အခန်း ၉၄၈

အပိုင်း(၉၄၈) ဟင်းလင်းပြင် နေရာရွှေ့ပြောင်းခြင်း

အကြမ်းဖျင်း ရည်မှန်းချက်နှင့် အစီအစဉ်များ ရှိလာသောအခါ လုပ်ငန်းစဉ်များကို အကောင်အထည်ဖော်ရန် ပိုမို လွယ်ကူမြန်ဆန်သွားလေပြီ။

ကိစ္စရပ်က အတော်လေး လျှို့ဝှက်သောကြောင့် လင်းယွမ်နှင့် ဟော်ကျန့်ကျွင်းက မည်သူ့ကိုမျှ အသိမပေးခဲ့ပေ။ `

သူတို့က လက်အောက်ငယ်သားများကို သင်္ကေတအစီအရင်များ ပြင်ဆင်ရန်သာ အမိန့်ပေးခဲ့ပြီး တောင်ဘက်သို့ ထွက်ပြေးလာသော နတ်ဘုရားနိုင်ငံတော်မှ အစွမ်းပိုင်ရှင်များကို ရင်ဆိုင်ရန် ပြင်ဆင်နေခြင်းဖြစ်ကြောင်း အပြင်ဘက်သို့ သတင်းလွှင့်ထားလိုက်သည်။

ထိုသို့လုပ်ဆောင်ရခြင်းမှာ ကြယ်နီကျွန်းပေါ်တွင် ရှိနေနိုင်သော သူလျှိုကဲ့သို့ ရန်သူများကို လှည့်စားရန်အတွက်ပင် ဖြစ်သည်။

"ရက်အနည်းငယ်နဲ့ အဆင်သင့်ဖြစ်နိုင်မလား"

"တစ်ရက်အတွင်း အဆင်သင့်ဖြစ်ပါမယ်"

ဟော်ကျန့်ကျွင်းက တိကျသေချာသော အဖြေကို ပေးလိုက်သည်။

လင်းယွမ်က ခေါင်းအနည်းငယ် ညိတ်လိုက်ပြီး "ကောင်းပြီ... အချိန်ဆွဲမနေတော့ဘူး... ဂျိမ်းစ်ကို သွားရှာပြီး လူအင်အား စုလိုက်မယ်"

"ဟုတ်ကဲ့ပါ"

ထို့နောက် လင်းယွမ်က ဂျိမ်းစ်ကို ခေါ်ယူလိုက်ပြီး မုန်ယာကုမ္ပဏီဘက်မှ ဝမ်လင်းအာ ညီအစ်မကိုပါ တစ်ပါတည်း အကြောင်းကြားလိုက်သည်။ သူက မုန်ယာကုမ္ပဏီဘက်မှ အစွမ်းပိုင်ရှင် အမြောက်အမြားကိုပါ ခေါ်ယူခဲ့သည်။

အရာအားလုံး အဆင်သင့်ဖြစ်သွားသောအခါ ဒုတိယနေ့တွင် လူအားလုံး ကြယ်နီကျွန်းပေါ်သို့ စုရုံးရောက်ရှိလာကြသည်။

လင်းယွမ်လည်း ထိုနေရာသို့ ရောက်ရှိလာရာ ဟော်ကျန့်ကျွင်းက "သခင်... အားလုံး အဆင်သင့် ဖြစ်နေပါပြီ"

လင်းယွမ်က ခေါင်းအနည်းငယ် ညိတ်ပြလိုက်ပြီး တစ်စုံတစ်ခုကို တွေးမိသွားကာ "အခုကစပြီး ကျွန်တော့်ကို ဆရာလင်း လို့ပဲ ခေါ်ပါ... သခင်လို့ မခေါ်ကြနဲ့တော့"

"ဟုတ်ကဲ့ပါ"

