အခန်း ၇၁၉

အခန်း (၇၁၉) - ဖျက်ဆီးခြင်းနှင့် အချိန်စက်ကွင်း၏ သက်ရောက်မှု (အပိုင်း ၂)

မူလဝိညာဉ်နယ်ပယ် အထွတ်အထိပ် အဆင့်ရှိသော အရှင်သခင်ကြီး (၉) ပါးစလုံးပင် ကင်းလွတ်ခွင့် မရလိုက်ပေ။ တစ်ခဏချင်းမှာပင် သူတို့အားလုံး၏ ခန္ဓာကိုယ်များမှာ စုယွီ၏ အချိန်စက်ကွင်း အောက်၌ အသက်မဲ့သွားကာ ဤလောကကြီးမှ ထွက်ခွာသွားကြတော့၏။

သူတို့အားလုံးသည် စုယွီ၏ အချိန်စက်ကွင်း အခင်းအကျင်းထဲတွင်ပင် အသက်ဇီဝိန် ချုပ်ငြိမ်းသွားခဲ့သည်။

စုယွီကို အရှက်ခွဲရန် စောင့်ကြည့်နေခဲ့သော ဧည့်သည်တို့၏ မျက်ဝန်းများမှာ ကြောက်ရွံ့မှုကြောင့် ပြူးကျယ်သွားကြ၏။ လူတိုင်း၏ ကျောရိုးထဲ စိမ့်ခနဲ ဖြစ်သွားပြီး ဒူးများပင် တုန်ယင်လာကြသည်။ တစ်နေရာလုံး တိတ်ဆိတ်သွားပြီး အသက်ရှူရပင် ခက်ခဲလာသလို...။

“...”

အားလုံးမှာ စကားပင် မဆိုနိုင်တော့ဘဲ မှင်သက်မိနေကြသည်။

လင်းလုံ ကုန်သွယ်ရေးအဖွဲ့မှ မူလဝိညာဉ် အရှင်သခင်ကြီးတွေ အကုန်သေသွားတာလား။

ဒီလူက လင်းလုံ ကုန်သွယ်ရေးအဖွဲ့ရဲ့ အရှင်သခင်တွေကို ဒီနေရာမှာတင် ရက်ရက်စက်စက် သတ်ပစ်ရဲတယ်ပေါ့လေ။

ယခု အချိန်တွင် သူတို့အားလုံး နောင်တ ရမိကြ၏။ အစောပိုင်းကတည်းက ထွက်ပြေးခဲ့သင့်သည်ဟု တွေးမိကာ အသက်မရှင်ရတော့မည်ကို စိုးရိမ်ပြီး နှလုံးခုန်သံများ ပိုမို မြန်ဆန်လာကြတော့သည်။

အေးစက်စက် လေထုက ဖိနှိပ်ထားသည်။

ဘတ်...

တစ်ယောက်ယောက်က ကြောက်လန့်တကြားဖြင့် စုယွီ၏ ခြေရင်းတွင် ဒူးထောက်ကာ အသက်ချမ်းသာပေးရန် တောင်းပန်လိုက်သည်။

“အရှင်... ကျွန်တော့်ကို ခွင့်လွှတ်ပါ”

သို့သော် စုယွီက ထိုလူကို အရေးပင် မစိုက်ပေ။ မူလဝိညာဉ် အရှင်သခင်ကြီး (၉) ပါးကို ရှင်းထုတ်ပြီးနောက် သူ၏ အကြည့်များကို လင်းလုံ ကုန်သွယ်ရေးအဖွဲ့၏ ဂိုဏ်းချုပ်ဆီသို့ ပြန်လည် ပို့လိုက်၏။

လင်းလုံ ကုန်သွယ်ရေးအဖွဲ့ ခေါင်းဆောင်မှာလည်း ကြောက်ရွံ့မှုကြောင့် ဆံပင်များပင် ထောင်မတ်သွားတော့သည်။ သူသည် အင်မတန် မြင့်မားသော မှော်ရတနာ အဆောင်လက်ဖွဲ့များကို ထုတ်ယူလိုက်သော်လည်း စုယွီက အချိန်စက်ကွင်းဖြင့် ၎င်းတို့ကို ပျောက်ကွယ်သွားစေ၏။

အချိန်စက်ကွင်း၏ ဖိအားအောက်တွင် လင်းလုံ ကုန်သွယ်ရေးအဖွဲ့ ခေါင်းဆောင်၏ လှုပ်ရှားမှုများမှာ ပုရွက်ဆိတ် တစ်ကောင်ပမာ နှေးကွေးသွားတော့သည်။

သူသည် အဆောင်လက်ဖွဲ့များကို ထိန်းချုပ်ရန် ကြိုးစားနေစဉ်မှာပင် သူက အနက်ရောင် ဒေါသ စစ်သည်တော်နှင့် ပူးပေါင်းကာ ဓားချက်တစ်ချက်ဖြင့် သူ့ဦးခေါင်းကို ပိုင်းဖြတ်လိုက်သည်။

