အခန်း ၁၉၃၀

အခန်း(၁၉၃၀) ပင်လယ်မင်းသားသေဆုံးမှုအတွက် လီချန်းယွမ် အပြစ်တင်ခံရခြင်း

ဤသည်မှာ တစ်ခါမျှ မဖြစ်ဖူးသေးသော အရာပင်ဖြစ်ပေ၏။

လီချန်းယွမ်က သူ၏ ပါရမီကို စတင်ပြသနိုင်ချိန်မှစ၍ လီမျိုးနွယ်စု၏ အစဥ်အမြဲ စောင့်ရှောက်မှုများကို ရခဲ့သည်။ မျိုးနွယ်စုတစ်ခုလုံးက သူ့ကို မျိုးနွယ်စု ပြန်လည်ရှင်သန် နိုးထလာစေမည့် အခွင့်အရေးတစ်ခုအဖြစ် မှတ်ယူထားကြသည်။

သူသည် လီမျိုးနွယ်စု၏ တင်းကျပ်သော ကာကွယ်စောင့်ရှောက်မှုအောက်တွင် အမြဲရှိနေခဲ့သည်။ ခါးသီးသော တိုက်ပွဲများနှင့် ပြင်းထန်သော တိုက်ပွဲများကို ကြုံတွေ့ခဲ့ဖူးသော်လည်း၊ သူ့ကို သေစေနိုင်သည့် တကယ့်စစ်မှန်သော တိုက်ပွဲမျိုးကိုမူ သူ တစ်ခါမျှ မကြုံဖူးခဲ့ပေ။ ယခင်က သူ့ကို ထိပ်တန်းပညာရှင်များ တိုက်ခိုက်ခဲ့ဖူးသော်လည်း လီမျိုးနွယ်စု၏ အစောင့်အရှောက်များကြောင့် သူ အမြဲတမ်း လွတ်မြောက်ခဲ့ရသည်။

လီချန်းယွမ် ကိုင်တွယ်ဖြေရှင်း၍မရသော အရာဟူ၍ မရှိသလောက်ပင်ဖြစ်ကာ သူ၏ ပြိုင်ဘက်အများစုမှာ သက်တူရွယ်တူများသာ ဖြစ်ကြသည်။ သူ၏ ပါရမီနှင့် ခွန်အားအရ သက်တူရွယ်တူများသည် သူ၏ပြိုင်ဘက် မဟုတ်ကြပေ။

သက်တူရွယ်တူ မဟုတ်သူများပင်လျှင် သူ့ကို အနိုင်ယူရန်မှာ ခက်ခဲလှသည်။ ဤအချက်ကြောင့်ပင် သူသည် အထွတ်အထိပ်သို့ ရောက်ရှိသွားပါက သူသည် ပြိုင်ဘက်ကင်း ဖြစ်လာလိမ့်မည်ဟု အခိုင်အမာ ယုံကြည်နေခြင်း ဖြစ်သည်။

ပင်လယ်မင်းသားနှင့် တွေ့ဆုံလျှင်ပင် ထိုအတိုင်းပင် ဖြစ်လိမ့်မည်။ အင်အားကြီးသော မိသားစုကြီးများမှ တပည့်များသည် ဤကဲ့သို့ပင် ဖြစ်ကြသည်။ ၎င်းတို့က ဖန်လုံအိမ်ထဲမှ ပန်းကလေးများကဲ့သို့ ပျိုးထောင်ခံရခြင်း မဟုတ်ပေ။ သူတို့သည် ပြင်းထန်သော တိုက်ပွဲမျိုးစုံနှင့် အတွေ့အကြုံမျိုးစုံကို ရင်ဆိုင်ကြရမည် ဖြစ်သည်။ နောက်ဆုံးအခိုက်အတန့်သို့ မရောက်မချင်း အစောင့်အရှောက်များမှာ ပေါ်ထွက်လာမည် မဟုတ်ပေ။

