အခန်း ၇

အခန်း။ ၇

ကျိုးလင်လင်နှင့် ဝမ်ထျန်းထျန်းတို့က ချန်းယန်ကို တောင်းပန်ရန် လုံးဝငြင်းဆန်ခဲ့သည်။

ချန်းယန်မှာ မတတ်သာသည့်အဆုံး တရားစွဲမည်ဟု ပြောဆိုလိုက်ချိန်တွင် ကျိုးလင်လင်က သူမ၏ဝမ်းကွဲအစ်ကိုမှာ ရှေ့နေဖြစ်ကြောင်း တရားရုံးမှာ တရားလာစွဲရန် စိန်ခေါ်ခဲ့သည်။ မြေအောက်ရထားကုမ္ပဏီဘက်ကလည်း တောင်းပန်ခြင်းမရှိဘဲ ချန်းယန်အား “မိန်းကလေးများကို သည်းခံပေးလိုက်ပါ” ဟူ၍သာ ပြောဆိုခဲ့သည်။

ဤအဖြစ်အပျက် တစ်ခုလုံးကို ဘေးလူများက ဖုန်းဖြင့် ရိုက်ကူးထားခဲ့ပြီး ယခု တရားရုံးတွင် ထုတ်ပြလိုက်ချိန်တွင် အင်တာနက်ပေါ်၌ ပွက်လောရိုက်သွားသည်။

[ဒါက သူတို့ တောင်းပန်တဲ့ ပုံစံလား]

[တောင်းပန်တာမှာ စိတ်ပါလက်ပါ ရှိရဲ့လား။ တရားရုံးမှာ လာစွဲခိုင်းတဲ့အထိ စိန်ခေါ်ရဲတယ်ပေါ့]

[သူတို့ကို ဥပဒေအရ အရေးယူကိုယူရမယ်]

[ရှေ့နေဂူက တကယ်ကို မိုက်တယ် ဒီလို အထောက်အထားမျိုးကို ရှာတွေ့လိမ့်မယ်လို့ မထင်ထားခဲ့ဘူး]

ဂူချန်က တရားခွင်သို့ လှည့်ကြည့်ကာ "အားလုံးကို မေးချင်ပါတယ်။ ဒါက တောင်းပန်တဲ့သဘောထား ဖြစ်နိုင်ပါ့မလား။ ချန်းယန်က တောင်းပန်စကားပဲ လိုချင်ခဲ့တာပါ။ ဒါပေမဲ့ ဟိုဘက်ကတော့ စော်ကားတဲ့အပြင် တရားစွဲခိုင်းတဲ့အထိ လုပ်ခဲ့တယ်။ ဒါမျိုးကို တောင်းပန်တယ်လို့ သတ်မှတ်မယ်ဆိုရင် လူတိုင်း လမ်းပေါ်မှာ မဟုတ်မမှန် စွပ်စွဲပြီး တောင်းပန်လိုက်တာနဲ့ ပြီးသွားရမှာလား" ဟု မေးခွန်းထုတ်လိုက်သည်။

ဤစကားကြောင့် တရားခွင်မှာ တိတ်ဆိတ်သွားသည်။

ကျိုးလင်လင်နှင့် ဝမ်ထျန်းထျန်းတို့မှာလည်း သူမတို့ကို ဗီဒီယိုရိုက်ထားမှန်း မသိခဲ့သဖြင့် အထိတ်တလန့် ဖြစ်သွားကြသည်။

