အခန်း ၂၁၃

အပိုင်း(၂၁၃) မိုးအောက်မြေပြင်မှာ ငါသာ အရှင်သခင်ပဲ

ကောင်းကင်ပြည်နယ်၊ အမည်မသိ စွန့်ပစ်ထားသော တားမြစ်နယ်မြေတစ်ခုတွင်။

အပြင်ဘက် ဧရိယာတွင် ပင်လယ်လွှမ်းနယ်ပယ် ကျင့်ကြံသူ အနည်းငယ်သည် လရောင်ထွန်းလင်းနယ်ပယ် အထွတ်အထိပ်အဆင့်ရှိ လူလတ်ပိုင်းအရွယ် အမျိုးသားတစ်ဦး၏ နောက်မှကပ်လျက် လိုက်ပါလာကြသည်။ သူတို့က အရှိန်အဝါများကို ဖုံးကွယ်ထားပြီး ပတ်ဝန်းကျင်ကို သတိထား၍ လေ့လာစူးစမ်းနေရင်း စိတ်များကို စူးစိုက်ထားကြသည်။

လူလတ်ပိုင်း အမျိုးသားက သေချာစွာနားထောင်ပြီးနောက် လက်ညှိုးကို နှုတ်ခမ်းပေါ်တင်ကာ တိတ်တိတ်နေရန် အချက်ပြပြီး တိုးတိုးလေး ပြောလိုက်သည်။

"တားမြစ်နယ်မြေက အန္တရာယ်များတယ်။ ငါတို့ သခင်က နံနက်ခင်းအလင်းနယ်ပယ် နှောင်းပိုင်းအဆင့်ကို ဖောက်ထွက်နိုင်ဖို့အတွက် အထွတ်အမြတ်ဆေးမြစ်ကို ရှာမတွေ့ခဲ့ဘူးဆိုရင် ဒီလောက် အနက်ရှိုင်းဆုံးနေရာကို ငါတို့တွေ အသက်စွန့်ပြီး ဝင်လာမှာ မဟုတ်ဘူး။ ဘာပဲဖြစ်ဖြစ် ရောက်လာမှတော့ အကောင်းဆုံးဖြစ်အောင် ကြိုးစားကြတာပေါ့။"

"ဘိုးဘေးရဲ့ နှုတ်မိန့်အရတော့ အထွတ်အမြတ်ဆေးမြစ်က ဒီအနီးအနားမှာ ရှိနေတယ်။ သဘာဝတရားက အရာအားလုံးဟာ ဝိညာဉ်ကို ပြုစုပျိုးထောင်ဖို့ ဖန်တီးထားတာဖြစ်ပြီးတော့ အထွတ်အမြတ်ဆေးမြစ် အများစုက အသိဉာဏ်နဲ့ မွေးဖွားလာကြပြီး သဘာဝဓာတ်ကြီးငါးပါး လွတ်မြောက်ရေး နည်းစနစ်မှာ ကျွမ်းကျင်ကြတယ်။ ငါတို့တွေ အတော်လေးကို သတိထားရမယ်။"

လူတိုင်းက လေးနက်စွာ ခေါင်းညိတ်ပြီး တိတ်ဆိတ်နေလိုက်ကြသည်။

ဤတားမြစ်နယ်မြေကို ကောင်းကင်ပြည်နယ်တွင် တတိယမြောက် အန္တရာယ်အများဆုံး နေရာအဖြစ် လူသိများသည်။ နံနက်ခင်းအလင်းနယ်ပယ်မှ သာမန်လူများပင် ဝင်လာပါက ရုတ်တရက် သေဆုံးသွားနိုင်သည်။ ဤလူစုသာ သတိမထားပါက သင်္ဂြိုဟ်စရာ မြေမရှိဘဲ သေဆုံးရလိမ့်မည်။

လဝက်မျှ အချိန်အတွင်း လူ(၁၀၀)ပါဝင်သောအဖွဲ့က ဆယ်ဂဏန်းခန့်သာ ကျန်ရှိတော့သည်အထိ လျော့နည်း၍ သွားခဲ့သည်။

