အခန်း ၉၄၇

အပိုင်း(၉၄၇) လျှို့ဝှက်ဆန်းကြယ်အစွမ်း

လင်းယွမ်၏ အမေးကို ဟော်ကျန့်ကျွင်းက ခဏမျှ စဉ်းစားလိုက်ပြီးနောက် ပြန်ဖြေလေ၏။ "သူက အပြင်လူတွေကို တစ်ခါမှ ထုတ်မပြောဖူးပေမဲ့... ကျွန်တော် အချိန်အတော်ကြာ စောင့်ကြည့်လေ့လာမိသလောက်ဆိုရင်... သူ့အစွမ်းက လျှို့ဝှက်ဆန်းကြယ် အမျိုးအစားထဲမှာ ပါဝင်နိုင်တယ်လို့ သံသယရှိတယ်"

လင်းယွမ်က အနည်းငယ် ကြောင်သွားပြီး အံ့သြတကြီး မေးလိုက်သည်။ "လျှို့ဝှက်ဆန်းကြယ် အမျိုးအစား ဟုတ်လား"

ထိုကဲ့သို့သော သန္ဓေပြောင်းအစွမ်း အမျိုးအစားမျိုး ရှိကြောင်း သူ ပထမဆုံးအကြိမ် ကြားဖူးခြင်းပင် ဖြစ်၏။

ဟော်ကျန့်ကျွင်းက အနေခက်စွာ ပြုံးလိုက်ပြီး ဆက်ပြောသည်။ "ကျွန်တော်တို့က သဘောသဘာဝကို အလွယ်တကူ နားလည်လို့မရတဲ့ အစွမ်းတွေကို လျှို့ဝှက်ဆန်းကြယ် အမျိုးအစားဆိုပြီး တစ်စုတည်း သတ်မှတ်ထားကြတာပါ"

"ဥပမာပြောရရင်... စကားတစ်ခွန်းတည်းနဲ့ သေတာရှင်တာကို ဆုံးဖြတ်နိုင်တဲ့ စေတစ်လုံး အစွမ်းမျိုး ပိုင်ဆိုင်ထားတဲ့သူကို ကျွန်တော် ကိုယ်တိုင် မြင်ဖူးတယ်"

"အဲဒီလို အစွမ်းမျိုးကို ကျွန်တော်တို့က လျှို့ဝှက်ဆန်းကြယ် အမျိုးအစားလို့ ခေါ်တာပါ"

"ဟုန်ထျန်ရီရဲ့ အစွမ်းကလည်း... ပစ်မှတ်ကို ဘယ်တော့မှ မလွဲစေတဲ့ လျှို့ဝှက်ဆန်းကြယ် အမျိုးအစား သန္ဓေပြောင်းအစွမ်း တစ်မျိုးပဲ"

"သူသာ တိုက်ခိုက်လိုက်ရင်... ရန်သူဆီမှာ ဘယ်လောက်ပဲ မြန်တဲ့ အလျင် ရှိနေပါစေ... ဘယ်လိုပဲ ခံစစ်အကာအကွယ်တွေ ရှိနေပါစေ... သေချာပေါက် ဒဏ်ရာရသွားတာချည်းပဲ"

"ဘယ်လိုမှ ထွက်ပြေးလို့မရသလို... ဘယ်လိုမှလည်း ပုန်းရှောင်လို့ မရဘူး"

"သူ့ရဲ့ အဲဒီလို ထူးဆန်းလှတဲ့ အစွမ်းကြောင့်ပဲ စစ်တပ်နယ်မြေမှာ နံပါတ်တစ် အစွမ်းထက်ဆုံးသူဆိုတဲ့ နေရာကို အခိုင်အမာ ရယူထားနိုင်တာပေါ့"

"ဒီအချိန်ထိ အဲဒါက ဘယ်လိုအစွမ်းမျိုးလဲဆိုတာ ကျွန်တော် စဉ်းစားလို့ မရသေးဘူး... ဒါကြောင့် လျှို့ဝှက်ဆန်းကြယ် အမျိုးအစားထဲကိုပဲ ထည့်သွင်းသတ်မှတ်ထားလိုက်ရတာ"

