အခန်း ၇၁၈

အခန်း (၇၁၈) - ဖျက်ဆီးခြင်းနှင့် အချိန်စက်ကွင်း၏ သက်ရောက်မှု (အပိုင်း ၁)

အဆုံးမဲ့ ဓားအရှင်သခင်ကြီး၏ မျက်လုံးအစုံမှာ ရုတ်တရက် ကျုံ့ဝင်သွားတော့၏။ ထိုစဉ် စုယွီ၏ ကိုယ်ခန္ဓာမှ ထွက်ပေါ်နေသော ထူးခြားသည့် အရှိန်အဝါကို သူ သတိပြုမိလိုက်သည်။ ထိုအရှိန်အဝါကား မူလဝိညာဉ် အထွတ်အထိပ် အရှင်သခင်ကြီး တစ်ပါး၏ အရှိန်အဝါ လုံးဝ မဟုတ်ပေ။

သို့သော် စုယွီက အေးစက်စက် လှည့်ကြည့်လိုက်သည်နှင့် တစ်ပြိုင်နက် နက်နဲသော တာအို အရှိန်အဝါ တစ်ခုသည် အဆုံးမဲ့ ဓားအရှင်သခင်ကြီးထံသို့ တဟုန်ထိုး ကျဆင်းလာတော့၏။

ထိုအရှိန်အဝါကြောင့် အဆုံးမဲ့ ဓားအရှင်သခင်ကြီးမှာ ကြောက်ရွံ့မှုဖြင့် တစ်ကိုယ်လုံး တုန်ယင်သွားရသည်။

သေခြင်းတရား၏ အရိပ်အယောင်တစ်ခုက သူ၏ ဝိညာဉ်ကို လွှမ်းခြုံသွားလေပြီ။

ဘယ်သူ...

ဘယ်သူက ဒီလူလဲ။

အဆုံးမဲ့ ဓားအရှင်သခင်ကြီးသည် ပါးစပ်ဟလိုက်သော်လည်း တစ်ခွန်းမျှ ပြန်မပြောရဲတော့ချေ။ သူသည် ထိတ်လန့်တုန်လှုပ်မှုကြောင့် ခြေလှမ်းတစ်လှမ်း နောက်သို့ ဆုတ်လိုက်ပြီး တံတွေးကို အနိုင်နိုင် မြိုချလိုက်၏။ သူ၏ မျက်နှာမှာလည်း ဖြူရော်သွားကာ ကြောက်ရွံ့မှုများက သူ့ကို စိုးမိုးသွားသည်။

ယခုအချိန်တွင် သူ ခံစားနေရသော ဖိအားမှာ အရှင်သခင်ဆယ်ပါး အင်မော်တယ်မြို့တော်၏ နောက်ကွယ်မှ ရှိနေသော အင်အားစုထက်ပင် ဆိုးရွားလွန်းလှသည်။

စုယွီ၏ ဒေါသတကြီး ကြိမ်းမောင်းလိုက်သံကို ကြားပြီးနောက်တွင် အဆုံးမဲ့ ဓားအရှင်သခင်ကြီးမှာ လင်းလုံ ကုန်သွယ်ရေးအဖွဲ့ဘက်မှ ရပ်တည်ရန် အစီအစဉ်ကို ချက်ချင်းပင် လက်လျှော့လိုက်တော့သည်။

မည်သို့ပင်ဖြစ်စေ ဤနေရာမှာ အရှင်သခင်ဆယ်ပါး အင်မော်တယ်မြို့တော်ပင် မဟုတ်ပါလော။

သူသည်လည်း ဤမြို့တော်၏ မူလဝိညာဉ် အထွတ်အထိပ် အရှင်သခင်ကြီး တစ်ပါးသာ ဖြစ်၏။

သို့သော်...

