အခန်း ၃၅၁

အခန်း (၃၅၁) - လှုပ်ခတ်နေသော အဝါရောင်လှိုင်းများကြားမှ အစွယ်များ (၁)

ဝံပုလွေဘုရင်၏ လက်သည်းချက်အောက်တွင် မြောက်ဘက်တံခါး ကင်းမျှော်စင်ကြီး ပြိုလဲသွားသည့် ဟိန်းဟောက်သံကြီးသည် စစ်မြေပြင်တစ်ခုလုံးသို့ ပျံ့နှံ့သွားသည်။

နင်မြို့၏ အခြားအရပ်မျက်နှာများရှိ တိုက်ခိုက်မှုများနှင့် ခုခံမှုများသည် လုံးဝ ကွာခြားသော နည်းလမ်းများဖြင့် ဖြစ်ပွားနေသည်။

အရှေ့ဘက်တံခါး မြို့တံတိုင်းသည် နေရောင်အောက်တွင် အေးစက်မာကျောသော အလင်းတန်းများကို ရောင်ပြန်ဟပ်နေပြီး လေ့ဟောက်၏ တည်ငြိမ်သောပုံရိပ်သည် ကင်းမျှော်စင်၏ အမြင့်ဆုံးအမှတ်တွင် မတ်မတ်ရပ်နေသည်။

မြို့အပြင်ဘက်တွင် သိပ်သည်းလှသော မိစ္ဆာသားရဲ စစ်တပ်ကြီးရှိနေပြီး အမျိုးမျိုးသော ဟိန်းဟောက်သံများနှင့် လက်နက်များ ထိမှန်သံများမှာ တစ်ခုတည်းအဖြစ် ရောနှောနေသည်။

သူသည် ယခုလေးတင် လက်မြှောက်ကာ မြေဝါရောင်အကာအကွယ်တစ်ခုကို စုစည်းလိုက်ပြီး လေထဲမှ ပစ်လွှတ်လာသည့် အဆိပ်လူး အရိုးလှံတစ်စင်းကို ပိတ်ဆို့လိုက်သည်။

“ချလွမ်“

ကျိုးပဲ့သွားသော အရိုးလှံ၏ အပိုင်းအစများ နေရာအနှံ့ လွင့်စင်သွားပြီး အဆိပ်ရည်များကြောင့် တရှဲရှဲ မြည်သံများနှင့်အတူ အဖြူရောင်မီးခိုးများ ထွက်ပေါ်လာကာ မြို့တံတိုင်းကို တိုက်စားသွားသည်။

လေ့ဟောက်၏ အသံမှာ ယခင်အတိုင်း တည်ငြိမ်နေဆဲပင် ဖြစ်သည်။

“စက်သေနတ် အဖွဲ့တွေ၊ ဘယ်ဘက်တောင်ပံကို ဖိနှိပ်ထား ဒုံးကျည်သမားတွေ အဲဒီကြံ့ကြီးပေါ်ကို ပစ်ခတ်ဖို့ ပြင်ဆင်”

သူ အမိန့်ပေးလိုက်သည်နှင့် မြို့အပြင်ဘက်မှ နားကွဲမတတ် ဟိန်းဟောက်သံတစ်ခု ထွက်ပေါ်လာသည်။

မြေကမ္ဘာချေမှုန်းကြံ့တစ်ကောင်သည် ကျည်ဆန်မိုးများကြားမှ ဖုန်မှုန့်များကို ဖြတ်သန်းကာ ပြေးထွက်လာသည်။

၎င်း၏ ထူထဲလှသော အရေပြားပေါ်တွင် ကျည်ဆန်ရာများ ရှိသော်လည်း မြို့တံခါးဆီသို့ ရူးသွပ်စွာ ချဉ်းကပ်လာဆဲပင်။

ဤမိစ္ဆာသားရဲမှာ လုံးဝစိတ်ရိုင်းဝင်နေသည်မှာ ထင်ရှားသည်။

၎င်း၏ နှာခေါင်းပေါက်များမှ အဖြူရောင် လေပူစီးကြောင်းများ မှုတ်ထုတ်နေပြီး ခြေလှမ်းတိုင်းက မြေပြင်ကို အနည်းငယ် တုန်ခါသွားစေသည်။

“ပစ်စမ်း”

