အခန်း ၄၅၁

အခန်း(၄၅၁) အားလုံး ကောင်းကင်မိစ္ဆာအတတ်ကို သွားလေ့ကျင့်ကြ

ချန်ဟွိုက်အန်က အလွန်ကြည်လင်နေပြီး အတွင်းမှ စိတ်ဝိညာဉ် စွမ်းအင်များ လည်ပတ်နေသည်ကို သဲ့သဲ့မျှ မြင်တွေ့နိုင်သော အန္တိမအဆင့် ချီမုန်တိုင်းဆေးလုံးကို လီကျုံးစီထံသို့ ကမ်းပေးလိုက်သည်။

ဤချီမုန်တိုင်းဆေးလုံးကို သူကိုယ်တိုင် သန့်စင်ထားခြင်း မဟုတ်ဘဲ အဂ္ဂိရတ်ဂိုဏ်းချုပ် ကျိုးရွှမ်ကျိ သန့်စင်ထားခြင်း ဖြစ်သည်။

ချီမုန်တိုင်းဆေးလုံးတွင် အတွေ့အကြုံ ဆေးလုံးနှင့် ဆင်တူသောအာနိသင် ရှိသည်။ ၎င်းကို သောက်ပြီးနောက် ကျင့်ကြံသူက အလိုအလျောက် ကျင့်ကြံခြင်းအခြေအနေသို့ ဝင်ရောက်သွားပြီး ပတ်ဝန်းကျင်ရှိ စိတ်ဝိညာဉ်ချီစွမ်းအင်များကို လျင်မြန်စွာ စုပ်ယူလိမ့်မည်။

ကွာခြားချက်မှာ ဤစိတ်ဝိညာဉ်ချီစွမ်းအင်သည် မသန့်စင်ဘဲ ကျင့်ကြံသူ၏ စစ်မှန်သောအနှစ်သာရနှင့် တိုက်ရိုက်ပေါင်းစပ်သွားခြင်းပင်။

ဤသို့ရောနှောသွားသော စစ်မှန်သောအနှစ်သာရသည် ကျင့်ကြံသူတစ်ဦး၏ သွေးကြောများနှင့် ဒန်တျန် အပေါ်တွင် ဝန်ပိုများလာစေပြီး အချိန်ကြာလာသည်နှင့်အမျှ အခြေခံအုတ်မြစ်ကို သေချာပေါက် ပျက်စီးစေလိမ့်မည်။

သို့သော် ချန်ဟွိုက်အန်က ဤဓားနက်ဂိုဏ်းမှ တက်လှမ်းသူ၏ အခြေခံအုတ်မြစ်ကို ကြည့်ရှုပြီးသွားပြီ ဖြစ်သည်။ ၎င်းမှာ သူ၏အခြေခံအုတ်မြစ်ကို ပျက်စီးစေသည့် ကိစ္စထက် သူ့တွင် အခြေခံအုတ်မြစ် လုံးဝ မရှိသည့်ကိစ္စက ပိုမှန်နေသည်။ ထို့ကြောင့် သူ၏ကြီးထွားမှုကို အတင်းအကျပ် တွန်းအားပေးရန် ချီမုန်တိုင်း ဆေးလုံးကို အသုံးပြုခြင်းက လုံးဝ သင့်တော်ပေသည်။

"ဒါက ငါတို့ လေဝိညာဉ်ဂိုဏ်းက အထူးပြုလုပ်ထားတဲ့ တက်လှမ်းခြင်းဆေးလုံးလို့ခေါ်တဲ့ ဆေးလုံးပဲ။ အဲဒါက တစ်ယောက်ယောက်ရဲ့ စွမ်းအားကို လျင်မြန်စွာ မြှင့်တင်ပေးနိုင်တယ်။"

ချန်ဟွိုက်အန် မျက်လုံးလှန်လိုက်ပြီး ချီမုန်တိုင်းဆေးလုံး၏ နာမည်ကို ပြောင်းလိုက်သည်။

ဤစကားကို ကြားသောအခါ လီကျုံးစီက လက်ဖဝါးထဲရှိ ဆေးလုံးကို ကြည့်လိုက်ပြီး မျက်လုံးများမှာ တောက်ပလာ၏။

