အခန်း ၄၃၂

အခန်း (၄၃၂) - အနာဂတ်အတွက် ဇာတ်ညွှန်းကြိုရေးနေသော အမောင်လော့ချန်

"ဘာအန္တရာယ်ကို ပြောတာလဲဗျာ"

စီမာဟွေ့နန် စိတ်ရှုပ်ထွေးစွာဖြင့် မျက်မှောင်ကြုတ်လိုက်မိပြီး

"အခြေတည်နှောင်းပိုင်းအဆင့် ကျင့်ကြံသူကြီး နှစ်ယောက်နဲ့ အခြေတည်အဆင့် ၆ ရှိတဲ့ တခြားတစ်ယောက်ကပါ ဘေးကနေ စောင့်ကြည့်နေတာကို.... ဒါက ဘယ်လိုလုပ်ပြီး အန္တရာယ်မရှိဘူးလို့ ပြောနိုင်ရတာလဲရှင်"

လော့ချန်က ခပ်ဖွဖွ ပြုံးလိုက်ရင်း ထျန်းလန်နတ်ဘုရားမြို့တော် ရှိရာ အရပ်ဆီသို့ လက်ညှိုးညွှန်ပြလျက်

"နောက်လာမယ့် ၁၀ နှစ်လုံးမှာ ရေခဲခံတပ်ကပဲ ဒီမြို့တော်ကို ဆက်ပြီး အုပ်ချုပ်သွားမှာလေ"

စီမာဟွေ့နန်၏ မျက်ဝန်းများသည် အံ့ဩမှုကြောင့် ပြူးကျယ်သွားရသည်။ အကယ်၍ ထိုစကားသာ မှန်ကန်ခဲ့လျှင် သူမ ထင်ထားသလို အန္တရာယ် မရှိနိုင်တော့ပေ။ ထို့ပြင် လော့ချန်၏ စကားအရ မိမိတို့၏ နောက်ကွယ်တွင် ရေခဲခံတပ်၏ အပြည့်အဝ ထောက်ခံမှု ရှိနေသည်မှာလည်း ထင်ရှားလှပေသည်။ ဤကဲ့သို့သော အခြေအနေမျိုးအောက်တွင် ထျန်းလန်နတ်ဘုရားမြို့တော်အတွင်း၌ ဆက်လက် ရပ်တည်လှုပ်ရှားနေရဦးမည့် ထိုအခြေတည်နှောင်းပိုင်းအဆင့် ကျင့်ကြံသူကြီးများသည် လော့ချန်အား ရန်စဝံ့ကြမည် မဟုတ်ချေ။ သူမသည် တံခါးပိတ်ကျင့်ကြံရာမှ ထွက်လာသည်မှာ မကြာသေးဘဲ သူမ၏ လက်အောက်ငယ်သားများထံမှ အပေါ်ယံ သတင်းအချက်အလက်အချို့ကိုသာ ကြားသိခဲ့ရသဖြင့် နောက်ကွယ်မှ နက်ရှိုင်းလှသော နိုင်ငံရေး ကစားကွက်များကိုမူ မသိရှိခဲ့ရှာပေ။

လော့ချန်က ခပ်တိုးတိုး ရယ်မောလိုက်ရင်း

"ပြီးတော့ ငါတို့ကြားမှာ တကယ့် ပဋိပက္ခဆိုတာလည်း မရှိခဲ့ဘူးလေ…. ဖေးချန်းချူး သူတို့ကို ကတိပေးခဲ့သမျှအရာတွေက သူတို့လက်ထဲ တကယ်မရောက်မချင်း စိတ်ကူးယဉ် သက်သက်ပဲ ဖြစ်နေဦးမှာ…. ဒီလို အခြေအနေမျိုးမှာ မီးနဂါးကိုးဆင့်အစီအရင်ကလည်း အရှိန်အဝါ ပြင်းထန်နေတဲ့အချိန်.... သူတို့က ငါနဲ့ တကယ်ပဲ ရန်သူဖြစ်အောင် စွန့်စားပါ့မလား"

