အခန်း ၇၀၉

အခန်း (၇၀၉) - တာအိုနယ်ပယ်အတွင်း နှစ်ပေါင်း နှစ်ရာ့သုံးဆယ့်လေးနှစ်ကြာ ကျင့်ကြံပြီးနောက် မာရှီချင်း မိစ္ဆာဝင်ပူးခြင်း (အပိုင်း ၂)

ကျင့်ကြံခြင်း အဆင့်အတန်းချင်း တူညီနေမည်ဆိုပါက သူတို့ကိုယ်သူတို့ တာအိုသားတော်၊ အင်ပါယာမင်းသမီး၊ သို့မဟုတ် သူတော်စင်အမျိုးသမီးဟု အမည်ခံထားစေကာမူ ဘာများ ထူးခြားသွားမည်နည်း။

စုယွီအနေနှင့် မိမိက ထိုလူများထက် နိမ့်ကျနေမည် မဟုတ်ကြောင်း ခံစားလိုက်ရ၏။

ဤသို့ တွေးတောနေစဉ် စုယွီ၏ ရင်တွင်း၌ စိတ်ဓာတ်ခွန်အားများ ရုတ်တရက် လှိုင်းထန်လာတော့သည်။

သို့သော်ငြား မကြာမီမှာပင် စုယွီသည် ရွှေပုစဉ်းရင်ကွဲ ကျင့်စဉ်ကို လည်ပတ်စေလိုက်၏။ သူ၏ စိတ်အာရုံကို ရှင်းလင်း ဗလာကျင်းသွားစေပြီးနောက် တည်ငြိမ်မှုဆီသို့ ပြန်လည်ရောက်ရှိသွားကာ သူ၏ အတွေးများကို လုံးဝ အေးချမ်းသွားစေလိုက်သည်။

သူ၏ လက်ရှိ ကျင့်ကြံခြင်း အဆင့်အရဆိုလျှင် မောက်မာဝင့်ကြွားရမည့် အချိန် မရောက်သေးချေ။

'ငါ ဆက်ပြီး ကြိုးကြိုးစားစား ကျင့်ကြံနေဖို့ လိုသေးတာပဲ... ငါ့ရဲ့ စွမ်းအားနဲ့ ကျင့်ကြံခြင်းကို မြှင့်တင်ရဦးမယ်...'

'အခု မူလဝိဉာဉ် နယ်ပယ် စတုတ္ထအဆင့်ကို ရောက်နေပြီ ဆိုပေမယ့် ဝိညာဉ်ခွဲထွက် နယ်ပယ်နဲ့ သိပ်မဝေးတော့ဘူး... ဒါပေမဲ့ ဝိညာဉ်ခွဲထွက် နယ်ပယ်နဲ့ ကိုက်ညီတဲ့ ကျင့်စဉ်တွေ ငါ့ဆီမှာ သိပ်များများစားစား မရှိသေးဘူး...'

စုယွီက တည်ငြိမ်စွာ စဉ်းစားသုံးသပ်လိုက်၏။ သူသည် ကြိုတင် ပြင်ဆင်ထားရန် လိုအပ်ပြီး ဝိညာဉ်ခွဲထွက် နယ်ပယ်၏ အမွေအနှစ်များကို ပိုမို စုဆောင်းရပေမည်။

အင်မော်တယ် ဂိတ်တံခါးတွင် ဝိညာဉ်ခွဲထွက် နယ်ပယ် အမွေအနှစ် အချို့ ရှိသင့်သော်ငြား အများအပြားတော့ သေချာပေါက် ရှိမည် မဟုတ်ပေ။

အကယ်၍ သူသာ ဓာတ်ကြီးငါးပါး ကျင့်စဉ်များကို စုဆောင်းနိုင်မည်ဆိုပါက လွန်စွာ ကောင်းမွန်ပေလိမ့်မည်။ ထိုသို့ဆိုလျှင် ဝိညာဉ်ခွဲထွက် နယ်ပယ်သို့ အဆင့်ချိုးဖြတ်ရာတွင် ဓာတ်ကြီးငါးပါး ကျင့်စဉ်ဖြင့် အုတ်မြစ် ချနိုင်ပေလိမ့်မည်။

အကယ်၍ ဤ ဓာတ်ကြီးငါးပါးကို မစုဆောင်းနိုင်ပါက တတ်နိုင်သမျှ မြန်မြန် စုဆောင်းရပေလိမ့်မည်။

ထို့အပြင်...