စုယွီသည် လင်းလုံ ကုန်သွယ်ရေးအဖွဲ့ ခေါင်းဆောင်ကို အဆုံးစီရင်ရန် ပြင်ဆင်နေစဉ် ကောင်းကင်ယံမှ အာကာသ စွမ်းအားလှိုင်းများ ရုတ်တရက် ပေါ်ထွက်လာ၏။

မူလဝိညာဉ်နယ်ပယ်ထက် ကျော်လွန်သော ပုဂ္ဂိုလ်ကြီးတစ်ဦး ကောင်းကင်မှ ဆင်းသက်လာပြီး ဒေါသတကြီး အော်ဟစ်လိုက်သည်။

“ရပ်ကြစမ်း... အားလုံး ရပ်လိုက်ကြစမ်း”

သို့သော် စုယွီက သူ့စကားကို နားမထောင်ပေ။

လင်းလုံ ကုန်သွယ်ရေးအဖွဲ့ ခေါင်းဆောင်၏ မူလဝိညာဉ်သည် ခန္ဓာကိုယ်ထဲမှ ထွက်ခွာလာချိန်တွင် စုယွီက အချိန်စက်ကွင်းဖြင့် ချက်ချင်း ပိတ်လှောင်လိုက်သည်။ ထို့နောက် အနက်ရောင် ဒေါသ စစ်သည်တော်ကို ခိုင်းစေကာ မူလဝိညာဉ်ကို စုပ်ယူ၍ သတ်ပစ်လိုက်တော့၏။

ဟူး...

ထိုပုဂ္ဂိုလ်ကြီး၏ မျက်လုံးများမှာ အေးစက်သွားပြီး သူ့အရှိန်အဝါများက စုယွီနှင့် အနက်ရောင် ဒေါသ စစ်သည်တော်တို့ အပေါ်သို့ ဖိအားများ သက်ရောက်စေ၏။

လင်းလုံ ကုန်သွယ်ရေးအဖွဲ့ ခေါင်းဆောင် သေဆုံးသွားပြီ ဖြစ်၏။

ကျန်ရှိနေသော မူလဝိညာဉ် အရှင်သခင်ကြီး (၉) ပါးလည်း အကုန်သေဆုံးသွားခဲ့ပြီ။

အလုပ်သမားများနှင့် အစေခံများမှာ ကြောက်လန့်တကြားဖြင့် ထောင့်တစ်နေရာတွင် ပုန်းကွယ်နေကြသည်။

အင်မော်တယ် အရှင်သခင်ကြီးမှာ စုယွီကို ဒေါသတကြီး စိုက်ကြည့်ကာ အော်ဟစ်လိုက်သည်။

“ငါ ပြောတာ မင်း နားမလည်ဘူးလား”

သို့သော် စုယွီက သူ့ကို အေးစက်စက် ငေးကြည့်လိုက်ပြီး တည်ငြိမ်စွာ ပြောလိုက်၏။

“မင်းတို့ အရှင်သခင်ဆယ်ပါး အင်မော်တယ်မြို့တော်ရဲ့ စည်းမျဉ်းတွေကို မင်းတို့ကိုယ်တိုင် မလိုက်နာနိုင်ဘူးဆိုရင်... ငါ့ကို လာပြီး မစွက်ဖက်နဲ့”

“လင်းလုံ ကုန်သွယ်ရေးအဖွဲ့က ငါ့လူတွေကို မှောင်ခိုဈေးကွက်မှာ ဖမ်းခေါ်သွားတာတောင် မင်းတို့ သတ္တိမရှိတဲ့ အရှင်သခင်ဆယ်ပါး အင်မော်တယ်မြို့တော်က စကားတစ်ခွန်းတောင် ပြောဖို့ မဝံ့မရဲ ဖြစ်နေခဲ့တာ မဟုတ်လား”

“အခု ငါက လူတွေကို လာကယ်တာ... မင်းတို့က တားရဲသေးသလား”

“ဒါမှမဟုတ် မင်းတို့က ငါ့ရဲ့ ယွင်ရှောင် ဆေးလုံးစံအိမ်က လင်းလုံ ကုန်သွယ်ရေးအဖွဲ့ထက် ပိုပြီး ကိုင်တွယ်ရ လွယ်မယ် ထင်နေတာလား”

“မင်းတို့လို အဆင့်မျိုးက ငါ့ကို လာပြီး အမိန့်ပေးဖို့ မပြောနဲ့... ငါ့ကို တားဆီးဖို့တောင် အရည်အချင်း မရှိဘူး”

“အရှက်မရှိလိုက်တာ...”

