အခန်း ၁၂၂

အခန်း (၁၂၂) တရားမဝင် ဆေးကုသမှု၊ ဆုချီးမြှင့်မှု - လိုဏ်ဂူကောင်းကင် ပြန်လည်တည်ဆောက်ခြင်း

လင်းဟောက် တွေဝေသွားခဲ့၏။

ချင်လော့ ပြောသည်မှာ မှန်ပေသည်။

ရှန်ချင်းယန်က သူ့ကို မည်သည့်အခါကမျှ မချစ်ခဲ့ချေ။

သူ၏ တစ်ဖက်သတ် ဆန္ဒများသာ ဖြစ်လေသည်။

သူ၏ အသက်ကို ပေးဆပ်ကာ ရှန်ချင်းယန်ကို ကယ်တင်ခဲ့သောကြောင့်သာ ရှန်ချင်းယန်က သူ့ကို ကယ်တင်ခဲ့ခြင်းဖြစ်ပြီး ကျေးဇူးဆပ်ရုံမျှသာ ဖြစ်ပေသည်။

သူ့ရှေ့ရှိ ရှန်ချင်းယန်ကို ကြည့်ရင်း လင်းဟောက်၏ အမူအရာကပြောင်းလည်းသွားခဲ့၏။

[ကံကြမ္မာသားတော်၏ မကောင်းဆိုးဝါးဘက်က ပြန်လည်ပေါ်ထွက်လာပြီး ကြီးစိုးလာကာ သူ၏ ကံကြမ္မာသားတော် အဆင့်အတန်းကို ဆုံးရှုံးတော့မည် ဖြစ်ပါသည်]

ထို့နောက် ဖြစ်ပျက်ခဲ့သောအရာများကို ချင်လော့ မည်သည့်အခါကမျှ မမျှော်လင့်ထားခဲ့ချေ။

ရှန်ချင်းယန်က အမှန်တကယ်ပင် အသက်ပြန်ရှင်လာခဲ့၏။

ဤသည်က လုံးဝ အဓိပ္ပာယ်မဲ့လွန်းလှပေသည်။

"ထင်တဲ့အတိုင်းပဲ ဝတ္ထုတွေထဲက အရာတွေက အမှန်ပဲ... ရွှေးချယ်ခံထားရတဲ့သူတွေက တော်တော်လေး ခံနိုင်ရည်ရှိတာပဲ"

ရှန်ချင်းယန် အသက်ပြန်ရှင်လာရသည့် အဓိက အကြောင်းရင်းမှာ လင်းဟောက်ကြောင့် ဖြစ်လေသည်။

အကယ်၍ လင်းဟောက်ကို ပြစ်ဒဏ်ပေးမည်ဆိုပါက သူ့ကို လိုင်စင်မရှိဘဲ ဆေးကုသမှုဖြင့် စွဲချက်တင်သင့်သည်ဟု သူ ခံစားလိုက်ရ၏။

'ဘုန်း!'

ရှန်ချင်းယန်ထံမှ အားကောင်းသော စွမ်းအားတစ်ခု ပေါက်ကွဲထွက်လာပြီး လင်းဟောက်ဆီသို့ ရိုက်ခတ်သွားခဲ့လေသည်။

'ဖူး!'

လင်းဟောက်က စမ်းရေပန်းကဲ့သို့ သွေးများကို အဆက်မပြတ် အန်ထုတ်လိုက်ရပြီး ချက်ချင်းပင် ပြင်းထန်စွာ ဒဏ်ရာရကာ သေလုနီးပါး ဖြစ်သွားခဲ့ပေ၏။

ချင်လော့က ရှေ့သို့ ပြေးထွက်သွားပြီး ရှန်ချင်းယန်၏ တိုက်ခိုက်မှုကို သူ၏ ဓားဖြင့် ကာကွယ်လိုက်သည်။

သူ အသစ်စုဆောင်းထားသော လက်အောက်ငယ်သားကို ဤမျှ လွယ်ကူစွာ အသတ်ခံရအောင် သူ မည်သို့ ခွင့်ပြုနိုင်မည်နည်း။

'ဝှစ်!'

