အခန်း ၁၃၀

အခန်း (၁၃၀) ကောင်းကင်မဟာမိတ်အဖွဲ့ကို ပြန်လည်တည်ထောင်ခြင်း၊ မဟာနတ်ဆိုးဂိုဏ်း ဖျက်ဆီးခံရတော့မည်

ယင်တောက်ယန်သည် ဤခရီးက သူ၏ အမြင်များကို အမှန်တကယ် ကျယ်ပြန့်သွားစေသည်ဟု ခံစားလိုက်ရ၏။

မဟာချင်အင်ပါယာကို ဆန့်ကျင်ပြီး ဖိနှိပ်ရန် ကြိုးစားခဲ့သော သူတော်စင်မင်းသား အများအပြားကို မြင်တွေ့ခဲ့ရသည့်အပြင် နတ်ဆိုးတစ်ပါးကဲ့သို့ ဖြစ်နေသော မဟာချင်အင်ပါယာ၏ နာမည်ဆိုးဖြင့် ကျော်ကြားသော တောင်စောင့်ဘုရင်နှင့်လည်း သူ ဆုံတွေ့ခဲ့ရလေသည်။

သူက အားကောင်းသော သူတော်စင် နှစ်ပါးကို တစ်ယောက်တည်း အင်အားသုံး၍ သတ်ဖြတ်ခဲ့ပြီး စကားတစ်ခွန်းတည်းဖြင့် မြင့်မြတ်နယ်မြေအတွက် အသက်ရှင်ရန် လမ်းကြောင်းကို ဖြတ်တောက်လိုက်၏။

ဤသည်က သူ့ကို မွန်းကျပ်သွားသလို ခံစားလိုက်ရစေသည်။

သူ နှစ်ရက်ကြာ စောင့်ဆိုင်းခဲ့ပြီးနောက် နောက်ဆုံးတွင် တိကျသော သတင်းကို ရရှိခဲ့လေသည်။

ချင်လော့သည် မဟာချင်အင်ပါယာသို့ စစ်ဆေးမေးမြန်းရန် ပြန်လည်ခေါ်ဆောင်သွားခံရမည် ဖြစ်ပေ၏။

"ဟူး... ကြည့်ရတာ ဆယ်ရက်သဘောတူညီချက်က အကျုံးမဝင်တော့ဘူး ထင်တယ်... ပြီးတော့ ချင်လော့ ကိုယ်တိုင်လည်း ပြဿနာ အကြီးကြီးထဲ ရောက်နေပြီ"

ဤသတင်းကို သိရှိပြီးနောက် ယင်တောက်ယန်သည် လျှို့ဝှက်ယင်မြင့်မြတ်နယ်မြေသို့ အမြန်ပြန်သွားကာ မြင့်မြတ်သခင်နှင့် အခြားသူများကို မျှဝေရန် မစောင့်နိုင်တော့ချေ။

သူ ထွက်သွားသည့် နှစ်ရက်အတွင်း လျှို့ဝှက်ယင်မြင့်မြတ်နယ်မြေမှာ လုံးဝ သုတ်သင်ခံလိုက်ရသည်ကို တွေ့ရှိရသဖြင့် သူ အလွန် အံ့အားသင့်သွားခဲ့ရ၏။

"သူတို့ လာတုန်းက အကောင်းကြီး ရှိသေးတာကို... အခု ပြန်သွားလို့ မရတော့ဘူးလား"

သူက လျှို့ဝှက်ယင်မြင့်မြတ်နယ်မြေရှိရာသို့ အဝေးမှ လှမ်းကြည့်လိုက်ရာ ထိုနေရာတွင် ဧရာမ မီးတောက်ကြီးတစ်ခုက မြေပြင်တစ်ခုလုံးကို လွှမ်းခြုံထားသည်ကို မြင်တွေ့လိုက်ရလေသည်။

