အခန်း ၅၇

အခန်း။ ၅၇

ဤအမှုကို မည်သည့်ရှေ့နေကမျှ အနိုင်ရနိုင်မည်ဟု မယုံကြည်ကြပေ။

ဖန်းတဥပဒေကုမ္ပဏီမှ ရှေ့နေများပင်လျှင် ချွင်းချက်မရှိပေ။ ရွှယ်ချင်းချင်းနှင့် ကောင်းရုန်တို့သည်လည်း ဤအမှုကို စတင်သတိပြုမိနေကြပြီဖြစ်သည်။

ဖန်းတဥပဒေကုမ္ပဏီသည် ဂူချန်ကို နှစ်စဉ်လစာ ယွမ် ၁.၅ သန်းမှ ၂ သန်းအထိဥပဒေလောက၏ ထိပ်တန်းလစာနှုန်းထားဖြင့် ကမ်းလှမ်းခဲ့သော်လည်း ဂူချန်က ငြင်းပယ်ခဲ့သည်။

ထိုသို့ ငြင်းပယ်ခြင်းကပင် ကုမ္ပဏီ ဒါရိုက်တာ ရွှယ်ယောင်ထင်ကို ဂူချန်အပေါ် ပိုမိုစိတ်ဝင်စားလာစေခဲ့သည်။

ရွှယ်ချင်းချင်းက "အာ... ဒီအမှုကလေ... ဘာလို့ ဂူချန် လက်ခံလိုက်တာလဲ။ ဒီအမှုက ပြစ်ဒဏ်လျှော့ပေါ့ပေးဖို့လောက်ပဲ ကြိုးစားလို့ရမှာ နိုင်ဖို့ဆိုတာ လုံးဝ မဖြစ်နိုင်ဘူး" ဟု ပြောလိုက်သည်။

အမြဲတမ်း ဂူချန်ကို အားပေးလေ့ရှိသူ ရွှယ်ချင်းချင်းပင်လျှင် ဤအမှုမှာ အနိုင်ရရန် လုံးဝမဖြစ်

နိုင်ဟု ခံစားနေရသည်။

ပြစ်ဒဏ်လျှော့ပေါ့ပေးရန် ကြိုးစားခြင်းပင်လျှင် ရှုံးနိမ့်နိုင်ခြေ မြင့်မားလှသည်။

သို့သော် ဂူချန်က ဤအမှုကို တာဝန်ယူလိုက်ခြင်းမှာ သူမကို ခဏတာ တွေဝေသွားစေသည်။

ကောင်းရုန်က သက်ပြင်းချရင်း "ဂူချန် ဘာကြောင့် ဒီအမှုကို ယူသလဲဆိုတာ မသိပေမဲ့ လက်ရှိ အထောက်အထားတွေအရ ချိုင်ချန်း မုဒိမ်းကျင့်ခဲ့တဲ့ အချက်က ခိုင်လုံနေပြီ။ ဇောင်လဲ့လဲ့က သူမ မလိုလားဘူးလို့ ခိုင်ခိုင်မာမာ ဆိုထားသလို CCTV မှတ်တမ်းမှာလည်း ထင်ရှားနေတယ်။ အသံဖိုင်ပါ ရှိနေသေးတော့ ဒီအမှုကို ဘယ်လိုမှ တိုက်ခိုက်လို့ မရတော့ဘူး" ဟု မှတ်ချက်ပြုသည်။

ထိုင်ခုံအလယ်တွင် ထိုင်နေသည့် အဘိုးအိုမှာ ဖန်းတဥပဒေကုမ္ပဏီ၏ ဒါရိုက်တာ ရွှယ်ယောင်ထင်ပင်။

သူသည် လက်ဖက်ရည်ကို ဖြည်းညှင်းစွာ သောက်သုံးရင်း "ဒီအမှုမှာ လှည့်ကွက်တစ်ခုတော့ ကျန်နေသေးနိုင်တယ်။ ဂူချန်က ဒီအမှုကို တကယ်ပဲ တိုက်မယ်လို့ ဆုံးဖြတ်ထားတယ်ဆိုရင် အနိုင်ရနိုင်မယ့် အခွင့်အရေးတစ်ခုခုတော့ ရှိနေလို့ပဲ ဖြစ်ရမယ်" ဟု ပြောသည်။

