အခန်း ၃၅

အခန်း။ ၃၅

"တရားခွင်ကို ခဏ ရပ်နားလိုက်ပြီ။ ဒါ့အပြင်... လျိုယာကျွင်း၊ အနောက်တောင်မီဒီယာနဲ့ ဒီအမှုမှာ ပတ်သက်ဆက်နွှယ်နေတဲ့ ဝန်ထမ်းတွေအားလုံးကိုပါ အသေးစိတ် စုံစမ်းစစ်ဆေးသွားမယ်"

တရားသူကြီး ရှန်ကျားရွှေက တူကို ရိုက်ခတ်လိုက်ပြီး ဟု ကြေညာလိုက်သည်။

တရားခွင် ရပ်နားသွားခဲ့ကာ မူလက ဝမ်ယုံချန်၏ လူသတ်မှုကို စစ်ဆေးရန်သာ ဖြစ်သော်လည်း ယခုအခါ အခြေအနေမှာ လုံးဝ ပြောင်းလဲသွားခဲ့သည်။

အကြောင်းမှာ ဂူချန်က တရားခံနေရာမှ တရားလိုနေရာသို့ ချက်ချင်း ပြောင်းလဲကာ လျိုယာကျွင်းအား စတင် စွပ်စွဲလိုက်ခြင်းကြောင့်ပင်။

တရားခွင်အတွင်း ဂူချန်ကို သတ်ပစ်မည်ဟု ကြုံးဝါးခဲ့သော ရွာသားမှာလည်း ရဲတပ်ဖွဲ့၏ ချက်ချင်း ဖမ်းဆီးခြင်းကို ခံလိုက်ရသည်။

ထိုနေ့လယ်တွင်ပင် ရဲတပ်ဖွဲ့ဝင် အများအပြား ရှီရှန်ရွာသို့ ရောက်ရှိလာပြီး စုံစမ်းစစ်ဆေးရန်အတွက် ရွာသားအများအပြားကို ခေါ်ဆောင်သွားခဲ့သည်။ အနောက်တောင်မီဒီယာမှ လူအများလည်း စစ်ဆေးရန် ခေါ်ဆောင်ခံရသည်။

အခြေအနေမှာ အလွန်ပင် ကြီးမားကာ ကျယ်ပြန့်သွားခဲ့သည်။

မူလက ဝမ်ယုံချန်က လျိုဗျောင်ကို သတ်သည့်အမှုသာဖြစ်သော်လည်း ဂူချန်၏ ထုတ်ဖော်

ချက်များကြောင့် ကြီးမားသည့် အမှုကြီးတစ်ခု ဖြစ်လာခဲ့သည်။

ရာဇဝတ်ဂိုဏ်းကြီးတစ်ခုအကြောင်း ဖြစ်ပြီး အွန်လိုင်းမှ တိုက်ရိုက်ထုတ်လွှင့်နေသည့်အတွက် မလွဲမသွေ စုံစမ်းစစ်ဆေးရတော့မည့် အနေအထား ဖြစ်လာသည်။

ထို့နောက် သတင်းထောက်များစွာ ရှီရှန်ရွာသို့ ရောက်ရှိလာပြီး အင်တာဗျူးများ ပြုလုပ်ကြသည်။

ဤအကြောင်းအရာမှာ Weibo တွင်လည်း ထိပ်ဆုံး၌ ရေပန်းစားလာခဲ့သည်။

အခြေအနေမှာ ပိုမိုပြင်းထန်လာသည်နှင့်အမျှ ရှီရှန်ရွာသားများက လျိုယာကျွင်း၏ မိသားစုကို တိုင်ကြားရန် တစ်ယောက်ပြီးတစ်ယောက် ထွက်ပေါ်လာကြသည်။

ထို့အပြင် အာဏာပိုင်များက တိုင်ကြားသူများအတွက် ဆုငွေချီးမြှင့်မည်ဟု ကြေညာလိုက်သည့်အခါ လူအများ ထပ်မံ ထွက်ပေါ်လာခဲ့သည်။