"ဒီဆေးလုံးရဲ့ ဘေးထွက်ဆိုးကျိုးတွေက ဘာတွေလဲ။ ခေါင်းကိုက်တာ ဒါမှမဟုတ် သွေးအန်တာမျိုးတွေ ရှိလား။" သူက သတိထားပြီး မေးလိုက်သည်။

"မရှိဘူး။" ချန်ဟွိုက်အန် ခေါင်းခါပြလိုက်သည်။

"သိပ်ကောင်းတယ်။" လီကျုံးစီသည် ဆေးလုံးကို ချက်ချင်းပင် မျိုချလိုက်သည်။

ဘေးထွက်ဆိုးကျိုးအချို့ ရှိလျှပင် သူ လုံးဝ လက်ခံနိုင်သည်။ ရွှေရောင်အနှစ်သာရအဆင့် ကျင့်ကြံသူ တစ်ဦးအနေဖြင့် ကျင့်ကြံမှုကို ဆုံးရှုံးပြီး သာမန်လူတစ်ယောက် ဖြစ်သွားသည့် အခိုက်အတန့်မှစ၍ ကြီးမားသော ဆုံးရှုံးမှုခံစားချက်က သူ့ကို ရူးသွပ်လုမတတ် ဖြစ်စေခဲ့သည်။ ယခုတွင် သူ လိုချင်သမျှမှာ အမြန်ဆုံး သူ၏ အထွတ်အထိပ် အခြေအနေသို့ ပြန်လည်ရောက်ရှိရန်ပင်။

ချန်ဟွိုက်အန်နှင့် ကျန်းယိပိုင်တို့က ဘေးတွင် တိတ်ဆိတ်စွာ ရပ်နေပြီး စောင့်ကြည့်နေကြသည်။

ခဏအကြာ ပတ်ဝန်းကျင်ရှိ စိတ်ဝိညာဉ်ချီစွမ်းအင်များက လီကျုံးစီထံသို့ စတင်စုဝေးလာသည်။

ဤစုဝေးမှုသည် စိတ်ဝိညာဉ်စုစည်း အခင်းအကျင်းနှင့် လုံးဝ ကွာခြားသည်။ စိတ်ဝိညာဉ်စုစည်း အခင်းအကျင်းသည် စိတ်ဝိညာဉ်ချီစွမ်းအင်ကို ကျင့်ကြံသူ၏ ခန္ဓာကိုယ်ထဲသို့ အတင်းအကျပ် မလောင်းထည့်ဘဲ ညင်သာပြီး သဘာဝကျကျ စုဝေးစေသည်။ သို့သော် ဤအခိုက်အတန့်တွင် ရောနှောနေသော စိတ်ဝိညာဉ် ချီစွမ်းအင်များသည် ရုတ်တရက် အလုံးအရင်း ဝင်ရောက်လာသကဲ့သို့ လီကျုံးစီ၏ ခန္ဓာကိုယ်ထဲ အတင်းအကျပ် စီးဝင်နေသည်။

ရောနှောနေသော စိတ်ဝိညာဉ် စွမ်းအင်များက လီကျုံးစီ၏ ဗလာဖြစ်နေသော သွေးကြောများနှင့် ဒန်တျန်ကို လျင်မြန်စွာ ပြည့်နှက်သွားပြီး ကျင့်ကြံမှုအဆင့်က မျက်မြင်ထင်ရှားသော အရှိန်ဖြင့် မြင့်တက်လာကာ အခြေခံအုတ်မြစ်အဆင့် နှောင်းပိုင်းသို့ ချက်ချင်း ပြန်လည်ရောက်ရှိသွားသည်။ ထိုအခါမှသာ ဆေးလုံး၏ အာနိသင်များ တဖြည်းဖြည်း နှေးကွေးသွား၏။

