အခန်း ၃၆၀

အခန်း (၃၆၀) - သစ္စာဖောက်ခြင်း၏ အရုဏ်ဦး (၂)

တစ်ချိန်တည်းတွင် နှင်းခဲအရိပ်လျှို့ဝှက်အစောင့်အရှောက်ကိုးဦးသည် ယင်းဖုန်း၏ လက်ထဲက အသေအပျောက်အများဆုံးဖြစ်သည့် ဓားမြှောင်များ ဖြစ်လာခဲ့ကြပြီ ဖြစ်သည်။

သူ၏ ကြောက်မက်ဖွယ်ကောင်းလောက်အောင် တိကျလှသော ညွှန်ကြားချက်များနောက်သို့ လိုက်ပါလျက် သူတို့သည် စစ်မြေပြင်၏ အဓိကအမှတ်များတွင် လျင်မြန်စွာ ပေါ်လာတတ်ကြသည်။

ကောင်းကင်သို့ မော့ကာ သူ၏ စူးရှသော အသံလှိုင်း ပင်ကိုစွမ်းရည်ဖြင့် လူသားစစ်သည်များ၏ နားစည်များကို ဖောက်ထွက်ပစ်ရန် ကြိုးစားနေသည့် လင်းယုန်မိစ္ဆာဘုရင်တစ်ကောင်သည် ၎င်း၏ အော်ဟစ်သံ မဆုံးမီမှာပင် ၎င်း၏ ခေါင်းပေါ်သို့ အရိပ်ထဲမှ ရုတ်တရက် ထွက်ပေါ်လာသည့် အေးစက်သော လက်သည်းရိပ်တစ်ခုကြောင့် ၎င်း၏ ဦးခေါင်းခွံသည် ချေမွခြင်း ခံလိုက်ရသည်။

သားရဲအုပ်စု၏ အနောက်ဘက်တွင် ပုန်းကွယ်လျက် မလှုပ်မယှက် ကျောက်ဆောင်တံတိုင်း၏ စွမ်းအင်များကို အားနည်းသွားစေရန် အက်ဆစ်အချွဲများကို အဆက်မပြတ် မှုတ်ထုတ်နေသည့် ဧရာမအဆိပ်ခရုကြီးတစ်ကောင်သည်လည်း အရိပ်များဖြင့် ဖွဲ့စည်းထားသည့် ရုတ်တရက် ပေါ်လာသော ဆူးချွန်တစ်ခုကြောင့် ၎င်း၏ နူးညံ့သော ဗဟိုချက်ကို ချက်ချင်း ထိုးစိုက်ခြင်း ခံလိုက်ရသည်။

အရိပ်လှည့်ပတ်ခြင်း၏ အားနည်းသော လှိုင်းဂယက်တစ်ခု ဖြတ်ပြေးသွားသည့် အကြိမ်တိုင်းက မဟာမိတ်တပ်ဖွဲ့ဘက်မှ နည်းဗျူဟာမြောက် အမှတ်တစ်ခု သို့မဟုတ် ခြိမ်းခြောက်မှုတစ်ခု ဖယ်ရှားခံလိုက်ရပြီဖြစ်ကြောင်း ဆိုလိုသည်။

ဤအရိပ်ထဲက အမဲလိုက်ခြင်းသည် အေးစက်ထိရောက်လှပြီး မဟာမိတ်တပ်ဖွဲ့၏ ကွပ်ကဲမှု စနစ်အပေါ်သို့ ဖျက်ဆီးနိုင်သော ထိုးနှက်ချက်တစ်ခုကို ပေးစွမ်းခဲ့သည်။

အလောင်းများ ပြည့်နှက်နေသည့် စစ်မြေပြင်၏ အခြားတစ်နေရာတွင်မူ တိုက်ပွဲဝင် စရိုက်လက္ခဏာမှာ များစွာ ပိုမိုရှေးကျပြီး ကြမ်းတမ်းရက်စက်သည်ကို မြင်တွေ့ရမည်။

သွေးမိစ္ဆာ၏ အနီရင့်ရင့် ပုံရိပ်သည် သားရဲအုပ်စုကြားထဲတွင် လောင်ကျွမ်းနေသည့် မီးတောက်တစ်ခုအလား ဖြစ်နေသည်။

