အခန်း ၃၈

အခန်း (၃၃၈) အိုယန်ပင်း၏ လက်ထပ်ထိမ်းမြားခြင်းအတွက် စီစဉ်ဆောင်ရွက်မှုများ

မကြာမီပင် အိုယန်ပင်းက ကျောက်လင်ကို သူမ၏ အိမ်သို့ ခေါ်ဆောင်လာခဲ့၏။ ခရိုင်ဝန် အိုယန်ဝန်ရှင်းမှာ စာရေးခန်းထဲတွင် တရားဝင် စာရွက်စာတမ်းများကို ရေးသားနေချိန် ဖြစ်သည်။ ဤအချိန်တွင် ထိုနှစ်ဦးမှာ စာရေးခန်းဆီသို့ တိုက်ရိုက်သွားလိုက်ကြသည်။

"အဖေ... သမီး ကျောက်လင်ကို အဖေနဲ့တွေ့ဖို့ ခေါ်လာတယ်..."

အိုယန်ပင်းက တံခါးခုံကို ကျော်ဖြတ်ဝင်ရောက်လာပြီး အသံကျယ်ကျယ်ဖြင့် အော်ပြောလိုက်၏။ ကျောက်လင်က သစ်သားသေတ္တာတစ်လုံးကို လက်ထဲတွင် ကိုင်ဆောင်လျက် အေးဆေးတည်ငြိမ်စွာ လျှောက်ဝင်လာသည်။ ထိုအသံကို ကြားလိုက်ရသောအခါ အိုယန်ဝန်ရှင်းက ခေါင်းကို ရုတ်တရက် မော့ကြည့်လိုက်ပြီး ကျောက်လင်ကို ပထမဆုံး မြင်လိုက်ရသည့်အခိုက် သူ၏ မျက်လုံးများ တောက်ပသွား၏။

ယခင်က အိုယန်ဝန်ရှင်းသည် ချီလင်အကယ်ဒမီ၏ နည်းပြချုပ် ယန်ဟုန်နျန်နှင့် ရင်းနှီးမှုရယူကာ ခရိုင်ဝန်အဖြစ် ရာထူးတိုးရန် ကြိုးပမ်းနေသည့်အတွက် ယန်ချန်ဖုန်းကို သဘောကျနေခဲ့ဖူးသည်။

သို့သော်လည်း ယန်ချန်ဖုန်းမှာ ပျောက်ကွယ်သွားပြီး ယန်ဟုန်နျန်လည်း ပြန်မလာခဲ့ပေ။ နောက်ပိုင်းတွင် လျှို့ဝှက်ဆန်းကြယ်သော လူအုပ်စုတစ်ခုက ယန်မိသားစုတစ်ခုလုံးကို အမြစ်ပြတ် သတ်ဖြတ်ပစ်ခဲ့သည်။ ယွီရွှေခရိုင်တွင် အာဏာအရှိဆုံးဖြစ်ခဲ့သော ယန်မိသားစုမှာ ထိုသို့ဖြင့် ပျောက်ကွယ်သွားခဲ့ရ၏။

နောက်ကွယ်မှ အားထားရမည့် အစွမ်းထက် ယန်မိသားစု မရှိတော့သည့်အခါ အိုယန်ဝန်ရှင်းမှာ ခရိုင်ဝန် ရာထူးအတွက် ဆက်လက်ပြင်ဆင်နိုင်ရန် မည်သည့် မှူးမတ်မျိုးနွယ်စုနှင့် ပူးပေါင်းသင့်သည်ကို တွေးတောနေခဲ့သည်။ နောက်ပိုင်းတွင် အိုယန်ဝန်ရှင်းမှာ ကျောက်လင်သည် ယွီရွှေခရိုင်၏ ထွန်းတောက်လာမည့် ကြယ်ပွင့်ဖြစ်ကြောင်း ကြားသိခဲ့ရသည်။

