အခန်း ၂၂၅

🍋 Chapter 225

ကျိုးထျန်းသည် ထိုဓာတ်ပုံများကို မြင်တွေ့လိုက်ရသည့်အခါ တဟားဟားဖြင့် ရယ်မောလိုက်မိတော့သည်။

ဤဓာတ်ပုံများ အားလုံးမှာ ဆောက်လုပ်ရေး လုပ်ငန်းခွင်တစ်ခု၏ အခြေအနေများကို ပြသနေခြင်း ဖြစ်သည်။

ထိုနေရာတွင် မြေတူးစက်များ၊ မြေညှိစက်များ၊ ကရိန်းဗျူဟာများနှင့် လက်ထဲတွင် ပေါက်ပြား၊ ဂေါ်ပြားများ ကိုယ်စီ ကိုင်ဆောင်ထားကြပြီး ဘေးကင်းလုံခြုံရေး ဦးထုပ်များ ဆောင်းထားကြသော အလုပ်သမားပေါင်း ရာချီ ရှိနေခဲ့ကြသည်။

၎င်းတို့အပြင် ပြင်ပမှ လူများ အနားသို့ တိုးကပ်မလာစေရန်အတွက် ထိုနေရာအား တားဆီးကာကွယ်ပေးနေကြသော လုံခြုံရေးဝန်ထမ်း အမြောက်အမြားလည်း ရှိနေခဲ့ကြသေးသည်။

အကယ်၍ အပြင်လူတစ်ယောက်ကသာ ဤအတိုင်း အပေါ်ယံ ကြည့်ရှုမည်ဆိုပါက ၎င်းကို အဆောက်အအုံဟောင်း ဖျက်ဆီးရေး လုပ်ငန်းခွင်တစ်ခုမျှသာဟု အလွန်ဆုံး ထင်မှတ်ကြပေလိမ့်မည်။

သို့သော်လည်း ကျိုးထျန်းကမူ အဓိက အချက်အချာကျသော နေရာကို တစ်ချက်တည်းဖြင့် လှမ်း၍ မြင်တွေ့လိုက်ရသည်။

အနီးကပ် ရိုက်ကူးထားသော ဓာတ်ပုံတစ်ပုံတွင် လူနှစ်ယောက်စာထက်မက ရှည်လျားလှသော ဆိုင်းဘုတ်မီးပုံးကြီး တစ်ခု ရှိနေခဲ့ပြီး ၎င်း၏ အပေါ်တွင် "ထျန်းရှန့်မင်လန် အနုပညာစတူဒီယို"(ဘွန်းဘရိုက်) ဟု ရေးသားထားသည်ကို မြင်တွေ့လိုက်ရသည်။

ဤအရာမှာ သေကြောင်းကြံစည်ခဲ့သော ချိုးလန်၏ ကုမ္ပဏီပင် ဖြစ်ပေသည်။

ဟန်လီကျွင်းသည် ဟန်တျန်းရုပ်ရှင်မြို့တော်၏ အရှင်သခင်ကြီးပီပီ တကယ့်ကို ထိုက်တန်လှပေသည်။

သူ၏ စကားတစ်ခွန်းတည်းဖြင့် လူများမှာ ချက်ချင်းရောက်ရှိလာခဲ့ကြပြီး ကုမ္ပဏီကို မြေလှန်ဖျက်ဆီးပစ်လိုက်ကြခြင်း ဖြစ်သည်။

၎င်းမှာ အမှန်တကယ်ပင် မြေလှန်ဖျက်ဆီးပစ်ခြင်း ဖြစ်သည်။

၎င်းတို့သည် အတွင်းပိုင်း အလှဆင်မွမ်းမံမှုများကိုသာ ရိုက်ခွဲဖျက်ဆီးခဲ့ကြရုံတင်မကဘဲ လမ်းမဘေးရှိ နှစ်ထပ်အဆောက်အအုံ တစ်ခုလုံးကိုပါ မြေကွက်လပ် ဖြစ်သွားသည်အထိ လုံးဝ ဖြိုချဖျက်ဆီးပစ်လိုက်ကြခြင်း ဖြစ်ပေသည်။