လျှို့ဝှက်ယင်မြင့်မြတ်နယ်မြေနှင့် မဝေးလှသော တောင်ထွတ်တစ်ခုပေါ်တွင် လူငယ်တစ်ဦးနှင့် အမျိုးသမီးတစ်ဦးတို့ ယှဉ်တွဲရပ်နေကြ၏။

လူငယ်က ကျယ်လောင်စွာ ရယ်မောလိုက်သည်။

"ဟားဟားဟား... နောက်ဆုံးတော့ ဖျက်ဆီးနိုင်ခဲ့ပြီ... လျှို့ဝှက်ယင်မြင့်မြတ်နယ်မြေက လူတိုင်း သေသင့်တယ်... သူတို့အားလုံး သေသင့်တယ်"

"ဆရာ... မြင့်မြတ်သခင်... အကြီးအကဲ... ညီမငယ်ယန်... စီနီယာအစ်မလျို... စီနီယာအစ်မစုန့်... စီနီယာအစ်မဝမ်... စီနီယာအစ်မလျို... စီနီယာအစ်မချီ... မြင်ကြရဲ့လား... ကျွန်တော်တို့ ကလဲ့စားချေနိုင်ခဲ့ပြီ... ကျွန်တော်တို့ ကလဲ့စားချေနိုင်ခဲ့ပြီ"

"လျှို့ဝှက်ယင်မြင့်မြတ်နယ်မြေ ဖျက်ဆီးခံလိုက်ရပြီ... ဟားဟားဟား"

စုယွီက မရပ်နိုင်အောင် ရယ်မောနေပြီး သူ၏ မျက်လုံးများတွင် မျက်ရည်များ ပြည့်လျှံလာခဲ့လေသည်။

လှပကျော့ရှင်းသော ပုံရိပ်များက သူ၏ မျက်စိရှေ့တွင် ဖြတ်ပြေးသွားပြီး သူ နာကျင်နေခဲ့၏။

သို့သော် လျှို့ဝှက်ယင်မြင့်မြတ်နယ်မြေ ပြာကျသွားသည်ကို မြင်ရခြင်းက သူ့ကို အများကြီး ပိုမို ကောင်းမွန်သွားစေခဲ့ပေသည်။

အဘိုးအိုတစ်ဦးက လျှို့ဝှက်ယင်မြင့်မြတ်နယ်မြေ အထက်ရှိ ကောင်းကင်မှ ဆင်းသက်လာပြီး စုယွီနှင့် သူ၏ အဖော်က ချက်ချင်း ရိုသေစွာ ဦးညွှတ်လိုက်ကြ၏။

"ဘိုးဘေး"

အဘိုးအိုက ခေါင်းညိတ်လိုက်ပြီး သူ၏ အကြည့်က စုယွီအပေါ်သို့ ကျရောက်သွားခဲ့သည်။

"ဒီလောက်နှစ်တွေ အများကြီး သီးသန့်ကျင့်ကြံနေခဲ့ပြီးမှ ဒီလို အဖြစ်ဆိုးမျိုး ဖြစ်လာလိမ့်မယ်လို့ ငါ ဘယ်တုန်းကမှ မတွေးမိခဲ့ဘူး... ကံကောင်းလို့ မင်းတို့နှစ်ယောက် လွတ်မြောက်လာနိုင်ခဲ့တယ်... အဲဒါကြောင့် ငါ့ရဲ့ ကွန်ရွှီမြင့်မြတ်နယ်မြေကို ဖျက်ဆီးခဲ့တာ လျှို့ဝှက်ယင်မြင့်မြတ်နယ်မြေပဲ ဆိုတာကို ငါ သိလိုက်ရတာ"

"ဒီနေ့ လျှို့ဝှက်ယင်မြင့်မြတ်နယ်မြေ ဖျက်ဆီးခံလိုက်ရပြီ... ပြီးတော့ ကွန်ရွှီမြင့်မြတ်နယ်မြေကို ပြန်လည်တည်ဆောက်ပြီး အရင်က ဂုဏ်ကျက်သရေကို ဆက်လက် ထိန်းသိမ်းရမယ်"

