အခန်း ၃၉

အခန်း။ ၃၉

ဂူချန်က တရားခွင်ကို ရည်ညွှန်းပြီး "တရားသူကြီးမင်းခင်ဗျာ ကျွန်တော် တစ်ခု ပြောကြားခွင့်ပြုပါ။ ကျွန်တော့်ရဲ့ လျှောက်လဲချက် မပြီးဆုံးမချင်း ဘယ်သူ့ကိုမှ ကြားဖြတ်မပြောဖို့ မေတ္တာရပ်ခံပါတယ်" ဟု တောင်းဆို လိုက်သည်။

ဂူချန် စတင်ပြောဆိုလိုက်ချိန်တွင် အင်တာနက်ကြည့်ရှုသူများ၏ မျက်နှာအမူအရာများမှာ ပြောင်းလဲသွားကြသည်။

ထိုအမှုမှာ မျှော်လင့်ချက် ရှိသေးကြောင်း သူတို့ သိလိုက်ကြခြင်းပင်။

ဂူချန်သည် ယခင်က ဝမ်ယုံချန်ကို အပြစ်ကနေ ကင်းလွတ်ခွင့်ပေးရန် တောင်းဆိုခဲ့ဖူးသည်။

[လာပြီ]

[အစိတ်လှုပ်ရှားဆုံး အပိုင်းကို ရောက်ပြီ။ အလုပ်သင်ရှေ့နေနဲ့ ထိပ်တန်းရှေ့နေတို့ရဲ့ တိုက်ပွဲ]

[အလုပ်သင်ရှေ့နေနဲ့ ရှေ့နေချုပ်တို့ရဲ့ တိုက်ပွဲ ဂူချန်ရေ အကောင်းဆုံး ကြိုးစား]

[ဥပဒေကို ရူးသွပ်သူကြီးရဲ့ စွမ်းရည်ကို ပြသတော့မလား။ သေဒဏ်ကနေ တစ်သက်တစ်ကျွန်း ဖြစ်သွားရုံနဲ့တင် ကျွန်တော်တို့အတွက်တော့ လေးစားစရာကောင်းနေပြီ]

ရှေ့နေချုပ်နှင့် ဟန်ဇီမင်းတို့မှာ ဂူချန်ကို စူးစိုက်ကြည့်နေကြသည်။

တရားခွင်တစ်ခုလုံး တိတ်ဆိတ်သွားသည်။

တရားသူကြီး ရှန်ကျားရွေက "ကာကွယ်ရေးရှေ့နေ လျှောက်လဲချက်ပေးပါ။ ဘယ်သူမှ မလိုအပ်ဘဲ ကြားဖြတ် မပြောကြပါနဲ့" ဟု ပြောလိုက်သည်။

ဂူချန်က "ကျွန်တော့်အမြင်မှာတော့... ရှေ့နေချုပ်နဲ့ တရားလိုရှေ့နေတို့ ပြောသွားတာလည်း အဓိပ္ပာယ်ရှိပါတယ်။ ဝမ်ယုံချန် ကြုံတွေ့ရတဲ့ ဒုက္ခတွေကို ကျွန်တော်လည်း စာနာပါတယ်။ ဝမ်ယုံချန်သာ အပြင်ကို ပြေးထွက်သွားပြီး လူကို တန်းသတ်လိုက်မယ်ဆိုရင် ဒါက တမင်သက်သက် ရည်ရွယ်ချက်ရှိရှိ လူသတ်မှု ဖြစ်မှာ သေချာပါတယ်"

ဤစကားကို ကြားလိုက်ရသောအခါ ဟန်ဇီမင်းနှင့် ရှေ့နေချုပ်တို့ နှစ်ယောက်စလုံး အံ့အားသင့်သွားကြသည်။

အွန်လိုင်းမှ ကြည့်ရှုသူများမှာလည်း ကြောင်သွားကြသည်။

ဟင်...

