အခန်း ၁၃၃

အခန်း (၁၃၃) - ကမ္ဘာတစ်သောင်းညီလာခံ (၁)

ကောင်းကင်တာအိုက ရက်စက်သည်...

ဤစကား၏ အဓိပ္ပာယ်မှာ အမှန်တကယ်တော့ ဤအဓိပ္ပါယ်ပင် ဖြစ်သည်။

စကြဝဠာ၏ဆန္ဒတစ်ခုဖြစ်သည့် ကောင်းကင်တာအိုက ဤကမ္ဘာအပေါ် မည်သည့်ဘက်လိုက်မှုမျှ မရှိသလို မည်သည့်ခံစားချက်မျှလည်းမရှိချေ။

သူနှင့် ပေါင်းစပ်ရန်အတွက် သူ့စည်းမျဉ်းများကို သင်ယူရမည်ဖြစ်သည်။ ရှုထောင့်တစ်ခုမှ ကြည့်မည်ဆိုလျှင် စည်းမျဉ်းများက အဆက်မပြတ် အသွင်ပြောင်းလဲနေခြင်းပင်။

ကျိုးရီက ထာဝရအသက်တာအိုသစ်သီးကို ဤအသွင်ပြောင်းလဲခြင်းအတွက် စွမ်းအင်အရင်းအမြစ်အဖြစ် အသုံးပြုကာ မိမိကိုယ်ကို စွမ်းအင်များ စဉ်ဆက်မပြတ် ထောက်ပံ့ပေးနေခြင်းဖြစ်သည်။

သေချာပေါက် ဤအရာကို အခြေခံအဖြစ်အသုံးပြုခြင်းက အလွန်အန္တရာယ်များလှသည်။

အဘယ်ကြောင့်ဆိုသော် ထာဝရအသက်တာအိုသစ်သီး မည်သည့်အချိန်တွင် လုံးဝ ပျေက်ကွယ်သွားမည်ကို မည်သူကမျှ အာမမခံနိုင်သောကြောင့်ဖြစ်သည်။

သို့သော် သူက နောက်တစ်ဆင့်သို့ တက်လှမ်းဖို့ရာ ဤအဆင့်ကို အရင်ကျော်ဖြတ်ရန် လိုအပ်နေသည်။

ဤအဆင့်ကို ကျော်ဖြတ်ပြီးမှသာ ဤပြဿနာအား ဖြေရှင်းရန် နည်းလမ်းအသစ်များကို တွေးတောနိုင်မည်ဖြစ်သည်။

ဤအရာများအပြင် အလွန်အရေးကြီးသော အခြားအကြောင်းရင်းတစ်ခုလည်း ရှိသေးသည်။ မဟာကံကြမ္မာကျင့်စဉ်က တကယ်ကို အလွန်အမင်းအစွမ်းထက်ပြီး အစွမ်းထက်ပါရမီလိုအပ်သည်။

ဤစွမ်းအားကို ကျွမ်းကျင်ပိုင်နိုင်သွားသည်နှင့် အနာဂတ်တွင် သူက ဥပဒေသများကို အမိန့်ပေးနိုင်စွမ်း ရှိလာမည်ဖြစ်သည်။

အကယ်၍ လူတစ်ယောက်ကို သေစေချင်ပါက သူ စကားတစ်ခွန်းပြောလိုက်ရုံသာ လိုအပ်တော့သည်။ ထိုအချိန်မှစ၍ အလွန်ရှုပ်ထွေးလှသော တိုက်ပွဲများကို ဖြတ်သန်းနေရန် မလိုအပ်တော့ချေ။

ဤသည်က အဓိပ္ပာယ်မဲ့လှသည်။

သူ့လက်အောက်ငယ်သားများအား ဆုံးရှုံးမှုများ ဖြစ်စေရုံသာမက သူ၏ ကိုယ်ပိုင်ကမ္ဘာကိုလည်း ထိခိုက်ခံရစေသည်။

ဝုန်း...

