၏ နတ်ဘုရားစွမ်းရည်မျိုးကို လေ့လာဆင်ခြင်နိုင်ခဲ့သည် မဟုတ်ပါလော။
၎င်းအတွင်း၌ ရှိနေသည့် အမှန်တရားကို သူတို့အားလုံး နားလည်သဘောပေါက်ထားကြပြီး၊ သူတို့အနက်မှ အများစုပင်လျှင် ငယ်ရွယ်စဉ် အချိန်တုန်းက လမ်းသစ်ထွင်လျက် နေမင်းခုနစ်ပါးခန်းမဆီသို့ ချဉ်းနင်းဝင်ရောက်ရန် စဉ်းစားတွေးတောခဲ့ဖူးကြသည်။
သို့သော်လည်း လမ်းသစ်ထွင်ခြင်း၌လည်း ပေးဆပ်ရမည့် တန်ဖိုး ရှိပေရာ၊ လူအများစုမှာ ၎င်း၏ နောက်ကွယ်က ပေးဆပ်ရမည့် တန်ဖိုးကို မခံနိုင်ကြသလို၊ ထိုကဲ့သို့သော သတ္တိမျိုးလည်း မရှိကြပါချေ။
ဥပမာအားဖြင့် တိန့်ဆွေ့နတ်ဘုရားရောင်ခြည်ကို နားလည်သဘောပေါက်လိုပါက၊ သံသရာတားမြစ်နယ်မြေ၏ ငရဲကဲ့သို့သော ညှဉ်းပန်းနှိပ်စက်မှုဒဏ်ကြောင့် အရှင်လတ်လတ် သေဆုံးသွားရမည့် အခြေအနေကို ကြိုတင်ပြင်ဆင်ထားရမည် ဖြစ်သည်။
ထို့ကြောင့်သာ ထိုက်ဟောက်ဝေ၏ ယခုတစ်ကြိမ် ဝှက်ဖဲက၊ လူအုပ်ကြီးအား ဤမျှလောက်အထိ ထိတ်လန့်အံ့ဩသွားစေခဲ့ခြင်း ဖြစ်ပေတော့သည်။
“တိန့်ဆွေ့နတ်ဘုရားရောင်ခြည်…… ဒီနတ်ဘုရားစွမ်းရည်က စွမ်းအင်စုစည်းခြင်းနဲ့ အသက်စွမ်းအင် အဆင့်တွေမှာ ရှိနေတဲ့ အချိန်တုန်းက၊ တစ်ဦးချင်း တိုက်ခိုက်တဲ့ နေရာမှာ ပြိုင်ဘက်ကင်းလုနီးပါး အစွမ်းထက်တယ် ”
တုန်းဖန်းဟို့က မျက်ဝန်းကို အနည်းငယ် မှေးစိုက်လိုက်ရင်း။
“ကောင်းကင်ငါးပါး မဟာမိတ်အဖွဲ့ထဲမှာ၊ အချို့သော မိသားစုတွေက တပည့်တွေကို သံသရာတားမြစ်နယ်မြေဆီကို တမင်သက်သက် စေလွှတ်လေ့ ရှိကြတယ်၊ အဲဒါက ဒီနတ်ဘုရားစွမ်းရည်ကို လေ့လာဆင်ခြင်နိုင်ဖို့အတွက်ပဲ။
လူအင်အား အမြောက်အမြား သုံးပြီးတော့ စတေးခံခိုင်းကြတာ။
နောက်ဆုံးမှာတော့ အောင်မြင်စွာ လေ့လာဆင်ခြင်နိုင်ခဲ့တဲ့ သူတော်စင်တွေကိုပဲ သီးသန့်ရွေးထုတ်ပြီး၊ တိုက်ခိုက်ရေးအဖွဲ့ငယ်လေးတွေအဖြစ် ဖွဲ့စည်းပြီးရှေ့တန်းစစ်မျက်နှာပြင်တွေမှာ မကြာခဏ စေလွှတ်လေ့ ရှိကြတယ် ”
“အင်း…… ငါတို့ ဟင်းလင်းပြင် အဆင့်မြင့် မဟာမိတ်အဖွဲ့ထဲမှာလည်း၊ ဒီလိုမျိုး အဖွဲ့အစည်းတွေ ရှိတယ် ၊ အဲဒါက ယင်သူတော်စင် အချို့နဲ့ သစ္စာဖောက်အချို့ကို ဖမ်းဆီးဖို့အတွက် တာဝန်ယူရတာ ”
