အခန်း ၁၃၃

အခန်း (၁၃၃) တာအိုမိတ်ဆွေများ၊ အလင်းရဲ့အမြန်နှုန်းနဲ့ အပြစ်ဝန်ခံပါ

ချင်လော့က စနစ်က သူ့ကို ၆၁၈ ပရိုမိုးရှင်း ပေးလိမ့်မည်ဟု မမျှော်လင့်ထားခဲ့ချေ။

‘၆၁၈,၀⁠၀၀ ဟုတ်လား... ဝိုး... ဗီလိန်အမှတ် ၂၀⁠၀,၀⁠၀⁠၀ နီးပါးတောင် ကျန်သေးတာပဲ’

ရွေးချယ်စရာ နှစ်ခုကို ရင်ဆိုင်ရချိန်၌ ချင်လော့က တစ်ခဏမျှ စဉ်းစားပြီးနောက် ပထမရွေးချယ်မှုကို စွန့်လွှတ်လိုက်၏။

‘ယာယီ ကျင့်ကြံမှု... မဟာသူတော်စင်အဆင့် နောက်ဆုံးအဆင့် ဖြစ်နေရင်တောင်မှ ဘာဖြစ်လဲ’

‘အကျိုးအမြတ်က နည်းလွန်းတယ်... အဲဒါက ယာယီပဲလေ’

သို့သော် သူ၏ ဒုတိယရွေးချယ်မှုက အန္တရာယ်ရှိသည့် အရိပ်အယောင်တစ်ခုကို သယ်ဆောင်လာပုံရပြီး စနစ်က အမြဲတမ်း အစီအစဉ်များ ချမှတ်နေခဲ့လေသည်။

အသက်ရှူစွမ်းအားမြှင့်တင်ခြင်းနည်းလမ်းကို နတ်ဆိုးနှိမ်နင်းရေးဌာန၏ အကျဉ်းထောင်တွင် အကျဉ်းချခံရချိန်၌ အသုံးပြုရန် ဖြစ်ပေ၏။

အကယ်၍ သူသာ ကောင်းကင်အကျဉ်းထောင်တွင် အကျဉ်းချခံရပါက သူ၏ ကျင့်ကြံမှုက လုံးဝ ပိတ်လှောင်ခံရမည်ဖြစ်ပြီး သူ့အတွက် ကျင့်ကြံရန် အလွန် ခက်ခဲသွားမည် ဖြစ်လေသည်။

သို့သော် သူ အသက်ရှူခြင်းကို တားဆီး၍ မရနိုင်ပေ။

ထို့ပြင် စနစ်က ဗီလိန်အမှတ် ၂၀⁠၀,၀⁠၀⁠၀ နီးပါး ချန်ထားပေးခဲ့သည်မှာ ကြိုတင်ကာကွယ်မှု တစ်ခုအနေဖြင့် ဖြစ်နိုင်သလား...

"ဒါဆို ဒုတိယတစ်ခုကိုပဲ ရွေးလိုက်မယ်"

ချင်လော့က အများကြီး တွန့်ဆုတ်မနေဘဲ ပြတ်ပြတ်သားသား ပြောဆိုလိုက်၏။

သူ မဟာချင်အင်ပါယာ မြို့တော်သို့ ပြန်လာရသည့် အကြောင်းရင်းကို သူ မမေ့သေးချေ။

နတ်ဆိုးနှိမ်နင်းရေးဌာန၏ နတ်နဂါးကို ရှာဖွေရန် ဖြစ်ပေသည်။

[လဲလှယ်ခြင်း အောင်မြင်ပါသည်]

[ဗီလိန်အမှတ် ၆၁၈,၀⁠၀၀ ကို အသုံးပြုပါသည်]

[ကျန်ရှိသော ဗီလိန်အမှတ်များ - ၁၈၂,၀⁠၀၀ မှတ်]