သူက ဤစွမ်းအားကို ဖန်တီးလိုက်သည့်အခိုက်အတန့်မှာပင် ကောင်းကင်ယံတစ်ခွင်လုံးတွင် မိုးကြိုးများနှင့် လျှပ်စီးကြောင်းများ လျှပ်လက်သွားတော့သည်။

ပုံမှန်မဟုတ်သော အခြေအနေက အလွန်မြန်ဆန်စွာ ရောက်ရှိလာပြီး အလွန်ထူးဆန်းလှကာ နယ်ပယ်ကလည်း အလွန်အမင်း ကျယ်ပြန့်လှသည်။

ကမ္ဘာအများအပြားရှိ အစွမ်းထက်ပညာရှင်များမှာ ဤအခိုက်အတန့်တွင် တစ်ယောက်ပြီးတစ်ယောက် နိုးထလာကြပြီး အပြင်သို့ ထွက်လာကြသည်။

သူတို့ရှေ့မှောက်ရှိ အရာအားလုံးကိုကြည့်ကာ အနည်းငယ် ဇဝေဇဝါဖြစ်နေကြပြီး သူတို့၏ မျက်လုံးများထဲ၌ အကြောက်တရားအရိပ်အယောင်များ ပေါ်ထွက်လာသည်။

“ဘယ်လောက်တောင် ကြောက်စရာကောင်းလိုက်လဲ၊ ဒါက စကြဝဠာရဲ့ဆန္ဒက ဒေါသထွက်နေတာပဲ။ ကောင်းကင်ကြီး ဒေါသထွက်နေပြီ”

“ဘာတွေ ဖြစ်နေတာလဲ၊ ဘယ်သူကများ ကောင်းကင်တာအိုကို ဒီလောက် ကြောက်စရာကောင်းတဲ့ အငွေ့အသက်တွေ ထုတ်လွှတ်လာတဲ့အထိ လုပ်ရဲလောက်တဲ့ အပြစ်ကြီးတစ်ခုကို ကျူးလွန်ခဲ့တာလဲ၊ တစ်ကမ္ဘာလုံးကို ဖျက်ဆီးပစ်တော့မယ့်အတိုင်းပဲ”

“တစ်ယောက်ယောက်က ကောင်းကင်တာအိုတစ်ခုလုံးရဲ့ အကျိုးစီးပွားကို သွားထိမိပုံရတယ်၊ ဘယ်သူကများ ဒီလောက်အထိ လုပ်နိုင်စွမ်းရှိလဲဆိုတာ တကယ်နားမလည်နိုင်တော့ဘူး။

ဒါက သာမန်လူတစ်ယောက်လုပ်နိုင်တဲ့ ကိစ္စမျိုးမဟုတ်ဘူး။ သူ့ရဲ့ စွမ်းအားက အရမ်း အစွမ်းထက်လွန်းတော့ အထွတ်အထိပ်အဆင့်တစ်ခုကိုတောင် ရောက်နေလောက်ပြီ။

အခုကစပြီး ဘယ်သူမဆို သူ့ကို သတ်ဖို့ ခက်ခဲသွားလောက်ပြီ”

“သွားပါပြီ၊ ဒီစကြဝဠာထဲမှာ နောက်ထပ် ထိပ်တန်း အစွမ်းထက်သိုင်းပညာရှင်တစ်ယောက် ထွက်ပေါ်လာတော့မယ်၊ အဲဒီကောင်က အနာဂတ်မှာ စကြဝဠာတစ်ခုလုံးအတွက် ဘေးဒုက္ခတွေ ယူဆောင်လာမလားမသိဘူး”

ကျိုးရီ ကိုယ်တိုင်ပင်လျှင် ဤကဲ့သို့သော ကိစ္စမျိုး ဖြစ်လာလိမ့်မည်ဟု မမျှော်လင့်ထားခဲ့ပေ။ သူက မိမိ၏ စိတ်ခံစားချက်အတိုင်း ဤအထူးနတ်ဘုရားစွမ်းရည်ကို ဖန်တီးခဲ့ခြင်းသာဖြစ်သော်လည်း တစ်ကမ္ဘာလုံးကို တုန်လှုပ်သွားစေလိမ့်မည်ဟု မထင်မှတ်ထားခဲ့သလို ကောင်းကင်တာအိုကိုပါ သတိထားသွားစေလိမ့်မည်ဟု မမျှော်လင့်ထားခဲ့ချေ။