"စုယွီ... အခု မင်းမှာ အကောင်းဆုံး အခွင့်အရေးတစ်ခု ရှိနေပြီ... တောင်တန်းတစ်သောင်းနယ်မြေမှာ အံ့သြစရာကောင်းတဲ့ အပြောင်းအလဲတစ်ခု ဖြစ်ပေါ်ခဲ့တယ်... ကောင်းကင်တာအိုမဟာမိတ်အဖွဲ့က ပြန်လည်တည်ဆောက်မယ့် လက္ခဏာတွေ ပြသနေတယ်... တကယ်လို့ ကောင်းကင်တာအိုမဟာမိတ်အဖွဲ့သာ ပြန်ပေါ်လာရင် မဟာမိတ်အဖွဲ့ထဲက ထိပ်တန်း ပါရမီရှင်တွေကို ပြုစုပျိုးထောင်ဖို့ သူ တတ်နိုင်သမျှ အရာအားလုံးကို လုပ်လိမ့်မယ်"

"ပြီးတော့ မင်းက ကွန်ရွှီမြင့်မြတ်နယ်မြေက တပည့်ပဲ"

"အမွေဆက်ခံသူ တပည့်ဖြစ်တဲ့ မင်းကို ငါ့ရဲ့ မိတ်ဆွေဟောင်း တစ်ယောက်ဆီ ခေါ်သွားဖို့ ငါ စီစဉ်ထားတယ်... ငါ့ရဲ့ ကွန်ရွှီမြင့်မြတ်နယ်မြေက ကောင်းကင်တာအိုမဟာမိတ်အဖွဲ့ကို ပထမဆုံး ဝင်ရောက်မယ့် အဖွဲ့တွေထဲက တစ်ခု ဖြစ်လာလိမ့်မယ်"

"တပည့်က ဘိုးဘေးရဲ့ အမိန့်တော်အတိုင်း နာခံပါ့မယ်"

စုယွီက လေးနက်စွာ ပြန်လည်ဖြေကြားလိုက်၏။

သူ၏ အချိန် ရောက်လာတော့မည်ကို သူ သိရှိလေသည်။

ကောင်းကင်တာအိုမဟာမိတ်အဖွဲ့သည် ပြန်လည်တည်ဆောက်မည့် လက္ခဏာများကို အမှန်တကယ် ပြသနေပြီး မြင့်မြတ်နယ်မြေများနှင့် ဂိုဏ်းများစွာသည် အရေးကြီးသော ကိစ္စရပ်များကို ဆွေးနွေးရန် ရွှမ်ထျန်းတာအိုဂိုဏ်းသို့ သွားရောက်ရန် ဖိတ်ကြားချက်များကို ရရှိထားကြပေ၏။

ဂိုဏ်းများနှင့် မြင့်မြတ်နယ်မြေများစွာသည် ရွှမ်ထျန်းတာအိုဂိုဏ်းသို့ အပြေးအလွှား သွားရောက်ခဲ့ကြပြီး အစည်းအဝေးတစ်ခုကို ချက်ချင်း ခေါ်ယူခဲ့ကြသည်။

တက်ရောက်သူများ၏ အနိမ့်ဆုံးအဆင့်မှာ သူတော်စင်ဘုရင်အဆင့် ဖြစ်ပြီး သူတို့အထဲတွင် သေဆုံးသွားပြီဟု ကာလရှည်ကြာ ကောလာဟလ ထွက်ပေါ်နေခဲ့သော မဟာသူတော်စင်အချို့လည်း ပါဝင်လေသည်။

"တောင်တန်းတစ်သောင်းနယ်မြေက အမြဲတမ်း စည်းကမ်းမဲ့ပြီး ရှုပ်ထွေးနေတဲ့ နေရာတစ်ခု ဖြစ်ခဲ့တယ်... တခြားသူတွေကို ငါတို့ကို အနိုင်ကျင့်ဖို့နဲ့ သတ်ဖြတ်ဖို့ ခွင့်ပြုထားခဲ့တယ်... ဒါပေမဲ့ အခုတော့ တောင်တန်းတစ်သောင်းနယ်မြေက ဒီအတိုင်း ဆက်သွားလို့ မရတော့ဘူး"