ကျောက်လင်မှာ ချမ်းသာကြွယ်ဝရုံသာမက အစွမ်းထက်သော ကျင့်ကြံသူတစ်ယောက်လည်း ဖြစ်သည်။ နယ်ခြားစောင့်တပ်၏ အဖွဲ့ဝင်တစ်ဦးဖြစ်သည့်အပြင် ယွီရွှေခရိုင်၏ အစွမ်းထက်သော ပုဂ္ဂိုလ်တစ်ဦး ဖြစ်သည်ဟု ပြောနိုင်ပေသည်။ တစ်ကြိမ်တွင် အိုယန်ဝန်ရှင်းမှာ သူ၏သမီး အိုယန်ပင်းထံမှ အိုယန်ပင်း၏ ချစ်သူမှာ ကျောက်လင်ဖြစ်ကြောင်း သိရှိခဲ့ရသည်။

ထို့ကြောင့် အိုယန်ဝန်ရှင်းမှာ အိုယန်ပင်းကို အခြားမှူးမတ်မျိုးနွယ်စုများနှင့် ရင်းနှီးမှုယူရန် ဖိအားပေးခြင်းကို ရပ်တန့်လိုက်ပြီး အိုယန်ပင်းနှင့် ကျောက်လင်တို့၏ ဆက်ဆံရေးကို တိတ်တဆိတ် လက်ခံလိုက်သည်။ ယခုတွင် ကျောက်လင်က ကိုယ်တိုင်လာရောက်လည်ပတ်ခဲ့ပြီ ဖြစ်သည်။

ကျောက်လင်၏ တည်ငြိမ်အေးဆေးသော အပြုအမူနှင့် သူ၏ ထူးခြားစွာ ချောမောသော မျက်နှာကို မြင်လိုက်ရသည့်အခါ အိုယန်ဝန်ရှင်းမှာ တကယ်ကို စိတ်လှုပ်ရှားသွားရ၏။ သူအမြဲတမ်း ရင်းနှီးမှုယူလိုခဲ့သော ထိပ်တန်းအစွမ်းပိုင်ရှင်ကို သူ၏သမီးကပင် ရရှိထားနှင့်နေပြီ မဟုတ်ပါလား။ ကျောက်လင်၏ စကားတစ်ခွန်းတည်းဖြင့် သူ ခရိုင်ဝန်ဖြစ်လာနိုင်မည်ကို အိုယန်ဝန်ရှင်း ကောင်းကောင်းသိသည်။

"ချစ်လှစွာသော ယောက္ခမကြီး... မင်္ဂလာပါ..."

"ဒီတစ်ခေါက် လာလည်ရင်း သေးငယ်တဲ့ လက်ဆောင်အချို့ ယူလာတယ်... လက်ခံပေးပါဦး..."

ကျောက်လင်က သူ၏ လက်ထဲမှ သစ်သားသေတ္တာကို စားပွဲပေါ်သို့ တင်လိုက်သည်။ အိုယန်ဝန်ရှင်းမှာ ချက်ချင်းပင် သစ်သားသေတ္တာကို ဖွင့်ကြည့်လိုက်ရာ အတွင်း၌ အရောင်လေးမျိုးဖြင့် သစ်သီးလေးလုံး ရှိနေ၏။ ဤသည်တို့မှာ ဝိညာဉ်သစ်သီး လေးလုံးပင် ဖြစ်သည်။

"အာ..."

