အခန်း ၉၄၆

အပိုင်း(၉၄၆) ကျင်းကျိုးစစ်တပ် အတွင်းပိုင်း ဂိုဏ်းကွဲများ

မွန်းလွဲပိုင်းအချိန်တွင် လင်းယွမ်က ဟော်ကျန့်ကျွင်း၏ ကျွန်းပေါ်သို့ ရောက်ရှိလာသည်။

ဤကျွန်း၏ ဧရိယာက မကြီးမားလှသော်လည်း ရာသီဥတုက သာယာပြီး ပုံမှန် ရေဓာတ် ရေပေါ်ကျွန်း တစ်ကျွန်းဖြစ်ပေသည်။

လင်းယွမ်က ဘေးနားရှိ ဟော်ကျန့်ကျွင်းကို တစ်ချက်ကြည့်ပြီး မေးခွန်းထုတ်သည်။ "ခင်ဗျားက ခွန်အားအမျိုးအစား အစွမ်းပိုင်ရှင်လား"

ဟော်ကျန့်ကျွင်းက ခေါင်းခါပြသည်။ "မဟုတ်ပါဘူး... ကျွန်တော်က ရေဓာတ် အစွမ်းပိုင်ရှင်ပါ"

လင်းယွမ်က အံ့အားသင့်သွားပြီး ပြောလေ၏။ "ခင်ဗျားရဲ့ မျိုးရိုးဗီဇပုံစံကို ကြည့်ရတာ ကြယ်ငါးတစ်ကောင်နဲ့ တူတယ်မလား"

"ဟုတ်ပါတယ်... ကျွန်တော့်ရဲ့ မျိုးရိုးဗီဇမျိုးစေ့ နာမည်က ရောင်စုံကြယ်ငါး လို့ ခေါ်ပါတယ်... ရေဓာတ် မျိုးရိုးဗီဇသားရဲဖြစ်ပြီးတော့ ဒုတိယ အရည်အသွေးကမှ ခွန်အားအမျိုးအစားပါ"

လင်းယွမ်က ချက်ချင်း သဘောပေါက်သွားသည်။ စောစောက ဟော်ကျန့်ကျွင်း၏ တိုက်ခိုက်ရေးဟန်ကို ကြည့်ခြင်းအားဖြင့် သူ၏ မျိုးရိုးဗီဇပုံစံတွင် သိသာထင်ရှားသော ခွန်အားအမျိုးအစား လက္ခဏာများ ရှိနေကြောင်း သိသာပေသည်။

ထိုသို့မဟုတ်လျှင် ဂျိမ်းစ်ကို ဖိနှိပ်တိုက်ခိုက်နိုင်မည် မဟုတ်ပေ။

ဟော်ကျန့်ကျွင်း၏ မျိုးရိုးဗီဇ ပြန်လည်ဖွဲ့စည်းခြင်း အဆင့်က ဂျိမ်းစ်လောက် မမြင့်မားကြောင်း သိထားရပေမည်။

လင်းယွမ်က သိချင်စိတ်ဖြင့် မေးမြန်းသည်။ "ခင်ဗျားရဲ့ အဲဒီ အချွဲတွေ ပန်းထုတ်တဲ့ အစွမ်းက ဘာလဲ... ဘာလို့ စွမ်းအင်ချိတ်ပိတ် အစီအရင် က ခင်ဗျားရဲ့အစွမ်းကို မပိတ်လှောင်နိုင်တာလဲ"

ဟော်ကျန့်ကျွင်းက ခါးသီးစွာ ပြုံးပြပြီး ရှင်းပြသည်။ "ဒီစွမ်းရည်က တကယ်တော့ လူတွေ တံတွေးထွေးတာနဲ့ အတူတူပါပဲ... ကြယ်ငါးတွေ အချွဲပန်းထုတ်တာကလည်း ခန္ဓာကိုယ်ရဲ့ ဇီဝကမ္မဖြစ်စဉ်တစ်ခုမို့လို့ သန္ဓေပြောင်းအစွမ်းနဲ့ မဆိုင်ပါဘူး"

