အခန်း ၈၈

အခန်း (၈၈) - ရေဘဝဲလက်တံများ ပြန်လည်ရောက်ရှိလာခြင်း

ဟိုမင်နှင့် ပိုင်ထိတို့က သူမကို တားဆီးရန် ကြိုးစားလိုက်ကြသည်။

ဟိုမင်က လေပွေဓားသိုင်းဖြင့် သူမ၏ ခြေထောက်ကို ပစ်မှတ်ထားကာ တိုက်ခိုက်လိုက်သည်။

သူမက ဘေးဘက်သို့ ခုန်ရှောင်လိုက်ကာ သူ၏တိုက်ကွက်ကို အောင်မြင်စွာ ရှောင်တိမ်းသွားလေသည်။

ပိုင်ထိက ကြက်ခြေခတ်တိုက်ကွက်ဖြင့် လေလှိုင်းခုတ်ချက်တစ်ခုကို သူမဆီသို့ ပစ်လွှတ်လိုက်သည်။

သို့သော်ငြား သူမက ဘေးဘက်သို့ ကျွမ်းထိုးရှောင်တိမ်းသွားပြီးနောက် လင်းဖန်ထံသို့ ခုန်အုပ်လိုက်ချေသည်။

ဒုန်း…

သူမက လင်းဖန်၏ နောက်ကျောကို အနောက်မှနေ၍ ပြင်းပြင်းထန်ထန် ကန်ကျောက်လိုက်သည်။

“အား…”

လင်းဖန်၏ ကျောပြင်မှာ သံမဏိနံရံတစ်ခုပမာ မာကျောနေသည့်အတွက် သူမက နာကျင်စွာ အော်ဟစ်လိုက်လေသည်။

သို့သော် ဤအရာက လင်းဖန်၏ အာရုံကို လွှဲသွားစေရန် လုံလောက်သွားခဲ့သည်။

ထို့ကြောင့် သူမ နောက်ထပ် လုပ်မည့်အရာကိုသိနိုင်ရန် သူက လှည့်ကြည့်လိုက်ရသည်။

ယင်းက ထန်ရွေ့အတွက် အသက်ရှူချောင်သွားစေရန် အခွင့်အရေး ဖြစ်သွားလေသည်။

ဆေးမီးဖိုမှ သူ၏လက်များကို ရုန်းထွက်လိုက်ရာ မီးဖို၏မျက်နှာပြင်ပေါ်တွင် အရေပြားစအချို့ ကပ်ကျန်နေခဲ့သဖြင့် သူက နာကျင်စွာ အော်ဟစ်လိုက်သည်။

သူက ဆေးပုလင်းတစ်လုံးကို အမြန်ထုတ်ယူလိုက်ပြီး အတွင်းမှ ဆေးလုံးတစ်လုံးကို မျိုချလိုက်လေသည်။

လင်းဖန်က သူဘာလုပ်နေသည်ကို မြင်လိုက်ရသောအခါ ရှေ့သို့ ပြေးကန်လိုက်ပြီး ထန်ရွေ့ကို ဆေးမီးဖိုအတွင်းသို့ အတင်းတွန်းပို့လိုက်သည်။

“အား... မင်း သေစေရမယ်”

ဆေးမီးဖို၏ တောက်လောင်နေသော မီးတောက်များထဲသို့ ပြုတ်ကျသွားစဉ် ထန်ရွေ့က အော်ဟစ်လိုက်လေသည်။

ယခုအချိန်တွင် ထိုမိန်းမငယ်ကို ဟိုမင်နှင့် ပိုင်ထိတို့က ဖမ်းဆီးထိန်းချုပ်လိုက်ပြီ ဖြစ်သည်။

လင်းဖန်က သူတို့ကို သွားရောက်ကူညီလိုသဖြင့် သူ၏တူများကို အမြန်ကောက်ယူလိုက်သည်။

ထိုအခိုက် ရင်းနှီးနေသော အသံတစ်ခုက သူ၏စိတ်ထဲတွင် ပေါ်ထွက်လာချေသည်။

[ဒင်]

[ယုတ်မာသော ရည်ရွယ်ချက်ရှိသည့် ဝိညာဉ် ချဉ်းကပ်လာနေသည်ကို ရှာဖွေတွေ့ရှိပါသည်]

[ကလဲ့စားချေအမှတ် ၂၀၀ ရရှိရန် ယုတ်မာသော ရည်ရွယ်ချက်ရှိသူကို သုတ်သင်ပါ]

