အခန်း ၂၀၈

208

"ငါကိုယ်တိုင်လည်း တစ်ချိန်က မဟာရှမင်းနိုင်ငံရဲ့ အထူးတပ်ဖွဲ့ဝင်တစ်ယောက် ဖြစ်ခဲ့ဖူးတာဆိုတော့ အဲဒီအထူးတပ်ဖွဲ့တွေရဲ့ အလေ့အထနဲ့ လှုပ်ရှားပုံတွေကို ကောင်းကောင်းကြီး သိတာပေါ့"

ခွေးရူးသည် ထိုအချက်ကို အလွန်အမင်း ရှင်းလင်းစွာ သဘောပေါက်ထား၏။

ထို့ကြောင့်လည်း K2 အဖွဲ့အစည်းက သူ့အား ဤတာဝန်အတွက် စေလွှတ်ခဲ့ခြင်း ဖြစ်သည်။

"ချစ်သူများကျွန်းက အနောက်တောင်စစ်ဌာနချုပ်နဲ့ နီးတယ်၊ အကယ်၍ သူတို့က အထူးတပ်ဖွဲ့တွေ စေလွှတ်မယ်ဆိုရင် ဘယ်အဖွဲ့ ဖြစ်နိုင်မလဲ၊ ဝံပုလွေအစွယ်လား၊ လင်းယုန်လား၊ ကျားရဲလား ဒါပေမဲ့လည်း အရေးမကြီးပါဘူး၊ အားလုံးက ငါ့လက်ထဲမှာ ရှုံးနိမ့်ခဲ့ဖူးတဲ့ အရှုံးသမားတွေပါပဲ"

ခွေးရူး၏ မျက်ဝန်းများက အေးစက်ခက်ထန်သွားသည်။

ယခင်က သူသည် တရုတ်နိုင်ငံတွင် အထူးတပ်ဖွဲ့ဝင်တစ်ဦး ဖြစ်ခဲ့စဉ်က ဤအထူးတပ်ဖွဲ့များနှင့် တိုက်ခိုက်ဖူးပြီး ဖြစ်ကာ နောက်ဆုံးတွင် သူကသာ အပြတ်အသတ် အနိုင်ရရှိ၍ သူတို့ကို နှိမ်နင်းခဲ့ဖူး၏။

"မင်းတို့ သေချာ စောင့်ကြည့်ထား၊ သူတို့ ထွက်လာတာနဲ့ ချက်ချင်း အပြတ်ရှင်းပစ်”

ခွေးရူးက အမိန့်ပေးလိုက်သည်။

"ဟုတ်ကဲ့ပါ"

သူ၏ နောက်လိုက်လူမိုက်က အမိန့်ကို နာခံပြီး ထွက်ခွာသွားခဲ့သည်။

ထို့နောက် ခွေးရူးသည် စကားပြောစက်ကို ကောက်ကိုင်လိုက်၏။

“နံပါတ် ၁၃ မင်းတို့ အဲဒီလူကို တွေ့ပြီလား”

ဤလူမိုက်များတွင် အမည်နာမဟူ၍ မရှိကြဘဲ သင့်တော်သော လျှို့ဝှက်အမည်ပင် မရှိကြချေ။

ထို့ကြောင့် သူတို့ကို ဂဏန်းနံပါတ်များဖြင့်သာ ရိုးရှင်းစွာ ကိုယ်စားပြုထားခြင်း ဖြစ်သည်။

"မရှိသေးပါဘူး၊ ကျွန်တော်တို့ တစ်ထပ်ချင်းစီကို သေချာစစ်ဆေးလာတာ အခု တစ်ထပ်ပဲ ကျန်ပါတော့တယ်၊ အခု အဲဒီကို သွားဖို့ ပြင်နေပါတယ်"