"ဒါပေမဲ့ သန္ဓေပြောင်းစွမ်းအင် အထောက်အပံ့သာ ပါဝင်မယ်ဆိုရင် ကျွန်တော့်ရဲ့ အချွဲတွေကို စွမ်းအင်ကနေတစ်ဆင့် အဆက်မပြတ် ထုတ်ပေးနိုင်ပြီးတော့ အချွဲမထွက်တော့တဲ့ အခြေအနေမျိုး မရှိနိုင်တော့ဘူး"

"ပြီးတော့ စွမ်းအင်အထောက်အပံ့ ရပြီးသွားရင် ကျွန်တော် ပန်းထုတ်လိုက်တဲ့ အချွဲတွေရဲ့ တိုက်ခိုက်နိုင်တဲ့ အကွာအဝေးရော... စေးပျစ်မှု အတိုင်းအတာပါ အများကြီး တိုးတက်သွားမယ်... မျိုးရိုးဗီဇ ပြန်လည်ဖွဲ့စည်းခြင်း အဆင့်ရောက်နေတဲ့ အစွမ်းပိုင်ရှင် တွေတောင်မှ တိုက်ရိုက်ကပ်ငြိသွားပြီး လှုပ်လို့မရတော့တဲ့အထိ ဖြစ်သွားနိုင်တယ်"

လင်းယွမ်က ထိုစဉ်က သူ ဖမ်းမိခဲ့သော သန္ဓေပြောင်း ပင်လယ်မျှော့ကို မနေနိုင်ဘဲ ပြန်သတိရသွားသည်။

ထိုသန္ဓေပြောင်း ပင်လယ်မျှော့များ၏ ခန္ဓာကိုယ်ထဲမှလည်း စေးပျစ်သော အရည်များ စိမ့်ထွက်လာတတ်သည်။ ထိုစဉ်က သူသည် ဤသန္ဓေပြောင်း ပင်လယ်မျှော့များ၏ ထွက်လာသော အရည်များကို ကော်အဖြစ် အသုံးပြုကာ သစ်သားဖောင်တစ်ခု ပြုလုပ်ခဲ့သေးသည်။

ယခုကြည့်ရသည်မှာ ဟော်ကျန့်ကျွင်း၏ ဤစွမ်းရည်က သန္ဓေပြောင်း ပင်လယ်မျှော့နှင့် အနည်းငယ် ဆင်တူနေပေသည်။

သူတို့နှစ်ယောက် စကားပြောနေစဉ်မှာပင် ကျွန်းပေါ်သို့ ရောက်ရှိသွားကြပြီ ဖြစ်သည်။

ဟော်ကျန့်ကျွင်းက ပြောသည်။ "ဆရာလင်း... ဒီကျွန်းကို ကျွန်တော့်ရဲ့ မျိုးရိုးဗီဇမျိုးစေ့နာမည် အစွဲပြုပြီး ကြယ်ငါးကျွန်းလို့ နာမည်ပေးထားပါတယ်"

"ကျွန်းရဲ့ ဧရိယာက စုစုပေါင်း ၉၃ စတုရန်းမိုင် ရှိတယ်... ရာသီဥတုက တစ်နှစ်ပတ်လုံး ပုံမှန်ဖြစ်ပြီး စွမ်းအင်အကာအကွယ်လွှာ လည်ပတ်နေလို့ မိုးရေတိုက်စားမှုကို တားဆီးပေးနိုင်တယ်"

"ဒီနေရာက နေထိုင်ဖို့ သင့်တော်လို့ ကျွန်တော် အစကတည်းက ဒီမှာပဲ ပင်မစခန်းကို တည်ဆောက်ခဲ့တာပါ"