သူက အလျင်အမြန် လှည့်ကြည့်လိုက်ရာ ဆေးမီးဖိုထဲမှ ပြန်ထွက်လာသော ထန်ရွေ့ကို မြင်လိုက်ရလေသည်။

ထန်ရွေ့၏ပုံစံမှာ ယခုအခါ မိစ္ဆာတစ်ကောင်နှင့် တူနေချေပြီ။

သူ့ကို လွှမ်းခြုံထားသော မီးတောက်များက သူ၏ဝတ်ရုံများကို လောင်ကျွမ်းစေခဲ့ပြီး ကျန်ရှိနေသော ဝတ်ရုံစအချို့မှာ သူ၏အရေပြားပေါ်တွင် ကပ်နေလေသည်။

သူ၏ခန္ဓာကိုယ်မှ မီးခိုးများ ထွက်ပေါ်နေကာ အလွန်ဆိုးရွားသော အသားလောင်ကျွမ်းနံ့များ ထွက်ပေါ်နေသည်။

သူ၏ဆံပင်များမှာ အများစု ပျောက်ကွယ်နေပြီဖြစ်ပြီး မျက်နှာပေါ်တွင်လည်း မီးလောင်ဒဏ်ရာများ အပြည့်ရှိနေသဖြင့် အနီရောင်မိစ္ဆာတစ်ကောင်ပမာ ဖြစ်နေပေသည်။

သူက လင်းဖန်ကို စိုက်ကြည့်လိုက်ရာ အံ့ဩဖွယ်ကောင်းလောက်အောင်ပင် မီးလောင်ခံထားရသော သူ၏အရေပြားများက ဖြည်းညှင်းစွာ ပြန်လည်ပြည့်လာပြီး အနာကျက်လာလေသည်။

ယင်းမှာ ဆေးလုံး၏ အာနိသင်ကြောင့်သာ ဖြစ်ရပေမည်။

ဝှစ်…

ထန်ရွေ့၏ ခန္ဓာကိုယ်ထဲမှ အမည်းရောင် ရေဘဝဲလက်တံနှစ်ခု ထွက်ပေါ်လာပြီး ထိုလက်တံများက လှောင်အိမ်များကို ခတ်ထားသော သံကြိုးများဆီသို့ ဖမ်းဆုပ်လိုက်လေသည်။

ခလွမ်း…

ပြင်းထန်သော ဆွဲငင်မှုနှင့်အတူ သံကြိုးများမှာ ရေဘဝဲလက်တံများ၏ ချိုးဖျက်ခြင်းကို ခံလိုက်ရသည်။

လှောင်အိမ်အတွင်း အကျဉ်းချခံထားရသူများမှာ တစ်ယောက်ကိုတစ်ယောက် ခဏတာ ကြည့်လိုက်ကြပြီးနောက် လှောင်အိမ်များထဲမှ အမြန်ပြေးထွက်သွားကြလေသည်။

လင်းဖန်က သူ၏တူဖြင့် ထန်ရွေ့ဆီသို့ ခုန်အုပ်လိုက်သည်။ သို့သော် ထန်ရွေ့က ရေဘဝဲလက်တံတစ်ခုကို အသုံးပြုကာ သူ၏ရှေ့ရှိ ကလေးတစ်ယောက်ကို ဖမ်းဆွဲလိုက်သည်ကို မြင်လိုက်ရသောအခါ နောက်သို့ ပြန်ဆုတ်လိုက်ရသည်။

ထိုအခါ ကလေး၏ မိဘများက အော်ဟစ်ကာ ရောက်ရှိလာကြသည်။

သူတို့က လင်းဖန်၏လမ်းကို ပိတ်ဆို့လိုက်ကြလေသည်။

“မင်း သူတို့ကို သတ်ပြီး ငါ့ဆီ လာလို့ရပါတယ်လေ”

ထန်ရွေ့က လှောင်ပြုံးပြုံးကာ ပြောလိုက်သည်။

“မင်း ဒီတောသားတွေကို စာနာချင်ယောင် ဟန်ဆောင်မနေစမ်းပါနဲ့”