ရွှယ်ချင်းချင်းက ခေါင်းခါရင်း "အဘိုးရယ် မဖြစ်နိုင်ပါဘူး။ ကျွန်မ ဥပဒေပြဋ္ဌာန်းချက်တွေကို အလွတ်ကျက်ထားတာ။ ဒီအခြေအနေမှာ အလှည့်အပြောင်းဆိုတာ မရှိနိုင်တော့ပါဘူး။ ဂူချန်တောင် မရနိုင်ဘူး... သူ အမှုယူလိုက်ရင် ရှုံးမှာသေချာတယ်။ ပြစ်ဒဏ်လျှော့ပေါ့ဖို့တောင် ခုခံဖို့ ခက်ခဲလိမ့်မယ်။ အဘိုး ဘာလို့ ဂူချန်အပေါ် ဒီလောက်ထိ ယုံကြည်မှု ရှိနေရတာလဲ"

ကောင်းရုန်ကလည်း "ကျွန်တော်ကလည်း ထိပ်တန်းရှေ့နေတစ်ယောက်ပါ။ ဒီလိုအမှုတွေကို အများကြီး မြင်ဖူးတယ်။ ဒါက တိုက်ခိုက်ဖို့ လုံးဝမဖြစ်နိုင်ဘူး။ အဆိုးဆုံးက ဒီအမှုမှာ ချိုင်ချန်းကိုယ်တိုင်က မုဒိမ်းမှုမြောက်ကြောင်း ဝန်ခံထားတာပဲလေ။ သူ့ကိုယ်တိုင် ဝန်ခံထားပြီးသားကို ဘာများ ပြောစရာ ရှိသေးလို့လဲ" ဟု ပြောလိုက်သည်။

ရွှယ်ယောင်ထင်က လက်ဖက်ရည်ကို တစ်ငုံသောက်ကာ ရယ်မောရင်း "အကယ်၍သာ ဂူချန်က ဒီအမှုကို အနိုင်ရခဲ့ရင် ချင်းချင်း... နင် ဂူချန်ဆီသွားပြီး အချိန်ပိုင်း ရှေ့နေသင်တန်းဆင်းလုပ်လိုက်။ သူ့ဆီကနေ သင်ခန်းစာတွေ သွားယူ" ဟု ပြောသည်။

ကောင်းရုန်က "ဒါရိုက်တာ... ဂူချန်က အမှုကောင်းနှစ်ခု အနိုင်ရခဲ့ပေမဲ့ သူက ကျွန်တော်တို့ဆီကိုလည်း မလာဘူး။ သူ့ရုံးကလည်း သေးသေးလေးပဲ။ သူဆီသွားပြီး ဘာတွေများ သင်ယူနိုင်မှာလဲ" ဟု အမြန်တားသည်။

ရွှယ်ချင်းချင်းက "ကျွန်မ သဘောတူတယ် ဂူချန်သာ ဒီအမှုကို တကယ်နိုင်အောင် တိုက်နိုင်မယ်ဆိုရင် ကျွန်မ အရမ်းကို အံ့အားသင့်သွားမှာပဲ ကျွန်မ မယုံဘူး။ ဂူချန် တကယ်နိုင်ပြီး ချိုင်ချန်းကို အပြစ်မရှိကြောင်း ကြေညာနိုင်ရင် လစာမယူဘဲ သူ့ဆီမှာ ရှေ့နေသင်တန်းဆင်းလုပ်ပေးမယ်" ဟု ဝင်ပြောသည်။

အမှန်စင်စစ် ရွှယ်ချင်းချင်းမှာ ဂူချန်၏ ပရိသတ်ဖြစ်သော်လည်း ဤအမှုတွင်မူ ဂူချန် လုံးဝမနိုင်ဘူးဟု သူမ ယုံကြည်နေသည်။

သူမသည် ဥပဒေပြဋ္ဌာန်းချက်များကို ကောင်းစွာ သိရှိသူ ဖြစ်သည်။

ရွှယ်ချင်းချင်းက ကောင်းရုန်ကို ကြည့်ပြီး "အစ်ကိုကောင်းရုန်... ဒီအမှုကို တစ်ချက်လောက် သုံးသပ်ပေးပါဦး။ ဂူချန်က ဘယ်လိုနည်းနဲ့ နိုင်အောင် တိုက်မှာလဲ တကယ်လို့ အစ်ကိုသာ ဂူချန်နေရာမှာဆို ဘယ်လို ခုခံမှာလဲ အဘိုးက လှည့်ကွက်ရှိတယ်လို့ ပြောတယ်။ ဂူချန်ကလည်း နိုင်မယ်လို့ ယုံကြည်နေတယ်။ ဒါပေမဲ့ ကျွန်မတော့ ဘယ်လိုတိုက်ရမှန်းကို မသိတော့ဘူး" ဟု ပြောလိုက်သည်။