ဤမိသားစုကြီးများနှင့် ဂိုဏ်းအဖွဲ့အစည်းကြီးများသည် သူတို့၏ တပည့်များကို ပျိုးထောင်ရန် ကိုယ်ပိုင်နည်းလမ်းများ ရှိကြသည်။

လီချန်းယွမ်က အခြားသူများထက် နိမ့်ကျသူမဟုတ်သော်လည်း ချူးယွင်ဖန်းနှင့် နှိုင်းယှဉ်လျှင်မူ ကွဲပြားသည်။ ချူးယွင်ဖန်းအတွက်မူ မှီခိုအားထားရမည့် အင်အားဟူ၍ မရှိဘဲ သူ၏အသက်မှာ အမြဲတမ်း အန္တရာယ်နှင့် ရင်ဆိုင်နေရခြင်း ဖြစ်သည်။ သူသည် ရေတွက်၍မရနိုင်သော သေရေးရှင်ရေး တိုက်ပွဲများကို ဖြတ်သန်းခဲ့ရသည်။

နှစ်ဖက်စလုံး၏ စိတ်ဓာတ်မှာ တစ်ဆင့်တည်း မဟုတ်ပေ။ ချူးယွင်ဖန်းအတွက်မူ သူသည် သေလုနီးပါး အခြေအနေသို့ ရောက်နေလျှင်ပင် တည်ငြိမ်မှုကို ပျက်ပြားစေမည် မဟုတ်ပေ။ သေခြင်းနှင့် ရှင်ခြင်းကြားမှ ပြင်းထန်သော လေ့ကျင့်မှုများသည် သူ့အတွက် အလွန်အရေးကြီးလှသည်။ သူကြုံတွေ့ခဲ့ရသော သေရေးရှင်ရေး တိုက်ပွဲများသည် သူ၏ ယခုလက်ရှိ အဆင့်အတန်းသို့ ရောက်ရှိလာစေရန် အဓိက သော့ချက်ပင် ဖြစ်သည်။

သေရေးရှင်ရေး တိုက်ပွဲတိုင်းသည် မိမိ၏ အကန့်အသတ်များကို ကျော်လွှားခြင်း ဖြစ်သောကြောင့် ချူးယွင်ဖန်း၏ အကန့်အသတ်မှာ သာမန်လူများထက် များစွာ သာလွန်နေခြင်း ဖြစ်သည်။

ဤအခိုက်အတန့်တွင် ပြင်ပကမ္ဘာမှာမူ ရုန်းရင်းဆန်ခတ် ဖြစ်နေသည်။ ဆန်းကြယ်နန်းဆောင်၏ အပြင်ဘက်တွင် ချိတ်ဆွဲထားသော ပါရမီရှင်စာရင်းတွင် မူလက အဆင့် (၄) နေရာ၌ ရှိနေသော ပင်လယ်မင်းသား၏ အမည်မှာ ရုတ်တရက် ပျောက်ကွယ်သွားခဲ့သည်။ လူအများက ဤမြင်ကွင်းကို မြင်လိုက်ရသောအခါ အံ့အားသင့်ကာ အသက်ရှူပင် မှားသွားခဲ့ကြသည်။ အဘယ်ကြောင့်ဆိုသော် အဆင့်စာရင်းမှ အမည်များ ရုတ်တရက် ပျောက်ကွယ်သွားခြင်း၏ အဓိပ္ပာယ်ကို သူတို့ ကောင်းကောင်း သိထားကြသောကြောင့် ဖြစ်သည်။