တစ်ချက်တည်းပင်... ဓားချီက လွှမ်းခြုံသွားပြီး ရှန်ချင်းယန်ကို လွင့်စင်သွားစေခဲ့လေသည်။

မြေပြင်ပေါ်သို့ ကျဆင်းသွားသော ရှန်ချင်းယန်က ချင်လော့နှင့် လင်းဟောက်ကို မုန်းတီးသော အကြည့်များဖြင့် စိုက်ကြည့်လိုက်၏။

ချင်လော့က သူမ၏ သတ်မှတ်စာရင်းတွင် နံပါတ်တစ် မဟုတ်တော့ချေ။

လင်းဟောက် ဖြစ်ကောင်းဖြစ်နိုင်ပေသည်။

"မင်းတို့ တိရစ္ဆာန်တွေ... ငါ မင်းတို့ကို မှတ်ထားမယ်... မင်းတို့အားလုံးကို ငါ သတ်မယ်!... မင်းတို့အားလုံးကို ငါ သေချာပေါက် သတ်မယ်!"

ဤသည်မှာ သူမအတွက် ကြီးမားသော အရှက်ခွဲခံရမှုတစ်ခု ဖြစ်လေသည်။

ချင်လော့နှင့် လင်းဟောက်တို့ကို ကြည့်ရင်း သူမက သူတို့၏ မျက်နှာများကို သူမ၏ နှလုံးသားထဲတွင် နက်ရှိုင်းစွာ မှတ်သားထားလိုက်၏။

"အား!"

ရှန်ချင်းယန်က ဟိန်းဟောက်လိုက်ရာ သူမ၏ အသံတွင် နက်ရှိုင်းသော နာကြည်းမှုနှင့် မုန်းတီးမှုများ ပြည့်နှက်နေခဲ့ပေသည်။

"မင်းတို့အားလုံး သေသင့်တယ်... မင်းတို့အားလုံး သေသင့်တယ်... သူတို့ကို သတ်လိုက်!"

'ဘုန်း!'

လမင်းရောင်ခြည်တစ်ခုက သူမကို လွှမ်းခြုံသွားပြီး မျက်တောင်တစ်ခတ်အတွင်းမှာပင် သူမ၏ စွမ်းအားများက ဝိညာဉ်နယ်မြေ၏ ကန့်သတ်ချက်များကို ကျော်လွန်သွားခဲ့လေသည်။

သူမက သူမ၏ အသက်ကို စတေးနေရုံသာမက လုံးဝ ဂရုမစိုက်တော့ချေ။

"မင်းက ငါ့ကို သတ်ချင်တယ်ဆိုရင် လူသားဧကရာဇ်အလံထဲ ဝင်ပြီး စကားပြောကြတာပေါ့"

ချင်လော့က ရှန်ချင်းယန် နောက်ထပ် လှည့်ကွက်တစ်ခု မလုပ်နိုင်စေရန် လူသားဧကရာဇ်အလံကို ချက်ချင်း ဖွင့်ထုတ်လိုက်၏။

ဒေါသများဖြင့် လုံးဝ လွှမ်းမိုးခံထားရပြီး ဆင်ခြင်တုံတရား ကင်းမဲ့နေသော ရှန်ချင်းယန်က အနည်းငယ်မျှ တွန့်ဆုတ်မနေဘဲ ချင်လော့၏ လူသားဧကရာဇ်အလံအတွင်းသို့ ပြေးဝင်သွားခဲ့လေသည်။

"ရှီးဟွမ်... သူမကို ဖိနှိပ်ထားလိုက်... သူမရဲ့ ဝိညာဉ်ကို လုံးဝ ဖျက်ဆီးပစ်ချင်တယ်"

'ဘုန်း!'