"အံ့မခန်းပဲ။" စိတ်ဝိညာဉ် အလင်းရောင်များဖြင့် တောက်ပနေသော လီကျုံးစီကို စိုက်ကြည့်ရင်း ချန်ဟွိုက်အန်ထံမှ အာမေဍိတ်သံ ထွက်လာသည်။ "အစ်ကိုကြီး၊ ဒီချီမုန်တိုင်းဆေးလုံးကို ကျင့်ကြံသူတွေ အမြောက်အမြား ထုတ်လုပ်ဖို့ သုံးလို့ရနိုင်တယ်။"

"မင်း အိပ်မက်မက်နေတာပဲ။" ကျန်းယိပိုင် မျက်လုံးလှန်လိုက်ပြီး ချန်ဟွိုက်အန်၏ အကြံအစည်ကို ပယ်ချလိုက်သည်။ "သူ့ရဲ့ ကျင့်ကြံမှု တိုးတက်တာ အရမ်းမြန်ရတဲ့ အကြောင်းရင်းက သူ တစ်ချိန်တုန်းက ရွှေရောင်အနှစ်သာရအဆင့် ကျင့်ကြံသူ ဖြစ်ခဲ့လို့ပဲ။ တက်လှမ်းခြင်းတိုင်က ကောင်းတဲ့အရာ မဟုတ်ပေမယ့် သူ့ရဲ့ ဒန်တျန်နဲ့ သွေးကြောတွေက ရွှေရောင်အနှစ်သာရအဆင့်မှာ တကယ်ကို ရှိနေပြီးသားပဲ။ အဲဒါတွေက သူ့ရဲ့ ကျင့်ကြံမှုတွေ ပျောက်သွားတာနဲ့ ပျောက်သွားမှာ မဟုတ်ဘူး။ ချီမုန်တိုင်းဆေးလုံးရဲ့ အာနိသင်က ဗလာဖြစ်နေတဲ့ ခွက်တစ်ခုကို ပြန်ဖြည့်ပေးရုံ သက်သက်ပဲ။"

အချိန်အတော်ကြာပြီးနောက် လီကျုံးစီက မျက်လုံးများကို ဖြည်းညှင်းစွာ ဖွင့်လိုက်သည်။

သူ လက်သီးဆုပ်လိုက်ပြီး မျက်နှာတွင် မနည်းထိန်းချုပ်ထားရသော ဝမ်းမြောက်မှုများဖြင့် ပြည့်နေ၏။

"ငါ့ရဲ့ ကျင့်ကြံမှုက တကယ် ပြန်ကောင်းလာပြီ။ ဟားဟားဟား။ ငါက တက်လှမ်းသူ ပြန်ဖြစ်သွားပြီ။" သူ ကျယ်လောင်စွာ ရယ်မောလိုက်သည်။ "ငါက အခြေခံအုတ်မြစ်အဆင့် နှောင်းပိုင်းမှာပဲ ရှိသေးပေမယ့် ရွှေရောင်အနှစ်သာရအဆင့်နဲ့ သိပ်မဝေးတော့ဘူး။ ပြီးတော့ နောက်ထပ် ကျင့်ကြံမယ့် ရက်အနည်းငယ် အတွင်းမှာ အဆင့်တက်နိုင်မယ်လို့ ခံစားရတယ်။"

အောင်မြင်မှုကို မြည်းစမ်းပြီးနောက် လီကျုံးစီက ချန်ဟွိုက်အန်ကို တောက်ပသော မျက်လုံးများဖြင့် ကြည့်လိုက်သည်။

သူ ယခုလေးတင် မြည်းစမ်းခဲ့သော ဆေးလုံးကို ချန်ဟွိုက်အန်က သန့်စင်ခဲ့ခြင်းဖြစ်ပြီး သူက ချန်ဟွိုက်အန်ကို ထူးချွန်သော အဂ္ဂိရတ်ပညာရှင် တစ်ဦးအဖြစ် သတ်မှတ်ထားပြီး ဖြစ်သည်။

