အခန်း ၅၄၉၀

Chapter 5490

ဤသည်မှာ ကောင်းကင်နှင့်မြေကြီးကြားတွင် သူတို့သာလျှင် ဗဟိုချက် ဖြစ်နေသည့်အလားပင်။

ရုပ်ခန္ဓာကိုယ်ဖွဲ့စည်းတည်ဆောက်ပုံအရ မွေးရာပါ သူတော်စင်သည် ကံကြမ္မာသားတော်၏နောက် ဒုတိယနေရာတွင် ရှိနေပေ၏။

အတိတ်တွင် ခွေးနက်ကြီးနှင့်မျောက် နှစ်ဦးလုံးက လုယွီသည် စစ်မှန်သော ကံကြမ္မာသားတော် ဖြစ်ကြောင်း တညီတညွတ်တည်း ယုံကြည်ခဲ့ကြသည်။

သို့သော် ကံကြမ္မာသားတော်သည် နောက်ဆုံးတွင် ဒဏ္ဍာရီတစ်ခုသာ ဖြစ်ပြီး မွေးရာပါ သူတော်စင်များကသာ အစစ်အမှန် ဖြစ်သည်။

လုယွီသည် လီမျိုးနွယ်ကို သတ်ဖြတ်ပြီး သူ့ထံမှ မွေးရာပါ သူတော်စင် အခွင့်အရေးကို လုယူခဲ့ပြီးနောက် ဤရုပ်ခန္ဓာကိုယ်ကို ရရှိခဲ့ခြင်း ဖြစ်ပေ၏။

"ဒီနည်းစနစ်ကို ကျင့်ကြံပြီးတဲ့နောက်မှာ ငါ့ရဲ့ ရုပ်ခန္ဓာကိုယ်ခွန်အားက သိသိသာသာ တိုးတက်လာလိမ့်မယ်..."

လုယွီသည် တွေးတောရင်း သူ၏မျက်လုံးများကို မှိတ်လိုက်ပြီး ဗလာဟင်းလင်းဖြစ်နေသော ခန်းမကြီးထဲတွင် ချက်ချင်းဆိုသလိုပင် စတင်၍ ကျင့်ကြံလိုက်သည်။

ဘန်း... ဘန်း... ဘန်း...

သူက လက်သီးတစ်ချက်ပြီးတစ်ချက် ထိုးလိုက်ရာ သူ၏လှုပ်ရှားမှုများသည် နဂါးတစ်ကောင်ကဲ့သို့ဖြစ်ပြီး လက်သီးများကို ကြိုးကြာငှက် တစ်ကောင်အလား ထိန်းချုပ်နေသည်။ တစ်ချိန်တည်းမှာပင် လုယွီ၏အသက်ရှူသံများကြားတွင် သူ အသက်ရှူသွင်းရှူထုတ်လိုက်သည်နှင့်အမျှ အဖြူရောင်စွမ်းအားစီးကြောင်းတစ်ခုသည် သူ၏ဒန်တျန်ထဲတွင် ပြည့်နှက်လာပေ၏။

ဤသည်မှာ သွေးချီနှင့်ရုပ်ခန္ဓာကိုယ်ကို အပြစ်အနာအဆာကင်းသော တစ်ခုတည်းအဖြစ်သို့ ပေါင်းစည်းနိုင်ရန် လေ့ကျင့်ပေးသည့် နည်းစနစ်တစ်ခုပင်။

ထိုနည်းစနစ် ပြီးပြည့်စုံခြင်းအဆင့်သို့ ရောက်ရှိသွားသည်နှင့် တပြိုင်နက် အင်မော်တယ် စွမ်းအားနှင့် ရုပ်ခန္ဓာကိုယ်ခွန်အားတို့သည် အတူတကွ တည်ရှိနိုင်ပြီး ပေါင်းစည်း၍ အသုံးပြုနိုင်ကာ တထပ်ထည်းကျသော စွမ်းအားတစ်ရပ်ကို ထုတ်လွှတ်နိုင်ပေမည်။

