အခန်း ၇၈

အခန်း (၇၈) - ရေခဲအစွယ်ကျားဖြူ

အစီအရင်တောင်ထွတ်…

ကျောက်မင်ယဲ့သည် အတိတ်ပြန်ပြောင်းအင်းကွက်ကို ပြင်ဆင်ထားသည့် သူ၏အခန်းတွင်း၌ ရှိနေလေသည်။

အင်းကွက်၏ အလယ်ဗဟိုတည့်တည့်တွင် လော့ဖန်းပိုင် ရှိနေလေသည်။

သူသည် အချည်ခံထားရပြီး သတိလစ်မေ့မြောနေချေသည်။

ကျောက်မင်ယဲ့က အင်းကွက်ကို စတင်လှုပ်ရှားစေလိုက်ရာ အလင်းတန်းတစ်ခု ပွင့်ထွက်လာပြီးနောက် ၎င်းမှ ပေါ်ထွက်လာသော ပုံရိပ်များကို စောင့်ကြည့်လိုက်တော့သည်။

ပထမဦးစွာ သူသည် သွေးအန်နေသော ဖြူဖျော့ဖျော့ ကလေးငယ်တစ်ဦးကို မြင်လိုက်ရသည်။

အခြေအနေက အလွန်ဆိုးရွားလာသောအခါ လော့ဖန်းပိုင်သည် အိမ်ထဲမှ ပြေးထွက်သွားလေတော့သည်။

မျက်နှာဖုံးနက်စွပ်ထားသော လူတစ်ယောက်က သူ့ထံသို့ ချဉ်းကပ်လာခဲ့သည်။

ထိုသူက နတ်ဆေးလုံးအချို့ဖြင့် ကူညီရန် ကမ်းလှမ်းခဲ့သည်။

၎င်းကို တုံ့ပြန်သောအားဖြင့် လော့ဖန်းပိုင်သည် ကြာနက်ဂိုဏ်း၏ ဂိုဏ်းခွဲတစ်ခု တည်ထောင်ရန် ကူညီပေးရမည် ဖြစ်သည်။

ဂိုဏ်းသားများ ပိုမိုများပြားလာပါက သူသည် ဆေးလုံးများကို ပိုမိုရရှိနိုင်မည်ပင်။

သူ၏သားဖြစ်သူ ထိုဆေးလုံးကို သောက်သုံးလိုက်သောအခါ ဆေးစွမ်းပြလေသည်။

ကလေးငယ်မှာ သွေးမအန်တော့သော်လည်း ပြင်းထန်သော ဘေးထွက်ဆိုးကျိုး ရှိနေခဲ့လေသည်။

လော့ဖန်းပိုင်မှာ ဗျာများသွားသော်လည်း ဤသည်မှာ မိမိ၏သား အသက်ရှင်သန်နိုင်မည့် တစ်ခုတည်းသောအခွင့်အရေး ဖြစ်သောကြောင့် ဆက်လက်လုပ်ဆောင်ရန် ဆုံးဖြတ်လိုက်ရလေသည်။

ထို့နောက်တွင်မူ လင်းဖန်နှင့် စွန်းဟိုင်တို့ ရောက်ရှိလာခဲ့ကြသည်။

ကျန်ရှိသည့် အကြောင်းအရာများမှာကား ဖြစ်ပျက်ခဲ့ပြီးသား ဖြစ်ပေသည်။

ကျောက်မင်ယဲ့သည် လော့ဖန်းပိုင် တည်ထောင်ထားခဲ့သော ကြာနက်ဂိုဏ်းခွဲ၏ တည်နေရာကို လျင်မြန်စွာ မှတ်သားလိုက်သည်

ဤသည်မှာ ချင်ဖုန်းဂိုဏ်းအနေဖြင့် ၎င်းတို့ကို ပြန်လည်ကလဲ့စားချေရန် အခွင့်အရေးပင် ဖြစ်သည်။

အထူးသဖြင့် အရေခွံရုပ်သေးတျောင် ပြုလုပ်သွားခဲ့သည့် ကိစ္စရပ်များပြီးနောက်တွင် ဖြစ်ပေသည်။

ကျောက်မင်ယဲ့သည် အချိန်ဆွဲမနေဘဲ သူရှာဖွေတွေ့ရှိထားသည်များကို ချင်းယန်ဇီထံသို့ လျင်မြန်စွာ တင်ပြလိုက်လေသည်။