လင်းယွမ်က သဘောပေါက်သွားလေသည်။ ဟော်ကျန့်ကျွင်း ပြောဆိုနေသော လျှို့ဝှက်ဆန်းကြယ် အမျိုးအစားဆိုသည်မှာ အကြောင်းအကျိုး အမျိုးအစား သန္ဓေပြောင်းအစွမ်း ဖြစ်နိုင်ချေ အလွန်များပြားလှ၏။

၎င်းက သူ တွက်ဆထားသည်နှင့် သိပ်မကွာခြားလှပေ။ ဟုန်ထျန်ရီသည် အကြောင်းအကျိုး အမျိုးအစား အစွမ်းပိုင်ရှင်တစ်ဦး ဖြစ်နေသည်မှာ အမှန်ပင်။

အကြောင်းအကျိုး အမျိုးအစား အစွမ်းပိုင်ရှင်တစ်ယောက်က မျိုးရိုးဗီဇ ပြန်လည်ဖွဲ့စည်းခြင်းကို ၈၉% အထိ ရောက်အောင် ကျင့်ကြံထားနိုင်သည်ဆိုခြင်းမှာ လုံးဝ ရိုးရှင်းသော ကိစ္စတော့ မဟုတ်ပေ။

အဘယ်ကြောင့်ဆိုသော် အကြောင်းအကျိုး အမျိုးအစား အစွမ်းများသည် ကျင့်ကြံရန် အလွန် ခက်ခဲသောကြောင့် ဖြစ်ပြီး ထိုအချက်ကို လင်းယွမ်ကိုယ်တိုင် နက်နက်ရှိုင်းရှိုင်း ခံစားနားလည်ထား၏။

သူ့လက်အောက်တွင်လည်း အကြောင်းအကျိုး အမျိုးအစား အစွမ်းပိုင်ရှင် မရှိသည်တော့ မဟုတ်ပေ။ ဥပမာအားဖြင့် ယခင်က ပေါင်ဆန်းတောင်၏ သစ္စာဖောက်ဟောင်း ဖြစ်ခဲ့သော ကုကျန့်ယဲ့ ပင် ဖြစ်သည်။

ကုကျန့်ယဲ့၏ အစွမ်းကို စေတစ်လုံးအစွမ်း ဟု ခေါ်ဆိုပြီး ဤအစွမ်းသည် စစ်မှန်သော အကြောင်းအကျိုး အမျိုးအစား အစွမ်းပင် ဖြစ်သည်။

သို့သော် ကုကျန့်ယဲ့သည် မျိုးရိုးဗီဇမျိုးစေ့အဆင့်၌ အရည်အသွေးမှတ် (၁၀၀) အထိ ကျင့်ကြံပြီးနောက် မျိုးရိုးဗီဇ ပြန်လည်ဖွဲ့စည်းခြင်း အဆင့်သို့ ကူးပြောင်းရန် ကြိုးပမ်းရာတွင် အချိန်အတော်ကြာသည့်တိုင်အောင် အနည်းငယ်မျှပင် တိုးတက်မှု မရှိခဲ့ချေ။

လင်းယွမ်၏ လက်အောက်ငယ်သား ဖြစ်လာပြီးနောက် ထိုက်ယန်တောင်၏ မျိုးရိုးဗီဇ ပြန်လည်ဖွဲ့စည်းခြင်း လေ့ကျင့်ရေးအခန်းကို အသုံးပြုခဲ့လျှင်တောင်မှ ပြီးခဲ့သောလကမှ မျိုးရိုးဗီဇ ပြန်လည်ဖွဲ့စည်းခြင်း အဆင့်သို့ သီသီလေး ရောက်နိုင်ခဲ့ခြင်း ဖြစ်သည်။ ယခုအချိန်ထိ တိုးတက်မှုနှုန်းမှာ ၁၀% ဝန်းကျင်၌သာ တဝဲလည်လည် ဖြစ်နေဆဲပင်။

