အခန်း ၇၅

အခန်း (၇၅) တစ္ဆေများနှင့် ချန်လန်၏ ပထမဆုံး တိုက်ပွဲ

အပြာရောင်ကြယ်၌....

ချန်လန်သည် မစ္စတာ မာဆက်ခ်ကို သူ၏ အိမ်ဟောင်းသို့ မဟုတ်ဘဲ သူ၏အိမ်အသစ်သို့ တိုက်ရိုက် ခေါ်ဆောင်လာခဲ့သည်။ ဤသည်မှာ ချင်မြို့တော်ရှိ ဈေးအကြီးဆုံး စံအိမ်ဖြစ်ပြီး စတုရန်းမီတာ တစ်ထောင်ကျော် ကျယ်ဝန်းကာ ယွမ်သန်းတစ်ရာကျော် တန်ဖိုးရှိပြီး နိုင်ငံ၏ ထိပ်တန်းကာကွယ်ရေး အထောက်အကူပြုပစ္စည်းများ တပ်ဆင်ထားသည်။

ထိုအချိန်က မျက်စိတစ်မှိတ်အတွင်းမှာပင် ဤစံအိမ်ကို သူ ဝယ်ယူခဲ့ခြင်း ဖြစ်ပေ၏။

ချန်လန်သည် အပြင်ဘက်ရှိ ကောင်းကင်ကို ကြည့်လိုက်ရာ ညရောက်နေလေပြီ။ သူသည် ကောင်းမွန်သောညစာကို ချက်ပြုတ်ရန်အတွက် မီးဖိုချောင်ရှိ ရေခဲသေတ္တာထဲမှ ပါဝင်ပစ္စည်းများကို ထုတ်ယူလိုက်သည်။

"မစ္စတာ မာဆက်ခ်... ခင်ဗျား နည်းနည်းလောက် စားမလား..."

ချန်လန်သည် သူ၏လက်ထဲရှိ အဆင့်မြင့် အမဲသားကို လှုပ်ယမ်းကာ မေးလိုက်သည်။

မစ္စတာ မာဆက်ခ် ခေါင်းယမ်းပြလေ၏။

"ဟင့်အင်း..."

ချန်လန် ထပ်မပြောတော့ဘဲ မီးဖိုကိုဖွင့်ရန် လှည့်လိုက်ပြီး အမဲသားကင်ရန် ပြင်ဆင်လိုက်သည်။

မစ္စတာ မာဆက်ခ်သည် ဆိုဖာရှေ့တွင် ထိုင်ကာ တီဗီဖွင့်ပြီး ရုပ်ရှင်ကို စတင်ကြည့်ရှုနေတော့သည်။

"အို... ခင်ဗျားက လူတွေရဲ့ ရုပ်ရှင်တွေကို ကြည့်ရတာ သဘောကျတာလား..."

ချန်လန်က စိတ်ဝင်စားသွားပြီး ရယ်မောရင်း မေးမြန်းသည်။

မစ္စတာ မာဆက်ခ်က ခေါင်းညိတ်လိုက်သည်။

"ဟုတ်တယ်... ခင်ဗျားတို့ လူသားတွေရဲ့ ရုပ်ရှင်တွေက အရမ်းစိတ်ဝင်စားဖို့ ကောင်းပြီး ခိုင်မာတဲ့ ဇာတ်အိမ်တွေ ပါဝင်တယ်... တိုက်တန်းနစ်နဲ့ ရှောရှန်း လွတ်မြောက်မှုကို ကျွန်တော် ကြည့်ပြီးပြီ... အရမ်းကောင်းတာပဲ..."

လူသား ယဉ်ကျေးမှုအပေါ် မစ္စတာ မာဆက်ခ် ၏ နားလည်မှု နက်ရှိုင်းနေခြင်းကြောင့် ချန်လန် အနည်းငယ် အံ့အားသင့်သွားသည်။ ဒယ်အိုးကို အပူပေးပြီး ဆီထည့်နေစဉ် သူက ပေါ့ပေါ့ပါးပါး အကြံပြုလိုက်သည်။

"ဂေါ့ဖားသားဇာတ်လမ်းတွဲတွေ ဖောရက်စ်ဂမ့်ဘ်နဲ့ အင်ဆက်ရှင်းတို့လည်း ကောင်းတယ်... ခင်ဗျား ကြည့်ကြည့်လို့ ရတယ်..."