အိုယန်ဝန်ရှင်းမှာ ကျင့်ကြံသူမဟုတ်သော်လည်း ကျင့်ကြံခြင်းဆိုင်ရာ ဗဟုသုတအချို့ ရှိသည့်အတွက် ၎င်းတို့မှာ ဝိညာဉ်သစ်သီးများဖြစ်ကြောင်း တစ်ချက်ကြည့်ရုံဖြင့် သိလိုက်ရသည်။

ကျောက်လင်က ချက်ချင်းပင် ဝိညာဉ်သစ်သီး လေးလုံးပေးလိမ့်မည်ဟု သူ လုံးဝ မမျှော်လင့်ထားခဲ့ပေ။ ဤသည်မှာ သေးငယ်သော လက်ဆောင်ဟု မဆိုနိုင်တော့ပါ။ သာမန်သေမျိုးများအတွက် ဤသည်မှာ အကောင်းဆုံးသော လက်ဆောင်ပင် ဖြစ်သည်။

"ယောက္ခမကြီး... ဒီဝိညာဉ်သစ်သီးလေးလုံးကို စားပြီးရင် ယောက္ခမကြီးရဲ့ ခန္ဓာကိုယ်တစ်ခုလုံးကို ပုံသွင်းပေးမှာ... ရောဂါဘယကင်းရှင်းပြီး ကျန်းမာတဲ့ ဘဝကို ပိုင်ဆိုင်ရမှာ သေချာပါတယ်..."

ကျောက်လင်က ပြုံးလျက် ပြောလိုက်သည်။

"တော်လိုက်တဲ့ သားမက်ပါလား... တကယ့်ကို ငါ့သားမက်ပဲ..."

အိုယန်ဝန်ရှင်းမှာ ရယ်မောခြင်းကို မတားဆီးနိုင်တော့ပေ။ ၎င်းမှာ သူ၏ နှလုံးသားထဲမှ လှိုက်လှဲစွာ ပေါ်ထွက်လာသော ပျော်ရွှင်မှုမျိုး ဖြစ်သည်။ အိုယန်ပင်းမှာ အံ့သြသွား၏။ ဤသူမှာ ယခင်က သူတို့၏ ဆက်ဆံရေးကို ပြင်းထန်စွာ ဆန့်ကျင်ခဲ့သော အဖေ ဟုတ်ပါလေစ။ ဝိညာဉ်သစ်သီး လေးလုံးနှင့်ပင် သူက သားမက်ကောင်းဟု ချက်ချင်း ခေါ်ဆိုခြင်း ခံလိုက်ရသည်။ ကျောက်လင်မှာ အိုယန်ဝန်ရှင်း၏ တုံ့ပြန်မှုကို အလွန်ကျေနပ်နေသည်။

"ယောက္ခမကြီး... ကျွန်တော် ဒီနေ့ လက်ထပ်ခွင့်တောင်းဖို့ လာတာပါ..."

ကျောက်လင်က ပြုံး၍ ပြောလိုက်၏။ အိုယန်ဝန်ရှင်းမှာ အံ့သြသွားသည်။ မူလက အိုယန်ဝန်ရှင်းမှာ ကျောက်လင်ကို ခရိုင်ဝန်ဖြစ်ရန် ကူညီပေးဖို့ သဘောတူခိုင်းခြင်းကဲ့သို့သော တောင်းဆိုချက်အချို့ ပြုလုပ်လိုခဲ့သည်။ သို့သော်လည်း အိုယန်ဝန်ရှင်းမှာ ချက်ချင်းပင် နားလည်သွားပြီး များစွာသော အချက်များကို အချိန်တိုအတွင်း သဘောပေါက်သွား၏။

ကျောက်လင် ဝင်လာသည်နှင့် ကြီးမားသော တန်ဖိုးရှိသည့် လက်ဆောင်အဖြစ် ဝိညာဉ်သစ်သီး လေးလုံးကို တင်ပြလိုက်သည်။ ကျောက်လင်က ဝိညာဉ်သစ်သီး လေးလုံးကို လွယ်လွယ်ကူကူ ပေးနိုင်သည်ဆိုသည့် အချက်ကပင် သူကိုယ်တိုင် အစွမ်းထက်သော ပုဂ္ဂိုလ်ဖြစ်ကြောင်း သို့မဟုတ် သူ၏ နောက်ကွယ်တွင် အစွမ်းထက်သော မိသားစု၏ အထောက်အပံ့ ရှိနေကြောင်း ဖော်ပြနေသည်။