သူက ဝမ်ယုံချန်ရဲ့ ရှေ့နေ မဟုတ်ဘူးလား။

ဘာတွေ ဖြစ်နေတာလဲ။

လူတိုင်း၏ စိတ်ဝင်စားမှုမှာ အထွတ်အထိပ်သို့ ရောက်သွားသည်။

ဂူချန်က "ဒါပေမဲ့ ဝမ်ယုံချန် အပြင်ကို ပြေးထွက်သွားတဲ့အချိန်မှာ သူက ဘယ်သူ့ကိုမှ တန်းပြီး မသတ်ခဲ့ပါဘူး"

"အဲ့ဒီအချိန်မှာ ဖြစ်ပျက်ခဲ့တာကတော့..."

"ဝမ်ယုံချန်က သူ့ဇနီးဆီက အသက်မရှင်ချင်တော့ဘူးဆိုတဲ့ စကားကို ကြားလိုက်ရတဲ့အခါ အလွန်အမင်း ဒေါသထွက်ပြီး လျိုဗြောင်ဆီကို ပြေးသွားခဲ့တာပါ"

"ဝမ်ယုံချန်မှာ လျိုဗြောင်ကို သတ်ဖို့ ရည်ရွယ်ချက် လုံးဝ မရှိခဲ့ပါဘူး။ တကယ်လို့သာ သူသတ်ချင်ရင် အရင်ကတည်းက လုပ်ပြီးနေမှာပေါ့။ ဘာလို့ အခုမှ စောင့်လုပ်ရမှာလဲ"

"သူ အပြင်ကို ပြေးထွက်သွားတုန်းက လျိုဗြောင်ကို နည်းနည်းပါးပါး ရိုက်နှက်ပြီး သူ့ရင်ထဲက မကျေနပ်ချက်တွေကို ဖြေရှင်းချင်ရုံလောက်ပဲ ရှိပါတယ်"

"ဒါပေမဲ့... အပြင်ကို ရောက်တဲ့အခါ သူက လျိုဗြောင်ကို မယှဉ်နိုင်တဲ့အတွက် ပြန်ပြီး အနိုင်ကျင့်ခံခဲ့ရပြန်ပါတယ်"

"အဲဒီအချိန်မှာ လျိုဗြောင်က အရမ်းအံ့သြသွားတယ်။ ဝမ်ယုံချန်က ဘယ်လိုလုပ်ပြီး သူ့ကို လာရိုက်ရဲတာလဲပေါ့။ ဒါကြောင့် လျိုဗြောင်က ကားထဲကနေ ဓားယူပြီး ဝမ်ယုံချန်ကို သတ်ပစ်မယ်လို့ ချက်ချင်း ခြိမ်းခြောက်လာခဲ့တာပါ"

"လျိုဗြောင်ရဲ့ ကားထဲမှာ ဓားရှိတယ်ဆိုတာကို ဝမ်ယုံချန် သိထားသလို လျိုဗြောင် ဓားထုတ်လိုက်တာကိုလည်း သူ မြင်လိုက်ရပါတယ်။ အဲဒီအခါ ဝမ်ယုံချန်က ကြောက်လန့်ပြီး အနီးနားက ကတ်ကြေးကို ကောက်ကိုင်လိုက်မိတာပါ"

"အဲဒီအချိန်မှာ ဝမ်ယုံချန်ရဲ့ ရင်ထဲမှာ ကြောက်ရွံ့မှု၊ ဒေါသနဲ့ ထိတ်လန့်မှုတွေ လွှမ်းမိုးနေခဲ့တာပါ"

"အသတ်ခံရတော့မယ့် ကြောက်စိတ်နဲ့ အချိန်အကြာကြီး အနိုင်ကျင့်ခံခဲ့ရတဲ့ ဒေါသတွေက ပေါက်ကွဲထွက်လာခဲ့တာပါ"

"လျိုဗြောင်က အရင် ဓားထုတ်ပြီး ခြိမ်းခြောက်ခဲ့တဲ့အတွက် ဒါက ဝမ်ယုံချန်ရဲ့ အသက်ကို ခြိမ်းခြောက်မှု ဖြစ်လာခဲ့ပါတယ်။ အဲဒီအခါမှာ သူက ကတ်ကြေးနဲ့ ပြန်လည်ခုခံရင်း လျိုဗြောင် သေဆုံးသွားခဲ့ရတာပါ"

