အခန်း ၄၆၃

အခန်း(၄၆၃) အလောင်းသုံးခု ဖြတ်တောက်ခြင်းဆိုတာ

ချန်ဟွိုက်အန်က အင်မော်တယ်ယွိစီ၏ အလောင်းကို အစပြု၍ လမ်းစများကို လိုက်ကာ အင်မော်တယ် ယွိစီကို ခြေရာခံရန် စီစဉ်ထားသည်။

ဒီအင်မော်တယ်ယွိစီက ရန်သူမဟုတ်ဘူးဆို ပြီးတာပဲ။ အင်မော်တယ်ဖြစ်ဖို့ ဆုတောင်းပေးလိုက်ပါမယ်။

ဒါပေမဲ့ ရန်သူသာ ဖြစ်မယ်ဆိုရင် အဲဒါက လီချင်းရန်နဲ့ လရိပ်ဂိုဏ်းအတွက် သေချာပေါက် ခြိမ်းခြောက်မှု တစ်ခု ဖြစ်လာမှာပဲ။ ငါ့ရဲ့ ဒီကိုယ်ပွား ဆုံးရှုံးသွားရမယ် ဆိုရင်တောင်မှ ဓားတစ်ချက်တည်းနဲ့ အင်မော်တယ် ယွိစီရဲ့ အင်မော်တယ်လမ်းစဉ်ကို ဖြတ်တောက်ပစ်မယ်။

လီချင်းရန် ပြင်ဆင်ပေးသော မနက်စာကို စားပြီးနောက် သူက တန်ယွန်ကို ချက်ချင်း သွားရှာပြီး တစ်ညလုံး မအိပ်ဘဲ စဉ်းစားထားခဲ့သည့် ကောက်ချက်ချမှုများကို ပြောပြလိုက်သည်။

ဤစကားကိုကြားရာ တန်ယွန်က အနည်းငယ် မျက်မှောင်ကြုတ်ကာ တိုးတိုးလေး ပြောလိုက်သည်၊ "စီနီယာ၊ ရှင့်ရဲ့ ခန့်မှန်းချက်က အမှန်ဖြစ်ဖို့ အတော်လေး နီးစပ်တယ်။" သူ၏ အကြည့်များက လေးနက်နေသည်။ "တကယ်တော့ သူက သူတော်စင်ယွိစီ ဖြတ်ထောက်ထားခဲ့တဲ့ အလောင်းသုံးလောင်းထဲက တစ်ခု ဖြစ်မယ်လို့ မနေ့ကတည်းက ကျွန်မ သံသယ ဝင်နေခဲ့တာ။ အလောင်းသုံးလောင်းထဲမှာ အလယ်အလောင်းက ငွေကို စွဲလမ်းတယ်။ သူက ပိုက်ဆံရနေသရွေ့ ကျင့်ကြံမှုအဆင့်ကို မြှင့်တင်နိုင်တယ်။ သူ့ရဲ့ ထူးခြားတဲ့ စွမ်းရည်ကတော့ ဝိညာဉ်စွမ်းအားက အရမ်းအစွမ်းထက်ပြီးတော့ လူတစ်ယောက်ရဲ့ ကံကြမ္မာကိုတောင် သိနိုင်စွမ်း ရှိတာပဲ။"

"မနေ့ညက သူ့ကို ကျွန်မ စမ်းသပ်ကြည့်ခဲ့တယ်။" တန်ယွန်က ဆက်ပြောသည်၊ "အင်မော်တယ် ယွိစီနဲ့ ရုပ်ချင်းလုံးဝတူတဲ့ ဒီကောင်မလေးက ဘာပဲလုပ်လုပ် ငွေကို အရမ်းစွဲလမ်းပြီး ငွေရဖို့ဆို ဘာမဆို လုပ်လိမ့်မယ်။ သူက ဝိညာဉ်ကျောက်တုံးတွေကိုမြင်ရင် မျက်လုံးမခွာနိုင်တော့ဘဲ အဲဒါတွေကို မျိုမချရမချင်း ရပ်မှာ မဟုတ်ဘူး... သူက ကျွန်မတို့ရဲ့ အဆင့်မြင့် ဝိညာဉ်ကြောတွေကြောင့် လရိပ်ဂိုဏ်ကို တမင်သက်သက် ရောက်လာတာ ဖြစ်မယ်လို့ ကျွန်မ သံသယရှိတယ်။"

