အခန်း ၂၆၃

အခန်း (၂၆၃) ကြေးစားမဟာမိတ်အဖွဲ့

ကျိုးယွမ်သည် အခန်းထဲမှ ထွက်ခွာလာခဲ့လေ၏။

အရိပ်ခန်းမမှ လူသုံးဦးကို သူက နဂါးဝန်ဆောင်မှုပေးသကဲ့သို့ (ဖျောက်ဖျက်ရှင်းလင်းခြင်းကို တင်စားသည်) အလုံးစုံ ရှင်းလင်းပေးလိုက်ပြီဖြစ်သည်။

သူသည် လမ်းလျှောက်ရင်း သူ၏ရှေ့ရှိ စနစ် အချက်အလက်များကို ကြည့်နေလေ၏။

[ပိုင်ရှင်: ကျိုးယွမ်]

[ကျင့်စဉ်အဆင့်: နတ်ဘုရားအသွင်ပြောင်း အထွတ်အထိပ်အဆင့်: ၇၀၄၆၇၄၃/၉၆၀၀၀၀၀၀]

[သက်တမ်း: ၂၉/၁၁၁၉၈၅.၈]

[ပါရမီ: တာအိုတားမြစ်ခြင်း ဝိညာဉ်သွေးကြော၊ မျိုးရိုးဗီဇပြောင်း မိုးကြိုးဝိညာဉ်သွေးကြော၊ မျိုးရိုးဗီဇပြောင်း မီးဝိညာဉ်သွေးကြော]

[ကံကြမ္မာတန်ဖိုး: ၁၃၉၀၅၇၆]

[ကျွမ်းကျင်မှုများ: အဆင့်မြင့် မီးတောက်မန္တန်၊ အဆင့်မြင့် ဝိညာဉ်ဖမ်း ဝင်္ကပါ]

[အထူးစွမ်းရည်များ: မျက်နှာ တစ်ထောင်ကျင့်စဉ်၊ အချိန်ကိုဖျက်ဆီးခြင်းနည်းစနစ်၊ ကောင်းကင်ဆင့်ကဲဖြစ်စဉ်ကျင့်စဉ်၊ အရှိန်အဝါဖုံးကွယ်ခြင်းကျင့်စဉ် (အဆင့် ၅)၊ အဆင့် ၅ အဆောင်သခင်]

အနာဂတ်တွင် အဆင့်ကျော်ဖြတ်ရန်မှာ လွယ်ကူသော အလုပ်တစ်ခု မဟုတ်ချေ။

သို့သော် ကျိုးယွမ် အလောတကြီး မဖြစ်ခဲ့ပေ။

သူသည် အဆင့် ၅ အဆောင်သခင်၏ အဆင့်သို့ ယခုမှသာ ဝင်ရောက်လာခဲ့ပြီး အဆင့် ၆ အဆောင်သခင် ဖြစ်လာရန်မှာ လုံးဝ မလွယ်ကူလှချေ။

အဆင့် ၆ အဆောင်သခင် ဖြစ်လာရန်မှာ နှစ်အနည်းငယ်မျှ အချိန်ယူရမည်။

ကျိုးယွမ်အတွက် ယခုလုပ်ရမည့်အရာမှာ တည်ငြိမ်စွာ နေထိုင်ပြီး မှော်အဆောင်ပညာကို အာရုံစိုက် လေ့လာရန်ပင် ဖြစ်သည်။

လမ်းကြားလေးထဲမှ ထွက်လာပြီးနောက် ကျိုးယွမ်သည် လူသူကင်းမဲ့သော နေရာတစ်ခုကို ရှာတွေ့ကာ ထောင်ချီထင်ယောင်ထင်မှား လေဟာနယ်ထဲမှ ထွက်လာခဲ့လေ၏။

အရိပ်ခန်းမမှ လူသုံးဦး၏ အဆိုအရ သွေးမိစ္ဆာမြက်ခင်းပြင်တွင် သွေးမြူခိုးနတ်သမီးသစ်ခွ ရှိနေသည်မှာ သေချာသဖြင့် သူ သွားရောက်စစ်ဆေးကြည့်ရပေမည်။

