အခန်း (၂၅၅-၂၅၆)

အပိုင်း(၂၅၅)

ဒင် - "အချစ်ရေး ကပ်ဘေး" တာဝန် ပြီးမြောက်သွားပြီ ဖြစ်သဖြင့် အတွေ့အကြုံမှတ် ၃၀၀၀၀၀ မှတ် ရရှိပြီး ရာဇဝင် အရည်အသွေး ရတနာသေတ္တာ (၁) ခု ရရှိသည်။

ဒင် - အဆင့် ၁ ဆင့် တက်သွားသည်။ လက်ရှိတွင် အဆင့် ၃၀ ဖြစ်သည်။

ဒင် - ဇာတ်ကောင် အချက်အလက်ပြကွက် လုပ်ဆောင်ချက်ကို ဖွင့်လိုက်ပါပြီ။ မိမိ၏ အကြည့်ကို ပစ်မှတ်အပေါ်တွင် အာရုံစိုက်ထားပြီး စိတ်ထဲမှ 'ဇာတ်ကောင် အချက်အလက်ပြကွက်' ဟု တိတ်တဆိတ် တွေးလိုက်ပါက ၎င်းပွင့်လာမည် ဖြစ်သည်။

ကျူးကျူးကို အသက်ပြန်ရှင်လာအောင် လုပ်ပေးပြီးနောက် ကျန်းလျို လျှောက်သွားစဉ်မှာပင် ရုတ်တရက် စနစ်၏ အသိပေးချက်များက သူ၏ စိတ်ထဲတွင် ဆက်တိုက်ဆိုသလို ထွက်ပေါ်လာလေတော့သည်။

ဤအသံကို ကြားလိုက်ရသောအခါ ကျန်းလျိုသည် တိတ်တဆိတ် ကျေနပ်ဝမ်းမြောက်သွားခဲ့သည်။ ဤမစ်ရှင်မှ ရရှိသော ဆုလာဘ်များ၊ လွန်ခဲ့သော ရက်များအတွင်း ကောင်းကင်နဂါး ဓမ္မတေးသံကို လေ့ကျင့်ကျင့်ကြံခဲ့မှုများနှင့် အဓိကအားဖြင့် ဝံပုလွေမိစ္ဆာများကဲ့သို့သော သတ္တဝါများနှင့် တိုက်ခိုက်ခဲ့ခြင်းများက ပေါင်းစပ်သွားကာ သူ့ကို အဆင့် ၃၀ သို့ တက်သွားစေခဲ့ပြီ မဟုတ်ပါလော။

ထို့အပြင် သူ အဆင့် ၃၀ သို့ ရောက်ရှိသွားသည်နှင့်အမျှ လုပ်ဆောင်ချက် အသစ်တစ်ခု အမှန်တကယ် ပွင့်လာခဲ့ပေပြီ။

ဇာတ်ကောင် အချက်အလက်ပြကွက် လုပ်ဆောင်ချက်...

အခြားသူများကို ကြည့်ရန် အလျင်မလိုဘဲ ကျန်းလျိုသည် သူ့ကိုယ်သူ ငုံ့ကြည့်လိုက်ပြီး တစ်ချိန်တည်းမှာပင် စိတ်ထဲမှ - "ဇာတ်ကောင် အချက်အလက်ပြကွက်" ဟု တိတ်တဆိတ် တွေးလိုက်လေသည်။

ချက်ချင်းဆိုသလိုပင် တစ်ပိုင်းပွင့်လင်းမြင်သာနေသော ဇာတ်ကောင် အချက်အလက်ပြကွက် တစ်ခုက ကျန်းလျို၏ မျက်စိရှေ့တွင် ပေါ်လာလေတော့သည်။

ယင်းက အွန်လိုင်းဂိမ်းစတိုင် ဇာတ်ကောင် အချက်အလက်ပြကွက်တစ်ခုပင် ဖြစ်ပြီး သူ၏ ကိုယ်ပိုင်ရုပ်သွင်ကို ပြသထားသည့်အပြင် လက်နက်ကိရိယာ နေရာလွတ် ဆယ့်သုံးခုစလုံးရှိ လက်နက်ကိရိယာများကိုပါ ပြသထားလေသည်။

ဤလက်နက်ကိရိယာများနှင့် ပတ်သက်သော အချက်အလက်များကိုတော့ ထပ်မံကြည့်ရှုနေရန် မလိုအပ်တော့ချေ။ လက်နက်ကိရိယာများကို မြင်တွေ့နိုင်သည့်အပြင် သူ၏ သွေးတန်း ပမာဏနှင့် မန်နာများကိုပါ သူ မြင်တွေ့နိုင်သေးသည်။

သို့သော်လည်း ကျန်းလျို အဓိက အာရုံစိုက်မိသည်က အတွေ့အကြုံမှတ်များကိုပင် ဖြစ်၏။ ဇာတ်ကောင် အချက်အလက်ပြကွက်ပေါ်တွင် သူ၏ အတွေ့အကြုံမှတ်များကို အမှန်တကယ် မြင်တွေ့နိုင်လေသည်။

အမည် - ကျန်းလျို

လိင် - ကျား

အသက်မွေးဝမ်းကျောင်း - ကရုဏာရှင် ဗောဓိသတ်

အဆင့် - ၃၀ (၁၀၀၈၆/၅၀၀၀၀၀)

လက်နက်ကိရိယာများ - ...

...