သူ့ရှေ့မှ လူသည် လုံးဝ ကြောက်ရွံ့ခြင်း မရှိသည့်အပြင် သူ့ကိုပင် ခြိမ်းခြောက်ရဲသေးသည်။

ဒီလိုလူမျိုးက ရိုးရိုးရှင်းရှင်း ဖြစ်နိုင်ပါ့မလား။

လင်းလုံ ကုန်သွယ်ရေးအဖွဲ့၏ နောက်ကွယ်တွင် အင်မော်တယ် တစ်သောင်း နန်းတော် ရှိသည်ဆိုသော်လည်း ၎င်းမှာ သာမန် အဆက်အသွယ်မျှသာ ဖြစ်၏။ အင်မော်တယ် တစ်သောင်း နန်းတော်အတွက်နှင့် အခြား အင်အားကြီးမားသော သူတစ်ယောက်ကို ရန်စရန်မှာ အကျိုးမရှိပေ။

ဤသို့ တွေးတောမိပြီးနောက်တွင် အဆုံးမဲ့ ဓားအရှင်သခင်ကြီးမှာ ဆိတ်ဆိတ်နေလိုက်ပြီး လက်ကို ဝှေ့ယမ်းကာ သူ၏ လက်အောက်ငယ်သား နှစ်ယောက်နှင့်အတူ လင်းလုံ ကုန်သွယ်ရေးအဖွဲ့မှ ထွက်ခွာသွားလေတော့သည်။

သူသည် အရှင်သခင်ဆယ်ပါး အင်မော်တယ်မြို့တော်၏ နောက်ကွယ်မှ အကြီးအကဲများထံသို့ ဤကိစ္စအတွက် အကူအညီ တောင်းခံရန် စကားပါးလိုက်တော့၏။

လင်းလုံ ကုန်သွယ်ရေးအဖွဲ့ အတွင်းတွင်...

စုယွီက အဆုံးမဲ့ ဓားအရှင်သခင်ကြီးကို စကားတစ်ခွန်းတည်းဖြင့် ခြိမ်းခြောက် မောင်းထုတ်နိုင်သည်ကို မြင်သောအခါ ကျန်ရှိနေသော မူလဝိညာဉ် အရှင်သခင်ကြီး (၉) ပါး၏ မျက်နှာထားများ ပြောင်းလဲသွားကြသည်။

အနက်ရောင် ဒေါသ စစ်သည်တော်နှင့် ကုန်သွယ်ရေးအဖွဲ့၏ ဂိုဏ်းချုပ် တိုက်ခိုက်နေစဉ်တွင် သူတို့က ဓားများကို ဆွဲထုတ်ကာ စုယွီကို ဝိုင်းရံ တိုက်ခိုက်လိုက်ကြသည်။

သို့သော် သူတို့၏ မျက်စိရှေ့တွင် စုယွီ ပျောက်ကွယ်သွားသည်ကိုသာ မြင်လိုက်ရ၏။

စုယွီ၏ အမြင်အာရုံထဲတွင်မူ သူသည် ပတ်ဝန်းကျင်ရှိ အချိန်စီးဆင်းမှုကို ပြောင်းလဲလိုက်သကဲ့သို့ ဖြစ်နေသည်။

သူတို့ (၉) ဦး၏ လှုပ်ရှားမှုများမှာ လွန်စွာ နှေးကွေးသွားတော့၏။

စုယွီသည် သူတို့အနက် တစ်ဦး၏ နောက်သို့ အေးဆေးစွာ လျှောက်သွားကာ ခေါင်းခွံကို လက်ဝါးဖြင့် ရိုက်ချလိုက်၏။

ထိုသူတို့ ဓားများဖြင့် စုယွီ၏ အရိပ်ကို ဝိုင်းသတ်နေစဉ်မှာပင်...

“ဝုန်း...”