ဤလူများအားလုံးက သူ့ကို သခင် ဟု ခေါ်နေကြလျှင် ပစ်မှတ်က အလွန် သိသာလွန်းနေမည် ဖြစ်သည်။

ရန်သူများက သူသည် ဤလူစု၏ ခေါင်းဆောင်ဖြစ်ကြောင်း ချက်ချင်းပင် သိရှိသွားနိုင်သည်။

အကယ်၍ ရန်သူများက ခေါင်းဆောင်ကို အရင်ဦးဆုံး လုပ်ကြံရန် ကြိုးစားလာပါက မကောင်းနိုင်ပေ။

"စလိုက်ကြရအောင်" လင်းယွမ်က အမိန့်ပေးလိုက်သည်။

ဟော်ကျန့်ကျွင်းက ခေါင်းအနည်းငယ် ညိတ်ပြလိုက်ပြီး ဆွန်းချီဟန်ဘက်သို့ လှည့်ကာ "အမိန့်ပေးလိုက်... ဟင်းလင်းပြင် နေရာရွှေ့ပြောင်းဖို့ ပြင်ဆင်ကြ... ပစ်မှတ်က ကျင်းကျိုးစစ်တပ်ပဲ"

"ဟုတ်ကဲ့ပါ ဗိုလ်ချုပ်"

"ဝုန်း"

တုန်ခါနေသော အသံတစ်သံ ထွက်ပေါ်လာပြီးနောက် ကျွန်းပေါ်တွင် ကြီးမားသော အကာအကွယ်အလွှာကြီးတစ်ခု လျင်မြန်စွာ ဖြစ်ပေါ်လာသည်။

ချက်ချင်းပင် ပတ်ဝန်းကျင်ရှိ ဟင်းလင်းပြင်မှာ တဖြည်းဖြည်း တွန့်လိမ်ကောက်ကွေးလာလေသည်။

မကြာမီမှာပင် ထိုဆူညံသံများနှင့်အတူ တစ်ကျွန်းလုံးမှာ ပြင်းထန်စွာ တုန်ခါသွားသည်။

ထို့နောက် ပတ်ဝန်းကျင်ရှိ ဟင်းလင်းပြင်မှာ အလင်းတန်းများအလား ပြောင်းလဲသွားလေတော့သည်။

လူအုပ်ကြီးက ကောင်းကင်သို့ မော့ကြည့်လိုက်ရာ အရောင်အသွေး စုံလင်လှသော အလင်းတန်း လျှောက်လမ်းကြီးတစ်ခုအတွင်း ရောက်ရှိနေသကဲ့သို့ ခံစားလိုက်ကြရသည်။

ပတ်ပတ်လည်တွင် ဟင်းလင်းပြင် လေစီးကြောင်းများက တဝီဝီ မြည်ဟည်းလျက် ဖြတ်သန်းတိုက်ခတ်နေကြသည်။

ထို ဟင်းလင်းပြင် လေစီးကြောင်းများကြားတွင် လျှပ်တစ်ပြက် ပေါ်လာပြီး ပြန်ပျောက်သွားတတ်သော ကြောက်မက်ဖွယ် သားရဲကြီးများကိုပင် မြင်တွေ့နိုင်သကဲ့သို့ ရှိသည်။

လင်းယွမ်က ထိုမြင်ကွင်းကို ကြည့်ရင်း လေးနက်သော မျက်နှာထားဖြင့်. "ခင်ဗျားတို့ ဟင်းလင်းပြင် နေရာရွှေ့ပြောင်းတဲ့ အကြိမ်တိုင်း ဒီ ဟင်းလင်းပြင် လေစီးကြောင်းတွေထဲက မြင်ကွင်းတွေကို မြင်ရတာလား"