ရှေးဟောင်းခေတ်ရှိ လူများအနက် မွေးရာပါ သိုင်းသူတော်စင်တချို့သည် နက်နဲသိမ်မွေ့သော သွေးချီစွမ်းအားများ ရှိရုံသာမက သာမန်ထက် သာလွန်ထူးကဲသော ရုပ်ခန္ဓာကိုယ်များလည်း ရှိကြ၏။ သူတို့၏ လက်သီးတစ်ချက်တည်းဖြင့် ကြီးမားကျယ်ပြန့်သော သွေးချီစွမ်းအားများနှင့်အတူ လက်သီးစွမ်းအားကို ထုတ်လွှတ်နိုင်ပြီး မိုင်တစ်ထောင်အထိ မရပ်မနား တိုက်ခတ်သွားနိုင်သည်။

လုယွီ၏နားလည်သဘောပေါက်နိုင်စွမ်းမှာ အလွန်မြန်ဆန်သည်။ အစပိုင်းတွင် သူ၏ လက်သီးစွမ်းအားမှာ အနည်းငယ် အချိုးမကျဖြစ်နေသော်လည်း တဖြည်းဖြည်း ကျွမ်းကျင်လာခဲ့သည်။

ဝုန်း...

လုယွီ ထိုးနှက်လိုက်သော လက်သီးချက်တိုင်းနှင့်အတူ လောကကြီးကို တုန်လှုပ်စေကာ တောင်များနှင့်မြစ်များကို ဝါးမျိုနိုင်စွမ်းရှိသည့် ကြီးမားကျယ်ပြန့်သော နဂါးဟိန်းသံတစ်သံကို ကြားလိုက်ရသည့်အလားပင်။

ဘန်း... ဘန်း... ဘန်း...

လက်သီးချက် ရာပေါင်းများစွာ ထိုးနှက်ပြီးနောက် လုယွီက ရုတ်တရက် မျက်မှောင် အနည်းငယ် ကြုတ်လိုက်ပြီး သူ၏လှုပ်ရှားမှုများကို ရပ်တန့်လိုက်၏။

"တစ်ခုခုတော့ မှားနေတယ်..."

လုယွီ၏စိတ်နှလုံးသား လေးလံသွားသည်။

ထိုနည်းစနစ်၏ ရာခိုင်နှုန်းခုနစ်ဆယ်ခန့်ကို သူ နားလည်ထားပြီးဖြစ်သော်လည်း နောက်ဆုံး အပိုင်းအနည်းငယ်တွင် လုယွီသည် ကြီးမားသော ပြဿနာတစ်ခုကို တွေ့ရှိခဲ့သည်။

သူ၏ချီစွမ်းအားများ ခန္ဓာကိုယ်ထဲသို့ ဝင်ရောက်သွားပြီးနောက် တခဏအကြာတွင် စိတ်ဝိညာဉ်နှင့်ခန္ဓာကိုယ် ပေါင်းစပ်ခြင်းအဖြစ်သို့ ပြောင်းလဲသွားသည်။

ကျမ်းစာတစ်ခုအတွက် ဤသည်မှာ မူလအကြမ်းဖျင်းစည်းမျဥ်းကို သိသာထင်ရှားစွာ ချိုးဖောက်နေခြင်းပင်။

ဤကဲ့သို့ ပြောင်းလဲမှုကို လူအများစုမှ သတိပြုမိရန် ခက်ခဲသော်လည်း လျှို့ဝှက်ဆန်းကြယ် မိုးကောင်းကင်ကျမ်းစာနှင့် ပေါင်းစပ်ထားပြီး ကောင်းကင်နှင့်မြေပြင်ကြားရှိ အကျယ်ပြန့်ဆုံးသော အသိပညာကို ကျွမ်းကျင်ပိုင်နိုင်ထားသည့် လုယွီကမူ ပြဿနာကို ချက်ချင်းမြင်တွေ့လိုက်၏။

အကယ်၍ စိတ်ဝိညာဉ်နှင့်ခန္ဓာကိုယ် ပေါင်းစပ်သွားပါက ထိုအရာသည် ရုပ်ခန္ဓာကိုယ်၏ ခွန်အားကို တိုးမြှင့်ပေးနိုင်သော်လည်း ခန္ဓာကိုယ် သေဆုံးခြင်းသည် အလုံးစုံပျက်စီးသွားခြင်းဟု အဓိပ္ပာယ်ရသည်။ ထိုသို့ဖြစ်လာပါက သူ၏စိတ်ဝိညာဉ်သည် ခန္ဓာကိုယ်ထဲမှ ထွက်ခွာသွားရန်ပင် ဖြစ်နိုင်တော့မည် မဟုတ်ချေ။