ဤစကားကို ကြားသောအခါ ချန်ဟွိုက်အန်၏ အမူအရာ ပြောင်းလဲသွားပြီး သူ၏နှုတ်ခမ်းများ တွန့်ကွေးသွားသည်။ "ဒါက ဖီးရှို့နဲ့ ဘာကွာလို့လဲ။" သူက အမြန် ခေါင်းခါပြီး သတိပေးလိုက်သည်။ "ဒါဆို မင်း သူ့ကို သေချာ စောင့်ကြည့်ထားတာ ပိုကောင်းမယ်။ ဒီငွေစုပ်ကောင်မလေးသာ ငါ့ရဲ့ အဆင့်မြင့် ဝိညာဉ်ကြော တည်နေရာ အတိအကျကို သိသွားရင် ရက်အနည်းငယ်အတွင်း အဲဒီထဲက ဝိညာဉ်ကျောက်တုံးတွေ အားလုံးကို ဝါးမျိုပစ်လိုက်မှာ သေချာတယ်။"

"အဲဒီအတွက်တော့ စိတ်မပူပါနဲ့။" တန်ယွန်က “ကျွန်မကို အားကိုးလိုက်ပါ”' ဆိုသည့် အမူအရာဖြင့် ရင်ဘတ်ကို ပုတ်လိုက်သည်။ "သူ့ဆီမှာ ကန့်သတ်ချက်တွေနဲ့ ခြေရာခံကိရိယာတွေ ကျွန်မ ချန်ထားခဲ့တယ်။ ပြီးတော့ ကျွန်မရဲ့သမီး တန်ပိုင်ကိုလည်း စောင့်ကြည့်ခိုင်းထားတယ်။"

တန်ယွန်သည် အလောင်းသုံးခု အတတ်ကို အတော်အသင့် နားလည်ထားပုံရသည်ကို မြင်သောအခါ ချန်ဟွိုက်အန်က ဆက်မေးလိုက်သည်၊ "ကျန်တဲ့ အလောင်းနှစ်ခုနဲ့ အင်မော်တယ်ယွိစီရဲ့ တကယ့်ခန္ဓာကိုယ်ကို ဘယ်လိုရှာရမလဲဆိုတာ မင်း သိလား။"

"စီနီယာ၊ သူတော်စင်ယွိစီကို ရှာချင်ရင် သူတော်စင်ယွိစီက အလောင်းသုံးခု ဖြတ်တောက်တဲ့ နည်းလမ်းတွေထဲက ဘယ်နည်းလမ်းကို အသုံးပြုခဲ့လဲဆိုတာကို အရင်ဆုံး နားလည်ဖို့ လိုမယ်။" တန်ယွန်က လေးနက်စွာ ပြောသည်။ "အလောင်းသုံးခုဖြတ်တောက်တဲ့ နည်းလမ်း သုံးမျိုး ရှိတယ်။"

"သုံးမျိုးတောင်လား။" ချန်ဟွိုက်အန် မျက်လုံး ပြူးကျယ်သွားသည်။

ဝိုး။ သူတို့မှာ လှည့်ကွက်တွေ အများကြီး ရှိနေတာပဲ။

တန်ယွန်အနည်းငယ် ပြုံးကာ ဆက်ရှင်းပြသည်။ "ပထမနည်းလမ်းက အတော်လေး အသုံးများတယ်။ ဆန္ဒမရှိ၊ အတွေးမရှိတဲ့အခြေအနေကို ရောက်ဖို့ အလောင်းသုံးခုကို ဖယ်ရှားလိုက်တာပါ။ အဲဒီအချိန် တာအိုအပေါ် သူတို့ရဲ့နားလည်သဘောပေါက်မှုက အထွတ်အထိပ်ကို ရောက်သွားပြီးတော့ အဲဒီလို ကျင့်ကြံသူတွေအပေါ် သက်ရောက်မယ့် ကောင်းကင်အတိဒုက္ခရဲ့စွမ်းအား အများကြီး လျော့သွားလိမ့်မယ်။"

