အခန်း ၇၂၉

အခန်း (၇၂၉) - မူလဝိညာဉ် အရှင်သခင်ကြီးကို ပထမဆုံး သတ်ဖြတ်ခြင်း (အပိုင်း ၂)

သူမအနေဖြင့် မည်သည့်အချိန်တွင် အပြည့်အဝ နာလန်ထူလာမည် ဆိုသည်ကို မသိနိုင်သေးချေ။

ဤအခြေအနေများအောက်တွင် သူမ တတ်နိုင်သမျှက ဤကျဉ်းမြောင်းလှသော အခင်းအကျင်း လျှို့ဝှက်နယ်မြေအတွင်း၌သာ တံခါးပိတ် ကျင့်ကြံနေရန်ပင် ဖြစ်တော့သည်။ သူမ၏ ခန္ဓာကိုယ်သစ်နှင့် မူလဝိညာဉ်ကို ခိုင်မာတောင့်တင်းစေရန်၊ ကျင့်ကြံခြင်းအဆင့်ကို မြှင့်တင်ရန်အတွက် အပြင်သို့ ထွက်ခွာနိုင်ခြင်း အလျဉ်းမရှိခဲ့ပေ။

ထိုအကြောင်းကို တွေးမိလိုက်သည်နှင့် တစ်ချိန်က သန့်စင်မွန်မြတ်လှပါသည်ဆိုသော လညွှန်နန်းတော် ဘိုးဘေးကြီး၏ မျက်နှာထက်တွင် အမုန်းတရားတို့က အထင်းသား ပေါ်လွင်လာခဲ့သည်။

“ကြယ်ခူးမျှော်စင်က သရဲအိုကြီး...”

အင်မော်တယ်တစ်သောင်း နန်းတော်အနေဖြင့် ကြယ်ခူးမျှော်စင်ကို လိုအပ်နေသေးသည့် အချက်ရယ်၊ ကြယ်ခူးမျှော်စင်ကလည်း သူမ၏ လညွှန်နန်းတော်အပေါ် သစ္စာခံထားပြီးဖြစ်သည့် အချက်ရယ်သာ မရှိပါက သူမအနေဖြင့် ခန္ဓာကိုယ် ဖျက်ဆီးခံလိုက်ရသည့် အမုန်းတရားများကို ဖြေဖျောက်ရန် ကြယ်ခူးမျှော်စင် တစ်ခုလုံးကို အမြစ်ပြတ် ချေမှုန်းပစ်လိုက်ချင်မိသည်အထိပင်။

ရင်တွင်းမှ အမုန်းတရားများကို ဖိနှိပ်လိုက်ပြီးနောက် လညွှန်နန်းတော်၏ ဘိုးဘေးကြီးသည် သူမ၏ ကျင့်ကြံခြင်းကို ဆက်လက် လည်ပတ်စေလိုက်တော့သည်။

လညွှန်နန်းတော်နှင့် မိုင်ငါးဆယ်ခန့် အကွာအဝေးတွင်မူ စုယွီသည် 'ယင်' အင်မော်တယ် စာလုံး၏ အစွမ်းဖြင့် သူ၏ ခြေရာလက်ရာများကို ဖုံးကွယ်ထားခဲ့ပြီး လညွှန်နန်းတော် ဘိုးဘေးကြီး၏ နတ်ဘုရားအာရုံ ပျောက်ကွယ်သွားမှသာ စိတ်အေးလက်အေး နေနိုင်တော့၏။

ကံကောင်းထောက်မစွာဖြင့် သူမက သူ့အား ရှာမတွေ့ခဲ့ပါချေ။

သို့သော်ငြားလည်း ဝိညာဉ်ခွဲထွက်အဆင့် အရှင်သခင်ကြီး တစ်ပါးကို လှမ်း၍ အကဲခတ်ခြင်းက ထိုအရှင်သခင်ကြီးမှာ ပြင်းထန်စွာ ဒဏ်ရာရထားလျှင်တောင်မှ တစ်စုံတစ်ခု မှားယွင်းနေကြောင်းကို သူမအား ခံစားသိရှိသွားစေခဲ့သည်။