ကျိုကျိတောင်တန်း၏ မဟာစီနီယာ တပည့်ကြီးဖြစ်သူ ရွှေရှင်းက တည်ငြိမ်စွာ ခေါင်းညိတ်ပြလိုက်ရင်း။
“ဟော်ဆွေ့မျိုးနွယ်စု ဘက်မှာလည်း၊ တိန့်ဆွေ့နတ်ဘုရားရောင်ခြည်ကို နားလည်သဘောပေါက်ထားတဲ့ သူတော်စင်ပေါင်း ရာဂဏန်းဝန်းကျင်လောက်အထိ မွေးမြူထားပြီးတော့၊ ရှန်းဟုန်မျိုးနွယ်စုရဲ့ ကျန်ရစ်သူ တွေကို နေရာအနှံ့ လိုက်လံဖမ်းဆီးခိုင်းနေတယ် ”
ပြောဆိုပြီးနောက်၊ သူမက ဖန့်ချန်အား လှမ်း၍ ကြည့်ရှုလိုက်ရင်း။
“တုန်းဖန်းဟို့ သတိပေးတာလည်း ဟုတ်တာပဲ၊ မင်း ဒီတစ်ခေါက် ကောင်းကင်ငါးပါး စစ်တလင်းထဲကို မဝင်နဲ့တော့၊ ရှေးယခင်တုန်းက ရှီးမျိုးနွယ်စုရဲ့ ကာကွယ်ရေးဆရာ ကော်ယန့်လီ က မင်းရဲ့ လက်ထဲကနေ နေမင်းခုနစ်ပါး တံဆိပ်ခတ်နှိပ်မှုကို မရရှိခဲ့တာမလို့၊ မင်းကို စောစောစီးစီးကတည်းက နာကျည်းမုန်းတီးနေခဲ့တာ ”
ရွှေရှင်းပင်လျှင် ထုတ်ဖော်၍ သတိပေးလာသည်ကို မြင်တွေ့လိုက်ရသဖြင့်၊ မေဒေါင်ကွမ်း၏ မျက်နှာအမူအရာက အလွန်အမင်း ရုပ်ဆိုးဆိုး ဖြစ်သွားခဲ့ရပြီး၊ သွားများကို တကျိကျိ မြည်အောင် ကြိတ်လိုက်မိတော့သည်။
ကျိလင် ကမူ ယခုအချိန်တွင် မေဒေါင်ကွမ်း၏ သတင်းစကားကို အပြည့်အဝ ယုံကြည်သွားခဲ့ပြီ ဖြစ်ရာ၊ နှလုံးသားထဲ၌ တိတ်တဆိတ် သက်ပြင်းချလိုက်မိတော့သည်။ ကံဆိုးသည်က တုန်းဖန်းဟို့နှင့် ရွှေရှင်းတို့ နှစ်ဦးစလုံးက ရှေ့သို့ထွက်၍ ဖျောင်းဖျနေကြသဖြင့်၊ ကြည့်ရသည်မှာ ယခုတစ်ကြိမ်တွင်လည်း တစ်ဖက်လူက ဘေးအန္တရာယ်ကနေ ထပ်မံ၍ လွတ်မြောက်သွားဦးမည် ထင်ပေသည်။
“အားလုံးပဲ စိတ်ပူပေးကြတဲ့အတွက် ကျေးဇူးတင်ပါတယ်ဗျာ၊ ဆရာက ပြောတယ်…… ဒီတစ်ခေါက် ထိုက်ဟောက်ဝေကို စစ်ဆေးရမယ့် နေမင်းခုနစ်ပါး ကျောင်းသားက အခြားတစ်ယောက် ဖြစ်လိမ့်မယ်တဲ့ ”
ဖန့်ချန်က လက်နှစ်ဖက်ကို ဆုပ်လျက် ပြုံး၍ ပြောဆိုလိုက်သည်။
လူအုပ်ကြီးက အတန်ငယ် ကြောင်အသွားခဲ့ရပြီးနောက်၊ မျက်ဝန်းထဲ၌ ရုတ်တရက် သဘောပေါက်သွားသည့် အရိပ်အယောင်တစ်ခု ထွက်ပေါ်လာခဲ့ကြသည်။