အာရုံစိုက်မခံရစေရန်အတွက် ကျိုးယွမ်သည် ကြေးစားမဟာမိတ်အဖွဲ့ ဟူသော အဖွဲ့အစည်းတစ်ခုသို့ ဝင်ရောက်ရန် ဆုံးဖြတ်လိုက်လေ၏။

ကြေးစားမဟာမိတ်အဖွဲ့သည် စုန်းဟူနယ်မြေနှင့် အပ်တစ်ထောင်နယ်မြေ နှစ်ခုစလုံးတွင် ရှိသော အဖွဲ့အစည်းတစ်ခု ဖြစ်သည်။

သူတို့သည် ဂိုဏ်းတစ်ခု မဟုတ်သဖြင့် တင်းကျပ်သော စည်းကမ်းများ မရှိချေ။

ဤအဖွဲ့အစည်းသည် လွတ်လပ်သော မဟာမိတ်အဖွဲ့တစ်ခု ဖြစ်ပြီး ဂိုဏ်းမဲ့ကျင့်ကြံသူများ အတွက် သီးသန့်ဖြစ်သော မဟာမိတ်အဖွဲ့ ဖြစ်ပေသည်။

ကြေးစားမဟာမိတ်အဖွဲ့၏ တာဝန်များမှာ ရိုးရှင်းလှသည်။

မည်သည့် ဂိုဏ်းမဲ့ကျင့်ကြံသူမဆို တာဝန်များ တင်နိုင်ပြီး တူညီသော ရည်မှန်းချက်ရှိသူများ စုပေါင်း၍ ထိုတာဝန်ကို ပြီးမြောက်အောင် ဆောင်ရွက်နိုင်သည်။

တာဝန်ပြီးဆုံးပါက ရရှိမည့် အကျိုးအမြတ်ကို ကြိုတင်သဘောတူထားပြီးဖြစ်ရာ သာမန်အားဖြင့် အငြင်းပွားမှုများ မရှိတတ်ချေ။

ပွင့်ပွင့်လင်းလင်း ပြောရလျှင် လူတိုင်း ပူးပေါင်းဆောင်ရွက်ခြင်းသည် တစ်ကြိမ်တည်းသော အလုပ်ကိစ္စသာ ဖြစ်ပေသည်။

သို့သော် ဂိုဏ်းမဲ့ကျင့်ကြံသူများ၏ အသိုင်းအဝိုင်းမှာ ထိုမျှသာ ကျယ်ဝန်းသဖြင့် အချိန်ကြာလာသည်နှင့်အမျှ လူများမှာ အချင်းချင်း ရင်းနှီးလာကြရာ ဂုဏ်သိက္ခာမှာလည်း အလွန် အရေးပါလှပေသည်။

ဂုဏ်သိက္ခာ ညံ့ဖျင်းသူများအကြောင်း ကောလာဟလများ ပျံ့နှံ့သွားပါက မည်သူကမျှ သူနှင့် ပူးပေါင်းတော့မည် မဟုတ်ချေ။

ကျိုးယွမ် အနည်းငယ် စုံစမ်းကြည့်လိုက်ရာ ကြေးစားမဟာမိတ်အဖွဲ့ ရှိရာနေရာကို ရှာတွေ့သွားလေ၏။

ကျိုးယွမ်သည် အသက် ၃၀ အရွယ်ခန့် ရှိပုံပေါ်ပြီး အခြေတည်စိတ်ဝိညာဉ် အစောပိုင်းအဆင့် ၏ မှေးမှိန်သော အရှိန်အဝါကို ထုတ်လွှတ်ထားလေသည်။

ထို့ကြောင့် ကျိုးယွမ် ကြေးစားမဟာမိတ်အဖွဲ့သို့ ဝင်ရောက်သွားသည်နှင့်တစ်ပြိုင်နက် လူအများအပြား၏ အာရုံစိုက်မှုကို ချက်ချင်း ဆွဲဆောင်သွားလေ၏။

"ဖရဲသီးစိမ်းလေးလား"

အဘိုးအိုတစ်ဦးက အနည်းငယ် မျက်မှောင်ကြုတ်ကာ တီးတိုးရေရွတ်လိုက်လေ၏။

'ဖရဲသီးစိမ်း' ဆိုသည်မှာ ကြေးစားမဟာမိတ်အဖွဲ့၏ ဝေါဟာရတစ်ခုဖြစ်ပြီး မျက်နှာသစ်ကို ဆိုလိုခြင်း ဖြစ်သည်။