ဝိညာဉ်ခွဲထွက် နယ်ပယ် ဓာတ်ကြီးငါးပါး ကျင့်စဉ်အတွက် အုတ်မြစ်ချရန် ကနဦး ပေါင်းစပ်မှုသည် လွန်စွာ အားကောင်းမည် မဟုတ်ချေ။ ဝိညာဉ်ခွဲထွက် နယ်ပယ် အတွက် ခိုင်မာသော အုတ်မြစ်ချရန် စုယွီ အနေဖြင့် မူလဝိဉာဉ် နယ်ပယ်တွင် ပြုလုပ်ခဲ့သကဲ့သို့ ပိုမို နက်ရှိုင်းသော တာအို ကျင့်စဉ်များကို အဆက်မပြတ် ထည့်သွင်းပေးရန် သေချာပေါက် လိုအပ်ပေလိမ့်မည်။

အနှစ်သာရကို ထုတ်ယူပြီး အညစ်အကြေးများကို စွန့်ပစ်ရပေမည်။

၎င်းကို အစဉ်မပြတ် ပေါင်းစပ်၊ မြှင့်တင်ကာ ရိုးရှင်းအောင် ပြုလုပ်ရပေမည်။

'ငါ့ရဲ့ ကျင့်ကြံခြင်းကို နည်းနည်းလောက် ပိုပြီး ခိုင်မာအောင် လုပ်ပြီးတာနဲ့ ဆရာ အရိုင်းနယ်မြေကနေ ပြန်လာတဲ့အခါ အင်မော်တယ် ဂိတ်တံခါးကနေ ဝိညာဉ်ခွဲထွက် နယ်ပယ် တာအို ကျင့်စဉ်တွေ အမွေဆက်ခံခွင့် တောင်းရမယ်...'

ဤနေရာအထိ တွေးတောမိသောအခါ စုယွီ၏ စိတ်အာရုံသည် တာအိုမျှော်စင် ကိစ္စအပေါ်သို့ တစ်ဖန် ရောက်ရှိသွားပြန်၏။ အကယ်၍ သူသာ အင်မော်တယ် ဂိတ်တံခါးအတွက် ပိုမို အကျိုးပြုနိုင်မည် ဆိုပါက ဝိညာဉ်ခွဲထွက် နယ်ပယ် တာအို ကျင့်စဉ်များကို တောင်းဆိုရန် လုံလောက်သော ယုံကြည်မှု ရှိလာပေလိမ့်မည်။

သူသည် ရယူရုံသာ ရယူပြီး ကျေးဇူးမဆပ်တတ်သည့် လူစားမျိုး မဟုတ်ပါချေ။

သူသည် ကျွမ်းကျင်မှု အဆင့် ဇယားကို ကြည့်ရှုလိုက်သည်။

ကျင့်ကြံခြင်း - မူလဝိဉာဉ် နယ်ပယ်၊ စတုတ္ထအဆင့်။

သက်တမ်း - ၃၀၉/၂၈၂၆ နှစ်။

ကျင့်စဉ်များ - ဓာတ်ကြီးငါးပါး ကျင့်စဉ် (မူလဝိဉာဉ် နယ်ပယ်၊ စတုတ္ထအဆင့်၊ ကျွမ်းကျင်မှု ၀.၀၁ ရာခိုင်နှုန်း)၊ ကောင်းကင် ခန္ဓာကိုယ် သန့်စင်ခြင်း ကျင့်စဉ် (ပဉ္စမအဆင့်၊ ကျွမ်းကျင်မှု ၃၁.၂၆ ရာခိုင်နှုန်း)၊ သွေးဝေလငါး လမြို ကျင့်စဉ် (စတုတ္ထအဆင့်၊ ကျွမ်းကျင်မှု ၇၀ ရာခိုင်နှုန်း)၊ အထက်ဘုံ သန့်စင်သော မူလ တာအို ကျင့်စဉ် (ပြီးပြည့်စုံ)၊ ရွှေပုစဉ်းရင်ကွဲ ကျင့်စဉ် (ပဉ္စမအဆင့်၊ ကျွမ်းကျင်မှု ၁၂.၆၄ ရာခိုင်နှုန်း)။