လင်းဖန်က ထန်ရွေ့၏စကားကို ဂရုစိုက်မနေတော့ဘဲ သူ၏ အံ့ဖွယ်ခုန်ပျံခြင်းစွမ်းရည်ကို အသက်သွင်းလိုက်ကာ တည့်တည့်မတ်မတ် ခုန်တက်လိုက်ပြီး လေထဲမှနေ၍ သူ၏တူတစ်လက်ကို ထန်ရွေ့ဆီသို့ ပစ်ပေါက်လိုက်လေသည်။

ဒေါင်…

ထန်ရွေ့က သူ၏ ရေဘဝဲလက်တံကို အသုံးပြု၍ တူကို ကာကွယ်လိုက်သည်။

ဝှစ်…

လင်းဖန်က အောက်သို့ ပြန်ဆင်းလာစဉ် ကျန်ရှိနေသော သူ၏တူကို ထန်ရွေ့ဆီသို့ ပစ်လွှတ်လိုက်ပြန်သည်။

ဒေါင်…

ဒီတစ်ကြိမ်တွင်မူ ထန်ရွေ့၏ ခေါင်းကို ထိမှန်သွားခဲ့ပြီး သူ၏ပါးပြင်ပေါ်တွင် ချိုင့်ခွက်တစ်ခု ကျန်ရစ်ခဲ့လေသည်။

သို့သော် ထိုချိုင့်ခွက်မှာ ဖြည်းညှင်းစွာဖြင့် ပြန်လည်ပြည့်တက်လာသည်။

ဆေးလုံး၏ အာနိသင်ကြောင့် ထန်ရွေ့၏ ပြန်လည်ကုစားနိုင်စွမ်းများ မြင့်တက်လာခဲ့ပုံရပေသည်။

“ဆေးလုံးတွေပဲ”

လင်းဖန်သည် မိမိထံတွင်လည်း ဆေးလုံးအချို့ ရှိနေသေးကြောင်း ရုတ်တရက် သတိရသွားလေသည်။

ကျောက်ချင်းယင်သည် သူ့အား မူလအဆီအနှစ်ဆေးလုံးအချို့ ပေးခဲ့ဖူးလေသည်။

သူသည် ဆေးလုံးတစ်လုံးကို အမြန်ထုတ်ယူကာ ပါးစပ်ထဲသို့ ပစ်ထည့်လိုက်သည်။

ဆေးလုံးက ဝမ်းဗိုက်ထဲသို့ ရောက်ရှိသွားသည်နှင့် သူသည် ကွဲပြားခြားနားမှုကို ချက်ချင်း ခံစားလိုက်ရသည်။

သူ၏ အာရုံခံစားမှုများမှာ သိသိသာသာ ထက်မြက်လာခဲ့သည်။

မြေအောက်ခန်းအတွင်းရှိ အမျိုးစုံလှသော အနံ့ဆိုးများကို ရရှိနေရုံမက အသေးစိတ်အချက်အလက်အားလုံးကိုလည်း ကွင်းကွင်းကွက်ကွက် မြင်တွေ့နေရကာ တောယုန်၏ အကြားအာရုံစွမ်းရည်ကို အသက်သွင်းထားသကဲ့သို့ အရာအားလုံးကို သဲသဲကွဲကွဲ ကြားနေရတော့သည်။

သူသည် သံမဏိလက်သည်းစွမ်းရည်ကို အသက်သွင်းရန် ချက်ချင်း တွေးတောလိုက်သည်။

ဝှစ်…

သူ၏ လက်ချောင်းများထံမှ လိမ္မော်ရောင် အလင်းတန်းတစ်ခု ဖြာထွက်လာပြီး ရှည်လျားသော လက်သည်းပုံသဏ္ဌာန်များအဖြစ် ပြောင်းလဲသွားလေသည်။

လင်းဖန်သည် အတွင်းပိုင်းမှ တိုးထွက်လာသော ခွန်အားများကို ခံစားလိုက်ရပြီးနောက် ထန်ရွေ့ရှိရာ ဘေးဘက်သို့ အမြန် ခုန်ပျံသွားလိုက်သည်။

ဝှစ်…

သူသည် မြေပြင်ပေါ်သို့ ဆင်းသက်ပြီးသည်နှင့် ထန်ရွေ့ဆီသို့ လွှားခနဲ ခုန်ဝင်သွားပြန်ရာ အလွန် မြန်ဆန်လွန်းလှသဖြင့် နက်ပြာရောင် အရိပ်တစ်ခုအဖြစ်သာ မြင်တွေ့လိုက်ရတော့သည်။

