အခန်း ၁၃၉

အခန်း (၁၃၉) နေထိုင်မှု ငါးနှစ်တာပြည့်မြောက်ခြင်း၊ ကောင်းကင်အကျဉ်းထောင်၏ ၁၀၈ လွှာသို့ ခြေချခြင်း

လျိုချွဲဇီမှာ လုံးဝ ကြက်သေသေသွားခဲ့၏။

ဝိညာဉ်တစ်သောင်းအလံပေါ်တွင် 'လူသားဧကရာဇ်အလံ' ဟု ရေးလိုက်ရုံဖြင့် ဝိညာဉ်တစ်သောင်းအလံ မဟုတ်တော့ဘူးဟု ဆိုလိုခြင်းလော။

‘အရူးတွေကို လာလှည့်စားနေတာပဲ’

"နဝမမင်းသား... အမှားမလုပ်မိပါစေနဲ့... ဒီနေရာက အကျဉ်းထောင်ပါ... တကယ်လို့ အရှင်မင်းသားက တစ်ခုခုကို စဉ်းစားဆင်ခြင်မှုမရှိဘဲ လုပ်လိုက်မယ်ဆိုရင် ပြဿနာအကြီးကြီး တက်သွားပါလိမ့်မယ်"

"မင်း ငါပြောတာကို သေသေချာချာ မကြားလိုက်ဘူးထင်တယ်... ဒူးထောက်လိုက်စမ်း!... အဲဒါဆိုရင် မင်းရဲ့အသက်ကို ချမ်းသာပေးဖို့ ငါ စဉ်းစားပေးမယ်... မဟုတ်ရင်တော့…"

လက်တစ်ချက် ဝှေ့ယမ်းလိုက်မှုနှင့်အတူ ချင်လော့က ဝိညာဉ်တပ်မကြီးကို လျိုချွဲဇီဆီသို့ ပြေးဝင်သွားစေခဲ့ပေသည်။

"ဟီးဟီးဟီး!"

"ဟီးဟီးဟီး!"

လူသားဧကရာဇ်အလံ အဆင့်တက်သွားခြင်းသည် အလံတော်အတွင်းရှိ ဝိညာဉ်များ အဆင့်တက်သွားခြင်းလည်း ဖြစ်ပေသည်။

ဤဝိညာဉ်များထဲတွင် သူတော်စင်ဘုရင်အဆင့်များစွာ ထပ်တိုးလာခဲ့၏။

သေးငယ်သော ဘေးဒုက္ခလေးတစ်ခုမျှသာဖြစ်သည့် လျိုချွဲဇီသည် ရှီးဟွမ်၏ လက်တစ်ချောင်းမျှပင် လှုပ်ရှားစရာမလိုဘဲ အလွယ်တကူ ဖိနှိပ်ခြင်း ခံလိုက်ရလေသည်။

‘ဘန်း!’

ပြင်းထန်စွာ ဒဏ်ရာရသွားသော လျိုချွဲဇီကို ချင်လော့က ခြေဖြင့် ဖိနင်းထားလိုက်၏။

"မင်း သေချင်တာလား... ဒါမှမဟုတ် ရှင်သန်ချင်တာလား"

ချင်လော့က သူ့ကို ငုံ့ကြည့်ကာ မေးမြန်းလိုက်သည်။

လျိုချွဲဇီက ချင်လော့ကို မော့ကြည့်ကာ မေးမြန်းလိုက်၏။

"နဝမမင်းသား... အရှင်မင်းသားက ထောင်ဖောက်ပြေးဖို့ ကြိုးစားနေတာလား"

"ကောင်းကင်အကျဉ်းထောင်က မဟာသူတော်စင်တစ်ပါးရဲ့ ဖိနှိပ်မှုအောက်မှာ ရှိနေတာပါ... အရှင်မင်းသား လွတ်မြောက်နိုင်မှာ မဟုတ်ပါဘူး"

‘ဘန်း!’

