အခန်း ၉၅၀

အပိုင်း(၉၅၀) လင်းယွမ် စတင်လှုပ်ရှားခြင်း

ဟုန်ထျန်ရီ လှုပ်ရှားလိုက်ပြီဖြစ်ပြီး အလွန်လျင်မြန်လှပေသည်။

အကြောင်းမှာ သူ၏တောင်ပံအစုံက အလျင်ကို မြှင့်တင်ပေးထားသောကြောင့်ပင်။

အရောင်အသွေးစုံလင်သော ကြယ်ငါးအသွင် ပြောင်းလဲထားသည့် ဟော်ကျန့်ကျွင်းက ချက်ချင်း တုံ့ပြန်လိုက်ပြီး ဒေါသတကြီး အော်ဟစ်လိုက်သည်။ "မင်း အတင့်ရဲလှချည်လား"

သူက ဟုန်ထျန်ရီထံသို့ အရှိန်ပြင်းပြင်းဖြင့် ခုန်အုပ်လိုက်ပြီး ကြယ်ငါး၏ စုပ်ခွက်လက်တံငါးချောင်းက ဟုန်ထျန်ရီအား လှမ်းဖမ်းလိုက်၏။

ဟုန်ထျန်ရီ၏ မျက်လုံးများထဲတွင် ပြတ်သားသည့် အရိပ်အယောင်များ ပေါ်လာကာ လက်သည်းဖြင့် အားကုန် ရိုက်ချလိုက်သည်။

"ဘုန်း"

တုန်ခါသွားသော အသံတုံးကြီးတစ်သံနှင့်အတူ ဧရာမသားရဲကြီးနှစ်ကောင်၏ လက်သည်းများနှင့် စုပ်ခွက်လက်တံများ ထိပ်တိုက်တွေ့ဆုံသွားကြသည်။

ထိုနောက်တွင်တော့ ဟော်ကျန့်ကျွင်း၏ ခန္ဓာကိုယ်သည် မြေပြင်ပေါ်သို့ ချက်ချင်း လဲကျသွားပြီး လိမ့်ထွက်သွားတော့၏။

သူ၏ မျိုးရိုးဗီဇ ပြန်လည်ဖွဲ့စည်းခြင်း အဆင့်က ဟုန်ထျန်ရီနှင့် ယှဉ်လျှင် အများကြီး ကွာခြားနေသေးသည်။

မျက်နှာချင်းဆိုင် ထိပ်တိုက်ရင်ဆိုင်လိုက်ရချိန်တွင် တစ်ချက်တည်းနှင့်ပင် ရိုက်လွှင့်ခံလိုက်ရခြင်း ဖြစ်သည်။

ဟုန်ထျန်ရီက တောင်ပံအစုံကို ခတ်လိုက်ပြီး လင်းယွမ်ဆီသို့ ဆက်လက် တိုက်ခိုက်ရန် ပြင်လိုက်သည်။

ထိုအချိန်မှာပင် ထက်မြက်လှသော ဓားချက်တစ်ချက်က အရှိန်ပြင်းပြင်းဖြင့် ပိုင်းဖြတ်ဝင်ရောက်လာ၏။

"အောက်ဆင်းခဲ့စမ်း"

ဂျိမ်းစ်က ကျယ်လောင်စွာ ဟိန်းဟောက်လိုက်ပြီး လေထဲတွင်ရှိနေသော ဟုန်ထျန်ရီအား ဓားဖြင့် အားကုန် ပိုင်းချလိုက်သည်။

ဟုန်ထျန်ရီ၏ မျက်သုံးလုံး ခွေးမိစ္ဆာက ထိုဓားကို လက်သည်းအစုံဖြင့် အလျင်အမြန် ကာကွယ်လိုက်၏။

"ထန်"

ရွှေရောင်လက်သည်းများနှင့် ဂျိမ်းစ်၏ လက်ထဲရှိ ဧရာမဓားကြီးတို့ ထိခိုက်မိသွားပြီး သံမဏိများ ရိုက်ခတ်သံ ထွက်ပေါ်လာသည်။

ဂျိမ်းစ်သည် ရိုက်လွှင့်ခံရခြင်း မရှိဘဲ လက်ထဲရှိ ဓားကို အောက်သို့ အားကုန် ဖိချလိုက်သည်။