ကျန်းလျိုအတွက်တော့ ဇာတ်ကောင် အချက်အလက်ပြကွက်သည် ထူးထူးခြားခြား အရေးပါပုံမရပေ။ ၎င်း၏ အကြီးမားဆုံးသော အကျိုးသက်ရောက်မှုမှာ မိမိ၏ ကိုယ်ပိုင် အတွေ့အကြုံမှတ်များကို မြင်တွေ့နိုင်ပြီး နောက်တစ်ဆင့် တက်ရန် မည်မျှ လိုအပ်သေးသည်ကို အတည်ပြုနိုင်ခြင်းပင် ဖြစ်ပုံရသည်။

အတွေ့အကြုံမှတ် ဘယ်လောက်လိုလဲ သို့မဟုတ် ဘယ်အချိန်မှာ အဆင့်တက်မည်ဆိုသည်ကို ဘာမှမသိဘဲ အားလုံးကို ခန့်မှန်းရုံသက်သက်သာ လုပ်ခဲ့ရသော ယခင်အချိန်များနှင့် မတူတော့ပေ။

ယခုတော့ ကွာခြားသွားခဲ့ပြီ ဖြစ်သည်။ အတွေ့အကြုံမှတ်များကို မြင်တွေ့ရခြင်းဖြင့် သူ နောက်တစ်ဆင့် တက်ရန် အတွေ့အကြုံမှတ် ၅၀၀,၀၀၀ လိုအပ်ကြောင်း ကျန်းလျို နားလည်သွားခဲ့ပြီး လက်ရှိတွင် ၎င်းနှင့် အလှမ်းဝေးနေသေးကြောင်းကိုပါ သိလိုက်ရ၏။

"ဇာတ်ကောင် အချက်အလက်ပြကွက် ပွင့်လာတာက ကိုယ့်ရဲ့ အတွေ့အကြုံမှတ်တွေကို ကြည့်နိုင်ဖို့ သက်သက်ပဲလား… ဒါပဲ လုပ်နိုင်တာလား… ဒီထက်ပိုပြီး အသုံးဝင်တာ ရှိသင့်တယ် မဟုတ်ဘူးလား..."

မိမိ၏ ကိုယ်ပိုင် ဇာတ်ကောင် အချက်အလက်ပြကွက်ကို ကြည့်ရှုပြီးနောက် ကျန်းလျိုသည် ရုတ်တရက် အတွေးတစ်ခု ဝင်လာခဲ့သည်။ သူ၏ အကြည့်များက ဘေးနားရှိ ရှားဝူကျင်းဆီသို့ ကျရောက်သွားပြီး အလားတူပင် စိတ်ထဲမှ တိတ်တဆိတ် တွေးလိုက်လေသည်။

'ဇာတ်ကောင် အချက်အလက်ပြကွက်'

အမည် - ရှားဝူကျင်း

လိင် - ကျား

အသက်မွေးဝမ်းကျောင်း - ရဟန်း

အဆင့် - ၆၅

လက်နက် - မိစ္ဆာနှိမ်နင်းရေး ရတနာတောင်ဝှေး (ဒဏ္ဍာရီလာ အရည်အသွေး) - လိုအပ်သော အဆင့် ၆၀၊ တိုက်ခိုက်ရေးစွမ်းအား +၁၆၀၀၀၀...

...

"ဒါကမှ ဇာတ်ကောင် အချက်အလက်ပြကွက်ကို အသုံးပြုရမယ့် မှန်ကန်တဲ့ နည်းလမ်းပဲ..."

သူ၏ ရှေ့မှောက်ရှိ ရှားဝူကျင်း၏ အဆင့် အချက်အလက်များကို မြင်လိုက်ရသောအခါ ကျန်းလျိုသည် ချက်ချင်း သဘောပေါက်သွားပြီး သူ၏ ရင်ထဲတွင် ဝမ်းသာပီတိများ ပြည့်လျှံသွားလေတော့သည်။

ယခုမှ အသစ်ပွင့်လာသော ဤလုပ်ဆောင်ချက်သည် မိမိ၏ ကိုယ်ပိုင် အခြေအနေကို စစ်ဆေးရန်သက်သက် မဟုတ်ဘဲ အခြားသူများ၏ အခြေအနေများကို ကြည့်ရှုရန်အတွက်လည်း အသုံးပြုနိုင်ပေသည်။

အတိတ်ကာလက ဒဏ်ရာရနေသော ဝံပုလွေ မိစ္ဆာစစ်သည်နှင့် ဆုံတွေ့ခဲ့စဉ်က ၎င်းသည် မတ်မတ် မလျှောက်နိုင်သောကြောင့် ကောင်းယန်သည် ၎င်းကို မိစ္ဆာစစ်သည်မှန်း မသိဘဲ မိစ္ဆာတစ်ကောင်ဟု အထင်မှားခဲ့ဖူးလေသည်။ အကယ်၍ ထိုစဉ်ကသာ သူတို့တွင် ဤဇာတ်ကောင် အချက်အလက်ပြကွက် လုပ်ဆောင်ချက် ရှိနေခဲ့မည်ဆိုပါက ထိုကဲ့သို့သော နားလည်မှုလွဲမှားခြင်းမျိုး ရှိလာမည် မဟုတ်ပါလော။

ထို့အပြင် ဝူချောင်ဆရာတော်နှင့် ဆုံတွေ့ခဲ့စဉ်ကလည်း သူ၏ စွမ်းအားကို ကျန်းလျို မသိခဲ့ပေ။ အကယ်၍သာ သူက ဇာတ်ကောင် အချက်အလက်ပြကွက်ကို ဖွင့်နိုင်ခဲ့မည်ဆိုပါက ဆရာတော်နှင့် ပတ်သက်သည့် တိကျသော အချက်အလက်များ အားလုံးကို သူ မြင်တွေ့နိုင်မည် မဟုတ်ပါလော။