[ကျွန်တော် လျိုယာကျွင်းမိသားစုကို တိုင်ကြားချင်ပါတယ်။ လျိုဗျောင်က လူတွေကို အမြဲအနိုင်ကျင့်တယ်။ သူတို့မိသားစုက ဘာမှ အသုံးမကျဘူး။ သူတို့က ကျွန်တော်တို့မိသားစုကို အမြဲအနိုင်ကျင့်ပြီး ပါးစပ်ပိတ်ခိုင်းထားတယ်။ ဆွန်ယန်မုန်မိသားစုကိုလည်း စွပ်စွဲဖို့ ကျွန်တော်တို့ကို အတင်းအကျပ် လုပ်ခိုင်းခဲ့တာ။ ဆွန်ယန်မုန်နဲ့ ဝမ်ယုံချန်တို့က ဘယ်လိုလူတွေလဲဆိုတာ မပြောရအောင် တားမြစ်ထားတယ်။ ဘယ်လိုပဲဖြစ်ဖြစ် လျိုယာကျွင်းမိသားစုက တကယ့်ကို ရွံစရာကောင်းတယ်]

[လျိုယာကျွင်းမိသားစုက ငွေတိုးချေးစားတာ။ သူတို့လူတွေ အများကြီးပဲ။ ကျွန်တော်တို့ သူတို့ကို မထိရဲဘူး။ သူတို့က ပြောရင် သေမယ်လို့ ခြိမ်းခြောက်တယ်]

[လျိုဗျောင်က တကယ့်ကို ရွံစရာကောင်းတယ်။ သူ ဘယ်နှစ်ယောက်ကို အနိုင်ကျင့်ခဲ့လဲဆိုတာတောင် မသိဘူး။ ဒီတစ်ခါ ဆွန်ယန်မုန် အနိုင်ကျင့်ခံရပြီး သူ သေသွားတာက တကယ်ကို ကျေနပ်စရာပဲ]

[ကျွန်တော်လည်း လျိုယာကျွင်းကို တိုင်မယ်။ နောက်ဆုံးတစ်ခါ သူတို့ဆီက တစ်သောင်းချေးတော့ ငါးသောင်းပြန်ပေးခိုင်းတယ်။ မပေးရင် အိမ်ကပစ္စည်းတွေ အကုန်ထုခွဲပစ်မယ်တဲ့။ တစ်သောင်းပဲ ပြန်ပေးခိုင်းပြီး ကျန်တဲ့ လေးသောင်းက ဝိုင်ဝယ်ခိုင်းတာ။ ဝိုင်က အရမ်းညံ့တယ် အတင်းအကျပ် ရောင်းခိုင်းတာပဲ။ သူတို့က ငွေတိုးချေးစားနေတာ]

[လျိုယာကျွင်းမိသားစုက လူတွေကို အနိုင်ကျင့်တာ ကြာလှပြီ။ အခုတော့ မိသွားပြီ ဟားဟား ကျေနပ်လိုက်တာ။ အရင်ကတော့ မပြောရဲဘူး။ အခုတော့ တိုင်ရဲပြီ]

ရွာသားများနှင့် ယခင်က အနိုင်ကျင့်ခံခဲ့ရသူများက တစ်ယောက်ပြီးတစ်ယောက် ဆန္ဒအလျောက် ထွက်လာတိုင်ကြားကြသည်။

သူတို့မှာ အရေးကြီးသော သက်သေများ ဖြစ်ကြသည်။

သူတို့အားလုံး ပူးပေါင်း၍ တိုင်ကြားခဲ့ကြသည်။

ရဲတပ်ဖွဲ့နှင့် တရားရုံးကလည်း လျိုယာကျွင်းနှင့် အနောက်တောင်မီဒီယာကို ဆက်လက် စုံစမ်းစစ်ဆေးနေသည်။

မီဒီယာများကလည်း စုံစမ်းရန် ရောက်ရှိလာပြီး ရွာသားအချို့က အင်တာဗျူးများကို ဖြေကြားခဲ့သည်။

[သနားစရာ ဝမ်ယုံချန်၊ ဝမ်ယုံချန်နဲ့ ဆွန်ယန်မုန် မိသားစုက လူကောင်းတွေပါ။ ဝမ်ယုံချန်က အရမ်းရိုးသားတယ်။ ဘယ်သူ့ကိုမှ မနှောင့်ယှက်ဘူး အမြဲ ပြုံးပြုံးလေးပဲ။ ဒါပေမဲ့ သူတို့က ငွေချေးပြီး မဆပ်နိုင်တော့ လျိုဗျောင်က သူ့မိန်းမကို သွားအနိုင်ကျင့်တာ လူတိုင်းသိပေမဲ့ ဘယ်သူမှ မပြောရဲကြဘူး]