ထိုသို့ ရှင်းပြလိုက်သည့်အခါမှ စီမာဟွေ့နန်တစ်ယောက် အရာအားလုံးကို သဘောပေါက်သွားတော့သည်။ အဖွဲ့ချုပ်ခေါင်းဆောင်သည် ဖိအားများအောက်တွင်ပင် ဤမျှ တည်ငြိမ်နေခြင်းမှာ မဆန်းတော့ပေ။ နှောင်းပိုင်းအဆင့်ကျင့်ကြံသူကြီးနှစ်ဦး၏ မျက်စိရှေ့မှာပင် ဖေးချန်းချူးကို တုံ့ဆိုင်းခြင်းမရှိဘဲ သတ်ဖြတ်ဝံ့ပြီး တစ်ချက်မျှပင် တုန်လှုပ်ခြင်း မရှိခဲ့သည်အထိပင်။

"အဖွဲ့ချုပ်ခေါင်းဆောင်က ကျွန်မ ထင်ထားတာထက် အများကြီး အမြော်အမြင် ကြီးမားတာပဲ…. ကျွန်မကပဲ အလွန်အကျွံ တွေးပူနေခဲ့မိတာပါ" ဟု သူမ ဝန်ခံလိုက်သည်။

လော့ချန်က ခေါင်းယမ်းလိုက်ရင်း

"သတင်းအချက်အလက် မရလိုက်တာကြောင့်ပါ"

ထို့နောက် သူ မျက်မှောင်ကြုတ်လိုက်ကာ ဆိုသည်။

"မင်း အခြေတည်အဆင့်ကို ခုမှ ရောက်ခါစလေ.... ဘာလို့ ကျင့်ကြံဆင့်ကို တည်ငြိမ်အောင် အရင်မလုပ်ဘဲ ထျန်းလန်တောင်ကနေ ဒီလောက် အသည်းအသန် ဆင်းလာရတာလဲ"

စီမာဟွေ့နန် သက်ပြင်းချလိုက်ရင်း ပြန်ဖြေလိုက်သည်။

"ကျွန်မ တံခါးပိတ်ကျင့်ကြံနေတာ လဝက်လောက်ပဲ ရှိသေးပေမဲ့ လော့ထျန်းအဖွဲ့မှာ ကိစ္စတွေ အများကြီး ဖြစ်ပျက်ခဲ့တာလေ…. ဒီလောက်အထိ အပြောင်းအလဲတွေ ဖြစ်နေတာကို ကျွန်မက ဘယ်လိုလုပ်ပြီး စိတ်အေးလက်အေးနဲ့ ကျင့်ကြံနိုင်မှာလဲရှင်"

သူမ အောင်မြင်စွာ အဆင့်တက်လှမ်းပြီးနောက် သူမအား ဆီးကြိုလိုက်သည်မှာ တိတ်ဆိတ်ခြောက်ကပ်ခြင်းတစ်ခုတည်းသာ ဖြစ်ခဲ့သည်။ အောင်မြင်မှုကို ကြိုဆိုမည့်သူ၊ မျှဝေခံစားမည့်သူ တစ်ဦးမျှ မရှိခဲ့ပေ။ ထိုစဉ်မှာပင် လော့ထျန်းအဖွဲ့တွင် ဖြစ်ပျက်နေသော ကိစ္စများကို သူမ ကြားလိုက်ရသည်။ အခြေတည်အဆင့်ရှိသော ရန်သူများကို တစ်ဦးပြီးတစ်ဦး ရင်ဆိုင်ခြင်း၊ တိုက်ပွဲတစ်ခုပြီးတစ်ခု ဆင်နွှဲခြင်း၊ ဂိုဏ်းတစ်ခုပြီးတစ်ခု ဖျက်ဆီးခြင်းများ၊ ထို့ပြင် ဒန်ရှားတောင်တစ်ခုလုံးတွင် စုပုံနေသော တန်ဖိုးကြီး ရတနာများမှာမူ ထည့်ပြောနေရန်ပင် မလိုတော့ချေ။ ထိုကဲ့သို့သော အခြေအနေမျိုးတွင် သူမအနေဖြင့် ဆက်လက် တံခါးပိတ်ကျင့်ကြံနေရန် မဖြစ်နိုင်တော့ပေ။ ဤအချိန်သည် လော့ထျန်းအဖွဲ့နှင့် လော့ချန်တို့အတွက် သူမကို အလိုအပ်ဆုံးအချိန် ဖြစ်မှန်း သူမ ကောင်းစွာ သိသည်။ ထို့ကြောင့် သူမ တုံ့ဆိုင်းခြင်းမရှိဘဲ ကျင့်ကြံဆင့် တည်ငြိမ်အောင် မလုပ်တော့ဘဲ ထျန်းလန်တောင်ထိပ်မှ ထွက်ခွာခဲ့ခြင်း ဖြစ်ပေသည်။

