အခန်း ၉၄၄

အပိုင်း(၉၄၄) တိုက်ပွဲ

"ငါ ရောက်နေပြီပဲ... မင်းက ထွက်မလာရဲဘူးလား"

ဟော်ကျန့်ကျွင်းက ပတ်လည်ဝိုင်းရံလာကြသော လူအုပ်ကြီးကို အကဲခတ်လိုက်ပြီး အသံကျယ်ကျယ်ဖြင့် အော်ဟစ်လိုက်သည်။

"ဟားဟား... ကျင်းကျိုးစစ်တပ်က တန်ဖိုးမထားတတ်ဘူးပဲ... ဗိုလ်ချုပ်ဟော် ကိုယ်တိုင်ကို လွှတ်လိုက်ရတယ်လို့... ကြည့်ရတာ ဒီတစ်ခေါက် ငါတို့ ငါးကြီးကြီးတစ်ကောင် ဖမ်းမိပြီထင်တယ်"

လင်းယွမ်က ရယ်မောလိုက်ပြီး အဝေးမှ လျှောက်လာခဲ့သည်။

ဟော်ကျန့်ကျွင်း၏ အကြည့်များက လင်းယွမ်အပေါ်သို့ ချက်ချင်း ရောက်ရှိသွားသည်။

သူက လင်းယွမ်ကို အပေါ်အောက် အကဲခတ်ကြည့်လိုက်ပြီး စိတ်ထဲတွင် အံ့သြသွားမိသည်။

"မင်းက ဘယ်သူလဲ... ခိုက်ရီနည်းပညာကပဲလား"

လင်းယွမ်က ခပ်ဟဟ ရယ်မောလိုက်ပြီး "ကြည့်ရတာ ခင်ဗျားတို့က ဘာစုံစမ်းထောက်လှမ်းမှုမှ မလုပ်ဘဲ ခိုက်ရီနည်းပညာကို ရမ်းသန်းပြီး လာတိုက်ကြတာပဲ"

"မင်းစကားက ဘာသဘောလဲ" ဆွန်းချီဟန်က ဟောက်လိုက်သည်။

ဟော်ကျန့်ကျွင်းကလည်း လင်းယွမ်ကို အေးစက်စက် အကြည့်များဖြင့် စိုက်ကြည့်နေသည်။

လင်းယွမ်က ခပ်ပြုံးပြုံးဖြင့် ပြောလိုက်သည်။ "ကိုယ့်ကိုယ်ကိုယ် မိတ်ဆက်ရရင် ကျွန်တော့်နာမည်က လင်းယွမ်... ထိုက်ယန်တောင်ခိုလှုံရေးစခန်းရဲ့ ခေါင်းဆောင်ပဲ"

"ထိုက်ယန်တောင်ခိုလှုံရေးစခန်း"

ဟော်ကျန့်ကျွင်းနှင့် ဆွန်းချီဟန်တို့ လူစုမှာ ကြောင်အမ်းအမ်း ဖြစ်သွားကြသည်။ ထိုက်ယန်တောင်ခိုလှုံရေးစခန်းဟူသော အမည်ကို သူတို့ တစ်ခါမှ မကြားဖူးကြသည်မှာ သိသာလှသည်။

လင်းယွမ်က ဂရုမစိုက်ဘဲ ဆက်ပြောလိုက်သည်။ "ကျွန်တော်တို့ ထိုက်ယန်တောင်ခိုလှုံရေးစခန်းက ကျန်နန်ပြည်နယ်က လင်ကျောင်းမြို့မှာ ရှိတာ... ဒီနေရာနဲ့ အရမ်းကြီး မဝေးသလို အရမ်းကြီးလည်း မနီးဘူးပေါ့"

"ခင်ဗျားတို့ မကြားဖူးတာလည်း ပုံမှန်ပါပဲ... ဒါပေမဲ့ မကြားဖူးတာက တစ်ပိုင်း... တောင်ဘက်ကို ခြေဆန့်ချင်တယ်ဆိုမှတော့ ဒီဘက်က အခြေအနေတွေကို မစုံစမ်းဘဲ မနေသင့်ဘူးလေ"

"ဒါမှမဟုတ် ခင်ဗျားတို့က တောင်ဘက်က ခိုလှုံရေးစခန်း အဖွဲ့အစည်းတွေကို လုံးဝအထင်သေးနေကြတာလား"