"ကျွန်းပေါ်က နေထိုင်သူအများစုက ကျွန်တော်နဲ့အတူ အစောဆုံး အသက်ရှင်ကျန်ရစ်ခဲ့တဲ့ စစ်သားတွေပါ... သူတို့က ကျွန်တော့်အပေါ်ကို လုံးဝ သစ္စာရှိကြတယ်"

လင်းယွမ်က ခေါင်းအနည်းငယ် ညိတ်ပြပြီး ပြောလေ၏။ "တော်တော်ကောင်းတာပဲ... တကယ်ကို နေချင့်စဖွယ် နေရာလေးပဲ"

"ငါ့ကို ကျင်းကျိုးစစ်တပ် ရဲ့ အခြေအနေအကြောင်း နည်းနည်းလောက် ပြောပြပါဦး"

ဟော်ကျန့်ကျွင်းက အနည်းငယ် တွေးတောကာ စကားလုံးများကို စီစဉ်သည်။

သူက ကျင်းကျိုးစစ်တပ်၏ အထက်တန်းအရာရှိတစ်ဦး ဖြစ်သောကြောင့် ကျင်းကျိုးစစ်တပ်၏ အခြေအနေကို သဘာဝကျကျ ပိုမို ရှင်းလင်းစွာ သိရှိထားပေသည်။

သူက ချက်ချင်းပင် စကားစသည်။ "ကျင်းကျိုးစစ်တပ်မှာ အဓိကအားဖြင့် ဂိုဏ်းကွဲကြီး ငါးခု ရှိတယ်... အဲဒီအထဲမှာ ကျွန်တော်က ပြင်ပကလာတဲ့ ဂိုဏ်းကွဲလို့ သတ်မှတ်လို့ရပြီး... ကျန်တဲ့ ဂိုဏ်းကွဲကြီး လေးခုကတော့ ကျင်းကျိုးစစ်တပ်က ဒေသခံတွေ ဦးဆောင်တာပါ"

"ဒီဂိုဏ်းကွဲကြီး လေးခုကတော့... ဟုန်... ဝမ်... ကျန်း နဲ့ လု ဆိုတဲ့ ဂိုဏ်းကွဲကြီး လေးခုပဲ"

"အဲဒီအထဲမှာ ဟုန် ဂိုဏ်းကွဲဆိုတာက ကျင်းကျိုးစစ်တပ်ရဲ့ နံပါတ်တစ် အစွမ်းပိုင်ရှင် ဟုန်ထျန်ရီ ခေါင်းဆောင်တဲ့ စစ်ဘက်ဆိုင်ရာ ဂိုဏ်းကွဲပါ"

"ဟုန်ထျန်ရီရဲ့ စွမ်းရည်က အမြင့်ဆုံးဖြစ်ပြီး သူ့လက်အောက်က လူတွေလည်း အများဆုံးမို့လို့... တစ်ခုလုံးအနေနဲ့ကြည့်ရင် ကျင်းကျိုးစစ်တပ်ရဲ့ ဂိုဏ်းကွဲကြီး ငါးခုထဲမှာ အင်အားအကြီးဆုံး အဖွဲ့လို့ ဆိုလို့ရတယ်"

"လက်ရှိ ကျင်းကျိုးစစ်တပ်ထဲမှာ သူက ထိပ်တန်းအဆင့်မှာ ရှိနေတာ"

လင်းယွမ်က ခေါင်းအနည်းငယ် ညိတ်ကာ မေးသည်။ "ကျန်တဲ့ ဂိုဏ်းကွဲ သုံးခုကရော"