အားကောင်းသော ဖိနှိပ်မှု ခံစားချက်က ရှန်ချင်းယန်ကို သတိပြန်ဝင်လာစေခဲ့သော်လည်း သူမက အများကြီး ဂရုမစိုက်ခဲ့ချေ။

သူမတွင် ပန်းတိုင် တစ်ခုတည်းသာ ရှိသည်။

ထိုပန်းတိုင်မှာ ချင်လော့ကို သတ်ရန်ပင်။

ဤခန္ဓာကိုယ်နှင့် ဝိညာဉ်ကို ဖျက်ဆီးရန် သူမ ဆန္ဒရှိနေပြီး ချင်လော့ကို ဖိနှိပ်ရန် အခွင့်အရေး မရှိတော့သည်ကို မြင်ချိန်၌ သူမ၏ မျက်လုံးများတွင် ပြတ်သားသော အရိပ်အယောင်တစ်ခု ဖြတ်ပြေးသွားခဲ့လေသည်။

သူမက အတင်းအကျပ် ထိုးဖောက်ဝင်ရောက်ခဲ့၏။

ရှီးဟွမ်၏ ဖိနှိပ်မှုအောက်တွင် သူမက တစ်စက္ကန့်မျှပင် မတုံ့ဆိုင်းဘဲ မိမိကိုယ်ကိုယ် ဖောက်ခွဲလိုက်ပေသည်။

'ဘုန်း!'

နားကန်းလောက်သော ဟိန်းဟောက်သံနှင့်အတူ ချီလှိုင်းများက ချင်လော့ဆီသို့ လွှမ်းခြုံသွားခဲ့လေသည်။

သူမ၏ မိမိကိုယ်ကိုယ် ဖောက်ခွဲမှုက သူမ၏ ခန္ဓာကိုယ်တစ်ခုတည်းသာ မကဘဲ မြင့်မြတ်သော လက်နက်တစ်ခုလည်း ပါဝင်လေသည်။

မြင့်မြတ်သော လက်နက် ငါးခုကို ရှန်ချင်းယန်က ဖော်ထုတ်လိုက်၏။

သူမက တကယ့်ကို သူဌေးကြီးပင်။

ရုပ်တစ်သောင်းမြင့်မြတ်နယ်မြေ၏ အရင်းအမြစ်များကို စုဆောင်းပေးရန် သူမ ကတိပြုခဲ့သည်မှာ အံ့သြစရာ မဟုတ်ချေ။

မြင့်မြတ်သခင်ပင် မခံစားရနိုင်သော အခွင့်အရေးတစ်ခု ဖြစ်လေသည်။

သို့သော် လူသားဧကရာဇ်အလံအတွင်းတွင် ချင်လော့ကို ထိခိုက်အောင် လုပ်ရန် ကြိုးစားခြင်းက အချည်းနှီးသာ ဖြစ်ပေ၏။

ဤတစ်ကြိမ်တွင် ရှန်ချင်းယန် အမှန်တကယ် သေဆုံးသွားခဲ့ပြီ။

လုံးဝ သေဆုံးသွားခဲ့ပြီ ဖြစ်လေသည်။

တစ်ချိန်တည်းမှာပင် ငါ့စိတ်ထဲတွင် အသံတစ်သံ ထွက်ပေါ်လာခဲ့၏။

[အထက်နယ်မြေမှ ကံကြမ္မာသမီးတော်၏ နတ်ဝိညာဉ် တစ်စွန်းတစ်စကို လုံးဝ ဖျက်ဆီးသတ်ဖြတ်လိုက်ပါသည်... အောက်ပါဆုချီးမြှင့်မှုကို ရရှိပါသည် - လိုဏ်ဂူကောင်းကင် ပြန်လည်တည်ဆောက်ခြင်း (မဟာလိုဏ်ဂူကောင်းကင် ဆယ်ခုကို စတေး၍ တစ်ခုတည်းအဖြစ် ပေါင်းစပ်ခြင်း)]

[စနစ်၏ အကြံပြုချက် - အလွန်အကျွံ သတ်ဖြတ်ခြင်းကြောင့် သင်သည် အခြားသူများ၏ မျက်စိစူးစရာ ဖြစ်လာပါသည်... သင်၏ စွမ်းအားကို ဖုံးကွယ်ထားပြီး ကျားကိုဖမ်းရန် အရူးဟန်ဆောင်ကာ လိုဏ်ဂူကောင်းကင်ကို ပေါင်းစပ်လိုက်ပါ... ထိုအခါ သင်၏ တိုက်ခိုက်ရေးစွမ်းအားများ တဟုန်ထိုး တက်လာပါလိမ့်မည်]

"ဟင်!"