ထို့ကြောင့် လင်းယွမ်သည် အကြောင်းအကျိုး အမျိုးအစား အစွမ်းပိုင်ရှင်များ၏ ကျင့်ကြံရန် ခက်ခဲမှုကို အလွန် ရှင်းလင်းစွာ သိရှိထားခြင်း ဖြစ်၏။

သို့သော် အကြောင်းအကျိုး အမျိုးအစား အစွမ်းပိုင်ရှင်များ ကျင့်ကြံရန် ခက်ခဲရခြင်း၏ အကြောင်းရင်းမှာ ၎င်းတို့၏ အစွမ်းများက အလွန် ထူးဆန်းပြီး ကြိုတင် ခန့်မှန်း၍မရနိုင်လောက်အောင် လျှို့ဝှက်ဆန်းကြယ်ကာ ကာကွယ်ရန် ခက်ခဲလွန်းသောကြောင့် ဖြစ်သည်။

ထို့ကြောင့် ၎င်း၏ စွမ်းအားမှာလည်း အလွန် အံ့မခန်း ဖြစ်ပြီး ယှဉ်ပြိုင်နိုင်မည့် ပြိုင်ဘက်မျိုး လုံးဝနီးပါး မရှိနိုင်ချေ။

လင်းယွမ် ပို၍ သိချင်နေသည်မှာ နတ်ဘုရားနိုင်ငံတော်၏ နတ်ဘုရားဟု ဆိုသော ရှန်တိဆိုသည့် လူသည် ဟုန်ထျန်ရီနှင့် တိုက်ခိုက်ရာတွင် မည်သို့မည်ပုံ အသက်ရှင် ကျန်ရစ်ခဲ့သနည်း ဆိုသည့် အချက်ပင် ဖြစ်သည်။

ထို့ပြင် ဟော်ကျန့်ကျွင်း ပြောစကားအရဆိုလျှင် ရှန်တိက ဟုန်ထျန်ရီကိုပင် ဒဏ်ရာရအောင် ပြန်လည် တိုက်ခိုက်နိုင်ခဲ့သေးသည်။

ဤသည်မှာ အလွန် ယုံကြည်နိုင်စရာ မရှိသော ကိစ္စပင်။

"ခင်ဗျားပြောပုံအရဆိုရင် ဟုန်ထျန်ရီက တော်တော်လေး စွမ်းမှာပဲ... ဒါဆို နတ်ဘုရားနိုင်ငံတော်က ရှန်တိဆိုတာကရော ဘယ်လို နောက်ခံမျိုးလဲ... သူ့မှာ ဘယ်လို အစွမ်းမျိုးရှိလို့ ဟုန်ထျန်ရီနဲ့ အပြန်အလှန် ဒဏ်ရာရတဲ့အထိ တိုက်နိုင်ရတာလဲ"

ဟော်ကျန့်ကျွင်း၏ မျက်နှာတွင် လေးနက်သော အမူအရာ ပေါ်လာပြီး ပြန်ဖြေသည်။ "ဆရာလင်းကို ကျွန်တော် သတိပေးမလို့ပဲ... နတ်ဘုရားနိုင်ငံတော်ရဲ့ နတ်ဘုရားဆိုတာက သာမန်မဟုတ်ဘူး... ဒီရှန်တိဆိုတဲ့ လူရဲ့ အစွမ်းကလည်း တော်တော်လေး ထူးဆန်းတယ်... သူက ကျွန်တော် ခုနကပြောခဲ့တဲ့ စေတစ်လုံးအစွမ်း အမျိုးအစားကို ပိုင်ဆိုင်ထားတဲ့ ပုံပဲ"

"သူနဲ့ ဟုန်ထျန်ရီ တိုက်ခိုက်တာကို ကျွန်တော် ကိုယ်တိုင် မြင်ခဲ့ရတာပါ... သူသုံးနိုင်တဲ့ အစွမ်းတွေက အများကြီးပဲ... သတ္တု... သစ်... ရေ... မီး... မြေ ဓာတ်စွမ်းအင် အမျိုးအစား အကုန်လုံးနီးပါးကို သူက စိတ်ကူးလိုက်တာနဲ့ ချက်ချင်း အသုံးပြုနိုင်တယ်"