ကံကောင်းထောက်မစွာဖြင့် အောင်ပွဲ၏အရုဏ်ဦးက ထောင့်ချိုးလေးတွင် ရှိနေပြီဖြစ်ပြီး လွန်ခဲ့သော ရက်အနည်းငယ်က ကြုံတွေ့ခဲ့ရသော ထိတ်လန့်မှုနှင့် စိတ်ဓာတ်ကျမှုများမှာ နောက်ဆုံးတွင် အနည်းငယ် လျော့ကျသွားခဲ့သည်။

"တွေ့ပြီ။ သဘာဝဓာတ်ကြီးငါးပါး အထွတ်အမြတ်ဆေးမြစ်..." လူငယ်တစ်ဦးက အံ့ဩဝမ်းသာစွာဖြင့် နတ်ဘုရားအာရုံမှတစ်ဆင့် အော်ဟစ်လိုက်သည်။

စွမ်းအင်များ ပြည့်ဝနေသော အဖွဲ့က လျင်မြန်စွာ ချဉ်းကပ်သွားပြီး ထိုဧရိယာကို ဝိုင်းရံလိုက်သည်။ သေချာစွာ ကြည့်လိုက်သောအခါ စိမ်းလန်းသော မြက်ခင်းပြင်တစ်ခုတွင် မျိုးစေ့များ စိုက်ပျိုးနေသော ခြင်းတောင်းကို လွယ်ကာ ပေါက်ပြားကို ကိုင်ဆောင်ထားသည့် လူပုအဘိုးအိုတစ်ဦးကို တွေ့လိုက်ရသည်။

လူလတ်ပိုင်း အမျိုးသားက မျက်လုံးများကို ကျဉ်းလိုက်ပြီး အသက်ရှူရန်ပင် မဝံ့ရဲပေ။

အဲဒါက တကယ်ကို အသိဉာဏ်ရှိလာပြီ…

အထွတ်အမြတ်ဆေးမြစ်က လူသားတစ်ယောက်အဖြစ် ပြောင်းလဲသွားပြီး အသိဉာဏ် ဖွံ့ဖြိုးလာခဲ့ပြီ။

"ရွှေက သစ်သားကို ထောင်ချောက်ဆင်တယ်။ ဟွန်ယွမ်ဆေးအိုးကိုယူ။"

"ရေက မီးကို အနိုင်ယူတယ်။ ဒါကြောင့် နတ်ဆိုးဘုရင်ရဲ့ဆေးလုံးကိုယူ။"

"မြေကြီးက ရေကို လက်ခံတယ်။ သန့်စင်တဲ့ ဝိညာဉ်မြေအောက်ကမ္ဘာမြေကြီးကိုယူ။"

"မြေကြီးကို ဆွဲထုတ်ဖို့ သစ်သားကို သုံးတယ်။ ကောင်းကင်ကို ထိစပ်နေတဲ့ သစ်ပင်ဆီကနေ အကိုင်းအခက်တွေကိုယူ။"

"မီးက ရွှေကို အရည်ပျော်စေတယ်။ ဘဝသုံးဆက်ရဲ့ အနှစ်သာရကို မသေမျိုး မီးတောက်တွေအဖြစ် ပြောင်းလဲလိုက်။"

လူလတ်ပိုင်း အမျိုးသားက လူပုအဘိုးအိုကို မျက်စိဒေါက်ထောက် ကြည့်နေစဉ် သူ၏မိသားစုမှ လူငယ်များကို တိတ်တဆိတ် ညွှန်ကြားချက်များ ပေးနေခဲ့သည်။

လူငယ်မျိုးဆက်မျာက သဘာဝဓာတ်ကြီးငါးပါးနှင့် ၎င်းတို့၏ အပြန်အလှန် ထိန်းချုပ်မှုများကို ကိုယ်စားပြုသော ဝိညာဉ်ရတနာများကို ပြင်ဆင်ပြီးသွားသောအခါ လူလတ်ပိုင်း အမျိုးသား၏ နှလုံးသားမှာ လည်ချောင်းဝသို့ ရောက်နေသကဲ့သို့ ဖြစ်နေသည်။ သူ အချိန်အတော်ကြာ စောင့်ဆိုင်းပြီးနောက် အသံလွှင့်ကာ ပြောလိုက်သည်။