"ဒုန်း"

ဧရာမ ဓားရှည်ကြီးဆီမှ မီးပွင့်များ တဖျပ်ဖျပ် လွင့်စင်ထွက်လာ၏။

ဟုန်ထျန်ရီ၏ ခန္ဓာကိုယ်မှာ တုန်ခါသွားပြီး လေထဲသို့ မြင့်တက်သွားကာ ရွှေရောင်လက်သည်းများပေါ်တွင် နက်ရှိုင်းသော ဓားရာများ ထင်ကျန်ရစ်လေသည်။

သို့သော် ဟုန်ထျန်ရီက ဂျိမ်းစ်နှင့် ဆက်လက် တိုက်ခိုက်ရန် အစီအစဉ်မရှိဘဲ ဂျိမ်းစ်ကို ကျော်ဖြတ်ကာ လင်းယွမ်ဆီသို့ အရှိန်ပြင်းပြင်းဖြင့် တည့်တည့် ခုန်ဝင်သွားသည်။

သူ၏ ရည်မှန်းချက်က အလွန် ရှင်းလင်းလှသည်။ ၎င်းမှာ တရားခံဖြစ်သူ လင်းယွမ်ကို အရင်ဆုံး ဖမ်းဆီးရန်ပင်တည်း။

ဤလင်းယွမ်ကိုသာ ဖမ်းမိလိုက်ပါက ဟော်ကျန့်ကျွင်းတို့၏ ရင်ထဲတွင်ရှိသော လင်းယွမ်၏ ဩဇာလွှမ်းမိုးမှုအပေါ် အသုံးချကာ ဟော်ကျန့်ကျွင်း လက်နက်ချရန် သွေးဆောင်နိုင်မည်ဟု သူ ယုံကြည်ထားသည်။

"ခွေးကောင်... ရပ်လိုက်စမ်း"

ဂျိမ်းစ်က ဒေါသတကြီး အော်ဟစ်လိုက်သော်လည်း သူ၏ ခြေထောက်နှစ်ချောင်းဖြင့် သူတစ်ပါး၏ တောင်ပံများကို မည်သို့ အမီလိုက်နိုင်မည်နည်း။

ထိုအချိန်မှာပင် လေထဲ၌ သွေးရောင် ခန္ဓာကိုယ်တစ်ခုက အရှိန်အဟုန်ဖြင့် ပျံသန်းလာပြီး ဟုန်ထျန်ရီကို ဝင်ရောက် တားဆီးလိုက်သည်။

"ဘုန်း"

လေထဲတွင် ခန္ဓာကိုယ်နှစ်ခု ပြင်းထန်စွာ ဝင်တိုက်မိသွားကြသည်။

ဝင်ရောက်တိုက်ခိုက်သော သွေးရောင် ခန္ဓာကိုယ်မှာ ချက်ချင်း နောက်သို့ လွင့်စဉ်သွားပြီး စူးစူးဝါးဝါး အော်ဟစ်သံတစ်သံ ထွက်ပေါ်လာ၏။

ဂျက်ခ်၏ ဧရာမ လင်းနို့ကိုယ်လုံးကြီးက မြေပြင်ပေါ်သို့ ပြုတ်ကျသွားပြီး အကြိမ်အနည်းငယ် လိမ့်ထွက်သွားသည်ကို တွေ့လိုက်ရသည်။

ထိုသို့ ဝင်ရောက်တားဆီးလိုက်မှုကြောင့် ဂျိမ်းစ်က နောက်ဆုံးတွင် ထပ်မံ အမီလိုက်လာနိုင်ခဲ့သည်။

သူက လက်ထဲရှိ ဓားကို ဆုပ်ကိုင်လိုက်ပြီး ဧရာမ လက်ရုံးကြီးများကို အားကုန်ရမ်းကာ လက်ထဲမှ ဓားရှည်ကြီးကို လှံတစ်စင်းသဖွယ် အားကုန် ပစ်လွှတ်လိုက်သည်ကို မြင်လိုက်ရ၏။

"ဝှစ်"

စူးရှသော လေခွင်းသံက လေထုကို ချက်ချင်း ဆုတ်ဖြဲသွားပြီး လူတိုင်း၏ နားစည်ထဲတွင် ပေါက်ကွဲသွားသကဲ့သို့ ဖြစ်သွားသည်။