ဟော်ကျန့်ကျွင်း၏ မျက်နှာမှာ အနည်းငယ် မည်းမှောင်သွားပြီး မေးလိုက်သည်။ "ကျန်နန်ပြည်နယ်က အဖွဲ့အစည်း ဟုတ်လား... မင်းတို့ ဘာလုပ်နေလဲဆိုတာကိုရော မင်းတို့ကိုယ်တိုင် သိရဲ့လား"

"ငါတို့က ကျင်းကျိုးစစ်တပ်ကွ... နိုင်ငံတော်ရဲ့ စစ်တပ်ပဲ... မင်းတို့က ဘာလုပ်ချင်နေကြတာလဲ"

ထိုစကားကို ကြားသောအခါ လင်းယွမ်က မနေနိုင်ဘဲ ဟားတိုက်ရယ်မောလိုက်တော့သည်။ "ဟော်ကျန့်ကျွင်း... အခုက ဘယ်အချိန် ရောက်နေပြီလဲ... ခင်ဗျားက ဒီလိုစကားလုံးတွေနဲ့ ကျွန်တော့်ကို ခြောက်လှန့်နေတုန်းပဲလား"

"ကပ်ဘေးကြီး ကျရောက်တာ သုံးနှစ်တောင် ရှိနေပြီလေ... အခုချိန်ထိ အစိုးရဆိုတဲ့ နာမည်ကို သုံးပြီး ကျုပ်တို့ကို ဖိနှိပ်ဖို့ လိုသေးတယ်လို့ ခင်ဗျားထင်နေတာလား"

"ပြီးတော့ ခင်ဗျားတို့က ဘယ်လိုလုပ်ပြီး နိုင်ငံတော်ကို ကိုယ်စားပြုသွားတာလဲ... ယူနီဖောင်း ဝတ်ထားရုံနဲ့လား"

"ဟမ့်... ငါတို့က ကျင်းကျိုးစစ်ဒေသက အစစ်အမှန် တပ်ဖွဲ့တွေကွ"

"ဗိုလ်ချုပ်ဟော်က ကပ်ဘေးမတိုင်ခင်ကတည်းက ကျင်းကျိုးစစ်တပ်ရဲ့ ဗိုလ်ချုပ်ပဲ... ဘာလို့ နိုင်ငံတော်ကို ကိုယ်စားမပြုနိုင်ရမှာလဲ"

"ကောင်လေး... အခုချက်ချင်း စွမ်းအင်ချိတ်ပိတ် အစီအရင်ကို ဖွင့်ပေးလိုက်... အရင်ကိစ္စတွေကို ငါတို့ အပြစ်မယူတော့ဘူး"

"အဲဒီလိုမှမဟုတ်ရင် မင်းတို့ရဲ့ အခုလုပ်ရပ်က ပုန်ကန်တာပဲ... ငါတို့ မင်းတို့ကို တိုက်ရိုက် သတ်ပစ်လို့ ရတယ်"

ဆွန်းချီဟန်က ကျယ်လောင်စွာ ဟောက်ကာ ခြိမ်းခြောက်လိုက်သည်။

ထိုစကားကို ကြားသောအခါ လင်းယွမ်က ခပ်ဟဟ ရယ်မောလိုက်ပြန်သည်။

"တကယ်ကို စိတ်ဝင်စားစရာပဲ... ကောင်းပြီလေ... ခင်ဗျားတို့က ဒီလို ကစားချင်တယ် ဆိုမှတော့ ကျုပ်လည်း ဟန်မဆောင်တော့ဘူး... အကုန် ဖွင့်ပြောလိုက်တော့မယ်"

"အားနာပေမဲ့ ကျုပ်ကလည်း ကျန်နန်ပြည်နယ်... လင်ကျောင်းမြို့... ကွမ်ဖူစစ်ဒေသရဲ့ ခေါင်းဆောင်ပဲ... ခင်ဗျားက နိုင်ငံတော်ကို ကိုယ်စားပြုတယ်ဆိုရင် ကျုပ်ကလည်း နိုင်ငံတော်ကို ကိုယ်စားပြုတယ်လို့ ပြောရမှာပေါ့"

ဆွန်းချီဟန်နှင့် ဟော်ကျန့်ကျွင်းတို့ ချက်ချင်း ကြောင်အမ်းအမ်း ဖြစ်သွားကြသည်။

ဟော်ကျန့်ကျွင်းက ဆွန်းချီဟန်ကို တစ်ချက်ကြည့်လိုက်ပြီး မေးလိုက်သည်။ "လင်ကျောင်းမြို့မှာ စစ်တပ် ရှိလို့လား"

