အခန်း ၁၉၃၅

အခန်း (၁၉၃၅) နှစ်ဖက်လုံးအထိနာပြီးစစ်ပွဲကြီးပြီးသွားလေပြီ

တောင်မြစ်ပန်းချီကားထဲသို့ ဝင်လာပြီးနောက် ချူးယွင်ဖန်းသည် ထူးဆန်းသောရနံ့တစ်မျိုးကို အနံ့ခံမိသည်။ ချက်ချင်းပင် စိတ်ကြည်သွားကာ ယခင်ကထက် နှစ်ဆမြန်မြန် တွေးနိုင်သည်ဟု ထင်မိ၏။ ဦးနှောက်၏လုပ်ဆောင်နိုင်စွမ်းက နှစ်ဆဖြစ်လာသည်။

ထိုအရာမှာ သူမီးရှို့လိုက်သော ဦးချိုဝေလငါးအဆီပင် ဖြစ်သည်။ ဦးချိုဝေလငါးအဆီမှ ထွက်လာသော မွှေးရနံ့သည် သူ့ကို ပေါ့ပါးဖျတ်လတ်စေသည်ဟု ခံစားရစေကာ ဦးနှောက်၏အလုပ်လုပ်နှုန်းကလည်း တိုးတက်လာခဲ့သည်။ ဆိုလိုသည်မှာ အစကထက် ကျင့်ကြံနိုင်စွမ်းက နှစ်ဆဖြစ်လာခြင်းဖြစ်သည်။ ထိုအမြန်နှုန်းက အံ့ဩစရာကောင်းလှ၏။

အစက ချူးယွင်ဖန်း၏ ကျင့်ကြံနိုင်စွမ်းသည် သာမန်လူများ စိတ်ကူးမကြည့်နိုင်သည့်အတိုင်းအတာတွင် ရှိနေပြီဖြစ်သည်။ သူသည် ဒုံးပျံကဲ့သို့ မြန်မြန်ဆန်ဆန်ပင် ပစ်လွှတ်သကဲ့သို့ကြီးထွားလာသော်လည်း ဦးချိုဝေလငါးဆီ၏တိုးတက်မှုနှင့်အတူ ကျင့်ကြံနိုင်စွမ်းကပါ နှစ်ဆမြင့်တက်လာသည်။ ထိုအရှိန်က သာမန်လူများ စိတ်ကူးကြည့်နိုင်သည်ထက် ပို၏။

ယခုတွင်မူ ရှေးခတ်ေက ဘုရင်များစွာသည် အသက်တစ်ရာအခြေအနေမျိုးဖြင့် ဉာဏ်အလင်းပွင့်သောအခြေအနေသို့ရောက်အောင် လုပ်နိုင်ခဲ့သည်ကို နားလည်သွားတော့သည်။ သူတို့‌၏မွေးရာပါ ပါရမီက သာမန်လူများထက် သာသည်။ ထို့အပြင် ပစ္စည်းကောင်းများကလည်း တောင်ပုံရာပုံရှိနေသည်။ ရှေးခေတ်အချိန်က လေ့ကျင့်မှုက ယခုထက် အဆပေါင်းများစွာ ပြင်းထန်သည်။ ထိုအရာများအားလုံး ပေါင်းလိုက်သောအခါတွင် အားလုံးကို အမြန်ဆုံးဖြစ်သွားစေသည်။

ချူးယွင်ဖန်းသည် တင်ပျဉ်ခွေထိုင်လိုက်ပြီး သူ၏ရှေ့၌ ဓားသန္ဓေသားလောင်း ပေါ်လာသည်။ ထိုဓားသည် တစ်ဝက်ခန့် ပုံစံပေါ်နေပြီး လူတစ်ယောက်အရွယ်ရှိနေပြီဖြစ်သည်။ မည်းမှောင်နေကာ ဓားတစ်ချောင်းနှင့်မတူပဲ ပေတံနှင့်တူပြီး ကြီးမားလှသည့်အနက်ရောင်ပေတံကြီး ဖြစ်၏။သို့သော်လည်း ထိုဓားမှ အံ့ဩစရာကောင်းသော ဓားအငွေ့အသက်များ ထုတ်လွှတ်နေသည်။ ဓားအငွေ့အသက်ကို ဓားခန္ဓာကိုယ်ထဲ၌ ချိန်ပိတ်ထားသဖြင့် ချိုးဖောက်ထွက်မလာနိုင်ပေ။ သို့သော်လည်း ချူးယွင်ဖန်းက ကောင်းကင်ကိုပင် ခွဲပစ်နိုင်သည့် ထူးခြားလှသည့် ဓားအငွေ့အသက်ကို ခံစားမိသည်။