ဟော်ကျန့်ကျွင်းက လေးနက်စွာ ခေါင်းညိတ်ပြပြီး "ဟုတ်ပါတယ်... ပြီးတော့ ပြဿနာတစ်ခုကို ကျွန်တော် သတိထားမိတယ်... ဒီ ဟင်းလင်းပြင် လေစီးကြောင်းတွေထဲမှာ အဲ့ဒီ သန္ဓေပြောင်း သားရဲတွေ ပေါ်လာတဲ့ အကြိမ်အရေအတွက်က ပိုပိုများလာတယ်"

"ဒါက သဘာဝဖြစ်စဉ်လား... ဒါမှမဟုတ် ကျွန်တော်တို့က ဟင်းလင်းပြင် လမ်းကြောင်းတွေကို မကြာခဏ ဖွင့်နေလို့ ဖြစ်ရတာလား ဆိုတာကိုတော့ ကျွန်တော် မသိဘူး"

"ဟုန်ထျန်ရီရဲ့ နောက်ကွယ်က ကျွမ်းကျင်သူအဖွဲ့တွေ ခွဲခြမ်းစိတ်ဖြာထားတာကို ကျွန်တော် ကြားဖူးတယ်... သူတို့အမြင်အရဆိုရင် ဒီ ဟင်းလင်းပြင် လေစီးကြောင်းတွေထဲက သားရဲတွေက မတည်ငြိမ်တဲ့ ဟင်းလင်းပြင် ဆုံမှတ်တွေကို လိုက်ဖမ်းရတာ နှစ်သက်ကြတယ်တဲ့"

"ကပ်ဘေးမတိုင်ခင်က အပန်းဖြေစခန်းတွေမှာ ရေမျက်နှာပြင်ပေါ် နည်းနည်းလေး လှုပ်ရှားသွားတာနဲ့ ရေအောက်က အလှမွေးငါးတွေ အလုအယက် စုရုံးရောက်လာကြသလိုမျိုးပေါ့"

"ဒီ ဟင်းလင်းပြင် လေစီးကြောင်းတွေထဲက သန္ဓေပြောင်း သားရဲတွေကလည်း အဲ့ဒီလို ရည်ရွယ်ချက်မျိုး ရှိနိုင်တယ်"

"ဒါကြောင့် သာမန်အခြေအနေမျိုးဆိုရင် ကျွန်တော်တို့က ဟင်းလင်းပြင် နေရာရွှေ့ပြောင်းခြင်းကို မသုံးဘဲ နေနိုင်သမျှ မသုံးဖို့ ကြိုးစားကြတာပဲ"

"ဒီလိုဆိုရင် ဟင်းလင်းပြင် အစွမ်းပိုင်ရှင်တွေက အရမ်း အန္တရာယ် မများလွန်းဘူးလား" လင်းယွမ်က သံသယဖြင့် မေးလိုက်သည်။

သူ ကိုယ်တိုင်လည်း ဟင်းလင်းပြင် နေရာရွှေ့ပြောင်းရန်အတွက် နေရာရွှေ့ပြောင်းခြင်း တံခါးများကို မကြာခဏ ဖွင့်လေ့ရှိသော်လည်း ဤကဲ့သို့ ဟင်းလင်းပြင် လေစီးကြောင်းများထဲမှ သန္ဓေပြောင်း သားရဲများကို တစ်ခါမှ မကြုံတွေ့ခဲ့ဖူးပေ။

ဟော်ကျန့်ကျွင်းက ခေါင်းခါယမ်းလိုက်ပြီး "အဲ့ဒါက မတူဘူးလေ... ဟင်းလင်းပြင် နေရာရွှေ့ပြောင်းတာနဲ့ ဟင်းလင်းပြင် အစွမ်းပိုင်ရှင်တွေ ဟင်းလင်းပြင် နေရာရွှေ့ပြောင်းခြင်းကို အသုံးပြုတာက ကွဲပြားတယ်"