မကြာမီ ဆွဲဆောင်မှုရှိသော အသားနံ့က မီးဖိုချောင်ထဲတွင် ပြည့်နှက်သွားလေ၏။

ချန်လန်က သူ၏ အမဲသားကို ကျက်လုနီးပါး ကင်လိုက်သည်။ အပြင်ဘက်တွင် ကျွမ်းနေပြီး အတွင်းတွင် နူးညံ့ကာ အရည်များ ထိန်းသိမ်းထားသော ထိုအသွင်အပြင်ကို သူ နှစ်သက်သည်။

ထို့နောက် သူသည် ခံတွင်းမြိန်စေသော ခရမ်းချဉ်သီးနှင့် ကြက်ဥ ခေါက်ဆွဲ တစ်ပန်းကန်ကို အလျင်အမြန် ချက်ပြုတ်လိုက်၏။ နောက်ဆုံးတွင် မြေအောက်ဝိုသါခန်းမှ ရိုမန်နီကွန်တီဝိုင်တစ်ပုလင်းကို ယူကာ သူ၏ ဖန်ခွက်ထဲသို့ တစ်ဝက်ခန့် ငှဲ့လိုက်သည်။

ယခင်က ဘဝကို အမှန်တကယ် မခံစားခဲ့ဖူးသူပီပီ အဆုံးမရှိလုနီးပါးဖြစ်သော ကြွယ်ဝချမ်းသာမှုနှင့် အာဏာကို ရရှိပြီးနောက်တွင် သူ့ထံ၌ သူဌေးပေါက်စ စိတ်ဓာတ်တစ်ခု မလွဲမသွေ ဖြစ်ပေါ်လာခဲ့သည်။ သူသည် ငွေများကို ဖြုန်းတီးကာ သူ၏ ရုပ်ပိုင်းဆိုင်ရာ လိုအင်ဆန္ဒများကို တိုက်ရိုက်အကျဆုံး နည်းလမ်းဖြင့် ဖြည့်ဆည်းပြီး အမြင့်ဆုံး အာရုံခံစားမှု အတွေ့အကြုံကို လိုက်စားလာခဲ့လေ၏။

ဒယ်အိုးထဲရှိ အပိုပါလာသော အမဲသားကင်ကို ကြည့်ရင်း ချန်လန်သည် စိတ်ကူးပေါက်ကာ ကညွတ်နှင့် ခရမ်းချဉ်သီးလေးများကို ပြုတ်၍ သေချာစွာ ပြင်ဆင်လိုက်ပြီး ဓား၊ခက်ရင်းတို့နှင့်အတူ မစ္စတာ မာဆက်ခ် ၏ရှေ့ရှိ ကော်ဖီစားပွဲပေါ်တွင် တင်ပေးလိုက်သည်။

"ခင်ဗျား တကယ် မစားဘူးဆိုတာ သေချာလား... စမ်းကြည့်ပါဦး... ခင်ဗျားတို့ဘက်က အစားအစာတွေနဲ့ နည်းနည်းတော့ ကွာခြားနိုင်တယ်..."

ချန်လန်က ပြောလိုက်သည်။

ကြွယ်ဝသော အနံ့နှင့် ဆွဲဆောင်မှုရှိသော အရောင်အဆင်း ထွက်ပေါ်နေသည့် သူ၏ရှေ့ရှိ လူသား အစားအစာကို ကြည့်ရင်း မစ္စတာမာဆက်ခ်၏ ယုန်နှာခေါင်း အနည်းငယ် လှုပ်ရှားသွားပြီး သူ၏ မျက်လုံးများတွင် သိချင်စိတ်နှင့် တွေဝေမှု အရိပ်အယောင်တစ်ခု ဖြတ်ပြေးသွားလေ၏။