စုယွီ၏ ယခင်က ကြိုတင်သတိထားမှုများမှာ မှန်ကန်ခဲ့ကြောင်း ပေါ်လွင်နေပေ၏။

မိမိထက် ပိုမိုစွမ်းအားကြီးမားသော ကျင့်ကြံသူများကို ရင်ဆိုင်ရချိန်တွင် မည်သည့်အခါမျှ ပေါ့ပေါ့တန်တန် မစစ်ဆေးသင့်ကြောင်း စုယွီက သူ့ကိုယ်သူ သတိပေးလိုက်သည်။ ဝိညာဉ်ခွဲထွက်အဆင့် အရှင်သခင်ကြီးများကို အလန့်တကြား မဖြစ်စေရန်နှင့် မိမိကိုယ်တိုင် အန္တရာယ်တွင်းသို့ မကျဆင်းစေရန်အတွက် သူသည် ရွှေရောင် ပုစဉ်းရင်ကွဲ မျက်လုံး ကျင့်စဉ် ဟူသော နတ်ဘုရားစွမ်းရည်ဖြင့် စူးစမ်းရှာဖွေခြင်းကို ရှောင်ကြဉ်ခဲ့ခြင်း ဖြစ်၏။

ယခုအခါတွင် သူ၏ လုပ်ရပ်မှာ မှန်ကန်ကြောင်း သက်သေပြနေချေပြီ။

မိမိထက် ကျင့်ကြံခြင်းအဆင့် များစွာမြင့်မားသူများကို ရင်ဆိုင်ရချိန်တွင် သူသည် အမြဲတမ်း သတိဝီရိယ ရှိနေသင့်ပေသည်။ သို့ဆိုလျှင် လညွှန်နန်းတော်ကို သူ မည်သို့ ရင်ဆိုင်သင့်သနည်း။

စုယွီက လညွှန်နန်းတော်၏ အခြားသော အစိတ်အပိုင်းများကို အကဲခတ်ကြည့်ရှုရင်း ဦးနှောက်ကို အလုပ်ပေးလိုက်သည်။

'လညွှန်နန်းတော် ဘိုးဘေးကြီးရဲ့ အသွင်အပြင်ကို ကြည့်ရတာ သူ့ တပည့် တစ်ယောက်ရဲ့ ခန္ဓာကိုယ်ကို လုယူထားတာများလား... တကယ့်ကို ရက်စက်ပြီး သွေးအေးလွန်းတယ်... ထာဝရအသက်ရှင်ရေး အတွက်နဲ့ ကိုယ့်တပည့်ကိုတောင် ချမ်းသာမပေးဘူးပဲ...'

သို့ရာတွင် ထိုအခိုက်အတန့်၌ စုယွီ၏ မျက်နှာပေါ်တွင် အေးစက်သော အပြုံးတစ်ခုက ဖျတ်ခနဲ ပေါ်လာခဲ့၏။

ခန္ဓာကိုယ် လုယူခြင်း လမ်းစဉ်ဆိုသည်မှာ လျှောက်လှမ်းရန် လွယ်ကူသော လမ်းတစ်ခု မဟုတ်ပါချေ။ တစ်ဖက်လူ၏ အသိစိတ်ကို အမြစ်ပြတ် ချေမှုန်းပစ်ရမည် ဖြစ်ပြီး ခိုသိုက်ကို ချိုးငှက်လုယူသကဲ့သို့ လုပ်ဆောင်ရခြင်းက သူမ၏ မူလဝိညာဉ် စွမ်းအားများကို သိသိသာသာ ကုန်ခမ်းသွားစေမည် ဖြစ်ကာ ကျင့်ကြံခြင်းအဆင့် ကျဆင်းသွားနိုင်သည့် ပြင်းထန်သော အန္တရာယ်လည်း ရှိနေပေသည်။