"ဟင်းလင်းပြင် နေရာရွှေ့ပြောင်းတဲ့ နည်းပညာက ကျယ်ပြန့်တဲ့ ဟင်းလင်းပြင် ဆုံမှတ်တွေနဲ့ ပတ်သက်နေတယ်... နေရာရွှေ့ပြောင်းနိုင်ဖို့အတွက် လုံလောက်တဲ့ ကြီးမားကျယ်ပြန့်တဲ့ ဟင်းလင်းပြင် လမ်းကြောင်းကြီးကို ဖွင့်ဖို့ လိုအပ်တယ်"

"ဒါပေမဲ့ ဟင်းလင်းပြင် အစွမ်းပိုင်ရှင်တွေ တစ်ကြိမ် ဖွင့်လိုက်တဲ့ နေရာရွှေ့ပြောင်းခြင်း တံခါးကတော့ တကယ်တမ်းမှာ ဟင်းလင်းပြင် ဆုံမှတ် တစ်ခုတည်း ရှိရုံနဲ့ လုံလောက်နေပြီ"

"ဒီနှစ်ခုရဲ့ လှုပ်ရှားမှု ပမာဏက လုံးဝကို မတူညီဘူးလေ"

"ဒါက ရေထဲကို ကျောက်ခဲတစ်လုံး ပစ်ချလိုက်တာနဲ့ ရေပေါ်ကို ဖုန်မှုန့်လေး တစ်မှုန့် ကျသွားတာနဲ့ ဘယ်အရာက ဒီဟင်းလင်းပြင် လေစီးကြောင်းတွေထဲက သန္ဓေပြောင်း သားရဲတွေရဲ့ အာရုံကို ပိုပြီး ဆွဲဆောင်နိုင်မလဲ ဆိုသလိုမျိုးပဲ"

ဟော်ကျန့်ကျွင်း ဤသို့ ရှင်းပြလိုက်သောအခါ လင်းယွမ် နားလည်သွားတော့သည်။

ဟင်းလင်းပြင် အစွမ်းပိုင်ရှင်များ ဟင်းလင်းပြင် နေရာရွှေ့ပြောင်းသည့်အခါ ဖြစ်ပေါ်လာသော လှုပ်ရှားမှုမှာ အလွန် သေးငယ်လွန်းလှသဖြင့် ဤဟင်းလင်းပြင် လေစီးကြောင်းများထဲမှ မိစ္ဆာကောင်များ၏ အာရုံကို ဆွဲဆောင်နိုင်ရန် လုံလောက်မှု မရှိပေ။

သို့သော် ဟင်းလင်းပြင် နေရာရွှေ့ပြောင်းသည့် နည်းပညာမှာမူ ကျွန်းတစ်ကျွန်းလုံးကို ရွှေ့ပြောင်းရခြင်း ဖြစ်သောကြောင့် ဖြစ်ပေါ်လာသည့် လှုပ်ရှားမှုမှာ အလွန် ကြီးမားလှပြီး ထိုဟင်းလင်းပြင် လေစီးကြောင်းများထဲမှ ကြောက်မက်ဖွယ် သတ္တဝါများ၏ အာရုံကို ဆွဲဆောင်သွားခြင်း ဖြစ်သည်။

"ဒီလိုဆိုရင် လူသားတွေက ဟင်းလင်းပြင် နေရာရွှေ့ပြောင်းခြင်းကို အကောင်အထည်ဖော်ပြီး စကြဝဠာယဉ်ကျေးမှုခေတ်ကို ဝင်ရောက်ဖို့ဆိုတာ အရမ်း မခက်ခဲလွန်းဘူးလား" ဘေးတွင် ရှိနေသော ဂျိမ်းစ်က မနေနိုင်ဘဲ မျက်မှောင်ကြုတ်ကာ မေးလိုက်သည်။

ဟော်ကျန့်ကျွင်းက ခေါင်းအနည်းငယ် ခါယမ်းလိုက်ပြီး "ဒါလည်း မသေချာပါဘူး... နည်းပညာဆိုတာ အမြဲတမ်း တိုးတက်နေမှာပဲလေ"