အနာဂတ်တွင် ရင်ဆိုင်ဖြေရှင်းရမည့် ပစ်မှတ်တစ်ခုခုနှင့် ဆုံတွေ့ရလျှင်ပင် သူသည် ဇာတ်ကောင် အချက်အလက်ပြကွက်ကို ဖွင့်ကာ ပြိုင်ဘက်၏ အဆင့်နှင့် သူတို့၏ ဓမ္မရတနာများနှင့် ပတ်သက်သည့် အချက်အလက်များကိုပါ မြင်တွေ့နိုင်မည် ဖြစ်သည်။ ယင်းက မိမိကိုယ်ကိုရော ရန်သူကိုပါ ကောင်းကောင်း သိရှိထားသည်ဟု ဆိုလိုခြင်း မဟုတ်ပါလော။

ဤရှုထောင့်မှ ကြည့်မည်ဆိုလျှင် ဤဇာတ်ကောင် အချက်အလက်ပြကွက်၏ လုပ်ဆောင်ချက်သည် အမှန်တကယ်ပင် အလွန် အရေးပါလှပေသည်။

ရှားဝူကျင်း၏ အဆင့်မှာ ၆၅ ဖြစ်ပြီး ကောင်းကင်နတ်အဆင့်၏ ဖြစ်တည်မှုအဆင့်များမှာ ၆၁ မှ ၇၀ ကြားတွင် ရှိသည်ကို ထည့်သွင်းစဉ်းစားပါက ရှားဝူကျင်း၏ အဆင့်သည် အတော်လေး သင့်လျော်နေပေသည်။

ချက်ချင်းပင် ကျန်းလျို၏ အကြည့်များက နဂါးမြင်းဖြူထံသို့ ကျရောက်သွားလေသည်။

နှိုင်းယှဉ်ကြည့်မည်ဆိုလျှင် နဂါးမြင်းဖြူသည် အဆင့် ၆၂ သို့ ရောက်ရှိနေခဲ့ပြီ ဖြစ်၏။ စွမ်းအားအရဆိုလျှင် သူသည် ရှားဝူကျင်းနှင့် သိပ်မကွာခြားလှသဖြင့် ကျန်းလျိုမှာ သူ့ဟာသူ တိတ်တဆိတ် ခေါင်းညိတ်လိုက်မိလေသည်။

ရှားဝူကျင်းနှင့် နဂါးမြင်းဖြူတို့ နှစ်ဦးစလုံး၏ အဆင့် အချက်အလက်များကို ကြည့်ရှုပြီးနောက် ကျန်းလျို၏ အတွေးများက အနည်းငယ် လှုပ်ရှားသွားပြီး သူ၏ အကြည့်များက စွန်းဝူခုန်းထံသို့ ကျရောက်သွားကာ စိတ်ထဲမှ တိတ်တဆိတ် ရေရွတ်လိုက်လေသည်။

'ဇာတ်ကောင် အချက်အလက်ပြကွက်'

အမည် - စွန်းဝူခုန်း (ရွှေရောင်)

လိင် - ကျား

အသက်မွေးဝမ်းကျောင်း - ရဟန်း

အဆင့် - ၈၀

လက်နက်ကိရိယာများ - ရူယီရွှေတင်းပုတ် (ရာဇဝင် အရည်အသွေး) - လိုအပ်သော အဆင့် ၇၅၊ တိုက်ခိုက်ရေးစွမ်းအား +၂၈၀၀၀၀၀...

"ဒါဆို ထိုက်ရီ အစစ်အမှန်နတ် အဆင့်တွေက ၇၁ ကနေ ၈၀ ကြားမှာ ရှိတာပေါ့… အဆင့်နဲ့ ကျင့်စဉ်ကို ကြည့်ရတာ… ဝူခုန်းက အခု ထိုက်ရီ အစစ်အမှန်နတ် အဆင့်ရဲ့ အထွတ်အထိပ်ကို ရောက်နေပြီပေါ့… နောက်တစ်လှမ်းဆိုရင် သူက တာ့လော ရွှေရောင်နတ် အဆင့်ကို လှမ်းတက်နိုင်တော့မှာပဲ..."

စွန်းဝူခုန်း၏ ဇာတ်ကောင်အဆင့်ကို ကြည့်ကာ ကျန်းလျိုက သူ့ဟာသူ တိတ်တဆိတ် ခေါင်းညိတ်လိုက်သည်။

ထို့အပြင် ကျန်းလျို၏ အာရုံကို အဖမ်းစားဆုံးအရာမှာ စွန်းဝူခုန်း၏ နာမည်ပင် ဖြစ်သည်။ ၎င်းသည် ရှားဝူကျင်းနှင့် နဂါးမြင်းဖြူတို့၏ နာမည်များနှင့် လုံးဝ ကွဲပြားနေပြီး ရွှေရောင်ဖြင့် ဖော်ပြထားခြင်း ဖြစ်၏။

ဂိမ်းစံနှုန်းများအရဆိုလျှင် ယေဘုယျအားဖြင့် ရွှေရောင်သည် ဘော့စ်ခေါင်းဆောင်အဆင့် နာမည်အရောင်များ ဖြစ်သည် မဟုတ်ပါလော။

ဤအရောင်က စွန်းဝူခုန်း၏ အဆင့်မှာ အလွန်မြင့်မားကြောင်း ဖော်ပြနေခြင်းလော သို့မဟုတ် သူ၏ အစစ်အမှန် စွမ်းအားသည် သူ၏ လက်ရှိအဆင့်ထက် ပိုမို မြင့်မားနေပြီး တူညီသော အဆင့်ရှိသူများကြားတွင်ပင် ရွှေရောင် ဘော့စ်ခေါင်းဆောင် အဆင့်ရှိသည့် ဖြစ်တည်မှုတစ်ခုအဖြစ် သတ်မှတ်ခံရကြောင်း ဆိုလိုခြင်းလော။