မှော်မန္တန်များ - သစ်သားနွယ်ပင် ကျင့်စဉ် (ပြီးပြည့်စုံ)... ယင်ယန် လွတ်မြောက်ခြင်း ကျင့်စဉ် (ပြီးပြည့်စုံ)၊ ကောင်းကင် ပိုင်းဖြတ် နတ်ဘုရား ကျင့်စဉ် (ပြီးပြည့်စုံ)၊ ပုစဉ်း ပိုးတုံးလုံး အချိန်တာအို ကျင့်စဉ် (ပြီးပြည့်စုံ)၊ ဟင်းလင်းပြင် ခွဲထွက်ခြင်း နည်းစနစ် (အခြေခံအဆင့်၊ ကျွမ်းကျင်မှု ၉၉.၈၇ ရာခိုင်နှုန်း)။

'ငါ့သက်တမ်းက တစ်ရာ့ခြောက်ဆယ့်လေးနှစ် တိုးလာတာပဲ...'

'ပုစဉ်း ပိုးတုံးလုံး အချိန်တာအို ကျင့်စဉ်ကလည်း ပြီးပြည့်စုံ အဆင့်ကို ရောက်သွားပြီ...'

'ဟင်းလင်းပြင် ခွဲထွက်ခြင်း နည်းစနစ်ရဲ့ ကျွမ်းကျင်မှုကလည်း အသေးစား အောင်မြင်မှု အဆင့်ကို ရောက်ခါနီးနေပြီပဲ...'

စုယွီသည် သက်ပြင်းရှည်ကြီး တစ်ချက်ကို ချလိုက်၏။ ပုစဉ်း ပိုးတုံးလုံး အချိန်တာအို ကျင့်စဉ်ကို လေ့ကျင့်ရာတွင် အစိမ်းရောင် သစ်သား နှစ်ပတ်လည် ကွင်း ကျင့်စဉ်ကြောင့် ဟင်းလင်းပြင် ခွဲထွက်ခြင်း နည်းစနစ်ထက် ပိုမို လွယ်ကူခဲ့သည်။

အချိန်နှင့် ဟင်းလင်းပြင် တာအို တို့ကြောင့် ၎င်းသည် ပြီးပြည့်စုံ အဆင့်သို့ တိုက်ရိုက် ရောက်ရှိသွားခဲ့ခြင်း ဖြစ်ပါသည်။

ထို့ပြင် ပြီးပြည့်စုံ အဆင့်ရှိ ပုစဉ်း ပိုးတုံးလုံး အချိန်တာအို ကျင့်စဉ်မှာ လွန်စွာ နက်နဲ ဆန်းကြယ်လှ၏။ ထိုကျင့်စဉ်ကို တက်ကြွစွာ အသုံးမပြုလျှင်တောင်မှ ၎င်း၏ လျှို့ဝှက်ချက်များသည် စုယွီ၏ ခန္ဓာကိုယ်နှင့် ပေါင်းစပ်သွားပုံရပြီး သူ၏ လှုပ်ရှားမှုတိုင်းကို ဇင် တာအို နှင့် ပိုမို လိုက်လျောညီထွေ ဖြစ်စေသည်။

ဇင် ဆိုသည်မှာ ဗုဒ္ဓဘာသာ လမ်းစဉ်နှင့် မတူဘဲ ဘဝကို ပြုစုပျိုးထောင်ခြင်း နည်းလမ်း တစ်ရပ်ကို ဆိုလိုခြင်း ဖြစ်သည်။

ပုစဉ်း ပိုးတုံးလုံး အချိန်တာအို ကျင့်စဉ် ပြီးပြည့်စုံသွားခြင်းက သူ၏ သက်တမ်းကို သေချာပေါက် ပိုမို ရှည်လျားသွားစေမည် ဖြစ်၏။

'ဟင်းလင်းပြင် ခွဲထွက်ခြင်း နည်းစနစ်ကို အသေးစား အောင်မြင်မှု အဆင့် ရောက်သွားရင် ငါ့ရဲ့ ဟင်းလင်းပြင် တာအို ကျွမ်းကျင်မှုကို မြှင့်တင်ပေးနိုင်မလား မသိဘူး...' စုယွီသည် ဟင်းလင်းပြင် ခွဲထွက်ခြင်း နည်းစနစ်၏ ကျွမ်းကျင်မှု အဆင့်ကို စစ်ဆေးရင်း ကိုယ့်ဘာသာ တွေးတောနေမိသည်။

...