“ငါ ပြောသားပဲ၊ ကရုဏာတောင်ကုန်းက ဆရာ ရှူရှန့်က သတင်းကို ပိုပြီးတော့ စောစောစီးစီး ရရှိထားတာ ဖြစ်လိမ့်မယ်၊ အဆက်အသွယ်တွေကို ကြိုတင်ပြီး ညှိနှိုင်းပေးထားပြီးသား ဖြစ်မှာပေါ့ ”
“မဟာမိတ်အဖွဲ့ထဲက လူကြီးလူကောင်းတွေကလည်း၊ ကျောင်းသား ဖန့်လိုမျိုး နေမင်းခုနစ်ပါး ပါရမီရှင်တစ်ယောက် ကိုယ့်လူအချင်းချင်းရဲ့ လက်ထဲမှာ ပျက်စီးသွားတာကို မြင်တွေ့ချင်ကြမှာ မဟုတ်ဘူးလေ ”
လူအုပ်ကြီးက တိုးညှင်းစွာ တီးတိုးရေရွတ်လိုက်ကြသည်။
တုန်းဖန်းဟို့က ခဏမျှ ကြောင်အသွားခဲ့ရပြီးနောက်၊ ချက်ချင်းပင် ခေါင်းကို ခပ်ဖွဖွ ညိတ်ပြလိုက်ရင်း။
“ဒါဆိုရင်တော့ ဘာပြဿနာမှ မရှိတော့ဘူး ”
“ဘာပဲဖြစ်ဖြစ်၊ သတိပေးခဲ့တဲ့အတွက် စီနီယာအစ်ကို တုန်းဖန်းကို ကျေးဇူးတင်ပါတယ် ”
ဖန့်ချန်က ပြုံးလျက် လက်နှစ်ဖက်ကို ဆုပ်လိုက်သည်။
တုန်းဖန်းဟို့က မချိုမချဉ်သော လေသံဖြင့် ပြန်လည်ပြောဆိုလိုက်သည်။
“ငါတို့က မျိုးနွယ်စုတူတွေ ဖြစ်နေလို့ပါ၊ မင်း အသေခံဖို့ သွားနေတာကို မျက်စိမှိတ် ကြည့်မနေချင်ရုံသက်သက်ပဲ ”
ပြောဆိုပြီးနောက်၊ သူက ကျိလင် ၏ ဘေးနားသို့ သွားရောက်ကာ စကားစမြည် ပြောဆိုနေခဲ့တော့သည်။
မကြာမီမှာပင်၊ ကောင်းကင်ငါးပါးနန်းတော်ဆောင်ကြီး ပွင့်ရမည့် အချိန်သို့ ရောက်ရှိလာခဲ့ရာ၊ လူအုပ်ကြီးက တစ်ယောက်ပြီးတစ်ယောက် ၎င်းအတွင်းသို့ အစီအစဉ်အလိုက် လှမ်းဝင်သွားကြတော့သည်။
……
……
ရှီးမျိုးနွယ်စု ကျောင်းတော်။
ကောင်းကင်ငါးပါးနန်းတော်ဆောင်ကြီး၏ ရှေ့မှောက်၌ ရေတွက်၍ မရနိုင်လောက်အောင်များပြားလှသည့် ရှီးမျိုးနွယ်စုမှ သူတော်စင်များ ဝိုင်းရံထားကြသည်။
ကျင့်ကြံခြင်းအဆင့်များမှာ စွမ်းအင်စုစည်းခြင်း ကာလဦးပိုင်းမှစ၍ အသက်စွမ်းအင်၊ ကမ္ဘာတည်ဆောက်ခြင်းအဆင့်များအထိ အစုံအလင် ပါဝင်နေခဲ့သည်။
သို့သော်လည်း ၎င်းတို့၏ လက်ရှိ အာရုံစိုက်မှုများအားလုံးကမူ၊ လူရိပ်နှစ်ခု၏ ကိုယ်ပေါ်သို့သာ ကျရောက်နေခဲ့ကြရသည်။