[ကြက်သွန်မြိတ်ရိတ်သိမ်းရင်တောင် (အခြားသူများကို ခေါင်းပုံဖြတ်ခြင်းအတွက် တင်စားချက်) သူတို့ကို ကြီးထွားဖို့ အချိန်ပေးသင့်တယ် မဟုတ်ဘူးလား... ဗီလိန်တွေကို ဖိနှိပ်ပြီးနောက် ဒီကောင်းကင်တာအိုက ကံကြမ္မာသားတော် တစ်ယောက်ကို ရွေးချယ်ပါလိမ့်မယ်]

[ကံကြမ္မာသားတော်ကို သုတ်သင်ခြင်းက ကြီးမားတဲ့ ဆုချီးမြှင့်မှုတွေကို ရရှိစေပြီး ကောင်းကင်တာအိုကို ပြင်းပြင်းထန်ထန် ထိခိုက်စေပါလိမ့်မယ်]

"ဒါက ဘာအဓိပ္ပာယ်လဲ... ကောင်းကင်တာအိုက ငါ့ကို ကြောက်နေတာလား... ငါသာ အဖိနှိပ်မခံရရင် ကံကြမ္မာသားတော်က မွေးဖွားလာမှာ မဟုတ်ဘူးပေါ့"

ချင်လော့၏ စကားများတွင် လှောင်ပြောင်မှုများ ရောယှက်နေခဲ့၏။

"ဟမ်... ငါက ကောင်းကင်တာအိုတောင်မှ သတိထားရမယ့် အဆင့်ထိ ရောက်နေပြီလား"

[ကောင်းကင်တာအိုသည် ကံကြမ္မာသားတော် ရင်ဆိုင်နေရသော အန္တရာယ်ကို မသိစိတ်မှ အာရုံခံမိပါလိမ့်မည်... ကံကြမ္မာသားတော် ရှိနေခြင်းက ကောင်းကင်တာအို၏ ရှင်သန်နိုင်မည့် အကြီးမားဆုံး မျှော်လင့်ချက်ကို ကိုယ်စားပြုပြီး အန္တရာယ်ကို အစကတည်းက နှိမ်နှင်းပစ်ရပါမည်]

"ဘယ်လိုပဲဖြစ်ဖြစ် ငါက နတ်ဆိုးနှိမ်နင်းရေးဌာနရဲ့ အကျဉ်းထောင်ကို သွားမှာပဲ"

ချင်လော့က နတ်ဆိုးနှိမ်နင်းရေးဌာန ရှိရာဘက်သို့ တစ်ချက်ကြည့်လိုက်ပြီး သူ၏ လက်အောက်ငယ်သားများကို ပြောဆိုလိုက်သည်။

"မင်းတို့အားလုံး ထွက်သွားလို့ ရပြီ"

"ရန်ထျန်းရှင်းကို ငါ ပြောပြီးပြီ... သူက မင်းတို့နဲ့ တခြားသူတွေကို ကာကွယ်ပေးလိမ့်မယ်... ပြဿနာ တစ်ခုခုကြုံရင် သူ့ဆီသွား... သူ မဖြေရှင်းနိုင်ရင် ထိုက်ရွှီမြင့်မြတ်နယ်မြေကို ဆက်သွယ်လိုက်"

"ဒါပေမဲ့ မင်း မမျှော်လင့်ဘဲ သေသွားရင်တော့ ငါ တောင်းပန်ရုံပဲ တတ်နိုင်မယ်"

"ဒါပေမဲ့ ငါ့လူတွေကို သတ်တဲ့ ဘယ်သူ့ကိုမဆို သူ့မိသားစု တစ်ခုလုံးကို သုတ်သင်ပစ်မယ်"

လီယီနှင့် အခြားသူများက ချက်ချင်း လက်ဆုပ်ချီ အရိုအသေပေးလိုက်ပြီး ပြောဆိုလိုက်၏။

"အရှင်မင်းသားရဲ့ ဂရုစိုက်မှုအတွက် ကျေးဇူးတင်ပါတယ်"