သူ့တွင် ထျန်းပင်းကဲ့သို့ ကြီးကျယ်ခမ်းနားလှသော မိုးကြိုးစွမ်းအားများ မရှိသလို ယင်းဖုန်းကဲ့သို့ လျှို့ဝှက်ဆန်းကြယ်ပြီး ခန့်မှန်းရခက်သော လှုပ်ရှားမှုများလည်း မရှိပေ။

သူ၏ တိုက်ပွဲဝင်သည့် ပုံစံမှာ ကောင်းကင်သတ်ဖြတ်ခြင်းစစ်သူရဲသွေး၏ ရက်စက်ယုတ်မာမှုများနှင့် သွေးသတ်ဖြတ်ခြင်း ထာဝရခန္ဓာ၏ ကြံ့ခိုင်မှုများကို ၎င်းတို့၏ အကန့်အသတ်အထိ တွန်းတင်ထားခြင်း ဖြစ်သည်။

သူသည် ရန်သူများ အသိပ်သည်းဆုံး ဧရိယာဆီသို့ တိုက်ရိုက်ဦးတည်ကာ ထိုးစစ်ဆင်ခဲ့ပြီး မိမိ၏ ခန္ဓာကိုယ်ကို အသုံးပြု၍ ပစ်ခတ်မှုအားလုံးကို ဆွဲဆောင်သည့် ဗဟိုချက်အဖြစ် ဆောင်ရွက်ခဲ့သည်။

ဧရာမမိစ္ဆာသားရဲ အမြောက်အမြားက သူ့အပေါ်သို့ တစ်ပြိုင်နက်တည်း ခုန်အုပ်လာကြသည်။

အစွယ်များနှင့် လက်သည်းများက သူ၏ ရွှေအိုရောင် ပုံစံများ ဖုံးလွှမ်းနေသည့် အမွေးအမျှင်များပေါ်တွင် အရိုးထိအောင် နက်ရှိုင်းလှသော ဒဏ်ရာများကို ချန်ထားခဲ့ကြသဖြင့် သူ၏ အနီရင့်ရင့် ခန္ဓာကိုယ်ကို သွေးများဖြင့် ချက်ချင်း ရွှဲနှစ်သွားစေခဲ့သည်။

သို့သော်လည်း သူ၏ ဒဏ်ရာများ ပြင်းထန်လေ၊ သွေးမိစ္ဆာ၏ မျက်လုံးများထဲရှိ တိုက်ပွဲဝင်လိုသော ရက်စက်မှုများမှာ ပိုမို ပြင်းထန်လာလေ ဖြစ်သည်။

“လာခဲ့ကြစမ်း။ အမှိုက်ကောင်တွေ”

သူ ရူးသွပ်စွာ ရယ်မောလိုက်သည်။

သူ့ပတ်လည်ရှိ သွေးရောင် လူသတ်ရောင်ဝါများက ရက်စက်သော ရောင်ဝါပေါက်ကွဲခြင်း ရိုက်ခတ်မှုတစ်ခုအဖြစ် အပြင်သို့ ပေါက်ကွဲထွက်သွားခဲ့ပြီ ဖြစ်သည်။

သူ့ကို ဝန်းရံထားကြသည့် မိစ္ဆာသားရဲများသည် ရူးသွပ်သော ဆန္ဒများ ပြည့်နှက်နေသည့် ဤစွမ်းအင်များကြောင့် ချက်ချင်းပင် ဖရိုဖရဲဖြစ်သွားခဲ့ကြရသည်။

နောက်တစ်ခဏတွင် သွေးရောင် လူသတ်ရောင်ဝါများ စုစည်းထားသည့် သွေးမိစ္ဆာ၏ လက်သည်းချက် သွေးဆုတ်ဖြဲလက်သည်းက ပြင်းထန်စွာ ဝှေ့ယမ်းထွက်ပေါ်လာပြီး သူ့ရှေ့က မိစ္ဆာခေါင်းဆောင်တစ်ကောင်၏ ခိုင်မာသော ကာကွယ်ရေးကို လွယ်ကူစွာ ဆုတ်ဖြဲပစ်လိုက်သည်။

ဒဏ်ရာမှ သွေးများ အဆက်မပြတ် စီးကျလာရုံတင်မကဘဲ အသက်စွမ်းအင်များကို အဆက်မပြတ် လောင်ကျွမ်းစေပြီး ထိုသားရဲအား ပြင်းထန်စွာ နာကျင်သွားစေသည်။