ထိုသို့ပြောဆိုသူများမှာ များသောအားဖြင့် ကြေးစားမဟာမိတ်အဖွဲ့တွင် နှစ်ရှည်လများ နေထိုင်လာကြသော ဝါရင့် ကျွမ်းကျင်သူများဖြစ်ကြပြီး သူစိမ်းများကို တစ်ချက်ကြည့်ရုံဖြင့် သိနိုင်ကြလေ၏။

"တာအိုမိတ်ဆွေ... တာဝန်လာတင်တာလား ဒါမှမဟုတ် တာဝန်လာယူတာလား"

မုတ်ဆိတ်မွေး ပါးပါးနှင့် အမျိုးသားတစ်ဦးသည် ကျိုးယွမ်ဆီသို့ လျှောက်လာပြီး အခြေတည်စိတ်ဝိညာဉ်အဆင့်၏ ဖိအားကိုလည်း ထုတ်လွှတ်ထားလေ၏။

ကျိုးယွမ်က ထိုသူကို တစ်ချက်ကြည့်လိုက်ပြီး ဤသူ၏ ကျင့်ကြံမှုအဆင့်မှာ အခြေတည်စိတ်ဝိညာဉ် အလယ်အလတ်အဆင့် ဖြစ်ကြောင်း ချက်ချင်း အတည်ပြုနိုင်လိုက်လေသည်။

ကျိုးယွမ် ပြုံးလိုက်ပြီး ထိုအမျိုးသားကို လက်နှစ်ဖက်ယှက်၍ ဂါရဝပြုလိုက်ကာ ပြောဆိုလိုက်လေ၏။

"တာအိုမိတ်ဆွေ... တာဝန်တွေကို ဘယ်နေရာမှာ ယူလို့ရလဲ"

မုတ်ဆိတ်မွေး ပါးပါးနှင့် အမျိုးသားက အနည်းငယ် ပြုံးလိုက်ပြီးနောက် ကျောက်စိမ်းပြား တစ်ခုကို ထုတ်ယူကာ ပြုံးလျက် ပြောဆိုလိုက်လေသည်။

"အဆင့်နိမ့် ဝိညာဉ်ကျောက်တုံး ဆယ်တုံး"

အနည်းငယ်မျှ တုံ့ဆိုင်းမနေဘဲ ကျိုးယွမ်သည် အဆင့်နိမ့် ဝိညာဉ်ကျောက်တုံး ဆယ်တုံးကို တစ်ဖက်လူဆီသို့ ပစ်ပေးလိုက်ပြီး တစ်ဖက်လူ၏ လက်ထဲမှ ကျောက်စိမ်းပြားကို ယူလိုက်လေ၏။

"တာအိုမိတ်ဆွေ... ဒီကိုလာတာ ပထမဆုံးအကြိမ်မို့လို့ ကျောက်စိမ်းပြား တစ်ခုတော့ ဝယ်ဖို့ လိုတယ်"

"နောင်တစ်ချိန် ကြေးစားမဟာမိတ်အဖွဲ့ကို လာပြီး နောက်ဆုံးရ သတင်းတွေကို ကြည့်ချင်တဲ့အခါ ဒီကျောက်စိမ်းပြားနဲ့ လဲလှယ်နိုင်တယ်... ကျွန်တော်တို့က နောက်ဆုံးပေါ် သတင်းတွေပါတဲ့ တစ်ခုကို ပေးလိုက်မယ်"

"ဒါပေမဲ့ သတင်းအချက်အလက်တွေကို အသစ်ပေးတဲ့ သူတွေအတွက် အလုပ်ကြေးအဖြစ် တစ်ခါလာတိုင်း အဆင့်နိမ့် ဝိညာဉ်ကျောက်တုံး တစ်တုံးတော့ ပေးရတယ်"

မုတ်ဆိတ်မွေး ပါးပါးနှင့် အမျိုးသားက ရှင်းပြလိုက်လေ၏။

ဤစကားကို ကြားသောအခါ ကျိုးယွမ်၏ စိတ်ထဲတွင် ကြေးစားမဟာမိတ်အဖွဲ့အပေါ် အထင်ကြီးမှု ချက်ချင်း တိုးလာလေ၏။