ချင်လော့က လျိုချွဲဇီကို နောက်တစ်ကြိမ် ဖိနင်းလိုက်ပြန်၏။

"ဒါဆို မင်းက သေလမ်းကို ရွေးချယ်လိုက်တာပေါ့"

"ဒါပေမဲ့ တစ်ခါတလေကျရင် သေခြင်းတရားက အဆုံးသတ် မဟုတ်ဘဲ အစပြုခြင်းလဲ ဖြစ်နိုင်တယ်"

လျိုချွဲဇီက ချင်လော့၏ စကားများကို ချက်ချင်း နားလည်သွားခဲ့ပေသည်။

သူက ချင်လော့ကို မော့ကြည့်ကာ ပြောဆိုလိုက်၏။

"နဝမမင်းသား... အရှင်မင်းသား လွတ်မြောက်အောင် ကျွန်တော် ကူညီပေးနိုင်ပါတယ်"

"အရှုံးပေးလိုက်... ပြီးတော့ မင်းရဲ့ဝိညာဉ်ကို ဖွင့်ချပေးထားစမ်း"

ချင်လော့က လေးနက်သော အသံဖြင့် ပြောဆိုလိုက်သည်။

လျိုချွဲဇီမှာ သူ၏ ဝိညာဉ်ပေါ်တွင် သေခြင်းရှင်ခြင်းတံဆိပ်တုံးကို ချင်လော့အား ရိုက်နှိပ်ခွင့်ပြုရန်မှလွဲ၍ အခြား ရွေးချယ်စရာ မရှိတော့ချေ။

လျိုချွဲဇီက သူ၏ ကံကြမ္မာကို လက်ခံလိုက်ရလေသည်။

သူက ချင်လော့၏ဘေးတွင် ရိုကျိုးစွာ ရပ်နေပြီး ချင်လော့ကို သတိထားကာ ပြောဆိုလိုက်၏။

"အရှင်မင်းသား... တကယ်လို့ အရှင်မင်းသားက ကောင်းကင်အကျဉ်းထောင်ကနေ ထွက်သွားချင်တယ်ဆိုရင် ကျွန်တော်တို့ သေသေချာချာ စဉ်းစားသင့်ပါတယ်"

ချင်လော့က စိတ်လိုက်မာန်ပါ လုပ်ဆောင်မိမည်ကို သူ အလွန် ကြောက်ရွံ့နေခဲ့သည်။

ယခုအခါ သူ၏ ကံကြမ္မာက ချင်လော့နှင့် ယှက်နွယ်နေပြီဖြစ်ပြီး အကယ်၍ ဤကိစ္စသာ ပေါက်ကြားသွားပါက သူသည် ဝိညာဉ်လွင့်စင်ပြီး စိတ်ဝိညာဉ် ဖျက်ဆီးခံရမည့် အိပ်မက်ဆိုးနှင့် သေချာပေါက် ရင်ဆိုင်ရမည် ဖြစ်ပေ၏။

ချင်လော့က သူ့ကို တစ်ချက်ကြည့်လိုက်ပြီး တည်ငြိမ်စွာ ပြောဆိုလိုက်သည်။

"စိတ်မပူပါနဲ့... အခု ငါ ထွက်မသွားသေးပါဘူး"

နောက်ထပ် စကားတစ်ခွန်းက လျိုချွဲဇီကို တုန်လှုပ်သွားစေပြီး မြေပြင်ပေါ်သို့ ပြုတ်ကျမတတ် ဖြစ်သွားစေခဲ့လေသည်။

"၁၀၈ လွှာကို ဘယ်လိုသွားရမလဲဆိုတာ မင်း သိလား"

"အရှင်မင်းသားက ၁၀၈ လွှာကို သွားချင်လို့လား"

လျိုချွဲဇီက အဓိကအချက်ကို နားလည်သွားပုံရလေသည်။

ချင်လော့က မှားယွင်းစွာ စွပ်စွဲခံရပြီး ထောင်ချခံရခြင်း မဟုတ်ဘဲ ထောင်ချောက်ထဲသို့ တမင်တကာ ဝင်လာခဲ့ခြင်းပင်။

သူ၏ ရည်ရွယ်ချက်က ၁၀၈ လွှာ၏ လျှို့ဝှက်ချက်များကို ဖော်ထုတ်ရန် ဖြစ်ပေသည်။

သူက ချက်ချင်း အကြံပေးလိုက်၏။

"အရှင်မင်းသား... လွန်ခဲ့တဲ့ နှစ်တစ်ရာအတွင်းမှာ လူတွေက နည်းလမ်းအမျိုးမျိုးနဲ့ ၁၀၈ လွှာကို သွားဖို့ ကြိုးစားခဲ့ကြတဲ့ ဖြစ်ရပ်သုံးခု ရှိခဲ့ပါတယ်... အကုန်လုံးက ချွင်းချက်မရှိ သေဆုံးသွားခဲ့ကြတာပါ"