‘မိုးကြိုးမုန်တိုင်း’ ဒုံးကျည်သုံးစင်းမှာ အမြီးတွင် မီးတောက်များ ပါဝင်လျက် ဟိန်းဟောက် ထွက်ပေါ်လာပြီး လေထဲတွင် သေသပ်စွာ ဝေ့ဝိုက်သွားပြီး အကွေးများကို ရေးဆွဲကာ မြေကမ္ဘာချေမှုန်းကြံ့၏ ခြေလက်အဆစ်များပေါ်သို့ တစ်ပြိုင်နက်တည်း ထိမှန်သွားသည်။

ပြင်းထန်သော ပေါက်ကွဲမှုကြီးကြားတွင် ဧရာမသတ္တဝါကြီးမှာ အော်ဟစ်ကာ လဲကျသွားခဲ့ပြီး ဖြစ်ပေါ်လာသည့် ဖုန်မှုန့်များက ကောင်းကင်တစ်ဝက်လောက်ကို ဖုံးလွှမ်းသွားသည်။

မြို့တံတိုင်းထက်ရှိ ကာကွယ်သူများ သက်ပြင်းချနိုင်ခါနီး အချိန်မှာပင် ဖုန်မှုန့်များကြားမှ အမည်းရောင်အရိပ်အချို့ ရုတ်တရက် ပြေးထွက်လာကြသည်။

၎င်းတို့မှာ ပေါက်ကွဲမှုကို အခွင့်ကောင်းယူကာ ရှေ့တိုးလာကြသည့် အရိပ်ကျားသစ်အုပ်စုပင် ဖြစ်သည်။

“သတိထားကြ”

လေ့ဟောက် ကျယ်လောင်စွာ အော်ဟစ်လိုက်ပြီး လက်ချောင်းများဖြင့် လျင်မြန်စွာ ဂါထာဖွဲ့စည်းလိုက်သည်။

ပိုမိုလေးလံသော မြေဝါရောင်အလင်းဒိုင်းတစ်ခု မြို့တံတိုင်းရှေ့တွင် မြင့်တက်လာပြီး ခုန်အုပ်လာကြသည့် အရိပ်ကျားသစ်များအားလုံးကို ပိတ်ဆို့ထားလိုက်သည်။

သို့သော်လည်း ဤဖရိုဖရဲဖြစ်မှုများကြားတွင် ငွေဖြူရောင်ပုံရိပ်တစ်ခုသည် မြို့တံတိုင်း၏ အရိပ်ထဲ၌ တစ္ဆေတစ်ကောင်အလား ပေါ်လာခဲ့သည်။

သူ၏ လှုပ်ရှားမှုများမှာ အလွန်မြန်ဆန်လှသဖြင့် အရိပ်တစ်ခုသာ ကျန်ရစ်သည်။ ချွန်ထက်သော လက်သည်းများက အေးစက်စက် အလင်းတန်းများ ထုတ်လွှတ်ပြီး ဒုံးကျည် ပြန်လည်ဖြည့်တင်းနေသည့် စစ်သည်တစ်ဦး၏ လည်ပင်းကို ချက်ချင်း ဖြတ်တောက်လိုက်သည်။

စစ်သည်မှာ အော်ဟစ်ရန်ပင် အချိန်မရလိုက်ဘဲ ပျော့ခွေလဲကျသွားရှာသည်။

ချက်ချင်းဆိုသလို ထိုပူနွေးနေဆဲဖြစ်သော အလောင်းမှာ သူ၏ ပုခုံးပေါ်က ဒုံးကျည်ပစ်လွှတ်ကိရိယာနှင့်အတူ အရိပ်များထဲသို့ ပျောက်ကွယ်သွားခဲ့သည်။ လုပ်ငန်းစဉ်တစ်ခုလုံးမှာ မျက်တောင်တစ်ခတ်အချိန်မျှသာ ကြာမြင့်ခဲ့သည်။

“ရန်သူ တိုက်ခိုက်တာ။ လုပ်ကြံသတ်ဖြတ်သူ ရှိတယ်”

မြို့တံတိုင်းထက်တွင် ဆူညံသွားခဲ့‌လေပြီ။

စစ်သည်များက ထိတ်လန့်တကြား ပတ်ဝန်းကျင်ကို လှမ်းကြည့်ကြသော်လည်း ထို ငွေဖြူရောင်ပုံရိပ်၏ ခြေရာကို လုံးဝ ရှာမတွေ့ကြတော့ပေ။

မြေပြင်ပေါ်ရှိ မခြောက်သွေ့သေးသော သွေးကွက်များကသာ ယခုလေးတင် ဖြစ်ပွားခဲ့သည့်အရာမှာ အစစ်အမှန်ဖြစ်ကြောင်း သက်သေပြနေသည်။