အထက်နယ်မြေမှ ကံကြမ္မာသမီးတော်လည်း ပါဝင်လိမ့်မည်ဟု ချင်လော့ မမျှော်လင့်ထားခဲ့ချေ။

‘အထက်နယ်မြေဆိုတာက နတ်ဘုရားနယ်မြေ ဒါမှမဟုတ် မသေမျိုးနယ်မြေနှင့် အတူတူပဲလား’

"အဲဒါက လူတော်တော်များများ ပြောနေကြတဲ့ အစွန်းရောက်နတ်ဆိုးတွေ နေထိုင်တဲ့ ကမ္ဘာပဲလား"

ချင်လော့က မေးမြန်းလိုက်၏။

[ဤလောကရှိ အစွန်းရောက်နတ်ဆိုးများဆိုသည်မှာ တူညီသောအဆင့်ရှိ အခြားကမ္ဘာများမှ ရန်သူများမျှသာ ဖြစ်ပါသည်]

ဤသည်ကို ကြားချိန်၌ ချင်လော့ နားလည်သွားခဲ့ပေသည်။

အထက်နယ်မြေဆိုသည်မှာ အဆင့် ၁ ယဉ်ကျေးမှုအထက်ရှိ အဆင့် ၂၊ အဆင့် ၃ သို့မဟုတ် အဆင့် ၅ ယဉ်ကျေးမှုများကြား ကွာခြားချက်ကဲ့သို့ တက်လှမ်းခြင်း သို့မဟုတ် အဆင့်မြင့်နယ်မြေပြီးနောက်ရှိ ကမ္ဘာနှင့် ညီမျှလေသည်။

ဤကမ္ဘာနှင့် ဝေးကွာလှသော အထက်နယ်မြေဟု ခေါ်ဆိုသော နေရာတွင် ရေခဲခေါင်းတလားတစ်ခုအတွင်း အိပ်ပျော်နေသော ခန္ဓာကိုယ်တစ်ခုက မျက်လုံးများကို ဖြည်းညင်းစွာ ဖွင့်လာခဲ့ပြီး ထိုမျက်လုံးများတွင် ရေခဲကဲ့သို့ အေးစက်မှုများ ပြည့်နှက်နေခဲ့၏။

"ငါ့ရဲ့ ဆက်ခံသူကို သတ်ပြီး ငါ့ရဲ့ နတ်ဝိညာဉ် တစ်စွန်းတစ်စကို ဖျက်ဆီးခဲ့တဲ့ မင်းတို့နှစ်ယောက် သေဖို့ အသင့်ပြင်ထား"

သူမက တိုးတိတ်စွာ ပြောဆိုလိုက်ပြီး ချင်လော့နှင့် လင်းဟောက်တို့၏ ပုံရိပ်များက အဘွားအိုတစ်ဦး၏ စိတ်ထဲသို့ ဖြတ်ပြေးသွားခဲ့လေသည်။

"ကွန်ရွှီနယ်မြေနဲ့ ဒီလူနှစ်ယောက်က ငါ့ရဲ့ အစီအစဉ်တွေကို ဖျက်ဆီးခဲ့တယ်... နတ်ဝိညာဉ်နဲ့အတူ သူတို့ကိုပါ ဖျက်ဆီးပစ်ရမယ်... လိုအပ်ရင် အတိုင်းအတာတစ်ခုအထိ စစ်ပွဲ ဆင်နွှဲနိုင်တယ်"

အဘွားအိုက မြေပြင်ပေါ်တွင် ရိုသေလေးစားစွာ ဒူးထောက်လိုက်၏။

"နတ်ဘုရားမရဲ့ အမိန့်တော်အတိုင်း နာခံပါ့မယ်"