အကြောင်းမှာ ကောင်းကင်တာအိုက ခံစားချက်များနှင့် ဆန္ဒများမရှိသော အင်မော်တယ်များက ကောင်းကင်တာအိုကိုယ်တိုင်နှင့် ဘာမှမကွာခြားဟု ယုံကြည်၍ပင်။ သူတို့က ကောင်းကင်တာအို၏ အသုံးချခံ သက်သက် ဖြစ်မသွားပေဘူးလား။ ထို့ကြောင့် ထိုကျင့်ကြံသူများက အလွယ်တကူပင် အင်မော်တယ်များ ဖြစ်လာနိုင်ပြီး သူတို့ကို သာမန်အင်မော်တယ်ဟုလည်း ခေါ်ကြသည်။

ကောင်းကင်တာအို ကောင်းချီးပေးထားသော ထိုအင်မော်တယ်များက တခြားအင်မော်တယ်များထက် အဆင့်များစွာသာလွန်သော အလွန်မြင့်မားသည့် တိုက်ခိုက်ရေးစွမ်းအားကို ပိုင်ဆိုင်ထားသည်ဟု ဆိုကြသည်။

အလောင်းသုံးခုကို ဖြတ်တောက်သည့် ဤနည်းလမ်းအကြောင်းကို ချန်ဟွိုက်အန်သည် ယခင်က ကြားဖူးပြီးသားဖြစ်ကာ သူ၏ယခင်ဘဝမှ ဝတ္ထုများစွာတွင်ပင် ဖော်ပြထားခဲ့သည်။

ထိုတ္ထုများ မည်သို့ဖြစ်လာကြောင်း သူ ယခင်က တွေးဖူးသည်။

အခုတော့ အဖြေပေါ်သွားလေပြီ။

ဒါ စာရေးဆရာက ထပ်ခါတလဲလဲ သံသရာလည်ခြင်းကနေ မှတ်ဉာဏ်အပိုင်းအစတွေကို ထုတ်ယူပြီး စာအုပ်ထဲမှာရေးထားတဲ့ ရလဒ်သက်သက်ပဲ မဟုတ်လား။

"ကျန်တဲ့ နှစ်ခုကကော။" ချန်ဟွိုက်အန် သိချင်စိတ် ပြင်းပြစွာဖြင့် ထပ်မေးလိုက်သည်။

"ကျန်တဲ့ နှစ်ခုကတော့ သိပ်မတွေ့ရတတ်ဘူး။" တန်ယွန်၏ လေသံကို ပိုမိုလေးနက်လာပြီး ပြောသည်။ "တစ်ခုကတော့ မူလခန္ဓာကိုယ်ကို စွန့်ပစ်ပြီး အလောင်းသုံးခုအဖြစ်ပဲ ခွဲထွက်သွားတာပါ။ ဒီနည်းလမ်းက နောက်ဆုံးမှာ တစ်ခုတည်းသောအခြေအနေကို ရောက်ဖို့အတွက် အလောင်းသုံးလောင်းကို ပြန်လည်ရယူဖို့ လိုအပ်တယ်။ အလောင်းသုံးလောင်းကို ခွဲထုတ်ပြီးသွားရင် တစ်ခုစီက သီးခြားစီကျင့်ကြံကြပြီး နောက်ဆုံးမှာ သူတို့တွေ ပြန်လည်ပေါင်းစပ်သွားတဲ့အခါ ကျင့်ကြံမှုအဆင့်က အများကြီး တိုးတက်သွားတယ်။"