"စီနီယာ၊ ဒီတက်လှမ်းခြင်းဆေးလုံးက အရမ်း အစွမ်းထက်တာပဲ။ နောက်ထပ် နည်းနည်းလောက် ထပ်သောက်ကြည့်ရင် မကောင်းဘူးလား။ တစ်ချက်တည်းနဲ့ အခြေတည်ဝိညာဉ် ဒါမှမဟုတ် နတ်အသွင်ပြောင်း အဆင့်အထိ တက်လှမ်းနိုင်ရင်နိုင်မှာ။ အဲဒီအချိန်ကျရင် ကျွန်တော်တို့ ဓားနက်ဂိုဏ်း…" သူက ရုတ်တရက် ရပ်သွားပြီး အလျင်အမြန် ပြင်ပြောလိုက်သည်။ "မဟုတ်ဘူး၊ ကျွန်တော်တို့ လေဝိညာဉ်ဂိုဏ်းက တခြား ဂိုဏ်းအားလုံးကို လုံးဝ ဖယ်ရှားပစ်နိုင်မှာ။"

ချန်ဟွိုက်အန် မျက်လုံးလှန်လိုက်ပြီး ပြောစရာစကားမဲ့စွာဖြင့် ပြောလိုက်သည်။ "အဲဒါက မင်းကို အကန့်အသတ်မရှိ စွမ်းအားကြီးလာအောင် ဘယ်လိုလုပ် လုပ်ပေးနိုင်မှာလဲ။ ဒီလို ဆေးလုံးမျိုးရဲ့ အာနိသင်က သောက်လိုက်တဲ့ ဆေးလုံးတစ်လုံးစီနဲ့အမျှ လျော့နည်းသွားတာပဲ။ မင်းရဲ့ ခန္ဓာကိုယ်ဖွဲ့စည်းပုံပေါ် မူတည်ပြီးတော့ အများဆုံး ဆေးလုံး ငါးလုံးလောက်ဆိုရင် အာနိသင် မရှိတော့ဘူး။"

"ကောင်းပါပြီ။" လီကျုံးစီ သက်ပြင်းချလိုက်သည်။

သူ အကန့်အသတ်မရှိ စွမ်းအားကြီးမလာနိုင်လျှင်ပ် လက်ရှိရလဒ်များနှင့် သူ အလွန် ကျေနပ်နေလေပြီ။

လီကျုံးစီအပေါ် တက်လှမ်းခြင်းဆေးလုံး၏ မှတ်သားလောက်ဖွယ် အာနိသင်များကို မြင်ရသောအခါ အခြား တပည့်များကလည်း ဆေးလုံးကို တစ်ယောက်ပြီးတစ်ယောက် သောက်သုံးခဲ့ကြသည်။

ခဏအကြာတွင် တပည့်အများစုသည် သူတို့၏ ယခင်စွမ်းအားများကို ပြန်လည်ရရှိခဲ့ကြပြီး အချို့မှာ ယခင်ကထက်ပင် ပိုမို အစွမ်းထက်လာခဲ့ကြသည်။

နောက်တစ်ခုမှာ အတွင်းအားကျင့်စဉ် ဖြစ်သည်။

သိုင်းပညာရှင်တစ်ဦးအနေဖြင့် ကျန်းယိပိုင်က ဓား၊ လှံနှင့် တုတ်များ အပါအဝင် မည်သည့် လက်နက်ကိုမဆို သင်ကြားပေးနိုင်သည်။ သို့သော် သူသည် အတွင်းအားကျင့်စဉ်များကို ရွေးချယ်ရာတွင် ရုန်းကန်နေရသည်။ သူ၏ အတွင်းအားကျင့်စဉ်များအားလုံးသည် ဓားသိုင်းနှင့် သက်ဆိုင်နေ၍ မဟုတ်။ အဓိက ပြဿနာမှာ ဤလူများသည် ၎င်းတို့ကို ကျင့်ကြံရန် ပါရမီ လုံးဝမရှိခြင်းပင်။

"ဂိုဏ်းချုပ်၊ တောင်းပန်ပါတယ်။ ဒီအတွင်းအားကျင့်စဉ်ကို ကျွန်တော် တကယ် နားမလည်ဘူး။"