အောင်မြင်စွာ လုယူနိုင်ခဲ့လျှင်တောင်မှ မူလဝိညာဉ်က နေရာသစ်တစ်ခု ရရှိသွားသော်လည်း ၎င်း၏ အမြစ်များကို ပြန်လည်ရယူရဦးမည် ဖြစ်သည်။ ဤခန္ဓာကိုယ်သစ်က သူမ၏ မူလဝိညာဉ်အတွက် အချုပ်အနှောင်သစ် တစ်ခုလည်း ဖြစ်လာမည်။

လက်ရှိ လညွှန်နန်းတော်၏ ဘိုးဘေးကြီးကဲ့သို့ပင် သူ၏ ယခင်စောင့်ကြည့်မှုများအရ ဆိုရလျှင် သူမအား ဝိညာဉ်ခွဲထွက်အဆင့် အရှင်သခင်ကြီး တစ်ပါးဟု သတ်မှတ်၍ မရနိုင်တော့ချေ။ သူမသည် မူလဝိညာဉ်နယ်ပယ် အရှင်သခင် တစ်ပါးထက် ပိုမိုအားကောင်းနေနိုင်သော်ငြားလည်း သူမမှာ 'တစ်ဝက်တစ်ပျက် သန်စွမ်းသော ဝိညာဉ်ခွဲထွက်အဆင့် အရှင်သခင်ကြီး' တစ်ပါးသာ ဖြစ်နေတော့သည်။

ဤသို့သော အခြေအနေများအောက်တွင် လညွှန်နန်းတော်၏ ဘိုးဘေးကြီးပင်လျှင် ဝိညာဉ်ခွဲထွက်အဆင့်၏ ဝိညာဉ်ကိုယ်ပွားကို ထိန်းသိမ်းထားနိုင်မည် မဟုတ်ပါချေ။ ဤသည်ကို မည်သို့လျှင် ဝိညာဉ်ခွဲထွက်အဆင့် အရှင်သခင်ကြီးဟု ခေါ်ဆိုနိုင်ပါမည်နည်း။

ယခုအချိန်တွင် သူ အာရုံစိုက်ရန် လိုအပ်သည်မှာ လညွှန်နန်းတော်၏ အခင်းအကျင်း အခင်းအကျင်းကြီးနှင့် ဘိုးဘေးကြီး ကိုယ်တိုင် တည်ဆောက်ထားသော အဆင့် (၅) အခင်းအကျင်းကြီးတို့သာ ဖြစ်ပေသည်။ သူမအား ဟင်းလင်းပြင် တာအိုလမ်းစဉ်၏ တားမြစ်ချက်ကို ချိုးဖျက်ခွင့် လုံးဝမပေးနိုင်သကဲ့သို့ အခင်းအကျင်း၏ စွမ်းအားများကို အသက်သွင်းရန် သို့မဟုတ် ခုခံရန်အတွက် အခင်းအကျင်းကို ထိန်းချုပ်ခွင့်ကိုလည်း ပေး၍ မရနိုင်ပါချေ။

ထိုသို့မှမဟုတ်လျှင် အဆင့် (၅) အခင်းအကျင်းကို ဦးဆောင်နေမည့် သူမကို သူ ရင်ဆိုင်နိုင်မည် မဟုတ်ပေ။

“ဒါဆိုရင်တော့...”

စုယွီက အတွေးများကို လှုပ်ရှားစေလိုက်ရာ ကြေးအိုးငယ် တစ်လုံးက သူ၏ဘေးတွင် ပေါ်လာ၏။ တစ်ချိန်တည်းမှာပင် သူသည် ချီသန့်စင် အိုးကို ထုတ်ယူလိုက်ပြီး အနက်ရောင် ဒေါသစစ်သည်တော်ကို ထိန်းချုပ်ခွင့် ပေးလိုက်တော့သည်။ သူက ဟင်းလင်းပြင် ကြေးအိုးငယ်ကို လက်နှစ်ဖက်ဖြင့် ဆုပ်ကိုင်ထားလိုက်သည်။

စုယွီ အသံဖြင့် သတင်းစကား ပါးလိုက်သည်။

“ဒီတစ်ခါ ဘာကိုမှ ချန်မထားနဲ့... အတိုတောင်းဆုံး အချိန်အတွင်းမှာ သူမရဲ့ မူလဝိညာဉ်ကို သတ်ဖြတ်ပစ်ရမယ်...”