သူ၏ လက်အောက်ငယ်သားများအနေဖြင့် သူတို့ ပစ်မှတ်ထားခံရခြင်းက လုံးဝ ပုံမှန်ပင် ဖြစ်လေသည်။

ချင်လော့က သူတို့၏ အသက်ကို အပြည့်အဝ မကယ်တင်နိုင်ကောင်း မကယ်တင်နိုင်ပေ။

သို့သော် သူတို့ကို သတ်သောသူများအတွက် အကျိုးဆက်များက ထိုသူများအတွက် ခံနိုင်ရည်ရှိမည် မဟုတ်ချေ။

ချင်လော့က လက်ဝှေ့ယမ်းလိုက်ရာ အဖွဲ့က ချက်ချင်း ဦးညွှတ်ပြီး နောက်ဆုတ်သွားကြ၏။

ထို့နောက် ချင်လော့က နတ်ဆိုးနှိမ်နင်းရေးဌာန၏ တံခါးပေါက်ဆီသို့ ဖြည်းညင်းစွာ လျှောက်သွားခဲ့လေသည်။

ဤအခိုက်အတန့်တွင် လူအများအပြားက နတ်ဆိုးနှိမ်နင်းရေးဌာန အဝင်ဝရှိ ချင်လော့ကို ကြည့်နေကြပြီး သူတို့၏ မျက်လုံးများတွင် လေးနက်မှုများ ပြည့်နှက်နေခဲ့သည်။

သူတို့၏ လုပ်ဖော်ကိုင်ဖက်များနှင့် အထက်အရာရှိများက ချင်လော့၏ လက်ချက်ဖြင့် သေဆုံးသွားကြောင်း သတင်းကို သူတို့အားလုံး ရရှိထားခဲ့ကြလေသည်။

ခန့်မှန်းချက်များအရ ချင်လော့တွင် သူတော်စင်အဆင့် တိုက်ခိုက်ရေးစွမ်းအား ရှိနေပေ၏။

တပ်မှူး အများအပြားအပြင် ချင်လော့၏ အသိဟောင်းဖြစ်သော လုချန်လည်း အပြင်ဘက်တွင် စောင့်ကြပ်နေခဲ့သည်။

"တပ်မှူးလု... မတွေ့တာ ကြာပြီနော်"

လုချန်က ချင်လော့ကို အနည်းငယ် စိုးရိမ်သော အမူအရာဖြင့် ကြည့်လိုက်၏။

ချင်လော့က ဓားတစ်ချက်တည်းဖြင့် လျိုရှန်ကို သတ်ခဲ့ကြောင်း သူ အတည်ပြုထားခဲ့လေသည်။

သူ၏ ကိုယ်ပိုင် စွမ်းအားကို အကဲဖြတ်ကြည့်ပြီး သူသည် လျိုရှန်ကို ဤမျှ လွယ်ကူစွာ သတ်နိုင်ကြောင်း သဘောပေါက်လိုက်သော်လည်း သူက သူတော်စင်တစ်ပါး ဖြစ်ပြီး ချင်လော့ကရော...

ချင်လော့၏ လက်ရှိ ကျင့်ကြံမှုအဆင့်မှာ လိုဏ်ဂူကောင်းကင်အဆင့် ၄ လောက်သာ ရှိသေးပေသည်။

ဤသည်က သူ့ကို တုန်လှုပ်သွားစေရန် လုံလောက်လေသည်။

ချင်လော့ကို နောက်ဆုံးတွေ့ခဲ့ရချိန်မှစ၍ အချိန်တိုလေးသာ ရှိသေးပြီး ချင်လော့သည် ဒုံးပျံတစ်စင်းကဲ့သို့ လိုဏ်ဂူကောင်းကင်အဆင့် ၄ သို့ ရောက်ရှိနေပြီ ဖြစ်၏။

လိုဏ်ဂူကောင်းကင်အဆင့် ၉ မှ တစ်စုံတစ်ယောက်ကို သတ်ဖြတ်နိုင်သော ကြောက်မက်ဖွယ်ကောင်းသည့် တိုက်ခိုက်ရေးစွမ်းအားပင် သူ့တွင် ရှိနေလေသည်။