အရိုင်းနယ်မြေ အတွင်း၌။

တာအိုမျှော်စင်ဟု ခေါ်ဆိုသော တာအိုမျှော်စင် အတွင်းရှိ ကောင်းကင်နှင့် မြေကြီးသည် မူလဝိဉာဉ် နယ်ပယ်ရှိ အရှင်သခင်ကြီး တစ်ပါး၏ တာအို နယ်ပယ်ကို သွေးသန့်စင်ပေးရန်အတွက် အစွမ်းထက်မြက်သော ရှေးဟောင်း ကျင့်ကြံသူကြီးများက ဖန်တီးထားသည့် နက်နဲ ဆန်းကြယ်သော နေရာ တစ်ခု ဖြစ်သည်။

အထပ်တစ်ထပ်လျှင် ကောင်းကင်နှင့် မြေကြီး တစ်ခုစီ ပါဝင်သည်။

သို့သော်ငြား အပြင်ဘက်မှ ကြည့်လျှင် ရွှေရောင် တောက်ပကာ မျက်စိကျိန်းမတတ် လင်းလက်နေပြီး ကောင်းကင်ယံ၏ လွှမ်းမိုးနိုင်စွမ်းများနှင့် ပြည့်နှက်နေသော တာအိုမျှော်စင်သည် အတွင်းဘက်၌မူ ကွဲပြားခြားနားသော မြင်ကွင်း တစ်ခု ရှိနေပေ၏။

အဆုံးအစမရှိသော မိစ္ဆာ ချီစွမ်းအားများသည် အရပ်လေးမျက်နှာသို့ တိုက်ခတ်နေပြီး ကြောက်မက်ဖွယ် ကောင်းသော မိစ္ဆာ စွမ်းအား တစ်ခုက ဤနေရာရှိ ဟင်းလင်းပြင် နေရာတိုင်းကို ဖိနှိပ် ချုပ်ချယ်ထားသည်။

မာရှီချင်းသည် မြေပြင်ပေါ်တွင် တင်ပျဉ်ခွေ ထိုင်နေပြီး ပြင်ပမှ အဆုံးအစမရှိသော မိစ္ဆာ ချီစွမ်းအားများ၏ တိုက်စားမှုကို ခုခံရန် သူ၏ စွမ်းအား အားလုံးကို အသုံးပြုကာ မြေဆရာ အခင်းအကျင်းကို ထောက်ပံ့ထားသည်။ သို့သော် မိစ္ဆာ ချီစွမ်းအားများ၏ တိုက်စားမှု အပြင် မာရှီချင်း၏ စိတ်ထဲတွင် ရစ်ဝဲနေသော မိစ္ဆာ အသံ တစ်သံလည်း ရှိနေသေး၏။ ၎င်းသည် နာတာရှည် ရောဂါ တစ်ခုကဲ့သို့ပင် ဖယ်ရှား၍ မရ၊ ဟန့်တား၍လည်း မရနိုင်အောင် ဖြစ်နေရသည်။

ဤအချိန်တွင် မာရှီချင်းသည် တစ်နှစ်ကျော် ကြာအောင် တောင့်ခံထားခဲ့ပြီး ဖြစ်သည်။

မူလက ဤအရာသည် သူ၏ အခွင့်အရေး တစ်ခု ဖြစ်သည်ဟု ထင်မှတ်ခဲ့ပြီး အစွမ်းထက် ရှေးဟောင်း ကျင့်ကြံသူ တစ်ဦး၏ တာအို ကျင့်စဉ်များကိုပင် အမွေဆက်ခံနိုင်မည်ဟု တွေးတောခဲ့သည်။ ထိုသို့ဆိုလျှင် ကြယ်ညွှန် မျှော်စင်နှင့် အင်မော်တယ် တစ်သောင်း အင်မော်တယ် နန်းတော်တို့ကို လက်စားချေနိုင်မည့် အခွင့်အရေး ရရှိလာမည်ဟု ယုံကြည်ထားခဲ့၏။