"သူ အသွင်ပြောင်းလိုက်တဲ့အခါမှာဆိုရင်... သူ့ရဲ့ မျိုးရိုးဗီဇ ပုံစံက တောင်ပံခြောက်ဖက် ကောင်းကင်တမန်တော်ကြီး ဖြစ်သွားသေးတာ"

"ဟုန်ထျန်ရီသာ မရှိဘူးဆိုရင်... ကျွန်တော်တို့ ကျင်းကျိုးစစ်တပ်ဘက်မှာ သူ့ကို ရင်ဆိုင်နိုင်မယ့်သူ တကယ် ရှိမှာမဟုတ်ဘူး"

လင်းယွမ်သည် ထိုစကားကို ကြားလိုက်ရသောအခါ အံ့အားသင့်သည့် အရိပ်အယောင်များ ပေါ်လာလေသည်။

"ဒီလောက်တောင် အစွမ်းထက်တာလား"

"သူ့ရဲ့ မျိုးရိုးဗီဇ ပြန်လည်ဖွဲ့စည်းခြင်း တိုးတက်မှုနှုန်းက ဘယ်လောက်ရှိပြီလဲ"

"ဟုန်ထျန်ရီနဲ့ သိပ်မကွာလောက်ပါဘူး"

"အဓိကကတော့ သူ့ရဲ့အစွမ်းက အရမ်း ထူးဆန်းနေတာပဲ... လျှို့ဝှက်ဆန်းကြယ် အမျိုးအစား ဖြစ်ဖို့ များတယ်"

လင်းယွမ်က မေးစေ့ကို ပွတ်သပ်လိုက်ရင်း "အကြောင်းအကျိုး အမျိုးအစား အစွမ်းပိုင်ရှင် နှစ်ယောက် တိုက်ကြတာလား... ဒီလောက်တောင် အစွမ်းထက်နေတာ မဆန်းတော့ပါဘူး"

သူ စိတ်ထဲတွင် မှတ်သားထားလိုက်သည်။ အကြောင်းအကျိုး အမျိုးအစား အစွမ်းပိုင်ရှင်များကို ယှဉ်နိုင်မည့်သူမှာ ဂျိမ်းစ်သာ ရှိပေလိမ့်မည်။

သေချာသည်ကတော့ သူကိုယ်တိုင်တွင်လည်း အကြောင်းအကျိုး အမျိုးအစား အစွမ်းရှိနေသောကြောင့် ထိုသို့သော အစွမ်းပိုင်ရှင်များကို အနည်းငယ်မျှပင် ကြောက်ရွံ့နေမည် မဟုတ်ပေ။

ထိုအစွမ်းပိုင်ရှင်များနှင့် ယှဉ်လျှင် သူ့ထံတွင် အခြားသော အစွမ်းအမျိုးမျိုးလည်း ရှိနေသေးရာ အကယ်၍ တကယ်တမ်း တိုက်ခိုက်ရမည်ဆိုပါက သူသည်သာ သေချာပေါက် အနိုင်ရရှိပေလိမ့်မည်။

သို့သော် တပ်ဖွဲ့နှစ်ခု ထိပ်တိုက်ရင်ဆိုင်ရချိန်တွင် တစ်ဦးချင်းစီ၏ ကိုယ်ပိုင်ခွန်အားကိုသာ အားကိုးနေ၍ မရချေ။

အထူးသဖြင့် နှစ်ဖက်စလုံးတွင် အစွမ်းများကို ချိတ်ပိတ်နိုင်သည့် အစီအရင်များ ရှိနေချိန်၌ သူ့တွင် မိုးထိအောင် မြင့်မားသည့် စွမ်းရည်များ ရှိနေစေကာမူ ထုတ်သုံးနိုင်မည် မဟုတ်ပေ။

ထို့ကြောင့် လင်းယွမ်သည် မိမိကိုယ်မိမိ ပြိုင်ဘက်ကင်းပြီဟု ထင်မှတ်ကာ စိတ်လိုက်မာန်ပါ မလုပ်ဆောင်ခဲ့ခြင်း ဖြစ်၏။