ရှန်ကုန်းဂိုဏ်းအား လော့ချန် (၈) ရက်ဆက်တိုက် တိုက်ခိုက်နေခဲ့သည်ဟူသော သတင်းကို ရရှိသောအခါ သူမ လူအင်အားကို စုစည်းကာ ဤနေရာသို့ ချက်ချင်း အပြေးအလွှား လာခဲ့ခြင်း ဖြစ်သည်။ ကံကောင်းထောက်မစွာဖြင့် မည်သည့်ဆိုးရွားသော ကိစ္စရပ်မျှ ဖြစ်ပွားမသွားခဲ့ပေ။

"အဖွဲ့ချုပ်ခေါင်းဆောင်.... ဒီတစ်ကြိမ် တိုက်ပွဲကရတဲ့ ပစ္စည်းတွေနဲ့ ပတ်သက်ပြီးတော့...."

သူမ စကားစလိုက်သည်။

လော့ချန်က လက်တစ်ဖက်ကို မြှောက်လိုက်ရင်း သူမ၏ စကားကို ဖြတ်လိုက်ကာ

"ငါတို့ ပြန်ရောက်တဲ့အခါမှပဲ သေသေချာချာ စာရင်းတွက်ကြတာပေါ့"

စီမာဟွေ့နန် ခေါင်းညိတ်လိုက်၏။ စစ်သုံ့ပန်းပစ္စည်းများ စာရင်းပြုစုရခြင်းသည် အမြဲ ရှုပ်ထွေးလှပြီး လော့ချန် ဤကဲ့သို့သော ကိစ္စရပ်များ ကိုင်တွယ်ရခြင်းကို မနှစ်သက်မှန်း သူမ သိသည်။ သို့သော်လည်း အရေးကြီးဆုံး ကိစ္စအချို့ကိုမူ သူမ ဆက်လက် တင်ပြရဦးမည် ဖြစ်သည်။

"ဒါဆိုရင် အဲဒီ ကျင့်ကြံသူနှစ်ယောက်ရဲ့ သိုလှောင်အိတ်တွေကိုကော ဘယ်လိုလုပ်မလဲရှင်"

ထိုသိုလှောင်အိတ်များတွင် ဝိညာဉ်အသိစိတ်ဖြင့် တံဆိပ်ခတ်နှိပ်မှုများ ရှိနေသည်။ ၎င်းတို့၏ ပိုင်ရှင်များ သေဆုံးသွားခဲ့လျှင်ပင် ထိုတံဆိပ်များကို ဖယ်ရှားရန် အချိန်ယူရမည်ဖြစ်ပြီး ချီသန့်စင်အဆင့် ကျင့်ကြံသူတစ်ဦးအနေဖြင့် ထိုအရာကို မပြုလုပ်နိုင်ပေ။ ဝိညာဉ်အသိစိတ် ရှိသော အခြေတည်အဆင့်ကျင့်ကြံသူတစ်ဦးသာလျှင် ထိုအိတ်များအား ဖွင့်လှစ်နိုင်မည် ဖြစ်သည်။

လော့ချန် တုံ့ဆိုင်းခြင်း မရှိခဲ့ပေ။ သူ ကြိုတင်စီစဉ်ထားပြီး ဖြစ်သည်။

"မင်လုံယွီက ဒီတိုက်ပွဲမှာ အကြီးမားဆုံး စွမ်းဆောင်နိုင်ခဲ့တဲ့သူပဲ…. ကျန်တဲ့ဆုလာဘ်တွေကိုတော့ နောက်မှ ငါတို့ ရှင်းကြတာပေါ့…. အခုလောလောဆယ်တော့ ရှန်ကုန်းဂိုဏ်းအကြီးအကဲရဲ့ အိတ်ကို သူ့ကို ပေးလိုက်ပါ…. ရှန်ကုန်းဂိုဏ်းအကြီးအကဲကလည်း အစီအရင်ပညာရှင်တစ်ယောက်ဆိုတော့ မင်လုံယွီ အဲ့ဒီအိတ်ကို သဘောကျလိမ့်မယ်"