အဆင့်မြင့်တစ္ဆေတစ်ကောင်အနေဖြင့် သူ လူသားအစားအစာများကို မစားနိုင်ခြင်း မဟုတ်ဘဲ မလိုအပ်ဟု ခံစားရခြင်းသာဖြစ်သည်။

ချန်လန်၏ အားပေးသော အကြည့်အောက်တွင် နောက်ဆုံး၌ သူသည် သပ်ရပ်လှပပုံရသော ဓားနှင့် ခက်ရင်းကို ကောက်ကိုင်လိုက်ပြီး အမဲသားအတုံးသေးသေးလေးတစ်တုံးကို အနည်းငယ် အဆင်မပြေစွာ လှီးဖြတ်၍ သူ၏ ပါးစပ်ထဲသို့ ထည့်လိုက်သည်။

သူ၏ သွားများသည် ကြွပ်ရွသော အပြင်လွှာကို ကိုက်ဖောက်သွားပြီး အတွင်းရှိ အရည်ရွှမ်းသော အနှစ်များကို ခံစားလိုက်ရချိန်၌ မစ္စတာ မာဆက်ခ်၏ အနီရောင်မျက်လုံးများ ရုတ်တရက် ပြူးကျယ်သွားလေ၏။

"အင်း..."

သူသည် ကျေနပ်စွာ ရေရွတ်လိုက်ပြီး သေချာစွာ ဝါးစားကာ အမဲသား၏ ကြွယ်ဝသော အနံ့၊ ငရုတ်ကောင်းမည်း၏ အနည်းငယ် စပ်သော အရသာနှင့် သူ၏ ပါးစပ်ထဲတွင် အရည်ပျော်သွားသော အဆီများ၏ အံ့အားသင့်ဖွယ် ခံစားချက်ကို အရသာခံနေသည်။

"အရမ်း အရသာရှိတာပဲ... ဒါက ထူးခြားတဲ့ အရသာပဲ... လူသားတွေရဲ့ အစားအစာက ဒီလောက်ထိ အံ့အားသင့်စရာကောင်းလိမ့်မယ်လို့ ကျွန်တော် ထင်မထားခဲ့ဘူး..."

သူ ပုံမှန်အားဖြင့် အကြိုက်ဆုံးမှာ ကြောက်ရွံ့မှုများ ပြည့်နှက်နေသော ဦးနှောက်အနှစ်များတွင် နှစ်ထားသည့် မုန်လာဥနီများဖြစ်ကြောင်း သေချာပေ၏။ ဘဝစွမ်းအင်နှင့် ပြင်းထန်သော စိတ်ခံစားမှုများ ရောနှောနေသော ထိုအရသာသည် သူ့အတွက် ထိပ်တန်းအဆင့်ပင်။

သို့သော် ယခုအချိန်၌ တခြားဟင်းလျာတစ်ခုကို သူ သဘောကျသွားပုံရပြီး ဤသည်မှာ လူသားကမ္ဘာမှ ဖြစ်နေသည်ကို သူ တွေ့ရှိလိုက်ရသည်။

မစ္စတာ မာဆက်ခ်၏ အံ့အားသင့်နေသော်လည်း ကျော့ရှင်းသော အမူအရာကို ထိန်းသိမ်းရန် ကြိုးစားနေပုံကို ကြည့်ရင်း ချန်လန်သည် အားရပါးရ မရယ်မောဘဲ မနေနိုင်ခဲ့ချေ။ ဤသည်မှာ သူကိုယ်တိုင် အစားအသောက်များကို ခံစားရခြင်းထက်ပင် ပို၍စိတ်ကျေနပ်စရာကောင်းသည်ဟု ခံစားလိုက်ရသည်။

သူ ဝိုင်ခွက်ကို မြှောက်လိုက်ပြီး တီဗီစခရင်နှင့် အမဲသားကင်ကို အရသာခံနေသော မစ္စတာ မာဆက်ခ် ထံသို့ လက်ဟန်ပြလိုက်၏။

"လူသားကမ္ဘာကနေ ကြိုဆိုပါတယ် မစ္စတာ မာဆက်ခ်..."