"နောက်ဆုံးတစ်ခုကတော့ အထက်အလောင်းကိုပဲ ထိန်းသိမ်းထားတာ။" ထိုသို့ပြောစဉ် တန်ယွန်၏ အမူအရာ မှောင်မိုက်သွားပြီး အသံ တိုးသွား၏။

"အောက်အလောင်းက သံယောဇဉ်ကြီးပေမယ့် အကြီးမားဆုံး ကံကြမ္မာကို ပိုင်ဆိုင်ထားတယ်။ အလယ်အလောင်းက လောဘကြီးပြီးတော့ ကံကြမ္မာကိုမြင်နိုင်စွမ်း ရှိတယ်။ အထက်အလောင်းကတော့ ရက်စက်ကြမ်းကြုတ်ပြီးတော့ အလောင်းသုံးလောင်းထဲမှာ အဆိုးရွားဆုံးလို့ လူသိများတယ်။ ပြိုင်ဘက်ကင်းတဲ့ နားလည်နိုင်စွမ်းရှိတယ်။ ရှေးခေတ်တုန်းကဆိုရင် တချို့ကျင့်ကြံသူတွေက စွမ်းအားအားလုံးကို မကောင်းဆိုးဝါး အလောင်းတွေပေါ်မှာ စုစည်းထားကြပြီးတော့ အဆင့်တစ်ခုကို ကျော်ဖြတ်ဖို့တောင် မလုပ်ကြဘူး။"

"သူတို့ရဲ့ဝိညာဉ်တွေက နောက်ဆုံးမှာ အထက်အလောင်းရဲ့ ဝါးမျိုတာကို ခံလိုက်ရပြီးတော့ လူသတ်တဲ့ မိစ္ဆာတွေဖြစ်သွားကြပေမယ့်..." တန်ယွန်က ပုခုံးတွန့်ကာ နောက်ပြောင်ပြီး သရော်သည့် လေသံဖြင့် ပြောသည်။ "အထက်အလောင်းကလည်း သူတို့ရဲ့ အစိတ်အပိုင်းတစ်ခုပဲဆိုတော့ ဘာမှမဖြစ်ဘူးလို့ သူတို့ ထင်ကြတာလေ။"

"ဒါက ကိုယ့်ကိုယ်ကိုယ် လှည့်စားတာ သက်သက်ပဲ။" ချန်ဟွိုက်အန်က နှုတ်ခမ်းကို တွန့်ကွေးလိုက်ပြီး မျက်လုံးများတွင် အေးစက်သော အရောင်တစ်ခု လင်းလက်သွားသည်။ "ဒါက မသေခင် သူတို့အတွက် စိတ်ပိုင်းဆိုင်ရာ နှစ်သိမ့်မှုသက်သက်ပဲလို့ ငါ ထင်တယ်။ ဘာပဲဖြစ်ဖြစ် ကိုယ့်အထဲမှာ ရှိနေတဲ့ တခြား မကောင်းဆိုးဝါး လူသတ်ကိုယ်ရည်ကိုယ်သွေးတစ်ခုရဲ့ ဝါးမျိုတာကို ဘယ်သူက ခံချင်မှာလဲ။"

"စီနီယာ ပြောတာ မှန်ပါတယ်။" တန်ယွန်ညင်သာစွာ ပြုံးလိုက်သည်။

"ဒါဆို အပေါ်က အခြေအနေတွေထဲက ဘယ်ဟာက သူတော်စင်ယွိစီရဲ့အခြေအနေ ဖြစ်မယ်လို့ မင်း ထင်လဲ။" ချန်ဟွိုက်အန်က ရှေ့သို့ အနည်းငယ် ကိုင်းကာ မေးလိုက်သည်။