"ဒေသခံ တပ်ဖွဲ့ငယ်လေးတစ်ခု ဖြစ်လောက်တယ်" ဆွန်းချီဟန်က လေသံတိုးတိုးဖြင့် ဖြေလိုက်သည်။

ဟော်ကျန့်ကျွင်းက မျက်မှောင်ကြုတ်လိုက်ပြီး အသံနက်ကြီးဖြင့် ပြောလိုက်သည်။ "မင်းကလည်း လုပ်ဖော်ကိုင်ဖက်ပဲဆိုတော့ အမိန့်နာခံတာက ငါတို့ရဲ့ အဓိကတာဝန်ဆိုတာ သိသင့်တယ်... အခု မင်းက ငါတို့ ကျင်းကျိုးတပ်ဖွဲ့ကို ဝိုင်းရံထားတာက ပုန်ကန်တဲ့သဘော သက်ရောက်နေပြီ"

လင်းယွမ်က လှောင်ပြုံးပြုံးလိုက်ပြီး ဟားတိုက်ရယ်မောလိုက်သည်။ "ဟားဟားဟား... ခင်ဗျားတို့နဲ့ ခဏလောက် ဇာတ်တိုက်ကစားပေးလိုက်တာကို ခင်ဗျားတို့ကိုယ်ခင်ဗျားတို့ တကယ်ကြီး အထင်ရောက်သွားကြတာလား"

"ဘယ်အချိန် ရောက်နေပြီမို့လို့ လာပြီး ဩဇာပေးနေတာလဲ"

"တော်ပြီ... စကားများမနေနဲ့တော့... ခင်ဗျားတို့က အေးအေးဆေးဆေး လက်နက်ချမှာလား... ဒါမှမဟုတ် ကျုပ်လူတွေကို ဖြေရှင်းခိုင်းရမလား"

"ကျုပ် တစ်ခုတော့ သတိပေးလိုက်မယ်... တကယ်ချကြရင် ခင်ဗျားတို့ သေလည်း အလကားပဲနော်"

"စွမ်းအင်ချိတ်ပိတ် အစီအရင်ထဲမှာ ကျုပ်တို့က ယမ်းဘီလူးတွေ အများကြီး ကြိုတင် မြှုပ်နှံထားပြီးသား"

ဟော်ကျန့်ကျွင်းနှင့် ဆွန်းချီဟန်တို့၏ မျက်နှာများမှာ ပျက်ယွင်းသွားကြသည်။

စောစောက သူတို့ပြောခဲ့သည်များမှာ တစ်ဖက်လူကို ခြောက်လှန့်ရန် သက်သက်သာ ဖြစ်သည်။

ယခင်က သူတို့၏ ဂုဏ်ပုဒ်မှာ အလွန် အသုံးဝင်ခဲ့ပေသည်။ ကျင်းကျိုးမြို့ အနီးတစ်ဝိုက်တွင် ရေလွှမ်းမိုးသော ကပ်ဘေးကြီး စတင်ဖြစ်ပွားချိန်၌ ဒေသခံ အဖွဲ့အစည်းများမှာ သူတို့ကို မြင်သည်နှင့် တစ်ဖွဲ့ပြီးတစ်ဖွဲ့ လက်နက်ချခဲ့ကြရာ သူတို့ ကိုယ်တိုင် ဝင်ရောက်တိုက်ခိုက်ရန်ပင် မလိုအပ်ခဲ့ပေ။

သို့သော် အချိန်ကြာလာသည်နှင့်အမျှ ကပ်ဘေးအခြေအနေမှာ ပိုမိုဆိုးရွားလာပြီး အပြင်ဘက်ရှိ ခိုလှုံရေးစခန်း အဖွဲ့အစည်းများက သူတို့ကို အရေးမစိုက်ကြတော့ပေ။

သေချာသည်မှာ သူတို့ ဤသို့ အချိန်ဆွဲနေခြင်းမှာ ပတ်ဝန်းကျင်ကို အကဲခတ်ကာ ရန်သူ၏ ခံစစ်တွင် မည်သည့်နေရာ၌ ဟာကွက်ရှိသည်ကို ရှာဖွေပြီး ထွက်ပြေးရန် အခွင့်အရေး ယူနေခြင်းလည်း ဖြစ်သည်။