“တကယ်ကို ရှားပါးပြီးအစွမ်းထက်တဲ့ တာအိုစွမ်းအားတစ်ခုကို ငါ ဖန်တီးနိုင်ခဲ့ပုံရတယ်။

အခုကစပြီး တကယ့်တိုက်ပွဲမှာ ဒီစွမ်းအားကို ငါအသုံးပြုမယ်ဆိုရင် မမျှော်လင့်ထားတဲ့ရလဒ်တွေကို သေချာပေါက် ယူဆောင်လာပေးလိမ့်မယ်”

“ဒီစွမ်းအားကို စကြဝဠာတစ်ခုလုံးမှာ ဘယ်သူကမှ မကျင့်ကြံဖူးသေးတာသေချာတယ်၊ အခုတော့ ဒီစွမ်းအားကို ဖန်တီးနိုင်တဲ့ ပထမဆုံးလူအဖြစ် ငါ့ကို သတ်မှတ်လို့ရလောက်ပြီ”

………..

မည်သို့ပင်ဆိုစေကာမူ ဤကိစ္စကို ကောင်းမွန်သောအရာတစ်ခုအဖြစ် သတ်မှတ်၍ ရနိုင်ပေသည်။

အဘယ်ကြောင့်ဆိုသော် ဤစကြဝဠာကြီးသည် သက်ရှိအားလုံး၏အထက်၊ အမြင့်မားဆုံးသော နေရာ၌ အမြဲတစေ ရပ်တည်နေခဲ့ပြီး အားလုံးကို ၎င်း၏အမိန့်အာဏာအား နာခံစေလျက် ညွှန်ကြားချက်များအတိုင်း လှုပ်ရှားဆောင်ရွက်စေခဲ့သောကြောင့်ပင်။

ကံကြမ္မာဟု ခေါ်ဆိုကြသော အရာမှာ အမှန်စင်စစ်အားဖြင့် ဤစကြဝဠာကြီး၏ဆန္ဒသာ ဖြစ်ပေ၏။ စကြဝဠာကြီးသည် လူတိုင်း၏ ကံကြမ္မာကို တိတ်တဆိတ် သတ်မှတ်ထားပြီးဖြစ်ရာ မည်သူမဆို အခြားသောရွေးချယ်ခွင့်မရှိဘဲ ထိုခြေလှမ်းများအတိုင်းသာ မလွဲမသွေ လိုက်ပါလျှောက်လှမ်းကြရသည်။

စကြဝဠာကြီး၏ဆန္ဒက လူတစ်ယောက်ကို သေဆုံးရမည်ဟု ဆုံးဖြတ်လိုက်ပါက ထိုသူသည် သတ်မှတ်ထားသော အချိန်၌ သေပွဲဝင်ရမည်သာ။ မည်မျှကြာအောင် အသက်ရှင်ရမည်ဟု သတ်မှတ်လိုက်လျှင်လည်း ထိုအတိုင်းသာ အသက်ရှင်ခွင့်ရမည်ဖြစ်သည်။

လူတစ်ယောက်ကို တစ်သက်တာလုံး အင်အားကြီးမားသူအဖြစ် ဖန်တီးချင်သည်ဖြစ်စေ၊ အားနည်းသူအဖြစ် ဖန်တီးချင်သည်ဖြစ်စေ မည်သူကမျှ အာခံဆန့်ကျင်နိုင်စွမ်းမရှိပေ။

သို့သော် ယခုအခါ ကျိုးရီက ဤစွမ်းအားကို ဖန်တီးလိုက်နိုင်ပြီဖြစ်ရာ အရာအားလုံးက ပြောင်းလဲသွားခဲ့လေပြီ။