"ဝိညာဉ်နယ်မြေ ဉာဏ်အလင်းပွင့်လက်ဖက်ရည်ပွဲမှာ ငါတို့ တောင်တန်းတစ်သောင်းနယ်မြေ အံ့မခန်းပါရမီရှင်များစာရင်းက ပါရမီရှင် ၂၅ ယောက် သတ်ဖြတ်ခံခဲ့ရတယ်... ဒါက တောင်တန်းတစ်သောင်းနယ်မြေအတွက် ကြီးမားတဲ့ ဆုံးရှုံးမှုပဲ"

"ငါ့ရဲ့ အနာဂတ် တာအိုသားတော် ချန်ရီလည်း ဝိညာဉ်နယ်မြေမှာ သေဆုံးသွားခဲ့တယ်... ဒါကြောင့် ရွှမ်ထျန်းတာအိုဂိုဏ်းက ငါတို့ရဲ့ အမွေအနှစ်နဲ့ အရင်းအမြစ်တွေကို တောင်တန်းတစ်သောင်းနယ်မြေကို ပေးအပ်ဖို့ ဆုံးဖြတ်လိုက်တယ်"

"လူကြီးမင်းတို့... ခေတ်က ပြောင်းလဲသွားပြီ။ နောက်လာမယ့် ခေတ်က အရမ်းအရေးကြီးလိမ့်မယ်"

"ငါတို့ရဲ့ အနာဂတ်နဲ့ တိုးတက်ဖို့ အခွင့်အရေးအတွက် ဒီကမ္ဘာက သာမန်ထက် လွန်ကဲတဲ့ အင်အားစုတွေနဲ့ ယှဉ်ပြိုင်ချင်တယ်ဆိုရင် ငါတို့ တစ်လုံးတစ်ဝတည်း ပေါင်းစည်းမှပဲ ဖြစ်နိုင်လိမ့်မယ်..."

ရွှမ်ထျန်းတာအိုဂိုဏ်း၏ ဂိုဏ်းချုပ် ချန်ဟွိုင်ရွှီးက တက်ရောက်လာသော လျှို့ဝှက်ညွှန်ကြားရေးမှူးများကို ကြည့်ကာ လေးနက်သော အသံဖြင့် ပြောဆိုလိုက်၏။

လီတောက်ယွမ်က ပထမဆုံး တုံ့ပြန်လိုက်သည်။

"ငါရဲ့ ဇီရှောင်မြင့်မြတ်နယ်မြေက မကောင်းဆိုးဝါး တာအိုအားလုံးကို တိုက်ခိုက်ဖို့ ကောင်းကင်တာအိုမဟာမိတ်အဖွဲ့ထဲ ဝင်ဖို့ လိုလားပါတယ်"

"လူကြီးမင်းတို့... မဟာချင်အင်ပါယာရဲ့ မင်းသားက ငါတို့ရဲ့ တောင်တန်းတစ်သောင်းနယ်မြေက ပါရမီရှင်တွေကို ဝိညာဉ်နယ်မြေထဲမှာ အကြောင်းပြချက်မရှိဘဲ သတ်ဖြတ်နေတယ်"

"မဟာချင်အင်ပါယာ တောင်စောင့်ဘုရင်က မြူခိုးအရိပ်မြင့်မြတ်နယ်မြေ တစ်ခုလုံးကို သုတ်သင်ပစ်လိုက်တယ်... သူတို့ အရမ်း လွန်လွန်းနေပြီ"

"ငါတို့သာ မပေါင်းစည်းဘူးဆိုရင် တစ်နေ့ကျရင် မဟာချင်အင်ပါယာက ငါတို့ရဲ့ တောင်တန်းတစ်သောင်းနယ်မြေ တစ်ခုလုံးကို သေချာပေါက် ဝါးမြိုသွားလိမ့်မယ်... ငါတို့ရဲ့ အမွေအနှစ်တွေ ပြတ်တောက်သွားတဲ့အခါ ငါတို့ရဲ့ ဘိုးဘေးတွေကို ဘယ်လို မျက်နှာပြမလဲ"