လီကျုံးစီက ကျောက်စိမ်းပြားကို ချထားလိုက်ပြီး နာကျင်ဟန်ဖြင့် ခေါင်းကို ဆုပ်ကိုင်ထားသည်။ သူက ကျောက်စိမ်းပြားပေါ်ရှိ စကားလုံးတစ်လုံးချင်းစီကို သီးခြားစီနားလည်နိုင်သော်လည်း ၎င်းတို့ကို ပေါင်းစပ် လိုက်သောအခါ မူးဝေမှုလှိုင်းတစ်ခုကို ခံစားရပြီး ခေါင်းပူထူလာသည်။

ပတ်ဝန်းကျင်ရှိ အခြားတပည့်များမှာလည်း လီကျုံးစီနည်းတူ ဖြစ်သည်။

သို့သော် ၎င်းက ကျန်းယိပိုင် ထုတ်ပေးခဲ့သော ၁၇ခုမြောက် အတွင်းအားကျင့်စဉ် ဖြစ်နေပြီ ဖြစ်သည်။

အဆင့်က တစ်ဆင့်ပြီးတစ်ဆင့် လျှော့ချထားပြီးလေပြီ။

အလယ်အလတ်အဆင့်မှ အဝါအဆင့်၊ ထို့နောက် လူသားအမြင့်ဆုံးအဆင့်အထိ လျှော့ချထားသည့်တိုင် ရလဒ်များက နားမလည်နိုင်အောင် ဖြစ်နေဆဲပင်။

လူသားအမြင့်ဆုံးအဆင့် ပစ္စည်းတစ်ခုကို ထုတ်ပေးခြင်းက အစ်ကိုကြီးကျန်း၏ ကန့်သတ်ချက် ဖြစ်သည်။

သူက ထိုထက်ပိုဆိုးသော ကျင့်စဉ်များကို မထုတ်ပေးနိုင်တော့ပေ။

ထိုရန်အမြင့်ဆုံးအဆင့် ပစ္စည်းတချို့က သူ ငယ်စဉ်က ခရီးသွားရင်း တခြားသူများ ပေးထားသော လက်ဆောင်များ ဖြစ်သည်။

"မဖြစ်နိုင်ဘူး။ ဒီလောက် ရိုးရှင်းတဲ့ကျင့်စဉ်ကို မင်းတို့တွေ ဘယ်လိုလုပ် နားမလည်နိုင်ရတာလဲ။"

ကျန်းယိပိုင်က လုံးဝ နားမလည်နိုင်အောင် ဖြစ်သွားသည်။

သူက အရာအားလုံးကို စကားလုံး တစ်လုံးချင်းစီ သေချာ ရှင်းပြခဲ့သည်။ ကျန့်ဝူ မြင့်မြတ်နယ်မြေမှ တပည့်များက မျက်လုံးမှိတ်ပြီး နားပိတ်ထားလျှင်ပင် ၎င်းကို နားလည်နိုင်သည်။

ဒါဆို ဒီလူတွေက ဘာလို့ နားမလည်နိုင်ရတာလဲ။

"ဂိုဏ်းချုပ်၊ ကျွန်တော်တို့ တကယ် နားမလည်ဘူး။ ဒီစကားလုံးတွေကို ပေါင်းစပ်လိုက်ရင် အဓိပ္ပာယ်ကို ကျွန်တော်တို့ လုံးဝ နားမလည်နိုင်တော့ဘူး။"

ကျန်းယိပိုင် အက်ကွဲသွားသည်။

ဂိုဏ်းအသစ်တစ်ခု တည်ထောင်ရာတွင် ပထမဆုံး အခက်အခဲက ဤနေရာမှာ ဖြစ်လာမည်ဟု သူ လုံးဝ မထင်ထားခဲ့ပေ။ အကြောင်းမှာ တပည့်များ၏ပါရမီက ကျောက်စိမ်းပြားများကို နားလည်ရန် မလုံလောက်၍ပင်။ ထို့ကြောင့် ကျင့်ကြံ၍ မရပေ။