"ခဏနေရင် အားလုံးကို တစ်ပြိုင်နက်တည်း မပစ်ထုတ်လိုက်နဲ့။ အဲဒါက လှုပ်ရှားလာတိုင်း ငါတို့က တုံ့ပြန်ဖို့ လိုတယ်။ နားလည်လား။ ငါ့ညွှန်ကြားချက်တွေ လိုက်နာပြီး ဒီအထွတ်အမြတ်ဆေးမြစ်က ဘယ်လွတ်မြောက်ရေး နည်းစနစ်ကို အရင်သုံးမလဲဆိုတာ စောင့်ကြည့်။ အဲဒါကို ထောင့်ကျဉ်းထဲ ရောက်သွားတဲ့အထိ လုပ်ရမယ်။"

မျိုးစေ့များကို စိုက်ပျိုးနေသော လူပုအဘိုးအိုက ကျောကို မတ်လိုက်ပြီး ကျောက်စိမ်း ပုလင်းငယ်တစ်ခုကို ထုတ်ယူကာ နဖူးမှချွေးများကို ဂရုတစိုက်သုတ်ပြီး ပုလင်းထဲသို့ စုဆောင်းလိုက်သည်။

အထွတ်အမြတ်ဆေးမြစ်အရည်ဆိုသည်မှာ လောဘကြီးပြီး အရှက်မရှိသော လူသားများက ရတနာတစ်ခုအဖြစ် သတ်မှတ်ထားသော စီးဆင်းနေသည့် အရည်တစ်ခု ဖြစ်သည်။ အရေးကြီးသော အချိန်များတွင် အရည်ကို ရတနာများဖြင့် လဲလှယ်ရန် အသုံးပြုနိုင်သည်။ သို့မဟုတ် အသက်ကို ကယ်တင်ရန် ပစ်ထုတ်နိုင်၏။

ရုတ်တရက်။

လူပုအဘိုးအိုက နောက်လှည့်ပြီး အဝေးရှိ မှောင်မိုက်နေသောဟူခိုတောင်တန်းကို တိတ်ဆိတ်စွာ စိုက်ကြည့်၍ နေသည်။ သူ၏နားထင်မှ ဆံပင်ဖြူများမှာ ဖရိုဖရဲဖြစ်နေပြီး သူ၏ဘေးတစ်ဖက်တစ်ချက်တွင် နားရွက် ခြောက်ခု စုစုပေါင်း ပါရှိသည်။

"မိုက်မဲတဲ့ လူသားတွေ။" လူပုအဘိုးအိုက မထီမဲ့မြင်ပြုကာ ရယ်မောလိုက်သည်။

၎င်းကို မြင်သောအခါ အဝေးတွင် ပုန်းအောင်းနေသော လူလတ်ပိုင်းအမျိုးသား၏ မျက်နှာအမူအရာ ချက်ချင်း ပြောင်းလဲသွားပြီး ထိတ်လန့်တကြား အော်ဟစ်လိုက်သည်။ "ဒုက္ခပဲ... "

"ဒီအထွတ်အမြတ်ဆေးမြစ်က ငါတို့ရဲ့အသံတွေကို ကြားနိုင်တယ်။ မြန်မြန် လှုပ်ရှားကြ... "

လူပုအဘိုးအိုက ပေါက်ပြားကို ပစ်ချလိုက်ပြီး လက်ခုပ်တီးကာ လူတိုင်း၏ ရှေ့မှောက်တွင် မြေကြီးထဲသို့ ပျောက်ကွယ်သွားပြီး မျက်စိတစ်မှိတ်အတွင်း မိုင်ထောင်ချီ ဝေးကွာသော နေရာသို့ ရောက်ရှိသွားတော့သည်။

လူအုပ်ကြီးက အလျင်စလို ပြေးထွက်လာကြပြီး သဘာဝဓာတ်ကြီးငါးပါး မှော်လက်နက်များကို တစ်ခုပြီးတစ်ခု ပစ်ထုတ်လိုက်ကြသော်လည်း နောက်ကျသွားဆဲဖြစ်သည်။