"ဒါနဲ့ ခင်ဗျားနဲ့ ဟုန်ထျန်ရီရဲ့ ဆက်ဆံရေးကရော ဘယ်လိုရှိလဲ... စစ်တပ်နယ်မြေက တခြား ဗိုလ်ချုပ်တွေနဲ့ရော ဆက်ဆံရေး ဘယ်လိုလဲ"

ဟော်ကျန့်ကျွင်းက ကြားသည်နှင့် သေချာစဉ်းစားချင့်ချိန်ပြီးနောက် ပြန်ဖြေသည်။ "ဟုန်ထျန်ရီကတော့ ကျွန်တော့်ကို သူ့ဘက်ပါအောင် အမြဲတမ်း သိမ်းသွင်းချင်နေတာ... ဘာလို့လဲဆိုတော့ ကျွန်တော်က ကျင်းကျိုးမြို့သား မဟုတ်ဘဲ နယ်ကလာတဲ့သူ ဖြစ်နေလို့ပဲ... ကျွန်တော့် လက်အောက်က စစ်သားတွေ အများစုကလည်း နယ်ခံတွေ မဟုတ်ကြဘူးလေ"

"ဒါကြောင့် ကျွန်တော်တို့က တခြား အုပ်စုကလူတွေရဲ့ အသိအမှတ်ပြုတာကို မခံရဘူး... အထူးသဖြင့် ကျန်းနဲ့ လု ဆိုတဲ့ အဓိက အုပ်စုကြီး နှစ်ခုကလူတွေဆိုရင် ကျွန်တော်တို့ကို အမြဲတမ်း ဖယ်ကြဉ်ထားကြတာ"

"ဒါပေမဲ့ ဟုန်ထျန်ရီက ဧရာမ အင်အားစုကြီး တစ်ခုကို ဖွဲ့စည်းချင်နေတော့ ကျွန်တော်နဲ့ ရင်းရင်းနှီးနှီး ဆက်ဆံတယ်... ဒါကြောင့် ဆက်ဆံရေးပိုင်းမှာတော့ ကျွန်တော်နဲ့ သူက မဆိုးဘူးလို့ ပြောလို့ရတယ်"

"တခြား အုပ်စုတွေနဲ့ကတော့ ဆက်ဆံရေး တော်တော်လေး ဆိုးတယ်"

လင်းယွမ်က မျက်ခုံးအနည်းငယ် ပင့်လိုက်ပြီး... "ဟုန်ထျန်ရီနဲ့ ဆက်ဆံရေး ကောင်းတယ်ဆိုပါတော့... ခင်ဗျား သူ့ကို ဒီကျွန်းပေါ် ရောက်လာအောင် ဖြားယောင်းခေါ်ဆောင်လာနိုင်မလား"

"ရပါတယ်... ဒါပေမဲ့ သူက အစောင့်အရှောက်တွေကိုတော့ ခေါ်လာမှာ သေချာတယ်" ဟု ဟော်ကျန့်ကျွင်းက စဉ်းစားပြီး ပြန်ဖြေသည်။

"ဒါဆို စစ်တပ်ဘက်က တခြားအုပ်စုခေါင်းဆောင်တွေကိုရော... ခင်ဗျား သီးသန့် တွေ့ဆုံဖို့ ချိန်းလို့ရမယ့် နည်းလမ်းများ ရှိလား"

"ဒါမှမဟုတ် သူတို့ကို ခင်ဗျားဆီ တိုက်ရိုက် လာခိုင်းလို့များ ရမလား"

ဟော်ကျန့်ကျွင်းက ခေါင်းခါယမ်းလိုက်သည်။ "လုံးဝ မဖြစ်နိုင်သလောက်ပဲ... ဒီလူတွေက ဟုန်ထျန်ရီရဲ့ လေပေါ်ကျွန်းကို သွားတာကလွဲရင်... တခြားသူတွေရဲ့ လေပေါ်ကျွန်းဆီကို ဘယ်တော့မှ အလွယ်တကူ သွားမှာမဟုတ်ဘူး"