အလားတူ အခြေအနေမျိုးက အနောက်ဘက်တံခါးတွင်လည်း ဖြစ်ပွားနေသည်။

ယန်ချင်းယွမ်၏ ‘အစောင့်အရှောက်’ တင့်ကားတပ်စုများသည် များပြားလှသော ပစ်ခတ်မှုများဖြင့် မိစ္ဆာသားရဲများ၏ ထိုးစစ်ကို ဖိနှိပ်ထားသည်။

အမြောက်သံများ ဟိန်းဟောက်နေစဉ် တင့်ကားတစ်စီးဘေးတွင် ဟင်းလင်းပြင် အက်ကြောင်းတစ်ခု တိတ်တဆိတ် ပွင့်ဟလာသည်။

ဤအက်ကြောင်းမှာ အလွန်တရာဖုံးကွယ်ထားသဖြင့် တင့်ကားအတွင်း တပ်ဆင်ထားသည့် ထောက်လှမ်းရေးစနစ်ပင်လျှင် အချိန်မီသတိပေးချက် ထုတ်ပြန်ရန် ပျက်ကွက်ခဲ့သည်။

ချွန်ထက်သော လက်သည်းများက အက်ကြောင်းထဲမှ ထွက်ပေါ်လာပြီး အမြောက်ပြောင်းကို တိကျစွာ ဖြတ်တောက်လိုက်သည်။

ထို့နောက် တင့်ကားတစ်စီးလုံးမှာ မမြင်နိုင်သော ဧရာမပါးစပ်ကြီးတစ်ခု၏ ဝါးမြိုခြင်းကို ခံလိုက်ရသကဲ့သို့ ပျောက်ကွယ်သွားခဲ့ပြီး မြေကြီးပေါ်တွင် အနည်းငယ် ချိုင့်ဝင်နေသော ခြေရာတစ်ခုသာ ကျန်ရစ်ခဲ့သည်။

“သတိပေးချက်။ တင့်ကား အမှတ် ၃ အချက်ပြမှု ပျောက်ဆုံးသွားပါပြီ။ စွမ်းအင်တုံ့ပြန်မှု လုံးဝ ပျောက်ကွယ်သွားပါပြီ”

ထိန်းချုပ်ခန်းအတွင်း အချက်ပေးသံများ မြည်လာပြီး အနီရောင်သတိပေးမီးများ ရူးသွပ်စွာ လင်းလက်လာသည်။

ယန်ချင်းယွမ် စောင့်ကြည့်ရေးမျက်နှာပြင်ပေါ်တွင် ရုတ်တရက် ပျောက်ကွယ်သွားသည့် အနီရောင်စက်လေးကို စိုက်ကြည့်နေမိသည်။ သူ၏ မျက်နှာအမူအရာမှာ လုံးဝမှုန်မှိုင်းနေသည်။

သူသည် ချက်ချင်း စစ်မြေပြင်မှတ်တမ်း ဗီဒီယိုကို ဖွင့်ကြည့်လိုက်သော်လည်း ဝေဝါးဝါး ငွေဖြူရောင်အရိပ်တစ်ခုကိုသာ ခက်ခဲစွာ ဖမ်းယူနိုင်ခဲ့သည်။

“ဒီလျှို့ဝှက်ဆန်းကြယ်တဲ့ အင်အားစုက လေလိုမျိုး ပေါ်လာပြီး လေလိုမျိုး ပျောက်သွားပြန်ပြီ...”

သူ တိုးတိုးလေး ရေရွတ်လိုက်မိရင်း ကွပ်ကဲမှုမျက်နှာပြင်ပေါ်တွင် လျင်မြန်စွာ နှိပ်လိုက်သည်။

“သူတို့ရဲ့ လှုပ်ရှားမှုလမ်းကြောင်းကို ချက်ချင်း ခွဲခြမ်းစိတ်ဖြာပါ၊ ငါ သူတို့ နောက်ထပ် လှုပ်ရှားနိုင်ခြေရှိတဲ့ ဧရိယာကို သိချင်တယ်”

တစ်ချိန်တည်းမှာပင် တောင်ဘက်တံခါးအပြင်ဘက်၌လည်း တိုက်ပွဲမှာ အလားတူ ပြင်းထန်နေသည်။

ဤနေရာသည် အင်အားစုသုံးခုလုံး၏ ရောနှောနေသော တပ်ဖွဲ့များ အတူတကွ ကာကွယ်နေကြသည့် ဧရိယာဖြစ်သည်။