စီမာဟွေ့နန် ခေါင်းညိတ်လိုက်၏။ သူမသည်လည်း မင်လုံယွီ၏ မလျှော့သော ဇွဲလုံ့လဖြင့် စွမ်းဆောင်ခဲ့မှုများကို ကြားသိထားပြီး ဖြစ်သည်။ မင်လုံယွီသည် လက်ရှိတွင် လော့ထျန်းအဖွဲ့ရှိ မြောက်မြားစွာသော ကျင့်ကြံသူများ၏ လေးစားမှုကို ရရှိနေလေပြီ။

"ပြီးတော့ ဖေးချန်းချူးရဲ့ အိတ်ကိုတော့.... အင်း.... အဲဒါကို ငါ့ကိုပေးပါ၊ ငါ့ဘာသာငါပဲ ကိုင်တွယ်လိုက်မယ်"

ထို့နောက် သူ စီမာဟွေ့နန်ကို ကြည့်ရင်း ခပ်တိုးတိုး လေသံဖြင့်

"အဲဒီအိတ်ထဲမှာ အခြေတည်ဆေးလုံး တစ်လုံးထက်မက ရှိနေလောက်တယ်”

စီမာဟွေ့နန် အလိုလို ခေါင်းညိတ်လိုက်မိသော်လည်း တစ်စုံတစ်ခု ထူးဆန်းနေသကဲ့သို့ ခံစားလိုက်ရသည်။

လော့ချန် ထပ်မံ၍ မရှင်းပြတော့ပေ။ ထိုအစား သူမကို အပြင်သို့ ထွက်ခွာရန် အချက်ပြလိုက်တော့သည်။

သူမ ထွက်ခွာသွားပြီးသည့်အခါမှ သူ ရွှေမီးဓားကို ထုတ်ယူလိုက်၏။ ဤမှော်ရတနာသည် အခြားသူများအတွက်ဆိုလျှင် ထူးထူးခြားခြား စွမ်းအားကြီးမားလှသည်တော့ မဟုတ်ပေ။ အများစုက ၎င်းကို မီရှုဟွာ တစ်ခါက လေလံပွဲတွင် ဝယ်ယူခဲ့သော ကောင်းကင်လမင်း ခရမ်းရောင်ရွှေဘီးထက်ပင် အဆင့်နိမ့်သည်ဟု ယူဆကြသည်။ အခြားသော ကျော်ကြားလှသည့် အခြေတည်အဆင့် ကျင့်ကြံသူများ၏ လက်နက်များနှင့် နှိုင်းယှဉ်လျှင်လည်း ထင်ရှားသော အားသာချက် မရှိသယောင် ထင်ရပေသည်။ သို့သော်လည်း လော့ချန်ကမူ အဆင့်တူ ပြိုင်ဘက်များနှင့် တိုက်ခိုက်ရပါက ဤရတနာဖြင့် သူ အပြတ်အသတ် အနိုင်ရရှိနိုင်မည်ဟု ယုံကြည်ချက် အပြည့်ရှိနေသည်။

"အရင်က ဒီမှော်ရတနာကိုထိန်းချုပ်နိုင်မှုက လေးဆယ်ရာခိုင်နှုန်းလောက်မှာပဲ ရှိခဲ့တာ၊ ဒါပေမဲ့ အခုဆိုရင် ခြောက်ဆယ်ရာခိုင်နှုန်းအထိ မြင့်တက်သွားပြီ"

ဤတိုးတက်မှုမှာ အလွန်ပင် ကြီးမားလှသည်။ စွမ်းအင် အလုံအလောက်ရှိပါက ထိုဓား၏ စွမ်းအား ခြောက်ဆယ်ရာခိုင်နှုန်းကို ထုတ်သုံးနိုင်သည်။ ပုံမှန်အားဖြင့် အခြေတည်နှောင်းပိုင်းအဆင့် ကျင့်ကြံသူကြီးများပင် ခုနစ်ဆယ် သို့မဟုတ် ရှစ်ဆယ်ရာခိုင်နှုန်းခန့်သာ ထုတ်သုံးနိုင်ကြပြီး ၎င်းသည်လည်း သူတို့၏ ကျင့်ကြံမှုနှင့် ချီစွမ်းအင် သိပ်သည်းဆပေါ်တွင် များစွာ မူတည်ပေသည်။ လော့ချန်ကို ပိုမိုအားသာစေသည့်အချက်မှာ ထိန်းချုပ်နိုင်စွမ်းပင် ဖြစ်သည်။ အင်အားနှင့် အရှိန်အဟုန်ကိုသာ အားကိုးကြသော အခြားကျင့်ကြံသူများနှင့် မတူဘဲ သူသည် ထိုဓားကို သိမ်မွေ့နက်နဲစွာဖြင့် စိတ်တိုင်းကျ ထိန်းချုပ်နိုင်သည်။ ဤကဲ့သို့သော ကျွမ်းကျင်မှုသည် လက်တွေ့စစ်တလင်းတွင် ပိုမို၍ အသုံးဝင်လှပေသည်။ သူ အဆင့်တူ ဖေးချန်းချူးကို တိုက်ကွက်တစ်ကွက်တည်းဖြင့် အနိုင်ယူနိုင်ခဲ့ခြင်းက သက်သေပင် ဖြစ်သည်။

