အခန်း ၇၂၈

အခန်း (၇၂၈) - မူလဝိညာဉ် အရှင်သခင်ကြီးကို ပထမဆုံး သတ်ဖြတ်ခြင်း (အပိုင်း ၁)

ကျင့်ကြံသူတစ်ယောက်အတွက် ခန္ဓာကိုယ် ပျက်စီးသွားခြင်းက ဆိုးရွားပြင်းထန်လွန်းသော ထိုးနှက်ချက်ကြီးတစ်ခု ဖြစ်ပေ၏။ ဝိညာဉ်ခွဲထွက်အဆင့် အရှင်သခင်ကြီးတစ်ပါး ဖြစ်နေလျှင်တောင်မှ ခန္ဓာကိုယ် ဖျက်ဆီးခံလိုက်ရပါက စွမ်းဆောင်ရည် တစ်ဝက်ခန့် ကျဆင်းသွားမည် သေချာလှသည်။

မူလဝိညာဉ် အသွင်ဖြင့်သာ ဤလောကတွင် ဆက်လက်ရပ်တည်နေရခြင်းက အသက်တိုစေမည့်ကိစ္စ ဖြစ်လာတော့သည်။

အချိန်ကာလများ ကုန်လွန်လာသည်နှင့်အမျှ မူလဝိညာဉ်သည် ရုပ်ခန္ဓာကိုယ် ပျောက်ဆုံးသွားမှုကြောင့် တဖြည်းဖြည်း မှေးမှိန်လာပြီး နောက်ဆုံးတွင် ကျင့်ကြံခြင်းစွမ်းအားများ ကုန်ခမ်းသွားကာ သေဆုံးခြင်းဆီသို့ ဦးတည်သွားမည် ဖြစ်သည်။

ဤအခြေအနေသို့ ရောက်ရှိလာပါက အင်မော်တယ်လမ်းစဉ်ကို ဆက်လက်လျှောက်လှမ်းနိုင်ရန် လမ်းကြောင်းသုံးသွယ်သာ ကျန်ရှိတော့၏။

ပထမတစ်နည်းက သူတစ်ပါး၏ ခန္ဓာကိုယ်ကို လုယူခြင်း ဖြစ်သည်။

နောက်တစ်နည်းကတော့ တစ္ဆေကျင့်ကြံသူအဖြစ် ပြောင်းလဲသွားခြင်းပင်တည်း။

တာ့ချန် ကျင့်ကြံခြင်းကမ္ဘာတွင် တစ္ဆေကျင့်ကြံသူတို့၏ ကျင့်စဉ်အမွေအနှစ်များမှာ အလွန်တရာ ရှားပါးလှပေ၏။ လညွှန်နန်းတော်၏ ဘိုးဘေးကြီးအနေဖြင့် ထိုတစ္ဆေကျင့်ကြံခြင်း အမွေအနှစ်ကို ရှာဖွေတွေ့ရှိရန် ခက်ခဲကြမ်းတမ်းသော ခရီးလမ်းကို ရွေးချယ်မည်လား ဆိုသည်ကို စုယွီ မသိပါချေ။

သို့သော်ငြားလည်း သူမသည် တစ္ဆေကျင့်စဉ်ဆီသို့ ကူးပြောင်းသွားခဲ့မည်ဆိုပါက တာ့ချန် ကျင့်ကြံခြင်းကမ္ဘာကြီးက သူမအား လက်ခံတော့မည် မဟုတ်ပေ။

ထို့ကြောင့် တစ္ဆေကျင့်ကြံသူအဖြစ် ပြောင်းလဲမည့် လမ်းစဉ်မှာ လညွှန်နန်းတော်၏ ဘိုးဘေးကြီး ရွေးချယ်မည့် လမ်းကြောင်း မဖြစ်နိုင်ချေ။

နောက်ဆုံးကျန်ရှိနေသော လမ်းကြောင်းကတော့ ခန္ဓာကိုယ်ကို ပြန်လည်ကြီးထွားလာစေနိုင်မည့် ရတနာတစ်ပါးပါးကို ရှာဖွေခြင်း သို့မဟုတ် ခန္ဓာကိုယ်ကို ပြန်လည်မွေးဖွားလာစေနိုင်သည့် အဆင့်မြင့်ကျင့်စဉ်တစ်ခုကို ကျင့်ကြံခြင်းတို့ပင် ဖြစ်တော့သည်။