"တစ်ထပ်ပဲ ကျန်တော့တာလား၊ ဒါဆိုရင် သူ အဲဒီအထပ်မှာ ရှိနေတာ သေချာပြီပေါ့၊ ကျောက်ဟိုင်ရှန့်လည်း ဒီအထပ်မှာပဲ ရှိနေမှာ သေချာတယ်၊ ဒီတော့ အဲဒီကောင်ကို သတ်ပစ်၊ ပြီးရင် ကျောက်ဟိုင်ရှန့်ကို ပြန်ခေါ်ခဲ့၊ ကြားလား”

"ဟုတ်ကဲ့ပါ ခွေးရူး"

နံပါတ် ၁၃ က ပြန်လည်ဖြေကြားပြီးနောက် မိမိ၏ လက်အောက်ခံများကို အမိန့်ပေးလိုက်သည်။

"မင်းတို့ သုံးယောက် ရှေ့ကနေ လမ်းရှင်းစမ်း"

သို့သော်လည်း နောက်တစ်ခဏတွင်မူ လျှပ်တပြတ်အတွင်း ပြင်းထန်လှသော သေနတ်သံများ ဆက်တိုက်ဆိုသလို ထွက်ပေါ်လာခဲ့သည်။

*ဒိုင်း ဒိုင်း ဒိုင်း ဒိုင်း*

လှေကားထောင့်၌ လမ်းရှင်းရန် ရှေ့ကသွားသော လူသုံးဦးမှာ စက္ကန့်ပိုင်းအတွင်း သေနတ်ကျည်ဆန်များ ထိုးဖောက်ဝင်ရောက်သွားသဖြင့် မြေပြင်ပေါ်သို့ လဲကျသေဆုံးသွားခဲ့ရ၏။

"တောက် အဲဒီကောင် ဒီမှာတင် ရှိနေတာပဲ၊ မြန်မြန် ပြန်ပစ်ကြ"

နံပါတ် ၁၃ က အော်ဟစ်လိုက်သည်။

စကားပြောစက်၏ အခြားတစ်ဖက်တွင်မူ ခွေးရူး၏ မျက်နှာအမူအရာမှာ အလွန်အမင်း ပျက်ယွင်းသွားခဲ့သည်။

သူသည် တစ်ဖက်မှ ထွက်ပေါ်လာသော အသံများကို အာရုံစိုက်၍ အသေအချာ နားစွင့်နေသော်လည်း စကားလုံးများကို ရှင်းလင်းစွာ မကြားရဘဲ ဆက်တိုက်ထွက်ပေါ်နေသည့် သေနတ်သံများကိုသာ ကြားနေရ၏။

‘ငါလွှတ်လိုက်တဲ့ လူဆယ်ယောက်ကတော့ သူ့ကို အေးဆေး ရှင်းလင်းနိုင်မှာပါ’

ခွေးရူးက မိမိစိတ်ကိုမိမိ ပြန်တင်းရင်း တွေးတောနေမိသော်လည်း စိတ်ထဲ၌ မရေရာသော မလုံခြုံမှုဝေဒနာတစ်ခု တိုးဝင်လာခဲ့သည်။

အခြားတစ်ဖက်ရှိ တိုက်ပွဲသည် ငါးမိနစ်ခန့် ကြာမြင့်ခဲ့ပြီး သေနတ်သံများမှာ လုံးဝ မပြတ်တမ်း ထွက်ပေါ်နေခဲ့ခြင်း ဖြစ်၏။

ခွေးရူးသည် ချက်ချင်းပင် ခက်ထန်စွာဖြင့် မေးလိုက်သည်။

"တိုက်ပွဲအခြေအနေ ဘယ်လိုလဲ၊ ဘာလို့ အခုထိ အဲဒီကောင်ကို အလဲမသိပ်နိုင်သေးတာလဲ၊ အသုံးမကျလိုက်တာ”

