အခန်း ၅၁

အခန်း။ ၅၁

တိုက်ရိုက်ထုတ်လွှင့်မှုကို အချိန်အတော်ကြာ ပြုလုပ်ပြီးနောက် ဂူချန်က ပရိသတ်များနှင့် ချိတ်ဆက်ကာ မေးခွန်းများ ဖြေကြားပေးရန် စီစဉ်လိုက်သည်။

ပထမဆုံး ချိတ်ဆက်လာသူမှာ ဝမ်ဝမ်ရွှယ်ပင်။

"ရှေ့နေဂူ... ကျွန်တော့်မှာ မေးခွန်းတစ်ခုရှိတယ်။ ခွေးက ကျွန်တော့်ကို ကိုက်လို့ ကျွန်တော်က ပြန်ကိုက်ပြီး ခွေးကို သတ်လိုက်ရင် ဒါ ဥပဒေနဲ့ ငြိပါသလား"

ပရိသတ်များမှာ ရယ်မောကုန်ကြသည်။ ဂူချန်ကမူ တည်ငြိမ်စွာပင် "မငြိပါဘူး။ ဒါက အရေးပေါ် ခုခံကာကွယ်မှုပဲ။ ခွေးက ကိုယ့်ကို ကိုက်ပြီး အန္တရာယ်ပြုနေပြီဆိုတော့ အဲ့ဒီခွေးကို သတ်လိုက်တာက တရားဝင် ခုခံတာမျိုးမို့ လျော်ကြေးပေးစရာ မလိုသလို အပြစ်လည်း မရှိပါဘူး" ဟု ရှင်းပြသည်။

ဝမ်ဝမ်ရွှယ်က နောက်ထပ် မေးခွန်းတစ်ခု ထပ်မေးသည်။

"ဒါဆို... အဲ့ဒီခွေးနေရာမှာ ကျားရိုင်း ဒါမှမဟုတ် ပန်ဒါဖြစ်နေရင်ရော သူတို့က ကိုက်တော့မှာမို့ ကျွန်တော်က ပြန်သတ်လိုက်ရင် ဥပဒေနဲ့ ငြိပါသလား"

ဂူချန်က "အဲ့ဒါလည်း အတူတူပါပဲ။ အရေးပေါ် ခုခံမှုပဲ။ သူတို့က တန်ဖိုးကြီးတဲ့ တိရစ္ဆာန်တွေ ဖြစ်ပေမဲ့ လူ့အသက်က ပိုတန်ဖိုးရှိပါတယ်။ တောထဲမှာ အစာမရှိဘဲ ရက် ၃၀ လောက် ပိတ်မိနေရင် ပန်ဒါကိုပဲစားစား၊ ကျားကိုပဲစားစား စားလို့ရပါတယ်။ အဝတ်အစား မရှိရင်လည်း အရေခွံခွာပြီး ဝတ်လို့ရတယ်။ ဒါလည်း အရေးပေါ် ခုခံမှုပါပဲ" ဟု ဖြေကြားလိုက်ရာ ပရိသတ်များမှာ အံ့အားသင့်သွားကြသည်။

ချိတ်ဆက်မှု ပြီးဆုံးပြီးနောက် နောက်ထပ် ချိတ်ဆက်လာသူမှာ [မင်းပြုံးလိုက်ရင်အရမ်းလှတယ်] ပင်။

"ရှေ့နေဂူ... မိန်းကလေးဆောင်ကို မှန်ပြောင်းနဲ့ ကြည့်တာက ပြစ်မှုမြောက်ပါသလား။ ထောင်ကျနိုင်ပါသလား"

ဂူချန် "..."