တစ်ခဏမျှ တိတ်ဆိတ်စွာ တွေးတောပြီးနောက် ကျန်းလျိုသည် ချက်ချင်း ခေါင်းခါယမ်းလိုက်ပြီး ဆက်မတွေးတော့ချေ။ စွန်းဝူခုန်း၏ ရွှေရောင် နာမည်ကို ကြည့်ရုံမျှဖြင့် စွန်းဝူခုန်း၏ စွမ်းအားက အမှန်တကယ်ပင် အစွမ်းထက်လှကြောင်း ကျန်းလျို အကြမ်းဖျင်း ခန့်မှန်းနိုင်ပေသည်။ မည်သို့ပင်ဖြစ်စေ ရွှေရောင်နာမည်က စွန်းဝူခုန်း မည်မျှ ကြောက်မက်ဖွယ်ကောင်းကြောင်း ပြသနေလေသည်။

လျှို့ဝှက်သံမဏိ ခန္ဓာကိုယ်၊ မီးလျှံမျက်လုံးနှင့် ရွှေရောင်အကြည့်၊ အသွင်ပြောင်းခြင်း ခုနစ်ဆယ့်နှစ်မျိုး၊ ကောင်းကင်နှင့်မြေကြီး၏ ဥပဒေသ၊ ကိုယ်ပွားဖန်တီးခြင်း၊ တိမ်တိုက်ခုန်ပျံခြင်း...

ပြောရမည်ဆိုလျှင် ရူယီ ရွှေတင်းပုတ် မရှိလျှင်တောင်မှ စွန်းဝူခုန်း၏ စွမ်းအားက အလွန်တရာ ကြောက်မက်ဖွယ် ကောင်းလှပေသည်။ အကယ်၍ နှိမ်နင်းရမည့် မိစ္ဆာတစ်ကောင်အဖြစ် သဘောထားမည်ဆိုလျှင် သူ့ကို ဘော့စ် အဆင့် သတ္တဝါအဖြစ် သတ်မှတ်ခြင်းက လုံးဝ ယုတ္တိတန်လှသည် မဟုတ်ပါလော။

ထို့အပြင် ရှားဝူကျင်း၏ မိစ္ဆာနှိမ်နင်းရေး ရတနာတောင်ဝှေးက အဆင့် ၆၀ တွင် အသုံးပြုနိုင်သော ဒဏ္ဍာရီလာ အရည်အသွေး လက်နက်ဖြစ်ပြီး တိုက်ခိုက်ရေးစွမ်းအား ၁၆၀,၀၀၀ ပေါင်းထည့်ပေးထားသည်ကို ကျန်းလျို သတိပြုမိလိုက်ရာ သူ၏ ကိုယ်ပိုင် ဝိဒျာရာဇာ သရဖူကို တွေးမိသွားစေသည်။ ၎င်းက အဆင့်မြှင့်တင်နိုင်သော လက်နက်ကိရိယာ ဖြစ်သော်လည်း အမြင့်ဆုံး ပေါင်းထည့်ပေးသော ကာကွယ်ရေးစွမ်းအားမှာ ၁၀၀,၀၀၀ သာ ရှိပေသည်။

ထို့ကြောင့် အတိုင်းအတာတစ်ခုအထိ ကြည့်မည်ဆိုလျှင် ဝိဒျာရာဇာ သရဖူသည် သာမန် ဗုဒ္ဓဘာသာ ရတနာတစ်ခုမျှသာ ဖြစ်နေသည်လော။ ၎င်းက ရှားဝူကျင်း၏ လက်နက်ထက်ပင် နိမ့်ကျနေပုံရပေသည်။

စွန်းဝူခုန်း၏ လက်နက်ဖြစ်သော ရူယီရွှေတင်းပုတ်ကို ကြည့်မည်ဆိုလျှင်မူ ၎င်းက အဆင့် ၇၅ တွင် အသုံးပြုနိုင်သော ရာဇဝင် အရည်အသွေး လက်နက်ဖြစ်ပြီး တိုက်ခိုက်ရေးစွမ်းအား ၂.၈ သန်းအထိ ပေါင်းထည့်ပေးရာ ရှားဝူကျင်း၏ မိစ္ဆာနှိမ်နင်းရေး ရတနာတောင်ဝှေးထက် အနည်းငယ်မျှသာ မကဘဲ အဆပေါင်းများစွာ ပို၍ အစွမ်းထက်နေပေသည်။

"ဒါကြောင့်ကိုး ဝူခုန်းက အရင်တုန်းက ပြောခဲ့တာ… တူညီတဲ့ ထိုက်ရီ အစစ်အမှန်နတ် အဆင့်မှာ ရှိနေပေမဲ့… မိုးနတ်မင်း မိုလီချင်းရဲ့ ကျင့်စဉ်စွမ်းအားက သူ့ရဲ့ ဆယ်ပုံတစ်ပုံလောက်ပဲ ရှိတယ်တဲ့လေ… ဝူခုန်းက မိုလီချင်းကို လုံးဝ အပြတ်အသတ် အနိုင်ယူနိုင်ခဲ့တာကိုး..."

"အဆင့်မြင့်လာလေလေ သူတို့ကြားက ကွာဟချက်က ပိုကြီးမားလာလေလေပဲ… ပြီးတော့ ဒီဓမ္မရတနာတွေဆိုရင်တောင် ကောင်းကင်နတ်အဆင့်နဲ့ ထိုက်ရီ အစစ်အမှန်နတ် အဆင့်ကြားက ကွာခြားချက်က ဒီလောက်တောင် ကြောက်စရာကောင်းတာလား… အရည်အသွေး ကွာခြားတယ်ဆိုရင်တောင် ဒါက နည်းနည်းတော့ လွန်မနေဘူးလား..."