မူလက ဤလမ်းမငယ်လေးမှာ ရုပ်ရှင်နှင့် ဗီဒီယို ထုတ်လုပ်ရေးနှင့် သက်ဆိုင်သော ကုမ္ပဏီများ၊ စတူဒီယိုများဖြင့် ပြည့်နှက်နေခဲ့ခြင်း ဖြစ်ပြီး "ထျန်းရှန့်မင်လန်" မှာလည်း ၎င်းတို့ထဲမှ တစ်ခု ဖြစ်သည်။

လမ်းမ၏ ဘေးတစ်ဖက်တစ်ချက်စီတွင် ရှိနေသော အဆောက်အအုံငယ်လေးများ စီတန်းနေမှုမှာ အလွန်ပင် ညီညာလှပသော မြင်ကွင်းတစ်ခု ဖြစ်နေခဲ့သည်။

သို့သော်လည်း ယခုအချိန်တွင်မူ ထိုဆိုင်တန်းကြီးမှာ မွေးနေ့ကိတ်မုန့်တစ်ခုကို အလယ်မှနေ၍ အပိုင်းအစတစ်ခု ဖဲ့ယူလိုက်သကဲ့သို့ ဖြစ်နေခဲ့ရာ ကြည့်ရသည်မှာ အလွန်ပင် အချိုးမကျလှသော မြင်ကွင်းတစ်ခု ဖြစ်သွားခဲ့ရတော့သည်။

ကျိုးထျန်းသည် ဟန်လီကျွင်း၏ ရည်ရွယ်ချက်ကို ကောင်းမွန်စွာ နားလည်ထားသည်။

ချိုးလန်၏ သွေးစွန်းနေသော အလံကို တိုင်တစ်တိုင်တွင် ချိတ်ဆွဲလျက် စံပြအဖြစ် ပြသလိုက်ခြင်း ဖြစ်ပေသည်။

သူသည် ဟန်တျန်းဒေသအတွင်းရှိ လူတိုင်းအား စည်းမျဉ်းစည်းကမ်းများကို ချိုးဖောက်ပါက မည်ကဲ့သို့သော အကျိုးဆက်မျိုး ကြုံတွေ့ရမည်ဆိုသည်ကို သေသေချာချာ မြင်တွေ့သွားစေချင်ခဲ့ခြင်း ဖြစ်သည်။

မနေ့ညက ဖြစ်ပျက်ခဲ့သော ကိစ္စရပ်မှာ အလွန်ပင် ကြီးမားလှသော ရုတ်ရုတ်သဲသဲ ဖြစ်မှုကို ဖြစ်ပေါ်စေခဲ့သည်။

မည်သို့ပင်ဆိုစေကာမူ လူပေါင်း ထောင်ချီနှင့် ရဲအရာရှိပေါင်း ရာချီ ပါဝင်ပတ်သက်နေခဲ့သဖြင့် ဤအကြောင်းအရာကို အများပြည်သူထံမှ ဖုံးကွယ်ထားရန်မှာ မည်သို့မျှ မဖြစ်နိုင်ပါချေ။

၎င်းကို ဖုံးကွယ်ထား၍ မရနိုင်တော့ပြီ ဖြစ်ရာ အားလုံးကို သတိပေးရန်အတွက် ဤကဲ့သို့ ကြီးကျယ်ခမ်းနားလှသော လုပ်ရပ်တစ်ခုကို ပြသလိုက်ခြင်းက ပိုမို၍ ကောင်းမွန်လှပေသည်။

‘ဒါက ဟန်တျန်း ပဲ ၊ ဒါက ဟန်လီကျွင်းရဲ့ နယ်မြေပဲ’

ဤကဲ့သို့ ကြီးမားလှသော လှုပ်ရှားမှုကို လူတိုင်း မြင်တွေ့နိုင်ရန်အတွက် တကူးတက ပြုလုပ်ခဲ့ခြင်း ဖြစ်သည်။