"လခွမ်းပဲ... ငါတို့ရဲ့ ကြိုးစားအားထုတ်မှုတွေ အားလုံး အလကား ဖြစ်သွားပြီ... " လူလတ်ပိုင်းအမျိုးသားက သူ၏ ပေါင်ကိုရိုက်ကာ အလွန် ဒေါသထွက်နေသည်။

ထိုစဉ်မှာပင်။

လူငယ်တစ်ဦးက ဆောင့်ကြောင့်ထိုင်ကာ မြေကြီးကို ထိကြည့်ပြီး အနည်းငယ် တုန်ခါမှုကို ခံစားလိုက်ရကာ ပြောလိုက်သည်-

"ဦးလေး။ တစ်ခုခု ဖြစ်နေတယ်။"

"မြေနဂါး လှည့်တာလား။ ဒီတားမြစ်နယ်မြေရဲ့ မြေကြီးနဲ့ကျောက်ဆောင်တွေက ကောင်းကင်သတ္တုလောက်ကို မာကျောတာ။ ဘယ်လိုလုပ် ဒါမျိုး ဖြစ်နိုင်မှာလဲ... "

"နံနက်ခင်းအလင်းနယ်ပယ်က အစွမ်းထက်တဲ့ နတ်ဆိုးတစ်ကောင် ပေါ်လာတာများလား... "

လူတိုင်း၏မျက်နှာအမူအရာ ပြင်းထန်စွာ ပြောင်းလဲသွားပြီး လူလတ်ပိုင်းအမျိုးသားကို လှမ်းကြည့်လိုက်ရာ သူ၏ မျက်နှာမှာ ပြာနှမ်းနေပြီး နှုတ်ခမ်းများ အနည်းငယ် တုန်ယင်နေသည်ကို တွေ့လိုက်ရ၏။

"ဒါက... ဒါက... ကိုယ့်ကိုယ်ကိုယ် တာအိုအဖြစ် ပြောင်းလဲတာ။ ကိုယ့်ကိုယ်ကိုယ် ထိန်းသိမ်းဖို့ မဟာတာအို သုံးထောင်ကို လုယူတာပဲ။ အဲဒါက ကောင်းကင်နဲ့ မြေကြီးအတွက် လက်ခံနိုင်စရာမရှိတဲ့ အရာပဲ။"

"တစ်ယောက်ယောက်က ကောင်းကင်ထောက်တိုင်နယ်ပယ်ကို ဖောက်ထွက်နေတယ်... "

သူတို့ မတုံ့ပြန်နိုင်ခင်မှာပင် မှောင်မိုက်သောတိမ်တိုက်များက ကောင်းကင်ကို ဖုံးလွှမ်းသွားပြီး မိုင်ထောင်ချီ ဖြန့်ကျက်သွားကာ ကိုးလွှာသောကောင်းကင်ဘုံမှ မိုးကြိုးအတိဒုက္ခတစ်ခု ဆင်းသက်လာသည်။

အရပ်မြင့်မြင့် ပုံရိပ်တစ်ခုက ကောင်းကင်ယံသို့ တစ်လှမ်းချင်း တက်လှမ်းသွားပြီး သူ၏ဆံပင်နက်များက လေပြင်းကြောင့် အနောက်သို့ လွင့်ပျံနေကာ မျက်လုံးများက လျှပ်စီးများကဲ့သို့ တောက်ပနေပြီး ရောင်ဝါမှာ နတ်ဘုရားတစ်ပါးကဲ့သို့ ခမ်းနားကြီးကျယ်လှသည်။

"အထွတ်အမြတ်ဆေးမြစ်လား... "

"ဒီအခွင့်အရေးက ငါ ပိုင်တာပဲ။"