သို့သော် လူသားနှင့်တစ္ဆေတို့ အစားအသောက်များကို အရသာခံနေစဉ် စံအိမ်အတွင်း၌ အချက်ပေးသံတစ်သံ ရုတ်တရက် မြည်ဟည်းလာသည်။

ဥဩသံများနှင့်အတူ စံအိမ်တစ်ခုလုံးတွင် အနီရောင် မီးများ လင်းလက်လာသည်။

【သတိပေးချက်... တစ္ဆေများ၏ ကျူးကျော်ဝင်ရောက်မှုကို ထောက်လှမ်းမိသည်... စံအိမ် ကာကွယ်ရေးစနစ်ကို အသက်သွင်းနေသည်...】

ဘန်း... ဘန်း... ဘန်း...

စံအိမ်၏အပြင်ဘက် နံဘေးပတ်လည်မှ ခပ်အုပ်အုပ်အသံများ ဆက်တိုက်ထွက်ပေါ်လာသည်။ ဧရာမကျည်ကာမှန်ပြတင်းပေါက်များမှတဆင့် မြေပြင်မှ ထူထဲသော သတ္တုစပ်နံရံများ ရုတ်တရက် ထွက်ပေါ်လာသည်ကို မြင်တွေ့နိုင်လေ၏။ ဤနံရံများသည် အလိုအလျောက် ဆန့်ထွက်လာပြီး လေးလံသော သတ္တုအချင်းချင်း ပွတ်တိုက်သံများနှင့်အတူ ပေါင်းစပ်သွားကာ စက္ကန့်ပိုင်းအတွင်း စံအိမ်ကို ခံတပ်တစ်ခုကဲ့သို့ လုံးလုံးလျားလျား ဝန်းရံသွားသည်။ ဤသည်က စံအိမ်ကို တင်းကျပ်စွာ ပိတ်ဆို့ကာ အတွင်းပိုင်းနှင့်အပြင်ပိုင်းကို အဆက်အသွယ် ဖြတ်တောက်လိုက်သည်။

မျက်နှာကြက်နှင့် နံရံများပေါ်တွင် မရေမတွက်နိုင်သော အပေါက်များ တိတ်တဆိတ် ပွင့်လာပြီး နက်ရှိုင်းသော အပြာရောင် စွမ်းအင်လက်နက် ပြောင်းဝများကို ဖော်ပြလိုက်၏။ စံအိမ် တစ်ခုလုံးသည် နေချင်စဖွယ် ဇိမ်ခံစံအိမ်ကြီးတစ်ခုမှ ကြောက်မက်ဖွယ်ကောင်းသော တိုက်ခိုက်ရေး ခံတပ်တစ်ခုအဖြစ်သို့ ချက်ချင်းပြောင်းလဲသွားသည်။

ချန်လန်၏မျက်နှာပေါ်ရှိ အပြုံး ပျောက်ကွယ်သွားသည်။ သူသည် ဝိုင်နီခွက်ကို စားပွဲပေါ်သို့ "ဘုန်း" ခနဲ အသံနှင့်အတူ ဆောင့်ချလိုက်ရာ အတွင်းရှိ အရည်များ ဖိတ်စင်သွားလေ၏။

မစ္စတာ မာဆက်ခ်၏ တုံ့ပြန်မှုမှာ ပို၍ပင် မြန်ဆန်သည်။

အချက်ပေးသံ မြည်လာသည်နှင့် တစ်ပြိုင်နက် သူသည် ဓားနှင့်ခက်ရင်းကို ချထားပြီးဖြစ်သည်။ အစားအသောက်များကြောင့် ရရှိခဲ့သော သူ၏ ပြေလျော့နေသည့် ကိုယ်ဟန်အမူအရာများ ပျောက်ကွယ်သွားပြီး ထိပ်တန်းတစ္ဆေတစ်ကောင်၏ နိုးကြားမှုနှင့် အေးစက်မှုတို့က အစားထိုး ဝင်ရောက်လာသည်။