"ဟုန်ထျန်ရီရဲ့ လေပေါ်ကျွန်းကို သွားရင်တောင်မှ သူတို့ရဲ့ ကိုယ်ပိုင် တပ်ဖွဲ့ကြီးတွေကို သေချာပေါက် အပါခေါ်သွားမှာပဲ"

"အဲဒီလောက်တောင် သေရမှာ ကြောက်ကြတာလား" ဟု လင်းယွမ်က စကားစပိတ်သွားသလို မေးလိုက်သည်။

ဟော်ကျန့်ကျွင်းက ခါးသီးစွာ ပြုံးလိုက်ပြီး ပြန်ဖြေသည်။ "အခု လေပေါ်ကျွန်း အကြီးကြီးတွေတိုင်းမှာ စွမ်းအင် ချိတ်ပိတ်တဲ့ အစီအရင်တွေကို တပ်ဆင်ထားကြတာလေ... ဘယ်သူမဆို လုပ်ကြံခံရမှာကို ကြောက်ကြတာပေါ့"

လင်းယွမ်မှာ ပြောစရာစကား ဆွံ့အသွားလေသည်။ ကြည့်ရသည်မှာ လျှို့ဝှက်စွာ လှုပ်ရှားရန် အနည်းငယ် ခက်ခဲနိုင်မည့်ပုံပင်။

"နည်းလမ်းကောင်း တစ်ခုကို သေချာ စဉ်းစားရတော့မယ်"

လင်းယွမ်သည် နက်နက်ရှိုင်းရှိုင်း တွေးတောနေတော့၏။

ဟော်ကျန့်ကျွင်းက အခြေအနေကို ကြည့်ပြီးနောက် စဉ်းစားကာ ပြောလိုက်သည်။ "ဆရာလင်း... ကျွန်တော့်ဆီမှာ အစီအစဉ်တစ်ခု ရှိတယ်... နားထောင်ကြည့်မလား"

လင်းယွမ်က ဟော်ကျန့်ကျွင်းကို ချက်ချင်း ကြည့်လိုက်ပြီး မေးလိုက်သည်။ "ပြောကြည့်စမ်းပါဦး"

"ကျွန်တော်နဲ့ ဟုန်ထျန်ရီက ဆက်ဆံရေး မဆိုးတော့လေ... အကြောင်းပြချက် တစ်ခုခုရှာပြီး သူ့ကို ဒီကျွန်းဘက် ရောက်လာအောင် လှည့်စားလို့ ရလောက်တယ်"

"ဒါပေမဲ့ သူ့စွမ်းရည်က အထင်သေးလို့မရဘူး... ကျွန်တော်က စွမ်းအင်ချိတ်ပိတ် အစီအရင်ကို ချက်ချင်းဖွင့်လိုက်ရင်တောင်မှ သူ့ကို ပထမဆုံး အချိန်လေးအတွင်းမှာ အမိဖမ်းနိုင်ဖို့ နည်းလမ်းမရှိခဲ့ရင်... သူသာ အစီအရင် နယ်ပယ်ထဲကနေ လွတ်သွားတာနဲ့ ပြန်ဖမ်းဖို့ အရမ်းခက်သွားလိမ့်မယ်"

"တကယ်လို့ ဆရာလင်း ကိုယ်တိုင်ဝင်ပြီး သူ့ကို ဖမ်းမယ်ဆိုရင်... အချိန် ဘယ်လောက်လောက် ယူရမလဲ မသိဘူး"

လင်းယွမ်သည် ထိုစကားကို ကြားလိုက်ရသောအခါ ချက်ချင်း ရယ်မောလိုက်ပြီး တုံ့ပြန်လိုက်၏။ "သူသာ ဒီကျွန်းပေါ်ကို တကယ် လာရဲတယ်ဆိုရင်... တစ်ယောက်ချင်း ယှဉ်တိုက်မယ်ဆိုရင်တောင် တစ်မိနစ် အတွင်းမှာ ကျွန်တော် အပြတ်ရှင်းနိုင်တယ်"