"လက်ရှိ ဟင်းလင်းပြင် နေရာရွှေ့ပြောင်းတဲ့ နည်းပညာက လှုပ်ရှားမှု ကြီးမားပေမယ့်... အနာဂတ်မှာ နည်းပညာတွေ ရင့်ကျက်လာတဲ့အခါ ဟင်းလင်းပြင် နေရာရွှေ့ပြောင်းတာကို အသုံးပြုရင်တောင် လှုပ်ရှားမှု အရမ်း သေးငယ်သွားနိုင်တာပဲ"

လင်းယွမ်က သဘောတူစွာ ခေါင်းညိတ်လိုက်ပြီး "ပြောတာ မှန်တယ်... လူသားတွေရဲ့ နည်းပညာက အချိန်နဲ့အမျှ အဆက်မပြတ် တိုးတက်နေတာပဲ"

"လက်ရှိ အခြေအနေအရ ပြောရရင်... အရေးအကြီးဆုံးက လူသားတွေရဲ့ အင်အားစုတွေကို အမြန်ဆုံး စုစည်းနိုင်မှသာ အစွမ်းကုန် ဖွံ့ဖြိုးတိုးတက်ဖို့ အခွင့်အရေး ရနိုင်မှာ"

"နေ့တိုင်း စစ်တိုက်နေကြပြီး အချင်းချင်း အပြန်အလှန် တိုက်ခိုက်နေကြတာ ဘယ်တော့မှ အဆုံးသတ်မှာလဲ"

"ဖွံ့ဖြိုးတိုးတက်ရေးနဲ့ တီထွင်ဆန်းသစ်မှုတွေ လုပ်ဖို့ ဘယ်မှာ အချိန်ရတော့မှာလဲ"

လူအုပ်ကြီးလည်း ထိုစကားကို ကြားသောအခါ မနေနိုင်ဘဲ သဘောတူစွာ ခေါင်းညိတ်လိုက်ကြသည်။

စကားပြောနေစဉ်မှာပင် ပတ်ဝန်းကျင်ရှိ ဟင်းလင်းပြင်က ရုတ်တရက် လှည့်ပတ်လာပြီး လျှောက်လမ်းကြီးမှာ ရုတ်ခြည်း ကွဲအက်သွားလေသည်။

ထို့နောက် ဟင်းလင်းပြင် နေရာရွှေ့ပြောင်းခြင်း အစီအရင်ကြီးက ကြီးမားသော ကျွန်းကြီးကို သယ်ဆောင်ကာ လေစီးကြောင်းများထဲမှ ချက်ချင်း ထွက်ပေါ်လာတော့သည်။

ရေနက်ပိုင်းရှိ ငါးမန်းကြီးတစ်ကောင် ရေထဲမှ ရုတ်တရက် ခုန်ထွက်လာသကဲ့သို့ပင်။

"ဝုန်း"

ပတ်ပတ်လည်တွင် လေစီးကြောင်းများ ပြင်းထန်စွာ တိုက်ခတ်နေပြီး အစီအရင်ကြီး၏ ဟင်းလင်းပြင်က တွန့်လိမ်နေကာ ဤဟင်းလင်းပြင် လေစီးကြောင်းများကို ကာကွယ်ထားသည်။

မိုးသက်မုန်တိုင်းက တဝေါဝေါဖြင့် ပြန်လည်ကျဆင်းလာပြီး လူအုပ်ကြီးမှာ စိမ်းသက်သော နေရာတစ်ခုသို့ ရောက်ရှိနေကြလေပြီ။

လင်းယွမ်က ဟော်ကျန့်ကျွင်းကို ကြည့်ကာ မေးလိုက်သည်။ "ဒါ ဘယ်နေရာလဲ"

