အခန်း ၅၆

အခန်း။ ၅၆

တရားသူကြီးချုပ် ကျောက်ကျိချောင်သည် ဤအမှုကို ဥပဒေအတိုင်း မျှတစွာ စီရင်ဆုံးဖြတ်လိမ့်မည်မှာ အသေအချာပင်။

အမှုအခြေအနေကို ကြည့်ရသမျှ ချိုင်ချန်းအတွက် အသက်ကယ်မည့်သူ မရှိတော့ပေ။

ချိုင်ချန်းသည် မိန်းကလေးကို အဓမ္မပြုကျင့်ခဲ့ပြီး ကိုယ်တိုင်လည်း ဝန်ခံထားပြီးဖြစ်ရာ မည်သူကမှ ကယ်တင်ပေးနိုင်မည် မဟုတ်ချေ။

ဂူချန်ကို ဥပဒေမဲ့မိုက်ရူးရဲဟု နာမည်ပြောင်ပေးထားသော်လည်း ဤအမှုတွင်မူ လမ်းစမရှိတော့သည်မှာ သေချာနေသည်။

သူသာ အမှန်တကယ် သက်သေအသစ် ရှာတွေ့မှသာ တစ်စုံတစ်ရာ ဖြစ်လာနိုင်မည်ပင်။

တရားသူကြီး ဝမ်ဖန်လုံက "ဒါဆိုရင်တော့ လမ်းစမရှိတော့ဘူး။ ဒီအမှုမှာ သက်သေတွေက အထင်အရှား ဖြစ်နေပြီ။ အသစ်ထပ်ရှာဖို့လည်း မလွယ်ဘူး။ ဘယ်သူပဲ အမှုလိုက်လိုက် ရလဒ်ကတော့ အတူတူပဲ။ ဂူချန်အနေနဲ့ အကောင်းဆုံးဆိုရင် ပြစ်ဒဏ်လျှော့ပေါ့ပေးဖို့လောက်ပဲ လုပ်ပေးနိုင်မှာပါ" ဟု မှတ်ချက်ပြုသည်။

တရားခံ မည်သို့သော ရာဇဝတ်မှု ကျူးလွန်သည်ဖြစ်စေ ရှေ့နေတစ်ဦးဦးက ခုခံကာကွယ်ပေးရန် ရှိတတ်စမြဲဖြစ်သည်။

သို့သော် ဝမ်ယုံချန်အမှုကဲ့သို့ အပြစ်မရှိကြောင်းခုခံနိုင်သည့် အခြေအနေမျိုးမဟုတ်ပါက ပြစ်ဒဏ်လျှော့ပေါ့ပေးရန်သာ ရှေ့နေတို့၏ အဓိကတာဝန်ဖြစ်လာသည်။

ချိုင်ချန်း၏ အမှုမှာ သက်သေခိုင်လုံသလို တရားခံကိုယ်တိုင်ကလည်း ဝန်ခံထားသည့်အတွက် အမှုမှာ အဆုံးသတ်သလောက် ရှိနေပြီဖြစ်သည်။

ထိုအချိန်မှာပင် ဤအမှုသည် အွန်လိုင်းပေါ်တွင် မီးတောက်သကဲ့သို့ ပျံ့နှံ့သွားခဲ့သည်။

ဇောင်လဲ့လဲ့၏ တင်တောင်းငွေ ၃ သိန်းတောင်းဆိုမှု၊ လက်မထပ်ခင် အိမ်နာမည်ပြောင်းပေးရန် တောင်းဆိုမှု၊ ငြင်းဆန်သည့်အခါ ၃ ရက်အကြာတွင် မုဒိမ်းမှုဖြင့် တိုင်ကြားမှု၊ ချိုင်ချန်းကို ဝန်ခံခိုင်းထားသည့် အသံဖိုင်နှင့် ဟိုတယ် CCTV မှတ်တမ်းများ ထွက်ပေါ်လာပြီးနောက်တွင်မူ အင်တာနက်ပေါ်၌ အမြင်နှစ်မျိုး ကွဲပြားသွားခဲ့သည်။