******

ပေါက်ကွဲမှု၏ နောက်ဆက်တွဲ အကျိုးဆက်များထဲမှ ထွက်ပေါ်လာသော ရှီးဟွမ်က ချင်လော့ကို နာကြည်းသော အမူအရာဖြင့် ကြည့်ကာ ပြောဆိုလိုက်သည်။

"ဒါက ဒုတိယအကြိမ် ရှိနေပြီနော်... ရန်သူတွေကို လူသားဧကရာဇ်အလံထဲ ခေါ်လာပြီး သူတို့ဘာသာ ဖောက်ခွဲခိုင်းတာကို မင်း မရပ်နိုင်ဘူးလား... ဝိညာဉ်တော်တော်များများ သေကုန်ပြီ"

သေဆုံးသွားသော ဝိညာဉ်များစွာ ဆုံးရှုံးရခြင်းက သူမကို နာကျင်စေခဲ့၏။

လူသားဧကရာဇ်အလံ၏ အဓိက ဝိညာဉ်တစ်ခုအနေဖြင့် ထိုသေဆုံးသွားသော ဝိညာဉ်များက သူမ၏ လက်အောက်ငယ်သားများ ဖြစ်လေသည်။

တစ်ဦး သေဆုံးသွားခြင်းက သူမ၏ စွမ်းအားကို အားနည်းသွားစေပေသည်။

"စိတ်မပူပါနဲ့... ဝိညာဉ်တွေက ဆက် ရှိနေမှာပါ... ပြီးတော့ လူသားဧကရာဇ်အလံက ပိုပြီး အစွမ်းထက်လာပါလိမ့်မယ်"

သူ လှည့်ကာ သေလုနီးပါး ဖြစ်နေသော လင်းဟောက်ကို တစ်ချက်ကြည့်လိုက်ပြီး ဆေးလုံးအချို့ကို ထုတ်ယူကာ သူ့ကို တစ်ပြိုင်နက်တည်း ကျွေးလိုက်လေသည်။

ထို့နောက် ချင်လော့က သေခြင်းရှင်ခြင်းတံဆိပ်တုံးကို သူ၏ ဝိညာဉ်ထဲသို့ ထည့်သွင်းလိုက်၏။

[ကံကြမ္မာသားတော်ကို ကျွန်ပြုခြင်းဖြင့် သူ၏ ကံကြမ္မာတန်ဖိုးအားလုံးကို ရရှိမည်ဖြစ်ပြီး ထိုတန်ဖိုးများကို ဗီလိန်အမှတ်များအဖြစ် အလိုအလျောက် ပြောင်းလဲသွားပါမည်]

‘နောက်ထပ် အမှတ် ၃၀,၀၀၀ လက်ထဲ ရောက်လာပြန်ပြီ’

ချင်လော့က မေးမြန်းလိုက်သည်။

"စနစ်... အခု ငါ ကောင်းတဲ့အရာတွေ အများကြီး လဲလှယ်လို့ ရပြီလား"

[စနစ်၏ အကြံပြုချက် - မျှော်လင့်မထားသော ပြဿနာများကို ကာကွယ်ရန် ပိုင်ရှင်သည် ရရှိထားသောအရာများကို အမြန်ဆုံး စီမံသင့်ပါသည်]

ဤတစ်ကြိမ်တွင် ရရှိခဲ့သောအရာများမှာ အလွန် များပြားလှပေသည်။

ချီလင်အဆီအနှစ်သွေး၊ ချန်ယီ၏ ချီလင်လက်မောင်း သုံးဖက်၊ ပုံမှန် ချီလင်သွေးနှင့် သူတော်စင်သား​ေတာ်နှင့် သူတော်စင်မလေးတို့ထံမှ မူလအဆီအနှစ်များ ပါဝင်လေသည်။

‘ဝိုး... တော်တော်များများပဲ... ‘

သူတို့အားလုံးက ရွေးချယ်ခံရသူများ ဖြစ်ကြပြီး သူတို့ထဲမှ အများအပြားမှာ အထူး ခန္ဓာကိုယ်များကို ပိုင်ဆိုင်ထားကြကာ ချင်လော့၏ ကောင်းကင်ဝါးမြိုခြင်းနတ်ဆိုးပညာကို အခြားအဆင့်တစ်ခုသို့ မြှင့်တင်ရန် လုံလောက်ပေသည်။