သို့သော် လင်းယွမ်က စကားနှစ်ခွန်း သုံးခွန်း ပြောရုံမျှဖြင့် နောက်ဆုံး ရာဇသံပေးလာလိမ့်မည်ဟု သူတို့ ထင်မှတ်မထားခဲ့ပေ။

ဤတစ်ကြိမ်တွင်မူ သူတို့အတွက် နောက်ဆုတ်စရာ လမ်းမရှိတော့ချေ။

"ဟက်ဟက်... ငါတို့ကို လက်နက်ချစေချင်တာလား... မင်းတို့မှာ အဲဒီလောက် စွမ်းရည်ရှိမရှိ အရင်ကြည့်ရသေးတာပေါ့"

ဆွန်းချီဟန်က အေးစက်စက် ရယ်မောလိုက်ပြီး ဘာမှထပ်မပြောတော့ဘဲ ခြေတစ်လှမ်း ရှေ့တိုးလိုက်သည်။

သူ့ခန္ဓာကိုယ်ထက်တွင် သွေးမြူခိုးများ ဖုံးလွှမ်းသွားပြီး ကိုယ်လုံးမှာ လျင်မြန်စွာ ကြီးထွားလာလေသည်။

သိပ်သည်းသော သွေးမြူခိုးများထဲမှ သူ၏အသံ ထွက်ပေါ်လာသည်။

"စွမ်းအင်ချိတ်ပိတ် အစီအရင်က ဘယ်လောက်ပဲ စွမ်းစွမ်း... မျိုးရိုးဗီဇ ပြန်လည်ဖွဲ့စည်းခြင်းကိုတော့ မတားဆီးနိုင်ဘူးကွ"

"ငါတို့က သန္ဓေပြောင်းအစွမ်းတွေကို မသုံးနိုင်ရင်တောင်မှ မျိုးရိုးဗီဇ ပြန်လည်ဖွဲ့စည်းထားတဲ့ အနေအထားနဲ့ဆိုရင် တိုက်ခိုက်နိုင်စွမ်း မရှိဘူးလို့တော့ မထင်နဲ့"

သူ မျိုးရိုးဗီဇ ပြန်လည်ဖွဲ့စည်းခြင်း အခြေအနေသို့ ကူးပြောင်းသွားသည်နှင့်အမျှ သူနှင့်အတူ ပါလာသူများကလည်း မျိုးရိုးဗီဇ ပြန်လည်ဖွဲ့စည်းခြင်း ပုံစံများသို့ အသီးသီး ကူးပြောင်းသွားကြလေသည်။

"အသွင်ပြောင်းမယ်"

"မျိုးရိုးဗီဇ ပြန်လည်ဖွဲ့စည်းခြင်း"

"လာစမ်း"

ထိုလူများက အသီးသီး ဟစ်အော်လိုက်ကြပြီး တစ်ယောက်ပြီးတစ်ယောက် မျိုးရိုးဗီဇ သားရဲကြီးများအဖြစ် တိုက်ရိုက် အသွင်ပြောင်းသွားကြတော့သည်။

"ဂါး"

မျိုးရိုးဗီဇ သားရဲကြီးများ၏ ဟိန်းဟောက်သံက မိုးကွဲမတတ် ကျယ်လောင်စွာ ထွက်ပေါ်လာသည်။

မြို့ငယ်လေးထဲရှိ ခိုလှုံရေးစခန်းမှ နေထိုင်သူများမှာ ကြောက်လန့်တကြားဖြင့် နောက်သို့ ဆုတ်ကာ အသီးသီး ပုန်းအောင်း ရှောင်တိမ်းသွားကြသည်။

လင်းယွမ်က အသွင်မပြောင်းသေးဘဲ မျက်နှာချင်းဆိုင်ရှိ ဟော်ကျန့်ကျွင်းနှင့် လူစုကို လှမ်းကြည့်လိုက်သည်။

တစ်ဖက်ရန်သူဘက်မှ လူ (၁၁) ယောက်ခန့် လာရောက်ခဲ့ပြီး အားလုံးမှာ မျိုးရိုးဗီဇ ပြန်လည်ဖွဲ့စည်းခြင်း အဆင့်ရှိ အစွမ်းပိုင်ရှင်များ ဖြစ်ကြသည်။