ဝမ်ဟိုင်ရှန်ကမူ အေးဆေးပင် ပြုံးပြကာ သူတို့ကို ငြိမ်နေရန် အချက်ပြသည်။

သူလည်း ဤမျှခိုင်လုံသော အထောက်အထားကို ဂူချန် ဆောင်ထားလိမ့်မည်ဟု မထင်ထားခဲ့ပေ။

တရားသူကြီး လီခန်းက "တရားခံရှေ့နေ ဘာများ ချေပချင်သေးလဲ" ဟု မေးသည်။

ဝမ်ဟိုင်ရှန်က "တရားသူကြီးခင်ဗျား ဒီဗီဒီယိုက သူတို့ရဲ့ သဘောထား မကောင်းတာကိုပဲ ပြနေတာပါ။ ချန်းယန်ကို ပြင်းပြင်းထန်ထန် ထိခိုက်အောင် လုပ်ထားတာ မဟုတ်ပါဘူး။ ချန်းယန်ရဲ့ ပေါင်ကြားကို ကန်တယ်ဆိုတာလည်း တကယ်တော့ အနာတရ ဖြစ်လောက်အောင် မဟုတ်ပါဘူး။ ဆေးရုံမှတ်တမ်း ပြခိုင်းကြည့်ပါ။ အနာတရ ဖြစ်တာ မရှိရင် ဆေးဖိုးပေးစရာမလိုပါဘူး" ဟု ပြန်လည်ချေပသည်။

တကယ်တမ်းတွင်လည်း ချန်းယန်မှာ ထိခိုက်မှု အနည်းငယ်သာ ရှိသဖြင့် ဆေးဖိုးပေးရန်မှာ ဝမ်ဟိုင်ရှန်အတွက် ခက်ခဲသောအချက် မဟုတ်ပေ။

ဝမ်ဟိုင်ရှန်က ဆက်၍ "တောင်းပန်တဲ့သဘောထား မကောင်းတာက ပြစ်မှုကြီးတစ်ခုလား။ ဒါကို အကြောင်းပြပြီး ချန်းယန်က အွန်လိုင်းမှာ သူတို့ကို လိုက်လံနှောင့်ယှက် အနိုင်ကျင့်နေတာ မဟုတ်ဘူးလား။ အဲဒီအွန်လိုင်းတိုက်ခိုက်မှုတွေကြောင့် သူတို့နှစ်ယောက်က စိတ်ကျရောဂါ ဖြစ်နေပါပြီ။ သူတို့က တောင်းပန်ဖို့ အသင့်ရှိပေမဲ့ ချန်းယန်ရဲ့ လုပ်ရပ်တွေအတွက်တော့ သူလည်း တာဝန်ယူရမယ်။ ချန်းယန်ကို စိတ်ပိုင်းဆိုင်ရာ နစ်နာကြေးနဲ့ ဆေးဖိုးအတွက် ယွမ် ၁ သိန်း ၈ သောင်း လျော်ကြေးပေးဖို့နဲ့ ချန်းယန်ဘက်ကလည်း သူတို့ကို တောင်းပန်ပေးဖို့ တောင်းဆိုပါတယ်" ဟု အငြင်းပွားလိုက်သည်။

ဝမ်ဟိုင်ရှန်၏ စကားကို ကြားလိုက်ရသည့်အခါ ကျိုးလင်လင်၏ မျက်လုံးများ အရောင်

လက်သွားသည်။

သူမ၏ဝမ်းကွဲအစ်ကိုက ရှေ့နေဖြစ်ရခြင်းမှာ တကယ်ကို အားကိုးစရာကောင်းလှသည်။

ချန်းယန်မှာမူ သူကိုယ်တိုင် လျော်ကြေးပေးပြီး တောင်းပန်ရတော့မည်ကို သိလိုက်ရသဖြင့် မှင်သက်သွားသည်။

ကိုယ့်အခွင့်အရေးကိုယ် ကာကွယ်ဖို့ ဗီဒီယိုတင်ခဲ့မိတာက အပြစ်ဖြစ်သွားတာလား။

အွန်လိုင်းပေါ်တွင်မူ ပရိသတ်များမှာ စိတ်ပျက်လက်ပျက် ဖြစ်နေကြသည်။

[တစ်ဖက်ရှေ့နေက တော်တော်တော်တာပဲ။ ချန်းယန် ဗီဒီယိုတင်မိလို့ပဲ လျော်ကြေးပေးရတော့မယ် ထင်တယ်]

[ရှေ့နေဂူက သင်တန်းဆင်းပဲ ရှိသေးတာ။ ဒီလောက်ထိ စွမ်းဆောင်နိုင်တာတင်ကို အံ့ဩဖို့ကောင်းနေပြီ။ ဒါပေမဲ့ ဒီအခြေအနေက တကယ်ခက်ခဲသွားပြီ]