"ပင်လယ်အရှင်သခင်ရဲ့ ဓားသိုင်းက အရှေ့ဘက်ပင်လယ်တစ်ခွင်မှာ ပြိုင်ဘက်ကင်းခဲ့တယ်ဆိုတဲ့ ကောလာဟလတွေက အခုတော့ အမှန်ပဲဆိုတာ သက်သေပြလိုက်ပြီ။ ဒီဓားရဲ့ အငွေ့အသက်လေး တစ်စွန်းတစ်စကတင် တော်တော်လေး တုန်လှုပ်စရာကောင်းနေပြီပဲ။ ဒါက ဖန်ဆင်းရှင်တစ်ယောက်ကိုတောင် ပြင်းပြင်းထန်ထန် ဒဏ်ရာရစေနိုင်တယ်"

ချူးယွင်ဖန်း၏ မျက်နှာအမူအရာမှာ အလွန်ပင် တည်ကြည်လေးနက်နေသည်။ သူသည် သူ၏ နတ်ဘုရားအသိစိတ်ကို ထိုဓားနက်ကြီးအတွင်းသို့ ပို့လွှတ်ကြည့်လိုက်သော်လည်း ခဏအကြာတွင် မျက်နှာပျက်လျက် ပြန်လည်ရုပ်သိမ်းလိုက်ရသည်။ ဓားအတွင်းသို့ ထိုးဖောက်ဝင်ရောက်ခဲ့သော သူ၏အသိစိတ်မှာ ဓားအတွင်း ကိန်းအောင်းနေသော ဓားအငွေ့အသက်များ၏ ချေမှုန်းခြင်းကို လုံးဝခံလိုက်ရသောကြောင့် ဖြစ်သည်။

"တကယ်ကို ရက်စက်တဲ့ ဓားပဲ"

ချူးယွင်ဖန်းသည် လေထုထဲတွင် ပျံ့နှံ့နေသော အဆုံးမရှိသည့် ကြမ်းတမ်းခက်ထန်သော အရှိန်အဝါကို ခံစားနေရသည်။ ဤရတနာဓားကို ကြောက်မက်ဖွယ်ကောင်းသော သတ်ဖြတ်ခြင်းဓားဟုပင် ခေါ်ဆိုနိုင်ပေသည်။

ထို့အပြင် ၎င်းမှာ ချူးယွင်ဖန်း ထင်ထားသကဲ့သို့ မပြည့်စုံသော ဓားတစ်စင်း မဟုတ်ပေ။ ဆန့်ကျင်ဘက်အနေဖြင့် ဤဓားမှာ အလုံးစုံ ပြီးပြည့်စုံနေပြီးသား ဖြစ်သည်။ ဤဓားမှာ လေးလံလှသော်လည်း ထက်မြက်သော အသွားမရှိပေ။ ချူးယွင်ဖန်းသည် ဤဓား၏ အမည်ကိုလည်း သိရှိလိုက်၏။

ပင်လယ်မှောက်လှန်ဓား....

ပင်လယ်အရှင်သခင်သည် သူ၏အမည်ကို အစွဲပြု၍ ဤဓားကို အမည်ပေးခဲ့ခြင်းဖြစ်ပြီး၊ တစ်ချိန်က ဤဓားဖြင့် အစွမ်းထက်လှသော ရန်သူပေါင်းများစွာကို အပြတ်အသတ် ချေမှုန်းခဲ့ဖူးသည်။ယခုအခါ ၎င်းမှာ ချူးယွင်ဖန်း၏ လက်ထဲသို့ ရောက်ရှိလာခဲ့ပြီ ဖြစ်သော်လည်း သူသည် ပင်လယ်မှောက်လှန်ဓား ကို အပြည့်အဝ မထိန်းချုပ်နိုင်သေးပေ။ ဤဓားအတွင်း၌ စည်းတံဆိပ်အလွှာပေါင်း သုံးလွှာ ရှိနေသည်။ တစ်လွှာချင်းစီကို ဖွင့်နိုင်လေလေ၊ ဓား၏ စွမ်းပကားမှာ အဆမတန် မြင့်မားလာလေလေ ဖြစ်ပေလိမ့်မည်။