လေထဲတွင် တောင်ပံဖြန့်ထားသော မျက်သုံးလုံး ခွေးမိစ္ဆာသည် လှုပ်ရှားမှုကို ချက်ချင်း ရပ်တန့်လိုက်ပြီး နောက်ကျောဘက်မှ ထိတ်လန့်ဖွယ်ရာ တိုက်ခိုက်မှုကို ခံစားလိုက်ရသဖြင့် ခန္ဓာကိုယ်ကို အလုံးလေးတစ်ခုသဖွယ် ကွေးညွှတ်လိုက်ကာ တောင်ပံအစုံဖြင့် ခန္ဓာကိုယ်ကို ကာကွယ်ပြီး မြေပြင်ဆီသို့ အရှိန်ပြင်းပြင်း ထိုးဆင်းသွားလေသည်။

၎င်းသည် ဆံခြည်တစ်မျှင်စာ ကွာဟမှုလေးဖြင့် ထိုဓားကို ရှောင်တိမ်းနိုင်ခဲ့ပြီး မြေပြင်ပေါ်သို့ ပြင်းထန်စွာ ပြုတ်ကျသွားတော့၏။

ချက်ချင်းဆိုသလိုပင် မြေကြီးများ တုန်ခါသွားပြီး ကျယ်လောင်သော အသံကြီးများ ဆက်တိုက် ထွက်ပေါ်လာသည်။

ဟုန်ထျန်ရီ၏ ရင်ထဲတွင် ပြင်းထန်စွာ တုန်လှုပ်သွားပြီး မနေနိုင်ဘဲ ကျိတ်၍ ဆဲရေးလိုက်မိသည်။ "ဘယ်လိုလုပ်ပြီး ရုတ်တရက် အစွမ်းပိုင်ရှင်တွေ ဒီလောက်အများကြီး ထွက်လာရတာလဲ"

"ဒီလူတွေအကုန်လုံးက ထိုက်ယန်တောင် ခိုလှုံရေးစခန်း က လူတွေများလား"

"ငါ ဘာလို့ ဒီခိုလှုံရေးစခန်း နာမည်ကို မကြားဖူးရတာလဲ"

သူ အလွန် အံ့အားသင့်နေမိသည်။ တောင်ပိုင်းကလာသည့် ခိုလှုံရေးစခန်းတစ်ခုမှာ ဘယ်ကနေ ဒီလောက်များပြားလှတဲ့ အစွမ်းပိုင်ရှင်တွေ ရှိနေရတာလဲ။

မျက်သုံးလုံး ခွေးမိစ္ဆာ အသွင်ဖြင့် ဟုန်ထျန်ရီသည် မြေပြင်ပေါ်တွင် အကြိမ်အနည်းငယ် လိမ့်ကာ ပြုတ်ကျလာသော အရှိန်ကို လျှော့ချလိုက်သည်။

ထို့နောက် သူ ဆက်မတွေးနေတော့ဘဲ နောက်ခြေထောက်များဖြင့် မြေပြင်ကို အားကုန်ကန်လိုက်ပြီး ခြေလက်လေးဖက်စလုံးဖြင့် မြေပြင်ပေါ်တွင် ရူးသွပ်စွာ ပြေးလွှားသွားလေသည်။

သူက အရင်ဆုံး လင်းယွမ်ကို ဖမ်းမိမှသာ လက်ရှိ ပြဿနာကို ဖြေရှင်းနိုင်မည် ဖြစ်သည်။

ယခုအချိန်တွင် သူနှင့် လင်းယွမ်ကြား အကွာအဝေးမှာ ဆယ်ပေခန့်သာ ကွာဝေးတော့သည်။

ဟုန်ထျန်ရီ၏ မျက်လုံးများထဲတွင် ဝမ်းသာသည့် အရိပ်အယောင်များ ပေါ်လာသော်လည်း တစ်ချိန်တည်းမှာပင် ရင်ထဲ၌ သံသယအချို့လည်း ဖြစ်ပေါ်လာသည်။

ဒီလောက်အကွာအဝေးကို ရောက်နေပြီတောင်မှ တစ်ဖက်လူက ဘာလို့ ထွက်မပြေးသေးတာလဲ။

သံသယဖြစ်နေစဉ်မှာပင် တစ်ဖက်လူ၏ ခန္ဓာကိုယ်ပေါ်မှ ထူထဲသော သွေးမြူခိုးများ ပျံ့နှံ့ထွက်ပေါ်လာသည်ကို သူ တွေ့လိုက်ရ၏။