ဤကြေးစားမဟာမိတ်အဖွဲ့မှာ အတော်လေး စိတ်ဝင်စားစရာ ကောင်းလှပေသည်။

အဆင့်နိမ့် ဝိညာဉ်ကျောက်တုံး တစ်တုံးမှာ အလွန်နည်းပါးလှသဖြင့် မည်သူကမျှ ဂရုစိုက်မည် မဟုတ်ချေ။

သို့သော် လာရောက် ရောင်းဝယ်သူ များပြားပါက သိသာထင်ရှားသော ဝင်ငွေတစ်ခု ဖြစ်လာနိုင်သေးပေသည်။

ကျိုးယွမ် ကျေးဇူးတင်စွာဖြင့် ပြုံးလိုက်ပြီးနောက် သူ၏ စိတ်ဝိညာဉ်အာရုံကို ကျောက်စိမ်းပြားအတွင်းသို့ ထည့်သွင်းကာ ကြည့်ရှုလိုက်လေ၏။

"ကျိုးယွမ်ကို ရှာဖွေပါ... ယုံကြည်ရတဲ့ သဲလွန်စ ရှာတွေ့သူကို အဆင့်နိမ့် ဝိညာဉ်ကျောက်တုံး တစ်သန်း ဆုချပါမယ်"

ဤသတင်းကို မြင်သောအခါ ကျိုးယွမ်၏ မျက်နှာပေါ်တွင် ထူးဆန်းသော အမူအရာတစ်ခု ပေါ်လာလေ၏။

သူ၏ ကိုယ်ပိုင်သတင်းက ပထမအဆင့်တွင် ရှိနေလိမ့်မည်ဟု သူ မထင်မှတ်ထားခဲ့ချေ။

သို့သော် ကျိုးယွမ် တည်ငြိမ်စွာ နေလိုက်ပြီး အခြားသတင်းများကို ဆက်လက် စစ်ဆေးကြည့်လိုက်လေ၏။

"ကောယာတောင် က အဆင့် ၃ မိစ္ဆာသားရဲကို ဖမ်းဖို့ ရွှေအမြုတေ အထွတ်အထိပ်အဆင့် ၄ ယောက် လိုအပ်တယ်... အောင်မြင်ရင် တစ်ယောက်ကို အဆင့်နိမ့် ဝိညာဉ်ကျောက်တုံး တစ်ထောင် ရမယ်"

"ရွှေဓားဂိုဏ်း က တပည့်သစ် စုဆောင်းနေတယ်... အောင်မြင်စွာ မိတ်ဆက်ပေးနိုင်သူတိုင်းကို အဆင့်နိမ့် ဝိညာဉ်ကျောက်တုံး ၁၀၀ ဆုချမယ်"

"စုန်းယွမ်တောင် မှာ အမြီးရှည် မြေခွေးတွေ အမဲလိုက်ဖို့ လူ ၃ ယောက် အဖွဲ့ဖွဲ့မယ်... တစ်ကောင်ဖမ်းမိတိုင်း အဆင့်နိမ့် ဝိညာဉ်ကျောက်တုံး ၅ တုံး ရမယ်"

ကျိုးယွမ်၏ မျက်လုံးများက စာမျက်နှာကို ဖြတ်သန်းသွားရာ ကျောက်စိမ်းပြားပေါ်တွင် သတင်းအချက်အလက် ရာပေါင်းများစွာ ရှိနေပြီး အကြောင်းအရာ စုံလင်လှပေသည်။

အချို့က သက်တော်စောင့်များ ငှားရမ်းခြင်း၊ အချို့က နည်းပြများ ရှာဖွေခြင်း၊ အချို့က သတို့သမီး ပို့ဆောင်ရန် လူအင်အား မလုံလောက်ခြင်း၊ အချို့က တာအိုလက်တွဲဖော် ရှာဖွေခြင်းများပင် ပါဝင်လေသည်။

ဤနေရာတွင် စိတ်ကူးမယဉ်နိုင်သောအရာ ဘာမှမရှိဟုပင် ဆိုနိုင်ပေသည်။

စာမျက်နှာများပေါ်ရှိ တာဝန်အမျိုးမျိုးကို ဖတ်ရှုရင်း ကျိုးယွမ် အလိုအလျောက် ပြုံးလိုက်မိလေ၏။