ထိုသူ၏ ဦးခေါင်းခွံ ပေါက်ကွဲသွားသည်။

ဦးခေါင်းမဲ့ အလောင်းမှ မူလဝိညာဉ်မှာ ကြောက်လန့်တကြား ထွက်ပြေးလာ၏။

ထိုစဉ် သူသည် သူ့နောက်တွင် ပေါ်လာသော ယွင်ရှောင် ဆေးလုံးစံအိမ် သခင်ကို မြင်လိုက်ရသည်။

'ပြေးရမယ်'

ဤမူလဝိညာဉ်မှာ အလွန်တရာ ထိတ်လန့်နေ၏။ သူ တစ်သက်တွင် ဤသို့သော အဖြစ်အပျက်မျိုး မကြုံဖူးခဲ့ပေ။ အလယ်အဆင့် မူလဝိညာဉ် အရှင်သခင် တစ်ပါးသည် သူ့နောက်သို့ မျက်စိတစ်မှိတ်အတွင်း ရောက်လာပြီး လက်တစ်ချက်တည်းဖြင့် ဦးခေါင်းခွံကို ပေါက်ကွဲစေခဲ့သည်။

ထိုသူ မည်သို့သော နည်းလမ်းဖြင့် တိုက်ခိုက်ခဲ့သည်ကို သူ လုံးဝ နားမလည်နိုင်ပေ။

သို့သော် သူ၏ မူလဝိညာဉ်ကို ထိန်းချုပ်ကာ ထွက်ပြေးရန် ပြုလုပ်စဉ်မှာပင် စုယွီ၏ လက်က သူ့မူလဝိညာဉ်ပေါ်သို့ ကျရောက်လာတော့သည်။

“ဝီး...”

အချိန်စက်ကွင်း ကျဆင်းလာပြီး မူလဝိညာဉ်ကို ပိတ်လှောင်လိုက်၏။

အချိန်စီးဆင်းမှုနှင့်အတူ အလယ်အလတ်အရွယ် အမျိုးသား ရုပ်သွင်ရှိသည့် ထိုမူလဝိညာဉ်မှာ မျက်စိတစ်မှိတ်အတွင်း အိုမင်းသွားတော့၏။

အာကာသအား ဖြတ်ကျော်၍ ကျင့်ကြံခြင်း ကမ္ဘာကို ဖြတ်သန်းနေသော အချိန်မြစ်ကြီးကို စုယွီ မြင်လိုက်ရသည်။

ထိုမူလဝိညာဉ်၏ ရုန်းကန်နေပုံကို သူ မြင်နေရပြီး ကြောက်ရွံ့စွာ အော်ဟစ်နေသည်မှာ အထင်အရှားပင်။ သူ မည်မျှပင် ရုန်းကန်ပါစေ အချိန်မြစ်ကြီး၏ အောက်ခြေသို့သာ ပိုမို မြန်ဆန်စွာ နစ်မြုပ်သွားတော့၏။

သူ၏ ရုပ်သွင်မှာလည်း မျက်မြင်ပင် အိုမင်းသွားတော့သည်။

နောက်ဆုံးတွင် ထိုအရိပ်မှာ အသက်လက္ခဏာ တစ်စုံတစ်ရာ မရှိတော့ဘဲ အချိန်မြစ်ကြီးထဲတွင် လုံးဝ ပျောက်ကွယ်သွား၏။

“ဝုန်း...”

တစ်ခဏချင်းမှာပင်။

အချိန်စက်ကွင်းထဲတွင် ပိတ်လှောင်ထားသော မူလဝိညာဉ်မှာ သူ၏ အသက်ကုန်ဆုံးသွားသည့်အလား အလိုလို ပျက်စီးသွားပြီး မြေပြင်ပေါ်သို့ ပြိုလဲကျသွားသော ဦးခေါင်းမဲ့ အလောင်းအဖြစ်သာ ကျန်ရစ်ခဲ့တော့၏။

သေဆုံးသွားသော ထိုသူကို ကြည့်ရင်း စုယွီက တွေးလိုက်သည်။

'သူတို့ပုံစံက အချိန်မြစ်ကြီးထဲကို နစ်မြုပ်သွားတာနဲ့ သက်တမ်းကုန်ဆုံးသွားတာနဲ့ တူတူပဲ'