အကယ်၍သာ သူသာ ကျောက်လင်ကို လက်ခံပြီး သမီးကို လက်ထပ်ပေးလိုက်မည်ဆိုပါက သူ ခရိုင်ဝန်ဖြစ်ချင်ကြောင်း ပြောဆိုခြင်းမှာ လွယ်ကူသော အရာတစ်ခုသာ ဖြစ်လိမ့်မည်။ ကျောက်လင်က လက်ထပ်ခွင့်တောင်းဖို့ လာသော်လည်း မည်သည့် အခြေအနေကိုမှ မသတ်မှတ်ထားပေ။ ဤနည်းဖြင့်သာ နောက်ပိုင်းတွင် သူ အကျိုးကျေးဇူး ပိုမိုရရှိနိုင်မည်ဖြစ်သည်။ အိုယန်ဝန်ရှင်းမှာ ချက်ချင်းပင် နားလည်သွား၏။

"ချစ်သားမက်လေး... ငါ့ဘက်က ဘာပြဿနာမှ မရှိပါဘူး..."

"ပင်းအာသာ မင်းကို ချစ်ရင် မင်းတို့နှစ်ယောက်သွားပြီး လက်ထပ်စာရင်း သွားသွင်းကြပေါ့..."

"မင်္ဂလာဆောင်ကို ဘယ်လို စီစဉ်မလဲဆိုတာ မင်းတို့နှစ်ယောက်ပဲ ဆုံးဖြတ်ကြပါ... ငါ အပြည့်အဝ ထောက်ခံပါတယ်..."

အိုယန်ဝန်ရှင်းမှာ သူ၏ သဘောထားကို ချက်ချင်း ထုတ်ဖော်ပြောဆိုလိုက်သည်။ ရှက်ရွံ့နေသည့် အရိပ်အယောင် လုံးဝ မရှိပေ။ ကျောက်လင်မှာ အိုယန်ဝန်ရှင်းကို လေးစားမှုအသစ်ဖြင့် မကြည့်ဘဲ မနေနိုင်တော့ပေ။ အိုယန်ဝန်ရှင်းမှာ တောင်းဆိုချက်အများဆုံး ပြုလုပ်သင့်သည့် အချိန်တွင် မပြုလုပ်ခဲ့ပေ။ ထို့ကြောင့် နောက်ပိုင်းတွင် သူက ကျောက်လင်ကို တောင်းဆိုသည့်အခါ ကျောက်လင်မှာ တကယ်ပင် ငြင်းဆန်နိုင်မည် မဟုတ်ပေ။

"ယောက္ခမကြီး... ပင်းအာဆီက ကြားတယ်... ယောက္ခမကြီးက ခရိုင်ဝန်ဖြစ်ချင်တယ်ဆို..."

ကျောက်လင်က ပြုံးလျက် မေးလိုက်သည်။ အိုယန်ဝန်ရှင်းမှာ လက်ရှိတွင် ခရိုင်စာရေးသာဖြစ်ပြီး ခရိုင်ဝန်ဖြစ်ရန် တစ်လှမ်းသာ လိုတော့သည်ဟု ထင်ရသော်လည်း တကယ်တမ်းတွင်မူ အဝေးကြီး လိုသေးသည်။ ခရိုင်ဝန်မှာ နန်းတော်မှ ခန့်အပ်ခြင်းဖြစ်ပြီး ခရိုင်လက်ထောက် ရာထူးမှ ရာထူးတိုးခြင်း မဟုတ်ပေ။ ခရိုင်ဝန်များမှာ များသောအားဖြင့် ခရိုင်ဝန်၏ အသိအမှတ်ပြုခြင်း ခံရသော ခရိုင်အတွင်းရှိ ပညာတတ်များဖြစ်ပြီး သူတို့က ခန့်အပ်ခြင်း ဖြစ်သည်။ အိုယန်ဝန်ရှင်းအတွက် ခရိုင်ဝန် ဖြစ်လာရန်မှာ အလွန်ခက်ခဲပေလိမ့်မည်။