ခန္ဓာကိုယ်ကို ပြန်လည်ရှင်သန်လာစေနိုင်သည့် ရတနာများအကြောင်းကို ရှေးဟောင်းမှတ်တမ်းများတွင် စုယွီ မြင်ဖူးခဲ့သော်လည်း မကြာသေးမီ နှစ်များအတွင်း သေမျိုးလောက၏ မှတ်တမ်းများတွင် ထိုသို့သော ရတနာမျိုးကို တစ်ခါမျှပင် မတွေ့မြင်ခဲ့ဖူးပါချေ။

နိဗ္ဗာန်ဖြစ်စဉ်မှတစ်ဆင့် ခန္ဓာကိုယ်ကို ပြန်လည်မွေးဖွားလာစေနိုင်သော ကျင့်စဉ်များနှင့် ပတ်သက်၍မူ စုယွီကိုယ်တိုင်က ထိုသို့သော ကျင့်စဉ်တစ်ခုကို ကျင့်ကြံထားသူ ဖြစ်ပေသည်။

ကောင်းကင်ဖီးနစ် နိဗ္ဗာန် ကျင့်စဉ် ပင်တည်း။

၎င်းမှာ ရှေးဟောင်း ဖီးနစ်ငှက်ကြီး၏ နှလုံးနှင့် အသည်းတို့အပေါ် အခြေခံထားသော လျှို့ဝှက်ဆန်းကြယ်သည့် ရှေးဟောင်းကျင့်စဉ်တစ်ခု ဖြစ်ပြီး နိဗ္ဗာန်ဖြစ်စဉ်၏ နတ်ဘုရားစွမ်းရည် သက်ရောက်မှုများကို ပိုင်ဆိုင်ထားသည်။ ခန္ဓာကိုယ် ပျက်စီးသွားလျှင်တောင်မှ အစိတ်အပိုင်း အနည်းငယ်မျှ ကျန်ရှိနေသေးသရွေ့ ဤနိဗ္ဗာန်ဖြစ်စဉ်အရ ပြန်လည်မွေးဖွားလာကာ ခန္ဓာကိုယ်သစ်တစ်ခုအဖြစ် ကြီးထွားလာနိုင်စွမ်း ရှိပေ၏။

လညွှန်နန်းတော်၏ ဘိုးဘေးကြီးအနေဖြင့် ဤလျှို့ဝှက်ဆန်းကြယ်သော ကျင့်စဉ်ကို ကျင့်ကြံနိုင်လိမ့်မည်ဟု စုယွီ မထင်ပါချေ။ ဤကျယ်ပြောလှသော ကျင့်ကြံခြင်းကမ္ဘာကြီး တစ်ခုလုံးတွင် ကောင်းကင်ဖီးနစ် နိဗ္ဗာန် ကျင့်စဉ်ကို ကျင့်ကြံနိုင်မည့် ဒုတိယမြောက်လူ ရှိနိုင်ပါ့မလား ဆိုသည်ကပင် မေးခွန်းထုတ်စရာ ဖြစ်နေတော့သည်။

“ဒါဆိုရင် သူ့အတွက် ရွေးချယ်စရာ တစ်လမ်းပဲ ကျန်တော့တယ်... သူတစ်ပါးရဲ့ ခန္ဓာကိုယ်ကို လုယူဖို့ပဲ”

စုယွီက တီးတိုးရေရွတ်လိုက်သည်။

သူ၏ မျက်လုံးများအတွင်း၌ ရွှေရောင်အလင်းတန်းတစ်ခုက သိပ်သည်းတောက်ပလာ၏။

ထိုအခိုက်အတန့်မှာပင် သူ၏ ဝိညာဉ်သည် ရွှေရောင် ပုစဉ်းရင်ကွဲ တစ်ကောင်အဖြစ်သို့ ပြောင်းလဲသွားပြီး သူ၏ မျက်လုံးများက နက်နဲပြီး လျှို့ဝှက်ဆန်းကြယ်သော အလင်းတန်းများ တလက်လက် တောက်ပလျက် လညွှန်နန်းတော်ဆီသို့ စူးစိုက်ကြည့်ရှုလိုက်တော့သည်။

တောင်တန်းများ၊ ထူထပ်သော သစ်တောကြီးများ၊ လျှို့ဝှက်ဆန်းကြယ်သည့် မြူခိုးများနှင့် လညွှန်နန်းတော်၏ အခင်းအကျင်း အခင်းအကျင်းကြီးများပင်လျှင် ရွှေရောင် ပုစဉ်းရင်ကွဲ၏ နတ်ဘုရားစွမ်းရည်များဖြင့် ထိုးဖောက်စစ်ဆေးမှုကို မခံနိုင်ကြပါချေ။