ထိုပုံရိပ်က ကောင်းကင်ယံသို့ တက်လှမ်းသွားပြီး ခေါင်းကိုလှည့်ကာ ဟင်းလင်းပြင်ကို ဖောက်ထွင်းကြည့်လိုက်ရာ မိုင်တစ်သိန်းကျော် ကွာဝေးသော ထောင့်တစ်နေရာဆီသို့ အကြည့်ရောက်သွားသည်။ ဟင်းလင်းပြင်ကိုဖြတ်၍ ဆုပ်ကိုင်လိုက်ရာ လူပုအဘိုးအိုက ဆွဲခေါ်ခံလိုက်ရ၏။

ချက်ချင်းပင် ထိုပုံရိပ်က ကောင်းကင်ယံသို့တက်လှမ်းသွားပြီး အသက်ပြင်းပြင်းရှူကာ အထွတ်အမြတ်ဆေးမြစ်၏ အနှစ်သာရအားလုံးကို နှာခေါင်းမှတစ်ဆင့် စုပ်ယူလိုက်ပြီး မျက်စိတစ်မှိတ်အတွင်း လူပုအဘိုးအိုကို သန့်စင်ပစ်လိုက်သည်။

"မဟာတာအို သုံးထောင်လုံး ငါ့ခန္ဓာကိုယ်ထဲကို ပြန်ရောက်လာပြီ... "

"ကောင်းကင်ဘုံအားလုံးနဲ့ ခေတ်အဆက်ဆက်က ငါ့ကို ဘုရင်အဖြစ် ကြေညာကြစမ်း... "

"ကမ္ဘာအားလုံး ပြီးပြည့်စုံသွားပြီ... "

ဟိန်းဟောက်သံက ကောင်းကင်နှင့်မြေကြီး တစ်ခွင်လုံး ပဲ့တင်ထပ်သွားပြီး ကောင်းကင်ပြည်နယ် တစ်ခုလုံးကို တုန်ခါသွားစေသည်။ မရေမတွက်နိုင်သော အစွမ်းထက် ပုဂ္ဂိုလ်များမှာ ထိတ်လန့်သွားကြပြီး အဝေးမှနေ၍ သူတို့၏ အကြည့်များကို လှမ်းကြည့်လိုက်ကြသည်။

မျက်စိတစ်မှိတ်အတွင်း အတိဒုက္ခကို ဖြတ်သန်းနေသော ထိုပုံရိပ်က လူတိုင်း၏အာရုံစိုက်ရာ ဖြစ်လာခဲ့သည်။

"အဲဒါ ကျိမိသားစုရဲ့ သခင်လေးပဲ။ သူက... ကောင်းကင်ထောက်တိုင်နယ်ပယ်ကို ဖောက်ထွက်တော့မလို့လား... "

"ကောင်းကင်ပြည်နယ်က သူရဲကောင်းတွေကြား နှစ်ထောင်ချီကြာခဲ့တဲ့ ရုန်းကန်မှုကြီး အဆုံးသတ်တော့မှာလား။"

"ကျိမိသားစုက ကမ္ဘာကြီးကို ပေါင်းစည်းမယ့်သူ ဖြစ်လာဖို့များတယ်။ ငါတို့ ချက်ချင်း စစ်စတင်ရမယ်။ ကျိမိသားစု ကောင်လေးရဲ့ အတိဒုက္ခကို အခွင့်ကောင်းယူပြီးတော့ ကျိမိသားစု တစ်ခုလုံးကို ရှင်းပစ်မယ်။ နဂါးသွေးကြောကို ဖြတ်တောက်၊ ဘေးဒုက္ခအတွက် အခွင့်အရေးကို ဖျက်ဆီးပြီး အတင်းအကျပ် ရပ်တန့်ပစ်ရမယ်... "

"သေချာတာပေါ့။ ကျိမိသားစု ကောင်လေးကို ကောင်းကင်ထောက်တိုင်နယ်ပယ်ကို ဖောက်ထွက်ခွင့် မပေးနိုင်ဘူး။ အဲဒီလိုမှမဟုတ်ရင် နယ်ပယ်တူချင်းမှာ သူ့ကို ဘယ်သူက ယှဉ်နိုင်မှာလဲ။"

"လက်လျှော့မနေကြနဲ့။ မိသားစုတိုင်းက ကောင်းကင်ဘုံဘိုးဘေးတွေကို စေလွှတ်ပြီး ကျိမိသားစုကို ဝိုင်းရံ၊ နဂါးသွေးကြောကို ဖြတ်တောက်ပြီး အဆင့်တက်မယ့် အခွင့်အရေးကို အနှောင့်အယှက် ပေးရမယ်။"

...