သို့သော်လည်း ကျောက်လင်က အိုယန်ဝန်ရှင်းကို ခရိုင်ဝန် ဖြစ်လာစေရန် ထောက်ခံပေးနိုင်ခြင်းမှာ မဖြစ်နိုင်သောအရာ မဟုတ်ပေ။ ခရိုင်ဝန်ရာထူး လစ်လပ်သွားသည်နှင့် ကျောက်လင်က စီရင်စုဝန် မုရင်ကဲ၏ ဆက်သွယ်မှုများကို အသုံးပြု၍ အိုယန်ဝန်ရှင်းကို ထိုရာထူးအတွက် အကြံပြုခိုင်းနိုင်ပေသည်။

"အမှန်အတိုင်းပြောရရင် သားမက်ရေ... ငါ့မှာ အဲ့ဒီအကြံအစည်တော့ ရှိပါတယ်..."

"ဒါပေမဲ့ ချစ်သားမက်က ဒီကိစ္စကို စိတ်ပူစရာ မလိုပါဘူး... ငါကိုယ်တိုင် နည်းလမ်းရှာပြီး တစ်နေ့နေ့မှာ ခရိုင်ဝန်ဖြစ်လာအောင် ကြိုးစားပါ့မယ်..."

အိုယန်ဝန်ရှင်းက တည်ငြိမ်စွာ ပြန်ဖြေလိုက်၏။ ကျောက်လင်က အနည်းငယ် ပြုံးလိုက်သည်။ စိတ်ပူစရာ မလိုဘူး ဟုတ်လား။ ၎င်းမှာ ရှေ့တိုးရန်အတွက် နောက်ဆုတ်ခြင်းဟူသော အလွန်တောက်ပြောင်သည့် နည်းဗျူဟာပင် ဖြစ်သည်။

"ယောက္ခမကြီး... အခွင့်အရေး ကြုံတဲ့အခါ စီရင်စုဝန်ဆီ ကျွန်တော် သေချာပေါက် ပြောပေးပါ့မယ်..."

"စောင့်နေလိုက်ပါ..."

ကျောက်လင်က တည်ငြိမ်စွာ ပြောလိုက်သည်။ ထိုစကားကို ကြားလိုက်ရသောအခါ အိုယန်ဝန်ရှင်းမှာ မရယ်ဘဲ မနေနိုင်တော့ပေ။ ကျောက်လင်မှာ စီရင်စုဝန်နှင့် ဆက်သွယ်မှု ရှိလိမ့်မည်ဟု သူ တကယ် မမျှော်လင့်ထားခဲ့ပေ။

"ယောက္ခမကြီး... ကျွန်တော် ခရိုင်မြို့ကိုလာတာ အရေးကြီးတဲ့ ကိစ္စတစ်ခု ရှိလို့ပါ..."

"မင်္ဂလာကိစ္စကို ပင်းအာနဲ့ သီးသန့် ဆွေးနွေးလိုက်ပါ့မယ်..."

"အခုတော့ ထန်ရှန်းလမ်းကို သွားရဦးမယ်..."

ကျောက်လင်က ရုတ်တရက် တစ်ခုခုကို ပြောလိုက်၏။ လက်ထပ်ခွင့် တောင်းခြင်းမှာ အလွန်ချောမွေ့သွားသည့်အတွက် ကျောက်လင်က အိုယန်ဝန်ရှင်းနှင့် အချိန်ကုန်ခံ၍ ဈေးဆစ်နေရန် မလိုတော့ပေ။ ကျောက်လင်၏ ခရိုင်မြို့ခရီးစဉ်မှာ အဓိကအားဖြင့် ထန်ရှန်းလမ်းကို ပြန်လည်မွမ်းမံရန် ဖြစ်သည်။ စီမံကိန်းအားလုံး ပြီးဆုံးသွားသည်နှင့် လွီမုချိုးနှင့် ချန်ရှင်းဝမ်တို့ကဲ့သို့ လက်မှုပညာရှင်များမှာ ထန်ရှန်းလမ်းရှိ ထူးခြားသော အဆောက်အအုံအမျိုးမျိုးကို အမြန်ဆုံး ဆောက်လုပ်နိုင်ရန် လူအင်အားကို စုစည်းနိုင်ကြပြီ ဖြစ်သည်။