အခြားလူတစ်ဦးက ထောက်ခံလိုက်၏။

"မှန်တယ်... ချင်လော့က အရမ်း လွန်လွန်းနေပြီ... ဝိညာဉ်နယ်မြေထဲမှာ ငါ့သားကို သတ်ခဲ့တာ... ငါက မဟာချင်အင်ပါယာနဲ့ သစ္စာတိုင်တည်ထားတဲ့ ရန်သူတွေ ဖြစ်သွားပြီ"

"ပြီးတော့ အဲဒီ မဟာနတ်ဆိုးဂိုဏ်းက နတ်ဆိုးမင်းသား လီရှောင်... သူက ငါ့ရဲ့ မြင့်မြတ်နယ်မြေက သူတော်စင်မလေးကို သတ်ခဲ့ရုံတင်မကဘူး"

"သူတော်စင်မလေးကို... သူတို့ ဘယ်လောက်တောင် ရဲတင်းပြီး သူမကို စော်ကားရဲတာလဲ... မဟာနတ်ဆိုးဂိုဏ်းက လွန်လွန်းနေပြီ... ရုပ်တစ်သောင်းမြင့်မြတ်နယ်မြေက မဟာနတ်ဆိုးဂိုဏ်းကို စစ်ကြေညာဖို့ အသင့်ပဲ"

ချန်ဟွိုင်ရွှီးက ခေါင်းညိတ်လိုက်သည်။

"မှန်တယ်... မဟာနတ်ဆိုးဂိုဏ်းက မကောင်းတဲ့ ရည်ရွယ်ချက်တွေ ရှိနေပြီး ငါတို့ရဲ့ တောင်တန်းတစ်သောင်းနယ်မြေကို လိုက်လံ သတ်ဖြတ်နေတယ်"

" ငါ့ဂိုဏ်းရဲ့ တပည့် ချန်ရီကိုလည်း သူသတ်တာလို့ သံသယရှိတယ်... ငါ့ရဲ့ ရွှမ်ထျန်းတာအိုဂိုဏ်းကလည်း မဟာနတ်ဆိုးဂိုဏ်းကို စစ်ကြေညာဖို့ စီစဉ်နေတယ်"

“မဟာနတ်ဆိုးဂိုဏ်း လီရှောင် က ဉာဏ်အလင်းပွင့်လက်ဖက်ပင်ကို ခုတ်လှဲလိုက်တာက ငါတို့ရဲ့ တောင်တန်းတစ်သောင်းနယ်မြေ ဝိညာဉ်နယ်မြေရဲ့ အနာဂတ်ကို အန္တရာယ်ပြုနေတာပဲ... ငါ့ရဲ့ မြင့်မြတ်နယ်မြေက မဟာနတ်ဆိုးဂိုဏ်းကို သေချာပေါက် စစ်ကြေညာရမယ်”

"လီရှောင်က ငါ့ရဲ့ မြူခိုးမြင့်မြတ်နယ်မြေက

တပည့် လုယွင်ဖေးကို သတ်ခဲ့တယ်... ငါ မြူခိုးမြင့်မြတ်နယ်မြေကလည်း မဟာနတ်ဆိုးဂိုဏ်းကို စစ်ကြေညာတယ်”

"ငါတို့ရဲ့ သူတော်စင်ဂိုဏ်းက သူတော်စင်သားတော် လည်း လီရှောင်ရဲ့ လက်ချက်နဲ့ သေတာဖြစ်နိုင်တယ်... ငါတို့ဂိုဏ်းကလည်း မဟာနတ်ဆိုးဂိုဏ်းကို စစ်ကြေညာဖို့ စီစဉ်နေတယ်"