ရှားဝူကျင်းနှင့် စွန်းဝူခုန်းတို့ကြားရှိ လက်နက် ကွာဟချက်ကို နှိုင်းယှဉ်ပြီးနောက် သူက တိတ်တဆိတ် ရေရွတ်လိုက်လေသည်။

***

အပိုင်း(၂၅၆)

ရှားဝူကျင်းနှင့် စွန်းဝူခုန်းတို့ကြား နှိုင်းယှဉ်မှုမှတစ်ဆင့် သူသည် ဤနတ်အဆင့် ဖြစ်တည်မှုများ၏ စွမ်းအားအဆင့် ကွာဟချက်များကို နက်ရှိုင်းစွာ နားလည်သဘောပေါက်နိုင်ခဲ့ပေသည်။ သိပ်မကြာမီမှာပင် ကျူးပါကျဲသည် ကျူးကျူးနှင့် ဆွေးနွေးစရာရှိသည်များကို ပြီးစီးသွားပုံရပြီး တစ်ယောက်တည်း ပြန်လည်ရောက်ရှိလာခဲ့လေသည်။

ကျူးပါကျဲ လျှောက်လာသည်ကို မြင်သောအခါ ကျန်းလျိုသည် စူးစမ်းချင်စိတ်များ ဖြစ်ပေါ်လာကာ ကျူးပါကျဲ၏ ဇာတ်ကောင် အချက်အလက်ပြကွက်ကို စစ်ဆေးကြည့်ရှုလိုက်လေသည်။

အမည် - ကျူးပါကျဲ (အပြာရောင်)

လိင် - ကျား

အသက်မွေးဝမ်းကျောင်း - ရဟန်း

အဆင့် - ၇၈

လက်နက်ကိရိယာများ - အမြင့်မြတ်ဆုံး ရွှေထွန်ခြစ်ရတနာ (ရာဇဝင် အရည်အသွေး) - လိုအပ်သော အဆင့်သတ်မှတ်ချက် မရှိ၊ တိုက်ခိုက်ရေးစွမ်းအား +၁၀ မှ ၁၀၀၀၀၀၀၀ အထိ (အသုံးပြုသူ၏ အဆင့်အပေါ် မူတည်သည်)...

ကျူးပါကျဲ၏ ဇာတ်ကောင် အချက်အလက်ပြကွက်ကို မြင်လိုက်ရပြီးနောက် ကျန်းလျိုသည် အံ့သြတကြီးဖြင့် လေကို အပြင်းအထန် ရှူသွင်းလိုက်မိလေသည်။

အဆင့်အရဆိုလျှင် ကျူးပါကျဲသည် စွန်းဝူခုန်းထက် အနည်းငယ် နိမ့်ကျနေပြီး သူ၏ နာမည်က အပြာရောင် ဖြစ်နေပေသည်။

မိစ္ဆာရှုထောင့်မှ ကြည့်မည်ဆိုလျှင် အဖြူရောင် နာမည်များသည် သာမန် သတ္တဝါများ၊ အပြာရောင်သည် အထက်တန်းအဆင့် သတ္တဝါများနှင့် ရွှေရောင်သည် ဘော့စ်ခေါင်းဆောင်အဆင့် သတ္တဝါများ ဖြစ်ကြပေသည်။ အဆင့်နှင့် အချက်အလက်ပြကွက်အရ ကြည့်မည်ဆိုလျှင် ကျူးပါကျဲသည် စွန်းဝူခုန်းအောက် လျော့နည်းနေပုံရပေသည်။

သို့သော်လည်း ကျူးပါကျဲ၏ လက်ထဲရှိ အမြင့်မြတ်ဆုံး ရွှေထွန်ခြစ်ရတနာသည် ရွှေတင်းပုတ်ကဲ့သို့ပင် ရာဇဝင် အရည်အသွေး ရှိသော်ငြား ၎င်းတို့၏ စွမ်းဆောင်ရည် အချက်အလက်များကတော့ သိသိသာသာ ကွာခြားနေခဲ့ပေသည်။

အဆင့်သတ်မှတ်ချက် မလိုအပ်သော ထိုခက်ရင်းသည် တိုက်ခိုက်ရေးစွမ်းအား ၁၀ သန်းအထိ ပေါင်းထည့်ပေးနိုင်ရာ ၎င်းက စွန်းဝူခုန်း၏ ရွှေတင်းပုတ်ထက်ပင် ပိုမို မြင့်မားနေလေသည်။

"ဒါကြောင့်ကိုး... မူရင်းဇာတ်လမ်းထဲမှာ ခြင်္သေ့ဝါ မိစ္ဆာက သူတို့သုံးယောက်စလုံးရဲ့ လက်နက်တွေကို ခိုးယူသွားပြီးတဲ့နောက်… ဘာလို့ ရွှေတင်းပုတ်ပွဲတော်လို့ မခေါ်ဘဲ ကိုးသွားထွန်ခြစ် ပွဲတော်လို့ တကူးတက သတ်မှတ်ခေါ်ဆိုခဲ့တာလဲ… ဒါဖြစ်နိုင်မလား… ဒီကျူးပါကျဲရဲ့ ကိုးသွားထွန်ခြစ်က စွန်းဝူခုန်းရဲ့ ရူယီ ရွှေတင်းပုတ်ထက်တောင် အရည်အသွေး ပိုမြင့်နေလို့ကိုး..."