ထို့ပြင် ပြင်းထန်လှသော ဖျက်ဆီးရေး မြင်ကွင်းကြီး ဖြစ်ပွားနေခဲ့သော်လည်း ၎င်းကို လာရောက်တားဆီးရန် နေနေသာသာ မည်သည့် အစိုးရအရာရှိတစ်ဦးမျှ ရောက်ရှိလာခြင်း မရှိခဲ့ချေ။

မည်သို့ပင်ဆိုစေကာမူ ချိုးလန်ကိုယ်တိုင်က အမှားကျူးလွန်ခဲ့ခြင်း ဖြစ်ပြီး သူ၏ လုပ်ရပ်များမှာ ရာဇဝတ်မှု မြောက်နေခဲ့ရုံတင်မကဘဲ ဒေသခံ ရဲတပ်ဖွဲ့ဝင်များကိုပါ အလွန်ပင် ဒေါသထွက်စေခဲ့သည်။

၎င်းမှာ ပြဿနာရှာခဲ့ခြင်း ဖြစ်ပြီး တကယ်တမ်း၌ ကြီးမားလှသော အရေးအခင်းကြီးတစ်ခု ဖြစ်ပွားလုနီးပါး ဖြစ်ခဲ့ရသည် မဟုတ်ပါလား။

၎င်းတို့သည်လည်း စံပြဥပမာကို အသုံးပြု၍ အချို့သော ကိစ္စရပ်များကို ဘယ်တော့မှ မလုပ်ဆောင်သင့်ကြောင်း လူတိုင်းအား သိရှိစေချင်ခဲ့ကြခြင်း ဖြစ်သည်။

ဓာတ်ပုံများကို ကြည့်ရှုပြီးနောက် ကျိုးထျန်းက ဂရုထဲတွင် မေးခွန်းတစ်ခု လှမ်း၍ မေးမြန်းလိုက်သည်။

"ဥက္ကဋ္ဌဟန်ခင်ဗျာ...ဆိုင်ခန်းတွေကို တိုက်ရိုက် ဖြိုချဖျက်ဆီးပစ်လိုက်တာက ဘာမှ ပြဿနာမရှိဘူးလားဗျ"

ဟန်လီကျွင်း "ဒီဆိုင်ခန်းတွေက အရင်ကတည်းက ငါ့ရဲ့ ပိုင်ဆိုင်မှုတွေလေ၊ ငါက ငါ့ရဲ့ ကိုယ်ပိုင်စီးပွားရေးလုပ်ငန်းကို ပြန်လည်တည်ဆောက်ချင်ရုံတင်ပါပဲ"

ကျိုးထျန်း ခေါင်းညိတ်လိုက်မိသည်။

သူသည် တကယ့်ကို အတွေ့အကြုံရင့်ကျက်လှသော ဝါရင့်ကြီးတစ်ဦး ဖြစ်ပေသည်၊ သူ၏ ကြွားဝါမှုများတွင်ပင် အကျိုးအကြောင်း ကိုက်ညီသော အကြောင်းပြချက်များ ရှိနေခဲ့သည်။

"ဒါဆိုရင် ဒီနေ့ည ငါတို့တွေ ဘယ်နေရာမှာ ဆုံကြမလဲဗျ"

ဟန်လီကျွင်း "ဒါကတော့ ရှောင်ကျွင်းနဲ့ ရှောင်ကျိုးတို့ရဲ့ သဘောထားအပေါ်မှာပဲ မူတည်တယ်၊ မင်းတို့နှစ်ယောက်စလုံးက ငယ်ရွယ်ကြသေးတယ်လေ ဒီကို ပျော်ပျော်ပါးပါး လာလည်ကြတာ ဖြစ်တာမို့လို့... ငါတို့တွေကတော့ ဘာဖြစ်ဖြစ် အဆင်ပြေတယ်"

ချောင်ကျွင်းကျဲ့ "ဥက္ကဋ္ဌဟန်က တကယ့်ကို အားနာစရာကောင်းအောင် ပြောဆိုတတ်တာပဲဗျာ ကျွန်တော့်ကို မေးမယ်ဆိုရင်တော့... ငါတို့တွေ ဘယ်နေရာမှာ လဲကျခဲ့လဲ၊ အဲ့နေရာမှာပဲ ပြန်ပြီးတော့ ထရလိမ့်မယ်ဗျ”