တက်လှမ်းတဲ့သူတွေရဲ့ နည်းစနစ်တွေကိုပဲ ဆက်ကျင့်လို့ မဖြစ်ဘူးလေ။ ဟုတ်တယ်မလား။

ချန်ဟွိုက်အန်လည်း ဖြေရှင်းနည်းရှာရန် ကြိုးစားနေသည်။

သူက ဖုန်းကိုဖွင့်ကာ ကစားသူ သိုလှောင်အိတထဲတွင် ခဏတာ ရှာဖွေကြည့်လိုက်ရာ ရုတ်တရက် သူ၏ မျက်လုံးများ အရောင်လက်သွား၏။

《ကောင်းကင်မိစ္ဆာအတတ် (လမ်းမှန်ကျင့်ကြံသူ ဗားရှင်း》

အစ်ကိုကြီးကျန်းပေးသော အတွင်းအားကျင့်စဉ်များက နားလည်ရန် ခက်ခဲသည်။

ကောင်းကင်မိစ္ဆာအတတ်က နားလည်ရန် လုံးဝမလိုပေ။

၎င်းက ကျောက်စာတိုင်တစ်ခု သက်သက်ပင်။ မည်သို့ ကျင့်ကြံရမည်ကို မြင်လိုက်သည်နှင့် စိတ်ထဲ၌ ချက်ချင်း စွဲထင်သွားပေလိမ့်မည်။ အလွတ်ကျက်စရာပင် မလိုပေ။

ထို့အပြင် ကျန်းယိပိုင်၏ ကြီးမားလှသောခန္ဓာကိုယ်က ခန္ဓာကိုယ်ကျင့်ကြံသူတစ်ဦးနှင့် တူနေသည်။

သူ့တပည့်တွေက ခန္ဓာကိုယ်သန့်စင်ခြင်း ကျင့်စဉ်ကို လေ့ကျင့်တာ ဘာမှားနေလို့လဲ။

ဒါပေမဲ့…

တက်လှမ်းသူတွေကို လမ်းမှန်ကျင့်ကြံသူတွေလို့ ယူဆသင့်တယ် မဟုတ်လား။

အဲဒီလိုဆိုရင် "ကောင်းကင်မိစ္ဆာအတတ် (လမ်းမှန်ဗားရှင်း)"က "မိစ္ဆာဗားရှင်း"လောက် အသုံးဝင်မယ့်ပုံ မပေါ်ဘူး။

သူ၏ အကြည့်များ ကောင်းကင်မိစ္ဆာအတတ် အပေါ်သို့ ရောက်သွားရာ အသေးစိတ် မိတ်ဆက်တစ်ခု ပေါ်လာသည်။

[ ကျိရှောင် နတ်ဘုရားမိုးကြိုးက မိစ္ဆာခန္ဓာကိုယ်ကို သန့်စင်ပေးသည် ]

[ သမာဓိ မီးတောက်က တောက်ပသော မျက်လုံးများကို သန့်စင်ပေးသည် ]

[ ယင်နဲ့ယန် ပေါင်းစပ်ပြီး နဂါးကျောရိုးကို ဖွဲ့စည်းသည် ]

[ လူအများ၏ယုံကြည်မှုက ရွှေရောင်ရုပ်တုတစ်ခုကို ဖန်တီးရန် ဦးတည်စေခဲ့သည် ]

[ နေနှင့်လက ငါ၏ပခုံးများကို အလှဆင်သည်။ ကြယ်များက ငါ၏လက်ဖဝါးထဲမှာ ပျောက်ကွယ်သွားသည်။ ဤလမ်းစဉ်၏ အဆုံးတွင် မကောင်းမှုအားလုံးကို လောင်စာအဖြစ် အသုံးပြုပြီး ငါသည် ကောင်းကင်၊ မြေကြီးနှင့် မိစ္ဆာများကို သန့်စင်ပေးမည် ]

[ ကစားသူ၏ကမ္ဘာတွင် တက်လှမ်းသူများကိုပင် မိစ္ဆာများဟု သတ်မှတ်၍ ရသည်။ ကောင်းကင်နှင့် မြေကြီး၏ မျှတမှုကို ဖျက်ဆီးသူ၊ တရားမဝင်နည်းလမ်းများနှင့် စွမ်းအားကို ရယူသူ၊ ကောင်းကင်ကိုဖီဆန်ပြီး သဘာဝတရား၏ နိယာမများကို ပြောင်းပြန်လှန်သူ မည်သူ့ကိုမဆို မိစ္ဆာဟု သတ်မှတ်သည် ]