"ပထမအမျိုးအစား ဖြစ်မယ်လို့ ထင်တယ်၊" တန်ယွန်က တွေးတောနေဟန်ဖြင့် လက်ချောင်းများကို စားပွဲပေါ် ညင်သာစွာ ခေါက်ရင်း ပြောလိုက်သည်။ "ပထမအမျိုးအစားရဲ့လက္ခဏာက အလောင်းသုံးခုရဲ့ ကျင့်ကြံမှု အဆင့်က မူလခန္ဓာကိုယ်လောက် မမြင့်ဘူး။ ဒါမှမဟုတ် လုံးဝကို မရှိတာ။ ဗေဒင်ဆရာမလေး ၏ရဲ့ အခြေအနေလိုမျိုးပေါ့။ သူ့ရဲ့အဆင့်ကို အာရုံခံလို့ မရဘူး။ ဒါပေမဲ့ ဝိညာဉ်စွမ်းအားကတော့ အားကောင်းတယ်။"

"ဒါဆိုရင် မင်းရဲ့အမြင်အရ သူတော်စင်ယွိစီရဲ့ တကယ့်ခန္ဓာကိုယ်ကို ဘယ်လို ရှာသင့်တယ်ထင်လဲ။"

"ဒါက အရမ်းကို ရိုးရှင်းပါတယ်။" တန်ယွန်က အနည်းငယ် ပြုံးလျက် ပြောသည်။ "ကျွန်မတို့က သူတော်စင်ယွိစီရဲ့ အတွင်းအလောင်းကို ပြုစုပျိုးထောင်ပေးဖို့ပဲ လိုတယ်။ ပြီးရင် သူက သူတော်စင်ယွစီကို သွားရှာလိမ့်မယ်။"

လောဘကြီးတဲ့၊ အဂတိလိုက်စားတဲ့ အရာရှိတွေကို ပြုစုပျိုးထောင်ရသလိုပေါ့။

ဆိုလိုတာက သူ့ကို ဝိညာဉ်ကျောက်တုံးတွေ ပုံအောပြီးပေးရမယ်ဆိုတဲ့ သဘောလား။

ချန်ဟွိုက်အန်နှင့် တန်ယွန်တို့ အချင်းချင်း ပြုံးရယ်လျက် ကြည့်လိုက်ကြပြီး သူတို့၏ မျက်လုံးများတွင် နားလည်မှုတစ်ခု လင်းလက်သွား၏။

"ရှင့်ရဲ့အကြံဉာဏ်က ကောင်းပါတယ်။" တန်ယွန်က ရယ်မောလိုက်သည်။ "ကျွန်မရဲ့ အကြံဉာဏ်ကတော့ သူ့ကို ဝိညာဉ်ကျောက်တုံးတွေ ကျွေးဖို့ပဲ။ ဒါပေမဲ့ အဆင့်မြင့် ဝိညာဉ်ကျေောက်တုံးတွေ ဒါမှမဟုတ် ဝိညာဉ်ပုံဆောင်ခဲတွေတော့ မဟုတ်ဘူး၊ အဲဒါက အရမ်းကို နှမြောစရာ ကောင်းတယ်။ အလယ်အလတ်ကနေ အနိမ့်ဆုံးအဆင့် ဝိညာဉ်ကျောက်တုံးတွေဆိုရင် လုံလောက်ပါတယ်။ ပုံမှန်မလိုအပ်တဲ့ ဆေးလုံးတွေ ဒါမှမဟုတ် မှော်လက်နက်တွေကိုလည်း သူ့ကို ကျွေးလို့ရတယ်။"

ချန်ဟွိုက်အန်၏ နှုတ်ခမ်းများ တွန့်ကွေးသွား၏။

ဘုရားရေ။ ဒါ ဘယ်လို အသုံးမကျတဲ့ အလောင်းမျိုးလဲ။

အကုန်စားတာပဲ။

"အမေ၊ ဘိုးဘေးကြီး၊ ဘာတွေ ပြောနေကြတာလဲ။ မနက်စောစောစီးစီး..." တိုးညှင်းသော အသံတစ်ခု ထွက်ပေါ်လာ၏။