အချိန်ပေးလိုက်ပါက ချင်လော့သည် ကောင်းကင်ကို ဆန့်ကျင်နိုင်စွမ်း ရှိလာမည် ဖြစ်ပေသည်။

"နဝမမင်းသား... အရာရှိတွေက အထဲမှာ စောင့်နေတာ ကြာပါပြီ... ကျေးဇူးပြုပြီး ကျွန်တော်နဲ့ အထဲဝင်ပြီး အရှင်မင်းသား ကျူးလွန်ခဲ့တဲ့ ပြစ်မှုတွေအတွက် ရှင်းပြပါ"

လုချန်သည် ချင်လော့ အပြစ်ပေးခံရပြီးနောက် ဖိနှိပ်ခံရခြင်း... သို့မဟုတ် တိုက်ရိုက် သတ်ဖြတ်ခံရခြင်းကိုပင် မျှော်လင့်နေခဲ့သည်။

အဘယ်ကြောင့်ဆိုသော် သူနှင့် ချင်လော့ကြားရှိ ရန်ငြိုးမှာ ပြန်လည် ပြေလည်နိုင်ခြင်း မရှိတော့လောက်အောင် နက်ရှိုင်းနေပြီ ဖြစ်သောကြောင့်ပင်။

ချင်လော့က လှောင်ပြောင်လိုက်သည်။

"ပြစ်မှုတွေအကြောင်း ပြောမယ်ဆိုရင် တပ်မှူးလု... ငါ့ကို လုပ်ကြံတဲ့ ကုမိသားစုရဲ့ ကြံစည်မှုကို သေချာ စုံစမ်းစစ်ဆေးဖို့ အရင်က ငါ မင်းကို ပြောခဲ့တယ်လေ... အခု ဘာလို့ ငါ့ကို ရှင်းပြချက် မပေးသေးတာလဲ"

"ပြီးတော့ ဒီနေ့ နတ်ဆိုးနှိမ်နင်းရေးဌာနက တပ်မှူးတစ်ယောက်က ငါ့ကို နေ့ခင်းကြောင်တောင် လုပ်ကြံဖို့ ကြိုးစားခဲ့တယ်... နတ်ဆိုးနှိမ်နင်းရေးဌာနထဲကို တောင်တန်းတစ်သောင်းနယ်မြေရဲ့ သူလျှိုတွေ ထိုးဖောက်ဝင်ရောက်နေပြီလို့ သံသယဖြစ်စရာ အကြောင်း ရှိနေပြီ"

"တပ်မှူးလု... မင်းလည်း ငါ့ကို သေစေချင်နေတာလား... မင်းက ငါတို့ရဲ့ မဟာချင်အင်ပါယာကို သစ္စာဖောက်သွားပြီလို့ ငါ ခံစားရတယ်"

ချင်လော့၏ ရန်လိုသော သဘောထားကြောင့် လုချန်၏ မျက်နှာ အလွန် အကျည်းတန်သွားခဲ့၏။

"နဝမမင်းသား... အရှင်မင်းသားရဲ့ လူသတ်မှု စွပ်စွဲချက်က အရှင်မင်းသားရဲ့ ကိုယ်ပိုင် ထင်မြင်ချက်သက်သက်ပါ... ကျွန်တော့်ရဲ့ နတ်ဆိုးနှိမ်နင်းရေးဌာနက လူတစ်ယောက်ရဲ့ စကားကိုပဲ အခြေခံပြီး ဘယ်လိုလုပ် အပြစ်ပေးလို့ ရမှာလဲ"

ချင်လော့က လှောင်ပြောင်လိုက်သည်။

"အိုး... ဟုတ်လား... ဒါဆို ငါ့ရဲ့ ပြစ်မှုကို ဆုံးဖြတ်ဖို့ မင်း ဘာကို သုံးမလဲဆိုတာ ငါ ကြည့်ချင်တယ်"