သူ၏ လက်အောက်ခံတပ်ဖွဲ့ဖြစ်သည့် သွေးအစွယ်တော်အစောင့်အရှောက်များသည်လည်း ဤသို့သော ဒဏ်ရာများကို အသက်ဖြင့် လဲလှယ်ကြသည်။

တိုက်ပွဲပိုမိုကြမ်းတမ်းလေ ပိုမိုရက်စက်လာလေဖြစ်သည့် နည်းလမ်းကို အစွန်းရောက်အောင် အသုံးပြုခဲ့ကြသည်။

သူတို့သည် သူတို့၏ စစ်သူကြီးနောက်မှ ကပ်လျက် လိုက်ပါလာကြရင်း ရူးသွပ်နေသော သွေးနီရောင်ဝံပုလွေအုပ်စုကြီးတစ်ခုကဲ့သို့ မိမိတို့၏ ကာကွယ်ရေးများကို လုံးဝ လျစ်လျူရှုထားခဲ့ကြသည်။

သူတို့၏ သွေးစွယ်လေခွဲလက်သည်းများက လေခွဲသံကြီးများနှင့်အတူ သူတို့ပတ်လည်ရှိ ရန်သူတိုင်းကို ရူးသွပ်စွာ တိုက်ခိုက်တော့သည်။

သူတို့ ဒဏ်ရာပိုရ‌လေ တိုက်ခိုက်မှု အမြန်နှုန်းနှင့် တုံ့ပြန်မှုများမှာ ပိုမို မြန်ဆန်လာလေဖြစ်သည့် သွေးစွန်းသော တိုက်ပွဲဝင် မသိစိတ်ပင် ဖြစ်သည်။

ရန်သူက သူတို့ကို အပြီးသတ် သတ်ဖြတ်နိုင်တော့မည်ဟု ထင်မှတ်လိုက်သည့် အခိုက်အတန့်တိုင်း၌ သူတို့က များစွာ ပိုမိုရူးသွပ်ပြီး ပိုမိုမြန်ဆန်သော တိုက်ခိုက်မှုများဖြင့် ပြန်လည် သတ်ဖြတ်ပစ်လေ့ရှိကြသည်။

သူတို့ နေရာယူထားကြသည့် စစ်မြေပြင် ဧရိယာအတွင်း ထူထဲလှသော သွေးညှီနံ့များဖြင့် ပြည့်နှက်နေသည်။

ထူးခြားသော သွေးစွန်းသတ်ဖြတ်ခြင်း နယ်ပယ် တစ်ခုကို ဖွဲ့စည်းထားသကဲ့သို့ ၎င်း၏ အကွာအဝေးအတွင်းရှိ ရန်သူ့တပ်ဖွဲ့များ၏ အသက်စွမ်းအင်များနှင့် စိတ်ဓာတ်များကို အဆက်မပြတ် တိုက်စားနေသည်။

ဝံပုလွေအသိုက်၏ ရုတ်တရက် ပေါ်ပေါက်လာခဲ့သည့် ဘက်စုံ၊ အလွှာစုံရှိ သိပ်သည်းလှသော တိုက်ခိုက်မှုကြီးမှာ ကွင်းဆက် လက်သီးချက်များအလားဖြစ်ပြီး သူတို့၏ အရှိန်အဟုန် အမြင့်ဆုံး အခြေအနေသို့ ရောက်ရှိနေကြသည့် မဟာမိတ်တပ်ဖွဲ့များ၏ မျက်နှာပေါ်သို့ ပြင်းထန်စွာ ရိုက်ချလိုက်ခြင်းပင် ဖြစ်သည်။

မူလက တားဆီး၍မရနိုင်ဘဲ ကမ္ဘာကြီးကို ဖျက်ဆီးပစ်တော့မည့်အလား ဖြစ်နေသည့် မိစ္ဆာသားရဲများ၏ ထိုးစစ်ဆင်မှုမှာ အတင်းအဓမ္မ ရပ်တန့်ခြင်း၊ ဖရိုဖရဲဖြစ်ခြင်းနှင့် တပ်ပျက်ခြင်းတို့ကို ခံလိုက်ရရှာသည်။

အချို့သော ဧရိယာများတွင်မူ မိစ္ဆာသားရဲများက ထိတ်လန့်တကြားဖြင့် နောက်လှည့်ကာ မိမိတို့၏ ပင်မတပ်ဖွဲ့များကို ပြန်လည် တိုက်ခိုက်လာကြသဖြင့် ပြိုလဲပျက်စီးမည့် အရိပ်အယောင်များပင် ပေါ်ပေါက်နေခဲ့ပြီ ဖြစ်သည်။

