အခန်း ၁၃၀

အခန်း (၁၃၀) သမင်ဂျိုအရက် ရရှိခြင်း၊ မာလောင်တက အဖွဲ့ခေါင်းဆောင်လီ မိန်းမယူမလားဟု မေးခြင်း

မာလောင်တ၏ အိမ်ဝိုင်းထဲတွင် မုဆိုးများသည် ဟိုတစ်စုသည်တစ်စု ထိုင်နေကြလေသည်။

ဤတစ်ခေါက် တောင်တက်ခရီးတွင် ဝံပုလွေအုပ်နှင့် တိုက်ပွဲဖြစ်ပွားခဲ့ရာ မုဆိုးများမှာ ဒဏ်ရာရသူရ၊ သေဆုံးသူသေဆုံးဖြင့် အတော်လေး အထိနာခဲ့ရသည်။

ဆုံးရှုံးမှုများ ကြီးမားသော်လည်း အကျိုးအမြတ်များလည်း အတော်လေး ရရှိခဲ့ကြ၏။

လီလန် ယူဆောင်သွားသော ဝံပုလွေသားရေ ဆယ့်ငါးချပ်ကို ဖယ်လိုက်လျှင် သူတို့အနေဖြင့် ဝံပုလွေသားရေ ဆယ့်လေးချပ်နှင့် ဝံပုလွေသား ကျင်း(၁၀၀၀)ကျော်ကို ရရှိခဲ့လေသည်။

ထိုအမွှေးဖြူဝံပုလွေဘုရင်ကြီး တစ်ကောင်တည်းပင်လျှင် အလေးချိန် ကျင်း(၁၀၀)ကျော် ရှိပေသည်။

ဝံပုလွေသားမှာ ညှီနံ့ပြင်းသော်လည်း အဓိက စားစရာအဖြစ် အသုံးပြု၍ ရနိုင်သေး၏။

ငတ်မွတ်ခေါင်းပါးသော အချိန်ကာလတွင် အသားက ညှီသည်ဖြစ်စေ၊ မညှီသည်ဖြစ်စေ အရေးမကြီးတော့ပေ။ လူတွေ ငတ်သေနေချိန်တွင် အသားက အရသာရှိမရှိကို မည်သို့ ညည်းတွားနေနိုင်မည်နည်း။

အသား ကျင်း(၁၀၀၀)ကျော်နှင့် သားရေ ဆယ်ချပ်ကျော်ကို မုဆိုးများအကြား ခွဲဝေပေးမည် ဖြစ်သည်။ မုဆိုးတစ်ယောက်လျှင် သားရေတစ်ချပ်နှင့် ဝံပုလွေသား ကျင်း(၁၀၀)ကျော် ရရှိမည်ဖြစ်၏။

ဤတစ်ခေါက် တောင်ပေါ်တက်၍ ဝံပုလွေအမဲလိုက်ရသည်မှာ အရှုံးမပေါ်ခဲ့သည့်အပြင် အနည်းငယ်ပင် အမြတ်ထွက်ခဲ့သေးသည်။

မာလောင်တဘက်မှလည်း သဘောတူထားသော ဆုကြေးငွေများ ရှိနေသေး၏။

မုဆိုးအချို့မှာ ဒဏ်ရာပြင်းထန်စွာ ရရှိထားရာ မာလောင်တက ရွာရှိခြေဗလာဆရာဝန်ကို သွားရောက် ခေါ်ယူနေပြီ ဖြစ်သည်။

ကျန်သောသူများမှာမူ ခြံဝင်းထဲတွင် အနားယူရင်း ဆေးလိပ်သောက်ကာ စကားစမြည်ပြောဆိုနေကြပြီး သူတို့ဝေစုရမည့် အသားနှင့် လုပ်အားခကို စောင့်ဆိုင်းနေကြလေသည်။

လီလန်နှင့် အခြားနှစ်ယောက် တောင်ပေါ်မှ ဆင်းလာသည်နှင့် ခြံဝင်းထဲသို့ပင် မဝင်ရသေးခင်မှာ မာလောင်တကဲ့သို့သော ဝါရင့်မုဆိုးများ၏ သတိထားမိခြင်းကို ခံလိုက်ရသည်။

မာလောင်တမှာ မျက်စိရှင်သူဖြစ်ရာ လီလန်၏ ရင်ခွင်ထဲရှိ ကလေးငယ်ကို တစ်ချက်တည်းနှင့် မြင်သွားတော့သည်။

အမွှေးဖြူဝံပုလွေဘုရင်၏ နှင်းကဲ့သို့ ဖြူဖွေးနေသော သားရေမှာ အလွန်ပင် မျက်စိဖမ်းစားနိုင်ပြီး ၎င်း၏ ဧရာမခေါင်းကြီးမှာလည်း ခမ်းနားထည်ဝါနေလေသည်။

"ကလေးလေးက ဘယ်ကရောက်လာတာလဲ..."