မထင်မှတ်ဘဲ ဤနေရာသည် သူ၏ ကိုယ်ပိုင် သေမင်းတမန် ကပ်ဘေးကြီး အဖြစ်သို့ ပြောင်းလဲသွားခဲ့ချေပြီ။

တစ်နှစ်ကျော်ကြာ တောင့်ခံထားခဲ့ရပြီးနောက် မာရှီချင်း၏ ခန္ဓာကိုယ်မှာ လုံးဝ နီးပါး ကုန်ခန်းသွားခဲ့ပြီ ဖြစ်ကာ အသိစိတ်များလည်း မှုန်ဝါးလာခဲ့ပေ၏။ သူ၏ မျက်နှာတွင် ခါးသီးသော အပြုံးတစ်ခု ပေါ်လာတော့သည်။

'ဆရာ... ဘိုးဘေးတို့... ညီအစ်ကိုစု... ကျွန်တော် ခင်ဗျားတို့ကို စိတ်ပျက်အောင် လုပ်မိပြီ...'

ဝုန်း...

မာရှီချင်း၏ ခန္ဓာကိုယ် ပြိုလဲလုဆဲဆဲ အချိန်တွင် သူ ထိန်းသိမ်းထားသော မြေဆရာ အခင်းအကျင်းသည် ပြင်ပရှိ အဆုံးအစမရှိသော မိစ္ဆာ ချီစွမ်းအားများ၏ ရိုက်ချိုးမှုကို ခံလိုက်ရသည်။ လျှို့ဝှက် နယ်မြေ အတွင်းရှိ အဆုံးအစမရှိသော မိစ္ဆာ ချီစွမ်းအားများသည် ဧရာမ မိစ္ဆာ ပုံရိပ်ယောင်ကြီး တစ်ခု အဖြစ်သို့ ပြောင်းလဲသွားပြီး ကြောက်မက်ဖွယ် ရယ်မောသံကြီး တစ်ခု ထွက်ပေါ်လာတော့၏။

“ဟီး... ဟီး... ဟီး...”

နောက်တစ်ခဏတွင် ကောင်းကင်သို့ ထိုးထွက်နေသော ထို မိစ္ဆာ ပုံရိပ်ကြီးသည် မာရှီချင်း၏ ခန္ဓာကိုယ် အတွင်းသို့ အတင်း ဝင်ရောက်သွားလေတော့သည်။

မာရှီချင်း၏ အသိစိတ်များ ချက်ချင်း မှောင်မိုက်သွားပြီး မိစ္ဆာ အမွေအနှစ် သတင်းအချက်အလက်များ လှိုင်းတံပိုးကြီး ပမာ သူ၏ ဦးနှောက်ထဲသို့ ဝင်ရောက်လာတော့၏။

အဆုံးအစမရှိသော မိစ္ဆာ အတွေးများသည် မာရှီချင်း ပိုင်ဆိုင်သမျှ အရာအားလုံးကို စတင် တိုက်စားလာခဲ့သည်။

ထိုစဉ်... လျှို့ဝှက် နယ်မြေ အတွင်းမှ အဆုံးအစမရှိသော ရှေးဟောင်း မိစ္ဆာ ချီစွမ်းအားများသည် မာရှီချင်း၏ ခန္ဓာကိုယ် အတွင်းသို့ စီးဝင်သွားသည်နှင့် အမျှ သူ၏ အရှိန်အဝါသည် ထိုးတက်သွားတော့၏။

မျက်စိတစ်မှိတ် အတွင်းမှာပင် မာရှီချင်း၏ ကျင့်ကြံခြင်း အဆင့်သည် မူလဝိဉာဉ် နယ်ပယ် ဒုတိယအဆင့်မှ တတိယအဆင့်သို့ အဆင့်ချိုးဖြတ် ဝင်ရောက်သွားခဲ့သည်။