ထန်ရွေ့က သူ၏ နက်မှောင်သော ရေဘဝဲလက်များကို အသုံးပြုကာ လင်းဖန်အား ရိုက်နှက်ရန် ကြိုးစားလိုက်သည်။

သို့သော်ငြား လင်းဖန်၏ တောက်ပလှသော လိမ္မော်ရောင် သံမဏိလက်သည်းများက ထိုရေဘဝဲလက်များကို အပိုင်းပိုင်းအစစ ဖြစ်သွားအောင် ဆုတ်ဖြဲပစ်လိုက်လေသည်။

ယခုအခါ လင်းဖန်မှာ ထန်ရွေ့၏ ရှေ့တည့်တည့်သို့ ရောက်ရှိနေပြီ ဖြစ်သည်။

သူသည် အချိန်ဆွဲမနေတော့ဘဲ ညာဘက်လက်သည်းဖြင့် ထန်ရွေ့၏ လည်ပင်းဆီသို့ လွှဲယမ်းကာ ပွတ်ဆွဲလိုက်သည်။

ထန်ရွေ့က နောက်သို့ ဆုတ်လိုက်သော်လည်း နောက်ကျသွားခဲ့လေပြီ။

သံမဏိလက်သည်းမှာ လည်ပင်းကို ထိမှန်သွားသော်လည်း သွေးလွှတ်ကြောကို ဖြတ်တောက်နိုင်လောက်အောင် နက်ရှိုင်းခြင်း မရှိချေ။

ထို့နောက် လင်းဖန်သည် သူ၏ ဘယ်ဘက်လက်သည်းကို ထန်ရွေ့၏ ဝမ်းဗိုက်ထဲသို့ ထိုးစိုက်လိုက်ပြန်သည်။

ဤတစ်ကြိမ်တွင်မူ လက်ချောင်းငါးချောင်းလုံးက ဝမ်းဗိုက်အတွင်းသို့ နက်ရှိုင်းစွာ နစ်ဝင်သွားခဲ့ပြီး လင်းဖန်က လက်သည်းများကို အောက်သို့ ဆွဲချပစ်လိုက်သည်။

ထန်ရွေ့၏ ဝမ်းဗိုက်ပေါ်တွင် ရှည်လျားနက်ရှိုင်းသော ဒဏ်ရာကြီး ငါးခု ထင်ကျန်ရစ်လေသည်။

“အား”

ထန်ရွေ့သည် နာကျင်စွာဖြင့် အော်ဟစ်လိုက်ပြီး လင်းဖန်၏ အရှေ့ဘက်သို့ ကန်ကျောက်လိုက်သည်။

လင်းဖန်သည် ထန်ရွေ့၏ ညာဘက်ပေါင်ကို သူ၏လက်သည်းများဖြင့် ဖမ်းဆုပ်လိုက်ရာ လက်သည်းများမှာ တို့ဟူးတုံးကို ထိုးသွင်းလိုက်သကဲ့သို့ လွယ်ကူစွာ နစ်ဝင်သွားလေသည်။

လင်းဖန်သည် ညာဘက်ပေါင်အတွင်းသို့ နစ်ဝင်နေသော လက်သည်းများကို ခြေကျင်းဝတ်အထိ တစ်လျှောက်လုံး အားကုန် ဆွဲချပစ်လိုက်သည်။

သူ၏ ညာဘက်ခြေထောက်တစ်ခုလုံးမှာ စုတ်ပြတ်သတ်သွားချေပြီ။

ထန်ရွေ့သည် အခြားရေဘဝဲလက်တစ်ခုကို ထုတ်လွှတ်ကာ ရုန်းရင်းဆန်ခတ် ဖြစ်နေသော လူအုပ်ကြားမှ ကလေးငယ်တစ်ဦးကို ဖမ်းဆွဲပြီး လင်းဖန်ထံသို့ ပစ်ပေါက်လိုက်သည်။

လင်းဖန်သည် သံမဏိလက်သည်းစွမ်းရည်ကို အမြန် သိမ်းလိုက်ပြီး ကလေးငယ်ကို လက်နှစ်ဖက်ဖြင့် ဖမ်းထိန်းလိုက်သည်။

ခြေထောက်ကျိုးနေသော ထန်ရွေ့သည် ရွာသားများ ထွက်ပြေးတိမ်းရှောင်နေကြသည့် ရုန်းရင်းဆန်ခတ် အခြေအနေနှင့် အာရုံလွှဲသွားမှုကို အခွင့်ကောင်းယူကာ ထွက်ပြေးရန် ကြိုးစားလေသည်။