သူ၏ အနီရောင် ယုန်မျက်လုံးများ အနည်းငယ် ကျဉ်းမြောင်းသွားပြီး သူ၏ အာရုံခံစားမှုများသည် ဒီရေလှိုင်းတစ်ခုအလား အရပ်မျက်နှာအသီးသီးသို့ ပျံ့နှံ့သွားလေ၏။

"သူတို့ ရောက်လာပြီ... ယော်ဆန်နဲ့ တစ္ဆေဒါဇင်ပေါင်းများစွာကို ကျွန်တော် မြင်နေရတယ်... သူတို့ရဲ့ စွမ်းအားတွေကတော့ ကွဲပြားတယ်... ဒါပေမဲ့ အစွမ်းအထက်ဆုံး တစ်ကောင်က တစ္ဆေဘုရင်ပဲ... ကြည့်ရတာ သူက ခင်ဗျားကို သတ်ဖို့ ဘယ်လိုတန်ကြေးပဲပေးရပေးရ ဆန္ဒရှိနေတဲ့ပုံပဲ..."

ထိုအချိန်၌ စံအိမ်အပြင်ဘက်တွင် ယော်ဆန်သည် ရှေ့ဆုံး၌ မတ်တတ်ရပ်နေလေ၏။ သူ၏နောက်တွင် စွမ်းအားအမျိုးမျိုးရှိသည့် တစ္ဆေဒါဇင်ပေါင်းများစွာ ရှိနေပြီး အစွမ်းထက်ဆုံးမှာ သူ၏ဘေးရှိ တစ္ဆေတစ်ကောင်ပင်။

ဤသည်မှာ ဝတ်ရုံခြုံထားသော တစ္ဆေတစ်ကောင်ဖြစ်ပြီး သူ၏အသွင်အပြင်ကို ဖုံးကွယ်ထားသော်လည်း သူ ထုတ်လွှတ်ထားသော စွမ်းအင်လှိုင်းမှာ အလွန်အမင်း ကြောက်မက်ဖွယ် ကောင်းနေသည်။

"ယော်ဆန်... သခင်ဟေးယွီ လိုချင်တဲ့ ပစ်မှတ်က အထဲမှာလား..."

တစ္ဆေဘုရင်က အေးစက်စက် မေးလိုက်သည်။

သာမန် လူသားတစ်ယောက်အတွက် အရှင်သခင်က ဘာလို့ သူ့ကို လှုပ်ရှားခိုင်းရတာလဲဆိုတာကို သူ နားမလည်နိုင်ခဲ့ဘူး... ဒါက ခြင်ကို အမြောက်နဲ့ ပစ်သလိုပဲ....

သူ တွေးတောလိုက်မိသည်။

"တစ္ဆေဘုရင်... ပေါ့ပေါ့ဆဆ မနေပါနဲ့... ဒီလူသားဆီမှာ ကြောက်ရွံ့မှုသတ်ဓား ရှိနေတယ်..."

"ဟက်... ကြောက်ရွံ့မှုသတ်ဓား လောက်လေးကို... အဲ့ဒါက ဘယ်သူသုံးတာလဲ ဆိုတဲ့အပေါ်မှာ မူတည်တယ်... အားလုံးပဲ တိုက်ခိုက်ကြ..."

တစ္ဆေဘုရင်က အော်ဟစ်လိုက်သည်။

အချိန်တခဏအတွင်း သူ၏နောက်ရှိ တစ္ဆေများသည် လက်နက်အမျိုးမျိုးကို ဝှေ့ယမ်းကာ ကြောက်မက်ဖွယ် စွမ်းအင်လှိုင်းများကို ထုတ်လွှင့်ပြီး စံအိမ်ဆီသို့ တစ်ကောင်ပြီးတစ်ကောင် ပြေးဝင်သွားကြ၏။ သူတို့သည် အမျိုးမျိုးသော တစ္ဆေသိုင်းပညာများကို အသုံးပြုကြပြီး သတ္တုနံရံများပေါ်တွင် အရာများ စွဲထင်ကျန်ရစ်စေခဲ့သည်။