ထို့နောက် စတုတ္ထအဆင့်... ပဉ္စမအဆင့်သို့ အဆင့်ဆင့် ရောက်ရှိသွားတော့၏။

မူလဝိဉာဉ် နယ်ပယ် အထွတ်အထိပ် အဆင့်သို့ အဆင့်ချိုးဖြတ်သွားသည့် အချိန် အထိပင်။ မာရှီချင်း၏ ခန္ဓာကိုယ်က ဆက်လက်၍ ဒဏ်မခံနိုင်တော့ဘဲ ကျယ်လောင်သော ပေါက်ကွဲသံကြီးနှင့် အတူ ပေါက်ကွဲ ထွက်သွားလေတော့၏။ သို့သော်ငြား ကြောက်မက်ဖွယ် မိစ္ဆာ ချီစွမ်းအားများက တိုက်ခတ်လာပြီး မာရှီချင်း၏ ပေါက်ကွဲသွားသော ခန္ဓာကိုယ် အကြွင်းအကျန်များမှ သွေးမြူခိုးများကို ပြန်လည် မျိုချကာ မျက်စိတစ်မှိတ် အတွင်းမှာပင် တစ်သားတည်း ပြန်လည် ပေါင်းစပ်သွားစေတော့သည်။

၎င်းမှနေ၍ ခန္ဓာကိုယ် အသစ် တစ်ခု ပြန်လည် မွေးဖွားလာခဲ့ပေ၏။

မာရှီချင်း၏ မူလက ဟောင်းနွမ်း အိုမင်းနေသော မျက်နှာသည်ပင်လျှင် လူငယ် အရွယ် သွင်ပြင်သို့ ပြန်လည် ရောက်ရှိသွားခဲ့သည်။

သူ၏ ဆံပင်များမှာ ငွေရောင် ဖြူဖွေးနေပြီး ပခုံးပေါ်သို့ ဖြာကျနေကာ ကြီးမားလှသော မိစ္ဆာ ချီစွမ်းအားများက လှိုင်းထနေသော သွေးသမုဒ္ဒရာကြီး တစ်ခုကဲ့သို့ သူ၏ ခန္ဓာကိုယ်ကို ရစ်ပတ်ထား၏။

အဝေးမှ ကြည့်လျှင် မာရှီချင်း၏ မျက်နှာသည် အနည်းငယ် မိစ္ဆာဆန်ဆန် ညို့ယူ ဖမ်းစားနိုင်ပြီး ချောမောသော အသွင်အပြင်ကို ဆောင်နေသည်။

သူ မျက်လုံးများကို ပြန်ဖွင့်လိုက်သောအခါ နှုတ်ခမ်းထောင့်တွင် မဲ့ပြုံး တစ်ခု ပေါ်လာပြီး လှောင်ပြောင် သရော်သည့် လေသံဖြင့် ရေရွတ်လိုက်သည်။

“မာရှီချင်း... ကောင်းကင် တာအိုရဲ့ ကျိန်စာသင့်နေတဲ့ မြေဆရာ တစ်ယောက်က အသက်ရှင် နေရတာ ဘာအဓိပ္ပာယ် ရှိလို့လဲ...”

“တော်လောက်ပြီ... မဖြစ်စလောက် အင်းဆက်ကောင်... ရုန်းကန်နေတာကို ရပ်လိုက်တော့... မှန်ကန်တဲ့ လမ်းစဉ်ပဲ ဖြစ်ဖြစ်၊ မိစ္ဆာ လမ်းစဉ်ပဲ ဖြစ်ဖြစ် ဒီလောကမှာ အရာအားလုံးက ကိုယ့်ရဲ့ စွမ်းအား အပေါ်မှာပဲ မူတည်တယ်...”

“မင်းမှာ စွမ်းအား မရှိလို့ မျက်စိလည် လမ်းမှားနေတဲ့ ခွေး တစ်ကောင်လို ဖြစ်သွားတာ မဟုတ်ဘူးလား... မင်းရဲ့ အဲဒီ မှန်ကန်တဲ့ လမ်းစဉ်က ကျင့်ကြံသူတွေ ဆိုတဲ့ လူတွေရဲ့ လိုက်လံ သတ်ဖြတ်တာကို ခံနေရတာလေ...”