ကျိဝူရွှမ်က အဝေးမှ တစ်ချက်ကြည့်လိုက်ပြီး ရယ်မောကာ ခေါင်းခါယမ်းလိုက်ပြီး သိပ်ဂရုမစိုက်ပေ။

ကောင်းကင်ဧကရာဇ်၏ အတိဒုက္ခကို အနှောင့်အယှက် ပေး၍မရနိုင်ပေ။ ဤလူယုတ်မာများသည် ကျိမိသားစု၏ နဂါးသွေးကြောကို အမြစ်မှဖြတ်တောက်ရန်သာ ကြိုးစားနိုင်ကြသည်။ ကျိဝူရွှမ်သည်လည်း ပြင်းထန်သော ဒဏ်ရာများကို ခံစားရမည်ဖြစ်ပြီး အတိဒုက္ခကို ကျော်လွှားရန် သူ၏ အခွင့်အရေးမှာ လျော့ကျသွားမည်ဖြစ်သည်။

သို့သော် ကမ္ဘာကြီး မသိသေးသည်မှာ ကျိဝူရွှမ်တွင် နောက်ထပ် သရုပ်တစ်ခု ရှိနေခြင်းပင်။

ကောင်းကင်ကြည့်ဆောင်၏ အဖွဲ့ဝင်တစ်ဦး၊ ထို့ပြင် နောက်ထပ် ဧကရာဇ်အဖြစ် သတ်မှတ်ခံထားရသူပင်...

ဤအခိုက်အတန့်တွင် ကျိဝူရွှမ်က ကောင်းကင်ထောက်တိုင်နယ်ပယ်သို့ ဖောက်ထွက်တော့မည်ဖြစ်ပြီး ကောင်းကင်ကြည့်ဆောင်က မည်သူ့ကိုမျှ ဝင်ရောက်စွက်ဖက်ခွင့် ပြုမည်မဟုတ်ပေ။

"မုန့်ချင်း... မင်း ဒါကို မျှော်လင့်မထားခဲ့ဘူးမလား။ ကောင်းကင်ထောက်တိုင်နယ်ပယ်ကို ဖောက်ထွက်ဖို့အတွက် နောက်ထပ် လအနည်းငယ်ကြာဦးမယ်လို့ ပြောခဲ့ပေမဲ့၊ တကယ်တမ်း ငါက အခွင့်အရေးကို အာရုံခံမိနေခဲ့ပြီးပြီ။"

"ငါ အဆင့်တက်ပြီးတာနဲ့ မင်းရဲ့ သေဆုံးမှုက အချိန်လိုတော့မှာ မဟုတ်ဘူး... "

မျက်စိတစ်မှိတ်အတွင်း သုံးရက် ကုန်လွန်သွားခဲ့လေပြီ။

ကောင်းကင်ပြည်နယ်တွင် တတိယမြောက် အန္တရာယ်အများဆုံးနေရာနှင့် အစွမ်းထက် ပုဂ္ဂိုလ်များကို သင်္ဂြိုဟ်နိုင်သော စစ်မြေပြင်အဖြစ် လူသိများသည့် တားမြစ်နယ်မြေက ယခုအခါ မိုးကြိုးအတိဒုက္ခကြောင့် လုံးဝ ဖျက်ဆီးခံလိုက်ရပြီး မိုင်သန်းပေါင်းများစွာ ကျယ်ဝန်းသော ဧရိယာကို အပျက်အစီးများအဖြစ် ချန်ရစ်ခဲ့သည်။

လေထဲတွင်။

ရေတံခွန်ကဲ့သို့ စီးဆင်းနေသော ဆံပင်နက်များနှင့် အင်္ကျီဗလာဖြစ်နေသော ကျိဝူရွှမ်က ကျယ်လောင်စွာနှင့် အထိန်းအကွပ်မရှိ ရယ်မောလိုက်သည်-