ဟော်ကျန့်ကျွင်းကမူ ဆွန်းချီဟန်ဘက်သို့ လှမ်းကြည့်လိုက်သည်။

ဆွန်းချီဟန်က ကျွန်းပေါ်ရှိ နည်းပညာဌာနနှင့် လျင်မြန်စွာ ဆက်သွယ်လိုက်ပြီးနောက် လူအုပ်ကြီးကို ပြောလိုက်သည်။ "တည်နေရာကို အတည်ပြုပြီးပါပြီ... ကျွန်တော်တို့ အခု ကျင်းကျိုးစစ်တပ် အနီးအနားကို ရောက်နေပါပြီ"

"စစ်တပ်ရဲ့ တိကျတဲ့ တည်နေရာကို ရှာပြီးတာနဲ့ ထွက်ကြတာပေါ့" ဟော်ကျန့်ကျွင်းက ပြောလိုက်သည်။

"ဟုတ်ကဲ့ပါ ဗိုလ်ချုပ်"

ဟော်ကျန့်ကျွင်းက လင်းယွမ်ဘက်သို့ လှည့်ကြည့်လိုက်ပြီး "သခင်... အော်... ဆရာလင်း... ကျွန်တော်တို့ ခဏနေရင် ရောက်ပြီ"

"ခဏနေရင် ဟုန်ထျန်ရီကို လာဖို့ ကျွန်တော် လူလွှတ်လိုက်မယ်... အဲ့ဒီအချိန်ကျရင် ကျွန်တော်တို့..."

သူက အသံကို နှိမ့်လိုက်ပြီး လင်းယွမ်နှင့်အတူ အသေးစိတ် ရင်ဆိုင်မည့် နည်းဗျူဟာများနှင့် လှုပ်ရှားရမည့် အချိန်အခါတို့ကို တိုင်ပင်ဆွေးနွေးလိုက်သည်။

လင်းယွမ်က ခေါင်းအနည်းငယ် ညိတ်ပြလိုက်သည်။

မကြာမီ ကြယ်နီကျွန်းက လျင်မြန်စွာ ပျံသန်းသွားရာ ရှေ့တွင် ကောင်းကင်ယံ၌ စုရုံးနေသော လေပေါ်ကျွန်းများကို မြင်တွေ့လိုက်ရပြီး ဧရာမ ကောင်းကင်မြို့တော်ကြီး တစ်ခုအသွင် ဖန်တီးထားလေသည်။

၎င်းသည် ကောင်းကင်ယံတွင် ပေါလောပေါ်နေသော ကုန်းမြေမြို့တော်ကြီး တစ်ခုပင် ဖြစ်သည်။

ကွဲပြားခြားနားသော ပုံစံကိုယ်စီရှိကြသည့် ဧရာမ ကျွန်းကြီးများက လေထဲတွင် ပေါလောပေါ်နေကြပြီး လင်းယွမ်က အကြမ်းဖျင်း အကဲခတ်ကြည့်လိုက်ရာ ဤကျွန်းများကြားတွင် သိသာထင်ရှားသော အကွာအဝေး ခွဲခြားမှုများ ရှိနေကြောင်း မြင်တွေ့ရသည်။ ဤလေပေါ်ကျွန်းများ စုစည်းထားသည့် ပုံစံကိုကြည့်ရုံဖြင့် ကျင်းကျိုးစစ်တပ်တွင် အင်အားစု မည်မျှရှိသည်ကို အလွယ်တကူ သိမြင်နိုင်ပေသည်။

ထိုအချိန်တွင် ဟော်ကျန့်ကျွင်းကလည်း နားလည်မှုရှိစွာဖြင့် ရှေ့ဆက်သွားခြင်းကို ရပ်တန့်လိုက်ပြီး ထိုလေပေါ်ကျွန်း အမြောက်အမြားနှင့် အတိုင်းအတာတစ်ခုအထိ အကွာအဝေးတစ်ခု ချန်ထားလိုက်သည်။