“ဟီးဟီး... မင်း အမျိုးမျိုး အထင်သေးခဲ့တဲ့ အဲဒီ မိစ္ဆာ ကျင့်ကြံသူတွေက မင်းထက် ပိုပြီး သစ္စာရှိ၊ တာဝန်ကျေကောင်း ကျေလိမ့်မယ်...”

“ငါ့ကို မယုံဘူးလား... ကိစ္စမရှိပါဘူး...”

“သေချာတာကတော့... ငါ မွေးဖွားလာကတည်းက အပြင်ဘက် ကျင့်ကြံခြင်း ကမ္ဘာ ဒါမှမဟုတ် ပြင်ပ မိစ္ဆာ ကျင့်ကြံသူတွေကို တစ်ခါမှ မမြင်ဖူးခဲ့ဘူး...”

“ငါ အပြင်ရောက်ရင် မင်းကို ပြမယ်... ငါလည်း သိပ်ကို စပ်စုချင်နေပြီ...”

“ဒါပေမဲ့ မထွက်သွားခင် ဒီမျှော်စင်ကြီးကို ငါ ယူသွားဖို့ လိုတယ်... ဒါက ရတနာ တစ်ပါးပဲ...”

မာရှီချင်းသည် ဤနယ်မြေမှ မထွက်ခွာမီ တာအိုမျှော်စင်၏ ပဉ္စမမြောက်နှင့် အမြင့်ဆုံး အထပ်ဆီသို့ ဦးတည် သွားရောက်လိုက်သည်။

...

တာအိုမျှော်စင်၏ အပြင်ဘက်တွင်။

ဧရာမ ရှေးဟောင်း အပျက်အစီး တစ်ခု ပေါ်ထွက်လာသော်ငြား ကောင်းကင် အင်မော်တယ် နန်းတော်နှင့် အခြား ဒေသများမှ ကျင့်ကြံသူများ ပူးပေါင်းကာ မိစ္ဆာ မျိုးနွယ်စုနှင့် မိစ္ဆာ သားရဲများကို တိုက်ခိုက် မောင်းထုတ်ခဲ့ပြီးနောက် ဤလျှို့ဝှက် နယ်မြေ အတွင်းသို့ ဝင်ရောက်လိုက်ချိန်တွင် ၎င်းသည် အမှန်တကယ်ပင် မိစ္ဆာ ချီစွမ်းအားများ ညစ်ညမ်းနေသော ဒေသ တစ်ခု ဖြစ်နေကြောင်း တွေ့ရှိရသဖြင့် အလွန်တရာ အံ့အားသင့်သွားကြရသည်။

လျှို့ဝှက် နယ်မြေ၏ အလယ်ဗဟို၌ ကောင်းကင်ကို ပင့်မထားသကဲ့သို့ ဧရာမ မျှော်စင် အရိပ်ကြီး တစ်ခု မတ်မတ် ရပ်တည်နေပေ၏။

မူလက အပြင်ဘက်မှ ကြည့်လျှင် ရွှေရောင် တောက်ပကာ မျက်စိကျိန်းမတတ် လင်းလက်နေသော တာအိုမျှော်စင်ကြီးသည် ယခုအခါ အဆုံးအစမရှိသော ရှေးဟောင်း မိစ္ဆာ ချီစွမ်းအားများဖြင့် ဖုံးလွှမ်းနေခဲ့ချေပြီ။ ထို မိစ္ဆာ ချီစွမ်းအား၏ အရှိန်အဝါက ဝိညာဉ်ခွဲထွက် နယ်ပယ်ရှိ အရှင်သခင်ကြီးများကိုပင် ရင်တထိတ်ထိတ် ဖြစ်စေပြီး ခြိမ်းခြောက်မှု တစ်ရပ်ကို ခံစားရစေတော့သည်။

ပထမ တာအိုသားတော်ကို ကာကွယ်ပေးနေသော ကောင်းကင် အင်မော်တယ် နန်းတော်မှ ဝိညာဉ်ခွဲထွက် အရှင်သခင်ကြီး၏ ကိုယ်ပွား တစ်ခုက အလျင်စလို ပြောလိုက်၏။

“သွားကြစို့... ဒီကနေ ထွက်သွားကြစို့... ဒီလျှို့ဝှက် နယ်မြေကြီးက တစ်ခုခုတော့ မှားနေပြီ...”