"ဒါကြောင့် ကျွန်တော် ယုံကြည်တာက ဝမ်ယုံချန်ရဲ့ လုပ်ရပ်က လုံးဝ ကိုယ့်ကိုကိုယ် ခုခံကာကွယ်ခြင်းပါ။ ရည်ရွယ်ချက်ရှိရှိ လူသတ်မှုလည်း မဟုတ်သလို ပေါ့ဆမှုကြောင့် လူသတ်မှုလည်း မဟုတ်ပါဘူး။ သူက သူ့ကိုယ်သူ ခုခံကာကွယ်ခဲ့တာပါ"

"ဟွာရှားရာဇဝတ်ကျင့်ထုံး ဥပဒေပုဒ်မ ၂၀ အရ ကိုယ့်ကိုကိုယ် ခုခံကာကွယ်ခြင်းနဲ့ ပတ်သက်ပြီး အခုလို ပြဋ္ဌာန်းထားပါတယ်"

[နိုင်ငံတော်၊ အများပြည်သူ သို့မဟုတ် တစ်ဦးတစ်ယောက်၏ အသက်၊ ခန္ဓာကိုယ်၊ ပစ္စည်းဥစ္စာတို့ကို ဥပဒေပြင်ပ ကျူးကျော်တိုက်ခိုက်မှုမှ ကာကွယ်ရန် လုပ်ဆောင်သော ခုခံမှုများသည် တရားဝင် ခုခံကာကွယ်ခြင်း ဖြစ်ပြီး ပြစ်မှုမမြောက်ပါ]

[အထူးသဖြင့် ရိုက်နှက်မှု၊ လူသတ်မှု၊ လုယက်မှု၊ မုဒိမ်းကျင့်မှု၊ ပြန်ပေးဆွဲမှုကဲ့သို့သော အသက်အန္တရာယ်ကို ခြိမ်းခြောက်သည့် ရာဇဝတ်မှုများကို ခုခံရာတွင် ကျူးလွန်သူကို ထိခိုက်မှု သို့မဟုတ် သေဆုံးမှု ဖြစ်စေသည်တိုင်အောင် ၎င်းသည် အလွန်အကျွံ ခုခံခြင်း မမြောက်သလို ပြစ်မှုလည်း မမြောက်ပေ]

"ဒါကြောင့် ဝမ်ယုံချန်က အပြစ်မရှိပါဘူး ခုခံကာကွယ်ခြင်းက အပြစ်မဟုတ်ပါဘူး"

ဂူချန် စကားကို အဆုံးသတ်လိုက်သည်နှင့် တရားခွင်တစ်ခုလုံး ပွက်လောရိုက်သွားပြီး လက်ခုပ်သံများ ဟိန်းထွက်လာသည်။

အွန်လိုင်းမှ တိုက်ရိုက်ထုတ်လွှင့်မှုကို ကြည့်ရှုသူများမှာလည်း ရင်ခုန်စိတ်လှုပ်ရှားကာ ဝမ်းသာအားရ ဖြစ်နေကြသည်။

[အံ့ဩဖို့ကောင်းလိုက်တာ]

[ဂူချန် မင်း တကယ်ကို ထူးချွန်တာပဲ။ ဒီလိုအချက်မျိုးကို ဘယ်လိုရှာတွေ့လိုက်တာလဲ]

[ကိုယ့်ကိုကိုယ် ခုခံကာကွယ်ခြင်းဆိုတာ ပြစ်မှုမမြောက်ဘူး။ ဝမ်ယုံချန်ရဲ့ ထွက်ဆိုချက်မှာလည်း လျိုဗြောင်က ဓားနဲ့သတ်မယ်လို့ ခြိမ်းခြောက်ခဲ့လို့ သူ ပြန်ခုခံခဲ့တာလို့ ပါပြီးသားလေ]

[ဒါဆိုရင် ဝမ်ယုံချန်ရဲ့လုပ်ရပ်က ကိုယ့်ကိုယ်ကိုယ် ခုခံကာကွယ်ခြင်းပဲ ဖြစ်နေပြီပေါ့။ ပြီးတော့ ခုခံကာကွယ်တာက ပြစ်မှုမမြောက်ဘူး မဟုတ်လား]

ဂူချန်က "ကျွန်တော့်ရဲ့ လျှောက်လဲချက် ပြီးဆုံးပါပြီ" ဟု ပြောလိုက်သည်။

ချက်ချင်းပင် ဟန်ဇီမင်းက လက်မြှောက်ကာ တရားခွင်တွင် ပြောဆိုခွင့် တောင်းဆို လိုက်သည်။