“ဂိုဏ်းချုပ်ကြီး... ဒါက ဂိုဏ်းခွဲရဲ့ တည်နေရာပါခင်ဗျာ”

ချင်းယန်ဇီက ထိုတည်နေရာကို ကြည့်ရှုကာ စဉ်းစားတွေးတောနေသည်။

၎င်းမှာ တောင်တန်းဂူတစ်ခုအတွင်း တည်ရှိနေခြင်း ဖြစ်သည်။

ကျောက်ချင်းယင်သည် စိတ်မရှည်တော့ဘဲ ထွက်ခွာရန် အဆင်သင့် ဖြစ်နေချေပြီ။

“ဘာကို စောင့်နေတာလဲ။ အဲဒီမိစ္ဆာဂိုဏ်းသားအားလုံးကို သွားသတ်ကြရအောင်”

ချင်းယန်ဇီက စိုးရိမ်တကြီး တားဆီးလိုက်သည်။

“ချင်းယင်... စိတ်လိုက်မာန်ပါ မလုပ်တာ အကောင်းဆုံးပဲ။ အရေခွံရုပ်သေးတျောင် လုပ်သွားတဲ့ကိစ္စပြီးကတည်းက သူတို့က အရင်ကထက် ပိုပြီးတော့ ပါးနပ်လာတာကို မင်း သိထားသင့်တယ်။ ဒါက သူတို့ရဲ့ နောက်ထပ်ထောင်ချောက်တစ်ခုလည်း ဖြစ်နေနိုင်တယ်”

ကျောက်ချင်းယင်က ပြန်မေးလိုက်သည်။

“ဒါဆိုရင် ဘာလုပ်သင့်လဲ။ သူတို့ကို ဒီအတိုင်း လွှတ်ထားလိုက်ရမှာလား”

အကယ်၍ ဤသည်မှာ ချင်ဖုန်းဂိုဏ်းကို ခြုံခိုတိုက်ခိုက်ရန် ဆိုးယုတ်သော အကြံအစည်တစ်ခု ဖြစ်ခဲ့ပါက ၎င်းမှာ အလွန်ပြီးပြည့်စုံသော အကြံအစည်ပင် ဖြစ်ပေလိမ့်မည်။

ချင်ဖုန်းဂိုဏ်းအနေဖြင့်လည်း ထိုဂိုဏ်းခွဲရှိနေသည်ကို မသိကျိုးကျွံပြုကာ လျစ်လျူရှုထား၍ မရနိုင်ချေ။

သို့သော် အထဲသို့ ဝင်ရောက်သွားပါက ကြာနက်ဂိုဏ်း၏ ခြုံခိုတိုက်ခိုက်မှုကို ခံရနိုင်သလို ဂူအတွင်း၌ မည်သည့်အရာက စောင့်ကြိုနေသည်ကိုလည်း မသိနိုင်ပေ။

ချင်းယန်ဇီသည် နက်ရှိုင်းစွာ စဉ်းစားတွေးတောပြီးနောက် နောက်ဆုံးတွင် ဆုံးဖြတ်ချက်တစ်ခု ချမှတ်လိုက်လေသည်။

“တပည့်တချို့ကို ခေါ်သွားပါ။ ဒါပေမဲ့ အထဲကို အနက်ကြီးအထိ မဝင်ပါနဲ့။ ဂိုဏ်းခွဲကို ရှင်းလင်းတဲ့အလုပ်ကိုတော့ တပည့်တွေကိုပဲ လုပ်ခိုင်းလိုက်ပါ။ မင်းတို့ကိုယ်တိုင်က သူတို့ရဲ့ပစ်မှတ် ဖြစ်နေနိုင်တဲ့အတွက် သတိအမြဲထားပါ”

ကျောက်ချင်းယင်က သဘောတူလိုက်သည်။

ဤသည်မှာ ကြာနက်ဂိုဏ်း ပြုလုပ်လေ့ရှိသော အစီအစဉ်မျိုး ဖြစ်ပုံရသည်။

အဆိုးရွားဆုံးအချက်မှာ ချင်ဖုန်းဂိုဏ်းအနေဖြင့် တစ်စုံတစ်ရာ ပြန်လည်တုံ့ပြန်ရန် မဖြစ်မနေ လိုအပ်နေခြင်းပင်။