"ဝမ် ဂိုဏ်းကွဲရဲ့ ခေါင်းဆောင်က ဝမ်ကျစ်ယွမ် လို့ခေါ်တဲ့ အစွမ်းပိုင်ရှင် တစ်ယောက်ပဲ... လျှပ်စီးဓာတ် အစွမ်းပိုင်ရှင်ဖြစ်ပြီး စွမ်းရည်ကလည်း သာမန်မဟုတ်ဘူး... မျိုးရိုးဗီဇ ပြန်လည်ဖွဲ့စည်းခြင်း အဆင့်က ကျွန်တော်နဲ့ သိပ်မကွာဘူး... ၇၀ ရာခိုင်နှုန်းကနေ ၇၅ ရာခိုင်နှုန်းလောက် ရှိမယ်လို့ ခန့်မှန်းရတယ်... အတိအကျတော့ သေချာမသိဘူး"

"ဒီလူက ကပ်ဘေးမတိုင်ခင်က သာမန်လူတစ်ယောက်ပဲ... နောက်ပိုင်း သန္ဓေပြောင်းအစွမ်း နိုးထလာပြီးတဲ့နောက် တစ်စတစ်စ အစွမ်းထက်လာပြီးမှ ကျင်းကျိုးစစ်တပ်ထဲကို ဝင်လာတာ"

"သူက ဟုန်ထျန်ရီရဲ့ အမာခံ ထောက်ခံသူ တစ်ယောက်ပဲ"

လင်းယွမ်က ထိုစကားကို ကြားသောအခါ မေးမြန်းသည်။ "ဘာလို့ ဟုန်ထျန်ရီရဲ့ အမာခံ ထောက်ခံသူ ဖြစ်နေရတာလဲ"

"ဘာလို့လဲဆိုတော့ ဟုန်ထျန်ရီကလည်း အစကတည်းက စစ်တပ်နောက်ခံက လာတာ မဟုတ်ဘူးလေ... သူလည်း အောက်ခြေကနေ တစ်ဆင့်ချင်း ရုန်းကန်လာခဲ့ရတာ... အခု စစ်တပ်ရဲ့ နံပါတ်တစ် အစွမ်းပိုင်ရှင် ဖြစ်လာတော့... ဝမ်ကျစ်ယွမ်က ဟုန်ထျန်ရီကို သူ့လိုမျိုး ဘဝတူလို့ တွေးနေတာပါ"

လင်းယွမ်က ချက်ချင်း နားလည်သွားပြီး မေးသည်။ "ခင်ဗျားဆိုလိုတာက... ကျန်း နဲ့ လု ဂိုဏ်းကွဲနှစ်ခုက ဟုန်ထျန်ရီနဲ့ တစ်လမ်းတည်း မဟုတ်ဘူးပေါ့"

ဟော်ကျန့်ကျွင်းက ခေါင်းအနည်းငယ် ညိတ်ပြသည်။ "အမှန်ပဲ... ကျန်း ဂိုဏ်းကွဲရဲ့ ခေါင်းဆောင်က ကျန်းဝမ်ပင် လို့ ခေါ်တယ်... ရေဓာတ် အစွမ်းပိုင်ရှင် တစ်ယောက်ပဲ... ဒီလူက အတိုင်းအတာတစ်ခုအထိ နောက်ခံရှိတယ်... ကပ်ဘေးမတိုင်ခင်ကတည်းက စစ်ဘက်ဆိုင်ရာ အရာရှိတစ်ယောက်ပေါ့"

"အောက်ခြေကနေ တက်လာတာ မဟုတ်လို့ဖြစ်မယ်... သူ့ဆီမှာ ဘဝင်မြင့်တဲ့စိတ် အနည်းအကျဉ်းတော့ ရှိတယ်... အောက်ခြေကနေ တက်လာတဲ့ ဟုန်ထျန်ရီတို့ကို သိပ်အထင်မကြီးဘူး"