"စစ်ကြေညာမယ်... ပထမဆုံး မဟာနတ်ဆိုးဂိုဏ်းကို ဖျက်ဆီးပစ်... ပြီးတော့ ငါတို့ရဲ့ ကောင်းကင်တာအိုမဟာမိတ်အဖွဲ့ တည်ထောင်ခြင်းကို ကြေညာမယ်... တောင်တန်းတစ်သောင်းနယ်မြေနဲ့ ကောင်းကင်တာအိုမဟာမိတ်အဖွဲ့ကို အထင်သေးလို့ မရဘူးဆိုတာကို မဟာချင်အင်ပါယာနဲ့ တခြား အင်အားစုတွေကို သိပါစေ”

"မှန်တယ်... ဒီတိုက်ပွဲက မဟာနတ်ဆိုးဂိုဏ်း တစ်ခုလုံးကို သုတ်သင်ပစ်ရမယ်... ပြီးတော့ ငါတို့ လုပ်နေတုန်းမှာပဲ နတ်ဆိုးဂိုဏ်းနဲ့ တခြားအရာတွေကိုပါ ဖျက်ဆီးပစ်ရမယ်... ဒါမှ ဒီအစွန်းရောက်နတ်ဆိုးတွေရဲ့ အမွေအနှစ်တွေ လုံးဝ ပြတ်တောက်သွားမှာ"

လူအုပ်ကြီးက ဒေါသထွက်နေကြပြီး မဟာနတ်ဆိုးဂိုဏ်းနှင့် လီရှောင်တို့မှာ သူတို့၏ စိတ်ခံစားမှုများအတွက် ထွက်ပေါက် ဖြစ်လာခဲ့လေသည်။

"ကောင်းပြီ... အခု လူတိုင်း သဘောတူပြီဆိုတော့ ကောင်းကင်တာအိုမဟာမိတ်အဖွဲ့ကို တရားဝင် တည်ထောင်လိုက်ပြီ"

"တစ်ချိန်တည်းမှာပဲ အဲဒါကို ကမ္ဘာကြီးကို ကြေညာလိုက်"

"မဟာနတ်ဆိုးဂိုဏ်းက ဝံပုလွေလို ရည်မှန်းချက်တွေကို မွေးမြူထားတယ်... သူ့ရဲ့ နတ်ဆိုးသားတော် လီရှောင်က ဉာဏ်အလင်းပွင့်လက်ဖက်ပင်ကို ခုတ်လှဲတယ်... တောင်တန်းတစ်သောင်းနယ်မြေ ဝိညာဉ်ရေးရာ အခြေခံအုတ်မြစ်ကို ဖျက်ဆီးတယ်... ပြီးတော့ ရုပ်တစ်သောင်းမြင့်မြတ်နယ်မြေကလူကို လူသတ်တယ်"

"သူတော်စင်မလေး ရှန်ချင်းယန်၊ ရွှမ်ထျန်းတာအိုဂိုဏ်း တာအိုသားတော် ချန်ရီ၊ မြူခိုးမြင့်မြတ်နယ်မြေ လုယွင်ဖေးနဲ့ တခြားသူတွေကိုသတ်ပြီး တောင်တန်းတစ်သောင်းနယ်မြေရဲ့ အနာဂတ်ကို ဖျက်ဆီးဖို့ ရည်ရွယ်နေတယ်"

"ဒီနေ့ကစပြီး ကောင်းကင်တာအိုမဟာမိတ်အဖွဲ့က မဟာနတ်ဆိုးဂိုဏ်းကို စစ်ကြေညာတယ်... အဲဒါက သေတဲ့အထိ တိုက်ရမယ့် စစ်ပွဲပဲ"

"မဟာနတ်ဆိုးဂိုဏ်းကို ကူညီရဲတဲ့ ဘယ်ဂိုဏ်းမဆို ကောင်းကင်တာအိုမဟာမိတ်အဖွဲ့ရဲ့ ရန်သူပဲ"