…

နောက်တစ်နေ့…

လင်းဖန်သည် ခန္ဓာကိုယ်ကြံ့ခိုင်ရေးတောင်ထွတ်တွင် သူ၏လေ့ကျင့်မှုများကို ပြီးဆုံးအောင် ပြုလုပ်ပြီးနောက် သစ်လုံးအိမ်လေးဆီသို့ ချက်ချင်း ပြန်လာခဲ့သည်။

သူ့အတွက်မူ တောအုပ်အတွင်းသို့ သွားရောက်ကာ မိစ္ဆာအမြုတေကို ရှာဖွေရမည့်အချိန် ရောက်ရှိလာခဲ့ပြီ ဖြစ်သည်။

လာမည့် လပြည့်ညမှာ နီးကပ်လာနေပြီ ဖြစ်သဖြင့် စီမာလျန်ထံသို့ မိစ္ဆာအမြုတေ ရောင်းချမည့် အခွင့်အရေးကို မလွတ်တမ်း ဆုပ်ကိုင်လိုလှသည်။

လမ်းခရီးတစ်လျှောက်တွင် သူသည် ထူးထူးခြားခြား မည်သည့်အရာနှင့်မျှ မကြုံတွေ့ခဲ့ရချေ။

ယခင်က သစ်ပင်များ ခုတ်လှဲစဉ်တွင် ၎င်းတို့၏ အသိုက်များကို ဖျက်ဆီးခဲ့သောကြောင့် ရှဉ့်ကလေးများမှာ သူ့အပေါ် ဒေါသထွက်နေကြဆဲပင်။

ထို့ကြောင့် သူသည် တောနက်ပိုင်းအတွင်းသို့ ပိုမိုဝင်ရောက်သွားရန်သာ ရွေးချယ်စရာ ရှိတော့သည်။

သူ၏ကိုယ်ပေါ်ရှိ အမွှေးအမျှင်များ ထောင်ထလာသည်ကို ခံစားလိုက်ရသောအခါ သားရဲရှိရာနှင့် နီးကပ်နေပြီ ဖြစ်ကြောင်း သိရှိလိုက်လေသည်။

နွေဦးရာသီ၏ အလယ်ပိုင်းသို့ ရောက်ရှိနေပြီဖြစ်သော်လည်း ပတ်ဝန်းကျင်တစ်ခုလုံးရှိလေထုမှာမူ အလွန်အမင်းအေးစိမ့်ကာ ခြောက်ခြားဖွယ် ကောင်းနေချေသည်။

ထိုစဉ် တစ်စုံတစ်ယောက် သို့မဟုတ် တစ်စုံတစ်ခုက သူ့ကို စောင့်ကြည့်နေသည်ဟု လင်းဖန် ခံစားလိုက်ရသည်။

တစ်စုံတစ်ရာက သူ့နောက်သို့ လိုက်ပါကာ လှမ်းကြည့်နေပုံရသည်။

သူသည် တောယုန်၏ အကြားအာရုံကို ချက်ချင်းအသက်သွင်းလိုက်ပြီး အာရုံစူးစိုက်ကာ နားစွင့်လိုက်လေသည်။

ပထမဦးစွာ သစ်ရွက်များ လှုပ်ရှားသွားသည့် တရှဲရှဲအသံကို သူ ကြားလိုက်ရသည်။

ပုရစ်တောင်ပံခတ်သံများနှင့်အတူ ခြေသံအချို့ ထွက်ပေါ်လာလေသည်။

ထိုခြေသံများမှာ အလွန်ပင် ညင်သာလှသဖြင့် သာမန်လူသားတစ်ဦးဆိုပါက ကြားနိုင်မည်မဟုတ်ချေ။

ထို့နောက် တိုးညှင်းသော ဟိန်းဟောက်သံ ခပ်အုပ်အုပ်ကို သူ ကြားလိုက်ရပြန်သည်။

လင်းဖန်သည် သားရဲရှိရာ အရပ်ဆီသို့ လှည့်ကြည့်လိုက်သည်။

မကြာမီပင် သူ၏ ထွက်သက်ဝင်သက်များမှာ ဖြူလွလွ မြူခိုးများအဖြစ် ပြောင်းလဲသွားသည်ကို မြင်လိုက်ရသည်။

ပတ်ဝန်းကျင်၏ အပူချိန်မှာ ရုတ်ချည်း ထိုးကျသွားလေသည်။

သားရဲကြီး ခုန်အုပ်လိုက်သောအသံကို လင်းဖန် ကြားလိုက်ရပြီးနောက် ဖြူဖွေးသော အလင်းတန်းတစ်ခုက သူ့ဆီသို့ တဟုန်ထိုး ပြေးဝင်လာချေသည်။