မာလောင်တသည် လီလန်၏ ရင်ခွင်ထဲတွင် အမွှေးဖြူဝံပုလွေဘုရင်၏ သားရေဖြင့် ပတ်ထားသော ကလေးငယ်ကို ကြည့်ရင်း အံ့သြတကြီး မေးလိုက်သည်။

ခြံဝင်းထဲရှိ မုဆိုးများသည် ဆူညံသံများကို ကြားသောအခါ ဝိုင်းအုံလာကြလေသည်။

"ဟေး ဒီကလေးက ဘယ်ကရောက်လာတာလဲ အဖွဲ့ခေါင်းဆောင်လီ ဒါက မင်းကလေးလား..."

"မင်းက ဘာတွေ လျှောက်ပြောနေတာလဲ အဖွဲ့ခေါင်းဆောင်လီက အိမ်ထောင်တောင် မကျသေးတာ ကလေးဘယ်ကရမှာလဲ သူ တောင်ပေါ်က ကောက်ရလာတာဖြစ်ရမယ်..."

"မြက်ခင်းပြင်တောင်ပေါ်မှာ ကလေးကောက်ရနိုင်မယ်လို့ မင်းထင်နေတာလား ငါ့ကို နောက်နေတာလား လင်ဇီးမှို သမင်ဂျိုနဲ့ ဂျင်ဆင်းတွေကို ကောက်ရတယ်လို့ပဲ ကြားဖူးပါတယ် တောင်ပေါ်ကနေ ကလေးကောက်ရတယ်လို့ တစ်ခါမှ မကြားဖူးပါဘူး..."

"ဒ္ကလေးက တကယ်ချစ်စရာလေးပဲ မျက်ခုံးထူထူ မျက်လုံးပြူးပြူးနဲ့ တော်တော်ချစ်ဖို့ကောင်းတာ..."

"ကြည့်စမ်း အဖွဲ့ခေါင်းဆောင်လီက ဝံပုလွေပေါက်လေး သုံးကောင်တောင် ကောက်ရလာသေးတယ်..."

"..."

ထိုအခါမှ မုဆိုးများသည် ကလေးငယ်အပြင် လီလန်နှင့် သူ၏ အပေါင်းအပါနှစ်ယောက်က ဝံပုလွေပေါက် သုံးကောင်ကိုလည်း ယူဆောင်လာကြောင်း တွေ့ရှိသွားကြတော့သည်။

"ကျွန်တော်တို့ ဒီကလေးကို ဝံပုလွေဂူထဲကနေ တွေ့လာတာ..."

လီလန်သည် မည်သည့်အရာကိုမျှ ဖုံးကွယ်မထားဘဲ ဝံပုလွေဂူထဲတွင် ဝံပုလွေကလေးကို တွေ့ရှိခဲ့ပုံအားလုံးကို မာလောင်တအား ပြောပြလိုက်လေသည်။

"ဝံပုလွေကလေး..."

"အိုး တကယ်ကြီး ရှိနေတာပဲ ရွာထဲက လူကြီးတွေက ကလေးတွေကို ပျော်အောင် ပုံပြင်တွေ ပြောပြနေတယ်လို့ပဲ ငါထင်ခဲ့တာ..."

မာလောင်တသည် ဝံပုလွေကလေးကို အပေါ်အောက် အကဲခတ်ကြည့်ရှုရင်း စပ်စုလိုစိတ်ဖြင့် မေးလိုက်သည်။

"ဒီဝံပုလွေကလေးကလည်း သိပ်မထူးခြားပါဘူး ငါ့မြေးလောက်ပဲ ရှိတာ..."

"မြေး ဟုတ်လား မာလောင်တ ခင်ဗျားမှာ မြေးရှိတယ်လား..."