လက်ရှိတွင် ချူးယွင်ဖန်းမှာ ဤဓားကို အသုံးပြုနိုင်ရုံမျှ အနည်းဆုံး လိုအပ်ချက်အဆင့်သို့သာ ရောက်ရှိသေးသည်။ ဤသို့တွေးတောရင်း သူသည် နောက်ထပ် မဆိုင်းမတွတော့ဘဲ ဧကရာဇ်ကျင့်စဉ်ထဲမှ သန့်စင်ခြင်းအတတ်ပညာကို အသုံးပြု၍ ပင်လယ်မှောက်လှန်ဓားကို စတင်သန့်စင် ကျင့်ကြံတော့သည်။ ဤဓားကိုသာ ပိုင်ပိုင်နိုင်နိုင် အသုံးပြုနိုင်မည်ဆိုပါက သူ၏ တိုက်ခိုက်ရေးစွမ်းရည်မှာ အမှန်တကယ်ပင် များစွာ တိုးတက်လာပေလိမ့်မည်။

သုံးရက်တာအချိန်မှာ မျက်စိတစ်မှိတ်အတွင်း ကုန်ဆုံးသွားခဲ့သည်။ ချူးယွင်ဖန်းက ပင်လယ်မှောက်လှန်ဓားကို အစွမ်းကုန် လေ့ကျင့်နေချိန်တွင် အိမ်ရှေ့မင်းသား၏ စစ်တပ်နှင့် ပင်လယ်မင်းသား၏ စစ်တပ်တို့အကြား တိုက်ပွဲမှာလည်း နောက်ဆုံးတွင် အဆုံးသတ်သွားခဲ့သည်။

သုံးရက်တိုင်တိုင် သွေးချောင်းစီး တိုက်ခိုက်ခဲ့ကြပြီးနောက် နှစ်ဖက်စလုံးမှာ အကျအဆုံး များပြားလှသည်။ သူတို့၏ ဆုံးရှုံးမှုမှာ ငါးဆယ်ရာခိုင်နှုန်းထက်ပင် ကျော်လွန်နေပြီ ဖြစ်သည်။ စစ်မြေပြင်တွင် ဤမျှအထိ ဆုံးရှုံးရခြင်းမှာ အလွန်အမင်း ပြင်းထန်သော အကျအဆုံးဟု ဆိုနိုင်သည်။ ဤမျှအထိ ပြိုကွဲမသွားဘဲ ဆက်လက် တောင့်ခံနိုင်ကြသည်ကို ကြည့်ခြင်းအားဖြင့် နှစ်ဖက်စလုံး၏ စစ်သည်တော်များမှာ မည်မျှအထိ ထူးချွန်သော လက်ရွေးစင်များ ဖြစ်ကြသည်ကို သိသာလှပေသည်။

နှစ်ဖက်စလုံးသည် အသက်ရှူအောင့်ကာ အငြိုးအတေးဖြင့် လက်စားချေလိုစိတ်များ ပြင်းထန်နေကြပြီး၊ ကြောက်မက်ဖွယ်ကောင်းသော သတ်ဖြတ်ရေးလက်နက်အမျိုးမျိုးကို တစ်ဦးပေါ်တစ်ဦး ပစ်ခတ်တိုက်ခိုက်ခဲ့ကြသည်။ သို့သော် နှစ်ဖက်စလုံး၏ အင်အားမှာ ထိပ်တိုက်ရင်ဆိုင်နိုင်လောက်အောင် တူညီနေပြီး မည်သူကမျှ အသာစီးမရခဲ့ကြပေ။ ပင်လယ်မင်းသား၏ စစ်တပ်မှာ နယ်မြေကျွမ်းကျင်မှု အားသာချက်ရှိသော်လည်း အခြားသော ပင်လယ်စုမျိုးနွယ်စုများမှာမူ ဤတိုက်ပွဲတွင် ဝင်ရောက်စွက်ဖက်ရန် ရည်ရွယ်ချက်မရှိဘဲ ဘေးမှသာ ကြည့်နေခဲ့ကြသည်။