“ မနေ့တုန်းက မကျေမနပ်ဖြစ်ခဲ့ရတာတွေကို အစားထိုးဖို့အတွက် မနေ့က အတူတူ ထမင်းစားခဲ့တဲ့ သီးသန့်ခန်းထဲမှာပဲ နောက်ထပ်တစ်ကြိမ် ထပ်မံစားသောက်ကြတာပေါ့ဗျာ"

ဟုန်ဝန်ထောင်း "ငါကတော့ ရှောင်ကျွင်းရဲ့ အကြံပြုချက်ကို သဘောကျတယ်ဗျာ၊ ‘ယွမ်ပင်းလိုဝ် စားသောက်ဆိုင်’ မှာပဲ နောက်ထပ်တစ်ကြိမ် ထပ်မံစားသောက်ဖို့ သဘောတူပါတယ်ဗျ"

ကျင်းထျန်းရွှမ် "ကျွန်တော်လည်း သဘောတူပါတယ်ဗျာ"

ကျိုးထျန်း "ဒါဆိုရင် လူကြီးမင်းတို့ခင်ဗျာ... ကျွန်တော် အခုချက်ချင်းပဲ သီးသန့်ခန်းကို သွားရောက်ပြီးတော့ ကြိုတင်စာရင်းပေးလိုက်ပါ့မယ်ဗျ။ ညနေ ၆ နာရီမှ ‘ချန်ကျန်းခန်းမ’ မှာ ပြန်ဆုံကြတာပေါ့ဗျာ"

...

ဖုန်းကို ချလိုက်ပြီးနောက်တွင် သူသည် ယွမ်ပင်းလိုင် စားသောက်ဆိုင်၏ ပိုင်ရှင်ထံသို့ ချက်ချင်း ဖုန်းခေါ်ဆိုလိုက်သည်။

ကျိုးထျန်းနှင့် အခြားသော သူဌေးကြီးများမှာ ယနေ့ညနေပိုင်းအချိန်တွင် ၎င်းတို့၏ စားသောက်ဆိုင်သို့ နောက်ထပ်တစ်ကြိမ် လာရောက်စားသောက်ကြဦးမည် ဖြစ်ကြောင်း ကြားသိလိုက်ရသည့်အခါ စားသောက်ဆိုင်ပိုင်ရှင်၏ အသံမှာ ရင်ခုန်စိတ်လှုပ်ရှားမှုကြောင့် တုန်ရင်နေသည်။

သူသည် မနေ့က ဖြစ်ပွားခဲ့သော ကိစ္စရပ်ကြောင့် ထိုသူဌေးကြီးများမှာ မိမိ၏ စားသောက်ဆိုင်ကို နာမည်ပျက်စာရင်း သွင်းပစ်လိုက်ကြလိမ့်မည်ဟု ထင်မှတ်ထားခဲ့ခြင်း ဖြစ်သည်။

အထူးသဖြင့် ဥက္ကဋ္ဌဟန် ဖြစ်ပေသည်။

အကယ်၍ သူကများ မိမိ၏ စားသောက်ဆိုင်တွင် ထမင်းစားရသည်မှာ စိတ်အနှောင့်အယှက်ဖြစ်ရသည်ဟု ပြောဆိုလိုက်မည်ဆိုပါက ချက်ချင်းပင် အလုပ်ဖြုတ်ခြင်း ခံရနိုင်ခြေ ရှိပေသည်။

သူသည် ထိုအကြောင်းကို တွေးတောရင်း တစ်ညလုံး စိတ်သောကရောက်နေခဲ့ရပြီး ကောင်းမွန်စွာ အိပ်ပျော်ခြင်းပင် မရှိခဲ့ပါချေ။

ထို့ကြောင့် ကျိုးထျန်း၏ စကားများကို ကြားသိလိုက်ရသည့် အခိုက်အတန့်တွင် သူသည် အလွန်ပင် စိတ်လှုပ်ရှားသွားခဲ့ရပြီး စိတ်ထဲရှိ ဝမ်းသာမှုများကို ဖော်ပြရန်အတွက် မျက်ရည်ပင် ကျလုနီးပါး ဖြစ်သွားခဲ့ရသည်။