လညွှန်နန်းတော် အတွင်းရှိ အင်မော်တယ် စံအိမ်တိုင်း၊ နန်းဆောင်များ၊ လသာဆောင်များ၊ မျှော်စင်ခန်းမများနှင့် ကျင့်ကြံနေကြသော တပည့်များ၊ အကြီးအကဲများ၏ ပုံရိပ်များပင် စုယွီ၏ မျက်လုံးများထဲတွင် ထင်ဟပ်လာခဲ့သည်။

လက်ဖက်ရည် တစ်ခွက်စာ အချိန်ခန့် ကြာပြီးနောက်။

လညွှန်နန်းတော် အတွင်းရှိ ပေထောင်ချီ မြင့်မားသော တောင်တံခါးကြီးတစ်ခု၏ တောင်ထွတ်တစ်ခု အတွင်း၌ စုယွီသည် အလွန်တရာ ဖုံးကွယ်ထားသော အခင်းအကျင်း လျှို့ဝှက်နယ်မြေ တစ်ခုကို ရှာဖွေတွေ့ရှိသွား၏။ ထိုနေရာတွင် သူသည် သူ၏ နတ်ဘုရားစွမ်းရည်များမှတစ်ဆင့် ဟင်းလင်းပြင် အတားအဆီးများကိုပင် ချိုးဖျက်၍ အရာအားလုံးကို ထွင်းဖောက်မြင်တွေ့နေရတော့သည်။

ဤအခင်းအကျင်း လျှို့ဝှက်နယ်မြေမှာ မကြီးမားလှဘဲ အခန်းငယ်တစ်ခုစာခန့်သာ အရွယ်အစားရှိကာ စိုစွတ်နေသော ကျောက်တုံးနံရံများဖြင့် ဝန်းရံထားသည်။ အထက်ရှိ မျက်နှာကြက်တွင် အက်ကွဲကြောင်းများ ပြည့်နှက်နေပြီး နေရာအနှံ့အပြားမှ ကျောက်စက်ပန်းဆွဲများ တွဲလောင်းကျနေပါ၏။

အောက်ဘက်တွင်မူ အကျယ် နှစ်ပေပင် မပြည့်သော ရေကန်ငယ်လေးတစ်ခု ရှိနေသည်။

အခင်းအကျင်း လျှို့ဝှက်နယ်မြေမှာ မယုံနိုင်လောက်အောင် ထူထပ်သည့် မြူခိုးများဖြင့် ဖုံးလွှမ်းနေပြီး ရေကန်ငယ် အတွင်း၌မူ စိမ်းဖျော့ဖျော့ အလင်းရောင်များ တောက်ပနေသည့် နို့နှစ်ရောင် ဝိညာဉ်အရည်များက ကန်တစ်ခုလုံးကို ပြည့်လျှံနေစေတော့သည်။

ရေကန်၏ အလယ်ဗဟိုတွင် ဆီးနှင်းကဲ့သို့ ဖြူဝေးသော အသားအရေ ရှိသည့် အမျိုးသမီး တစ်ဦးက ခြေချိတ်ထိုင်နေပြီး သူမ၏ မျက်နှာအမူအရာမှာ ခံစားချက်ကင်းမဲ့နေကာ သူမ၏ ခန္ဓာကိုယ်ပေါ်တွင် အဝတ်အစား တစ်စမျှပင် ဖုံးလွှမ်းထားခြင်း မရှိပါချေ။

သူမ၏ ခန္ဓာကိုယ်မှ ကြီးမြတ်ပြီး နက်နဲလှသော အငွေ့အသက်များ ဖြာထွက်နေကာ အခင်းအကျင်း လျှို့ဝှက်နယ်မြေ တစ်ခုလုံးကို ဖုံးလွှမ်းသွားစေ၏။

ဤအငွေ့အသက်သည် မူလဝိညာဉ်နယ်ပယ် အထွတ်အထိပ်အဆင့်နှင့် ဝိညာဉ်ခွဲထွက်အဆင့်၏ ပထမအလွှာတို့အကြားတွင် အတက်အကျ ဖြစ်ပေါ်နေပြီး တစ်ခါတစ်ရံတွင် ပိုမိုအားကောင်းလာကာ တစ်ခါတစ်ရံတွင်မူ အားနည်းသွားတတ်သည်။

အမျိုးသမီး၏ ခန္ဓာကိုယ်မှ မှေးမှိန်သော၊ သန့်စင်မွန်မြတ်သည့် အလင်းရောင်တစ်ခုက တလက်လက် တောက်ပနေပြီး သူမ၏ ပခုံးပေါ်သို့ ကျဆင်းနေသော ဆံကေသာများကပင် စူးရှတောက်ပသော အလင်းရောင်များဖြင့် ဝင်းလက်နေတော့သည်။