စံအိမ်အတွင်း၌ အချက်ပေးသံများ အဆက်မပြတ် မြည်ဟည်းနေသည်။

【သတိပေးချက်... ကာကွယ်ရေး ၃၀ ရာခိုင်နှုန်း ပျက်စီးသွားပါပြီ...】

【သတိပေးချက်... ကာကွယ်ရေး ၅၀ ရာခိုင်နှုန်း ပျက်စီးသွားပါပြီ...】

【သတိပေးချက်... ကာကွယ်ရေး ၇၀ ရာခိုင်နှုန်း ပျက်စီးသွားပါပြီ...】

ချန်လန် အံ့အားသင့်သွားသည်။

ကာကွယ်ရေးစနစ်သည် ခိုင်မာမည်ဟု သူ တွေးထင်ထားခဲ့သော်လည်း ဤသည်က ရန်သူများကို မတားဆီးနိုင်သေးချေ။

"မစ္စတာ ချန်လန်... ခင်ဗျားရဲ့ စံအိမ်က အပြင်က တစ္ဆေတွေကို တောင့်မခံနိုင်ဘူး... သူတို့ထဲက အများကြီးက တစ္ဆေစစ်သူကြီးတွေပဲ... လောလောဆယ် အပြာရောင်ကြယ်မှာ သူတို့ကို ခုခံနိုင်စွမ်းရှိတဲ့ ကာကွယ်ရေး ပစ္စည်းမျိုး မဖန်တီးနိုင်သေးဘူး..."

"ဒါဆိုရင်လည်း တံခါးတွေကို ဖွင့်ပြီး သူတို့ကို ဝင်ခွင့်ပေးလိုက်ပေါ့..."

ချန်လန်က အေးစက်စက် လှောင်ပြုံးပြုံးလိုက်၏။

သူ စကားပြောပြီးသည်နှင့် တပြိုင်နက် ကြယ်ရောင်များ စီးဆင်းနေသော ဓားရှည်တစ်လက်က သူ၏ ညာဘက်လက်ထဲတွင် လေဟာနယ်မှ ထွက်ပေါ်လာပြီး နဂါးငွေ့တန်းကို ကိုင်ဆောင်ထားသကဲ့သို့ ဖြစ်နေသည်။

ဤဓားကို သူ ကိုင်ထားသဖြင့် မည်သည့် တစ္ဆေမျိုးလာလာ သူ ကြောက်ရွံမည်မဟုတ်ချေ။

ထိုအချိန်၌ စံအိမ်၏ ကာကွယ်ရေးများ လုံးလုံးလျားလျား ပြိုလဲပျက်စီးသွားသည်။

【သတိပေးချက်... ကာကွယ်ရေး လုံးဝပြိုလဲပျက်စီးသွားပါပြီ... ကျေးဇူးပြု၍ အမြန်ဆုံး ထွက်ပြေးပါ...】

အချိန်တခဏအတွင်း စံအိမ်ကို ဝန်းရံထားသော သတ္တုနံရံများ ပြိုကျသွားပြီး တစ္ဆေများ တစ်ကောင်ပြီးတစ်ကောင် ထွက်ပေါ်လာပေ၏။ စံအိမ်အတွင်းရှိ စက်သေနတ်များသည် တစ္ဆေများဆီသို့ ချက်ချင်းချိန်ရွယ်လိုက်ကြသည်။

"ပစ်ခတ်မှု စတင်စမ်း..."

ချန်လန်က လက်ဝှေ့ယမ်းကာ အေးစက်စက် အော်ဟစ်လိုက်သည်။

စက်သေနတ်များသည် ရူးသွပ်စွာ စတင်ပစ်ခတ်ကြပြီး ကျည်ဆန်များသည် တန်ဖိုးမရှိသကဲ့သို့ ဖြာထွက်လာကာ တစ္ဆေများကို တိုက်ခိုက်လိုက်၏။