သူ့လေသံက ပြစ်တင်ဝေဖန်မှုများဖြင့် ပြည့်နှက်နေသည်။

ငါးမိနစ်အပြည့် ကြာသွားပြီ ဖြစ်သော်လည်း ယခုထိ အနိုင်မရသေးသဖြင့် ဒေါသထွက်နေမိ၏။

ဤလူဆယ်ဦးထဲမှ တစ်ဦးချင်းစီသည် အထူးတပ်ဖွဲ့ဝင်အဆင့် ရှိသူများ ဖြစ်ကြသည်။

အကယ်၍ အထူးတပ်ဖွဲ့ဝင် ဆယ်ဦးက လူတစ်ယောက်ကို မနိုင်ဘူးဆိုလျှင် ထိုလူ၏ အင်အားက မည်မျှ အစွမ်းထက်နေသနည်းဟု စဉ်းစားရပေတော့မည်။

သူက အထူးတပ်ဖွဲ့ဝင်များ၏ ဘုရင်များ ဖြစ်နေ၍လား၊ မဖြစ်နိုင်ချေ။

"မဟုတ်ဘူး အစ်ကိုကြီး၊ ကျွန်တော်တို့ဘက်က အကျအဆုံး များလွန်းတယ်၊ အခု ကျွန်တော်တို့ လေးယောက်ပဲ ကျန်တော့တယ်၊ ခြောက်ယောက်ကတော့ ပွဲချင်းပြီး သေသွားပြီ၊ အဲဒီလူလည်း ကျွန်တော်တို့ကြောင့် ဒဏ်ရာရထားတယ်၊ ဒါပေမဲ့ သူက ဒဏ်ရာက သွေးတွေထွက်နေတာတောင် လှုပ်ရှားမှုက အံ့သြစရာကောင်းလောက်အောင် မြန်ဆန်နေတုန်းပဲ အစ်ကိုကြီး”

တိုက်ပွဲအတွင်း နံပါတ် ၁၃ သည် အလောတကြီးဖြင့် ပြောဆိုနေရပြီး သူ့လေသံတွင်လည်း ကြောက်ရွံ့တုန်လှုပ်မှု အရိပ်အယောင်များ အထင်းသား ထင်ဟပ်နေသည်။

ခွေးရူးသည် နံပါတ် ၁၃ ၏ ပြောစကားကို အသေအချာ နားစွင့်နေရင်း အခြေအနေမှာ တစ်ခုခု မှားယွင်းနေပြီဆိုသည်ကို ရိပ်မိလိုက်၏။

ဒါ ဘယ်လို ရူးကြောင်ကြောင်ကွက်လဲ၊ လူဆယ်ယောက်တောင် ရှိသည်ကို အချိန်အတော်ကြာသည့်အထိ ဤလူတစ်ယောက်ကို မကိုင်တွယ်နိုင်ကြဘူး ဟုတ်လား။

"မဖြစ်နိုင်ဘူး၊ ငါတို့ သူ့ကို ဒီအတိုင်း ဆက်လွှတ်ထားရင် ငါတို့ အားလုံး အပြတ်ရှင်းခံရလိမ့်မယ်၊ ငါကိုယ်တိုင်ပဲ လာခဲ့တော့မယ်"

နောက်ဆုံးတွင် ခွေးရူးသည် သူကိုယ်တိုင် ဝင်ရောက်ကိုင်တွယ်ရန် ဆုံးဖြတ်လိုက်ပြီး ဟိုတယ်လော်ဘီ ဧည့်ခန်းမကြီး ဖြစ်သည့် ဤနေရာကို စောင့်ကြပ်ရန်အတွက်မူ စိတ်ချရသော လူနှစ်ဦးသာ ချန်ထားခဲ့တော့သည်။

ထိုလူနှစ်ဦးတွင် သေနတ်များ ရှိနေသောကြောင့် မြေပြင်ပေါ်တွင် ဝပ်နေကြရသည့် လူများထဲမှ မည်သူမျှ မလှုပ်ရဲကြပေ။