"အိုး... ဒါဆို 'တတိယအကြိမ်' က ကန့်သတ်ချက်ပေါ့... စတုတ္ထအကြိမ်ကိုတော့ ငါ လုပ်မယ်"

"စနစ်... ငါရဲ့ ကျင့်ကြံမှုကို ပြန်လည်ရရှိပြီးပြီ... မင်း.. ခဏလောက် ထွက်လာဦး"

ချင်လော့က စိတ်ထဲမှ တိတ်တဆိတ် ခေါ်ဆိုလိုက်သည်။

[စနစ်က စတင် လည်ပတ်နေပါသည်]

[စနစ်က ပိတ်ထားစဉ်အတွင်း စုဆောင်းရရှိခဲ့သော ဗီလိန်အမှတ်များကို တွက်ချက်နေပါသည်]

ချင်လော့မှာ စကားဆွံ့အသွားခဲ့၏။

သူ ဤနေရာသို့ ရောက်လာကတည်းက စနစ်နှင့် ဆက်သွယ်၍ မရခဲ့သဖြင့် စနစ် ပျက်သွားပြီဟု သူ ထင်မှတ်ထားခဲ့လေသည်။

မမျှော်လင့်ဘဲ စနစ်က ပိတ်သွားခဲ့ခြင်းပင်။

ငါးနှစ်တောင် ရှိပြီ... စကားပြောစရာ လူတစ်ယောက်မှတောင် မရှိခဲ့ဘူး...

ချင်လော့ အရူးမဖြစ်သွားတာကပဲ ကံကောင်းနေသေးသည်။

[ရှောင်ယာ၏ ဝိညာဉ်အမြုတေမှာ ကြီးမားစွာ ထိခိုက်သွားခဲ့ပြီး ကံကြမ္မာတန်ဖိုး အမှတ် ၁၀၀,၀၀၀ ဆုံးရှုံးသွားပါသည်... ပိုင်ရှင်က ဗီလိန်အမှတ် ၁၀၀,၀၀၀ ကို ရရှိပါသည်]

[သတိပေးချက် - ပိုင်ရှင်အနေဖြင့် ရှောင်ယာကို ထိန်းချုပ်နိုင်ရန် ရှီးဟွမ်ကို အမြန်ဆုံး ကူညီပေးရပါမည်... နှောင့်နှေးပါက မမျှော်လင့်ထားသော အကျိုးဆက်များကို ဖြစ်ပေါ်စေနိုင်ပါသည်]

[ဖန်ချင်းက နတ်ဆိုးကျင့်စဉ်ကို ကျင့်ကြံပြီးစီးသွားပြီး ကံကြမ္မာတန်ဖိုး အားလုံးကို ဆုံးရှုံးသွားပါသည်... ပိုင်ရှင်က ဗီလိန်အမှတ် ၂၁၉,၀၀၀ ကို ရရှိပါသည်]

[ဓားဝိညာဉ်ကို သန့်စင်ရန် အချိန်ကျပါပြီ။]

[လုံကျီရော့၏ နတ်ဆိုးမျိုးစေ့ စိုက်ပျိုးခြင်း လုပ်ငန်းစဉ်မှာ ၉၀ ရာခိုင်နှုန်းသို့ ရောက်ရှိသွားပြီဖြစ်ရာ ကံကြမ္မာတန်ဖိုး အမှတ် ၁၅၀,၀၀၀ ဆုံးရှုံးသွားပါသည်... ပိုင်ရှင်က ဗီလိန်အမှတ် ၁၅၀,၀၀၀ ကို ရရှိပါသည်]

[မသိမသာဖြင့် သူမသည် ပိုင်ရှင်အပေါ် ကြီးမားသော ချစ်ခင်နှစ်သက်မှုတစ်ခု ဖြစ်ပေါ်လာခဲ့ပြီး ပိုင်ရှင်၏ အမိန့်များနှင့် တောင်းဆိုမှုများကို ယေဘုယျအားဖြင့် သဘောတူမည် ဖြစ်ပါသည်]

[ပိုင်ရှင် - ချင်လော့]

[အသက် - ၂၅ နှစ်]

[ဗီလိန်အမှတ်များ - ၆၀၁,၀၀၀ မှတ်]

[ကျင့်ကြံမှုအဆင့် - လိုဏ်ဂူကောင်းကင်အဆင့် ၄]

[ခန္ဓာကိုယ်အဆင့် - သူတော်စင်အဆင့်]