နှစ်ဖက်စလုံး အထိနာနေသည်ကို ဘေးမှကြည့်နေသူ အမြောက်အမြားရှိနေပြီး ပင်လယ်နေမျိုးနွယ်စုအတွင်းရှိ လူအများစုမှာလည်း ထိုသို့ပင် စောင့်ကြည့်လိုသော ဆန္ဒရှိနေကြသည်။ ဤသုံးရက်အတွင်း နှစ်ဖက်စလုံးသည် စစ်မြေပြင်သို့ စစ်သည်များနှင့် ပညာရှင်များကို အဆက်မပြတ် ဖြည့်တင်းခဲ့ကြသည်။ ပင်လယ်ပြင်တစ်ခုလုံးမှာ သွေးများဖြင့် နီရဲနေခဲ့ရာ ပင်လယ်ရေနှင့်ပင် မတူတော့ဘဲ သွေးကန်ကြီးတစ်ခုကဲ့သို့ ဖြစ်နေတော့သည်။

နှစ်ဖက်စလုံးမှ ပညာရှင်များ မည်မျှအထိ သေဆုံးခဲ့ရသည်ကို မခန့်မှန်းနိုင်ပေ။ လူသားများနှင့် ပင်လယ်နေမျိုးနွယ်စုများသာမက များသောအားဖြင့် ဉာဏ်ရည်မမြင့်သော်လည်း ကြီးမားသောခန္ဓာကိုယ်နှင့် အလွန်အစွမ်းထက်သည့် ပင်လယ်နက်သားရဲကြီးများလည်း ပါဝင်သည်။ နေရာအနှံ့ သွေးများ စီးဆင်းနေခဲ့ပြီး မရေမတွက်နိုင်သော အကျအဆုံးများကြောင့် ပင်လယ်နေမျိုးနွယ်စု၏ ထိန်းချုပ်မှုအောက်တွင်မရှိသော သာမန်ပင်လယ်နက်သားရဲကြီးများပင် ထိတ်လန့်တုန်လှုပ်ကုန်ကြသည်။

ပုံမှန်အားဖြင့် အရှေ့ဘက်ပင်လယ်တွင် သတ်ဖြတ်မှုများရှိပါက ထိုပင်လယ်သားရဲများ ရောက်ရှိလာတတ်သော်လည်း ယခုမူ စစ်မြေပြင်အနီးသို့ ချဉ်းကပ်မိသော ပင်လယ်တွင်းရှိ လူသတ်သမားသားရဲကြီးများပင် ထက်ဝက်ခန့် သေလုမတတ် ကြောက်ရွံ့သွားကြသည်။ နှစ်ဖက်စလုံးမှ ထွက်ပေါ်လာသော ပြင်းထန်လှသည့် သတ်ဖြတ်လိုသော အရှိန်အဝါမှာ သာမန်ပင်လယ်နက်သားရဲများ တောင့်ခံနိုင်သည့် အရာမဟုတ်ပေ။

တိုက်ပွဲမှာ သုံးရက်တိုင်တိုင် ကြာမြင့်ခဲ့ပြီးနောက်တွင် လီမျိုးနွယ်စုနှင့် အိမ်ရှေ့မင်းသား၏ အုပ်စုတို့မှာ စစ်မြေပြင်မှ စတင်ဆုတ်ခွာခဲ့ကြသည်။ သူတို့မှာ အပြင်းအထန် ဒဏ်ရာရရှိခဲ့ပြီး အင်အားချည့်နဲ့နေပြီ ဖြစ်သော်လည်း လီမျိုးနွယ်စု၏ လက်ရွေးစင်တပ်များမှာ စနစ်တကျပင် ဆုတ်ခွာသွားခဲ့သည်။ သို့သော် သူတို့သည် အလွန်လျင်မြန်စွာ ဆုတ်ခွာသွားခဲ့သဖြင့် ပင်လယ်ထဲတွင် ကျန်ရစ်ခဲ့သော ရဲဘော်များ၏ အလောင်းများကိုပင် ပြန်လည်သယ်ဆောင်နိုင်ခြင်း မရှိခဲ့ကြပေ။