လင်းဖန်သည် ကလေးငယ်ကို မြေပြင်ပေါ်သို့ ချပေးလိုက်ပြီး သူ၏တူကို ကောက်ယူကာ ထန်ရွေ့၏ ကျောပြင်ဆီသို့ ခုန်ဝင်လိုက်သည်။

သူသည် ယင်ယန် ကြက်ခြေခတ် ရိုက်ချက်ဖြင့် ထန်ရွေ့၏ ခါးအထက်ပိုင်းကို ပြင်းထန်စွာ ရိုက်ချလိုက်သည်။

ဗုန်း…

ထို့နောက် ဖြစ်ပေါ်လာသော ပေါက်ကွဲမှုကြောင့် ထန်ရွေ့မှာ ဒူးထောက်ကျသွားပြီး သူ၏ကလီစာများမှာ မြေပြင်ပေါ်သို့ လွင့်စင်ထွက်ကျလာလေသည်။

လင်းဖန်မှာ အချိန်ဆွဲမနေတော့ဘဲ သူ၏ ယင်ယန် ကြက်ခြေခတ်ရိုက်ချက်ကို ထန်ရွေ့၏ လည်ပင်းဆီသို့ ထပ်မံ ရိုက်ချလိုက်ပြန်သည်။

ရေဘဝဲလက်နှစ်ခုက လင်းဖန်ထံသို့ ထိုးစိုက်ဝင်လာသော်လည်း ၎င်းတို့သည် အရေပြားမျှကိုသာ ထိုးဖောက်နိုင်ပြီး ဆက်လက်၍ မတိုးဝင်နိုင်တော့ချေ။

လင်းဖန်၏ ခန္ဓာကိုယ်ကျင့်ကြံမှုက ထိုတိုက်ခိုက်မှုကို ခုခံနိုင်စွမ်း ရှိစေခဲ့ခြင်းပင်။

ဘုန်း…

မကြာမီပင် ယင်နှင့်ယန်ချီများ ဓာတ်ပြုသွားပြီး ထန်ရွေ့၏ လည်ပင်းတွင် ပြင်းထန်သော ပေါက်ကွဲမှုတစ်ခု ဖြစ်ပွားသွားတော့သည်။

ဘုန်း…

သူ၏ ဦးခေါင်းမှာ ကိုယ်ထည်မှ ပြတ်တောက်ကာ မြေပြင်ပေါ်သို့ လိမ့်ဆင်းသွားလေသည်။

ခန္ဓာကိုယ်မှ သွေးများ ပန်းထွက်လာပြီး ကြီးမားသော သွေးအိုင်ကြီးတစ်ခု ဖြစ်ပေါ်လာသည်။

လင်းဖန်၏ စိတ်ထဲတွင် ရင်းနှီးနေသော အသံတစ်ခု ပေါ်ထွက်လာသည်။

[ဒင်]

[ယုတ်မာသော ရည်ရွယ်ချက်ရှိသူကို သုတ်သင်နိုင်ခဲ့သည့်အတွက် ဂုဏ်ယူပါသည်]

[ကလဲ့စားချေအမှတ် + ၂၀၀]

[လက်ရှိ ကလဲ့စားချေအမှတ် - ၁၄၆၀]

မိန်းမပျိုလေးမှာ ထွက်ပြေးရန် ကြိုးစားနေသည်ကို လင်းဖန် မြင်တွေ့လိုက်ရသဖြင့် စနစ်ကို စစ်ဆေးရန် အချိန်မရှိတော့ချေ။

သူမသည် ဂူအတွင်းပိုင်းသို့ ပိုမိုနက်ရှိုင်းစွာ ပြေးဝင်သွားလေသည်။

သူသည် နောက်မှ လိုက်လံဖမ်းဆီးလိုသော်လည်း မြေအောက်ခန်းအတွင်း ရုန်းရင်းဆန်ခတ် ထွက်ပြေးနေကြသော ရွာသားများက သူ၏လမ်းကို ပိတ်ဆို့ထားကြသည်။

ဟိုမင်နှင့် ပိုင်ထိတို့မှာလည်း ထိုမိန်းမပျိုနောက်သို့လိုက်ရန် အဆင်မပြေဘဲ ဖြစ်နေကြတော့သည်။