သေမျိုးလောကသို့ ကျဆင်းလာသော အင်မော်တယ် တစ်ပါးကဲ့သို့ပင် သူမသည် လောကီအညစ်အကြေးများနှင့် ကင်းစင်နေလေ၏။

ထိုအခိုက်အတန့်တွင် အမျိုးသမီးသည် သူမ၏ ကျင့်စဉ်ကို လည်ပတ်စေကာ ရေကန်အတွင်းရှိ ဝိညာဉ်အရည်၏ စွမ်းအားများကို သန့်စင်နေပြီး ဤခန္ဓာကိုယ်ကို ခိုင်မာတောင့်တင်းစေရန်နှင့် ၎င်း၏ ကျင့်ကြံခြင်းအဆင့်ကို တိုးတက်လာစေရန် လုပ်ဆောင်နေခဲ့သည်။

သို့သော်ငြားလည်း ထိုစဉ်၌ အမျိုးသမီး၏ မျက်ခုံးများက အနည်းငယ် တွန့်ချိုးသွားပြီး သူမ၏ ကျင့်ကြံခြင်း အခြေအနေမှ ဖြည်းညင်းစွာ ထွက်ပေါ်လာတော့သည်။

သူမက မျက်လုံးများကို ဖွင့်လိုက်ရာ အေးစက်ပြီး ရေခဲတမျှ အေးစက်သော အကြည့်များက တောက်ပလာကာ ပတ်ဝန်းကျင်ကို အကဲခတ် ကြည့်ရှုလိုက်သည်။

ယခုလေးတင် သူမ၏ စိတ်ထဲတွင် ရုတ်တရက် ဂနာမငြိမ် ဖြစ်သွားသကဲ့သို့ ခံစားလိုက်ရပြီး သူမ၏ တံခါးပိတ် ကျင့်ကြံခြင်းကို အနှောင့်အယှက် ဖြစ်စေခဲ့၏။

သို့ရာတွင် သူမ မျက်လုံးများကို ဖွင့်လိုက်သည့် အခိုက်အတန့်၌ ထိုဂဏာမငြိမ်ဖြစ်သော ခံစားချက်မှာ စိတ်ကူးယဉ် အာရုံချောက်ချားမှုတစ်ခုမျှသာ ဖြစ်ခဲ့သကဲ့သို့ ပျောက်ကွယ်သွားခဲ့တော့သည်။

'တစ်ယောက်ယောက်ကများ လညွှန်နန်းတော်ကို ပစ်မှတ်ထားနေတာလား...'

သူမ၏ နှလုံးသားထဲတွင် သံသယဖြစ်ဖွယ် အတွေးတစ်ခု ပေါ်လာသည့်အခိုက် သူမ၏ နတ်ဘုရားအာရုံက အခင်းအကျင်း လျှို့ဝှက်နယ်မြေ၏ အပြင်ဘက်သို့ ထိုးဖောက်ဝင်ရောက်သွားကာ လညွှန်နန်းတော် တစ်ခုလုံးနှင့် နန်းဆောင်၏ အပြင်ဘက်ရှိ ကမ္ဘာကြီးအထိပါ ရှာဖွေစူးစမ်းလိုက်သည်။

အချိန်အနည်းငယ် ကြာပြီးနောက် သူမသည် မည်သည့် ထူးဆန်းမှုမျိုးကိုမျှ ရှာမတွေ့ခဲ့ပါချေ။

အပြင်ဘက်ရှိ လညွှန်နန်းတော်တွင်လည်း မည်သည့် အပြောင်းအလဲမျှ မရှိပေ။

သို့ဆိုလျှင် အဘယ်ကြောင့် သူမ၏ စိတ်ထဲတွင် ရုတ်တရက် ဂဏာမငြိမ် ဖြစ်သွားရသနည်း။

ထိုခံစားချက်မှာ တစ်ခဏမျှသာ လင်းလက်သွားသော ဂဏာမငြိမ်ဖြစ်မှု တစ်ခုသာ ဖြစ်နေခြင်းက ထူးဆန်းနေတော့သည်။

အမျိုးသမီးသည် ခေတ္တမျှ ဇဝေဇဝါ ဖြစ်သွားခဲ့ပြီး အပြင်ဘက်တွင် မည်သည့် လှုပ်ရှားမှုမျှ မရှိဘဲ တစ်နာရီခန့် ကုန်လွန်သွားပြီးနောက်မှသာ သူမ၏ သတိထားနေမှုကို အနည်းငယ် လျှော့ချလိုက်ကာ ညင်သာစွာ သက်ပြင်းချလိုက်တော့သည်။

“ငါပဲ အတွေးလွန်သွားတာ ဖြစ်မယ်...”