[ဘာကြောင့် ဒီလိုအမျိုးသမီးတွေကို ဘာမှမဖြစ်စေရတာလဲ။ လူကို မဟုတ်မမှန် စွပ်စွဲပြီးရင် ဒီအတိုင်း လွတ်သွားရမှာလား]

အမှုမှာ လုံးဝမျှော်လင့်ချက် မရှိတော့သည့်အသွင် ဆောင်နေသည်။

ဂူချန်က ဗီဒီယိုသက်သေ ရှာနိုင်ခဲ့သော်လည်း ချန်းယန်၏ အွန်လိုင်းတင်ခဲ့သည့် ဗီဒီယိုများကြောင့် အခြေအနေမှာ ပိုမိုဆိုးရွားသွားသည်။

ထိပ်တန်း ဥပဒေရုံးချုပ်တွင်လည်း ကောင်းရုန်က "ကြည့်လိုက်ပါ ဘာမှလုပ်လို့ မရတော့ဘူး။ ဂူချန်က သင်တန်းဆင်းပဲလေ။ အမှုက သိပ်မကြည့်ကောင်းတော့ပါဘူး။ ဗီဒီယိုအထောက်အထားပဲ ရတာ။ အနိုင်ရရင်တောင် ချန်းယန်က လျော်ကြေး ပေးရဦးမှာပဲ။ ပြီးတော့ ဂူချန်က တရားသူကြီးနဲ့ ရှေ့နေကိုပါ စွပ်စွဲထားတော့ တရားသူကြီးက ချန်းယန်ဘက်ကို ဘယ်တော့မှ လှည့်ကြည့်မှာ မဟုတ်ဘူး" ဟု သုံးသပ်သည်။

ရွှယ်ယောင်ထင်ကမူ လက်ဖက်ရည်ကို ငြိမ့်ညောင်းစွာ သောက်ရင်း "စောစောစီးစီး မဆုံးဖြတ်ပါနဲ့ဦး။ ဂူချန်က တည်ငြိမ်နေတာကို ကြည့်ရတာ စိတ်ဝင်စားစရာပဲ" ဟုသာ ပြန်ပြောသည်။

ထိုအချိန်တွင် ဂူချန်က မတ်တပ်ရပ်ကာ "တရားသူကြီးခင်ဗျား ကျွန်တော့်မှာ အထောက်အထားအသစ် ရှိပါသေးတယ်" ဟု ကြေညာလိုက်သည်။

လီခန်းက "ဘာအထောက်အထားလဲ"

ဂူချန်က "အထောက်အထားမတင်ပြခင် ချန်းယန်ရဲ့ အွန်လိုင်းဗီဒီယို ၃ ခုကို အရင်ကြည့်ပေးပါ" ဟု တောင်းပြောလိုက်သည်။

မျက်နှာပြင်ကြီးပေါ်တွင် ချန်းယန်၏ ဗီဒီယိုများ ပေါ်လာသည်။

ဗီဒီယိုထဲတွင် ချန်းယန်က ထိုနေ့က ဖြစ်ပျက်ခဲ့သည်များကို အရှိအတိုင်း ရိုးသားစွာ ပြောပြထားသည်။

"ရပ်လိုက်ပါ"

ဂူချန်က ရုပ်သံကို ရပ်ခိုင်းလိုက်သည်။

"တရားသူကြီးခင်ဗျား ချန်းယန်က အဲ့ဒီနေ့က ဖြစ်ရပ်ကို တစ်စက်ကလေးမှ မပိုမလိုဘဲ အရှိအတိုင်း ပြောပြခဲ့တာပါ။ သူ ပြောပြတာက သူ့ရဲ့ အတွေ့အကြုံသက်သက်ပါ။ သူ ဘယ်သူ့ကို အွန်လိုင်းမှာ အနိုင်ကျင့်နေလို့လဲ။ သူ ဘယ်သူ့ကို အသရေဖျက်နေလို့လဲ" ဟု အားမာန်ပါပါ မေးခွန်းထုတ်လိုက်သည်။