"ငါတို့ ယွိစီ အကြောင်း ပြောနေတာ။" တန်ယွန်ခေါင်းလှည့်လိုက်သော်လည်း သမီးဖြစ်သူ တန်ပိုင်၏ လက်ကောက်ဝတ်ကို မြင်လိုက်ရသောအခါ အမူအရာ အကြီးအကျယ် ပြောင်းလဲသွားတော့သည်။

"ရှောင်ပိုင်။ နင့်လက်ကောက်ဝတ်ပေါ်က မိခင်နဲ့ကလေး လက်ကောက် ဘယ်ရောက်သွားပြီလဲ။" သူ၏ အသံမှာ တင်းမာ၏။

"ဒီမှာ ရှိတယ်လေ..." တန်ပိုင်က လက်ကိုမြှောက်ပြီး တစ်ချက် ကြည့်လိုက်ရာ အမူအရာ ပြောင်းလဲသွားသည်။

မိခင်နဲ့ကလေးလက်ကောက် ပျောက်သွားလေပြီ။

မိခင်လက်ကောက်က သူ၏လက်ကောက်ဝတ်တွင်ရှိပြီး ကလေးလက်ကောက်က ဗေဒင်ဆရာမလေး၏ လက်ကောက်ဝတ်တွင် ရှိသည်။

လက်ကောက်အသေးက အကွာအဝေးတစ်ခုကို ရောက်သွားလျှင် လက်ကောက်အကြီးက ၎င်းကို အာရုံခံနိုင်၏။

သို့သော် အခုတွင် မိခင်လက်ကောက်က ခြေရာလက်ရာမကျန် ရုတ်တရက် ပျောက်သွားလေပြီ။

"ဒုက္ခပါပဲ။ အဲဒီမိန်းကလေး ထွက်ပြေးသွားပြီ။" တန်ယွန်၏မျက်နှာ ဖြူရော်သွားသော်လည်း သူ အမြန် ပြန်လည်တည်ငြိမ်သွားပြီး ချန်ဟွိုက်အန်ကို ရှင်းပြသည်။

"ဒါပေမဲ့ မိခင်နဲ့ကလေးလက်ကောက်က ကျွန်မရဲ့ ပထမဆုံး ကာကွယ်ရေးလမ်းကြောင်း သက်သက်ပါ။ အခင်းအကျင်းတွေနဲ့ ခြေရာခံအဆောင်တွေလည်း ရှိသေးတယ်။"

သူက သမီးဖြစ်သူနှင့် ချန်ဟွိုက်အန်ကို လိုဏ်ဂူထဲသို့ အလောတကြီး ခေါ်သွားသည်။

သူတော်စင်ယွိစီအတွက် မူလက ရည်ရွယ်ထားသော အခန်းက ယခုအခါတွင် ဗလာဖြစ်နေလေပြီ။ အခင်းအကျင်းများနှင့် ကန့်သတ်ချက်များ ဖျက်ဆီးခံထားရပြီး ဝိညာဉ်ကျောက်တုံး အပိုင်းအစ အနည်းငယ်သာ ကျန်ရစ်ခဲ့သည်။

"သူ့ရဲ့ ရည်ရွယ်ချက်က ငါတို့ဂိုဏ်းကို လာဖို့ဆိုရင် ဘာလို့ ထွက်ပြေးသွားတာလဲ။"

ချန်ဟွိုက်အန် ဆောင့်ကြောင့်ထိုင်ချလိုက်ပြီး၊ ဝိညာဉ်ကျောက်တုံး အပိုင်းအစတစ်ခုကို ကောက်ယူကာ နားမလည်နိုင်အောင် ဖြစ်နေသည်။

သို့သော် ထို့နောက်တွင် ရုတ်တရက် တစ်ခုခုကို သတိရသွားသည့်အလား ပေါင်ကိုရိုက်လိုက်ပြီး အမူအရာ အကြီးအကျယ် ပြောင်းလဲသွားတော့သည်။

"ဒုက္ခပဲ။ ငါ့ရဲ့ ဝိညာဉ်ကျောက်တွင်း။"

...