[ဓားတာအိုအဆင့် - ဓားတာအို ပြီးပြည့်စုံခြင်းအဆင့်]

[ကျင့်စဉ်များ - ကောင်းကင်ဝါးမြိုခြင်းနတ်ဆိုးကျင့်စဥ်၊ အကြိမ်ကိုးဆယ်ရွှေခန္ဓာကျင့်စဉ်၊ အသက်ရှူစွမ်းအင်တိုးတက်ခြင်းကျင့်စဉ်]

[သိုင်းပညာ - နိမိတ်လေးပါးဓားသိုင်း၊ ဓားတစ်သောင်းကျင့်စဥ်]

ငါးနှစ် ကုန်လွန်သွားခဲ့ပြီး ဗီလိန်အမှတ် ၆၀၀,၀၀၀ ခန့် စုဆောင်းရရှိခဲ့လေပြီ။

ချင်လော့အတွက်မူ ဤသည်က ဝမ်းသာစရာ အံ့အားသင့်မှုတစ်ခု ဖြစ်ပေ၏။

"စနစ်... ငါ ဒီထဲကို ရောက်နေပြီ... အခုက မင်းရဲ့ တန်ဖိုးကို ပြသရမယ့် အချိန်ပဲ"

[ကောင်းကင်အကျဉ်းထောင်၏ ၁၀၈ လွှာသို့ အမြန်ဆုံး သွားရောက်ပါ... စနစ်က သင့်ကို လွတ်မြောက်ရန် ကူညီပေးပါလိမ့်မည်]

ချင်လော့၏ အကြည့်က လျိုချွဲဇီအပေါ်သို့ ကျရောက်သွားခဲ့၏။

"ခြေဆွံ့နေတဲ့ကောင်... ငါတို့ ၁၀၈ လွှာကို ဘယ်လို သွားနိုင်မလဲဆိုတာ မင်း ဘယ်လိုထင်လဲ"

လျိုချွဲဇီ တုန်လှုပ်သွားခဲ့သည်။

အကယ်၍ လုံးဝ မလိုအပ်ပါက သူ ၁၀၈ လွှာသို့ မည်သည့်အခါကမျှ သွားချင်မည် မဟုတ်ချေ။

ဤသည်မှာ မိမိကိုယ်ကိုယ် သတ်သေခြင်းသာ ဖြစ်ပေမည်။

"သွားဖို့က လွယ်ပါတယ်... ဒါပေမဲ့ ပြန်လာဖို့က မဖြစ်နိုင်ပါဘူး"

လျိုချွဲဇီက အသေးစိတ် ရှင်းပြလိုက်၏။

တကယ်တမ်းတွင် ကောင်းကင်အကျဉ်းထောင်၏ အလွှာတိုင်း၌ မည်သည့် ကန့်သတ်ချက်မှ မရှိဘဲ နောက်တစ်လွှာသို့ စိတ်ကြိုက် သွားလာနိုင်လေသည်။

သို့သော် ကောင်းကင်အကျဉ်းထောင်ကို အလွန် ကြောက်မက်ဖွယ်ကောင်းသော အစီအရင်များဖြင့် တပ်ဆင်ထားပေ၏။

၁၀၀ လွှာအောက်တွင် အကျဉ်းသားများအားလုံးမှာ ကြီးလေးသော ပြစ်မှုကျူးလွန်သူများ ဖြစ်ကြပြီး အစီအရင်၏ လွှမ်းမိုးမှုအောက်တွင် သူတို့က လက်ချောင်းတစ်ချောင်းပင် လှုပ်ရှားရန် ခဲယဉ်းလှလေသည်။

တစ်ခုခုလုပ်ဖို့ နေနေသာသာ အသက်ရှူဖို့ပင် ခက်ခဲလှပေသည်။

နောက်တစ်လွှာသို့ ကူးပြောင်းသွားခြင်းက အဆင်ပြေသော်လည်း ပြန်လာရန်အတွက် အစီအရင်ကို ထိန်းချုပ်သူ၏ သဘောတူညီချက် လိုအပ်လေသည်။

အလွှာတိုင်းတွင် အတားအဆီးများ ရှိပေ၏။

အဘယ်ကြောင့်ဆိုသော် ကောင်းကင်အကျဉ်းထောင်မှ ထွက်ခွာရန် တစ်ခုတည်းသော နည်းလမ်းမှာ ပထမအလွှာမှစတင်၍ တစ်ဆင့်ချင်းစီ အပေါ်သို့ တက်ရန်သာ ဖြစ်သောကြောင့်ပင်။