အဆုံးစွန်၌ သူတို့တွင် စက်သေနတ်များ ရှိနေသဖြင့် မည်သူမဆို မတ်တပ်ထရပ်ရန် ကြိုးပမ်းပါက စက္ကန့်ပိုင်းအတွင်း ကျည်ဆန်မိုးရွာပြီး အသက်ပျောက်သွားမည် ဖြစ်၏။

ထို့ပြင် ထိုလူနှစ်ဦးသည် ဝပ်နေကြရသော လူနှစ်ရာခန့် ထိုးဖောက်မသွားနိုင်စေရန်အတွက် မဟာဗျူဟာကျကျ နေရာယူထားကြခြင်း ဖြစ်သည်။

ခွေးရူးအပါအဝင် ဟိုတယ်လော်ဘီတွင် စောင့်ကြပ်ရန် စုစုပေါင်း တစ်ဆယ့်ငါးဦး ရှိ၏။

အခြားလူငါးဦးမှာမူ လေဝင်လေထွက်လမ်းကြောင်းရှိ အထူးတပ်ဖွဲ့ဝင်များကို စောင့်ကြပ်ရန် သွားရောက်ကြပြီး ဖြစ်သည်။

သူတို့သည် လက်နက်အပြည့်အစုံ တပ်ဆင်ထားကြပြီး သူတို့၏ တစ်ခုတည်းသော ရည်ရွယ်ချက်မှာ ချင်ရန်ကို သတ်ပစ်ရန်ပင်။

ခွေးရူးကိုယ်တိုင် ပါဝင်ပတ်သက်လာခြင်းမှာ သာမန်အခြေအနေတစ်ခုတော့ မဟုတ်ပေ။

သူ့အင်အားက သံသယဖြစ်ဖွယ်မရှိ အစွမ်းထက်လွန်းလှသည်။

သူသည် တစ်ချိန်က တရုတ်နိုင်ငံ၏ အထူးစစ်သည်တော်ဘုရင် ဖြစ်ခဲ့ဖူးပြီး တရုတ်နိုင်ငံ၏ အထူးတပ်ဖွဲ့ဝင်တစ်ဦးချင်း စွမ်းရည်ပြိုင်ပွဲတွင် အဆင့်သုံး ရရှိခဲ့ဖူးသူ ဖြစ်ရာ ကမ္ဘာတစ်လွှား၌ နာမည်ကျော်ကြားခဲ့သူ ဖြစ်ခဲ့၏။

နောက်ပိုင်းတွင်မူ မျှော်လင့်မထားသော အခြေအနေအချို့ကြောင့် သူသည် K2 ထံသို့ ဘက်ပြောင်းခိုလှုံခဲ့သည်။

K2 တွင် ရှိနေသည့် နှစ်ပေါင်းများစွာအတွင်း ခွေးရူးသည် သူ့လက်များကို သွေးအိုင်ထဲ၌ နှစ်စိမ်ထားခဲ့ပြီး သူ၏ မိခင်နိုင်ငံသား မြောက်မြားစွာကို သတ်ဖြတ်ခဲ့၏။

စစ်ဆင်ရေးတာဝန်အချို့တွင် ခွေးရူးသည် တရုတ်နိုင်ငံ၏ အထူးတပ်ဖွဲ့ဝင်တစ်ဦးအဖြစ် ဟန်ဆောင်ကာ သူတို့၏ ယုံကြည်မှုကို ရယူပြီးနောက် သူတို့အား နောက်ကျောမှ ဓားဖြင့်ထိုး၍ အခြေအနေကို ပြောင်းပြန်လှန်ပစ်ခဲ့သည်မှာ အကြိမ်ကြိမ်ပင် ဖြစ်သည်။

ဤကဲ့သို့သော စစ်ဆင်ရေးမျိုး အမြောက်အမြား ရှိခဲ့ဖူးပြီး သူသည် ရေတွက်၍မရနိုင်သော ရာဇဝတ်မှုများကို ကျူးလွန်ခဲ့သူ ဖြစ်၏။