"ကျွန်တော် ကန့်ကွက်ပါတယ် ကာကွယ်ရေးရှေ့နေရဲ့ လျှောက်လဲချက်တွေက သူ့ရဲ့ ပုဂ္ဂိုလ်ရေးအမြင်သက်သက်ပါ။ ဘာအထောက်အထားမှ မရှိပါဘူး"

"ကျွန်တော် မေးပါရစေ။ လျိုဗြောင်က ဓားထုတ်တယ်ဆိုတာကို ဘယ်သူမြင်လိုက်တာလဲ ဝမ်ယုံချန်ကို အသက်အန္တရာယ်ပြုဖို့ ကြိုးစားခဲ့တာကိုရော ဘယ်သူက သက်သေပြနိုင်မလဲ"

"ဒီဓားဆိုတာကရော တကယ်ရော ရှိရဲ့လား။ ရဲတပ်ဖွဲ့ရဲ့ မှတ်တမ်းအရ လျိုဗြောင်ရဲ့ ကားထဲမှာ ဘာဓားမှ ရှာမတွေ့ခဲ့ပါဘူး။ အခင်းဖြစ်ပွားတဲ့နေရာမှာလည်း ဝမ်ယုံချန်ရဲ့ ကတ်ကြေးပဲ ရှိခဲ့တာပါ။ ဓားဆိုတာ မရှိတဲ့အတွက် ဒါက ဝမ်ယုံချန်တစ်ယောက်တည်း ဖန်တီးပြောဆိုနေတာပဲ ဖြစ်ပါတယ်"

"ဥပဒေဆိုတာ အထောက်အထားကိုပဲ ကြည့်တာပါ။ အဲဒီဓားနဲ့ပတ်သက်တဲ့ အထောက်အထားမရှိရင် ဓားလည်းမရှိဘူးလို့ပဲ သတ်မှတ်ရမှာပါ။ အဲဒီလိုဆိုရင် ဝမ်ယုံချန်မှာ အသက်အန္တရာယ် ကြုံတွေ့ခဲ့ရခြင်း မရှိပါဘူး။ ဟွာရှားရာဇဝတ်ကျင့်ထုံး ဥပဒေပုဒ်မ ၂၀ အရ ခုခံကာကွယ်ခြင်းရဲ့ အခြေခံအချက်မှာ လက်ရှိဖြစ်ပွားနေတဲ့ ကျူးကျော်တိုက်ခိုက်မှု သို့မဟုတ် အသက်အန္တရာယ်ကို ခြိမ်းခြောက်သည့် ရာဇဝတ်မှု ရှိရပါမယ်"

"တကယ်လို့ လျိုဗြောင်က ဆွန်ယန်မုန်ကို မုဒိမ်းကျင့်နေချိန်မှာ ဝမ်ယုံချန်က ဝင်ရောက်တားဆီးပြီး လူသတ်ခဲ့မယ်ဆိုရင်တော့ ခုခံကာကွယ်မှုလို့ ပြောလို့ရမှာပါ။ အခုတော့ ဒီဓားဆိုတာ မရှိတဲ့အတွက် ခုခံကာကွယ်မှု မမြောက်ပါဘူး။ ကာကွယ်ရေးရှေ့နေအနေနဲ့ အဲဒီဓားရှိကြောင်း သက်သေပြနိုင်မှသာ ဒီအမှုကို ပယ်ချလို့ရမှာပါ"

ဟန်ဇီမင်းက ပြတ်ပြတ်သားသား ပြောလိုက်သည်။

ပရိသတ်များမှာလည်း မှတ်ချက်များ တရစပ် ပေးနေကြသည်။

[ရှေ့နေဂူချန် အရည်အချင်းရှိပေမဲ့ ဟန်ဇီမင်းပြောတာလည်း မှန်နေပြန်ရော အထောက်အထားက လိုအပ်တာကိုး]

[တကယ်ပါပဲ ဓားမတွေ့ရဘဲနဲ့တော့ ခုခံကာကွယ်မှုလို့ ဘယ်လိုသက်သေပြရမလဲ]