"အရှင်မင်းသား... တကယ်လို့ ကျွန်တော်တို့သာ အဲဒီအောက်ကို ဆင်းသွားမယ်ဆိုရင် ကျွန်တော့်လို ခြေဆွံ့တဲ့သူတစ်ယောက်က အစီအရင်ရဲ့ စွမ်းအားကြောင့် ဖိချေခံရပြီး သေသွားနိုင်ပါတယ်"

"ကျွန်တော်က ခြေဆွံ့နေလို့ အရည်အချင်း မရှိတာ မဟုတ်ပါဘူး... ကောင်းကင်အကျဉ်းထောင်က အစီအရင်က အရမ်းကို ကြောက်စရာကောင်းနေလို့ပါ"

"ဒါ့အပြင်... ကောင်းကင်အကျဉ်းထောင်ရဲ့ အကြီးမားဆုံး လျှို့ဝှက်ချက်ကို ၁၀၈ ထပ်ထဲမှာ တစ်ယောက်ယောက်က စောင့်ကြပ်နေတယ်ဆိုတဲ့ ကောလာဟလတွေလည်း ရှိပါတယ်... သူက မဟာသူတော်စင်အဆင့်ကိုတောင် ကျော်လွန်သွားပြီဖြစ်တဲ့ တန်ခိုးကြီးတဲ့ ပုဂ္ဂိုလ်တစ်ဦးပါ"

လျိုချွဲဇီက ချင်လော့၏ အကြံအစည်ကို ဖျက်ရန် ကြိုးစားခဲ့သော်လည်း သူ စိတ်ပျက်ခဲ့ရလေသည်။

"ငါတို့ သွားလို့ရမှတော့ သွားကြတာပေါ့"

ချင်လော့၏ စကားများတွင် မေးခွန်းထုတ်ဖွယ်မရှိသော လေသံတစ်ခု ပြည့်နှက်နေခဲ့၏။

လျိုချွဲဇီမှာ သနားစရာကောင်းအောင် ဖြစ်သွားခဲ့သည်။

သူ တတ်နိုင်သည်မှာ ဘာမျှမရှိချေ။

ယခုအခါ သူ၏ အသက်က ချင်လော့၏ လက်ထဲတွင် ရှိနေလေပြီ။

ချင်လော့ ပြောသမျှက ဥပဒေပင် ဖြစ်ပေသည်။

"ပြင်ဆင်ထား... သွားကြမယ်"

လက်တစ်ချက် ဝှေ့ယမ်းလိုက်မှုနှင့်အတူ ချင်လော့က သူတို့နှစ်ဦးကို လူသားဧကရာဇ်အလံအတွင်းမှ အပြင်သို့ ထုတ်လွှတ်ပေးလိုက်၏။

လူသားဧကရာဇ်အလံက ကောင်းကင်ဝါးမြိုခြင်းနတ်ဆိုးကျင့်စဥ်ကို အသက်သွင်းနိုင်ပြီး အတွင်းရှိ အစီအရင်က ချင်လော့အပေါ် မည်သည့် ဖိနှိပ်မှုမျှ မရှိသလောက် ဖြစ်ပေသည်။

လျိုချွဲဇီက ၁၀၀ လွှာတွင် ဤမျှ မာနကြီးနိုင်ခဲ့ရခြင်းမှာ သူ ပိုင်ဆိုင်ထားသော အမှတ်အသားက အစီအရင်၏ အာနိသင်များကို ဟန့်တားထားနိုင်သောကြောင့် ဖြစ်လေသည်။

လျိုချွဲဇီ ဦးဆောင်မှုဖြင့် ချင်လော့သည် နောက်တစ်လွှာ၏ ဝင်ပေါက်သို့ ရောက်ရှိလာခဲ့၏။

ချင်လော့က အတွင်းသို့ ခြေချလိုက်သည်နှင့် တစ်ပြိုင်နက် ပို၍ ကြောက်မက်ဖွယ်ကောင်းသော ဖိနှိပ်သည့် စွမ်းအားတစ်ခုကို ခံစားလိုက်ရလေသည်။

သို့သော် ကောင်းကင်ဝါးမြိုခြင်းနတ်ဆိုးကျင့်စဥ်ကို အသက်သွင်းပြီးနောက် ဖိအားက တွန်းအားအဖြစ်သို့ ပြောင်းလဲသွားခဲ့ပေသည်။