"နောက်ပိုင်း ဟုန်ထျန်ရီက ကျင့်စဉ်မှာ အောင်မြင်မှုရလာပြီး မျိုးရိုးဗီဇ ပြန်လည်ဖွဲ့စည်းခြင်း အဆင့်က ၈၉ ရာခိုင်နှုန်းအထိ ရောက်သွားတော့မှ... ကျန်းဝမ်ပင်လည်း မတတ်သာဘဲ ခေါင်းငုံ့ အရှုံးပေးရတာပါ"

"လု ဂိုဏ်းကွဲရဲ့ ခေါင်းဆောင်ခေါင်းဆောင်ကတော့ လုယွမ်ဆန်း လို့ခေါ်တယ်... ဒီလူကလည်း နောက်ခံရှိတယ်... ဒါပေမဲ့ ကပ်ဘေးမတိုင်ခင်က အထက်တန်းအလွှာထိတော့ မရောက်သေးဘူး... သူ့ရဲ့ မူလ အထက်အရာရှိက အောက်ခြေကနေ တက်လာတဲ့ စစ်ဗိုလ်တစ်ယောက်ပဲ... ဒါပေမဲ့ လုယွမ်ဆန်းရဲ့ လုပ်ကြံတာ ခံရပြီး အဲဒီကနေတစ်ဆင့် လုယွမ်ဆန်းက အပေါ်ကို တက်လာခဲ့တာ"

"လုယွမ်ဆန်းက မွေးရာပါ ကျန်းဝမ်ပင်နဲ့ တစ်တန်းတည်းစား ဖြစ်နေတော့ သူတို့နှစ်ယောက်က သဘာဝကျကျ ပိုရင်းနှီးကြတယ်"

ဟော်ကျန့်ကျွင်း၏ ရှင်းပြမှုကို နားထောင်ပြီးနောက် လင်းယွမ်က ကျင်းကျိုးစစ်တပ်၏ ဖွဲ့စည်းပုံကို အကြမ်းဖျင်း နားလည်သွားလေသည်။

လင်းယွမ်က မေးသည်။ "ဒါဆို အခု ကျင်းကျိုးစစ်တပ်ထဲမှာ... ဟုန်ထျန်ရီရဲ့ အမိန့်က အရာရောက်လား... အဲဒီ လုယွမ်ဆန်း နဲ့ ကျန်းဝမ်ပင် တို့က သူ့အမိန့်ကို အပေါ်ယံပဲ နာခံပြီး ကွယ်ရာမှာ ဆန့်ကျင်တာမျိုး ရှိလား"

ဟော်ကျန့်ကျွင်းက သက်ပြင်းတစ်ချက်ချသည်။ "သေချာပေါက် ရှိတာပေါ့... ဥပမာအနေနဲ့ ဒီတစ်ခေါက် နတ်ဘုရားနိုင်ငံတော် က ရှန်တိတို့ကို သွားတိုက်တဲ့ကိစ္စဆိုပါတော့... ကျင်းကျိုးစစ်တပ်က ခေါင်းဆောင်တွေသာ အတူတူ ဝင်တိုက်ကြမယ်ဆိုရင်... ရှန်တိက သူ့ကိုယ်သူ နတ်ဘုရားလို့ ကြွေးကြော်နေရင်တောင်... သေဘေးကနေ လွတ်နိုင်မှာ မဟုတ်ဘူး"

"ဒါပေမဲ့ ရှန်တိက လုံးဝ မသေခဲ့ဘူး... အဲဒီအစား ဟုန်ထျန်ရီက ဒဏ်ရာနည်းနည်း ရသွားတယ်... ဒါက ဘာအကြောင်းကြောင့်လဲဆိုတာ ကျွန်တော် မပြောရင်တောင် ဆရာလင်းလည်း ရိပ်မိလောက်မှာပါ"