သူသည် ဖုန်းထဲမှနေ၍ ကျိုးထျန်းအား အဆက်မပြတ် မြှောက်ပင့်ပြောဆိုနေခဲ့ပြီး လူတိုင်းအတွက် အကောင်းမွန်ဆုံးသော ဟင်းလျာများကို ပြင်ဆင်ပေးမည့်အပြင် မိမိ နှစ်ပေါင်းများစွာကြာအောင် သိမ်းဆည်းထားခဲ့သော အဖိုးတန် အရက်ဟောင်းများကိုပါ ထုတ်ယူ၍ ဧည့်ခံပါမည်ဟု ကတိပြုနေခဲ့တော့သည်။

ကျိုးထျန်းသည် မြှောက်ပင့်အလိုလိုက်ခြင်း ခံရသည့်အခါ စိတ်ထဲမှနေ၍ အနည်းငယ် အနေရခက်သလို ခံစားလိုက်ရသည်။

သို့သော်လည်း သူ ပြန်လည်တွေးတောကြည့်လိုက်သည့်အခါ စိတ်သက်သာရာ ရသွားခဲ့သည်။

တောင်ထိပ်ပေါ်မှနေ၍ ဖြည်းညှင်းစွာ ကျဆင်းလာသော နှင်းပွင့်ငယ်လေးတစ်ပွင့်သည် လှိမ့်ဆင်းသွားရင်း ဘေးပတ်ဝန်းကျင်ရှိ နှင်းများကို ဆွဲခေါ်သွားခဲ့ရာ တောင်ခြေသို့ ရောက်ရှိသွားသည့်အချိန်တွင် ကားတစ်စီးနီးပါး ကြီးမားလှသော နှင်းလုံးကြီးတစ်ခုအဖြစ်သို့ ပြောင်းလဲသွားခဲ့ပြီး အိမ်တစ်လုံးကိုပင် ဖျက်ဆီးပစ်နိုင်စွမ်း ရှိပေသည်။

ဟန်လီကျွင်းနှင့် သူ၏ အပေါင်းအပါများ၏ စကားတစ်ခွန်းမှာ ထိုနှင်းပွင့်ငယ်လေးနှင့် ဆင်တူပေသည်။

ပြောဆိုလိုက်သည့်အချိန်တွင် ပေါ့ပါးလှသည်ဟု ထင်ရသော်လည်း စားသောက်ဆိုင်ပိုင်ရှင်၏ ပုခုံးပေါ်သို့ ကျရောက်လာသည့်အခါတွင်မူ အလွန်ပင် လေးလံလှပေသည်။

သူသည်လည်း ဥက္ကဋ္ဌဟန်နှင့် ထိုပုဂ္ဂိုလ်ကြီးများ၏ အနားသို့ တရွေ့ရွေ့ တိုးကပ်နေခဲ့ပြီ ဖြစ်ရာ... ကံကောင်းပါက နောက်ထပ် နှစ်အနည်းငယ် ကြာမြင့်သွားခဲ့ပြီးနောက် သူကိုယ်တိုင်လည်း တောင်ထိပ်ပေါ်မှနေ၍ နှင်းပွင့်များကို လွှတ်ချနိုင်သော ပုဂ္ဂိုလ်တစ်ဦး ဖြစ်လာနိုင်ပေသည်။

သူသည် မိမိ၏ အလုပ်များကို ခဏမျှ ချန်ထားခဲ့ပြီးနောက် အိမ်ရှေ့ခြံဝန်းအတွင်းသို့ လျှောက်လှမ်းသွားခဲ့ကာ မုရန်နှင့်အတူ ခဏမျှ စာဖတ်လိုက်ပြီးသည့်နောက် အပြင်သို့ ထွက်ကာ လမ်းလျှောက် ထွက်ခဲ့ကြသည်။