"အစီအရင်ကို အသုံးချပြီး မှော်ရတနာကို အဆင့်မြှင့်ရတာ.... တကယ့်ကို ပျော်စရာ ကောင်းတာပဲ"

လော့ချန် ရေရွတ်လိုက်မိရင်း သူ၏ နှုတ်ခမ်းဖျားတွင် ကျေနပ်သော အပြုံးတစ်ခု ပေါ်လာသည်။

"ငါသာ မီးနဂါးကိုးဖြာ အစီအရင်ကို ဆက်ပြီး အသုံးပြုနိုင်မယ်ဆိုရင်...."

ထိုအတွေးဖြင့် သူ ခပ်တိုးတိုး ရယ်မောလိုက်မိသည်။ သို့သော်လည်း လောကကြီးသည် မည်သည့်အခါမျှ ထိုမျှအထိ ရက်ရောလေ့ မရှိပေ။ တိုက်ပွဲအတွင်း အစီအရင်ကို ထိန်းသိမ်းထားရန်အတွက် သူသည် နှစ်ပေါင်းများစွာ စုဆောင်းခဲ့ရသော အဆင့်လတ် ဝိညာဉ်ကျောက် အားလုံးနီးပါးကို သုံးခဲ့ရခြင်း ဖြစ်သည်။ မင်လုံယွီ ပြင်ဆင်ပေးခဲ့သော အစီအရင် ပစ္စည်းများနှင့် ပေါင်းစပ်လိုက်လျှင် စုစုပေါင်း ကုန်ကျစရိတ်သည် တစ်သိန်းကျော်လွန်သွားခဲ့ပြီ ဖြစ်သည်။ သူ မည်မျှပင် ကြွယ်ဝချမ်းသာပါစေ၊ ဤကဲ့သို့သော ဖြတ်လမ်းနည်းကို ထပ်မံအသုံးပြုရန်မှာ မဖြစ်နိုင်တော့ပေ။ သို့သော်လည်း ရွှေမီးဓားသည် ယခုအခါ ခြောက်ဆယ်ရာခိုင်နှုန်းအထိ သန့်စင်ပြီး ဖြစ်ရာ သူ၏ လက်ရှိ လိုအပ်ချက်များအတွက် လုံလောက်သည်ထက်ပင် ပိုနေခဲ့လေပြီ။ ဤတစ်ကြိမ် တိုးတက်မှုသည် သူ့အား ဆယ်စုနှစ်ပေါင်းများစွာ ကြိုးပမ်းရမည့် အားထုတ်မှုများကို သက်သာသွားစေခဲ့သည်။

လော့ချန်သည် ရွှေမီးဓား၏ ပူနွေးသော ဓားရိုးကို လက်ချောင်းများဖြင့် ပွတ်သပ်နေမိရင်း သူ၏ အကြည့်သည် အဝေးသို့ ရောက်ရှိသွားသည်။ တိုက်ပွဲများ၊ ဖရိုဖရဲ အခြေအနေများ၊ ကျော်ကြားလာမှုများနှင့် အာဏာတည်ဆောက်ခြင်းများမှာ ယခုမူ လုံလောက်သွားပြီဖြစ်သည်။ နောက်ခြေလှမ်းကမူ ယခုအကြိမ် တိုက်ပွဲများမှရလာသည့် အကျိုးအမြတ်အားလုံးကို အပြည့်အဝ အသုံးချရန်သာ ဖြစ်သည်။ အကယ်၍ ဤအရင်းအမြစ်များအားလုံးကို အစွမ်းကုန် အသုံးချနိုင်ခဲ့လျှင် သူ၏ စွမ်းအားနှင့် လော့ထျန်းအဖွဲ့၏ အင်အားသည် လုံးဝ အဆင့်သစ်တစ်ခုသို့ တက်လှမ်းသွားနိုင်မည် ဖြစ်သည်။