ထို့နောက် သူက ပြောလိုက်သည်။ "လူတစ်ယောက် သွားပြီး ဗိုလ်ချုပ်ကြီးဟုန်ကို အကြောင်းကြားလိုက်... ကျွန်တော်တို့ ခိုက်ရီနည်းပညာရဲ့ ပြဿနာကို ဖြေရှင်းပြီးပြီမို့လို့ သူ့ကို လာရောက်ဆွေးနွေးပေးဖို့ ပြောလိုက်"

လက်အောက်ရှိ သတင်းပို့စစ်သားလေးက ဟုန်ထျန်ရီ ရှိနေသော ထိုဧရာမ လေပေါ်ကျွန်းဆီသို့ ချက်ချင်း ထွက်ခွာသွားလေသည်။

မကြာမီမှာပင် လေယာဉ်ပျံများ တဝီဝီ မြည်ဟည်းလျက် ပျံသန်းလာသည်ကို မြင်တွေ့လိုက်ရသည်။

ထိုမြင်ကွင်းကို ကြည့်ရင်း လင်းယွမ်က သက်ပြင်းတစ်ချက်ချကာ ပြောလိုက်သည်။ "ထင်တဲ့အတိုင်းပဲ... သူတစ်ယောက်တည်း လာတာ မဟုတ်ဘူး"

ဟော်ကျန့်ကျွင်းက မေးလိုက်သည်။ "ဆရာလင်း... ဒါဆို ကျွန်တော်တို့ အစီအစဉ်အတိုင်းပဲ လုပ်ကြမလား"

"အင်း"

လင်းယွမ်က ခေါင်းအနည်းငယ် ညိတ်လိုက်ပြီး ချက်ချင်းပင် ဂျိမ်းစ်၊ ဝမ်လင်းအာနှင့် အခြားသူများကို ခေါ်ယူကာ အနီးအနားရှိ စစ်တပ်လူအုပ်ကြီးကြားထဲတွင် ပုန်းကွယ်နေလိုက်ကြသည်။

မကြာမီ လေယာဉ်များ ဆင်းသက်လာပြီး ရှေ့ဆုံးမှ လေယာဉ်ထဲမှ လူငယ်တစ်ဦး ထွက်ပေါ်လာသည်။

လင်းယွမ်က လူအုပ်ကြားထဲမှ လှမ်းကြည့်လိုက်ရာ ထိုသူမှာ အသက်သုံးဆယ်ကျော်အရွယ်ခန့် ရှိပြီး စစ်ဝတ်စုံကို ဝတ်ဆင်ထားကာ အဆင့်မြင့်ရာထူးကြီး ရယူထားသူတစ်ဦး၏ အသွင်အပြင်မျိုး ရှိနေသည်။

သူ၏ မျက်နှာသွင်ပြင်မှာ သာမန်သာဖြစ်သော်လည်း မျက်လုံးတစ်စုံမှာမူ အလွန် ထက်မြက်လှပြီး လူမရောက်သေးခင်မှာပင် ဟားတိုက်ရယ်မောလျက် "ဗိုလ်ချုပ်ဟော်... ပင်ပန်းသွားပြီနော်... ဟားဟားဟား... အဲ့ဒီ ခိုက်ရီနည်းပညာရဲ့ ခေါင်းဆောင်ကို ဖမ်းလာနိုင်ခဲ့ပြီလား"

"ဒီလူဆီမှာ အခြားအစွမ်းပိုင်ရှင်တွေရဲ့ အစွမ်းတွေကို ချိတ်ပိတ်နိုင်တဲ့ တိတ်ဆိတ်ခြင်းအစွမ်း ရှိတယ်လို့ ကြားဖူးတယ်... အာနိသင်က စွမ်းအင်ချိတ်ပိတ်သင်္ကေတနဲ့ ဆင်တူတယ်တဲ့"

"ဒီလူ့ဆီက အစွမ်းကို သေချာလေး လေ့လာကြည့်လို့ ရနိုင်တယ်"

ဆက်ရန်...