အကြောင်းရင်း နှစ်ခုသာ ရှိနိုင်သည်။ တစ်ခုမှာ ပါရမီရှင်စာရင်းတွင် ပါဝင်ခွင့်ရှိသော အကြောင်းပြချက် မရှိတော့ခြင်း (သို့မဟုတ်) အဆင့်စာရင်းမှ အောက်သို့ တွန်းပို့ခံလိုက်ရခြင်း ဖြစ်ပြီး၊ အခြားတစ်ခုမှာ အသက်ကန့်သတ်ချက်သို့ ရောက်ရှိသွားခြင်း ဖြစ်သည်။ ပါရမီရှင်စာရင်းသည် မျိုးဆက်သစ်လူငယ်များထဲမှ ထိပ်တန်းပညာရှင်များကိုသာ မှတ်တမ်းတင်ထားခြင်း ဖြစ်သည်။ အသက်အရွယ် ကျော်လွန်သွားသူများ သို့မဟုတ် ခွန်အား မလုံလောက်သူများကို ဖယ်ရှားပစ်မည် ဖြစ်သည်။

သို့သော် ပင်လယ်မင်းသားမှာမူ ထိုအချက်များနှင့် မကိုက်ညီပေ။ ဖြစ်နိုင်ခြေ တစ်ခုသာ ရှိသည်၊ ၎င်းမှာ ပင်လယ်မင်းသား သေဆုံးသွားခြင်းပင် ဖြစ်သည်။ ဤသည်မှာ တစ်ခုတည်းသော ဖြစ်နိုင်ခြေ ဖြစ်သည်။

"ပင်လယ်မင်းသားက ဘယ်လိုလုပ် သေသွားတာလဲ"

လူအများက အံ့သြလျက် မယုံနိုင်ဖြစ်နေကြသည်။ ပင်လယ်မင်းသား၏ ခွန်အားမှာ ပြိုင်ဘက်ကင်းသည်တော့ မဟုတ်ပေ။ ကမ္ဘာပေါ်တွင် လူမျိုးစုအားလုံးမှ ရေတွက်၍မရသော ပညာရှင်များစွာ ရှိနေပြီး ပင်လယ်မင်းသားကို သတ်နိုင်သူများလည်း အမြောက်အမြား ရှိသည်။ သို့သော် သတ်နိုင်သော စွမ်းရည်ရှိခြင်းနှင့် တကယ်သတ်ခြင်းမှာ လုံးဝ မတူညီသော ကိစ္စဖြစ်သည်။ ပင်လယ်မင်းသား၏ ဘေးနားတွင် အစောင့်အရှောက် အမြောက်အမြား ရှိနေမည်ဖြစ်ကြောင်း လူတိုင်း သိထားကြသည်။

ထိုမျှများပြားသော အစောင့်အရှောက်များ၏ ကာကွယ်မှုအောက်တွင် သူ့ကို သတ်ရန်မှာ ကောင်းကင်ပေါ်သို့ တက်ရသကဲ့သို့ ခက်ခဲလှသည်။ ထိုကဲ့သို့သော အခြေအနေမျိုးတွင် ပင်လယ်မင်းသား မည်သို့ သေဆုံးသွားသနည်း။

ချက်ချင်းပင် လူတိုင်း ကြောင်အသွားကြသည်။ ပင်လယ်မင်းသား သေဆုံးသည့် သတင်းမှာ တစ်ကမ္ဘာလုံးသို့ အံ့ဩစရာကောင်းသော အရှိန်အဝါဖြင့် ပြန့်နှံ့သွားသည်။ ဤသတင်းမှာ အလွန် မြန်ဆန်လှသည်။ ပါရမီရှင်စာရင်းကို သိပ်ဂရုမစိုက်သူများပင်လျှင် ဤသတင်းကို ချက်ချင်း ရရှိလိုက်ကြသည်။

အထူးသဖြင့် ပါရမီရှင်စာရင်းသည် ကမ္ဘာတစ်ဝှမ်းလုံးမှ ပညာရှင်များအားလုံးကို စုစည်းထားခြင်း ဖြစ်သည်။ အဆင့်သတ်မှတ်ချက် ပြောင်းလဲမှုများကို ကမ္ဘာပေါ်ရှိ လူမျိုးစုအားလုံး၏ နယ်မြေများတွင် တစ်ပြိုင်တည်း သိရှိနိုင်သည်။ အဆင့်စာရင်း ပြောင်းလဲမှုတိုင်းသည် လူအများ၏ အာရုံစိုက်မှုကို ခံရမြဲ ဖြစ်သည်။