စကားပြောပြီးနောက် ချင်လော့က နတ်ဆိုးနှိမ်နင်းရေးဌာန ရုံးခန်းထဲသို့ ခြေလှမ်းကျဲကြီးများဖြင့် ဝင်သွားခဲ့၏။

လုချန်က ချင်လော့ကို လေးနက်စွာ တစ်ချက်ကြည့်လိုက်ပြီးနောက် အနီးကပ် လိုက်သွားကာ နတ်ဆိုးနှိမ်နင်းရေးဌာန ရုံးခန်းထဲသို့ ဝင်ရောက်သွားခဲ့လေသည်။

ဤအခိုက်အတန့်တွင် နတ်ဆိုးနှိမ်နင်းရေးဌာန၏ ဒုတပ်မှူး ချူဟန်၊ တရားရေးဝန်ကြီးဌာန၏ ဒုဝန်ကြီးနှင့် တာ့လီကျောင်းတော်၏ လက်ထောက်ဝန်ကြီးတို့ ပါဝင်သော တရားရုံးသုံးခု ပူးတွဲစစ်ဆေးမေးမြန်းမှုဖြင့် နတ်ဆိုးနှိမ်နင်းရေးဌာနက ဤကိစ္စကို တာဝန်ယူထားဆဲ ဖြစ်ပေ၏။

ထို့ပြင် ချောင်းကြည့်နေသော မျက်လုံးများစွာကြောင့် ချင်လော့၏ နှလုံးသား တင်းကျပ်သွားခဲ့သည်။

"အမှောင်ထဲမှာ ပုန်းအောင်းနေတဲ့ မဟာသူတော်စင်တွေ ရှိနေပုံပဲ... ပြီးတော့ တစ်ယောက်မကဘူး"

အရာရှိ သုံးဦးအနက် ဤမြင်ကွင်းကို တိတ်တဆိတ် စောင့်ကြည့်နေသူ သေချာပေါက် ရှိရမည်ပင်။

မြို့စားကြီး သုံးဦးအနက် အားအနည်းဆုံးသူမှာ မဟာသူတော်စင်တစ်ပါး ဖြစ်ပြီး သာမန် မဟာသူတော်စင်တစ်ပါးလည်း မဟုတ်ချေ။

ထို့ပြင် ဝန်ကြီးကိုးဦးအနက် မဟာသူတော်စင် အများအပြား ရှိနေသဖြင့် မဟာချင်အင်ပါယာ မြို့တော် တစ်ခုလုံးသည် နဂါးကန်နှင့် ကျားတွင်း ဖြစ်နေလေသည်။

နတ်ဆိုးနှိမ်နင်းရေးဌာန၏ တပ်မှူးချုပ်သည် မဟာသူတော်စင်အဆင့်ရှိ တန်ခိုးကြီးမားသော ပုဂ္ဂိုလ်တစ်ဦး ဖြစ်ကြောင်း သေချာပေ၏။

နတ်ဆိုးနှိမ်နင်းရေးဌာနတွင် ရှိမရှိကိုမူ မသိရသေးချေ။

နတ်ဆိုးနှိမ်နင်းရေးဌာန၏ အောက်တွင် အကျဉ်းထောင် ရှိပြီး မဟာသူတော်စင်အဆင့်မှ တန်ခိုးကြီးမားသော ပုဂ္ဂိုလ်များက စောင့်ကြပ်နေသည်မှာ သေချာလေသည်။

"ထင်တဲ့အတိုင်းပဲ ပထမ ရွေးချယ်မှုက အကောင်းဆုံး အနေနဲ့ မြို့တော်ကနေ ထွက်သွားပြီး လွတ်လွတ်လပ်လပ် နေနိုင်ဖို့ပဲ"