"ဒီမေးခွန်းကိုတော့ ကျွန်တော် မဖြေနိုင်ဘူး။ ရှေ့နေတွေမှာလည်း စည်းမျဉ်းရှိတယ်လေ" ဟု ငြင်းလိုက်သည်။

သို့သော် ပရိသတ်များက မေးခွန်းကို ဖြေပေးဖို့ တောင်းဆိုကြပြီး အဆိုပါ ပရိသတ်က Douyin နံပါတ်တစ်လက်ဆောင် ပို့လိုက်သည့်အခါ ဂူချန်က "ကျေးဇူးတင်ပါတယ်။ တကယ်တော့ ဒီမေးခွန်းက မဖြေနိုင်တာ မဟုတ်ပါဘူး။ ရှေ့နေတွေမှာ စည်းမျဉ်းရှိတယ်ဆိုတာ... လက်ဆောင်ရောက်လာရင်တော့ ဖြေပေးရမှာပေါ့။ လက်ဆောင်ပို့တဲ့သူကို အလကား တိုင်ပင်ခိုင်းလို့ မရဘူးလေ" ဟု ပြန်ပြောလိုက်သည်။

ပရိသတ်များမှာ ရယ်မောလိုက်ကြပြီး ဂူချန်က ဆက်၍ "မင်း မှန်ပြောင်းနဲ့ ကြည့်တာက မိန်းကလေးဆောင်ကို ကြည့်တာလားဆိုရင် မဟုတ်ပါဘူး။ မင်းက အိမ်ခေါင်မိုးပေါ်က ကြည့်တာပါ။ ဘယ်မိန်းကလေးဆောင်ကို ပြောနေတာလဲ မင်း တကယ်ပဲ မိန်းကလေးဆောင်ကို စောင့်ကြည့်ခဲ့တာလား" ဟု ပြန်မေးလိုက်ရာ ပရိသတ်များမှာ ဂူချန်၏ လူမိုက်ဆန်ပြီး ဥပဒေကို ကွေ့ပတ်သွားတတ်သည့် စတိုင်လ်ကြောင့် ရယ်မောမဆုံး ဖြစ်နေကြတော့သည်။

[မင်းပြုံးလိုက်ရင်အရမ်းလှတယ်] "…….."

ပရိသတ်များ "………."

[ဟားဟား... အခုမှ သဘောပေါက်သွားပြီ]

[တကယ့်ကို ဉာဏ်အလင်းပွင့်သွားတဲ့ အခိုက်အတန့်ပဲ]

[ဟုတ်တယ်... ဘယ်သူက ငါ့ကို မိန်းကလေးဆောင် ကြည့်တယ်လို့ ပြောလဲ သက်သေရှိလား ငါက မှန်ပြောင်းနဲ့ ရှုခင်းကြည့်တာ မရဘူးလား]

[မင်းပြုံးလိုက်ရင်အရမ်းလှတယ်]က "တကယ်လို့ ကျွန်တော်က မိန်းကလေးဆောင်ကို စောင့်ကြည့်ခဲ့တာပါလို့ ဝန်ခံမိရင်ရော ဒါ ဥပဒေနဲ့ ငြိသလား" ဟု ထပ်မေးလိုက်သည်။

ဂူချန်က "အဲ့ဒါလည်း မငြိပါဘူး။ ရိုးရိုးစောင့်ကြည့်တာလောက်နဲ့တော့ ဥပဒေနဲ့ မငြိပါဘူး။ ဓာတ်ပုံရိုက်တာမျိုး အများသူငါဆီ ဖြန့်ဝေတာမျိုး မလုပ်သရွေ့တော့ ဘာမှမဖြစ်ပါဘူး။ အများဆုံးတော့ ကိုယ်ကျင့်တရားအရ အပြစ်တင်ခံရုံလောက်ပဲ ရှိမှာပါ" ဟု ဖြေလိုက်သည်။