ပထမတစ်ယောက်ကမူ ကော်ယန်လီ၏ လက်အောက်က တိုက်ရိုက်တပည့်ရင်း ဖြစ်သူ ထိုက်ဟောက်ဝေ ဖြစ်သည်။
အခြားတစ်ယောက်ကမူ ကော်ယန်လီက ယခုလေးတင် အနားနား၌ ထားရှိရန် လက်ခံလိုက်သည့် နောက်ဆုံးပိတ် တပည့်ရင်း၊ လူသားမျိုးနွယ်စုမှ ဖန့်ကျစ်ရွှယ် ပင် ဖြစ်ပေတော့သည်။
လူသားမျိုးနွယ်စုနှင့် ရှီးမျိုးနွယ်စု၏ ရုပ်သွင်ပြင် လက္ခဏာများက အခြေခံအားဖြင့် ထပ်တူနီးပါး တူညီကြပြီး၊ ပင်ကိုယ်သဘာဝအရသာ အနည်းငယ်မျှ ကွဲပြားခြားနားမှု ရှိကြပေသည်။
ထို့ကြောင့် ဖန့်ကျစ်ရွှယ်သည် ရှီးမျိုးနွယ်စု ကျောင်းတော်အတွင်း၌ ရှိနေပါသော်လည်း၊ ကြည့်ရသည်မှာ ထိုမျှလောက်အထိ မျက်စိစပါးမွှေးစရာ ဖြစ်မနေပါချေ။
သို့သော်ငြားလည်း သူမ ပိုင်ဆိုင်ထားသည့် အထွတ်အထိပ်တာအိုအဆင့်ရှိ ကိုယ်ပိုင်အတွင်းကမ္ဘာနယ်မြေကမူ၊ သူမအား အချိန်နှင့်အမျှ တောက်ပလှသော နတ်ဘုရားအလင်းတန်းများ ဖြာထွက်နေစေသည့် တည်ရှိမှုတစ်ခုအဖြစ် ကမ္ပည်းတင်ပေးထားခဲ့ရာ၊ မည်သည့်နေရာသို့ ရောက်ရှိပါစေဦးတော့၊ လူအများ၏ အာရုံစိုက်မှုကို မလွဲမသွေ ရရှိနေစေခဲ့သည်။
မူလကဆိုလျှင် ယနေ့တွင် ဖန့်ကျစ်ရွှယ်ကသာ အဓိကဇာတ်လိုက် ဖြစ်သင့်ပေသည်။
သူမအနေနှင့် ပထမဆုံးအကြိမ် ကောင်းကင်ငါးပါး စစ်တလင်းအတွင်း၌၊ အတောက်ပဆုံးသော စစ်ရေးစွမ်းဆောင်ရည် အောင်မြင်မှုများကို မုချ ပြသနိုင်လိမ့်မည် ဖြစ်သည်။
သို့သော်လည်း ထိုက်ဟောက်ဝေက တိန့်ဆွေ့နတ်ဘုရားရောင်ခြည်ကို နားလည်သဘောပေါက်သွားခဲ့သည့် ကိစ္စရပ်က၊ တစ်ကျောင်းလုံးရှိ ရှီးမျိုးနွယ်စု ကျောင်းတော်တစ်ခုလုံးသို့ ပျံ့နှံ့သွားခဲ့ပြီ ဖြစ်ရုံမျှမက၊ အခြားသော ကျောင်းတော်များပင်လျှင် ကြားသိထားခဲ့ကြရပြီ ဖြစ်သည်။
“ဒီတစ်ခေါက်မှာ၊ မင်းတို့ ထင်တာကတော့ ထိုက်ဟောက်ဝေရဲ့ စစ်ဆေးရေးအရာရှိက…… လူသားမျိုးနွယ်စု ကျောင်းတော်က ဖန့်ချန် ဖြစ်လာနိုင်မလားဟင် ”