ဟုန်ထျန်ရီက အံ့အားသင့်စွာဖြင့် လှောင်ပြုံး ပြုံးလိုက်သည်။ "ဒီအချိန်ရောက်မှ မျိုးရိုးဗီဇ ပြန်လည်ဖွဲ့စည်းဖို့ သတိရတာလား"

"တစ်ယောက်ချင်း တိုက်ခိုက်တဲ့နေရာမှာ ငါ ဘယ်တုန်းကမှ မရှုံးဖူးဘူး"

ဟုန်ထျန်ရီက ဟားတိုက် ရယ်မောလိုက်ပြီး ခြေလက်များ မရပ်တန့်ဘဲ မြေပြင်ပေါ်တွင် ပြေးလွှားနေရာ မီးခိုးလုံးကြီးများအလား ဖုန်တုံးကြီးများ လွင့်စင်ထသွားသည်။

မျက်တောင်တစ်ခတ်အတွင်းမှာပင် သူသည် သွေးမြူခိုးများ ရှေ့သို့ ရောက်ရှိသွားလေပြီ။

နောက်တစ်ခဏတွင် မျက်သုံးလုံး ခွေးမိစ္ဆာက လက်သည်းဖြင့် သွေးမြူခိုးများထဲသို့ အားကုန် ရိုက်ချလိုက်သည်။

"ဘုန်း"

ဤလက်သည်းချက်က သွေးမြူခိုးများထဲသို့ အမှန်တကယ် ကျရောက်သွားခဲ့၏။

၎င်း၏ မျက်လုံးများထဲတွင် ချက်ချင်း ဝမ်းသာသည့် အရိပ်အယောင်များ ပေါ်လာသည်။

"သေလိုက်စမ်း"

နောက်တစ်ခဏတွင် ၎င်းက ကျယ်လောင်စွာ အော်ဟစ်လိုက်ပြီး လက်သည်းများဖြင့် အားကုန် ဆွဲဆုတ်လိုက်လေသည်။

သို့သော် သူ၏ ရှေ့ခြေထောက်ကို ဧရာမ ခွန်အားကြီးတစ်ခုက ရုတ်တရက် ဖမ်းဆုပ်လိုက်သည်ကို ခံစားလိုက်ရ၏။

ထိုနောက်တွင် ဧရာမ လက်ဝါးကြီးတစ်ခုက ၎င်း၏ ရှေ့ခြေထောက်ကို အားကုန် ဆုပ်ကိုင်လိုက်သကဲ့သို့ ဖြစ်သွားသည်။

မျက်သုံးလုံး ခွေးမိစ္ဆာ အသွင်ရှိသော ဟုန်ထျန်ရီ တုံ့ပြန်ချိန်ပင် မရလိုက်ဘဲ ပြင်းထန်သော ဆွဲငင်အားတစ်ခုက ဝင်ရောက်လာလေသည်။

"ဝှီး"

သူ၏ မျက်စိရှေ့တွင် ပြာဝေသွားပြီး ထိတ်လန့်ဖွယ်ကောင်းသော အလေးချိန်မဲ့ ခံစားမှုတစ်ခု ဝင်ရောက်လာသည်ကို ခံစားလိုက်ရ၏။

ပေသုံးရာ နီးပါးမြင့်သော ၎င်း၏ ခန္ဓာကိုယ်ကြီးမှာ ထိုဧရာမ ခွန်အားကြီး၏ အားကုန် လွှဲယမ်းခြင်းကို ခံလိုက်ရသည်။

ထို့နောက် တစ်စုံတစ်ယောက်၏ အားကုန် ဆွဲချခြင်းကို ခံလိုက်ရပြီး လေထဲမှနေ၍ မြေပြင်ပေါ်သို့ ပြင်းထန်စွာ ရိုက်ချခံလိုက်ရလေသည်။

"ဒုန်း"