သူတို့သည် ကျင့်ကြံသူ ငါးထောင် ပါဝင်သော တပ်မတော်ကြီးကို ဤ ရှေးဟောင်း အပျက်အစီးနှင့် လျှို့ဝှက် နယ်မြေမှ အလျင်စလို ဦးဆောင် ခေါ်ထုတ်သွားခဲ့ပြီး မိုင်ငါးဆယ် အကွာတွင်မှသာ စခန်းချလိုက်ကြသည်။ ထိုနေရာတွင် အတူ လိုက်ပါလာသော မြေဆရာ များက ကာကွယ်ရေး အခင်းအကျင်းများကို စတင် တည်ဆောက်ကြတော့၏။

လျှို့ဝှက် နယ်မြေရှိရာ အရပ်သို့ သူတို့ လှမ်းကြည့်လိုက်ကြရာ အပြင်ဘက် မြင်ကွင်းမှ ရွှေရောင် တောက်ပပြီး မျက်စိကျိန်းမတတ် လင်းလက်နေသော တာအိုမျှော်စင်ကြီးက သူတို့၏ မြင်ကွင်းထဲသို့ ဝင်ရောက်လာခဲ့သည်။

ကောင်းကင် အင်မော်တယ် နန်းတော်မှ ဝိညာဉ်ခွဲထွက် အရှင်သခင်ကြီးနှင့် ပထမ တာအိုသားတော် တို့၏ မျက်နှာများ ပြောင်းလဲသွားတော့သည်။

“ဘယ်လို လုပ်ပြီး ဒီလောက် များပြားတဲ့ မိစ္ဆာ ချီစွမ်းအားတွေက ဒီနေရာမှာ လာစုဝေးနေပြီး မကွဲမကွာ ဖြစ်နေရတာလဲ...”

နောက်တစ်နှစ် အတွင်း ကောင်းကင် အင်မော်တယ် နန်းတော်နှင့် အခြား ဒေသများမှ ကျင့်ကြံသူများသည် အပျက်အစီးများကို စူးစမ်း လေ့လာရန် အကြိမ်ကြိမ် ကြိုးစားခဲ့ကြ၏။ အပျက်အစီးများ အတွင်း၌ အကြွင်းအကျန် အခင်းအကျင်း များစွာ ရှိနေဆဲပင် ဖြစ်သည်။

၎င်းက သူတို့ကို မိစ္ဆာ ချီစွမ်းအားများကို သည်းခံကာ အခင်းအကျင်းများကို ဦးစွာ ဂရုတစိုက် ဖျက်ဆီးစေပြီးမှသာ တာအိုမျှော်စင်ဆီသို့ တဖြည်းဖြည်း ချဉ်းကပ်နိုင်စေခဲ့သည်။

ထိုစဉ်... အပျက်အစီးများ အတွင်း၌ သူတို့သည် အခြားသော အခွင့်အရေးများကို ရရှိခဲ့ကြပြီး အပျက်အစီးများ၏ မူလ ပိုင်ရှင်နှင့် ပတ်သက်သည့် သတင်းအချက်အလက် များကို ရှာဖွေ တွေ့ရှိခဲ့ကြသည်။

“ယွဲ့ အင်မော်တယ်ရဲ့ မိစ္ဆာ နှိမ်နင်းရေး စံအိမ် ဟုတ်လား... ဒီ ယွဲ့ အင်မော်တယ် စံအိမ် ဆိုတာက ဘယ်လို ရှေးဟောင်း အင်အားစုမျိုးလဲ... တစ်ခါမှကို မကြားဖူးဘူး...”

ကောင်းကင် အင်မော်တယ် နန်းတော်မှ ဝိညာဉ်ခွဲထွက် အရှင်သခင်ကြီးသည် အလွန်အမင်း အံ့အားသင့်နေခဲ့ချေပြီ။