အချို့သော အင်တာနက်အသုံးပြုသူများက "ဒါက မုဒိမ်းမှု မဟုတ်ဘူး။ ဇောင်လဲ့လဲ့က အိမ်နာမည် မရလို့ တိုင်လိုက်တာ။ ဒါက ကြိုတင်စီစဉ်ထားတဲ့ ငွေညှစ်မှုပဲ ဒီလိုမိန်းကလေးကိုသာ ထောင်ချသင့်တာ"

"အသံဖိုင်က မိန်းကလေးအမေက ချိုင်ချန်းကို လှည့်စားပြီး ဖမ်းဆီးခိုင်းတာလေ။ သနားစရာ ချိုင်ချန်းက အလိမ်ခံလိုက်ရပြီ"

"ဘာလို့ ၃ ရက်လောက် စောင့်ပြီးမှ တိုင်တာလဲ ပိုက်ဆံနဲ့ အိမ်ကို လိုချင်လို့ ခြိမ်းခြောက်တာလေ။ သူ မပေးနိုင်ဘူးဆိုမှ ရဲတိုင်ပြီး ထောင်ချဖို့ ကြံတာ။ ဇောင်လဲ့လဲ့ရဲ့ အကွက်က တကယ့်ကို နက်နဲတယ်"

သို့သော်လည်း အမျိုးသမီး အင်တာနက်သုံးစွဲသူ အချို့ကမူ "ဘာဖြစ်လို့လဲ ဒါက မုဒိမ်းမှုလေ ဘာလို့ တရားခံကို ကာကွယ်ပေးနေကြတာလဲ။ ချိုင်ချန်းကိုယ်တိုင် ဝန်ခံထားတာမဟုတ်ဘူးလား။ ဗီဒီယိုမှာလည်း မိန်းကလေးက ထွက်ပြေးဖို့ ကြိုးစားနေတာကို အတင်းဆွဲခေါ်သွားတာ မဟုတ်ဘူးလား"

"ရွံစရာကောင်းလိုက်တာ ဒါက မုဒိမ်းမှုလို့ ထင်ရှားနေတာကိုတောင် အတင်းလိုက်ကာပေးနေကြတယ်။ စေ့စပ်ထားလို့ သဘောတူရမယ်လို့ ဘယ်သူက ပြောလဲ။ အတင်းအဓမ္မပြုကျင့်တာက ပြစ်မှုပဲ"

လူအများကတော့ ဤအမှုက အလွန်ပင် ရုန်းကန်ရမည့် အမှုဖြစ်ကြောင်း သိရှိနေကြသည်။

ဂူချန်က ဂူယွမ်မြို့သို့ သွားရောက်ကာ ချိုင်ချန်းကို ကူညီပေးမည်ဆိုသည့် သတင်းထွက်ပေါ်လာချိန်တွင် လူအများမှာ အံ့အားသင့်သွားကြသည်။

[ဂူချန် တကယ်ပဲ ဒီအမှုကို ယူမှာလား]

[အထောက်အထားတွေက အစုံအလင်ပဲ။ ဒါ မုဒိမ်းမှုမြောက်တာ သေချာနေပြီ]

[ဂူချန်ကို နတ်ဘုရားလို မသတ်မှတ်ကြပါနဲ့။ သူက ရှေ့နေတစ်ယောက်ပဲလေ။ မုဒိမ်းမှုဆိုတာက ဥပဒေအရ ပြစ်ဒဏ်ရှိကို ရှိမှာ။ ဘယ်ရှေ့နေမှ မပြောင်းလဲနိုင်ဘူး]

[အကောင်းဆုံးဆိုရင် ဂူချန်လည်း ပြစ်ဒဏ်လျှော့ပေါ့ပေးဖို့ပဲ လုပ်နိုင်မှာ။ ဇောင်လဲ့လဲ့ဆီက ခွင့်လွှတ်ကြောင်း စာမရရင်တော့ ချိုင်ချန်း ထောင်ကျဖို့ သေချာနေပြီ]