အတိတ်ကာလကဆိုလျှင် ဤကဲ့သို့သော ဖြစ်စဉ်များသည် အမြဲ ဘေးအန္တရာယ်များနှင့် ပြည့်နှက်နေတတ်ပြီး မမြင်ရသော ရန်သူများ၏ ခြိမ်းခြောက်မှု အရိပ်မည်းများက လွှမ်းမိုးထားတတ်သည်။ သို့သော်လည်း ယခုအခါ ထျန်းလန်နတ်ဘုရားမြို့တော်ကို ရေခဲခံတပ်က အုပ်ချုပ်ရန် သေချာသွားခဲ့ပြီဖြစ်ရာ ၎င်းက သူနှင့် လော့ထျန်းအဖွဲ့အတွက် အကောင်းဆုံးသော ပတ်ဝန်းကျင်ကို ဖန်တီးပေးထားခဲ့ပြီ ဖြစ်ပေသည်။

....

လှေပျံပေါ်တွင် စီမာဟွေ့နန်သည် စစ်သုံ့ပန်းပစ္စည်းများကို စာရင်းပြုစုရင်း အလုပ်ရှုပ်နေခဲ့သည်။ သူမသည် တစ်ဖွဲ့ပြီးတစ်ဖွဲ့ ကူးပြောင်းသွားလျက် မေးမြန်းစုံစမ်းမှုများ ပြုလုပ်ကာ ဖြစ်ပျက်ခဲ့သမျှ ဖြစ်စဉ်အားလုံးကို အသေးစိတ် ပုံဖော်နေခဲ့သည်။ လော့ထျန်းအဖွဲ့ကြောင့် ပျက်စီးသွားခဲ့ရသော မျိုးနွယ်စုများနှင့် ဂိုဏ်းများတွင် ကျန်ရှိနေသေးသော မဟာမိတ်များ သို့မဟုတ် ပုန်းအောင်းနေသော ရန်သူများ ရှိနေနိုင်ပြီး၊ သူတို့ဘက်မှ တုံ့ပြန်ရန် အဆင်သင့် ဖြစ်နေနိုင်ပေသည်။ ဤစစ်ဆင်ရေး၏ ရိုက်ခတ်မှုသည် နက်ရှိုင်းလှပေသည်။

ယနေ့မှစ၍ မိမိတို့၏ ချဉ်းကပ်ပုံသည် တိုက်ပွဲအတွင်းကကဲ့သို့ ပြင်းထန်ခက်ထန်လွန်း၍ မရတော့ပေ။ ယခုလိုအပ်သည်မှာ သိမ်မွေ့မှုပင် ဖြစ်သည်။

လော့ထျန်းအဖွဲ့အနေဖြင့် ကျရှုံးသွားသော ဂိုဏ်းများ၏ ယခင်မဟာမိတ်များကို မည်သို့ ကိုင်တွယ်ဖြေရှင်းသင့်သနည်း။ ရန်သူအဖြစ် သတ်မှတ်ရမည်လော သို့မဟုတ် မဟာမိတ်အဖြစ် သိမ်းသွင်းရမည်လော။ ထို့ပြင် တန်ယွမ်ဂိုဏ်းနှင့် ထျန်းယင်းတောင်၏ ရန်သူဟောင်းများကိုရော မည်သို့ကိုင်တွယ်မည်နည်း။ ဤအောင်ပွဲကို အသုံးချပြီး ထိုဆက်ဆံရေးများကို ပြောင်းလဲပစ်နိုင်မည်လော သို့မဟုတ် မဟာမိတ်မဖြစ်လျှင်ပင် အနည်းဆုံး ကုန်သွယ်မှု တံခါးကို ဖွင့်လှစ်နိုင်မည်လော။

ဤအရာများအားလုံးကို စဉ်းစားနေစဉ်မှာပင် သူမ လော့ချန် ပြောခဲ့သော စကားတစ်ခွန်းကို ရုတ်တရက် သတိရမိသွားသည်။

"အဲဒီအိတ်ထဲမှာ အခြေတည်ဆေးလုံး တစ်လုံးထက်မက ရှိနေလောက်တယ်”

‘ဒါပေမဲ့ အဖွဲ့ချုပ်ခေါင်းဆောင်က အဲ့အိတ်ကို ဖွင့်တောင်မဖွင့်ရသေးဘူးလေ၊ သူ ဘယ်လိုလုပ် သိနေရတာလဲ’