လင်းယွမ်က ထိုစကားကို ကြားသောအခါ မနေနိုင်ဘဲ ပြုံးမိသည်။

သူက မနေနိုင်ဘဲ ပြောသည်။ "ငါသာ ဟုန်ထျန်ရီ နေရာမှာဆိုရင်... အဲဒီ နတ်ဘုရားနိုင်ငံတော် က နတ်ဘုရား ဆိုတဲ့ကောင်ကို သတ်ဖို့ အလောတကြီး လုပ်နေမှာ မဟုတ်ဘူး... ပထမဆုံး သတ်ရမှာက ကျန်း နဲ့ လု နှစ်ယောက်ပဲ"

"ပြည်ပရန်ကို မနှိမ်နင်းခင် ပြည်တွင်းရေးကို အရင် မဖြေရှင်းထားရင်... အနှေးနဲ့အမြန် ကြီးမားတဲ့ ကိစ္စတွေကို ပျက်စီးစေလိမ့်မယ်"

ဟော်ကျန့်ကျွင်းက ထိုစကားကို ကြားသောအခါ လက်ယှက်အရိုအသေပေးကာ ပြောသည်။ "ဆရာလင်း ပြောတာ မှန်ပါတယ်... တကယ်တော့ ကျွန်တော်လည်း အဲဒီလို တွေးဖူးတယ်... ဒါပေမဲ့ ဟုန်ထျန်ရီက ကျင်းကျိုးစစ်တပ် အတွင်းမှာသာ ပုန်ကန်မှု ဖြစ်လာရင်... အဲဒီအချိန်ကျ လူတွေ အများကြီး သေကုန်မှာကို နည်းနည်း စိုးရိမ်နေတာပါ"

"အခု လူဦးရေက နည်းပါးနေပြီလေ... ကပ်ဘေးကြီးထဲကနေ အသက်ရှင်ကျန်ရစ်ဖို့ဆိုတာ မလွယ်ကူကြဘူး... ကျွန်တော်တို့က လူသားတွေရဲ့ မျိုးဆက်တွေကို တတ်နိုင်သမျှ ထိန်းသိမ်းထားသင့်တယ် တဲ့"

လင်းယွမ်က ထိုစကားကို ကြားလိုက်ရချိန်တွင် အံ့အားသင့်စွာဖြင့် ပြောလေ၏။ "ဟော... ဒီ ဟုန်ထျန်ရီက အဲဒီလို စိတ်ထားမျိုး ရှိနေတာလား"

ဟော်ကျန့်ကျွင်းက ခါးသီးစွာ ပြုံးပြပြီး ပြန်ဖြေသည်။ "တကယ်တော့ ဟုန်ထျန်ရီရဲ့ စိတ်သဘောထားက မဆိုးပါဘူး"

"ဒါပေမဲ့ နည်းနည်းတော့ စိတ်ကူးယဉ်ဆန်လွန်းတယ်"

လင်းယွမ်က ထိုစကားကို ကြားသောအခါ မေးစေ့ကို ပွတ်သပ်ကာ ပြောသည်။ "စိတ်ကူးယဉ်သမားပေါ့လေ... ဒီအဆင့်အထိ ရောက်လာနိုင်တာ တကယ်တော့ မလွယ်ကူပါဘူး... ဒါပေမဲ့ အပေါ်ယံလောက်ပဲ ခင်ဗျားနဲ့ စိတ်ကူးယဉ်စကားတွေ ပြောနေတာမျိုး ဖြစ်နေမှာကိုတော့ စိုးရိမ်ရတယ်"

"တကယ်လို့ သူသာ အစွမ်းကုန် အသုံးပြုပြီး တိုက်ခိုက်မယ်ဆိုရင်... ကျန်း နဲ့ လု နှစ်ယောက်ကို တစ်ချက်တည်းနဲ့ သေချာပေါက် သတ်ပစ်နိုင်လား"