အတိတ်ကာလတုန်းက လညွှန်နန်းတော်၏ ဘိုးဘေးကြီးသည် တာ့ယွဲ့ နယ်မြေအပေါ် လှုပ်ရှားမှုတစ်ခု ပြုလုပ်ရန် အလိုရှိခဲ့ဖူး၏။ ကံကောင်းထောက်မစွာဖြင့် သူသည် ဤကိစ္စကို ကြိုတင်မြင်တွေ့ခဲ့ပြီး နတ်မိမယ် ဖုန်းလင် ဆိုသည့် မည်သူမည်ဝါမှန်း မသိသော အမည်သစ်ဖြင့် သူမအား ခြောက်လှန့် မောင်းထုတ်နိုင်ခဲ့သည်။

ထိုသို့သာ မလုပ်ခဲ့ပါက တာ့ယွဲ့ နယ်မြေတစ်ခုလုံး သူမ၏ ဖျက်ဆီးခြင်းကို ခံလိုက်ရမည် ဖြစ်ပေသည်။

ဤကြွေးမြီမှတ်တမ်းကို စုယွီက သူ၏ စိတ်နှလုံးထဲတွင် အမြဲမှတ်သားထားခဲ့လေ၏။ သူ၏ မိတ်ဆွေ မာရှီချင်နှင့် ပတ်သက်သည့် အဟောင်းနှင့် အသစ်သော ရန်ငြိုးရန်စများကိုပါ ပေါင်းထည့်လိုက်လျှင် အကြွေးတိုင်းကို မဖြစ်မနေ ပြန်လည်ပေးဆပ်စေရမည်လေ။

“ဝှစ်...”

ချီသန့်စင်အိုးကို ကိုင်ဆောင်ထားသော အနက်ရောင် ဒေါသစစ်သည်တော်က စုယွီကို ခေါင်းညိတ်ပြလိုက်သည့် အခိုက်အတန့်မှာပင် ဟင်းလင်းပြင် တာအိုလမ်းစဉ်၏ စွမ်းအားများက စုယွီထံသို့ စုစည်းလာကာ သူ့အား အနက်ရောင် ဒေါသစစ်သည်တော်နှင့်အတူ လွှမ်းခြုံသွားတော့သည်။ နောက်တစ်ခဏ၌ ဟင်းလင်းပြင် လှုပ်ခတ်မှုနှင့်အတူ သူတို့နှစ်ဦး၏ ပုံရိပ်များသည် မျက်စိတစ်မှိတ်အတွင်းမှာပင် ပျောက်ကွယ်သွားခဲ့သည်။

တခြားတစ်ဖက်တွင်မူ...

လညွှန်နန်းတော် တောင်တံခါးအဝင်ဝ၏ ဗဟိုချက်ရှိ အခင်းအကျင်း လျှို့ဝှက်နယ်မြေ တားမြစ်မြေအတွင်း၌ ဖြစ်၏။

ကျဉ်းမြောင်းသော နေရာလွတ်အတွင်း မယုံနိုင်လောက်အောင် တည်ငြိမ်နေသော ဟင်းလင်းပြင်သည် ရုတ်တရက် ပွင့်ထွက်သွားပြီး ပုံရိပ်နှစ်ခုက လျှပ်တစ်ပြက် ပေါ်လာကာ လညွှန်နန်းတော် ဘိုးဘေးကြီးနှင့် ဆယ်ပေပင်မဝေးသော ရေကန်အတွင်း၌ ရပ်တန့်သွားကြတော့သည်။

“ဝုန်း...”