စကြဝဠာတစ်ခုလုံးတွင် စကြဝဠာကြီး၏ဆန္ဒကို ဆန့်ကျင်ခုခံနိုင်စွမ်းရှိသော ပထမဆုံးသော စွမ်းအားတစ်ခု ထွက်ပေါ်လာခဲ့ပြီ ဖြစ်သည်။

ယနေ့မှစ၍ သူသည် စကြဝဠာကြီး၏ ထိန်းချုပ်မှုအောက်မှ လွတ်ကင်းနိုင်မည်ဖြစ်ပြီး မိမိဆန္ဒရှိရာကို လွတ်လပ်စွာ လုပ်ဆောင်နိုင်တော့မည်။

မဟုတ်သေး။ ပွင့်ပွင့်လင်းလင်း ဆိုရလျှင် ဤအတွေးက အနည်းငယ် ချဲ့ကားလွန်းရာကျနေပေလိမ့်မည်။ အနည်းဆုံးတော့ လက်ရှိအချိန်၌ ဤအဆင့်အထိ သူ မတတ်လှမ်းနိုင်သေးပေ။

လက်ရှိ သူ၏စွမ်းအားမှာ နတ်ဘုရားဧကရာဇ်အဆင့်တွင်သာ ရှိနေသေးသည် မဟုတ်လော။

သူ့စွမ်းအားများ ပိုမိုတိုးတက်လာစေရန်အတွက် ဆက်လက်၍ ကျင့်ကြံအားထုတ်နေရန် လိုအပ်သေးသည်။

ယခုလက်ရှိ သူလွှမ်းမိုးနိုင်သောနယ်ပယ်မှာ သူ၏ လက်ရှိစွမ်းအားအဆင့်အတွင်း၌သာ ဖြစ်ပြီး၊ ထိုအဆင့်ထက် ကျော်လွန်သွားပါက သူ မည်သည့်အရာကိုမျှ လုပ်နိုင်မည်မဟုတ်ပေ။

သို့သော် အချိန်များ ကုန်လွန်လာသည်နှင့်အမျှ သူ့စွမ်းအားများက တစ်နေ့တခြား ပိုမိုကြီးမားလာမည်ဖြစ်ရာ မည်သည့်အရာကိုမျှ ကြောက်ရွံ့နေစရာ လိုတော့မည်မဟုတ်ပေ။

အနှေးနှင့်အမြန် ဆိုသလိုပင် စကြဝဠာတစ်ခုလုံးကို ထိန်းချုပ်နိုင်သည့် အဆင့်အထိ သူ တက်လှမ်းနိုင်မည်သာ။ ထိုအချိန်သို့ ရောက်လာလျှင်မူ ဤစကြဝဠာကြီးထဲ၌ သူ့အား ရင်ဆိုင်နိုင်မည့်သူဟူ၍ အမှန်တကယ်ပင် ရှိလာတော့မည်မဟုတ်ပေ။

ကျိုးရီသည် သီးသန့်တံခါးပိတ်ကျင့်ကြံခြင်းကို ဆက်လက်မလုပ်ဆောင်တော့ချေ။ လက်ရှိအဆင့်သို့ ရောက်ရှိလာပြီးဖြစ်ရာ သူသည် အခြားသူများကဲ့သို့ ခက်ခဲပင်ပန်းစွာ ကျင့်ကြံနေရန် မလိုအပ်တော့ပေ။

မည်သည့်အချိန်၊ မည်သည့်နေရာတွင်မဆို သူ၏ စိတ်ဆန္ဒလေး တစ်ချက်ဖြင့်ပင် သက်သောင့်သက်သာ အနားယူနေသည့် အခြေအနေမျိုးကို ဖန်တီးထားနိုင်ပေသည်။