ချင်လော့က သူ့ဘာသာ ရေရွတ်လိုက်၏။

ဤအခိုက်အတန့်တွင် ချင်ဖန်လည်း ရုံးခန်းထဲသို့ ဝင်ရောက်လာခဲ့သည်။

ပရိသတ်ထဲတွင် ထိုင်ပြီးနောက် ချင်လော့ကို ချောင်းကြည့်ရန် သူ၏ သူငယ်အိမ်နှစ်ထပ်ကို အသက်သွင်းရန် မစောင့်နိုင်တော့ချေ။

‘မင်း ကိုယ်တိုင် မမြင်ရသရွေ့ ယုံမှာ မဟုတ်ဘူး’

သူက ချက်ချင်း အံ့အားသင့်စွာ အော်ဟစ်လိုက်၏။

"အဲဒါ ဘယ်လိုလုပ် ဖြစ်နိုင်မှာလဲ"

သူ မသိစိတ်မှ မတ်တတ်ရပ်လိုက်ရာ အခြားသူများ၏ အာရုံကို ဆွဲဆောင်သွားခဲ့လေသည်။

"ပဉ္စမမင်းသား... ဒါက ကျွန်တော့်ရဲ့ နတ်ဆိုးနှိမ်နင်းရေးဌာန ရုံးခန်းပါ... ကျေးဇူးပြုပြီး တိတ်တိတ်နေပေးပါ"

ချူဟန်က မျက်မှောင်ကြုတ်ကာ သတိပေးလိုက်၏။

ချင်ဖန်က အတင်း ပြုံးလိုက်ပြီး ခေါင်းညိတ်ကာ ပြန်ထိုင်လိုက်သည်။

ချင်လော့က အကြည့်ကို ဖြည်းဖြည်းချင်း လှည့်လိုက်ပြီး ချင်ဖန်နှင့် အကြည့်ချင်း ဆုံသွားခဲ့၏။

ထိုအခိုက်အတန့်တွင် ချင်ဖန်သည် သူ၏ သူငယ်အိမ်နှစ်ထပ်ကို အသုံးပြုကာ ချင်လော့၏ လျှို့ဝှက်ချက်များကို ချောင်းကြည့်ခဲ့ကြောင်း ချင်လော့ သဘောပေါက်သွားခဲ့သည်။

သူ၏ ခန္ဓာကိုယ်အတွင်း၌ အတွင်းနေရာ တစ်ခုတည်းသာ ရှိနေကြောင်းကိုလည်း တစ်ဖက်လူ ရှာဖွေတွေ့ရှိသွားလောက်ပြီ ဖြစ်ပေ၏။

ချင်ဖန်၏ မျက်လုံးများအတွင်းတွင်တော့ တုန်လှုပ်မှု အရိပ်အယောင်များ ကျန်ရှိနေဆဲ ဖြစ်လေသည်။

သူက တိုးတိတ်စွာ ရေရွတ်လိုက်၏။

"သူ့မှာ လိုဏ်ဂူကောင်းကင် တစ်ခုပဲ ရှိတာလား... ဒါမှမဟုတ် တခြား လိုဏ်ဂူကောင်းကင်တွေကို ပြန်လည်ပုံဖော်ပြီး တစ်ခုတည်းအဖြစ် ပေါင်းစပ်လိုက်တာလား"

ဤကိစ္စက သူ့အတွက် အလွန် အရေးကြီးလေသည်။

သူသည် ကောင်းကင်ကို ဆန့်ကျင်နိုင်သော အမွေအနှစ်တစ်ခုကို ရရှိခဲ့ပြီး သူ၏ ပါရမီရှင် အရည်အချင်းဖြင့် ကောင်းကင်ကို ဆန့်ကျင်နိုင်သော မဟာလိုဏ်ဂူကောင်းကင် ဆယ်ခုကို ဖန်တီးခဲ့၏။

ထို့နောက် သူက လိုဏ်ဂူကောင်းကင်တစ်ခုကို ဖန်တီးရန် မဟာလိုဏ်ဂူကောင်းကင် ဆယ်ခုကို ပြန်လည်ပုံဖော်ပြီး စတေးခဲ့လေသည်။