“အခွင့်အရေးပဲ…တစ်သက်မှာ တစ်ခါပဲ ကြုံရခဲတဲ့ အခွင့်အရေးပဲဟေ့… လှုပ်ရှားနိုင်သေးတဲ့သူတွေအားလုံး… ငါ့နောက်က လိုက်ခဲ့ကြစမ်း… သူတို့ကို ချေမှုန်းပစ်ကြမယ်… ကျဆုံးသွားခဲ့ကြရတဲ့ ငါတို့ရဲ့ ရဲဘော်ရဲဘက်တွေအတွက်…”

လေ့ဟောက်၏ ခန္ဓာကိုယ်တစ်ခုလုံးတွင် ဒဏ်ရာများ ဖုံးလွှမ်းနေပြီး သူ၏ စွမ်းအင်များမှာလည်း ခမ်းခြောက်လုနီးပါး ဖြစ်နေသော်လည်း ထူးချွန်သော ကွပ်ကဲသူတစ်ဦးအနေဖြင့် သူသည် စစ်ပွဲ၏ လမ်းကြောင်းကို အဆုံးအဖြတ်ပေးမည့် ဤအဆုံးအဖြတ် အခိုက်အတန့်လေးကို ဖမ်းယူမိလိုက်ပြီ ဖြစ်သည်။

ဝံပုလွေအသိုက်က ဘာကြောင့် အစွမ်းကုန် ရုတ်တရက် ဝင်ရောက်စွက်ဖက်ပေးခဲ့သည်ကို သူထပ်ပြီး တွေးတောမနေတော့ပေ။

ထိုအရာက အရေးမကြီး‌ပေ။ အရေးကြီးသည်မှာ မျှော်လင့်ချက်များ ပေါ်ပေါက်လာခဲ့ပြီ ဖြစ်ခြင်းပင်။

သူ ကျယ်လောင်စွာ အော်ဟစ်လိုက်ရင်း မြို့တံတိုင်းပေါ်မှ ပထမဆုံး ခုန်ဆင်းသွားခဲ့ပြီး သူ၏ လေးလံသော လက်သီးများကို လွှဲယမ်းလျက် ရန်သူ့အုပ်စုကြားသို့ ထိုးစစ်ဆင်တော့သည်။

သူ၏ အနောက်တွင်၊ ဒဏ်ရာအနည်းငယ်သာ ရရှိထားကြသည့် အရပ်သား ကျင့်ကြံသူများ အပါအဝင် ကျန်ရှိနေသေးသော လူသား ကာကွယ်သူအားလုံး အသက်လု စစ်ပွဲအော်ဟစ်သံများကို ထုတ်ဖော်လိုက်ကြသည်။

ထိုရွှေရောင် မိုးကြိုးအလင်းတန်းနှင့် ရွေ့လျားနေသည့် ရေခဲတံတိုင်းကြီး၏ အနောက်ကနေ ကပ်လျက်လိုက်ပါရင်း သူတို့သည် ပြင်းထန်သော တန်ပြန်ထိုက်ခိုက်မှုကြီးကို စတင်လိုက်ကြတော့သည်။

စစ်မြေပြင်၏ ထိုးနှက်ချက်မှာ ဤအခိုက်အတန့်တွင် ပြင်းထန်ပြီး အဆုံးအဖြတ်ဖြင့် တိမ်းစောင်းသွားခဲ့ရပြီ ဖြစ်သည်။

သို့သော်လည်း ရှေ့တန်းစစ်မြေပြင်တစ်ခုလုံး ဝံပုလွေအသိုက်၏ ဘက်စုံဝင်ရောက်တိုက်ခိုက်မှုများနှင့် လူသားတို့၏ အသက်လု တန်ပြန်တိုက်ခိုက်မှုများကြောင့် မြေပြင်တုန် ဖရိုဖရဲဖြစ်မှုများထဲသို့ ကျရောက်နေသည်။

ကာလရှည်ကြာစွာ အားယူနေသည့် များစွာ သေစေနိုင်သော မုန်တိုင်းကြီးတစ်ခုမှာမူ မိစ္ဆာမဟာမိတ်အဖွဲ့၏ ပင်မစခန်း အနောက်ဘက်၌ စတင်ပွင့်ဟလာတော့မည် ဖြစ်သည်။