သူမ မျက်မှောင်ကြုတ်လိုက်မိရင်း လုပ်လက်စအလုပ်များကို ခေတ္တရပ်တန့်လိုက်သည်။ ရှန်ကုန်းဂိုဏ်း၏ နှစ်ပေါင်းတစ်ရာကျော် သမိုင်းကြောင်းအရ အိတ်ထဲတွင် အခြေတည်ဆေးလုံး တစ်လုံး သို့မဟုတ် နှစ်လုံးမျှ အရန်သင့် ရှိနေခြင်းသည် ပုံမှန်ဖြစ်နိုင်သော်လည်း ထိုထက် ပိုမိုများပြားရန်မှာ မဖြစ်နိုင်ပေ။

‘ဒါဆိုရင် ခေါင်းဆောင်က ဘာဖြစ်လို့ အများကြီး ရှိနေတယ်လို့ အရိပ်အမြွက် ပြောခဲ့ရတာလဲ၊ သူ ဘာကို ဆိုလိုချင်တာလဲ....’

သူမ၏ ဦးနှောက်ထဲသို့ ရုတ်တရက် အဖြေတစ်ခု ရောက်ရှိလာခဲ့သည်။

"ဪ.... သတင်းတစ်ခု ဖန်တီးဖို့ကိုး"

စီမာဟွေ့နန်တစ်ယောက် လော့ချန်၏ ရည်ရွယ်ချက်ကို ချက်ချင်း သဘောပေါက်သွားတော့သည်။ သူသည် အပြင်လူများအား လော့ထျန်းအဖွဲ့တွင် အခြေတည်ဆေးလုံး မြောက်မြားစွာ ရှိထားသည်ဟု ယုံကြည်သွားစေလိုခြင်း ဖြစ်သည်။ ထိုသို့ပြုလုပ်ခြင်းဖြင့် အကယ်၍ နောင်တွင် လော့ထျန်းအဖွဲ့မှ အခြေတည် ကျင့်ကြံသူများ ထပ်မံထွက်ပေါ်လာခဲ့လျှင် ၎င်းသည် အလွန် ကျိုးကြောင်းဆီလျော်သော ကိစ္စတစ်ခု ဖြစ်သွားပေလိမ့်မည်။

ဤခန့်မှန်းချက်သည် လော့ချန် လုပ်ဆောင်တတ်သော ပုံစံနှင့် လုံးဝ ကိုက်ညီလှပေသည်။ သူသည် မည်သည့်အရာကိုမဆို မလုပ်ဆောင်မီ အမြဲ အစီအစဉ် ကြိုတင်ချမှတ်လေ့ ရှိသူ ဖြစ်သည်။ ဖူမျိုးနွယ်စုကို မတိုက်ခိုက်မီ သတင်းအမှားများ လွှင့်ခဲ့ခြင်း ဖြစ်စေ၊ ရှောင်ဟွမ်းတောင်တိုက်ပွဲမတိုင်မီ နန်ကုန်းကျင်း၊ တာကျန်းဂိုဏ်းနှင့် လီမျိုးနွယ်စုတို့ကို မဟာမိတ်အဖြစ် သိမ်းသွင်းခဲ့ခြင်းဖြစ်စေ လော့ချန်သည် အမြဲတမ်း ဇာတ်ညွှန်းကို ကြိုတင်ပြင်ဆင်လေ့ ရှိသူဖြစ်သည်။

သို့သော်လည်း ဤကဲ့သို့သော အစီအစဉ်များ ဆွဲထားပြီးသည့်နောက်တွင် လော့ထျန်းအဖွဲ့မှ အခြေတည် ကျင့်ကြံသူများ အမှန်တကယ် ထပ်မံထွက်ပေါ်လာနိုင်ပါ့မည်လော။ ထိုအရာမှာ မည်မျှအထိ ခက်ခဲမှန်း သူမထက် သိသူ မရှိပေ။ ချီသန့်စင်အဆင့်ကျင့်ကြံသူများ အထူးသဖြင့် ပါရမီညံ့ဖျင်းလှသော တစ်ကိုယ်တော်ကျင့်ကြံသူများအနေဖြင့် အဆင့်တက်လှမ်းနိုင်ရန်အတွက် မြောက်မြားစွာသော အခြေတည်ဆေးဝါးများ လိုအပ်ပေသည်။ သူမကိုယ်တိုင် အဆင့်တက်လှမ်းနိုင်ခဲ့ခြင်းသည်လည်း လော့ချန်၏ အပြည့်အဝ ကူညီပံ့ပိုးပေးမှုကြောင့်သာ ဖြစ်သည်။ လော့ချန်သာ မရှိခဲ့လျှင် ဤမျှလောက် ချောမွေ့လွယ်ကူခဲ့မည် မဟုတ်ပေ။