သူတို့ စစ်သည်တစ်ဦးစီ၏ အရည်အသွေးမှာ အခြားတံခါး သုံးခုထက် နိမ့်ကျနေသော်လည်း ပြီးပြည့်စုံသော တပ်စုအမျိုးအစားများဖြင့် အစားထိုးထားကြသည်။

လောင်ကျွမ်းမီးလျှံဂိုဏ်းမှ မီးစနစ်ကျင့်ကြံသူများက ရှေ့တန်းတွင် မီးတံတိုင်းများကို ဖန်တီးထားကြပြီး သံမဏိဒိုင်းကာ ကင်းစခန်းမှ စစ်သည်များက ဒိုင်းများဖြင့် ကာကွယ်ထားကြကာ သုသေသနအသင်းမှ နည်းပညာဝန်ထမ်းများက အနောက်ဘက်မှ ပံ့ပိုးမှုများ ပေးထားကြသည်။

ဒဏ်ရာရရှိထားသော လျှပ်စီးကျားသစ်တစ်ကောင်သည် နောက်သို့ ဆုတ်ခွာရန် အတင်းအဓမ္မ ကြိုးစားနေသည်။

၎င်းသည် ယခင်က မီးစနစ် ကျင့်ကြံသူတစ်ဦးနှင့် ထိပ်တိုက်ရင်ဆိုင်မှုအတွင်း ပြင်းထန်စွာ ဒဏ်ရာရရှိခဲ့ခြင်းဖြစ်သည်။ ဘယ်ဘက်ရှေ့ခြေဖဝါးမှာ လောင်ကျွမ်းလုနီးပါး ဖြစ်နေကာ လျှပ်စီးပုံစံ အမွေးအမျှင်များပေါ်တွင် အမည်းရောင်လောင်ကျွမ်းရာများ ဖုံးလွှမ်းနေသည်။

၎င်းသည် ဘေးအန္တရာယ်မှ လွတ်မြောက်သွားခဲ့ပြီဟု ထင်မှတ်ကာ မိမိ၏ တပ်ဖွဲ့များထံသို့ ရောက်ရှိခါနီး အချိန်မှာပင် အရိပ်များထဲမှ ရုတ်တရက် ရေခဲဆူးချွန်အချို့ ထွက်ပေါ်လာပြီး ၎င်း၏ အဓိကအမှတ်များကို တိကျစွာ ထိုးစိုက်လိုက်သည်။

“ဝူး...”

လျှပ်စီးပုံစံကျားသစ် ဝမ်းနည်းဖွယ် အော်ဟစ်လိုက်ရှာသည်။ ၎င်း မသေဆုံးမီ မြင်တွေ့လိုက်ရသည်မှာ ငွေဖြူရောင်ပုံရိပ်တစ်ခုက ၎င်း၏ နဖူးပေါ်မှ ဗဟိုချက်ကို ဆွဲထုတ်နေခြင်းပင် ဖြစ်သည်။

ထိုပုံရိပ်၏ လှုပ်ရှားမှုများမှာ အလွန်ကျွမ်းကျင်လှသဖြင့် သတ်ဖြတ်မှုတစ်ခုတွင် ပါဝင်နေခြင်း မဟုတ်ဘဲ ဂရုတစိုက် ပြင်ဆင်ထားသည့် ကပွဲတစ်ခုကို ဖျော်ဖြေနေသကဲ့သို့ပင်။

“အရှင်မင်းကြီး။ ငါတို့လူတွေ ချုံခိုတိုက်ခိုက်ခံလိုက်ရပါတယ်”

ပျံသန်းနိုင်သော မိစ္ဆာသားရဲတစ်ကောင်က ထိတ်လန့်တကြားဖြင့် ပင်မစခန်းဆီသို့ ပျံသန်းပြန်လာခဲ့ပြီး အသံမှာ အကြောက်တရားများကြောင့် တုန်ရင်နေသည်။

“ဒါ နှင်းဝံပုလွေဘုရင်ရဲ့ လက်အောက်ငယ်သားတွေပါ သူတို့က ဒဏ်ရာရပြီး နောက်ဆုတ်လာတဲ့ ရဲဘော်ရဲဘက်တွေကိုတောင် မချန်ခဲ့ကြဘူး”