စိမ့်နွံနက်မြွေဘုရင်၏ ချောမွေ့လှသော ကြေးခွံများ ဖုံးလွှမ်းနေသည့် ဧရာမခန္ဓာကိုယ်ကြီးသည် အစွန်းရောက် တင်းမာမှုများကြောင့် အနည်းငယ် တုန်ယင်နေရှာသည်။

၎င်း၏ လျှာနီနီကြီးက လျင်မြန်စွာ လှုပ်ရှားနေပြီး လေထုထဲရှိ စွမ်းအင်များနှင့် စိတ်ခံစားမှုများ၏ သိမ်မွေ့သော အပြောင်းအလဲတိုင်းကို ခံစားသိရှိနေသည်။

လွန်ခဲ့သည့် နာရီအနည်းငယ်က ရေခဲများနှင့် ရုန်းများ ဖုံးလွှမ်းနေသည့် ထိုရေဆိုးသန့်စင်စက်ရုံအတွင်း၌ ထို “နှင်းဝံပုလွေဘုရင်” (ယွဲ့ရီ၏ ပြီးပြည့်စုံသော ပုံသဏ္ဌာန်ပြောင်းလဲမှု) က ၎င်းအား ပေးအပ်ခဲ့သည့် အရိုးထဲထိ အေးစက်သော နောက်ဆုံး အကျပ်ကိုင်မှုမှာ ၎င်း၏ စိတ်ထဲတွင် အိပ်မက်ဆိုးတစ်ခုအလား ထပ်ခါတလဲလဲ ပဲ့တင်ထပ်နေခဲ့သည်။

“မိစ္ဆာဘုရင်တစ်ပါးရဲ့ ဦးခေါင်းနဲ့ ဝိညာဉ်ကို မင်းနဲ့ မင်းရဲ့ မျိုးနွယ်စုဝင်တွေ ဝံပုလွေအသိုက်ရဲ့ ပိုင်နက်နယ်မြေထဲ ဝင်ရောက်ဖို့နဲ့ ‘အသက်ရှင်သန်ခွင့်’ ရရှိဖို့အတွက် တစ်ခုတည်းသော လက်မှတ်အဖြစ် အသုံးပြုပါ…ဒါက မင်းအတွက် နောက်ဆုံး အခွင့်အရေးပဲ…”

သူသည် ဒေါသတရားများကြောင့် မျက်စိကန်းနေကြသည့် နင်မြို့ ဝံပုလွေအသိုက်တို့နှင့်အတူ ပျက်စီးသွားကြရတော့မည့် ထိုအရူးသုံးယောက်၏ အနောက်ကလိုက်ပြီး ဂူသင်္ချိုင်းထဲသို့ လိုက်သွားရမည်လား။

သို့မဟုတ် ဤတစ်ခုတည်းသော အခွင့်အရေးကို ဖမ်းဆုပ်လျက် သူတို့ကိုစတေးကာ မိမိကိုယ်တိုင်နှင့် မိမိ၏ သားသမီးမြေးမြစ်များအတွက် အစစ်အမှန်ဖြစ်မည့် အနာဂတ်တစ်ခုရရှိရန် လောင်းကြေးထပ်ရမည်လား။

ကောက်ကျစ်ပြီး အသက်ရှင်သန်ခြင်းကို တန်ဖိုးထားလှသည့် စိမ့်နွံနက်မြွေဘုရင်အတွက်မူ ဤရွေးချယ်မှုမှာ ချင့်ချိန်ရန်ပင် မလိုအပ်ခဲ့ပေ။

၎င်း၏ မြွေမျက်လုံးများသည် မိမိနှင့် မလှမ်းမကမ်း အရှေ့တည့်တည့်တွင် ရှိနေကြသည့် အရိုးဖြူတောအုပ်မှ မိစ္ဆာဘုရင် သုံးပါးတစ်စုအပေါ်သို့ ပစ်မှတ်ထားလိုက်သည်။

သူတို့သည် ၎င်းအား ကျောခိုင်းထားကြရင်း သူတို့၏ ဝိညာဉ်စွမ်းအားအားလုံးကို ရှေ့တန်းစစ်မြေပြင်ကို ဖိနှိပ်ရန်အတွက် အသုံးချနေကြပြီး ဝံပုလွေအသိုက်၏ ကြောက်မက်ဖွယ်ကောင်းသော ထိုးစစ်များအပေါ် ဒေါသတကြီး အော်ဟစ်နေကြသည်။