ထိတ်လန့်ဖွယ်ရာ ပေါက်ကွဲသံကြီး ထွက်ပေါ်လာ၏။

မြေကြီးမှာ ချက်ချင်း တုန်ခါသွားပြီး အက်ကွဲသွားတော့သည်။

ဖုန်မှုန့်များ လွင့်စင်နေစဉ် မျက်သုံးလုံး ခွေးမိစ္ဆာနှင့် မြေပြင် ထိတွေ့သွားသော နေရာတွင် ဧရာမ တွင်းကြီးတစ်ခု ချိုင့်ဝင်သွားလေသည်။

တစ်ချက် လွှဲယမ်းကာ တစ်ချက် ရိုက်ချလိုက်ခြင်းက ဟုန်ထျန်ရီအား ရွှံ့နွံများထဲသို့ တိုက်ရိုက် နစ်ဝင်သွားစေခဲ့သည်။

ဟုန်ထျန်ရီ ခေါင်းမူးသွားပြီး တစ်ကိုယ်လုံးတွင် မနာကျင်သော နေရာဟူ၍ တစ်နေရာမှ မရှိတော့ပေ။

သူ၏ မျက်လုံးများထဲတွင် ကြယ်များ လင်းလက်သွားပြီး တတိယမြောက် မျက်လုံးမှာ မျက်ဖြူလန်သွားတော့သည်။

ဤတိုက်ခိုက်မှုက မည်မျှ ပြင်းထန်ကြောင်း တွေးကြည့်ရုံဖြင့် သိနိုင်ပေသည်။

မူးဝေနေစဉ်မှာပင် ဟုန်ထျန်ရီ၏ မျက်လုံးသုံးလုံးက သွေးမြူခိုးများ ကွဲလွင့်သွားပြီးနောက် ဧရာမ ဝက်ဝံဖြူကြီးတစ်ကောင် ထွက်ပေါ်လာသည်ကို မြင်လိုက်ရ၏။

ထို ဝက်ဝံဖြူကြီး၏ ခန္ဓာကိုယ်မှာ တောင်တန်းကြီးတစ်ခုအလား ကြီးမားလှပြီး ခေါင်းကို အနည်းငယ် ငုံ့ကာ သူ့ကို အပေါ်စီးမှ ကြည့်နေလေသည်။

ထို့နောက် ဝက်ဝံဖြူကြီးက လူစကားပြောလိုက်သည်။ "ငါ့ကို ဖမ်းမိသွားရင် အားလုံး အဆင်ပြေသွားပြီလို့ မင်း ထင်နေတာလား"

"ဟားဟား... မင်းနဲ့ ငါ့ကြားက ကွာဟချက် ဘယ်လောက်တောင် ကြီးမားသလဲဆိုတာကို မင်း လုံးဝ မသိသေးပါဘူး"

"သူတို့ကို အနိုင်ယူပြီး ငါ့ရှေ့ကို ရောက်လာနိုင်တာကလည်း မင်းမှာ အရည်အချင်း နည်းနည်း ရှိနေလို့ပါပဲ"

ဟုန်ထျန်ရီသည် ထိုစကားများကို ကြားလိုက်ရသောအခါ ရင်ထဲတွင် ပြင်းထန်စွာ ဒေါသထွက်သွားမိသည်။

မောက်မာလိုက်တာ။

အရမ်းကို မောက်မာလွန်းတယ်။

ဒီလောက် မောက်မာတဲ့လူကို သူ တစ်ခါမှ မကြုံဖူးခဲ့ပေ။

အမြဲတမ်း ဟုန်ထျန်ရီ ဆိုသည်မှာ ကျင်းကျိုးစစ်တပ် ၏ နံပါတ်တစ် လူစွမ်းကောင်း ဖြစ်ခဲ့သည်။

ကျင့်စဉ် လေ့ကျင့်သည့် နှုန်းဖြစ်စေ၊ တိုက်ခိုက်ရေး စွမ်းရည်ဖြစ်စေ သူသည် ကျင်းကျိုး တစ်ခွင်တွင် ပြိုင်ဘက်ကင်း ဖြစ်ခဲ့သည်။

သူ့ရှေ့တွင် ဤမျှ မောက်မာသည့် လူမျိုးကို ယခုမှ ပထမဆုံးအကြိမ် တွေ့ဖူးခြင်းပင်။

သို့သော် စောစောက ထိပ်တိုက်တွေ့ဆုံမှုက ခွန်အားပိုင်းတွင် သူနှင့် တစ်ဖက်လူကြား ကွာဟချက် အလွန်ကြီးမားကြောင်းကို ရှင်းလင်းစွာ ပြသနေလေသည်။