ကောင်းရုန်က သက်ပြင်းချရင်း ခေါင်းခါလိုက်သည်။

"ကျွန်တော်လည်း မသိဘူး။ ဒီအမှုကို မြင်တဲ့ ဘယ်ရှေ့နေမဆို လမ်းစမရှိတော့ဘူး။ တိုက်လို့မရတော့ဘူး။ အထောက်အထားက ခိုင်လုံလွန်းနေတယ်လို့ပဲ မြင်ကြမှာပါ။ ပြစ်ဒဏ်လျှော့ပေါ့ပေးဖို့လောက်ပဲ ကြိုးစားနိုင်မှာပါ။ ဒါပေမဲ့ ဒီအမှုက ထူးခြားတယ်။ ပြစ်ဒဏ်လျှော့ပေါ့ဖို့ ခုခံတာတောင် ခက်ခဲလိမ့်မယ်။ ဇောင်လဲ့လဲ့ မိသားစုဆီက ခွင့်လွှတ်ကြောင်းစာ မရသရွေ့တော့ မလွယ်ဘူး"

ရွှယ်ချင်းချင်းက "ဇောင်လဲ့လဲ့က ခွင့်လွှတ်ကြောင်းစာ ပေးမှာမဟုတ်ဘူး။ ချိုင်ချန်းမိသားစုက ပိုက်ဆံအများကြီး ပေးမလား မပေးဘူးလားဆိုတာပဲ" ဟု ပြောလိုက်သည်။

ကောင်းရုန်က "ဂူချန်သာ ဒီအမှုကို တကယ်နိုင်သွားရင်တော့ ကျွန်တော် တကယ့်ကို အံ့အားသင့်မိမှာပဲ... ဘယ်လိုပဲဖြစ်ဖြစ် ကျွန်တော်တော့ လုပ်နိုင်မှာ မဟုတ်ဘူး" ဟု ပြောသည်။

ကောင်းရုန်ကိုယ်တိုင်ကလည်း ထိပ်တန်းရှေ့နေတစ်ဦး ဖြစ်သည့်တိုင် ဤအမှုကိုသာ သူသာကိုင်တွယ်ရမည်ဆိုပါက မည်သို့ ခုခံရမည်ကို အဖြေရှာမရ ဖြစ်နေသည်။

အဖြေမရှိ၊ လမ်းစမရှိသည့် ဤအမှုကို ဂူချန်တစ်ယောက်တည်းသာလျှင် အကောင်းဆုံး ကိုင်တွယ်ဖြေရှင်းသွားရတော့မည်ပင်။

တရားရုံးအတွင်းတွင် ဂူချန်သည် အမှုတွဲဖိုင်များကို စေ့စေ့စပ်စပ် ဖတ်ရှုလေ့လာပြီးစီးသွားပြီဖြစ်သည်။

သူသည် အမှုတွဲထဲမှ အသေးစိတ်အချက်အလက် တစ်ခုမျှမကျန်အောင် အကုန်လုံးကို စိတ်ထဲစွဲမှတ်ထားလိုက်သည်။

ထို့နောက်တွင်မူ ဂူချန်သည် ရဲစခန်းသို့ ဆက်လက်သွားရောက်ခဲ့သည်။

ရဲစခန်းသို့ ရောက်ရှိသောအခါ ရဲအရာရှိများမှာ ဂူချန်ကို အလွန်ပင် ရိုသေလေးစားစွာဖြင့် နွေးထွေးစွာ ကြိုဆိုကြသည်။

အကြောင်းမှာ ဂူချန်က သူတို့ကိုပါ မည်သည့်အချိန်တွင် ထောင်ထဲပို့လိုက်မည်ကို ကြောက်ရွံ့နေကြခြင်းကြောင့် ဖြစ်ပေလိမ့်မည်။

ဂူချန်သည် ချိုင်ချန်း၏ အမှုနှင့်ပတ်သက်သည့် အသေးစိတ်အချက်အလက်များနှင့် တရားရင်ဆိုင်ရမည့် မှတ်တမ်းများကို သေချာစွာ စစ်ဆေးကြည့်ရှုခဲ့သည်။

မှတ်တမ်းအရ ချိုင်ချန်းသည် မူလက မုဒိမ်းမှုကျူးလွန်ကြောင်း ဝန်ခံထားခြင်းမရှိခဲ့ပေ။ သို့သော် ဇောင်လဲ့လဲ့၏ မိခင်ဖြစ်သူက တင်ပြလိုက်သော အသံဖိုင်တွင် ချိုင်ချန်းကိုယ်တိုင် မုဒိမ်းမှုကျူးလွန်ကြောင်း ဝန်ခံထားသည့်အချက်၊ CCTV မှတ်တမ်းများ၏ သက်သေအထောက်အထားများကြောင့် ချိုင်ချန်းမှာ အမှုရင်ဆိုင်နေရခြင်းပင်။