ထို့ကြောင့် ထိုဆယ့်တစ်ယောက်လုံး တိုက်ရိုက် အသွင်ပြောင်းသွားကြရာ မျိုးရိုးဗီဇ ပြန်လည်ဖွဲ့စည်းထားသည့် သားရဲကြီး ဆယ့်တစ်ကောင်အဖြစ် ပြောင်းလဲသွားကြလေသည်။

သို့သော် ဤမျှနှင့် လုံးဝ လုံလောက်မှု မရှိသေးပေ။

အကြောင်းမှာ လင်းယွမ်တို့ဘက်တွင် မျိုးရိုးဗီဇ ပြန်လည်ဖွဲ့စည်းခြင်း အဆင့်ရှိ အစွမ်းပိုင်ရှင် အရေအတွက်မှာတင် (၅၀) ကျော်အထိ ရှိနေသောကြောင့်ပင်တည်း။

၎င်းအထဲတွင် ဂျိမ်းစ်တို့ သုံးယောက်ပင် မပါဝင်သေးချေ။

မျိုးရိုးဗီဇ သားရဲကြီး (၅၀) ကျော်က မျိုးရိုးဗီဇ သားရဲကြီး (၁၁) ကောင်ကို သွားရောက် တိုက်ခိုက်မည်ဆိုလျှင် ရလဒ်မှာ ပြောနေစရာပင် မလိုတော့ပေ။

စွမ်းအင်ချိတ်ပိတ် အစီအရင်ကြောင့် ယခုအချိန်တွင် မျိုးရိုးဗီဇ သားရဲကြီးများမှာ သန္ဓေပြောင်းအစွမ်းများကို လုံးဝ အသုံးမပြုနိုင်ကြတော့ဘဲ တစ်ခုတည်းသော လုပ်နိုင်စွမ်းမှာ ကိုယ်ကာယခွန်အားဖြင့်သာ ရင်ဆိုင်တိုက်ခိုက်ရန် ဖြစ်သည်။

ထို့ကြောင့် ဤအချိန်တွင် ခွန်အားအမျိုးအစား၊ အလျင်အမျိုးအစားနှင့် ခန္ဓာကိုယ်ကြံ့ခိုင်မှု အမျိုးအစား မျိုးရိုးဗီဇ သားရဲကြီး သုံးမျိုးက ပို၍ အခွင့်အရေး ရနေသည်။

သူတို့သည် သန္ဓေပြောင်းအစွမ်းများကို အသုံးမပြုနိုင်သော်လည်း ဤမျိုးရိုးဗီဇ သားရဲကြီး သုံးမျိုးမှာ အစွမ်းမရှိလျှင်ပင် မျိုးရိုးဗီဇ ပြန်လည်ဖွဲ့စည်းထားသော ခန္ဓာကိုယ်က အမှန်တကယ်တွင် သူတို့၏ သက်ဆိုင်ရာ အရည်အသွေးများအပေါ်၌သာ အခြေခံထားခြင်း ဖြစ်သည်။

ယခုအချိန် ခိုက်ရီနည်းပညာဘက်တွင် စုရုံးရောက်ရှိလာသူ အားလုံးမှာ အခြေခံအားဖြင့် ဤအစွမ်းပိုင်ရှင် အမျိုးအစား သုံးခုလုံးပင် ဖြစ်ကြသည်။

အမှန်တကယ်တွင် ဤစွမ်းအင်ချိတ်ပိတ် အစီအရင်ကြီး တစ်ခုလုံး၏ အပြင်ဘက်၌ ဒြပ်စင်အမျိုးအစား မျိုးရိုးဗီဇ ပြန်လည်ဖွဲ့စည်းခြင်း အဆင့်ရှိ အစွမ်းပိုင်ရှင် အများအပြား ချုံခိုစောင့်ဆိုင်းနေကြသေးသည်။

ထိုအစွမ်းပိုင်ရှင်များမှာ ဟော်ကျန့်ကျွင်းတို့ လူစုထဲမှ တစ်စုံတစ်ယောက်က စွမ်းအင်ချိတ်ပိတ် အစီအရင်ထဲမှ ကံကောင်းထောက်မစွာ ထွက်ပြေးလွတ်မြောက်သွားမည်ကို ကာကွယ်ရန်အတွက် ဖြစ်သည်။

"ဝုန်း"