ထိုပုဂ္ဂိုလ်ကြီးမှာ စုယွီ၏ စကားကြောင့် ဒေါသတကြီး ဖြစ်သွားပြီး မျက်နှာမှာ အစိမ်းရောင် သန်းသွားတော့သည်။ သူသည် လက်ကို ဝှေ့ယမ်းကာ စုယွီကို ထိုးနှက်ရန် ပြင်လိုက်သော်လည်း စိတ်ထဲတွင် ကြောက်ရွံ့မှုများက ဖိစီးနေ၏။

သူသည် စုယွီကို ကြည့်ပြီး တွေးလိုက်သည်။

'ဒီကောင်က ဘယ်သူလဲ... သူ့နောက်ကွယ်မှာ ဘယ်သူရှိနေတာလဲ'

'သူက တကယ်ပဲ အင်မော်တယ် တစ်သောင်း နန်းတော်ရဲ့ အစီအစဉ်တွေကို သိနေတာလား'

ဤသို့ တွေးတောမိပြီးနောက်တွင် သူသည် လက်ကို ပြန်ရုပ်လိုက်ပြီး စိတ်ကို တည်ငြိမ်အောင် ထိန်းကာ အေးစက်စွာ ပြောလိုက်သည်။

“မင်းက ဘယ်သူလဲ... အခုချက်ချင်း ပြောစမ်း... မဟုတ်ရင် ဒီနေ့ မင်း ဒီနေရာမှာပဲ သေရမယ်”

“မင်းမှာ ဘယ်လောက်ကြီးမားတဲ့ အင်အားစုတွေပဲ နောက်ကွယ်မှာ ရှိပါစေ... ငါ့ အရှင်သခင်ဆယ်ပါး အင်မော်တယ်မြို့တော်ကိုတော့ မင်း လာစိန်ခေါ်လို့ မရဘူး”

စုယွီက အေးဆေးပင် ပြုံးလိုက်သည်။

သူက စိတ်ထဲတွင် ကျိတ်ရယ်ရင်း ပြန်ပြောလိုက်၏။

“အင်မော်တယ် တစ်သောင်း နန်းတော်.. အရိုင်းနယ်မြေမှာ ဘာလို့ ရှုံးသွားလဲ သိလား... သူတို့နေရာ သူတို့ မသိဘဲနဲ့ တာအို သခင်ကြီးရဲ့ အခွင့်အရေးကို လုယူဖို့ ကြိုးစားလို့ပဲ”

“တာ့ချန် ကျင့်ကြံခြင်းကမ္ဘာက အင်မော်တယ် ဂိုဏ်းတွေရဲ့ ခေါင်းဆောင်ဆိုတဲ့ ဂုဏ်ပုဒ်နဲ့များ ငါ့ရဲ့ အင်မော်တယ်.. အဲ.. ငါတို့နဲ့ ယှဉ်တိုက်နိုင်မယ်လို့ တကယ်ပဲ ထင်နေခဲ့ကြတာလား.. ဟွန့်.. ကိုယ့်အဆင့်ကိုယ် အရင်ပြန်ကြည့်သင့်တာပေါ့..”

“အခုတော့ သူတို့ အိပ်မက်ကနေ နိုးလာကြပြီ မဟုတ်လား.. ဟဲဟဲ..”

“ဟား ဟား... အခု သူတို့ နိုးထလာပြီ မဟုတ်လား”

အရှင်သခင်ကြီးမှာ စုယွီ၏ စကားကို ကြားလိုက်ရသောအခါ အံ့အားသင့်သွားပြီး အသက်ရှူပင် ရပ်သွားသလို ခံစားလိုက်ရသည်။ သူသည် အလွန်တရာ ထိတ်လန့်သွားပြီး စုယွီကို ကြောင်တောင်တောင်ဖြင့် ငေးကြည့်နေမိ၏။

တာ့ယန် အင်မော်တယ်မင်းဆက်...။

တာ့ယန် အင်မော်တယ်မင်းဆက်က အင်မော်တယ် တစ်သောင်း နန်းတော် ကို အနိုင်ယူလိုက်ခြင်းမှာ မကြာသေးမီကမှ ဖြစ်ပျက်ခဲ့သော အကြောင်းအပျက် တစ်ခုပင် ဖြစ်၏။

ထိုအင်အားစုမှာ မည်သူနည်း။

တာ့ယန် အင်မော်တယ်မင်းဆက်ပင် ဖြစ်၏။

ဤအချက်ကို စဉ်းစားမိလိုက်သည်နှင့် အရှင်သခင်ကြီး၏ တစ်ကိုယ်လုံးမှာ တုန်ယင်သွားပြီး အအေးဓာတ်က အရိုးထဲအထိ စိမ့်ဝင်သွားတော့သည်။

သူ့စိတ်ထဲတွင် ကြောက်ရွံ့မှုများက အဆုံးမဲ့ လှိုင်းတံပိုးကြီးပမာ ဖုံးလွှမ်းသွား၏။