ဟော်ကျန့်ကျွင်း၏ ရင်ထဲတွင် အကြီးအကျယ် တုန်လှုပ်သွားသည်။ ဟုန်ထျန်ရီ၏ စွမ်းရည်ကို သူ အသိဆုံးပင် ဖြစ်၏။

သို့သော် ဆရာလင်းက ဟုန်ထျန်ရီကို တစ်မိနစ်အတွင်း အပြတ်ရှင်းနိုင်သည်တဲ့လား။

လင်းယွမ်ကို သူ၏ သခင်အဖြစ် အသိအမှတ်ပြုထားပြီး ဖြစ်လင့်ကစား ယခုအချိန်တွင် သူသည် ထိတ်လန့် အံ့သြမှုကို မထိန်းချုပ်နိုင်အောင် ဖြစ်နေမိသည်။

သူက ဆက်လက် စဉ်းစားလိုက်ပြီး ပြောလိုက်သည်။ "ဟုန်ထျန်ရီ လာရင်... သူ့အစောင့်တွေကို သေချာပေါက် ခေါ်လာမှာပဲ... ဒါပေမဲ့ လူအရေအတွက်ကတော့ သိပ်များမှာ မဟုတ်ဘူး... အဲဒီအချိန်ကျရင် ကျွန်တော်တို့ အတူတူ ဝင်တိုက်ကြမယ်... ကျွန်တော့်လူတွေက သူ့အစောင့်တွေကို တားထားဖို့ တာဝန်ယူမယ်"

"ဟုန်ထျန်ရီကိုတော့ အဲဒီအချိန်ကျရင် ဆရာလင်း ကိုယ်တိုင် ဝင်တားပေးရမယ်... ဘယ်လို သဘောရလဲ"

လင်းယွမ်က ခေါင်းအနည်းငယ် ညိတ်လိုက်ပြီး "ဒီနည်းလမ်း မဆိုးဘူး... ဟုန်ထျန်ရီကိုသာ ဖမ်းမိသွားရင် အဲဒီအချိန်ကျမှ စစ်တပ်က တခြား အုပ်စုတွေအတွက်ကတော့ ပူပန်စရာ မလိုတော့ဘူး"

"ဒါဆို ကျွန်တော် အခုပဲ လူအင်အား စီစဉ်ပြီး စွမ်းအင်ချိတ်ပိတ် အစီအရင်ကို တပ်ဆင်ခိုင်းလိုက်ပါ့မယ်" ဟု ဟော်ကျန့်ကျွင်းက ချက်ချင်း ဆိုသည်။

လင်းယွမ်က ပြုံးလိုက်ပြီး "စောစောလုပ်တာ ပိုကောင်းတယ်... ခင်ဗျား ဒီတစ်ခေါက် ထွက်လာတာက ခိုက်ရီနည်းပညာ ကုမ္ပဏီကို ရှင်းဖို့လေ... ဒီနေရာမှာ အချိန်အကြာကြီး နှောင့်နှေးနေလို့ မဖြစ်ဘူး... မဟုတ်ရင် ဟုန်ထျန်ရီတို့က ခိုက်ရီနည်းပညာရဲ့ အင်အားကို သံသယ ဝင်သွားလိမ့်မယ်"

"ဒီလိုလုပ်... နေ့လယ်ကျရင် ခင်ဗျားက ဟင်းလင်းပြင် နေရာရွှေ့ပြောင်းခြင်း အစီအရင်ကို အသက်သွင်းလိုက်... ကျွန်တော်တို့ အတူတူ ကျင်းကျိုးကို သွားကြမယ်"

လင်းယွမ်သည် ဂျိမ်းစ်နှင့် အခြားသူများကို တိုက်ရိုက် ခေါ်ဆောင်သွားပြီး အတူတကွ လက်တွဲကာ ဟုန်ထျန်ရီကို အရင်ဆုံး ဖမ်းဆီးရန် ရည်ရွယ်ထားလေတော့သည်။

ဆက်ရန်...