ထိုအချိန်တွင် နောက်ထပ်ချိတ်ဆက်လာသူမှာ ကျန်းရှန်းဝေဖြစ်သည်။

"ရှေ့နေဂူ... ကျွန်တော် အခက်အခဲလေးတစ်ခု ဖြစ်နေလို့ပါ။ ဒီနေ့ နေ့လည်စာ စားရင်း သူငယ်ချင်းနဲ့ ကြောင်မွေးတဲ့အကြောင်း ပြောမိရင်း ကြောင်ချေးက အရမ်းနံတယ်လို့ ပြောမိတယ်။ အဲ့ဒီမှာ မိန်းကလေးတစ်ယောက် ရောက်လာပြီး သူ့ထမင်းပန်းကန်ကို ကျွန်တော့်ခေါင်းပေါ် လောင်းချလိုက်တယ်။ ပြီးတော့ ဘာမှမဖြစ်သလို ထွက်သွားတယ်။ ကျွန်တော်တို့လည်း မကျေနပ်လို့ လိုက်မေးတော့ သူက ကျွန်တော့်ကို ပါးရိုက်ပြီး ကြောင်ချေးနံတယ်လို့ ပြောတဲ့အတွက် မင်းက လူမိုက်ပဲလို့ ပြောသွားတယ်။ ဒါနဲ့ ကျွန်တော် ရဲတိုင်လိုက်တယ်"

ဂူချန်က "ရဲတွေက ဘယ်လိုဖြေရှင်းပေးလိုက်လဲ" ဟု မေးလိုက်သည်။

ပရိသတ်များမှာ ဒေါသထွက်နေကြပြီ ဖြစ်သည်။

[ဘာလဲဗျ အဲ့ဒီ မိန်းကလေး တကယ့်ကို စောက်ကျင့်မကောင်းတာပဲ]

[ကြောင်ချေး နံတယ်ပြောတာကို ထမင်းပန်းကန် လောင်းချရသလား]

ကျန်းရှန်းဝေက "ရဲတွေက လာဖြေရှင်းပေးတယ်။ ကျွန်တော်က ဒဏ်ရာမရခဲ့ဘူး။ ဒါပေမဲ့ လူပုံအလယ်မှာ အရှက်ခွဲခံရတာကို မခံနိုင်ဘူး။ ရဲတွေကတော့ ငွေ ၁၀၀ လျော်ကြေးပေးပြီး တောင်းပန်ခိုင်းလိုက်တယ်။ ကျွန်တော်က မယူဘူး။ ဒီလို အရှက်ခွဲခံထားရတာကို ၁၀၀ နဲ့ ပြီးသွားရမလား။ နောက်ပြီး သူက တောင်းပန်တဲ့ပုံစံလည်း မဟုတ်ဘူး။ ပိုက်ဆံကို ကျွန်တော့်ဆီ ပစ်ပေါက်သွားတာ" ဟု နာကျင်စွာ ပြောပြသည်။

"ရဲတွေကလည်း လူပျိုကြီးတွေက ပိုသီးခံရမယ်။ ဘာမှလည်း ဒဏ်ရာမရတာပဲ။ စိတ်မဆိုးပါနဲ့လို့ ပြောပြီး အတင်းဖြေရှင်းခိုင်းတယ်။ သူ့အင်အားက သိပ်မရှိတဲ့အတွက် ပါးရိုက်တာလည်း ဘာမှမဖြစ်ဘူးဆိုပြီး ပြောနေသေးတယ်။ ကျွန်တော် ဘာဆက်လုပ်ရမလဲ ရှေ့နေဂူ"

ဂူချန်၏ မျက်နှာမှာ အနည်းငယ် တင်းမာသွားသည်။

"ဒီအမှုကတော့ တကယ့်ကို စိတ်ပျက်စရာပဲ။ ဥပဒေနဲ့ဆိုရင် ဒါက အရှက်ခွဲမှုသာမကဘဲ တမင်သက်သက် ရိုက်နှက်တာလည်း မြောက်တယ်။ ရဲတွေက ဒီလိုနည်းနဲ့ ဖြေရှင်းတာ တကယ်တော့ အဆင်မပြေဘူး။ ကျွန်တော်တို့ ဒီအမှုကို ပြန်ကြည့်ရအောင်..."