ဤအရာကြောင့်ပင် သူသည် လိုဏ်ဂူကောင်းကင်အဆင့် နောက်ဆုံးအဆင့်တွင် ရှိနေသည့်တိုင် သူတော်စင်တစ်ပါးနှင့် ထိပ်တိုက် ရင်ဆိုင်နိုင်ခဲ့ပြီး သူတော်စင်တစ်ပါးကိုပင် သတ်ဖြတ်နိုင်ခဲ့သည့် ကြောက်မက်ဖွယ် မှတ်တမ်းတစ်ခုကို ပိုင်ဆိုင်ထားခဲ့သည်။

အကယ်၍ ချင်လော့က လိုဏ်ဂူကောင်းကင်တစ်ခုတည်းသာ ဖန်တီးထားနိုင်ခဲ့မည်ဆိုလျှင်တော့ အခြေအနေက အဆင်ပြေနိုင်သေးပေသည်။

သို့သော် ဒုတိယအချက်သာ ဆိုလျှင်...

"လိုဏ်ဂူကောင်းကင်အဆင့် ၉မှာ ရှိတဲ့ လျိုရှန်ကို သူ သတ်နိုင်ခဲ့တာက သူ ပထမတစ်ခု မဟုတ်ဘူးဆိုတာကို သက်သေပြနေတယ်"

ချင်ဖန်က ရုတ်တရက် မော့ကြည့်လိုက်ပြီး သူနှင့် ချင်လော့တို့က တစ်ယောက်ကိုတစ်ယောက် နက်ရှိုင်းစွာ စိုက်ကြည့်လိုက်ကြလေသည်။

တာအိုမိတ်ဆွေ တစ်ဦးကို မြင်တွေ့လိုက်ရသကဲ့သို့ သူ၏ မျက်လုံးများမှ တစ်စုံတစ်ရာကို ချင်လော့ နားလည်သွားခဲ့၏။

"ငါ့ညီက ငါနဲ့ လမ်းကြောင်းတူ လျှောက်နေတာလား"

မည်သို့ပင်ဖြစ်စေ ချင်ဖန်သည် အဓိပတိအရိုးကို ပိုင်ဆိုင်ထားကြောင်းကို ချင်လော့က မတွေးဘဲ မနေနိုင်ခဲ့ချေ။

"ထင်တဲ့အတိုင်းပဲ... ဒါက အခုချိန်အထိ ငါ ကြုံတွေ့ဖူးသမျှထဲမှာ အစွမ်းအထက်ဆုံး ကံကြမ္မာသားတော်ပဲ"

ချင်ဖန်က စိတ်ထဲမှ တွေးလိုက်၏။

"ချင်လော့ သေရမယ်... ငါ မသိနိုင်တဲ့ တခြား လျှို့ဝှက်ချက်တွေ သူ့ဆီမှာ သေချာပေါက် ရှိရမယ်"

"သူက မွေးရာပါ သေမျိုး တစ်ယောက် လုံးဝ မဟုတ်ဘူး... သူ့ခန္ဓာကိုယ်ကို ငါ ခွဲစိတ်ပြီး သူ့ရဲ့ ပါရမီတွေကို ခိုးယူရမယ်"

သူ၏ အကြည့်က ပြောင်းလဲသွားပြီး တာ့လီကျောင်းတော်၏ လက်ထောက်အရာရှိအပေါ်သို့ ကျရောက်သွားခဲ့လေသည်။

သက်လတ်ပိုင်းအရွယ် အမျိုးသားက ချင်ဖန် ခေါင်းအနည်းငယ် ညိတ်ပြသည်ကို မြင်လိုက်ရပြီး ချက်ချင်း နားလည်သွားခဲ့၏။

သူ လှုပ်ရှားရမည့် အချိန်ရောက်ပြီဖြစ်ပြီး ချင်လော့ကို သူ၏ အကျဉ်းထောင်တွင် ဖိနှိပ်ထားရမည် ဖြစ်ပေသည်။