[ဆွန်ယန်မုန်က အရမ်းကောင်းတဲ့သူ၊ အရမ်းကို သီလရှိတာ၊ သူမက ဘယ်လိုလုပ်ပြီး တခြားသူနဲ့ ဖောက်ပြန်မှာလဲ။ ဆွန်ယန်မုန်နဲ့ ဝမ်ရှောင်မုန်က နှစ်ယောက်လုံး နားမကြား၊ စကားမပြောနိုင်ဘူး။ တကယ်ကို သနားဖို့ကောင်းတယ်]

[လျိုဗျောင်ဆိုတဲ့ လူက ဆွန်ယန်မုန်ကို တစ်လနီးပါးလောက် အနိုင်ကျင့်နေတာ။ ခဏခဏ လာပြီးတော့လေ။ ကျွန်တော် ဆွန်ယန်မုန် အော်သံတွေကို ခဏခဏ ကြားနေရပေမဲ့ ဘယ်သူမှ မကူညီရဲဘူး ဘယ်သူမှ မတိုင်ရဲဘူး]

[ဝမ်ယုံချန်က မတိုင်ရဲဘူး။ တိုင်လိုက်ရင် လျိုဗျောင်က ထောင်ထဲ ခဏပဲ နေရမှာ။ လျိုဗျောင် ထောင်ထဲရောက်သွားရင် ဝမ်ယုံချန်မိသားစု ဒုက္ခရောက်မှာ။ သူတို့က လျိုယာကျွင်းမိသားစုကို မထိရဲဘူး။ တကယ်ကို သနားဖို့ကောင်းတယ်]

[လျိုယာကျွင်းမိသားစုက ဝမ်ရှောင်မုန်ကိုသုံးပြီး ဆွန်ယန်မုန်ကို ခြိမ်းခြောက်တယ်လို့ ကြားတယ်။ ဘယ်လိုပဲဖြစ်ဖြစ် လျိုဗျောင်နဲ့ လျိုယာကျွင်းမိသားစုက လူယုတ်မာတွေပဲ။ ဝမ်ယုံချန်က သူ့ကို သတ်လိုက်တာ ကောင်းတယ်။ ဝမ်ယုံချန်က သေဒဏ်ကျဖို့ များပေမဲ့ ဒါက တကယ့်ကို သနားစရာပဲ။ ဆွန်ယန်မုန်နဲ့ ဝမ်ရှောင်မုန် ဘယ်လိုရှင်သန်ကြမလဲ။ နှစ်ယောက်လုံးက နားမကြား၊ စကားမပြောနိုင်ဘူးဆိုတော့ ဘဝကို ဘယ်လိုဖြတ်သန်းကြမလဲ။ သူတို့ယောက်ျားကလည်း သေဒဏ်ရင်ဆိုင်နေရပြီ ဘာလမ်းမှ မရှိတော့ဘူး]

[သနားစရာကောင်းလိုက်တာ ဆွန်ယန်မုန်ရဲ့ ဘဝကတော့ ပြီးသွားပြီ။ သူ့ဘဝ ပျက်စီးသွားပြီ။ သူ့ယောက်ျားက ထောင်ထဲမှာ ယောက်ျားကလည်း ဆုံးတော့မှာ... ဟူး လူတွေရဲ့ ကံကြမ္မာက ဘာလို့ ဒီလောက်တောင် ဆိုးရွားရတာလဲ]

ဤအင်တာဗျူးများကို အွန်လိုင်းတွင် အားလုံး ထုတ်ပြန်ခဲ့သည်။

အမှန်တရားမှာ ထင်ရှားစွာ ပေါ်ပေါက်လာခဲ့ပြီ ဖြစ်သည်။

အင်တာနက် အသုံးပြုသူတိုင်းမှာ အရာတစ်ခုကို အသေအချာ သဘောပေါက်သွားကြသည်။ လျိုယာကျွင်း၏ မိသားစုသည် ငွေတိုးချေးစားသည့် ရာဇဝတ်ဂိုဏ်းတစ်ခုကို တည်ထောင်ထားပြီး၊ ရွာသားများနှင့် ပူးပေါင်းကာ အာဏာပြ အနိုင်ကျင့်နေသည့်အတွက် မည်သူမျှ မဆန့်ကျင်ရဲကြပေ။