ဆွန်းချီဟန်မှာ ဂျက်ခ်နှင့် မော်လီတို့၏ ပူးပေါင်းဖိနှိပ်မှုကို ခံလိုက်ရပြီး ဂျက်ခ်က အလွန်မြန်ဆန်သော အလျင်ဖြင့် ဆွန်းချီဟန်၏ ခေါင်းကို လက်သီးဖြင့် အပြင်းအထန် ထိုးချလိုက်သည်။

ချက်ချင်းပင် ဆွန်းချီဟန်၏ ခန္ဓာကိုယ်မှာ ထိန်းချုပ်မရဘဲ အနောက်သို့ လွင့်စင်သွားပြီး "ဘုန်း" ဟူသော အသံနှင့်အတူ အဆောက်အအုံတစ်လုံးကို ဝင်တိုက်မိကာ ကျိုးပဲ့ပျက်စီးသွားလေသည်။

သူက ခေါင်းမူးနောက်သွားသည်ဟု ခံစားလိုက်ရပြီး ဒေါသတကြီးဖြင့် ပြန်ထရန် ကြိုးစားလိုက်သည်။

သို့သော် အနီးအနားမှ နောက်ထပ် မျိုးရိုးဗီဇ သားရဲကြီး နှစ်ကောင်က ခုန်အုပ်လာပြီး ရှေ့ဆင့်နောက်ဆင့်ဆိုသလိုပင် ဆွန်းချီဟန်၏ ရှေ့လက်နှစ်ဖက်ကို ဖမ်းဆုပ်ကာ မြေပြင်ပေါ်သို့ အသေအလဲ ဖိချလိုက်ကြသည်။

ဂျက်ခ်က ခြေတစ်ဖက်ဖြင့် နင်းချလိုက်ရာ "ဘုန်း" ဟူသော အသံနှင့်အတူ ဆွန်းချီဟန်၏ ခေါင်းကို မြေပြင်ပေါ်သို့ ပြင်းထန်စွာ ဖိနင်းလိုက်လေသည်။

"ဟားဟား... ကောင်လေး... မင်း ခုနက တော်တော်လေး ရမ်းကားနေတာ မဟုတ်ဘူးလား"

"ဆရာလင်းရှေ့မှာတောင် ဒီလောက် မောက်မာရဲတယ်ပေါ့... မင်းလိုကောင်မျိုးက ဆရာလင်း ကိုယ်တိုင် ဝင်ပါရလောက်တဲ့အထိ မတန်ဘူး... အခု ဘယ်သူက ဆရာလဲဆိုတာ မင်းကို သိအောင် လုပ်ပေးမယ်"

ထိုသို့ပြောရင်း သူက စွမ်းအင်ချိတ်ပိတ် လည်ပတ်တစ်ခုကို ထုတ်ယူကာ ဆွန်းချီဟန်၏ ခေါင်းစွပ်တွင် တိုက်ရိုက် တပ်ဆင်လိုက်သည်။

တစ်ချိန်တည်းမှာပင် ဒေါက်တာယင်ကလည်း လျင်မြန်စွာ ပြေးလာပြီး ဆွန်းချီဟန်၏ ကျောပြင်ပေါ်သို့ အမြောက်ဆံတစ်လုံး ပစ်ခတ်လိုက်သည်။

"ဘုန်း" ဟူသော အသံနှင့်အတူ ထိုအမြောက်ဆံမှာ ကြီးမားသော စွမ်းအား မရှိသော်လည်း ပေါက်ကွဲသွားပြီးနောက် ဆွန်းချီဟန်၏ ခန္ဓာကိုယ်ထဲသို့ လျင်မြန်စွာ စိမ့်ဝင်သွားကာ စွမ်းအင်ချိတ်ပိတ် သင်္ကေတတစ်ခုအဖြစ် ဖြစ်ပေါ်သွားလေသည်။

ဤပုံစံမှာ ယခင်က ဂျိမ်းစ်ကို ချိတ်ပိတ်ခဲ့သော စွမ်းအင်ချိတ်ပိတ် သင်္ကေတနှင့် များစွာ တူညီနေပေသည်။

လင်းယွမ်က ထိုမြင်ကွင်းကို ကြည့်ရင်း မနေနိုင်ဘဲ ခေါင်းညိတ်လိုက်မိသည်။ ၎င်းက စွမ်းအင်ချိတ်ပိတ် လက်ထိပ်ထက် များစွာ ပို၍ အဆင်ပြေလှသည်။