ကျူးပါကျဲ၏ ကိုးသွားထွန်ခြစ်နှင့် ပတ်သက်သည့် အချက်အလက်များကို ကြည့်ရှုပြီးနောက် သူက တိတ်တဆိတ် အံ့သြချီးကျူးမိလေသည်။

အကယ်၍ ဇာတ်ကောင် အချက်အလက်ပြကွက် လုပ်ဆောင်ချက်ဖြင့် ကိုယ်တိုင်ကိုယ်ကျ မျက်မြင်မတွေ့ခဲ့ရပါက နာမည်ကျော်ကြားလှသော ရူယီ ရွှေတင်းပုတ်သည် ကျူးပါကျဲ၏ ကိုးသွားထွန်ခြစ်ထက် နိမ့်ကျနေလိမ့်မည်ဟု ကျန်းလျို ထင်မှတ်ထားခဲ့မည် မဟုတ်ပေ။

ဇာတ်ကောင် အချက်အလက်ပြကွက် လုပ်ဆောင်ချက်ကို ဖွင့်ပြီးနောက် ကျန်းလျိုသည် သူ၏ အဖွဲ့ဝင်များ၏ စွမ်းအားအပေါ် ပိုမို နက်ရှိုင်းသော နားလည်သဘောပေါက်မှုများကိုလည်း ရရှိခဲ့လေသည်။

ချက်ချင်းဆိုသလိုပင် ကျန်းလျို၏ အာရုံက သူ ယခုလေးတင် ရရှိခဲ့သော ရာဇဝင် အရည်အသွေး ရတနာသေတ္တာဆီသို့ ပြန်လည်ရောက်ရှိသွားလေသည်။

သည်တစ်ကြိမ်တော့ ဘယ်လို ကောင်းတဲ့အရာတွေများ ထွက်လာမလဲဆိုတာ သူ စိတ်ဝင်တစား တွေးတောနေမိတော့သည်။

...

နဂါးမြင်းဖြူ၏ ခွာများက အနောက်အရပ်ဆီသို့ ဦးတည်နေ၏။ ကျန်းလျိုသည် နဂါးမြင်းဖြူ၏ ကျောပေါ်တွင် တင်ပျဉ်ခွေ ထိုင်နေပြီး မြင်းခွာသံ မှန်မှန်က အလျင်စလိုလည်းမရှိ နှေးကွေးလွန်းခြင်းလည်းမရှိဘဲ လွတ်လပ်ပေါ့ပါးစွာ အေးဆေး လမ်းလျှောက်ထွက်လာသည့် ပုံစံမျိုး လုံးဝ ဖြစ်နေပေသည်။

စီးနင်းရသည်မှာ ချောမွေ့လွန်းလှသဖြင့် ခုန်ပေါက်လှုပ်ရှားမှု တစ်စုံတစ်ရာကိုမျှပင် မခံစားရချေ။ သူသည် ကောင်းကင်နဂါး ဓမ္မတေးသံ ကျင့်စဉ်ပညာရပ်ကို လေ့ကျင့်ကျင့်ကြံနေစဉ် သူ၏ ကျင့်စဉ်အဆင့်က တစ်စတစ်စ စုဆောင်းမိလာပြီး အတွေ့အကြုံမှတ်များကိုလည်း ဖြည်းဖြည်းချင်း ရရှိနေကြောင်းကို ကျန်းလျို အာရုံခံသိရှိနေလေသည်။

အဆင့် ၃၀ သို့ ရောက်ရှိသွားပြီး ဇာတ်ကောင် အချက်အလက်ပြကွက် လုပ်ဆောင်ချက်များ ပွင့်လာခဲ့ပြီးနောက် ကျန်းလျိုသည် သူ၏ ကျင့်ကြံခြင်းတွင် ပို၍ပင် စိတ်အားထက်သန်လာသလို ခံစားနေရပေသည်။

အဘယ်ကြောင့်ဆိုသော် အဆင့်တက်ရန် လိုအပ်သော အတွေ့အကြုံမှတ်များကို မြင်တွေ့နိုင်စွမ်းရှိလာခြင်းက တိုးတက်မှုပြကွက် တစ်ခုကို မြင်နေရသကဲ့သို့ ဖြစ်ရာ အရင်ကလို အမှောင်ထဲတွင် စမ်းတဝါးဝါး လုပ်နေရသည်ထက်ပို၍ စိတ်အားထက်သန်စရာ ကောင်းနေသောကြောင့် ဖြစ်ပေသည်။

ထို့အပြင် ကျန်းလျိုသည် အဆင့် ၃၁ သို့ ရောက်ရှိလာမည့် အချိန်ကို အလွန်တရာ မျှော်လင့်နေခဲ့သည်။ အကယ်၍ သူသာ ကောင်းကင်နဂါး ဓမ္မတေးသံ ပညာရပ်ကို စတုတ္ထအဆင့်အထိ မြှင့်တင်နိုင်မည်ဆိုပါက တရားထိုင်နေစဉ်အတွင်း အတွေ့အကြုံမှတ်များကို ယခုထက် ပိုမို ရရှိနိုင်မည် ဖြစ်လေသည်။

ထို့ကြောင့် ဤလတ်တလောရက်များအတွင်း ကျန်းလျို၏ ကျင့်ကြံလိုစိတ်များက ထူးထူးခြားခြား ပြင်းပြနေခဲ့ခြင်း ဖြစ်၏။

စွန်းဝူခုန်းနှင့် တပည့်သုံးယောက်တို့သည် ကျန်းလျို၏ နောက်တွင် သုံးပွင့်ဆိုင် တြိဂံပုံသဏ္ဍာန် နေရာယူလျက် လိုက်ပါလာကြရာ အရည်အချင်းပြည့်ဝသော သက်တော်စောင့် သုံးယောက်နှင့် အမှန်တကယ်ပင် တူညီနေပေသည်။

အစွမ်းအထက်ဆုံးဖြစ်သော စွန်းဝူခုန်းမှာ ပိန်ပိန်ပါးပါးနှင့် အရပ်ပုပု မျောက်တစ်ကောင်လိုသာ ပုံပေါ်ပြီး အားအနည်းဆုံးဖြစ်သော ရှားဝူကျင်းကတော့ ကြီးမားထွားကြိုင်းပြီး ရက်စက်ကြမ်းကြုတ်မည့် ပုံပေါက်နေလေသည်...