လင်းဖန်၏ စိတ်အာရုံထဲတွင် ရင်းနှီးလှသော စနစ်အသိပေးသံ ထွက်ပေါ်လာသည်။

[ဒင်]

[ယုတ်မာသော ရည်ရွယ်ချက်ရှိသည့်ဝိညာဉ် ချဉ်းကပ်လာနေသည်ကို ရှာဖွေတွေ့ရှိပါသည်။]

[ကလဲ့စားချေအမှတ် ၈၀ ရရှိရန် ယုတ်မာသော ရည်ရွယ်ချက်ရှိသူကို သုတ်သင်ပါ]

ရေခဲအစွယ်ကျားဖြူမှာ မြန်ဆန်လွန်းလှသဖြင့် လင်းဖန်မှာ တုံ့ပြန်ရန်ပင် အချိန်မရလိုက်ချေ။

သူသည် လက်နှစ်ဖက်ကိုမြှောက်ကာ ကာကွယ်ရန်သာ တတ်နိုင်တော့သည်။

ကျားလက်သည်းများက လင်းဖန်၏ အရေပြားကို ကုတ်ခြစ်သွားသော်လည်း နက်နက်ရှိုင်းရှိုင်း ဝင်မသွားနိုင်ခဲ့ပေ။

လင်းဖန်၏ ခန္ဓာကိုယ်ကြံ့ခိုင်ရေးကျင့်စဉ်က ၎င်း၏ချီကို အသုံးပြု၍ အရေပြားအား သံမဏိကဲ့သို့ မာကျောစေရန် အထောက်အကူပြုပေးထားသောကြောင့် ဖြစ်လေသည်။

သားရဲကြီးအား အခွင့်အရေးမပေးဘဲ လင်းဖန်က ၎င်း၏ မျက်နှာတည့်တည့်သို့ ခပ်ပြင်းပြင်း ကန်လွှတ်လိုက်သည်။

ကျားကြီးမှာ လေထဲ၌ ရောက်နေသဖြင့် မရှောင်တိမ်းနိုင်တော့ဘဲ ကန်ချက်ကို အရှိန်အပြည့်ဖြင့် ခံလိုက်ရလေသည်။

၎င်းသည် နောက်သို့ လွင့်စင်သွားကာ သစ်ပင်ပင်စည်များနှင့် ပြင်းထန်စွာ ဆောင့်မိသွားတော့သည်။

ကျားကြီး ပြန်လည်မတ်တတ်ရပ်လာသောအခါ အေးစက်လှသော အစွယ်များကိုထုတ်ပြရင်း ပါးစပ်မှ မြူဖြူများကို မှုတ်ထုတ်နေလေသည်။

လင်းဖန်သည် ဤအခွင့်အရေးကို အသုံးချ၍ သူ၏ တူများကို ဆွဲထုတ်လိုက်သည်။

ကျားကြီးသည် လင်းဖန်ကို စိုက်ကြည့်ကာ နောက်ထပ် အခွင့်အလမ်းကို စောင့်ဆိုင်းနေသည်။

လင်းဖန်တစ်ယောက် မိမိချဉ်းကပ်လာသည်အား မည်သို့ ကြိုတင်သိရှိနေသည်ကို လုံးဝ နားမလည်နိုင် ဖြစ်နေလေသည်။

ထိုအတောအတွင်း လင်းဖန်သည် မိမိ၏ချီများကို တူများအတွင်းသို့ ပို့လွှတ်လိုက်သည်။ ထို့နောက် ကျားကြီးဆီသို့ တဟုန်ထိုး ပြေးဝင်သွားတော့သည်။

ကျားကြီးက ရှေ့လက်သည်းဖြင့် လင်းဖန်ကို ရိုက်ထုတ်ရန် ကြိုးစားလိုက်သည်။

ခလွမ်း…

လင်းဖန်သည် ယန်ရိုက်ချက်ကို အသုံးပြု၍ ၎င်း၏ ရှေ့လက်သည်းကို ရိုက်ချိုးပစ်လိုက်သည်။

ကျားကြီးမှာ နာကျင်စွာဖြင့် အော်ဟစ်လိုက်လေသည်။

၎င်းက အစွယ်များကို ပြန်လည်ထုတ်ပြကာ လင်းဖန်၏ လည်ပင်းကို ကိုက်ခဲရန် ကြိုးစားပြန်သည်။