ဂူချန်သည် အချက်အလက်အားလုံးကို အသေးစိတ် စစ်ဆေးပြီးနောက် ချိုင်ချန်းနှင့်လည်း သီးသန့် တွေ့ဆုံစကားပြောခဲ့သည်။

ချိုင်ချန်းမှာလည်း ဂူချန်ထံတွင် အဖြစ်အပျက် အားလုံးကို ဖုံးကွယ်ခြင်းမရှိဘဲ ရိုးသားပွင့်လင်းစွာ ပြောပြခဲ့သည်။

ဂူချန်သည် အမှု၏ အကြောင်းအရာ အားလုံးကို သိရှိနားလည်သွားပြီးနောက် ဘာမျှလွဲချော်မှုမရှိကြောင်း အတည်ပြုလိုက်သည်။

ဤအမှုကို သူ အနိုင်ရရှိနိုင်ကြောင်း ယခုအခါ ဂူချန် စိတ်ချသွားပြီဖြစ်သည်။

ချိုင်ချန်းသည် ဇောင်လဲ့လဲ့ကို မုဒိမ်းမှု ကျူးလွန်ခဲ့ခြင်းမဟုတ်ကြောင်း ဂူချန် ခိုင်ခိုင်မာမာ ယုံကြည်သွားသည်။

ဟိုတယ်၏ စောင့်ကြည့်ကင်မရာမှတ်တမ်းတွင် ဇောင်လဲ့လဲ့သည် အမျက်ဒေါသထွက်ဟန်ဖြင့် ဟန်ဆောင်၍ အခန်းထဲမှ ထွက်ခွာသွားခြင်းဖြစ်ပြီး ချိုင်ချန်းက ချော့မော့၍ ပြန်လည်သယ်ဆောင်လာခြင်းသာ ဖြစ်သည်။

ချိုင်ချန်း၏ ပြောပြချက်အရ ဟိုတယ်အခန်းထဲတွင် ဇောင်လဲ့လဲ့သည် အစပိုင်းတွင် အနည်းငယ် ငြင်းဆန်ဟန်ဆောင်သော်လည်း နောက်ပိုင်းတွင်မူ အလွန်တက်ကြွစွာ ပူးပေါင်းပါဝင်ခဲ့ကြောင်း ချိုင်ချန်း၏ စွမ်းဆောင်ရည်ကိုပင် ဝေဖန်ခဲ့သေးကြောင်း သိရသည်။

သို့သော် ဟိုတယ်အခန်းအတွင်း၌မူ ကင်မရာမရှိသည့်အတွက် သူတို့နှစ်ဦးကြား ဖြစ်ပျက်ခဲ့သည်များကို ချိုင်ချန်းတစ်ယောက်တည်းကသာ ထွက်ဆိုနိုင်တော့သည်။

ဇောင်လဲ့လဲ့ဘက်ကမူ သူမ အဓမ္မပြုကျင့်ခံရကြောင်းသာ တသမတ်တည်း စွဲဆိုထားသည့်အတွက် အမှုမှာ အလွန်ပင် ရှုပ်ထွေးလှသည်။

ဂူချန်သည် အဖြစ်အပျက် အားလုံးကို အသေးစိတ် စာရင်းပြုစုလိုက်သည်။

ဤအမှုကို တိုက်ခိုက်ရသည်မှာ အမှန်တကယ်ပင် ခက်ခဲလှသည်။

ချိုင်ချန်းမှာ တကယ့်ကို ထောင်ချောက်ဆင်ခံလိုက်ရခြင်း ဖြစ်သော်လည်း ဇောင်လဲ့လဲ့၏ တက်ကြွစွာ ပူးပေါင်းမှုကို သက်သေပြရန် လမ်းစမရှိဖြစ်နေသည်။

အကယ်၍သာ သာမန်လူတစ်ယောက်ကသာ ဤအမှုကို ရင်ဆိုင်ရမည်ဆိုပါက ချိုင်ချန်းမှာ ထောင်ကျရန် သေချာနေပြီဖြစ်သည်။

သို့သော် ဂူချန် ကိုင်တွယ်နေသည့် အမှုဖြစ်သည့်အတွက် အခြေအနေမှာ ကွဲပြားသွားပြီဖြစ်သည်။

တိုက်ခိုက်ရသည်မှာ ခက်ခဲသော်လည်း အနိုင်ရရှိရန် မဖြစ်နိုင်သည်တော့ မဟုတ်ပေ။

ထိုမျှသာမကဘဲ တရားလိုဖြစ်သူ ဇောင်လဲ့လဲ့ကိုပါ ထောင်ထဲပို့ပေးရန် ဂူချန်တွင် အစီအစဉ် ရှိနေပြီးသား ဖြစ်သည်။