ထိုကဲ့သို့သော အခြေအနေကြောင့်ပင် လျိုဗျောင်မှာ မင်းမူပြီး သူတစ်ပါးသားမယားကို အနိုင်ကျင့်ရန် ဝန်မလေးခဲ့ခြင်းပင်။

ရှီရှန်ရွာသားများမှာလည်း ကြောက်ရွံ့မှုကြောင့် ပါးစပ်ပိတ်နေခဲ့ကြရသဖြင့် ဝမ်ယုံချန်နှင့် ဆွန်ယန်မုန်တို့ မိသားစုမှာ အကူအညီမဲ့ခဲ့ရသည်။

ရလဒ်အနေဖြင့် ပထမအကြိမ် တရားရုံးစွဲဆိုမှုတွင် ဝမ်ယုံချန်ကို သေဒဏ်ပေးရန် အမိန့်ချမှတ်ခဲ့သည်။

ထိုအချိန်က အွန်လိုင်းမှ ဝေဖန်သူများမှာလည်း ဆွန်ယန်မုန်ကိုသာ အပြစ်တင်ကာ "သူမကိုယ်တိုင် လမ်းမှားလိုက်စား၍ ခံရခြင်းဖြစ်သည်" ဟူသည့် စွပ်စွဲချက်များဖြင့် ဝိုင်းဝန်းတိုက်ခိုက်ခဲ့ကြသည်။

ထိုအခြေအနေဆိုးကြီးကို ဂူချန်ဆိုသည့် သင်တန်းဆင်း ရှေ့နေလေးက ပြောင်းလဲပစ်ခဲ့သည်။ သူသည် စကားမပြောနိုင်သလို အကြားအာရုံမရသည့် ဆွန်ယန်မုန်၏ ဘက်မှရပ်တည်ကာ သူမ၏ ဂုဏ်သိက္ခာကို ပြန်လည်ဆယ်တင်ပေးခဲ့သည်။

အနည်းဆုံးတော့ လူတိုင်းကို အမှန်တရား သိရှိသွားအောင် လုပ်ဆောင်နိုင်ခဲ့သည်။

လျိုဗျောင်သည် ဝမ်ယုံချန်တို့ မိသားစုကို အနိုင်ကျင့်သူဖြစ်ကြောင်း၊ ဆွန်ယန်မုန် လက်မှတ်ထိုးခဲ့သည့် စာချုပ်မှာလည်း သမီးဖြစ်သူကို ဓားစာခံလုပ်၍ အတင်းအကျပ် ခြိမ်းခြောက်ချုပ်ဆိုခိုင်းခဲ့ခြင်းဖြစ်ကြောင်းတို့ကို ဂူချန်က ဖော်ထုတ်ပြသနိုင်ခဲ့သည်။

ဂူချန်သည် Weibo တွင် လူပြောများဆုံး အကြောင်းအရာတစ်ခု ဖြစ်လာခဲ့ပြီး လူအများက သူ့ကို လေးစားလာကြသည်။

[ဂူချန် တကယ်တော်တာပဲ။ သင်တန်းဆင်းရှေ့နေတစ်ယောက်အနေနဲ့ ဒီလောက်လုပ်နိုင်တာ တကယ့်ကို အံ့ဩဖို့ကောင်းတယ်]

[သူများတွေ မလုပ်ရဲတာကို သူလုပ်ပြလိုက်တယ်။ ဂူချန်က လူတိုင်းကို အမှန်တရား ပြောပြခဲ့တယ်]

[ဂူချန်က တော်လိုက်တာ။ သူက သင်တန်းဆင်းရှေ့နေတစ်ယောက်တင် မဟုတ်ဘူး။ သူကိုင်တွယ်ခဲ့တဲ့ အမှုနှစ်ခုစလုံးက အရမ်းကောင်းတယ်]