"ရုပ်ပိုင်းဆိုင်ရာ သန်စွမ်းပြီး အသက်ငယ်ရွယ်တဲ့ ရွှေအမြုတေ အထွတ်အထိပ်အဆင့် အမျိုးသား ကျင့်ကြံသူကို ရှာနေတယ်... ကျွန်တော့် ဇနီးနဲ့ ယန်သန့်စင်ခြင်းကျင့်စဉ် အတူကျင့်ကြံပေးဖို့ပါ... အမျိုးသမီး ကိုယ်ဝန်ရသွားရင် ထွက်သွားလို့ရပြီ... ဆုကြေးက အဆင့်နိမ့် ဝိညာဉ်ကျောက်တုံး ၅၀၀ ပါ"

"မှတ်ချက်- ကျွန်တော့် ဇနီးက အသားဖြူပြီး လှပတယ်... သိမ်မွေ့တဲ့ စိတ်သဘောထားရှိပြီး ဒေါသကြီးတဲ့ မိန်းမ မဟုတ်ပါဘူး... ဒါကြောင့် စိတ်မပူပါနဲ့"

ဤတာဝန်ကို မြင်သောအခါ ကျိုးယွမ်၏ မျက်လုံးများ ပြူးကျယ်သွားလုမတတ် ဖြစ်သွားလေ၏။

သူ၏ ခေါင်းပေါ်က အစိမ်းရောင်က မလုံလောက်သေးလို့ ပြောနေတာများလား။

(မှတ်ချက်- အစိမ်းရောင်ဦးထုပ်ဆောင်းခြင်း = မိန်းမဖောက်ပြန်ခံရခြင်း)

စိမ်းလန်းစိုပြေနေတဲ့ မြက်ခင်းပြင်ကြီး (မိန်းမဖောက်ပြန်ခံရခြင်း) တွေကို တခြားလူတွေက ရှောင်ပြေးချင်နေကြချိန်မှာ သူကတော့ အဲ့ဒါကို သူ့ခေါင်းပေါ် အတင်း ဆောင်းချင်နေတာပဲ။

အစပိုင်းတွင် ဤသည်မှာ သီးခြား ဖြစ်ရပ်တစ်ခုသာဟု ကျိုးယွမ် ထင်ခဲ့သော်လည်း ကျန်ရှိနေသော အကြောင်းအရာများကို မြင်သောအခါ သူ ဆွံ့အသွားရလေတော့သည်။

"အသက်ငယ်ရွယ်တဲ့ ရွှေအမြုတေအဆင့် ကျင့်ကြံသူကို ကျွန်တော့်ရဲ့ အိမ်ထောင်မကျသေးတဲ့ သမီးနဲ့ ယန်သန့်စင်ခြင်းကျင့်စဉ် အတူကျင့်ဖို့ တောင်းဆိုပါတယ်... ကိုယ်ဝန်ရသွားရင် ထွက်သွားလို့ရပါပြီ... နောက်ထပ် ဘယ်တော့မှ အဆက်အသွယ် မလုပ်ရပါဘူး... ဆုကြေးက အဆင့်နိမ့် ဝိညာဉ်ကျောက်တုံး ၂၀၀ ပါ"

ကျိုးယွမ်သည် ဤကဲ့သို့သော သတင်းစကားများကို ဆက်တိုက် ဖတ်ရှုလိုက်ရပြီး၊ အချို့မှာ သူတို့ သမီး၏ အသက်အရွယ်၊ နှစ်သက်မှုများနှင့် အခြားအရာများကိုပါ မှတ်ချက်ရေးထားကြသေးသည်။

ကျင့်ကြံခြင်းလောကတွင် ဤကိစ္စမျိုးမှာ အထူးအဆန်း မဟုတ်ကြောင်းကို ကျိုးယွမ် မသိခဲ့ချေ။