နျူရှင်းဝူက နေ့စဉ်ရက်ဆက် ရင်းနှီးကျွမ်းဝင်စွာ ပေါင်းသင်းနေကျ ကျောင်းနေဖက်ချင်းများနှင့် အတူတူ ရပ်တန့်နေခဲ့ရင်း၊ အဝေးတစ်နေရာတွင် ရှီးမျိုးနွယ်စု ကျောင်းတော်၏ လူကြီးလူကောင်း ပုဂ္ဂိုလ်ပေါင်းစုံ ဝိုင်းရံခြင်းကို ခံထားရသည့် ထိုက်ဟောက်ဝေအား လှမ်း၍ ကြည့်ရှုနေမိရာ၊ မျက်ဝန်းထဲ၌ အတန်ငယ် မနာလိုဖြစ်မိခြင်းများ ပါဝင်နေခဲ့သည်။
“အသေအချာပဲ ဖန့်ချန်ပဲ ဖြစ်လိမ့်မယ်၊ သူက နေမင်းခုနစ်ပါးခန်းမရဲ့ စွမ်းအင်စုစည်းခြင်း ကာလဦးပိုင်း သူတော်စင်အဆင့်တွေထဲမှာ အဆင့်တစ်ရာမြောက် နေရာမှာ ရှိနေတာလေ၊ သူက စစ်ဆေးမှု မလုပ်ရင် အခြားဘယ်သူက လုပ်ဦးမှာလဲ ”
ရှီးမျိုးနွယ်စုမှ သူတော်စင်တစ်ဦးက ခပ်ဖွဖွ ပြုံးလျက်။
“ဒါ့အပြင် ဖန့်ချန်က အသက်ပျောက်သွားရဖို့ ရာခိုင်နှုန်း အလွန်အမင်း များနေပြီ၊ အကယ်၍ ရှေးယခင်တုန်းက အဲဒီကိစ္စရပ်သာ ဖြစ်ပျက်မခဲ့ဘူးဆိုရင်တော့၊ ထိုက်ဟောက်ဝေက အသေသတ်မယ့် အကွက်မျိုးအထိ ထုတ်သုံးမှာ မဟုတ်လောက်ဘူး ”
“ရှေးယခင်တုန်းက အဲဒီကိစ္စရပ် ဟုတ်လား……”
နျူရှင်းဝူက နှလုံးသားထဲ၌ တိတ်တဆိတ် သက်ပြင်းချလိုက်မိပြီး၊ ထိုစဉ်တုန်းက ကိစ္စရပ်ကို ရှီးမျိုးနွယ်စုဘက်က လုပ်ဆောင်ခဲ့ပုံမှာ မတရားသဖြင့် ဖြစ်သည်ဟု သူကိုယ်တိုင်လည်း ခံစားမိခဲ့သည်။
သူတို့အနေနှင့် ထိုက်ဟောက်ယွီ၏ ဒဏ်ရာအခြေအနေကြောင့်၊ အဘယ်ကြောင့်ဆိုသော် သူတစ်ပါး၏ လက်ထဲက နေမင်းခုနစ်ပါး တံဆိပ်ခတ်နှိပ်မှုကို ရှေ့သို့ထွက်၍ လုယူရန် ကြံစည်ရပါသနည်း။
“အားလုံးပဲ…… ဒီတစ်ခေါက် ငါ ကောင်းကင်ငါးပါး စစ်တလင်းထဲကို ဝင်ရောက်ရတာကတော့၊ ရည်ရွယ်ချက် တစ်ခုတည်းပဲ ရှိတယ် ”
ထိုက်ဟောက်ဝေ၏ အသံက ရုတ်တရက် ကွင်းပြင်တစ်ခုလုံးသို့ ဟိန်းထွက်သွားခဲ့သည်။
ရှီးမျိုးနွယ်စုမှ သူတော်စင်အုပ်ကြီးက ပြိုင်တူ သူ့ထံသို့ လှမ်း၍ ကြည့်ရှုလိုက်ကြသည်။
“ငါ ပြန်လာတဲ့ အချိန်ကျရင်၊ ငါဟာ မုချဧကန် နေမင်းခုနစ်ပါး ကျောင်းသားတစ်ဦးရဲ့ အဆင့်အတန်းကို ရရှိထားလိမ့်မယ် ”
“တစ်ချိန်တည်းမှာပဲ၊ ငါ ရရှိလာမယ့် နေမင်းခုနစ်ပါး တံဆိပ်ခတ်နှိပ်မှုကို၊ ငါ့ရဲ့ အစ်ကိုကြီးထံကိုလွှဲပြောင်းပေးအပ်ပြီးတော့ ဒဏ်ရာကုသတဲ့ နေရာမှာ အသုံးပြုစေမယ် ”
ထိုက်ဟောက်ဝေက လေးနက်တည်ကြည်စွာ ပြောဆိုလိုက်သည်။