…

ဤအရာကို မြင်သောအခါ ချန်ဟွိုက်အန်၏ မျက်လုံးများ အရောင်လက်သွား၏။

တက်လှမ်းသူတွေကလည်း အခုဆို ကုန်ကြမ်းတွေ ဖြစ်နေပြီလား။

ဘာပြောစရာ ရှိဦးမှာလဲ။

"စိတ်အေးအေးထားပါ။ အစ်ကိုကြီး။ ဒီအရူးတွေရဲ့အဆင့်အထိ ကိုယ့်ကိုယ်ကိုယ် အောက်မကျခံပါနဲ့။" ချန်ဟွိုက်အန်က ကျန်းယိပိုင်၏ပခုံးကို ပုတ်ကာ ပြုံးလျက် ပြောသည်။ "ကျွန်တော့်ဆီမှာ အတော်လေး ကောင်းတဲ့ အတွင်းအားကျင့်စဉ် တစ်ခု အဆင်သင့် ရှိနေတယ်။ အဲဒါက ခန္ဓာကိုယ် သန့်စင်ဖို့ပဲ။" သူက ကောင်းကင်မိစ္ဆာကျောက်စာတိုင်ကို ထုတ်ယူကာ ကျန်းယိပိုင်၏ အရှေ့တွင် ချထားလိုက်ပြီးနောက် တပည့်များကို ပြောလိုက်သည်။

"အခုကစပြီးတော့ မင်းတို့တွေ ဒါကို ကျင့်ကြံရမယ်။ ကဲ ကျောက်စာတိုင်ကို စိုက်ကြည့်ပြီးတော့ အဓိပ္ပာယ်ကို နားလည်နိုင်မနိုင် ကြည့်လိုက်။"

လူတိုင်းက ကျောက်စာတိုင်ကို မြင်လိုက်သည့် အခိုက်အတန့်တွင် မျက်လုံးကို မခွာနိုင်တော့ပေ။ လီကျုံးစီသည် တရားထိုင်သည့် အခြေအနေသို့ပင် ဝင်ရောက်သွား၏။ ၎င်းကိုမြင်ရာ အရာအားလုံး အဆင်ပြေနေပြီဖြစ်ကြောင်း ချန်ဟွိုက်အန် သိလိုက်သည်။

"ညီလေး... မင်းရဲ့ ဒီ... ဒီမိစ္ဆာအတတ်က တော်တော်လေး စိတ်ဝင်စားစရာ ကောင်းတယ်..."

ကျန်းယိပိုင်က ကျောက်စာတိုင်မှ သူ၏အကြည့်ကို လွှဲကာ ထစ်ငေါ့စွာ ပြောလိုက်သည်။ "ပထမဆုံးအကြိမ် ကြည့်လိုက်တာနဲ့တင် ဒါက တကယ်ကို ထူးထူးဆန်းဆန်း ဖြောင့်မတ်နေသလိုပဲ။"

ချန်ဟွိုက်အန် လျှို့ဝှက်ဆန်းကြယ်စွာ ပြုံးလိုက်သည်။

ဒါက မိစ္ဆာကနေ လမ်းမှန်ကို ပြောင်းလဲသွားတာသက်သက် မဟုတ်ဘူး။

ငါက မိစ္ဆာအတတ်တွေရဲ့ ဖန်တီးရှင်လေ။

အခုကစပြီး ကောင်းကင်မိစ္ဆာအတတ်ကို ကျင့်ကြံတဲ့သူတွေ အားလုံးက ငါ့ရဲ့ လက်ပါးစေတွေ ဖြစ်လာတော့မယ်။

သစ္စာဖောက်မှာအတွက် စိတ်ပူစရာ မလိုတော့သလို အနာဂတ်အတွက်လည်း စိုးရိမ်စရာ မရှိတော့ဘူး။ ဒါကြောင့် ဒီကျင့်ကြံသူတွေကို ငါ သိထားသမျှအားလုံးကို သင်ပေးလို့ ရပြီ။

…