သူမက ခြေချိတ်၍ ပြန်ထိုင်လိုက်ပြီး တရားအားထုတ်ခြင်းထဲသို့ ဝင်ရောက်သွားကာ ဤခန္ဓာကိုယ်ကို သူမကိုယ်ပိုင် ဖြစ်လာစေရန် သူမ၏ ကျင့်စဉ်ကို နောက်တစ်ဖန် လည်ပတ်စေလိုက်ပြန်၏။

အကြီးအကဲ ဇီရှင်းဖူက သူမအား တိုက်ခိုက်ကာ သူမ၏ ခန္ဓာကိုယ်ကို ဖျက်ဆီးပစ်ခဲ့ပြီး သူမ၏ မူလဝိညာဉ်ကိုပင် ပြင်းထန်စွာ ဒဏ်ရာရစေခဲ့ကတည်းက သူမသည် ဤလျှို့ဝှက်နယ်မြေထဲတွင် နေထိုင်ကာ ကျင့်ကြံခြင်းဖြင့် သူမ၏ ဒဏ်ရာများကို ကုသနေခဲ့ခြင်း ဖြစ်သည်။

ဤခန္ဓာကိုယ်နှင့် ပတ်သက်၍မူ ၎င်းသည် လွန်ခဲ့သော နှစ်သုံးဆယ်နီးပါးခန့်က လညွှန်နန်းတော်မှ ပျောက်ဆုံးသွားခဲ့သော တာအိုမျိုးစေ့ ထျန်းယွဲ့၏ ခန္ဓာကိုယ်ပင် ဖြစ်တော့သည်။

ထျန်းယွဲ့၏ မူလကျင့်ကြံခြင်း အဆင့်မှာ မူလဝိညာဉ်နယ်ပယ်၏ အဆင့် (၃) တွင်သာ ရှိသော်လည်း သူမက လှည့်စားကာ သူ၏ ခန္ဓာကိုယ်ကို လုယူပြီးနောက်တွင် ၎င်းကို မူလဝိညာဉ်နယ်ပယ် အထွတ်အထိပ်အဆင့် ကျော်လွန်သည်အထိ အတင်းအဓမ္မ မြှင့်တင်ပစ်ခဲ့သည်။

သူမ၏ လက်ရှိခွန်အားသည် မူလဝိညာဉ်နယ်ပယ် အထွတ်အထိပ်အဆင့်နှင့် ဝိညာဉ်ခွဲထွက်အဆင့်၏ ပထမအလွှာတို့အကြား တစ်နေရာတွင် ရှိနေ၏။

သို့ရာတွင် ဤအမှတ်၌ ခန္ဓာကိုယ် လုယူခြင်း၏ အားနည်းချက်က ထွက်ပေါ်လာခဲ့ချေပြီ။

သူမ၏ မူလဝိညာဉ်သည် ဤခန္ဓာကိုယ်သစ်နှင့် ပြီးပြည့်စုံစွာ မပေါင်းစပ်နိုင်ခဲ့ပါချေ။

အကယ်၍ သူမသည် ဤခန္ဓာကိုယ်သစ်ကို ဝိညာဉ်ခွဲထွက်အဆင့် အခြေအနေသို့ ပြန်လည်ရောက်ရှိစေလိုပါက သူမအနေဖြင့် ၎င်းကို တဖြည်းဖြည်းချင်း အနည်းငယ်စီ ပြုပြင်မွမ်းမံပြီး သူမကိုယ်တိုင်နှင့် ပြီးပြည့်စုံစွာ ပေါင်းစပ်နိုင်သည့် ခန္ဓာကိုယ် တစ်ခုအဖြစ် ပြောင်းလဲပစ်ရန်သာ တတ်နိုင်ပြီး ၎င်းမှာ အတိုင်းအတာ တစ်ခုအထိတော့ ဖြစ်နိုင်ခြေ ရှိပေ၏။

ထို့အပြင် သူမ၏ မူလဝိညာဉ် အတွင်းရှိ ဒဏ်ရာများမှာ သူမသည် အင်မော်တယ်တစ်သောင်း နန်းတော်ထံမှ မူလဝိညာဉ်ကို ကုသပေးနိုင်သည့် အဆင့် (၅) အသက်ကယ်ဆေးလုံး အချို့ကို ရရှိထားခဲ့သော်ငြား ဒဏ်ရာများကို တည်ငြိမ်စေရုံမျှသာ တတ်နိုင်ခဲ့သည်။