"ဟားဟား... ဟားဟားဟား... "

"ကောင်းကင်ထောက်တိုင်နယ်ပယ် ရောက်ပြီ။ ကောင်းကင်ပြည်နယ်ရဲ့ ကြီးစိုးသူက အခု ပေါ်ပေါက်လာပြီ... "

ရယ်မောနေစဉ် ကျိဝူရွှမ်၏မျက်နှာအမူအရာမှာ တဖြည်းဖြည်း မည်းမှောင်လာသည်။ သူက လက်ချောင်း နှစ်ချောင်းကို ပွတ်သပ်ရင်း သူ့ကိုယ်သူ တိုးတိုးလေး ရေရွတ်လိုက်သည်။

"တောရိုင်းမြေ၊ အချိန်-နေရာလွတ် ဓားသူတော်စင် မုန့်ချင်း။"

"ငါ့ကို အနိုင်ယူနိုင်တဲ့ နယ်ပယ်တူထဲက တစ်ဦးတည်းသောသူက မင်းပဲ။ ဒါပေမဲ့ အဲဒီတုန်းက အဲဒါက ငါ့ရဲ့ ကိုယ်ပွားအတု သက်သက်ပဲ။"

"ဒီတစ်ကြိမ်မှာတော့ ငါ့ရဲ့ အစစ်အမှန်ပုံစံနဲ့ မင်းကို လာတွေ့မယ်။ မင်းကို နာကျင်မှု ခံစားရအောင် လုပ်မယ်၊ မင်းကို လူတစ်ပိုင်း ဝက်တစ်ပိုင်းအဖြစ် ပြောင်းလဲပစ်မယ်။ ပြီးတော့ မင်းရှေ့မှာ ချင်းလျူလီကို အရှက်ခွဲပစ်မယ်။"

ရုတ်တရက်။

သူ၏နားထဲတွင် တိုးညင်းပြီး အထီးကျန်ဆန်သော အသံတစ်ခု ပေါ်ထွက်လာသည်။

"ကျိမိသားစုရဲ့ ဝိုင်းရံမှုက နှောင့်နှေးသွားပြီ။ ကောင်းကင်ပြည်နယ် ကြီးစိုးသူ ရာထူးကို မင်း လုယူချင်တယ်ဆိုရင် ကောင်းကင်စောင့်ကြည့်ဆောင်ရဲ့ အကူအညီကို မင်း အားကိုးလို့ မရဘူး။ မိသားစုတွေနဲ့ အင်အားစုတွေ အားလုံးကို မင်းကိုယ်တိုင် ကိုယ်ကျ နှိမ်နင်းရလိမ့်မယ်။ ပြီးတော့ အဲဒီအမြင့်မားဆုံးဘိုးဘေးတွေကို မင်းဘက် ပါလာအောင် လုပ်ရလိမ့်မယ်။"

ထိုစကားကို ကြားသောအခါ ကျိဝူရွှမ် အနည်းငယ် ခေါင်းညိတ်ပြီး ပြောလိုက်သည်။

"လူကြီးမင်း... ကျွန်တော် နားလည်ပါတယ်။"

"ကောင်းကင်ကြည့်ဆောင်က ကမ္ဘာကြီးရဲ့ အပြင်ဘက်မှာ ခရီးသွားနေတာ နှစ်ပေါင်းများစွာ ကြာခဲ့ပြီ။ အဲဒါသာ ပါဝင်ပတ်သက်လာတာနဲ လူသားဧကရာဇ်ရဲ့ နောက်ဆုံးအာဏာအပေါ် သက်ရောက်မှု ရှိလိမ့်မယ်။ ကျွန်တော် လူသားဧကရာဇ်ရဲ့ ထီးနန်းကို တက်ချင်တယ်ဆိုရင် လူတိုင်းကို တစ်ယောက်ချင်းစီ နှိမ်နင်းရမယ်... "