သူ့ကိုယ်စား ကျင့်ကြံပေးရန်အတွက် ကိုယ်ပွားများစွာကိုပင် သူ ဖန်တီးထားနိုင်သေးသည်။

ဤသည်မှာ စီးပွားရေးလုပ်ငန်းတစ်ခု လုပ်ဆောင်နေရသည်နှင့် အနည်းငယ် တူညီနေသည်။

ငွေကြေးအရင်းအနှီး များပြားလေလေ စီးပွားရေးလုပ်ရန် ပိုမိုလွယ်ကူပြီး အမြတ်အစွန်း ပိုရလေလေ ဖြစ်သည်။

တကယ်ကို အလွန်ကောင်းမွန်လှသော အခြေအနေပင်။

ယခုအခါ သူ၏ ကျင့်ကြံခြင်းအဆင့်ကို ထိန်းသိမ်းထားရန်အတွက် မည်သည့်အရာကိုမျှ လုပ်ဆောင်နေရန် မလိုအပ်တော့သလို ကျင့်ကြံခြင်း အရင်းအမြစ်များကိုပင် ပြင်ဆင်နေရန် မလိုတော့ပေ။

တစ်နေ့တွင် ရွှမ်ရဲသည် ကျိုးရီအား ဂါရဝပြုရန်အတွက် အရက်ဆိုင်လေးဆီသို့ ရောက်ရှိလာခဲ့သည်။ ရွှမ်ရဲသည် ရောက်ရောက်ချင်းပင် ကျိုးရီရှေ့၌ အရိုအသေပေး ဦးညွှတ်လိုက်သည်။

“ဆရာ”

ကျိုးရီသည် မျက်နှာပေါ်တွင် အပြုံးဖျော့ဖျော့လေးပေါ်လာပြီး ခေါင်းတစ်ချက် ငြိမ့်ပြလိုက်သည်။

“ရွှမ်ရဲ... ငါတို့ မတွေ့ဖြစ်တာ တော်တော်လေး ကြာသွားပြီပဲ၊ ဒီအတောအတွင်း မင်း ဘာတွေလုပ်နေခဲ့တာလဲ၊ ဘယ်လိုဖြစ်လို့ ငါ့ဆီလာတွေ့ဖို့ အချိန်ရလာတာလဲ”

ရွှမ်ရဲက ရယ်မောလိုက်ရင်း သူ၏ အကြံအစည်များကို စိတ်အားထက်သန်စွာ ရှင်းပြလေသည်။

“ဟားဟား... ဆရာ၊ အခုတလော ကျွန်တော် အပြင်ဘက်မှာ အလုပ်နည်းနည်း ရှုပ်နေခဲ့တယ်၊ မဟာကမ္ဘာကြီးထဲက မိတ်ဆွေတော်တော်များများနဲ့လည်း ရင်းနှီးခဲ့တယ်”

“ကျွန်တော်တို့ရဲ့ လက်ရှိကမ္ဘာကြီးရဲ့ အင်အားကို တိုးချဲ့နိုင်ဖို့အတွက် တခြားကမ္ဘာတွေနဲ့ ဆက်သွယ်ပြီး လေ့လာသင်ယူချင်တဲ့ အကြံတစ်ခုရထားတယ်”

“ဒီလိုလုပ်လိုက်ရင် တစ်ဖက်လူကလည်း ကျွန်တော်တို့ဆီကနေ အများကြီး သင်ယူသွားနိုင်တယ်ဆိုပေမယ့် ဒါတွေအားလုံးက နှစ်ဦးနှစ်ဖက် အကျိုးရှိစေမယ့် ပူးပေါင်းဆောင်ရွက်မှုတွေချည်းပါပဲ”

“ယေဘုယျအားဖြင့်တော့ သတ်မှတ်ထားတဲ့ ဒေသတစ်ခုအတွင်းမှာရှိတဲ့ ကျွန်တော်တို့ကမ္ဘာကြီးရဲ့ အင်အားကို သိသိသာသာ မြှင့်တင်ပေးနိုင်ပါလိမ့်မယ်”

“ဘာပဲဖြစ်ဖြစ် ဒီစကြဝဠာကြီးထဲမှာ ကျွန်တော်တို့ကမ္ဘာတွေပဲ ရှိနေတာမှ မဟုတ်တာ၊ တခြားကမ္ဘာတွေအများကြီး ရှိနေသေးတယ်လေ”