ကောင်းကင်နဂါး ဓမ္မတေးသံကို ကိုးဆယ့်ကိုးကြိမ်တိတိ အပြည့်အဝ လှည့်ပတ်ကျင့်ကြံပြီးနောက် ကျန်းလျိုသည် ကျင့်ကြံမှုကို ရပ်တန့်လိုက်ပြီး သူ၏ ဇာတ်ကောင် အချက်အလက်ပြကွက်ကို စစ်ဆေးကာ တိတ်တဆိတ် သက်ပြင်းချလိုက်မိလေသည်။

အတွေ့အကြုံမှတ်များအရဆိုလျှင် လက်ရှိတွင် သူသည် ၃၅၀,၀၀၀ ၌ ရှိနေပေသည်။ အတွေ့အကြုံမှတ် ၅၀၀,၀၀၀ ဖြင့် အဆင့်တက်ရန်အတွက် ခရီးအနည်းငယ် လိုနေသေး၏။

"အဲဒီနေ့ အချစ်ရေး ကပ်ဘေး တာဝန် ပြီးမြောက်သွားပြီးကတည်းကဆို အခု တစ်လလောက် ရှိသွားပြီ… ငါ အတွေ့အကြုံမှတ် ၃၅၀,၀၀၀ လောက်ပဲ ရသေးတယ်… တာဝန်တွေ လုပ်တာကပဲ အတွေ့အကြုံမှတ် ရဖို့အတွက် အမြန်ဆုံး နည်းလမ်းပဲ..."

သူ၏ အတွေ့အကြုံမှတ်များကို ကြည့်ကာ ကျန်းလျိုက တိတ်တဆိတ် ညည်းတွားလိုက်မိပြီး အတွေ့အကြုံမှတ် နှစ်သိန်း၊ သုံးသိန်းခန့် ဆုလာဘ်များ ပေးလေ့ရှိသော ထိုခက်ခဲသည့် တာဝန်များကိုပင် အနည်းငယ် လွမ်းဆွတ်တမ်းတနေမိလေသည်။

ကံမကောင်းစွာဖြင့် တစ်လတာ အချိန်ကုန်လွန်သွားခဲ့သော်လည်း မည်သည့်တာဝန်များမျှ ထွက်ပေါ်လာခြင်း မရှိခဲ့ချေ။ သူတို့၏ အနောက်အရပ်ဆီသို့ ခရီးစဉ်က အလွန်တရာ အေးချမ်းငြိမ်သက်နေခဲ့ပေသည်။

ဤအချိန်တွင် ကျန်းလျိုသည် ကွမ်ယင် ဗောဓိသတ် ဖန်တီးပေးလေ့ရှိသော အခက်အခဲများကိုပင် အမှန်တကယ် လွမ်းဆွတ်နေမိတော့သည်။

"တပည့်တို့… မိုးလည်း ချုပ်နေပြီ… အခုလောလောဆယ် ငါတို့ နားလိုက်ကြရင် ဘယ်လိုလဲ..."

ကျင့်ကြံမှုကို ရပ်တန့်ပြီးနောက် ဆည်းဆာချိန် ရောက်နေပြီဖြစ်သော ကောင်းကင်ကို ကြည့်ကာ ကျန်းလျိုက ပြောလိုက်သည်။

"ကောင်းပါပြီ..."

ကျန်းလျို၏ စကားကြောင့် နဂါးမြင်းဖြူသည် ရပ်တန့်သွားပြီး စွန်းဝူခုန်းနှင့် အခြားသူများကလည်း သဘောတူညီစွာ ခေါင်းညိတ်လိုက်ကြသည်။

"ဆရာ... ဆရာ... ဒီနေ့ ကျွန်တော်တို့ ဘာစားကြမလဲ..."

ကျူးပါကျဲ၏ မျက်လုံးများက မျှော်လင့်ချက်များဖြင့် တောက်ပနေပြီး ကျန်းလျိုကို အားတက်သရော ကြည့်ကာ မေးလိုက်သည်။

အစပိုင်းတွင် မိန်းကလေးများကို လိုက်လံပိုးပန်းသည့် ပညာရပ်ကို ကျန်းလျိုထံမှ သင်ယူရန် ရည်ရွယ်ချက်ဖြင့် ထွက်လာခဲ့သော်လည်း ယခုအခါတွင်မူ ကျူးပါကျဲသည် ကျန်းလျို၏ အရသာရှိလှသော ဟင်းလျာများ၏ သိမ်းသွင်းမှုကို ခံလိုက်ရပြီ ဖြစ်ပေသည်။

ဒိုင်း... ဒိုင်း... ဒိုင်း...

ကျန်းလျို မြင်းပေါ်မှ ဆင်းကာ ညစာကောင်းကောင်း တစ်နပ် ပြင်ဆင်တော့မည့် အချိန်တွင် ရုတ်တရက် ကောင်းကင်ယံသို့ ပစ်ဖောက်လိုက်သော မီးရှူးမီးပန်းများက သူ၏ အကြည့်ကို ဖမ်းစားသွားလေသည်။

ကြည့်ရသည်မှာ အဝေးမှ လူများက မီးရှူးမီးပန်းများ ပစ်ဖောက်နေကြခြင်း ဖြစ်၏။ လူတစ်ယောက်က စတင် ပစ်ဖောက်လိုက်သည်နှင့် ယင်းက အချက်ပြလိုက်သကဲ့သို့ ဖြစ်သွားကာ အခြားသူများစွာကလည်း ဆက်တိုက်ဆိုသလို လိုက်လံ ပစ်ဖောက်ကြလေတော့သည်။

မကြာမီမှာပင် ကောင်းကင်ယံ တစ်ခုလုံးသည် အရောင်အသွေး စုံလင်သော မီးရှူးမီးပန်းများဖြင့် ပြည့်နှက်သွားပြီး အခမ်းအနား ကျင်းပနေသည့် ပျော်ပွဲရွှင်ပွဲ အငွေ့အသက်များ ချက်ချင်း ပေါက်ကွဲထွက်ပေါ်လာတော့သည်။

"မီးရှူးမီးပန်းတွေလား... ထန်မင်းဆက်မှာ ဒါတွေ ရှိနေပြီလား..."