ဤအမှုမှာ အလွန်ပင် လူသိများထင်ရှားသော အမှုဖြစ်နေသည့်အတွက် ပရော်ဖက်ရှင်နယ် ရှေ့နေကြီးများစွာကလည်း အနီးကပ် စောင့်ကြည့်နေကြသည်။

ထို့ကြောင့် ရှေ့နေအချို့က အွန်လိုင်းတွင် သုတို့၏ အမြင်များကို ဤသို့ ရေးသားဖော်ပြလာကြသည်။

[ဒီအမှုနဲ့ပတ်သက်ပြီး ကျွန်တော့်အမြင်ကို သိချင်ကြလား။ ဂူချန် ဘယ်လောက်ပဲ ထူးချွန်ပါစေ ချိုင်ချန်းကို မုဒိမ်းမှုနဲ့ ထောင်ချမှာ အသေအချာပါပဲ။ အကောင်းဆုံးဆိုရင် ပြစ်ဒဏ်လျှော့ပေါ့ပေးဖို့လောက်ပဲ ကြိုးစားနိုင်မှာ အပြစ်မရှိကြောင်း တင်ပြဖို့ဆိုတာ မဖြစ်နိုင်ပါဘူး]

[အပြစ်မရှိကြောင်း တင်ပြဖို့ဆိုတာ လုံးဝမဖြစ်နိုင်ဘူး။ ဝမ်ယုံချန်အမှုတုန်းက တရားဝင် ခုခံကာကွယ်မှုဖြစ်လို့ အနိုင်ရခဲ့တာ။ အခုဟာက ချိုင်ချန်းက တကယ်ပဲ အဓမ္မကျင့်ခဲ့တာဖြစ်ပြီး သက်သေအထောက်အထားတွေကလည်း အခိုင်အမာ ဖြစ်နေပြီ။ မိန်းကလေးဘက်ကလည်း "သဘောမတူဘူး" လို့ ခိုင်ခိုင်မာမာ စွဲဆိုထားတဲ့အတွက် ချိုင်ချန်း ထောင်ကျဖို့ကတော့ သေချာနေပါပြီ]

[ပြစ်ဒဏ်လျှော့ပေါ့ဖို့ ကြိုးစားရတာတောင် ခက်ခဲဦးမှာပါ။ ဇောင်လဲ့လဲ့ဆီက ခွင့်လွှတ်ကြောင်း စာမရသရွေ့တော့ ချိုင်ချန်း ထောင်ဒဏ်ကျခံရမှာပဲ။ ဘယ်လောက်ကြာကြာ ထောင်ကျမလဲဆိုတဲ့ ကိစ္စပဲ ကျန်ပါတော့တယ်]

[ဒီအမှုက ကျွန်တော်တို့ကို သင်ခန်းစာတစ်ခု ပေးလိုက်တာပါ။ စေ့စပ်ထားသူပဲဖြစ်ဖြစ်၊ လက်ထပ်ထားသူပဲဖြစ်ဖြစ်၊ မိန်းကလေးတစ်ယောက်ရဲ့ သဘောဆန္ဒကို ဆန့်ကျင်ပြီး ဘာမှလုပ်လို့မရပါဘူး။ အဲ့ဒီလိုလုပ်ရင် မုဒိမ်းမှုမြောက်သွားနိုင်ပါတယ်]

[ဘယ်လိုပဲဖြစ်ဖြစ် ချိုင်ချန်းကတော့ တကယ့်ကို ကံဆိုးသူပါပဲ။ အခုချိန်မှာ ဘယ်သူမှ သူ့ကို မကူညီနိုင်တော့ဘူး။ ဥပဒေမဲ့မိုက်ရူးရဲလို့ နာမည်ကြီးတဲ့ ဂူချန်တောင်မှ ပြစ်ဒဏ်လျှော့ပေါ့ပေးဖို့လောက်ပဲ ကြိုးစားနိုင်မှာပါ]