ဤသည်မှာ ကျင့်ကြံသူများ၏ ကမ္ဘာဖြစ်သည်။

သာမန်လူများအတွက်မူ သူတို့အိမ်တွင် ချီသန့်စင်ခြင်းအဆင့် ကျင့်ကြံသူတစ်ဦး ရှိနေခြင်းက ရွှေသန်းပေါင်းများစွာထက်ပင် ပို၍ တန်ဖိုးရှိပေသည်။

ကုန်သည်များနှင့် သူဌေးများစွာသည် သူတို့၏ မိသားစုများကို အချိန်ကြာမြင့်စွာ ကြီးပွားချမ်းသာနေစေရန် အလိုရှိကြသည်။

သက်တော်စောင့်များ ငှားရမ်းခြင်းအပြင် မိသားစုမှ ကလေးများကိုပါ လေ့ကျင့်ပေးကြလေသည်။

ထို့ပြင် မိသားစုဝင်များကို ဝိညာဉ်သွေးကြောများ ပါဝင်ပြီး မွေးဖွားလာစေရန်မှာ သဘာဝကျကျပင် အကောင်းဆုံး ရွေးချယ်မှု ဖြစ်ပေသည်။

ထို့အပြင် ဤမိသားစုများရှိ အမျိုးသမီးများအားလုံးမှာ သာမန်လူ အမျိုးသမီးများသာ ဖြစ်ရာ အင်မော်တယ်တစ်ဦးနှင့် ယန်သန့်စင်ခြင်းကျင့်စဉ် အတူကျင့်ကြံခွင့်ရခြင်းမှာ သူတို့အတွက် သေချာပေါက် ကောင်းချီးမင်္ဂလာတစ်ရပ်ပင် ဖြစ်ပေသည်။

ထို့ကြောင့် ဤတောင်းဆိုမှုမျိုးသည် ကြေးစားမဟာမိတ်အဖွဲ့များတွင် အလွန် အတွေ့ရများသော ကိစ္စဖြစ်သည်။

ကျိုးယွမ်သည် ယခင်က အဆင့်အတန်းမြင့်မားသူများနှင့် တွေ့ဆုံခဲ့ဖူးသဖြင့် သဘာဝကျကျပင် ဤကဲ့သို့သော ကိစ္စရပ်များအကြောင်း ကြားခဲ့ရမည် မဟုတ်ချေ။

ကျိုးယွမ်၏ မျက်နှာပေါ်တွင် ရှုပ်ထွေးသော အမူအရာတစ်ခု ပေါ်လာပြီးနောက် သူ လေးနက်စွာ သက်ပြင်းချလိုက်လေ၏။

သူ ဂိုဏ်းမဲ့ကျင့်ကြံသူများအကြား ရောနှောမနေခဲ့သည်မှာ အမှန်တကယ်ပင် အချိန်အတော်ကြာခဲ့ပြီ ဖြစ်သည်။

သူ၏ ကိုယ်ပေါ်တွင် အဆင့်နိမ့် ဝိညာဉ်ကျောက်တုံး အနည်းငယ်သာ ရှိခဲ့စဉ်က ခြေလှမ်းတိုင်းကို သေသေချာချာ စီစဉ်တွက်ချက်ခဲ့ရသည်။

ကျိုးယွမ်သည် အခြားကမ္ဘာတစ်ခုထဲသို့ ဝင်ရောက်သွားသကဲ့သို့ ခံစားလိုက်ရလေ၏။

ထို့နောက် ကျိုးယွမ်သည် သွေးမိစ္ဆာမြက်ခင်းပြင် တာဝန်များ ရှိမရှိ ဆက်လက် ရှာဖွေကြည့်လိုက်လေသည်။

သူသည် တာဝန်အားလုံးကို ဖတ်ရှုပြီးနောက် မျက်မှောင်ကြုတ်သွားလေ၏။

‘ဘာမှမရှိဘူးပဲ…’

‘ကိုယ်တိုင် တာဝန်တစ်ခု တင်ဖို့က တကယ်ပဲ ဖြစ်နိုင်ပါ့မလား’

ဤအခိုက်အတန့်တွင် ကျိုးယွမ် အနည်းငယ် တွေဝေသွားလေ၏။

အကြောင်းမှာ ထိုသတင်းကို တင်လိုက်ပါက အာရုံစိုက်မှုကို လွယ်ကူစွာ ဆွဲဆောင်နိုင်သောကြောင့် ဖြစ်သည်။