လင်းဖန်က ခြေမြန်စွမ်းရည်ကို အသုံးပြု၍ ဘေးသို့ ရှောင်တိမ်းလိုက်ရာ ပြာလဲ့လဲ့အလင်းရောင်တစ်ခုအဖြစ် ပြောင်းလဲသွားသည်။

ကျားကြီး၏ဘေးဘက်သို့ ရောက်သွားသည်နှင့် လင်းဖန်သည် မဆိုင်းမတွဘဲ အခြားတူတစ်လုံးကို အောက်မှအထက်သို့ ပင့်တင်ကာ ၎င်း၏မေးစေ့ဆီသို့ လွှဲရိုက်လိုက်လေသည်။

ဒုန်း…

ထိုတိုက်ခိုက်မှုက ကျားကြီး၏ မေးစေ့ကို တည့်တည့်ထိမှန်သွားပြီး ပြင်းထန်သော ဒဏ်ရာကြောင့် ၎င်း၏အာရုံများ ဝေဝါးသွားချေသည်။

၎င်းသည် မြေပြင်ပေါ်၌ ထိုင်လျက် ခေါင်းကို ခါယမ်းကာ သတိပြန်ဝင်လာစေရန် ကြိုးစားနေလေသည်။

သို့သော် လင်းဖန်ကမူ နောက်ထပ် တိုက်ကွက်တစ်ခုအတွက် အသင့်ဖြစ်နေပြီ ဖြစ်သည်။

ယင်ယန် ကြက်ခြေခတ်ရိုက်ချက်…

သူသည် တူနှစ်ဖက်လုံးဖြင့် ကျားကြီး၏ ဗိုက်ကို အားပြင်းစွာ ရိုက်ချလိုက်တော့သည်။

ယင်နှင့်ယန်ချီတို့က ဗိုက်သားပေါ်တွင် ဓာတ်ပြုသွားသောအခါ ကျားကြီးမှာ စူးစူးဝါးဝါး အော်ဟစ်လိုက်ရချေသည်။

ဖုန်း…

၎င်း၏ ဗိုက်ကြီးမှာ ပေါက်ကွဲသွားလေတော့သည်။

ကလီစာများမှာ ဘေးပတ်ပတ်လည်သို့ လွင့်စင်ပျံနှံ့သွားလေသည်။

ယခုအခါ လင်းဖန်သည် ဤမြင်ကွင်းကို ကျင့်သားရနေပြီဖြစ်ရာ ဝတ်ရုံပေါ်တွင် ပေကျံသွားသော အရာများကို ခါထုတ်ပစ်လိုက်ရုံသာ ပြုလုပ်လိုက်သည်။

လင်းဖန်၏ စိတ်ထဲ၌ ရင်းနှီးသော အသံတစ်ခု ထွက်ပေါ်လာပြန်သည်။

[ဒင်၊ ယုတ်မာသော ရည်ရွယ်ချက်ရှိသူကို သုတ်သင်နိုင်ခဲ့သည့်အတွက် ဂုဏ်ယူပါသည်]

[ကလဲ့စားချေအမှတ် + ၈၀]

[လက်ရှိ ကလဲ့စားချေအမှတ် - ၄၁၀]

လင်းဖန်သည် ၎င်း၏ပုဆိန်ဖြင့် ကျားကြီး၏ ခန္ဓာကိုယ်ကို လျင်မြန်စွာခွဲလိုက်ပြီး နှလုံးသားဆီသို့ လက်လှမ်းလိုက်သည်။

အတန်ငယ် ကြိုးစားလိုက်ပြီးနောက် သူသည် မိစ္ဆာသားရဲအမြုတေကို အောင်မြင်စွာ ဆွဲထုတ်နိုင်ခဲ့သည်။

၎င်းမှာ ရေခဲပြာရောင်ရှိပြီး အလွန်အေးစက်သော ခံစားချက်ကို ပေးစွမ်းနေလေသည်။

သေချာ ကြည့်ရှုလိုက်ပါက အမြုတေအတွင်း၌ ကျားကြီး၏ ပုံရိပ်လွှာကို ဝိုးတိုးဝါးတား မြင်တွေ့နိုင်ပေသည်။

ယခုအခါ သူသည် ပထမအဆင့်ကို ပြီးမြောက်သွားပြီဖြစ်ပြီး သူ၏ တူများကို အဆင့်မြှင့်တင်ရန် နောက်ထပ် အဆင့်နှစ်ဆင့်သာ လိုတော့ပေသည်။