သို့သော်လည်း ခွေးရူးသည် ကမ္ဘာပေါ်တွင် သူ့အား မည်သူမျှ အပြစ်ပေးနိုင်မည်မဟုတ်ဟု ယုံကြည်ထားသည်။

အကြောင်းမှာ သူသည် ထူးကဲလှသော တစ်ကိုယ်ရေအင်အားရှိသည့် ထိပ်တန်းစစ်သည်တော်တစ်ဦး ဖြစ်သောကြောင့်ပင်။

ယခုအချိန်တွင် သူသည် ချင်ရန်အား ဖမ်းဆီးရန် သူ့လူများကို ဦးဆောင်လာခဲ့ပြီး အောင်မြင်လိမ့်မည်ဟုလည်း ခွေးရူးက ချက်ချာ တွက်ဆထားသည်။

ထိုအချိန် ဟိုတယ်လော်ဘီ ဧည့်ခန်းမဆောင်၏ မြေပြင်ပေါ်တွင် ဝပ်နေသော ကျန်းရှောင်ရှောင်သည် သူမ ခေါင်းကို အသာအယာ မော့ကြည့်လိုက်သည်။

သူမအနေဖြင့် ခုနက စကားပြောသံများထဲမှ အချို့ကို ကြားညှပ်၍ ကြားလိုက်ရ၏။

ဤလူစုသည် အလွန်အမင်း အစွမ်းထက်သော ပြိုင်ဘက်တစ်ဦးနှင့် ရင်ဆိုင်နေရပြီး လူအမြောက်အမြား စေလွှတ်ခဲ့သော်လည်း ထိုသူကို မနှိမ်နင်းနိုင်ဘဲ ဖြစ်နေကြသည်ဟူသော စကားပင် ဖြစ်သည်။

ထိုအခါ ကျန်းရှောင်ရှောင်သည် စိတ်ထဲမှ မတွေးဘဲ မနေနိုင်တော့ချေ။

သူတို့ပြောနေသည့် အစွမ်းထက်လူသည် ချင်ရန်မှလွဲ၍ အခြား မည်သူ ဖြစ်နိုင်ဦးမည်နည်း။

‘ရှင် ကျွန်မတို့ကို ကယ်တင်ဖို့အတွက် သေချာပေါက် အသက်ရှင်ပြီး ပြန်လာနိုင်မှာပါ၊ ဟုတ်တယ်မလား’

ကျန်းရှောင်ရှောင်၏ ဘေးပတ်လည်တွင် အလောင်းများစွာ ရှိနေပြီး သူတို့ခန္ဓာကိုယ်များမှာ သွေးများဖြင့် ရွှဲရွှဲစိုနေသည်။

‘သူ သေချာပေါက် အသက်ရှင်လျက် ပြန်လာပြီး ငါတို့ကို ကယ်တင်ရမယ်’

ကျန်းရှောင်ရှောင်က စိတ်ထဲမှ တီးတိုး ဆုတောင်းနေမိသည်။

တစ်ချိန်တည်းမှာပင် ချင်ရန် ရှိနေသည့် အထပ်၌မူ ချင်ရန်၏ တစ်ကိုယ်လုံးတွင် သွေးများဖြင့် နီရဲနေပြီး သူ့အရှေ့တွင်မူ K2 အဖွဲ့အစည်း၏ အဖွဲ့ဝင် ဆယ်ဦးစလုံး လဲလျောင်း သေဆုံးနေကြပြီ ဖြစ်သည်။

ရှိသမျှ ဉာဏ်ရော ခွန်အားပါ သုံးစွဲလိုက်ရသဖြင့် ချင်ရန်၏ မျက်နှာအမူအရာမှာ အနည်းငယ် ဖြူလျော်နေ၏။