“ကိုယ့်ကိုယ်ကိုယ် ပိုပြီး အင်အားကြီးလာအောင် လုပ်နိုင်မှသာ တခြားသူတွေရဲ့ တိုက်ခိုက်မှုတွေကို ခုခံနိုင်မှာ”

ကျိုးရီသည် ကျေနပ်အားရစွာဖြင့် ခေါင်းညိတ်လိုက်သည်။

“မင်း လုပ်တာ တော်တော်လေးကောင်းတယ်၊ ဒီလို အကြံဉာဏ်မျိုးရှိနေတာက မင်းက အရည်အချင်းပြည့်ဝတဲ့ လောကဧကရာဇ်တစ်ပါးဖြစ်ကြောင်း သက်သေပြနေတာပဲ၊ ဒီလိုကိစ္စမျိုးတွေကို ငါ့ဆီ သတင်းလာပို့နေစရာ မလိုဘူး”

“မင်းရဲ့ အလုပ်ကို သေသေချာချာလုပ်ဖို့ပဲ လိုတယ်၊ မင်းက အခု ဒီကမ္ဘာကြီးရဲ့ ဧကရာဇ်ဖြစ်နေပြီဆိုတော့ မင်းကိုယ်ပိုင် အရှိန်အဝါလေးနဲ့တော့ လှုပ်ရှားသင့်တယ်”

ရွှမ်ရဲက ပေါ့ပါးစွာ ရယ်မောလိုက်သည်။

“ဘယ်အချိန်ပဲဖြစ်ဖြစ် ကျွန်တော်က ဆရာ့ရဲ့ လက်အောက်ငယ်သားပါပဲ”

ကျိုးရီက ပြုံးစစဖြင့် နောက်ပြောင်လိုက်သည်။

“မင်းကောင်လေး... အခုလို ဖားတတ်အောင် ဘယ်တုန်းက သင်လိုက်တာလဲ”

ရွှမ်ရဲက ခေါင်းကို ကုတ်လျက် ရိုးသားစွာ ဖြေကြားသည်။

“ဟားဟား... လူသားမျိုးနွယ်တွေနဲ့ အတူနေလာတာ ကြာပြီဆိုတော့ အကျင့်ဆိုးတချို့ ကူးစက်လာတာကိုတော့ ရှောင်လွှဲလို့ မရဘူးလေ၊ တိတိကျကျ ပြောရရင်တော့ ဒါတွေက အကျင့်ဆိုးတွေ မဟုတ်ပါဘူး၊ ကျွန်တော့် ရင်ထဲမှာ ရှိတဲ့အတိုင်း ပြောနေတာပါ၊ တကယ် စေတနာအမှန်နဲ့ ပြောနေတာပါ”

ကျိုးရီက လေးနက်သော အမူအရာဖြင့် မေးလိုက်သည်။

“ကောင်းပြီ... မင်းရဲ့ သစ္စာရှိမှုကို ငါသိပါတယ်၊ မကြာသေးခင်က အပြင်လောကမှာ ထူးခြားတဲ့ကိစ္စတစ်ခုခုများ ဖြစ်ခဲ့သေးလား”

ရွှမ်ရဲ၏ မျက်နှာပေါ်တွင် အနည်းငယ် လေးနက်သွားသော အရိပ်အယောင်တစ်ခု ဖြတ်ပြေးသွားသည်။

“တကယ်တော့ ထူးခြားတဲ့ကိစ္စတစ်ခု ရှိနေတယ်၊ မကြာခင်မှာ ကျွန်တော်တို့ရဲ့ နယ်မြေက ကမ္ဘာတစ်သောင်းညီလာခံတစ်ခုကို ကျင်းပတော့မယ်၊ အခြေခံအားဖြင့်တော့ ကမ္ဘာတိုင်းက အင်အားကြီးသူတွေ အားလုံး တက်ရောက်ကြလိမ့်မယ်”