ချူးယွင်ဖန်း ပျောက်ကွယ်သွားစဉ်ကကဲ့သို့ပင် လူအများမှာ အံ့အားသင့်ခဲ့ကြသည်။ သို့သော် ချူးယွင်ဖန်းက ပင်လယ်မင်းသားနှင့် မတူပေ။ ချူးယွင်ဖန်းသည် အဆင့် (၁၀၀) ဝန်းကျင်တွင်သာ ရှိခဲ့သူ ဖြစ်သည်။ သူသည် သက်တူရွယ်တူများထဲတွင် ထူးချွန်သူဟု သတ်မှတ်နိုင်သော်လည်း၊ လူမျိုးစုအသီးသီးမှ ထိပ်တန်း ပါရမီရှင်များနှင့် နှိုင်းယှဉ်လျှင်မူ ကွာဟချက် ကြီးမားလှသေးသည်။

ပင်လယ်မင်းသား သေဆုံးမှုမှာမူ အရှေ့ပင်လယ်တစ်ခုလုံးကို တုန်လှုပ်သွားစေသည်။

"ပင်လယ်မင်းသား ဘယ်လိုလုပ် သေသွားတာလဲ”

"ပင်လယ်မင်းသားရဲ့ အစောင့်အရှောက်တွေကရော ဘယ်မှာလဲ သူတို့အားလုံး သေကုန်ကြပြီလား"

"အဲ့တာ လီချန်းယွမ်များလား”

အရှေ့ပင်လယ်မှ လူအများမှာ လီချန်းယွမ်ကို ချက်ချင်း ပြေးမြင်လိုက်ကြသည်။ အခြားနေရာမှ လူများမှာ ရှင်းရှင်းလင်းလင်း မသိကြသော်လည်း၊ သူတို့ကမူ ဖြစ်ပျက်ခဲ့သမျှကို ကောင်းကောင်း သိထားကြသည်။ လီချန်းယွမ်က အရှေ့ပင်လယ်မှ ပညာရှင်တစ်ဦး၏ အမွေအနှစ်ကို ရယူလိုနေပြီး၊ ပင်လယ်မင်းသားက သူတို့ကို တိုက်ခိုက်လိုနေခြင်း ဖြစ်သည်။ အကယ်၍ ပင်လယ်မင်းသား အမှန်တကယ် သေဆုံးသွားခဲ့လျှင်၊ ၎င်းကို လုပ်ဆောင်နိုင်စွမ်းရှိသူမှာ လီချန်းယွမ် တစ်ဦးတည်းသာ ရှိသည်။

ပင်လယ်မင်းသား၏ အစောင့်အရှောက် အားလုံးကို သတ်နိုင်ရန်မှာ ဤအရေးကြီးသော အချိန်တွင် လီမျိုးနွယ်စု တစ်ခုတည်းသာ လုပ်ဆောင်နိုင်သည်။ သူတို့တွင်လည်း ဤသို့လုပ်ရန် အကြောင်းပြချက် ရှိသည်။ သို့မဟုတ်ပါက အခြားသူ မည်သူမျှ ထိုကဲ့သို့သော အကြောင်းပြချက် သို့မဟုတ် စွမ်းရည်မျိုး မရှိပေ။

သက်သေအားလုံးမှာ လီမျိုးနွယ်စုထံသို့သာ ဦးတည်နေသည်။

"မုန်တိုင်းတစ်ခု လာတော့မယ်" တစ်ဦးက အော်ဟစ်လိုက်သည်။

လူတိုင်း တိတ်ဆိတ်သွားကြသည်။ လူတိုင်း၏ အမြင်မှာ တူညီနေကြသည်။ ပင်လယ်မင်းသားမှာ ပင်လယ်မျိုးနွယ်စုများ၏ မျှော်လင့်ချက် ဖြစ်သည်။ သူတို့ကြားတွင် ပညာရှင်များနှင့် ပါရမီရှင်များစွာ ရှိနေသော်လည်း၊ ပင်လယ်မင်းသား သေဆုံးမှုမှာမူ ကြီးမားသော တုန်လှုပ်မှုကို ဖြစ်ပေါ်စေသည်။