ဟင်းလင်းပြင် လှုပ်ခတ်သွားသည့် အခိုက်အတန့်မှာပင် လညွှန်နန်းတော် ဘိုးဘေးကြီး၏ မျက်နှာက သိသိသာသာ ပြောင်းလဲသွားခဲ့သည်။ ကနဦးကတော့ သူမသည် ဂနာမငြိမ်မျှသာ ဖြစ်နေခဲ့ခြင်းပါပေ။

သို့သော် ဟင်းလင်းပြင် လှုပ်ခတ်သွားသည့် အချိန်၌ မူးဝေသွားစေသော သေမင်းတမန် ခြိမ်းခြောက်မှုကြီးက ရုတ်တရက် ကျဆင်းလာခဲ့ရာ သူမအား ဝိညာဉ်ခွဲထွက်အဆင့်သို့ ရောက်ရှိပြီးနောက်ပိုင်း ဒုတိယအကြိမ်မြောက် သေဆုံးခြင်း၏ ခြိမ်းခြောက်မှုကို ခံစားလိုက်ရစေတော့သည်။

အေးစက်စက် အငွေ့အသက်များက သူမ၏ ခန္ဓာကိုယ်ထဲသို့ စီးဝင်သွားပြီး သတိအနေအထားဖြင့် ကြောက်လန့်နေသော ကြောင်တစ်ကောင်ကဲ့သို့ ကျောချမ်းသွားကာ ကြက်သီးမွေးညင်းများပင် ထ,သွားခဲ့လေ၏။

“သေချင်နေတာ...”

'လား' ဟူသော စကားလုံး သူမ၏ ပါးစပ်မှ မထွက်ပေါ်လာမီမှာပင် ရင်တွင်း၌ လောင်မြိုက်နေသော ဒေါသမီးတောက်များက တဟုန်းဟုန်း တောက်လောင်လာခဲ့သည်။

အချိန်၊ ဟင်းလင်းပြင်၊ ဓာတ်ကြီးငါးပါး၊ ပုံရိပ်ယောင်နယ်ပယ်များအပြင် စုယွီ၏ အထက်ဘုံ သန့်စင်သော မူလတာအို နိယာမနှင့် ကောင်းကင်ဘုံ အင်မော်တယ် ခန္ဓာကိုယ် သန့်စင်ခြင်း ကျင့်စဉ်တို့က လက်တစ်ကမ်း အကွာအဝေးအတွင်းသို့ ပြင်းထန်စွာ ကျဆင်းလာခဲ့တော့၏။

အချိန် တာအိုနယ်ပယ်က လညွှန်နန်းတော် ဘိုးဘေးကြီး၏ တုံ့ပြန်မှုနှုန်းကို နှေးကွေးသွားစေသည်။

ဝိညာဉ်ခွဲထွက်အဆင့်နှင့် နီးကပ်နေပြီဖြစ်သော သူမ၏ ခန္ဓာကိုယ်စွမ်းအားများဖြင့်ပင်လျှင် ဟင်းလင်းပြင် တာအိုလမ်းစဉ်၏ ဖိနှိပ်မှုအောက်တွင် ဟင်းလင်းပြင် တားမြစ်ချက်ကို ချက်ချင်း မချိုးဖျက်နိုင်ခဲ့ပါချေ။

အသေးစား အောင်မြင်မှုအဆင့်သို့ ရောက်ရှိနေပြီဖြစ်သော ဓာတ်ကြီးငါးပါး တာအိုနယ်ပယ်ကမူ ဧရာမ အလေးချိန်တုံးကြီး တစ်ခုနှင့် ပိုတူနေပြီး လညွှန်နန်းတော် ဘိုးဘေးကြီး၏ ခန္ဓာကိုယ်နှင့် နှလုံးသားကို ပြင်းပြင်းထန်ထန် ဖိနှိပ်ချေမှုန်းနေတော့သည်။

ပုံရိပ်ယောင်နယ်ပယ်က လညွှန်နန်းတော် ဘိုးဘေးကြီး၏ အာရုံခံစားမှုများကို အနည်းငယ် အနှောင့်အယှက် ဖြစ်စေခဲ့သော်လည်း သူမက လျင်မြန်စွာပင် ချိုးဖျက် လွတ်မြောက်သွားခဲ့သည်။