ဤသို့သော မြင်ကွင်းမျိုးက အမျိုးမျိုးသော စစ်မြေပြင်များပေါ်တွင် အဆက်မပြတ် ပြန်လည် ဖြစ်ပွားနေသည်။

ယင်းဖုန်း ဦးဆောင်သော နှင်းခဲအရိပ်လျှို့ဝှက်အစောင့်အရှောက်များသည် စစ်မြေပြင် ရှင်းလင်းသူများအလား ပြုမူနေကြသည်။

သူတို့၏ ရည်မှန်းချက်များမှာ ရှင်းလင်းပြတ်သားလှသည်။ ဘုရင်အဆင့်ထက် မြင့်မားသော စွမ်းအင်ဗဟိုချက်များနှင့် လူသားတို့၏ လက်နက်ကြီးများပင် ဖြစ်သည်။

ထိုမျှကသေးဘဲ သူတို့၏ စစ်ဆင်ရေးများမှာ အလွန်ထိရောက်လှသည်။ ပြိုင်ဘက် အားနည်းဆုံးဖြစ်မည့် အချိန်ကို အမြဲတမ်း ရွေးချယ်တိုက်ခိုက်ကြပြီး တစ်ချက်တည်းဖြင့် သတ်ဖြတ်ကာ တိုက်ပွဲတွင် ဘယ်တော့မှ အချိန်ဆွဲမနေကြပေ။

အရပ်သားများကို အရူးအမူး သတ်ဖြတ်နေကြသည့် မိစ္ဆာသားရဲ မဟာမိတ်တပ်ဖွဲ့များနှင့် ရှင်းလင်းစွာ ကွာခြားသည်မှာ ဝံပုလွေအသိုက်၏ တပ်ဖွဲ့များသည် မယုံနိုင်လောက်အောင် စည်းကမ်းရှိမှုကို ပြသနေကြခြင်းပင် ဖြစ်သည်။

သူတို့သည် တန်ဖိုးရှိသော စစ်ဘက်ဆိုင်ရာ ပစ္စည်းများကိုသာ ပစ်မှတ်ထားကြပြီး အနီးနားတွင် ထိတ်လန့်တကြား ထွက်ပြေးနေကြသည့် အရပ်သားများကိုမူ လုံးဝ လျစ်လျူရှုထားကြသည်။

ဝံပုလွေစစ်သည် အဖွဲ့တစ်ဖွဲ့သည် လောင်ကျွမ်းနေသော လမ်းမများပေါ်တွင် လျင်မြန်စွာ လှုပ်ရှားနေကြပြီး ပြန့်ကျဲနေသော လက်နက်များနှင့် ကျည်ဆန်များကို တိကျစွာ စုဆောင်းနေကြကာ သူတို့ဘေးတွင် ထိတ်လန့်တုန်ယင်နေကြသည့် အရပ်သားများကိုမူ တစ်ချက်မျှ လှည့်မကြည့်ကြပေ။

သူတို့၏ လှုပ်ရှားမှုများမှာ မြန်ဆန်လှကာ တိတ်တဆိတ် သဘောတူညီမှု ပူးပေါင်းဆောင်ရွက်မှုများကို ပြသနေကြသဖြင့် စနစ်တကျ လေ့ကျင့်ထားကြောင်း ထင်ရှားသည်။

“တတိယ ဧရိယာ ရှင်းလင်းပြီးပါပြီ”

“အပြစ်အနာအဆာမရှိတဲ့ စက်သေနတ်ကြီးနှစ်လက် စုဆောင်းမိပါတယ်”

“ကျည်ဆန်သိုလှောင်ရုံတစ်ခု ထောက်လှမ်းတွေ့ရှိရပါတယ်၊လက်ရှိ ပြောင်းရွှေ့နေပါတယ်”

အဆင့်မြင့် စိတ်အာရုံဆက်သွယ်ခြင်း အားဖြင့် အဖွဲ့ငယ်တိုင်း၏ အခြေအနေများကို ယင်းဖုန်းထံသို့ အချိန်နဲ့တစ်ပြေးညီ အစီရင်ခံနေကြသည်။

သူသည် မြင့်မားသော နေရာတစ်ခုတွင် ရပ်နေပြီး ငွေဖြူရောင်အမွေးအမျှင်များက လေထဲတွင် ညင်သာစွာ လှုပ်ခတ်နေကာ သူ၏ရေခဲမျက်ဝန်းပြာများက စစ်မြေပြင်တစ်ခုလုံးကို တည်ငြိမ်စွာ ကြည့်ရှုနေတော့သည်။