လီလန်၏ မျက်နှာတွင် ဝမ်းသာပျော်ရွှင်မှုများ လင်းလက်သွားတော့သည်။

မာလောင်တမှာ ယခုနှစ်တွင် အသက်ငါးဆယ်ကျော်နေပြီဖြစ်ရာ အဘိုးဖြစ်မည့် အရွယ်ရောက်နေပြီဖြစ်၍ မြေးရှိနေခြင်းမှာ အံ့သြစရာတော့ မဟုတ်ပေ။

"ငါ့သားအကြီးကောင် မနှစ်ကမှ အိမ်ထောင်ကျတာလေ ပြီးခဲ့တဲ့လကပဲ မြေးလေး မွေးထားတာ..."

"ဒါဆိုရင် ခင်ဗျားရဲ့ ချွေးမကို ခေါ်ပြီး ကလေးကို နို့တိုက်ပေးဖို့ မာလောင်တကို အကူအညီတောင်းရတော့မယ်..."

"ကောင်းပြီလေ..."

ထို့နောက် မာလောင်တက သူ၏ ချွေးမကို ခေါ်လာပြီး ဝံပုလွေကလေးကို အိမ်ခန်းထဲသို့ ခေါ်သွားခိုင်းလိုက်သည်။

"ကလေးကို ရေချိုးပေးပြီး အဝတ်အစားသန့်သန့်လေးတွေ လဲပေးဖို့ မမေ့နဲ့ဦးနော် ဝံပုလွေတွေက အနံ့ပြင်းတယ်..."

လီလန်က မာလောင်တ၏ ချွေးမကို လှမ်းအော်ပြောလိုက်၏။

"အဖွဲ့ခေါင်းဆောင်လီလို ယောက်ျားကြီးက ဒီလောက် သေချာဂရုစိုက်တတ်မယ်လို့ ငါမထင်ထားဘူး မင်းရော မိန်းမယူပြီး ကလေးယူချင်နေပြီလား..."

မာလောင်တက နောက်ပြောင်လိုက်လေသည်။

သူ၏ ပါးနပ်သော မျက်လုံးများက လီလန်ကို ခေါင်းမှခြေအဆုံး အကဲခတ်ကြည့်ရှုလိုက်သည်။

တောင်ပေါ်တွင် ပြသခဲ့သော လီလန်၏ စွမ်းဆောင်ရည်များအရ သူသည် အသက်နှစ်ဆယ်အရွယ် တောက်ပသော အနာဂတ်ရှိသည့် အလားအလာကောင်းသော မုဆိုးတစ်ယောက် ဖြစ်သည်။

"အဖွဲ့ခေါင်းဆောင်လီ မင်းမှာ ရည်းစားရှိနေပြီလား မရှိသေးရင် ငါတစ်ယောက်လောက် မိတ်ဆက်ပေးမယ်လေ..."

မာလောင်တက ပြုံး၍ ပြောလိုက်သည်။

သူ စကားပင် မဆုံးသေးခင် ဆက်ပြောလိုက်လေသည်။

"ငါ့မှာ မင်းနဲ့ ရွယ်တူလောက် တူမတစ်ယောက်ရှိတယ် မြို့က ကုန်တိုက်တစ်ခုမှာ အရောင်းစာရေးမ လုပ်နေတာလေ မင်းတို့နှစ်ယောက်ကို မိတ်ဆက်ပေးရမလား..."

"..."

မကြာသေးမီကများ ယောက်ျားလေးတွေနှင့် ပတ်သက်ပြီး ကံကောင်းမှုတွေ ကြုံနေရလို့လား တွေ့တဲ့လူတိုင်းကို အိမ်ထောင်ဖက်တွေ မိတ်ဆက်ပေးနေတာလား။

လီလန်သည် အနည်းငယ် စိတ်ရှုပ်သွားပြီး မာလောင်တ၏ ကမ်းလှမ်းမှုကို ယဉ်ကျေးစွာ ငြင်းဆိုလိုက်သည်။

"မာလောင်တ ကျွန်တော်က ငယ်ပါသေးတယ် အလျင်မလိုပါဘူး..."

"မင်းက ဒ္နှစ်ဆို အသက်နှစ်ဆယ်ပြည့်ပြီ ငယ်တော့ဘူးလေ ငါ့သားအငယ်ကောင်ဆို ဆယ့်ကိုးနှစ်ပဲ ရှိသေးတယ် သူ့ရင်ခွင်ထဲမှာ ဝဝကစ်ကစ် ကလေးလေးတစ်ယောက်တောင် ရနေပြီ..."

"..."