"ထန်ရှန်းလမ်းလား..."

"ဒါဆိုရင် ချင်းပေါင်စံအိမ်က တစ်လမ်းလုံးရဲ့ မြေယာစာချုပ်တွေကို ဝယ်ယူဖို့ နောက်ကွယ်ကနေ ငွေကြေးထောက်ပံ့ပေးတဲ့သူက မင်းပဲပေါ့..."

ရုတ်တရက် အိုယန်ဝန်ရှင်းက သိလိုစိတ်ဖြင့် မေးလိုက်သည်။ ရွှမ်ယွမ်ဇီက ချင်းပေါင်စံအိမ်နှင့် သူ၏ ဆက်သွယ်မှုများကို အသုံးပြု၍ ထန်ရှန်းလမ်းတစ်ခုလုံး၏ မြေယာစာချုပ်များကို ဝယ်ယူခဲ့သည်။ ဤမျှကြီးမားသော ဖြစ်ရပ်တစ်ခုကို ခရိုင်ဝန် အိုယန်ဝန်ရှင်း မသိဘဲ နေမည်နည်း။

"ဟုတ်ပါတယ်... ထန်ရှန်းလမ်းရဲ့ မြေယာစာချုပ်တွေက အကုန်လုံး ကျွန်တော့်လက်ထဲမှာ ရှိပါတယ်..."

ကျောက်လင်က ချက်ချင်းပင် ဝန်ခံလိုက်သည်။

"သားမက်ကောင်း... မင်းက တကယ့်ကို အံ့သြဖို့ကောင်းတယ်..."

"ငါ နားလည်ပါပြီ... ထန်ရှန်းလမ်းကို ပြန်လည်မွမ်းမံတဲ့ကိစ္စမှာ ငါ့ဘက်က ဘယ်လို အတားအဆီးမှရှိမှာ မဟုတ်ဘူး..."

အိုယန်ဝန်ရှင်းက အတည်ပြုလိုက်ပြီးနောက် ချက်ချင်းပင် ကတိပေးလိုက်၏။ ကျောက်လင် အခုလေးတင် ပေးလိုက်သော ဝိညာဉ်သစ်သီး လေးလုံးဖြစ်စေ၊ အနာဂတ်တွင် သူ ခရိုင်ဝန်ရာထူးရရှိအောင် ကူညီပေးမည့် ကျောက်လင်၏ အစီအစဉ်ဖြစ်စေ အိုယန်ဝန်ရှင်းမှာ ကျောက်လင်ကို ကူညီရန် စိတ်ဆုံးဖြတ်ထားသည်။ အကယ်၍သာ သူက ဤမျှပင် ကူညီမှု မပေးနိုင်ပါက အိုယန်ဝန်ရှင်းမှာ ကျောက်လင်ကို အကူအညီ တောင်းရန်ပင် ရှက်နေရပေလိမ့်မည်။

"သားမက်က ကျေးဇူးတင်ပါတယ်..."

ကျောက်လင်က ယဉ်ကျေးစွာ ပြောလိုက်ပြီးနောက် အိုယန်ပင်းကို ဆွဲခေါ်ကာ ခြံဝင်းထဲမှ ပျံသန်းထွက်ခွာသွားပြီး ထန်ရှန်းလမ်းဆီသို့ ဦးတည်သွားတော့သည်။