ဟော်ကျန့်ကျွင်းက ထိုစကားကို ကြားသောအခါ ရုတ်တရက် အနည်းငယ် တွန့်ဆုတ်သွားပြီး ခေါင်းခါပြသည်။ "သိပ်တော့ မဖြစ်နိုင်ဘူး... ဘာလို့လဲဆိုတော့ ကျန်း နဲ့ လု နှစ်ယောက်လုံးမှာ ကိုယ်ပိုင် ရေပေါ်ကျွန်းတွေ အသီးသီး ရှိကြတယ်... သူတို့ရဲ့ ရေပေါ်ကျွန်းတွေပေါ်မှာ စွမ်းအင်ချိတ်ပိတ် အစီအရင် တွေကို ချထားတယ်လေ"

"စွမ်းအင်ချိတ်ပိတ် အစီအရင် ကို စတင်လိုက်တာနဲ့... ဟုန်ထျန်ရီရဲ့ သန္ဓေပြောင်းအစွမ်း က ဘယ်လောက်ပဲ စွမ်းစွမ်း... အသုံးပြုဖို့ နေရာမရှိတော့ဘူး... ခန္ဓာကိုယ်ကြံ့ခိုင်မှု သက်သက်နဲ့ပဲ ယှဉ်တိုက်ရမှာ"

လင်းယွမ်က ခေါင်းညိတ်ပြသည်။ ဤသည်က အမှန်တရားပင် ဖြစ်ပေသည်။ စွမ်းအင်ချိတ်ပိတ် အစီအရင် ၏ တည်ရှိမှုက အချို့သော အစွမ်းပိုင်ရှင် များ၏ စွမ်းရည်ကို အမှန်တကယ် ကန့်သတ်ထားလေသည်။

သူကိုယ်တိုင်ပင်လျှင်... စွမ်းအင်ချိတ်ပိတ် အစီအရင် အတွင်းတွင် ရောက်ရှိနေပြီး မျိုးရိုးဗီဇ ပြန်လည်ဖွဲ့စည်းခြင်း အဆင့်ရှိ အစွမ်းပိုင်ရှင် ရာပေါင်းများစွာ၏ တိုက်ခိုက်မှုကို ရင်ဆိုင်ရမည် ဆိုပါက... ထွက်ပြေးရမည့် အဆုံးသတ်မျိုးသာ ရှိပေလိမ့်မည်။

သန္ဓေပြောင်းအစွမ်း မရှိတော့လျှင်... သူက အခြားသော အစွမ်းပိုင်ရှင် များထက် ခန္ဓာကိုယ် ပိုမို ကြီးမားရုံမျှသာ ဖြစ်သွားပေမည်။

သေချာသည်မှာ ကြယ်နတ်ဘုရား အဆင့်သို့ ထိုးဖောက်ကျော်လွန်သွားပြီး မိမိ၏ ကိုယ်ပိုင် နှလုံးအမြူတေ နှင့် ဦးနှောက်အမြူတေ ကို ပိုင်ဆိုင်ကာ ဤရေပေါ်ကျွန်းများကဲ့သို့ ဧရာမ ကြီးမားသော ခန္ဓာကိုယ်ကြီးမျိုး ရှိမနေလျှင်ပေါ့။

အဲဒီအချိန်ရောက်မှ မျိုးရိုးဗီဇ ပြန်လည်ဖွဲ့စည်းခြင်း အဆင့်ရှိ အစွမ်းပိုင်ရှင် တွေကို သတ်ရတာက... ပုရွက်ဆိတ်တွေကို နင်းချေသတ်ပစ်ရတာနဲ့ ဘာမှ ကွာခြားတော့မှာ မဟုတ်ဘူး။

"ဒါနဲ့... ဟုန်ထျန်ရီရဲ့ သန္ဓေပြောင်းအစွမ်းက တကယ်တမ်း ဘာလဲ... ခင်ဗျား သိလား"

လင်းယွမ်က ရုတ်တရက် တစ်ခုခုကို တွေးမိသွားပြီး ဟော်ကျန့်ကျွင်းကို ကြည့်ကာ မေးမြန်းသည်။

ဆက်ရန်...