အဝေးမှ လှပတင့်တယ်လှသော မီးရှူးမီးပန်းများကို ကြည့်ရင်း ကျန်းလျို စိတ်ထဲတွင် အံ့အားသင့်နေခဲ့ပေသည်။

ထန်မင်းဆက်သည် ကြီးပွားတိုးတက်သော ခေတ်ကာလဖြစ်သည် ဆိုသော်လည်း ထိုအချိန်ကတည်းက လှပသော မီးရှူးမီးပန်းများ အမှန်တကယ် ရှိနေခဲ့ပြီလော။

သို့သော်... ပြန်တွေးကြည့်မည်ဆိုလျှင် သူ အရင်က ကြည့်ဖူးခဲ့သော ရာဇဝင် ဇာတ်လမ်းတွဲများထဲတွင် ဤကဲ့သို့သော မြင်ကွင်းမျိုး ပါခဲ့သလိုလို ရှိပေသည်။

ကျန်းလျိုသည် ခေါင်းခါယမ်းလိုက်ပြီး ထပ်မံ၍ အသေးစိတ် မတွေးတောတော့ချေ။ ဤသည်က အနောက်အရပ်သို့ ကျမ်းစာပင့်ဆောင်သည့် ခရီးစဉ်၏ ကမ္ဘာလောကဖြစ်ပြီး သူသိထားသော သမိုင်းဝင် ထန်မင်းဆက်နှင့် လုံးဝ ကွဲပြားခြားနားပေသည်။ အစစ်အမှန် ထန်မင်းဆက်တွင် မီးရှူးမီးပန်းများ ရှိသည်ဖြစ်စေ မရှိသည်ဖြစ်စေ အနောက်အရပ်သို့ ကျမ်းစာပင့်ဆောင်သည့် ခရီးစဉ်၏ ကမ္ဘာတွင် ၎င်းတို့ ရှိနေခြင်းကပင် လုံလောက်နေပြီ ဖြစ်၏။

ပထဝီဝင် အနေအထားအရဆိုလျှင်လည်း ထိုနည်းတူပင် ဖြစ်သည်။ အကယ်၍ နိုင်ငံတော် နယ်စပ်မှနေ၍ အနောက်ဘက်သို့ ခရီးသွားမည်ဆိုပါက မည်သို့သော နေရာမျိုး ဖြစ်နေမည်နည်း။ ပတ်ဝန်းကျင် အနေအထားကရော မည်သို့ ရှိမည်နည်း။

အကယ်၍ သမိုင်းဝင် ထန်မင်းဆက်တွင် ငရုတ်သီးကို ရှာဖွေမည်ဆိုပါက တောင်အမေရိကတိုက်၏ အပူပိုင်းဒေသများဆီသို့ သွားရမည် ဖြစ်သည်။ သို့သော် အနောက်အရပ်သို့ ကျမ်းစာပင့်ဆောင်သည့် ခရီးစဉ်၏ ကမ္ဘာတွင်ရော မည်သို့နည်း။ တောင်အမေရိကတိုက် ရှိနေပါသလား။

အနောက်အရပ်သို့ ကျမ်းစာပင့်ဆောင်သည့် ခရီးစဉ် ကမ္ဘာရှိ တစ်ခုတည်းသော ကုန်းမြေများမှာ တိုက်ကြီးလေးတိုက်သာ ဖြစ်ပေသည်။

အရှေ့ဘက်တွင် သန်းရှန်းကျိုးတိုက်၊ အနောက်ဘက်တွင် နျူဟယ်ပြည်နယ်၊ တောင်ဘက်တွင် စန်းပုတိုက်နှင့် မြောက်ဘက်တွင် ကျွီလုတိုက် တို့ပင် ဖြစ်လေသည်။

ထို့ကြောင့် တစ်ခဏမျှ အံ့အားသင့်သွားပြီးနောက် ကျန်းလျိုသည် ခေါင်းခါယမ်းလိုက်ကာ ထန်မင်းဆက်တွင် မီးရှူးမီးပန်းများ ပေါ်လာနိုင်သည်ဆိုသော အတွေးကို ဘေးဖယ်ထားလိုက်လေသည်။

"ဝူခုန်း... ဟိုဘက်မှာ ဘယ်လို ပွဲတော်မျိုး ကျင်းပနေတာလဲဆိုတာ သွားကြည့်စမ်းပါဦး..."

အဝေးမှ ကြီးကျယ်ခမ်းနားသော မီးရှူးမီးပန်းများကို မြင်လိုက်ရသောအခါ ကျန်းလျိုက စွန်းဝူခုန်းအား စေခိုင်းလိုက်သည်။

"ဟုတ်ကဲ့ပါ ဆရာ..."

စွန်းဝူခုန်းက ခေါင်းညိတ်လိုက်ပြီးနောက် အထက်သို့ ခုန်တက်သွားကာ မကြာမီမှာပင် ကောင်းကင်ယံထဲသို့ ပျောက်ကွယ်သွားလေတော့သည်။

***