'သူတို့က အချိန်မြစ်ထဲမှာ ရှိနေသရွေ့ အချိန်စက်ကွင်းရဲ့ စွမ်းအားကို သုံးပြီး သူတို့ရဲ့ သက်တမ်းကို ကုန်ခမ်းအောင် လုပ်ပြီး သေဆုံးစေနိုင်တယ်'

စုယွီက အချိန်စက်ကွင်းကို အသုံးပြုကာ တစ်ဦးကို သတ်ဖြတ်လိုက်ချိန်တွင် ကျန်ရှိနေသော (၈) ဦးမှာလည်း အံ့အားသင့်သွားကြ၏။ သူတို့၏ မှော်ရတနာများမှာ စုယွီ ချန်ရစ်ခဲ့သော အရိပ်ကိုသာ ထိမှန်သွားခဲ့သည်။

စုယွီကို သူတို့ ဝိုင်းရံနိုင်စွမ်း မရှိတော့ကြောင်း သိလိုက်ရသောအခါ သူတို့ အလွန် ထိတ်လန့်သွားကြ၏။

မူလဝိညာဉ် အထွတ်အထိပ် အဆင့် (၇) ရှိသော အရှင်သခင်ကြီး တစ်ပါးက ဒေါသတကြီး အော်ဟစ်လိုက်သည်။

“သတ်လိုက်စမ်း... မြန်မြန်”

“အွတ်...”

အဝေးတွင် အနက်ရောင် ဒေါသ စစ်သည်တော်သည် လင်းလုံ ကုန်သွယ်ရေးအဖွဲ့၏ ဂိုဏ်းချုပ်ကို နောက်တစ်ကြိမ် ထပ်မံ တိုက်ခိုက်လိုက်ပြန်၏။

သွေးများ ပန်းထွက်သွားပြီး ဂိုဏ်းချုပ်၏ အရှိန်အဝါမှာ တုန်ခါသွားကာ အားနည်းသွားတော့သည်။

သူသည် စုယွီ၏ အချိန်စက်ကွင်းကြောင့် အာရုံလွဲသွားခဲ့ပြီး စစ်သည်တော်၏ ဓားချက်ကို အပြည့်အဝ ခံလိုက်ရခြင်း ဖြစ်၏။ သူသည် ပြင်းထန်စွာ ဒဏ်ရာရရှိသွားပြီး ခုခံနိုင်စွမ်းပင် မရှိတော့ပေ။

စစ်သည်တော်၏ လက်ချက်ဖြင့် သူ သေဆုံးသွားရန်မှာ အချိန်သာ လိုတော့၏။

စုယွီအတွက်မူ ကျန်ရှိနေသော မူလဝိညာဉ် အရှင်သခင်ကြီး (၈) ပါးက သူတို့၏ မှော်ရတနာများကို ထပ်မံ အသုံးပြုလိုက်ကြသည်။ သူတို့က စုယွီကို ဖမ်းမိရန်နှင့် ဆက်လက် တိုက်ခိုက်ရန် ကြိုးစားနေကြ၏။

သို့သော် စုယွီက လက်ကို ဝှေ့ယမ်းလိုက်သည်နှင့် အချိန်စက်ကွင်းမှာ တဟုန်းဟုန်း ကျဆင်းလာသည်။

လင်းလုံ ကုန်သွယ်ရေးအဖွဲ့တွင် ကျန်ရှိနေသော ကျင့်ကြံသူများ၏ မျက်စိရှေ့တွင် စုယွီ၏ အရိပ်မှာ ပျောက်ကွယ်သွားပြီး မူလဝိညာဉ် အရှင်သခင်ကြီး (၈) ပါးတို့၏ ခန္ဓာကိုယ်များမှာ မျက်စိတစ်မှိတ်အတွင်း ပေါက်ကွဲ ပွင့်ထွက်သွားလေတော့၏။

ထို့နောက် သူတို့၏ မူလဝိညာဉ်များမှာ တစ်ခုပြီး တစ်ခု ကောင်းကင်ယံတွင် ကြေမွ ပျက်စီးသွားတော့၏။