အကြောင်းမှာ သူ့ခန္ဓာကိုယ်၌ နေရာတစ်ခုထက်မက သေနတ်များ မှန်ထားသောကြောင့် ဖြစ်သည်။

သို့သော် ကံကောင်းထောက်မစွာဖြင့် မည်သည့်ကျည်ဆန်မျှ အသက်အန္တရာယ်ဖြစ်စေနိုင်သော နေရာကို ထိမှန်ခဲ့ခြင်း မရှိသေးချေ။

ချင်ရန်သည် သူ့အဝတ်များကို ဆုတ်ဖြဲကာ ဒဏ်ရာကို ရိုးရှင်းစွာ စည်းနှောင်လိုက်ပြီး သွေးတိတ်အောင် ပြုလုပ်နိုင်ခဲ့သော်လည်း လတ်ဆတ်သော သွေးများမှာမူ တစိမ့်စိမ့် ဆက်လက် စီးထွက်နေဆဲ ဖြစ်၏။

‘ဒီလူတွေက တကယ်ကို အစွမ်းထက်တာပဲ’

ချင်ရန်သည် အသက်ကို ခက်ခက်ခဲခဲ ရှူရှိုက်နေရပြီး သူ့မျက်ဝန်းများတွင် ထိတ်လန့်တုန်လှုပ်မှု အရိပ်အယောင်အချို့ ပေါ်ပေါက်လာသည်။

ဒါက သူ ရင်ဆိုင်ခဲ့ဖူးသမျှထဲတွင် အင်အားအတောင့်တင်းဆုံး ပြိုင်ဘက်များ ဖြစ်၏။

ယခင်က သူ ရင်ဆိုင်ခဲ့ဖူးသော လီကွမ်တို့လို လူမျိုးမှာ ဤလူများနှင့် ယှဉ်လျှင် ဘာမှမဟုတ်ပေ။

ဤနေရာရှိ မည်သူမဆို လီကွမ်ကို အလွယ်တကူ အနိုင်ယူနိုင်စွမ်း ရှိကြသည်။

အကယ်၍ ခွေးရူးသာ ချင်ရန် တွေးလိုက်သည့် စကားကို ကြားလျှင် သူ့မျက်နှာကြွက်သားများ မည်မျှတောင် တုန်ခါသွားမည် မသိနိုင်ချေ။

ချင်ရန်က သူတို့၏ အင်အားကို အသိအမှတ်ပြုခဲ့သော်လည်း ဤ K2 အဖွဲ့ဝင် ဆယ်ဦးမှာ သူတို့အသက်ကို ရက်ရောစွာ လှူခဲ့ကြရပြီး ဘာများ ရရှိခဲ့သနည်း။

သူတို့သည် ချင်ရန်ကို ဒဏ်ရာရအောင်သာ လုပ်နိုင်ခဲ့ပြီး အမှန်တကယ် သတ်ပစ်နိုင်ခြင်း မရှိခဲ့ကြချေ။

ခွေးရူးသည် သူတို့၏ ခေါင်းဆောင်အဖြစ် သူတို့အား အစွမ်းထက်ဆုံး လူသတ်လက်နက်များ ဖြစ်လာစေရန် အားသွန်ခွန်စိုက် လေ့ကျင့်ပေးခဲ့ခြင်း ဖြစ်သော်လည်း အစွမ်းထက်ဆုံး လူသတ်လက်နက် ဆယ်ခုစလုံးကို ချင်ရန် တစ်ဦးတည်းကပင် တစ်ခဏအတွင်းမှာပင် အကုန်လုံးကို အပြတ်ရှင်းပစ်ခဲ့၏။

"ငါ ဒီမှာ ဆက်နေလို့ မဖြစ်ဘူး၊ ပြီးတော့ လာခဲ့တဲ့ လမ်းအတိုင်း ပြန်သွားလို့လည်း မရဘူး၊ ဒီတော့ အခြားတစ်နေရာကို သွားရမယ်"