စွမ်းအင်ချိတ်ပိတ် လက်ထိပ်နှင့် စွမ်းအင်ချိတ်ပိတ် လည်ပတ်တို့မှာ တစ်ဖက်လူကို တပ်ဆင်ပေးရန် လိုအပ်သော်လည်း ဤအမြောက်ဆံပုံစံ စွမ်းအင်ချိတ်ပိတ် သင်္ကေတကမူ များစွာ ပို၍ ရိုးရှင်းပေသည်။

လင်းယွမ်က ခေါင်းလှည့်ကာ ဂျိမ်းစ်နှင့် ဟော်ကျန့်ကျွင်းတို့ဘက်မှ အခြေအနေကို ထပ်မံ ကြည့်ရှုလိုက်သည်။

ထိုသို့ ကြည့်လိုက်ရာ အံ့သြသွားသည့် အရိပ်အယောင်များ ပေါ်လွင်လာသည်။

ဟော်ကျန့်ကျွင်း၏ မျိုးရိုးဗီဇ အသွင်သဏ္ဌာန်မှာ ဧရာမ ပင်လယ်ကြယ်ပုံစံ အသွင်တစ်ခု ဖြစ်နေပြီး အလွန်တရာ သန်မာသော အာရုံခံလက်တံ ငါးခု ပါရှိကာ အလယ်ဗဟိုရှိ ချက်ပေါက်နှင့်တူသော ဧရာမ ပါးစပ်ပေါက်ကြီးမှ ပျစ်ချွဲသော အရည်များကို အမြောက်အမြား ပန်းထုတ်နိုင်သေးသည်။

သန္ဓေပြောင်းအစွမ်းများကို အသုံးမပြုနိုင်သော်လည်း ဤအသွင်သဏ္ဌာန်က ဂျိမ်းစ်ကို အဆက်မပြတ် ဆုတ်ခွာသွားစေရန် ဖိအားပေးနိုင်ဆဲ ဖြစ်သည်။

သိထားရမည်မှာ ဂျိမ်းစ်သည် တိတ်ဆိတ်ဇုန် အစွမ်းကို ပိုင်ဆိုင်ထားသောကြောင့် အစွမ်းများ အသုံးမပြုနိုင်သော ပတ်ဝန်းကျင်တွင် ရန်သူများနှင့် ကိုယ်ခံပညာဖြင့် ရင်ဆိုင်တိုက်ခိုက်ရာ၌ အကျွမ်းကျင်ဆုံး ဖြစ်သည်။

ထို့အပြင် သူ၏ တစ်ကိုယ်လုံးရှိ စက်ပစ္စည်း ကိရိယာများမှာလည်း အကောင်းဆုံးအဆင့်များ ဖြစ်ရာ မျိုးရိုးဗီဇ အသွင်သဏ္ဌာန်ကို အားကိုးပြီး သူ့ကို ကိုယ်ခံပညာဖြင့် အနိုင်ယူနိုင်မည့်သူမှာ အလွန် ရှားပါးလှသည်။

သို့သော် ဤတစ်ကြိမ်တွင်မူ ဂျိမ်းစ်က ပြိုင်ဘက်ကောင်းနှင့် တွေ့ဆုံသွားခဲ့ပြီ ဖြစ်သည်။

ဟော်ကျန့်ကျွင်း၏ အာရုံခံလက်တံ ငါးခုအနက် နှစ်ခုကို ရွေ့လျားရန် အသုံးပြုပြီး ကျန်သုံးခုမှာမူ အလွန် မြန်ဆန်ကာ လှုပ်ရှားမှုအကြိမ်အရေအတွက် အလွန် များပြားပြီး နတ်ဆိုးတစ်ကောင်အလား မှန်းဆ၍ မရအောင် လှုပ်ရှားနေသည်။

ထို့အပြင် တစ်ခါတစ်ရံ ပန်းထုတ်လိုက်သော ပျစ်ချွဲသည့် အရည်များကလည်း ပြိုင်ဘက်၏ ရွေ့လျားမှု အလျင်ကို များစွာ ကန့်သတ်ထားလေသည်။

ထို့ကြောင့် ယခုအချိန် တိုက်ခိုက်ရာတွင် ဂျိမ်းစ်မှာ အခြေအနေမလှဘဲ အဆက်မပြတ် ဆုတ်ခွာနေရတော့သည်။

ဆက်ရန်...