ကောင်းကင်ကြည့်ဆောင် အရှင်သခင်၏အသံမှာ လွမ်းဆွေးဖွယ်ကောင်းပြီး ယောကျ်ားလား မိန်းမလား ဆိုသည်ကို ခွဲခြားသိရန် မဖြစ်နိုင်ပေ။ ၎င်းက လိင်နှစ်မျိုးစလုံးနှင့် တူနေ၏။

"မင်း နားလည်တာ ကောင်းပါတယ်။"

ကျိဝူရွှမ်က လေထဲတွင် အချိန်အတော်ကြာ မတ်တပ်ရပ်နေပြီး ကောင်းကင်ကြည့်ဆောင် အရှင်သခင်က အကြည့်ကို လွှဲသွားပြီး မိမိကို ဂရုမစိုက်တော့ကြောင်း အတည်ပြုလိုက်သည်။ သူက မျက်ခုံးတွန့်ချိုးသွားပြီး သူ့ကိုယ်သူ လေးနက်စွာ ရေရွတ်လိုက်သည်။

"ကောင်းကင်ထောက်တိုင်နယ်ပယ်ကို တက်လှမ်းပြီးရင် ကောင်းကင်ကြည့်ဆောင် အရှင်သခင်နဲ့တန်းတူ ရပ်တည်နိုင်လိမ့်မယ်လို့ ငါ ထင်ခဲ့တာ။ ဒါပေမဲ့ ငါ ဒီလိုဖြစ်မယ်လို့ လုံးဝ မမျှော်လင့်ထားခဲ့ဘူး... "

"အသံရဲ့အရင်းအမြစ်ကို ငါ အခုထိ ခြေရာခံလို့ မရသေးဘူး။ သူက ဘယ်အဆင့်မှာ ရှိနေတာလဲ..."

"ကောင်းကင်ဘုံရဲ့အထက်မှာ... ကောင်းကင်နယ်ပယ်လား..."

ကျိဝူရွှမ်က ခေါင်းကိုခါယမ်းကာ စိတ်ကိုအနှောင့်အယှက်များမှ ကင်းစင်စေပြီး အကြည့်ကို ကျိမိသားစုဆီသို့ လှည့်လိုက်သည်။ ကျိမိသားစု ဘေးကင်းကြောင်း အတည်ပြုပြီးနောက် သူ အနည်းငယ် ပြုံးလိုက်၏။

ဤအခိုက်အတန့်တွင် အစွမ်းထက်သော ဘိုးဘေးများအားလုံး လှုပ်ရှားမှုများကို ရပ်တန့်ကာ တံခါးများကို ပိတ်ထားပြီး ကျိဝူရွှမ်က သူတို့နှင့် တစ်ယောက်ချင်းစီ အကောင့်ရှင်းမည့်အချိန်ကို စောင့်ဆိုင်းနေကြောင်း သူ အာရုံခံသိရှိနိုင်ပြီ ဖြစ်သည်။

ကျိဝူရွှမ်က တူညီသောနယ်ပယ်အတွင်း ပြိုင်ဘက်ကင်းပြီး ပိုမြင့်သော နယ်ပယ်မှ လူများကိုပင် သတ်နိုင်ကြောင်း လူတိုင်း သိကြသည်။

သူ့ကို မည်သူကမှ ထိန်းထားနိုင်မည် မဟုတ်ပေ။

"ဒါက တကယ့်ကို ပြဿနာပဲ။ မိသားစု အများအပြားကို ငါတို့ တစ်ယောက်ချင်းစီ ရှင်းလင်းပြီးပြီ။ ပြီးတော့ ကောင်းကင်ထောက်တိုင်နယ်ပယ် အလယ်အလတ်အဆင့်ကို ဖောက်ထွက်သွားတဲ့ ဘီလူးအိုကြီး တချို့တောင် ရှိနေသေးတယ်လား... "

"အပြည့်အဝ ပေါင်းစည်းမှု ရဖို့အတွက် သုံးလလောက် အချိန်ယူရလိမ့်မယ်။"

"ကောင်းပြီလေ မုန့်ချင်း... ငါ မင်းကို နောက်ထပ် သုံးလလောက် အသက်ရှင်ခွင့် ပေးလိုက်မယ်။"

…