ထိုကဲ့သို့ အားနည်းချက်များသည် အလွန်သိသာထင်ရှားလွန်းကာ အင်မော်တယ်ကျမ်းစာတစ်ခုတွင် မြင်တွေ့နိုင်သော အမှားတစ်ခုနှင့် လုံးလုံးလျားလျား မတူညီချေ။

"မဟာမိုးကောင်းကင် ရွှေအင်မော်တယ်တစ်ပါးရဲ့ အမွေအနှစ်က ဒီလောက်ထိ ရိုးရှင်းနေတာ အံ့အားသင့်စရာ မဟုတ်တော့ဘူး..."

လုယွီက ခေါင်းခါယမ်းလိုက်သည်။

အတိတ်တွင် သရဲတစ္ဆေဧကရာဇ်၏ အမွေအနှစ် ကို ရရှိရန်အတွက် သူသည် ပြင်းထန်သော ကြိုးစားအားထုတ်မှုများကို ပြုလုပ်ခဲ့ရပြီး မရေမတွက်နိုင်သော အခက်အခဲများကို ခံစားခဲ့ရသည်။ နောက်ဆုံးတွင် ထိုအရာကို မရရှိမီ သူသည် အစွမ်းထက်သော ရန်သူအမြောက်အများအပြားကို တိုက်ခိုက်၍ အနိုင်ယူခဲ့ရလေ၏။

သို့သော် တရားသူကြီးဆွေ့၏ အမွေအနှစ်ကမူ....

နတ်ဆိုးဘိုးဘေး ပျောက်ကွယ်သွားသည်နှင့် အမွေအနှစ်သည် အလွန်အဆင်ပြေချောမွေ့စွာ ထွက်ပေါ်လာသည်။

ထိုအမွေအနှစ်တွင် နတ်ဆိုးဘိုးဘေးအား ဖယ်ရှားရန် ပါဝင်သည်မှာ အမှန်ဖြစ်သော်လည်း သုံးကြိမ်ဦးညွှတ်အရိုအသေပြုရုံဖြင့် အမွေအနှစ်ကို ရရှိခြင်းမှာ အလွန်ရိုးရှင်းနေပေလိမ့်မည်။

အမွေအနှစ်တစ်ခု၏ ရည်ရွယ်ချက်မှာ သင့်လျော်သော ဆက်ခံသူကို ရှာဖွေရန်ဖြစ်ပြီး ဦးညွှတ်အရိုအသေပြုတတ်သော စိတ်ပျက်ဖွယ် လူတစ်ယောက်ကို ရှာဖွေရန် မဟုတ်ချေ။

လုယွီထံတွင် တာအိုသခင်စိတ်ဝိညာဉ် ရှိနေ​သောကြောင့်သာ အမတ်ကြီးချွယ်၏ အမွေအနှစ်ကို ရရှိခဲ့ခြင်း ဖြစ်ပေ၏။

လုယွီသည် လျှို့ဝှက်ဆန်းကြယ် မိုးကောင်းကင်ကျမ်းစာ၏ စမ်းသပ်မှုမှ အသက်ရှင်ကျန်ရစ်ခဲ့သောကြောင့် ကောင်းကင်ဘုံ ဧကရာဇ်၏အမွေအနှစ်ကို ရရှိခဲ့ခြင်း ဖြစ်သည်။

လုယွီသည် လောကနှစ်ခုတောင်တန်း အပြင်ဘက်တွင် ပြင်းထန်သောတိုက်ပွဲတစ်ခု ဆင်နွှဲခဲ့သောကြောင့် လူသားဧကရာဇ်၏ အမွေအနှစ် ကို ရရှိခဲ့သည်။

မည်သည့် အမွေအနှစ်မျိုး ဖြစ်နေပါစေ စမ်းသပ်မှု၌ မြင့်မားသော အဆင့်သတ်မှတ်ချက်တစ်ခု ရှိနေရပေမည်။

wunzinnosp