[လျိုဗျောင်ကတော့ သေသင့်တယ်။ လျိုယာကျွင်းလည်း ထောင်ထဲသွားရမယ်။ ဒီလို လူယုတ်မာတွေကို လွှတ်မထားသင့်ဘူး]

[ဒါပေမဲ့ ဆွန်ယန်မုန်တို့ မိသားစုက တကယ်ကို သနားဖို့ကောင်းတယ်။ ဆွန်ယန်မုန်ထက် ပိုဆိုးတဲ့သူ ရှိဦးမလား။ ဂူချန်က ဝမ်ယုံချန်ရဲ့ သေဒဏ်ကို တစ်သက်တစ်ကျွန်း ဖြစ်အောင် ကူညီပေးနိုင်မလား ဘယ်လိုပဲဖြစ်ဖြစ် အပြစ်က လွတ်ဖို့တော့ မဖြစ်နိုင်ပါဘူး....]

[အဲဒါတော့ မဖြစ်နိုင်ဘူး။ ဝမ်ယုံချန်က လူသတ်ခဲ့တာဆိုတော့ အထောက်အထား ခိုင်လုံနေတာပဲ။ ဂူချန်က ဘုရားသခင်ပဲ ဖြစ်နေပါစေဦးတော့ သူ အပြစ်ကင်းတယ်လို့ ပြောလို့ မရနိုင်ဘူး]

[မှန်တာပေါ့ သေဒဏ်ကနေ တစ်သက်တစ်ကျွန်း ဖြစ်သွားရင်လည်း ကောင်းတာပဲ။ အနည်းဆုံး ဆွန်ယန်မုန်အတွက် မျှော်လင့်ချက် ရှိလာမယ်၊ ဝမ်ရှောင်မုန်လည်း သူ့ဖခင်ကို ပြန်တွေ့နိုင်မှာပေါ့]

[အနည်းဆုံးတော့ ဒီအမှုက ဝမ်ရှောင်မုန်ကို သူ့ဖခင်က လူတစ်ယောက်ကို အန္တရာယ်ပြုလို့ ထောင်ကျတာ မဟုတ်ဘဲ သူရဲကောင်းတစ်ယောက်ဖြစ်ကြောင်း သိသွားစေမှာပါ....]

အင်တာနက် အသုံးပြုသူတိုင်းသည် ဂူချန် ဝမ်ယုံချန်၏ ကံကြမ္မာကို ပြောင်းလဲပေးနိုင်ရန် မျှော်လင့်နေကြသည်။

ဝမ်ယုံချန်မှာ လူကောင်းတစ်ယောက် ဖြစ်သည်။

ထို့အပြင် ဆွန်ယန်မုန်နှင့် ဝမ်ရှောင်မုန်တို့မှာလည်း ဝမ်ယုံချန်၏ စောင့်ရှောက်မှု လိုအပ်

နေသည်။

သို့သော်လည်း အင်တာနက် အသုံးပြုသူများမှာလည်း ၎င်းမှာ လက်တွေ့မကျမှန်း သိရှိနေကြသည်။

လူသတ်မှုအတွက် သက်သေအထောက်အထားများမှာ ခိုင်လုံနေ၍ ငြင်းဆို၍ မရနိုင်ပေ။ လူသတ်လျှင် အသက်ဖြင့် လျော်ရမည်ဆိုသည်မှာ ရှေးယခင်ကတည်းက ရှိခဲ့သော စည်းမျဉ်းဖြစ်သည်။ မည်သူမျှ ဝမ်ယုံချန်ကို မကယ်တင်နိုင်ပေ။ ဂူ

ချန်မှာ လျိုယာကျွင်းကို ထောင်ချနိုင်ခဲ့ပြီး ရှီရှန်ရွာ၏ ရာဇဝတ်ဂိုဏ်းကို ချေမှုန်းနိုင်ခဲ့သည်မှာ ထူးချွန်လွန်းနေပြီပင်။

သို့သော် ဝမ်ယုံချန်၏ အမှုနှင့် ပတ်သက်လာလျှင်မူ ဥပဒေမဲ့မိုက်ရူးရဲဟု နာမည်ကြီးသည့် ဂူချန်ပင်လျှင် ဘာမျှ မလုပ်နိုင်တော့သည်မှာ အမှန်ပင်။