[ဟုတ်တယ်... အဲဒီဓားက ဘယ်ရောက်သွားတာလဲ။ ရဲတွေတောင် ရှာမတွေ့ခဲ့တာ အချိန်တွေလည်း ကြာသွားပြီဆိုတော့ အခုမှ ပြန်ရှာဖို့က ပိုတောင် ခက်ခဲဦးမှာ]

ထိုအချိန်တွင် ဖန်တဥပဒေရုံး၌ ဒါရိုက်တာ ရွှယ်ယောက်ထင်၊ အလုပ်သင်ရှေ့နေ ရွှယ်ချင်းချင်းနှင့် ထိပ်တန်းရှေ့နေ ကောင်းရုန်တို့က တရားခွင် တိုက်ရိုက်ထုတ်လွှင့်မှုကို ကြည့်ရှုနေကြသည်။

ကောင်းရုန်က ခေါင်းခါရင်း "ဓားကို အခုအချိန်မှာ ရှာတွေ့ဖို့ဆိုတာ မဖြစ်နိုင်တော့ပါဘူး။ တကယ်လို့များ အဲဒီဓားရှိခဲ့ရင်တောင် လျိုယာကျွင်းက ဒါကို အစောကြီးကတည်းက ဖျောက်ဖျက်ထားမှာပါ။ ဂူချန် ကြိုးစားတာကောင်းပေမဲ့ အထောက်အထား မလုံလောက်ဘူး။ ရွာထဲမှာလည်း CCTV မရှိတော့ ဓားကို ရှာဖို့ ပိုခက်သွားပြီ။ နောက်ဆုံးတော့ ဝမ်ယုံချန် သေဒဏ်ပဲ ကျသွားလိမ့်မယ်... ဓားကို မတွေ့သရွေ့တော့ တစ်သက်တစ်ကျွန်းဒဏ်တောင် ရဖို့ မလွယ်ဘူး" ဟု သုံးသပ်သည်။

ရွှယ်ချင်းချင်းက "ဒါဆိုရင်လည်း ထပ်ရှာခိုင်းပါဦး။ ဓားကို ရှာတွေ့မှာပါ ရဲတွေကို အချိန်

ထပ်ပေးပြီး စုံစမ်းခိုင်းပါ" ဟု တောင်းဆို လိုက်သည်။

ကောင်းရုန်က "အဲဒါ မဖြစ်နိုင်တော့ဘူး။ ဒီအမှုက ဒီနေ့ ဒုတိယအကြိမ် စီရင်ချက်ချဖို့ သတ်မှတ်ထားတာ။ အရင်ကတခါ ရွှေ့ဆိုင်းထားပြီးပြီ။ ထပ်ရွှေ့လို့မရတော့ဘူး။ ဒီနေ့ပဲ အဆုံးသတ်ရမှာ။ အခုမှ ဓားကို ဘယ်လိုရှာတွေ့နိုင်ပါ့မလဲ။ ဓားကိုရှာဖို့ ရဲဘယ်နှစ်ယောက် လိုမလဲ။ ပြီးတော့ အဲဒီဓားက တကယ်ရော ရှိရဲ့လား" ဟု ငြင်းဆန်သည်။

ရွှယ်ချင်းချင်းက "ကျွန်မ မယုံဘူး။ ဂူချန်မှာ ဒီအမှုကို အနိုင်ယူဖို့ အခွင့်အရေး ရှိသေးတယ်လို့ ကျွန်မ ထင်တယ်" ဟု ခိုင်ခိုင်မာမာ ပြောလိုက်သည်။

ကောင်းရုန်က ခေါင်းခါရင်း "ဒီအမှုမှာ အထောက်အထား စုဆောင်းရတာ အလွန်ခက်ခဲလွန်းတယ်။ ရဲတောင် ရှာမတွေ့တဲ့ ဓားကို အခုမှ ဘယ်ကနေ ရှာရမှာလဲ။ ဝမ်ယုံချန် သေဒဏ်ကျဖို့ပဲ ရှိတော့တယ်။ ဂူချန် ဒီအမှုကို လှည့်စားဖို့ဆိုတာ မဖြစ်နိုင်တော့ပါဘူး" ဟုသာ တုံ့ပြန်လိုက်သည်။