ဤခေတ်ဤအခါတွင် ကျေးလက်ဒေသမှ လူများသည် အသက်ဆယ့်ခုနစ်နှစ် သို့မဟုတ် ဆယ့်ရှစ်နှစ်အရွယ်လောက်တွင်ပင် စောစောစီးစီး အိမ်ထောင်ကျကာ မိသားစုဘဝကို စတင်လေ့ရှိကြသည်။

လီလန်က စကားလမ်းကြောင်းလွှဲလိုက်ပြီး

"မာလောင်တ ဒီကလေးရဲ့ အမေက ဝံပုလွေတွေ စားတာခံလိုက်ရတယ် သူ့မှာ မိသားစု ရှိသေးမှာပါ ခင်ဗျားမှာ အဆက်အသွယ်တွေ အများကြီးရှိတာပဲ သူ့အတွက် စုံစမ်းပေးပါဦး..."

မာလောင်တက ခေါင်းညိတ်လိုက်ပြီး

"ဒီကလေးက သနားစရာလေးပါ နောက်မှ သူ့အကြောင်း စုံစမ်းပေးဖို့ တစ်ယောက်ယောက်ကို ငါ အကူအညီတောင်းလိုက်ပါ့မယ်..."

မာလောင်တသည် စကားပြောပြီးသည်နှင့် တစ်စုံတစ်ရာကို သတိရသွားပုံပေါ်သည်။

"ငါ့ကို ခဏလောက် စောင့်ဦး လောင်စန်းကို သွားပြီး အရက်သွားယူခိုင်းလိုက်မယ်..."

မာလောင်တက မာလောင်စန်းကို ညွှန်ကြားချက်အချို့ ပေးလိုက်ရာ နောက်တစ်ယောက်က အိမ်ထဲသို့ ကမန်းကတန်း ပြေးဝင်သွားပြီး အထုပ်နှစ်ထုပ်ကို ယူဆောင်လာခဲ့သည်။

အထုပ်တစ်ထုပ်ထဲတွင် ကျောက်ကပ်အားတိုးမြက် ငါးကျင်း ပါဝင်သည်။

အခြားအထုပ်တစ်ထုပ်တွင်မူ အရက်အိုးနှစ်အိုး ပါဝင်ရာ သမင်ဂျိုအရက် တစ်ကျင်းနှင့် တရုတ်ဆေးမြစ်အရက် တစ်ကျင်းတို့ ဖြစ်လေသည်။

"လင်ဇီးမှိုတောအုပ်က ကျောက်ဘိုင်တောင်တန်းမှာ ရှိတာ နောက်နှစ် နွေဦးပေါက်လို့ လင်ဇီးမှိုတွေ ထွက်လာရင် မင်းကို ငါ အဲ့ကို ခေါ်သွားပေးမယ်..."

မာလောင်တက ပြုံး၍ ပြောလိုက်သည်။

"ဒါဆိုရင်လည်း ကျေးဇူးအများကြီးတင်ပါတယ် မာလောင်တ..."

လီလန်သည် ခေါင်းညိတ်လိုက်ပြီး အထုပ်နှစ်ထုပ်ကို တုံ့ဆိုင်းခြင်းမရှိဘဲ လက်ခံလိုက်လေသည်။

ကျောက်ကပ်အားတိုးမြက် ငါးကျင်း၊ သမင်ဂျိုအရက် တစ်ကျင်းနှင့် တရုတ်ဆေးမြစ်အရက် တစ်ကျင်း အားလုံးကို လက်ဝယ်ရရှိသွားပြီ ဖြစ်သည်။

"အဖွဲ့ခေါင်းဆောင်လီ ဒီတစ်ခေါက် တောင်တက်ခရီးမှာ ငါတို့ မင်းကို အကြွေးတင်သွားပြီ မင်းက အများဆုံး ကူညီပေးခဲ့တာဆိုတော့ မင်းကို သမင်သွေးအရက် တစ်ကျင်း ထပ်ပေးမယ်..."

မာလောင်တက နောက်ထပ် အရက်အိုးတစ်အိုးကို ယူလာလေသည်။

သမင်သွေးအရက်သည် သမင်လိင်အင်္ဂါအရက်လောက် မကောင်းသော်လည်း ၎င်းသည် ကျောက်ကပ်ကို အားဖြည့်ပေးရန်နှင့် ယန်ဓာတ်ကို အားကောင်းစေရန်အတွက် ထိရောက်မှုရှိကာ သွေးနှင့် ချီဓာတ်ကိုလည်း ဖြည့်စွမ်းပေးနိုင်စွမ်းရှိသည့် အားဆေးကောင်းတစ်လက် ဖြစ်သည်။

"ဒါ ဒါက များလွန်းနေပြီ..."