"တစ်ချိန်တည်းမှာပဲ ငါတို့က မဟာချင်အင်ပါယာကို ဆန္ဒပြတယ်... ငါတို့ရဲ့ တောင်တန်းတစ်သောင်းနယ်မြေကို အကြောင်းပြချက်မရှိဘဲ သတ်ဖြတ်ခဲ့တဲ့သူတွေကို ပြင်းပြင်းထန်ထန် အပြစ်ပေးဖို့ သူတို့ကို တောင်းဆိုတယ်"

ဤအရာက လုံးဝ လမ်းလွဲသွားခဲ့၏။

ဤအဖြစ်အပျက်ကို စတင်ခဲ့သူအနေဖြင့် ချင်လော့သည် တောင်တန်းတစ်သောင်းနယ်မြေမှ ထွက်ခွာသွားပြီး မဟာချင်အင်ပါယာ၏ နယ်မြေထဲသို့ ဝင်ရောက်သွားခဲ့ပြီ ဖြစ်လေသည်။

သတင်းကို ကြားရချိန်၌ သူ အံ့အားသင့်သွားပြီး သူ၏ မျက်နှာပေါ်တွင် ထူးဆန်းသော အမူအရာတစ်ခု ပေါ်လာခဲ့၏။

"အစ်ကိုလီရှောင်... မင်းကို ဒုက္ခပေးမိတဲ့အတွက် ငါ တောင်းပန်ပါတယ်"

"မင်းရဲ့ ကိုယ်ပိုင် စွမ်းအားနဲ့ မင်းက မဟာနတ်ဆိုးဂိုဏ်း တစ်ခုလုံးကို ဒုက္ခ ဖြစ်သွားစေခဲ့တယ်... မင်းက မဟာနတ်ဆိုးဂိုဏ်းရဲ့ သမိုင်းမှတ်တမ်းတွေမှာ မှတ်တမ်းတင်ခံရဖို့ ကံပါလာတာပဲ"

"ဒါပေမဲ့ ကောင်းကင်တာအိုမဟာမိတ်အဖွဲ့ တည်ထောင်ခြင်းက မဟာချင်အင်ပါယာအတွက် ကောင်းတဲ့အရာ မဖြစ်နိုင်ဘူး... ပြီးတော့ စစ်ပွဲက ဖြစ်လာတော့မယ့် အနေအထားမှာ ရှိနေတယ်"

မဟာနတ်ဆိုးဂိုဏ်းအတွင်းတွင် လီရှောင်က လက်ဖက်ရွက်များအားလုံးကို ဆန္ဒမရှိဘဲ ထုတ်ယူကာ မဟာနတ်ဆိုးဂိုဏ်း၏ ခေါင်းဆောင်များကို ပေးအပ်လိုက်လေသည်။

လူအနည်းငယ်က တစ်ငုံသောက်လိုက်ပြီး တာအိုလက်ဖက်ရည်၏ အံ့ဖွယ်များကို အရသာခံရန် မျက်လုံးများကို မှိတ်လိုက်ကြ၏။

လီရှောင်က တာအိုလက်ဖက်ရည်ကို ချက်ချင်း တစ်ငုံတည်း သောက်လိုက်သည်။

သူ၏ ကျင့်ကြံမှုအဆင့်က နိမ့်ကျသဖြင့် အာနိသင်များကို ပို၍ ခံစားရလေသည်။

သို့သော် နောက်တစ်စက္ကန့်တွင် ထိုခံစားချက်ကို အပြည့်အဝ နားမလည်နိုင်မီမှာပင် သူ၏ ခေါင်းနောက်ဘက်သို့ ပြင်းထန်သော ရိုက်ချက်တစ်ခု ကျရောက်လာခဲ့၏။

"ဆက်သောက်နေလိုက်... မင်းအမေကြီးတော်ကို ဆက်သောက်နေလိုက်!"

" ခွေးကောင်... မင်း ... မင်းက ငါတို့ မဟာနတ်ဆိုးဂိုဏ်းကို ဖျက်ဆီးလိုက်တာ!"

"သေစမ်း... မြန်မြန်... မြန်မြန်...!"