အကယ်၍ ပင်လယ်မင်းသားသာ စစ်မြေပြင်တွင် သေဆုံးခဲ့ပါက လူတိုင်း ပြောစရာ ရှိမည်မဟုတ်ပေ။ ပင်လယ်မျိုးနွယ်စုများသည် ဤအချက်ကြောင့် တရှကို လက်စားချေမည် မဟုတ်ပေ။ နှစ်စဉ်နှစ်တိုင်း နှစ်ဖက်စလုံးမှ ပါရမီရှင် အမြောက်အမြား သေဆုံးနေကြခြင်း ဖြစ်သည်။

သို့သော် လီမျိုးနွယ်စု၏ လက်ထဲတွင် သေဆုံးရခြင်းမှာမူ တစ်မျိုးဖြစ်၏။

အရှေ့ပင်လယ်သို့ ခြေလှမ်းစတင်လှမ်းနေသော လီမျိုးနွယ်စုအတွက်မူ အရှေ့ပင်လယ်တွင် အခြေချရန်မှာ ယခင်ထက် ဆယ်ဆခန့် ပိုမိုခက်ခဲသွားပေလိမ့်မည်။

"လီမျိုးနွယ်စုကို သွေးနဲ့ ပြန်ပေးဆပ်ခိုင်းရမယ်”

"သူတို့အားလုံးကို သတ်ပစ်ကြ”

"လီမျိုးနွယ်စုကို မျိုးဖြုတ်ပစ်ကြ"

ပင်လယ်မျိုးနွယ်စုများအားလုံး ဒေါသတကြီး ဟိန်းဟောက်နေကြသည်။ သူတို့ ဤသတင်းကို ရရှိချိန်တွင် လီချန်းယွမ်က ပင်လယ်မင်းသားကို သတ်လိုက်သည်ဟုသာ အားလုံးက ထင်မှတ်ထားကြသည်။ သူမှအပ အခြားသူ မည်သူမျှ ထိုသို့လုပ်ရန် အကြောင်းပြချက် သို့မဟုတ် စွမ်းရည် မရှိပေ။ ပင်လယ်မင်းသားသည် လူခေါ်၍ လီချန်းယွမ်ကို တိုက်ခိုက်ရန် သွားခဲ့ခြင်းမှာလည်း ခိုင်လုံသော ယူဆချက်တစ်ခု ဖြစ်သည်။

ပင်လယ်မျိုးနွယ်စုမှ အကြီးအကဲများသည် သူတို့၏ တံခါးပိတ်ကျင့်ကြံမှုများမှ ထလာကြကာ လီမျိုးနွယ်စုကို အမြစ်ပြတ်ချေမှုန်းရန် ကြွေးကြော်နေကြသည်။ ကံကောင်းသည်မှာ သူတို့သည် အခြေခံ ကျိုးကြောင်းဆင်ခြင်မှု ရှိနေသေးသဖြင့် လူသားမျိုးနွယ်စု တစ်ခုလုံးကို ရန်မမူခဲ့ကြခြင်း ဖြစ်သည်။

အရှေ့ပင်လယ်တွင် ပင်လယ်မျိုးနွယ်စုများသည် အလွန်အင်အားကြီးသော်လည်း၊ လူသားများမှာလည်း အားနည်းသူများ မဟုတ်ကြပေ။ အခြေအနေ တကယ်ဆိုးရွားလာပါက ၎င်းတို့က တရှအင်ပါယာကို အားကိုးနိုင်ကြသေးသဖြင့် ကြောက်ရွံ့နေစရာမရှိပေ။

--