"ဒါကို ခင်မင်မှုတစ်ခုအနေနဲ့ပဲ သဘောထားလိုက်ပါ မင်းက တောင်ပေါ်မှာ အမဲလိုက်တာ အရမ်းတော်တယ်ဆိုတော့ နောင်တစ်ချိန်မှာ မင်းအကူအညီကို ငါ လိုအပ်လာနိုင်တယ်လေ..."

"ကောင်းပါပြီ ဒါဆိုလည်း ကျေးဇူးပါပဲ မာလောင်တ..."

လီလန်တွင် သမင်သွေးအရက် တစ်ကျင်းကို လက်ခံရန်မှလွဲ၍ အခြားရွေးချယ်စရာ မရှိတော့ပေ။

"ဒါဆိုရင်လည်း မာလောင်တ ကျွန်တော် ပြန်တော့မယ် ခင်ဗျားရဲ့ ချွေးမကို ကလေးကို ရက်အနည်းငယ်လောက် ကူညီစောင့်ရှောက်ပေးဖို့ ပြောပေးပါဦး သူ့မိသားစုကို အမြန်ဆုံးရှာတွေ့နိုင်အောင် ကျွန်တော် ကြိုးစားပေးပါ့မယ်..."

လီလန်က လေးနက်သောအသံဖြင့် ပြောလိုက်သည်။

"အဖွဲ့ခေါင်းဆောင်လီ ဂရုစိုက်သွားဦး..."

ထို့နောက် လီလန်သည် ကျောက်လျူ၊ ကျန်းဝေ့ကော်တို့နှင့်အတူ မာ မိသားစု၏ ခြံဝင်းထဲမှ ထွက်ခွာလာခဲ့လေသည်။

ဟူး...

"ငါတို့တော့ နောက်ဆုံး ရွာကို ရောက်လာခဲ့ပြီ သည်တစ်ခေါက် တောင်တက်ခရီးကတော့ တကယ်ကို အန္တရာယ်များတာပဲ..." ကျန်းဝေ့ကော်သည် သူ၏ နဖူးမှ ချွေးများကို သုတ်လိုက်သည်။

မာလောင်တ၏ အမဲလိုက်ခွေးနှစ်ကောင်ကို လုယူသွားသော အရှေ့မြောက်ပိုင်းဝံပုလွေ၏ အနောက်တွင် ဤမျှကြီးမားသော ဝံပုလွေအုပ်ကြီး ရှိနေမည်ဟု မည်သူက ထင်ထားမည်နည်း။

"ဘာဖြစ်လို့လဲ ကောင်လေး မင်း ကြောက်လန့်သွားတာလား မင်းမှာ သည်လောက်ပဲ သတ္တိရှိတာလား..." လီလန်သည် ကျန်းဝေ့ကော်ကို တစ်ချက်ကြည့်ကာ နောက်ပြောင်လိုက်သည်။

သူနှင့်အတူ ဤတောင်တက်ခရီးစဉ်တွင် ဤလက်အောက်ငယ်သားနှစ်ယောက်၏ စွမ်းဆောင်ရည်မှာ အတော်လေး ကောင်းမွန်ခဲ့သည်။ ဝံပုလွေများ၏ ဝိုင်းရံထားခြင်းကို ခံရချိန်တွင် တည်ငြိမ်အေးဆေးစွာဖြင့် ရဲစွမ်းသတ္တိနှင့် ဉာဏ်ရည်ဉာဏ်သွေး နှစ်မျိုးလုံးကို ပြသနိုင်ခဲ့ရာ သူတို့မှာ အရည်အချင်းရှိသူများဟု ဆိုနိုင်ပေသည်။

"ကောင်းပြီ မင်းတို့ တစ်ယောက်ကို ဝံပုလွေသားရေ တစ်ချပ်စီနဲ့ ကျောက်ကပ်အားတိုးမြက် တစ်ကျင်းစီ ယူလိုက် အရက်တော့ မင်းတို့ကို ထပ်မပေးတော့ဘူး နောက်နှစ် နွေဦးပေါက်ရင် လင်ဇီးမှို ကောက်ဖို့ ကျောက်ဘိုင်တောင်တန်းကို မင်းတို့ကို ငါ ခေါ်သွားပေးမယ်..."

"ကောင်းပါပြီ ကျေးဇူးတင်ပါတယ် အဖွဲ့ခေါင်းဆောင်..."

"အဖွဲ့ခေါင်းဆောင် ဒါဆိုရင်လည်း ကျွန်တော် အားမနာတော့ဘူးနော်..."