လျိုချွဲဇီက ချင်လော့ကို အံ့အားသင့်စွာ စိုက်ကြည့်နေခဲ့၏။

ချင်လော့က ဤနေရာတွင် ဤမျှ လွတ်လပ်စွာ လှုပ်ရှားနိုင်လိမ့်မည်ဟု သူ မမျှော်လင့်ထားခဲ့ချေ။

အလွှာတိုင်းတွင် အကျဉ်းထောင်တစ်ခုစီ ရှိပြီး တည်နေရာမှာ အထက်အလွှာနှင့် အတူတူပင် ဖြစ်လေသည်။

လျိုချွဲဇီက ချင်လော့ကို ကျဉ်းထောင်ပတ်လည်သို့ ဦးဆောင်ခေါ်သွားပြီး နောက်တစ်လွှာသို့ ဆက်လက် ဆင်းသွားခဲ့သည်။

၁၀၂၊ ၁၀၃၊ ၁၀၄၊ ၁၀၅...

လျိုချွဲဇီက ထပ် ၁၀၅ တွင် ရပ်တန့်သွားခဲ့၏။

သူ ဆက်၍ မဆင်းနိုင်တော့ချေ။

"အရှင်မင်းသား... ကျွန်တော် ဆက်မခံနိုင်တော့ဘူး"

လျိုချွဲဇီက အသက်ပြင်းပြင်းရှူရင်း ချင်လော့ကို ခါးသီးသော အမူအရာဖြင့် ကြည့်ကာ ပြောဆိုလိုက်သည်။

အောက်ကို ဆင်းဖို့နေနေသာသာ သူ အပေါ်ကိုတောင် ပြန်မတက်နိုင်တော့ချေ။

"ဝင်ခဲ့လေ"

ချင်လော့က လက်ဝှေ့ယမ်းလိုက်ရာ လူသားဧကရာဇ်အလံက လျိုချွဲဇီကို အတွင်းသို့ သိမ်းဆည်းသွားခဲ့လေသည်။

ချင်လော့က ဆက်လက် ရှေ့ဆက်သွားခဲ့၏။

၁၀၆၊ ၁၀၇...

သို့သော် ထပ် ၁၀၈ သို့ ခြေချရန် ပြင်လိုက်ချိန်မှာပင် အဖြစ်အပျက်ငယ်လေး တစ်ခု ဖြစ်ပွားခဲ့ပေသည်။

အမျိုးသားတစ်ဦးက ချင်လော့၏ လမ်းကို ပိတ်ရပ်ထားခဲ့၏။

"မင်းက ဘယ်သူလဲ"

"မင်းကို သတ်မယ့်သူပဲ"

ချင်လော့က စကားများများ ပြောမနေတော့ချေ။

အချိန်က မည်သူ့ကိုမျှ မစောင့်ချေ။ ဖြစ်နိုင်သည်မှာ ရှာဖွေတွေ့ရှိသွားလောက်ပြီ ဖြစ်ပေသည်။ ထပ်၁၀၈ သို့ သွားခြင်းဖြင့်သာ အခက်အခဲကို ဖြတ်ကျော်နိုင်ရန် မျှော်လင့်နိုင်မည် ဖြစ်လေသည်။

'ဝှစ်!'

လူသားဧကရာဇ်အလံက ထိုအမျိုးသားကို လွှမ်းခြုံသွားရာ သူက အလန့်တကြား အော်ဟစ်လိုက်ပြီးနောက် အုံခဲနေသော ဝိညာဉ်များ၏ ဆုတ်ဖြဲခြင်းကို ခံလိုက်ရပေသည်။

ဤသည်ကို မြင်တွေ့ရချိန်၌ လျိုချွဲဇီမှာ ဤလူနှင့် ယှဉ်လျှင် သူ မည်မျှ ကံကောင်းကြောင်း သဘောပေါက်သွားပြီး တိတ်တဆိတ် ဝမ်းသာနေခဲ့၏။

၁၀၈ လွှာကို ဝင်ရောက်ပြီ။

ချင်လော့က အထပ် ၁၀၈ သို့ ခြေချလိုက်သည်နှင့် သူ၏ရှေ့ရှိ မြင်ကွင်းကို မြင်လိုက်ရချိန်၌ သူ၏ မျက်လုံးများတွင် အံ့အားသင့်မှု အရိပ်အယောင်တစ်ခု ပေါ်လာခဲ့လေသည်။