ထိုသို့ တွေးမိပြီးနောက် သူက အံကြိတ်ကာ ထရပ်ရန် ကြိုးစားလိုက်၏။

သို့သော် ဝက်ဝံလက်ဝါးကြီးတစ်ခုက အပေါ်သို့ မြင့်တက်သွားပြီး "ဘုန်း" ဟူသော အသံနှင့်အတူ ဟုန်ထျန်ရီ၏ ခန္ဓာကိုယ်ပေါ်သို့ အားကုန် ဖိနင်းချလိုက်သည်။

ထိတ်လန့်ဖွယ်ရာ ခွန်အားကြောင့် ယခုမှ ထရပ်ခါစ မျက်သုံးလုံး ခွေးမိစ္ဆာမှာ ချက်ချင်း ပြန်လည် မှောက်ကျသွားတော့၏။

"အား"

ဟုန်ထျန်ရီ ဒေါသတကြီး ဟိန်းဟော်လိုက်သော်လည်း ဝက်ဝံလက်ဝါးကြီး၏ အားကုန် ဖိနင်းထားခြင်းကို ခံနေရဆဲပင်။

"ကျစ်... သတ္တိရှိရင် စွမ်းအင်ချိတ်ပိတ် အစီအရင်ကို ဖွင့်ပေးစမ်းပါ"

ဟုန်ထျန်ရီ ရူးသွပ်စွာ အော်ဟစ်လိုက်သည်။

သူ၏ အသန်မာဆုံး အရာက ခွန်အား မဟုတ်ဘဲ သူ၏ သန္ဓေပြောင်းအစွမ်း သာ ဖြစ်ပေသည်။

လင်းယွမ်က ခပ်ဖျော့ဖျော့ ပြုံးလိုက်သည်။ "မင်း ဘာတွေ လာနောက်နေတာလဲ... ဒါ တိုက်ပွဲလေ... ကလေးကလား ကစားနေတယ်လို့ ထင်နေတာလား"

ထိုသို့ ပြောပြီးနောက် လင်းယွမ်က ဆက်မပြောနေတော့ဘဲ စွမ်းအင်ချိတ်ပိတ် ဆေးရည် တစ်ပုလင်းကို ထုတ်ယူကာ သူ့ခန္ဓာကိုယ်ထဲသို့ ထိုးသွင်းလိုက်သည်။

စွမ်းအင်ချိတ်ပိတ် ဆေးရည် ထိုးသွင်းလိုက်သည်နှင့်အတူ အနီရောင် သင်္ကေတတစ်ခုက မှိတ်တုတ်မှိတ်တုတ် ဖြစ်လာသော်လည်း အသွင်သဏ္ဌာန် မပေါ်လာနိုင်ခဲ့ပေ။

လင်းယွမ်မှာ ထူးဆန်းအံ့သြခြင်း မရှိပေ။ အကြောင်းမှာ ထိုအကြောင်းရင်းကို သူ သိထားသောကြောင့် ဖြစ်သည်။

ယခုအချိန်တွင် လူတိုင်းသည် စွမ်းအင်ချိတ်ပိတ် အစီအရင်ထဲတွင် ရောက်ရှိနေပြီး သန္ဓေပြောင်းအစွမ်းနှင့် သက်ဆိုင်သော ပစ္စည်းများ၊ သင်္ကေတများအားလုံးကို အသုံးပြု၍ မရနိုင်သောကြောင့် စွမ်းအင်ချိတ်ပိတ် ဆေးရည်လည်း ချွင်းချက် မဟုတ်ပေ။

သို့သော် ပြဿနာမရှိပေ။ ခဏနေ၍ စွမ်းအင်ချိတ်ပိတ် အစီအရင်ကို ရုပ်သိမ်းလိုက်သည်နှင့် ဤဆေးရည်က ချက်ချင်း အာနိသင် ပြလာမည် ဖြစ်သည်။

ထိုအချိန်ရောက်လျှင် ဤလူများက သန္ဓေပြောင်းအစွမ်းကို အသုံးပြုနိုင်မည် မဟုတ်တော့ပေ။

ဆက်ရန်...