လူအုပ်ကြီးက မျက်နှာပေါ်၌ ထိတ်လန့်အံ့ဩရိပ်များ ပြည့်နှက်သွားခဲ့ရပြီး၊ မယုံကြည်နိုင်လောက်အောင်ပင် ထိုက်ဟောက်ဝေအား စိုက်ကြည့်နေမိကြတော့သည်။
အကယ်၍ နေမင်းခုနစ်ပါး တံဆိပ်ခတ်နှိပ်မှုကို အခြားသူအား လွှဲပြောင်းပေးအပ်လိုက်မည်ဆိုပါက၊ နောင်အနာဂတ်တွင် နေမင်းခုနစ်ပါး ကျောင်းသားတစ်ဦး၏ အဆင့်အတန်းကို ထပ်မံရရှိနိုင်တော့မည် မဟုတ်ပါချေ၊ ဒါဟာ နောင်အနာဂတ်၏ သူတော်စင်လမ်းစဉ်အပေါ် မည်မျှလောက်အထိ ကြီးမားလှသော သက်ရောက်မှုမျိုး ဖြစ်ပေါ်လာစေလိမ့်မည်နည်း။
“သူ ရူးသွားပြီလား ”
နျူရှင်းဝူ၏ စိတ်အမူအရာက ထူးဆန်းသွားခဲ့ရပြီး၊ လူရူးတစ်ယောက်ကို ကြည့်ရှုနေသကဲ့သို့ပင် ဖြစ်နေခဲ့ရသည်။
ထိုအချိန်၌ ကောင်းကင်ငါးပါးနန်းတော်ဆောင်ကြီးက ပွင့်လှစ်သွားခဲ့ပြီ ဖြစ်ရာ၊ ထိုက်ဟောက်ဝေက ခပ်ဖွဖွ ပြုံးလိုက်ရင်း၊ လူအုပ်ကြီး၏ ထိတ်လန့်တုန်လှုပ်မှုများကို ဂရုစိုက်မနေဘဲ ကိုယ်ကို လှည့်လျက် ကောင်းကင်ငါးပါးနန်းတော်ဆောင်ကြီး၏ အတွင်းသို့ လှမ်းဝင်သွားခဲ့တော့သည်။
……
……
ရှေးယခင်အတိုင်းပင် ကျယ်ပြောလှသည့် ကွင်းပြင်ပလတ်ဖောင်းကြီး ဖြစ်ပေသည်။
ဟင်းလင်းပြင်၏ ထက်ကောင်းကင်ယံ၌၊ ရုတ်တရက် ကြီးမားလှသော ရွှေရောင်စာလုံးတန်းကြီးများက တစ်သီတစ်တန်းကြီး ကျဆင်းလာခဲ့သည်။
၎င်းတို့အားလုံးကမူ စိန်ခေါ်မှုနယ်မြေအတွင်းက စိန်ခေါ်မှု သတင်းအချက်အလက်များပင် ဖြစ်ကြသည်။
လူသားမျိုးနွယ်စုမှ သူတော်စင်များသည်၊ အစောဆုံး အချိန်၌ပင်လျှင် ထိုက်ဟောက်ဝေက ဟောက်ထုတောင်ကုန်းမှ ဂျူပင်းအား စိန်ခေါ်ထားသည့် သတင်းအချက်အလက်ကို မြင်တွေ့လိုက်ကြရသည်။
လက်ရှိအချိန်၌ ဂျူပင်း၏ အမည်ကမူ အရောင်အဝါ မှေးမှိန်လျက် ရှိနေဆဲ ဖြစ်ပြီး၊ ကြည့်ရသည်မှာ ယာယီအားဖြင့် တစ်စုံတစ်ရာ တုံ့ပြန်မှု မပြုလုပ်ရသေးပုံ ရပေသည်။
ထောင့်စွန်းတစ်နေရာတွင်မူ၊ ဂျူပင်းက ဟင်းလင်းပြင်ကို စိုက်ကြည့်နေရင်း၊ သွားများကို တကျိကျိ ကြိတ်လျက်။
“ဒါက တကယ့်ကို လူကို အနိုင်ကျင့်လွန်းတာပဲ ”