ချင်ရန်သည် ခဏမျှ တွေးတောပြီးနောက် အခြားလမ်းကြောင်းတစ်ခုကို ရွေးချယ်လိုက်သည်။

သူ့လမ်းကြောင်းသည် လေဝင်လေထွက်လမ်းကြောင်းများနှင့် နီးကပ်လှ၏။

ထို့နောက် ချင်ရန်သည် အောက်ထပ်သို့ နှစ်ထပ်ခန့် ဆင်းလာခဲ့သည်။

ထိုစဉ် ရုတ်တရက် ချင်ရန်၏ အာရုံခံစနစ်အတွင်းသို့ ထူးခြားသော မြင်ကွင်းတစ်ခု တိုးဝင်လာခဲ့သည်။

ထိုနေရာတွင် လူခြောက်ဦးခန့် ရှိနေပြီး တရုတ်နိုင်ငံ၏ အထူးတပ်ဖွဲ့ စစ်ဝတ်စုံများကို ဝတ်ဆင်ထားကြသည့် လူတစ်စုပင် ဖြစ်၏။

သူတို့သည် လေဝင်လေထွက် ပိုက်လိုင်းအတွင်းမှတစ်ဆင့် တဖြည်းဖြည်း တိုးဝင်လာနေကြပြီး မကြာမီ အတွင်းသို့ ရောက်ရှိတော့မည် ဖြစ်သည်။

ဤသည်က အဓိကအချက်မဟုတ်သေးပေ။

ပို၍ အရေးကြီးသည်မှာ ထိုနေရာတွင် K2 အဖွဲ့ဝင် ငါးဦးသည် သားကောင်ကို ချောင်းမြောင်းနေသော မျက်ဝန်းများဖြင့် စောင့်ဆိုင်းနေကြခြင်းပင်။

ကြည့်ရသည်မှာ သူတို့သည် တရုတ်နိုင်ငံ၏ အထူးတပ်ဖွဲ့ဝင်များ လေဝင်လေထွက်လမ်းကြောင်းမှ ထွက်လာမည်ကို ကြိုတင်သိရှိနေကြသည့်အတိုင်းပင် ဖြစ်သည်။

ချင်ရန်၏ မျက်လုံးသူငယ်အိမ်များ ကျုံ့ဝင်သွားခဲ့သည်။

မဖြစ်ဘူး။

ဤ တရုတ်နိုင်ငံအထူးတပ်ဖွဲ့ဝင် ခြောက်ဦးမှာ အလွန်အမင်း အန္တရာယ်ကြီးမားသည့် အခြေအနေသို့ ဆိုက်ရောက်နေပြီ ဖြစ်သည်။

အကယ်၍ သူတို့သာ အပြင်သို့ ထွက်လာပါက တစ်ခဏအတွင်း အသက်ပျောက်သွားကြလိမ့်မည်။

မိခင်နိုင်ငံသားအချင်းချင်း ဖြစ်သည့်အတွက် ချင်ရန်အနေဖြင့် ဤအတိုင်း လက်ပိုက်ကြည့်နေမည် မဟုတ်ပေ။

ထို့ကြောင့် သူသည် ဒဏ်ရာရထားသော ခန္ဓာကိုယ်ကို တရွတ်တိုက်ဆွဲလျက် ခြေလှမ်းများကို အရှိန်မြှင့်တင်ကာ လေဝင်လေထွက်လမ်းကြောင်းဆီသို့ တည့်တည့်မတ်မတ် ဦးတည်လိုက်သည်။

သူသည် ထို K2 အဖွဲ့ဝင် ငါးဦးကို အပြတ်ရှင်းပစ်ပြီး မိခင်နိုင်ငံသားများကို ဘေးအန္တရာယ်မှ ကယ်တင်ရန် စိတ်ပိုင်းဖြတ်လိုက်တော့သည်။