"အိုး ဟုတ်သားပဲ... အဲဒီ ကြွက်စုတ်လေး လုယွင်ဖေးကိုလည်း ငါတို့ လုံးဝ အလွတ်ပေးလို့ မဖြစ်ဘူး"

"ပြီးတော့ ငါ့ရဲ့ ဉာဏ်အလင်းပွင့်လက်ဖက်ရွက်တွေကို ခိုးသွားတဲ့ လီရှောင်ဆိုတဲ့ အဲဒီခွေးကောင်ရော"

ချင်လော့က လင်းဟောက်၏ မျက်နှာကို ပုတ်လိုက်၏။

"ထတော့... အလုပ်လုပ်ရမယ့် အချိန်ရောက်ပြီ"

"သွား... လုယွင်ဖေးကို ရှာဖို့ မင်းရဲ့ ချန်းလန်သူတော်စင်ဆိုတဲ့ အဆင့်အတန်းကို အသုံးပြုပြီး ငါ့ကို ကူညီရှာပေး"

"ပြီးရင် ရှန်ချင်းယန် သေဆုံးသွားတဲ့ သတင်းကို ဖြန့်လိုက်... ဘယ်လိုပြောရမလဲ ဆိုရင်တော့... အင်း"

ချင်လော့က တစ်ခဏမျှ စဉ်းစားလိုက်ပြီး ပြောဆိုလိုက်သည်။

"လီရှောင်ဆိုတဲ့ ကောင်တစ်ယောက်က ရှန်ချင်းယန်ကို စော်ကားပြီး သတ်ပစ်လိုက်တယ်လို့ပဲ ပြောလိုက်"

"သူက တောင်တန်းတစ်သောင်းနယ်မြေရဲ့ မဟာနတ်ဆိုးဂိုဏ်းက မဟုတ်ဘူးလား... အဲဒါကို သူ လုပ်ခဲ့တာလို့ တခြားသူတွေကို ယုံကြည်သွားစေဖို့ လုံလောက်ပါတယ်"

လင်းဟောက်က ချင်လော့ကို ကြက်သေသေဖြင့် စိုက်ကြည့်နေခဲ့ပြီး သူ၏ စိတ်ထဲတွင် အတွေးတစ်ခု ဖြတ်ပြေးသွားခဲ့၏။

"ချောက်ချတာလား"

သူ ဖြောင့်မတ်ပြီး ရိုးသားသင့်သည်ဟု သူ၏ ကြီးပြင်းလာမှုက သင်ကြားပေးထားခဲ့ရာ သူက ငြင်းဆိုရန် ပြင်လိုက်ချိန်မှာပင် ချင်လော့က အရင်ဆုံး ခံစားမိသွားခဲ့လေသည်။

ချင်လော့က အေးအေးဆေးဆေး ပြောဆိုလိုက်သံကိုသာ ကြားလိုက်ရ၏။

"မင်း ရှန်ချင်းယန်ကို ဘာလုပ်ခဲ့လဲဆိုတာ ဘယ်သူ့ကိုမှ မသိစေချင်ဘူး မလား"

လင်းဟောက်က ချက်ချင်း သတိပြန်ဝင်လာပြီး ပြောဆိုလိုက်သည်။

"ဟုတ်ကဲ့ပါ အရှင်... ကျွန်တော် ချက်ချင်း လုပ်လိုက်ပါ့မယ်"

တောအုပ်ထဲတွင် လမ်းလျှောက်နေသော လီရှောင်မှာ ရုတ်တရက် အပြင်းအထန် နှာချေလိုက်လေသည်။

‘ဟတ်ချိုး!’

"ထူးဆန်းတယ်... ထူးဆန်းတယ်... ဘာအကြောင်းပြချက်မှ မရှိဘဲ ဘာလို့ ငါ ချမ်းစိမ့်စိမ့် ခံစားနေရတာလဲ"