ပင်လယ်နေမျိုးနွယ်စုဘက်တွင်လည်း အထိနာခဲ့သည်။ သူတို့၏ အကျအဆုံးမှာ လီမျိုးနွယ်စုနှင့် အိမ်ရှေ့မင်းသားတို့၏ ပူးပေါင်းအင်အားထက်ပင် မနည်းလှပေ။ မိသားစုတစ်ခုတည်းအနေဖြင့် ဤမျှအထိ တိုက်ခိုက်ခဲ့ရသည်မှာ ကြီးမားသော ဆုံးရှုံးမှုပင် ဖြစ်သည်။ အစပိုင်းတွင် သူတို့သည် ပင်လယ်မင်းသားအတွက် လက်စားချေရန် ဒေါသများဖြင့် တိုက်ခိုက်ခဲ့ကြသော်လည်း၊ ယခုမူ ထိုစိတ်များ ပျောက်ကွယ်သွားခဲ့ပြီ ဖြစ်သည်။ ဆုံးရှုံးမှုမှာ ကြီးမားလွန်းသဖြင့် ပင်လယ်မင်းသားအုပ်စုမှ အဆင့်မြင့်ပုဂ္ဂိုလ်များမှာ ငိုချင်သော်လည်း မျက်ရည်မထွက်နိုင်လောက်အောင် ဖြစ်နေရသည်။

သူတို့ထိန်းချုပ်ထားသော ပင်လယ်နက်သားရဲကြီးများ၏ ဆုံးရှုံးမှုမှာ ရေတွက်၍မရနိုင်တော့ပေ။ ထို့အပြင် ပင်လယ်နေမျိုးနွယ်စုမှ ပညာရှင်များမှာ နောက်တန်းတွင် ပုန်းကွယ်နေပြီး သားရဲကြီးများကိုသာ အရှေ့မှ တိုက်ခိုက်ခိုင်းခဲ့သော်လည်း၊ သူတို့မှာ လီမျိုးနွယ်စု ရေတပ်၏ အဓိက ပစ်မှတ်များ ဖြစ်နေခဲ့သည်။ နတ်ဘုရားဖျက်ဆီးရေးလက်နက်များ၏ တိုက်ခိုက်မှုမှာ သူတို့ထံသို့သာ ဦးတည်နေခဲ့သဖြင့် ပင်လယ်နေမျိုးနွယ်စု၏ ဖန်ဆင်းရှင်များမှာလည်း မကြာခဏဆိုသလို သေဆုံးခဲ့ရသည်။

စကြဝဠာအဆင့်ရှိသူများ၏ အကျအဆုံးမှာလည်း မရေမတွက်နိုင်ပေ။ ဤတိုက်ပွဲမှာ ဤစစ်တပ်ကို အင်အားချည့်နဲ့သွားစေခဲ့သည်။ ယခုအချိန်တွင် သူတို့သည် လီမျိုးနွယ်စုကို ထပ်မံလိုက်လံတိုက်ခိုက်ရန် အင်အားမရှိတော့ပေ။ လီမျိုးနွယ်စု၏စစ်တပ် အမြန်ဆုံးထွက်ခွာသွားရန်ပင် သူတို့ ဆုတောင်းနေကြတော့သည်။ သို့မဟုတ်ပါက မည်သူက အရင်ပြိုလဲသွားမည်ကို ပြောရန် ခက်ခဲလှပေသည်။

မကြာခင်ပင် လီမျိုးနွယ်စု စစ်တပ် ရုတ်တရက် ဆုတ်ခွာသွားရခြင်း၏ အကြောင်းရင်းမှာ ပျံ့နှံ့သွားခဲ့သည်။ ၎င်းမှာ တရှအင်ပါယာမှ ပျောက်ကွယ်နေသော လီချန်းယွမ်ပြန်လည် ပေါ်ထွက်လာခြင်းကြောင့် ဖြစ်လေ၏။