သို့သော်လည်း အခြေတည်ဆေးလုံးများနှင့် အလားတူ ဆေးဝါးများကို မည်သည့်နေရာမှ လွယ်လွယ်ကူကူ ရရှိနိုင်မည်နည်း။ ထျန်းလန်နတ်ဘုရားမြို့တော်ရှိ လေလံပွဲများသည် ဆယ်နှစ်မှ တစ်ကြိမ်သာ ကျင်းပလေ့ရှိပြီး ထိုအချိန်တွင် ထွက်ပေါ်လာသော ဆေးလုံးများသည်လည်း အင်အားစု မြောက်မြားစွာကြားတွင် ခွဲဝေယူကြရခြင်း ဖြစ်သည်။ တစ်ဖက်တွင်လည်း မှောင်ခိုဈေးကွက်အတွင်း၌ အခြေတည်ဆေးလုံးများသည် အလွန် အရောင်းသွက်သော ပစ္စည်းများဖြစ်ရာ ပေါ်လာသည်နှင့်တစ်ပြိုင်နက် မိုးထိုးသော ဈေးနှုန်းများဖြင့် ချက်ချင်း ရောင်းကုန်သွားလေ့ရှိသည်။

ထိုသို့ဆိုလျှင် အဖြေမှာ ထျန်းလန်နတ်ဘုရားမြို့တော်လက်အောက်ရှိ ပိုမိုကြီးမားသော ဈေးမြို့တော်ကြီးများတွင် ရှိနေမည်လော။ သို့သော်လည်း လော့ထျန်းအဖွဲ့၏ သြဇာအာဏာသည် ထိုမျှအထိ မကျယ်ပြန့်သေးပေ။ အဖွဲ့ချုပ်ခေါင်းဆောင်တွင် အခြေတည်အဆင့် ဆေးဝါး မြောက်မြားစွာကို ရရှိနိုင်မည့် အထူး လမ်းကြောင်းတစ်ခုသာ ရှိနေလျှင်မူ ခြွင်းချက်ဖြစ်သည်။

စီမာဟွေ့နန်သည် ဤဖြစ်နိုင်ခြေရှိသော အဖြေတစ်ခုတည်းကိုသာ တွေးမိနေတော့သည်။

"စီမံခန့်ခွဲရေးမှူး.... ကျွန်တော်တို့ ဒန်ရှားတောင်ကို ရောက်တော့မယ်"

ရွှီရှောင်လျို၏ အသံက သူမ၏ အတွေးများကို ဖြတ်တောက်ပစ်လိုက်သည်။

သူမသည် စိမ်းလန်းစိုပြည်ပြီး သက်ဝင်လှုပ်ရှားနေသော တောင်ကြီးကို တစ်ချက် လှမ်းကြည့်လိုက်ရင်း သက်ပြင်းရှည်ကြီးတစ်ချက်ကို ချလိုက်မိသည်။ သူမအနေဖြင့် လော့ချန် ဘာကို လိုလားနေမှန်း ကောင်းစွာ သဘောပေါက်သွားခဲ့လေပြီ။ သတင်းအချက်အလက်ကို အပြင်သို့ ပျံ့အောင် ပြုလုပ်ရန် လိုအပ်ခြင်း ဖြစ်သည်။ ကျန်ရှိနေသော ကိစ္စရပ်များမှာမူ သူမအနေဖြင့် ဝင်ရောက်စွက်ဖက် မေးမြန်းနေစရာ မလိုချေ။

မိမိ၏ တာဝန်ကို ကောင်းစွာ နားလည်သွားသည့်အတွက် သူမအနေဖြင့် စိတ်ပေါ့ပါးသွားသည်။ သူမ လက်ကို ဝှေ့ယမ်းရင်း အမိန့်ပေးလိုက်သည်။

"လှေဆင်းဖို့ ပြင်ကြ"

လော့ချန်နှင့် သူ၏စွန့်စားခန်းများ