တာ့လီကျောင်းတော်သည် ချင်ဖန်၏ နယ်မြေ ဖြစ်လေသည်။

သူ၏ နယ်မြေထဲသို့ ရောက်သွားသည်နှင့် တစ်ပြိုင်နက် ချင်လော့သည် သူ ခြယ်လှယ်သမျှကိုသာ ခံရမည် ဖြစ်ပေ၏။

ထို့နောက် တာ့လီကျောင်းတော်၏ လက်ထောက်ဝန်ကြီးဖြစ်သူ ဝမ်ကျန်းယွမ်က စကားပြောလာခဲ့လေသည်။

"နဝမမင်းသား... မင်းသားတစ်ပါးအနေနဲ့ အရှင်မင်းသားက မဟာချင်အင်ပါယာရဲ့ ဥပဒေတွေကို လျစ်လျူရှုပြီး ရက်စက်ကြမ်းကြုတ်တဲ့ ပြစ်မှုတွေကို ကျူးလွန်ခဲ့တယ်... အရှင်မင်းကြီးက မင်းသားတစ်ပါးဟာ သာမန်လူတစ်ယောက်လိုပဲ ဥပဒေကို လိုက်နာရမယ်လို့ အရင်က ပြောခဲ့ဖူးတယ်... ကျွန်တော် မေးမယ်... အရှင်မင်းသား အပြစ်ကို ဝန်ခံလား"

အခြား နှစ်ဦးက မျက်မှောင်ကြုတ်သွားပြီး သူ့ကို တစ်ချက်ကြည့်လိုက်သော်လည်း သူ့ကို မငြင်းခုံခဲ့ကြချေ။

ယနေ့ ဤအမှု၏ စစ်ဆေးမေးမြန်းမှုက အနည်းငယ် ပြဿနာရှိလာမည်မှာ သေချာပေ၏။

သူ့ကို အရင်ဆုံး စမ်းသပ်ခိုင်းလိုက်တာက ပိုကောင်းလေသည်။

သို့သော် ချင်လော့၏ အဖြေက သူတို့ မည်သည့်အခါကမျှ မမျှော်လင့်ထားခဲ့သော အရာ ဖြစ်လေသည်။

ချင်လော့က တည်ငြိမ်စွာ ပြောဆိုလိုက်သံကိုသာ ကြားလိုက်ရ၏။

"ငါ ဝန်ခံတယ်"

"အရှင်မင်းသားက ဝန်မခံဘူးဆိုတော့ ကျွန်တော်... ဘာ!... အရှင်မင်းသား ဝန်ခံတယ် ဟုတ်လား!"

ဝမ်ကျန်းယွမ် အံ့အားသင့်သွားခဲ့လေသည်။

ချင်လော့က သူ့ကို အမှန်တကယ် လန့်သွားစေခဲ့ပြီး တစ်ခဏမျှ အံ့အားသင့်သွားစေခဲ့၏။

ဘာတွေဖြစ်နေလဲဆိုတာကို သူ သဘောပေါက်သွားသည်နှင့် ချက်ချင်း ဆက်ပြောလိုက်သည်။

"ဒါပေမဲ့ အရှင်မင်းသား ဘာပြစ်မှု ကျူးလွန်ခဲ့လဲဆိုတာတောင် ကျွန်တော် မပြောရသေးဘူး... အရှင်မင်းသားက…"

"မင်း ငါ့ကို ဘာအပြစ်ရှိတယ်လို့ ပြောပြော ငါ ဝန်ခံတယ်... ငါ့ရဲ့ ပြစ်ဒဏ်ကို မြန်မြန် ကြေညာလိုက်ပါ... ပြီးရင် ငါတို့ ကိုယ့်လမ်းကိုယ် သွားလို့ရပြီ... လူတိုင်းက အလုပ်များနေတာပဲ... အချိန် နည်းနည်းလောက် သက်သာသွားရင် ပိုမကောင်းဘူးလား"