အုပ်စုလိုက် စုပေါင်း၍ ခရီးသွားတတ်ကြသော အခြားကျောင်းသားများနှင့် မတူဘဲ ၎င်းတို့နှစ်ယောက်၏ ခရီးစဉ်မှာ များစွာ လွတ်လပ်ပေါ့ပါးသည်။

သို့သော်လည်း ကျောင်းသားပေါင်း ၄၀ ခန့်မှာ ကျိုးထျန်းနှင့် မုရန်တို့နှစ်ယောက်စလုံး တပြိုင်တည်း ပျောက်ဆုံးနေခြင်းကို သတိပြုမိသွားကြပြီးနောက်တွင်မူ ထူးဆန်းလှသော ကောလာဟလအချို့မှာ ပျံ့နှံ့လာခဲ့တော့သည်။

လူတိုင်းက ၎င်းတို့နှစ်ယောက်၏ ဆက်ဆံရေးကို သံသယဝင်လာကြခြင်းဖြစ်သည်။

အထူးသဖြင့် ကျိုးထျန်း၏ အတန်းထဲမှ မိန်းကလေးများ ဖြစ်ကြပြီး ၎င်းတို့၏ စကားသံများထဲတွင် မနာလိုဖြစ်နေသော အငွေ့အသက်များ ပါဝင်နေခဲ့သည်။

၎င်းတို့၏ အတန်းထဲတွင် နောက်ဆုံး၌ ကြည့်ကောင်းလှသော ယောကျာ်းလေးတစ်ယောက် ရရှိခဲ့ပါလျက်နှင့်...

စစ်သင်တန်းပင် မပြီးဆုံးသေးမီမှာတင် အခြားဌာနမှ မိန်းကလေးတစ်ယောက်၏ ဆွဲခေါ်ခြင်းကို ခံလိုက်ရပြီ ဖြစ်ရာ ‘ငါတို့ အချင်းချင်းကြားမှာတင် အရင်မသိမ်းဆည်းရဘူးလား’ ဟု စိတ်ထဲ မတင်မကျ ဖြစ်နေခဲ့ကြသည်။

ထို့ပြင် ဒါရိုက်တာဝူ၏ သဘောထားကို ကြည့်ခြင်းအားဖြင့်လည်း လူတိုင်းက ကျိုးထျန်းအနေဖြင့် ရုပ်ရှင်ရိုက်ကူးရေး နောက်ကွယ်တွင် ကြီးမားလှသော အဆက်အသွယ်များ ရှိနေသလားဆိုသည်ကို သံသယဝင်လာကြသည်။

‘ဘာဖြစ်လို့ ဒါရိုက်တာကြီးက ကျိုးထျန်းအပေါ်မှာ ဒီလောက်အထိ အထူးမျက်နှာသာ ပေးနေရတာလဲ’

၎င်းတို့နှစ်ယောက်စလုံး ပျောက်ဆုံးနေခဲ့လျှင်ပင် ဒါရိုက်တာဝူက လုံးဝ ဂရုမစိုက်ဟန် ရှိနေခဲ့ပြီး အခြားလူများက လာရောက်မေးမြန်းသည့် အခါတွင်လည်း ကျောင်းသားများကို ၎င်းတို့၏ ကိစ္စမဟုတ်သဖြင့် စိတ်မပူရန်သာ ပြောဆိုခဲ့သည်။

ဤနေရာတွင် သေချာပေါက် တစ်ခုခု ရှိနေသည်မှာ ထင်ရှားလှပေသည်။

ကျိုးထျန်းမှာမူ ၎င်းတို့၏ အတွေးအမြင်များကို ဂရုစိုက်ရန်အတွက် အချိန်မရှိချေ။

ယနေ့သည် ယမန်နေ့နှင့် မတူပေ။ သူသည် ကျောက်ရှင်းနှင့် ကျောက်ဖန့်တို့ကို ထပ်မံ၍ ဖိတ်ကြားခြင်း မပြုခဲ့ချေ။

အထူးသဖြင့် တစ်ညလုံး သူ့အား စိတ်အနှောင့်အယှက်ပေးခဲ့သော ကျောက်ဖန့်ကို ဖြစ်သည်။

သူသည် မုရန်တစ်ယောက်တည်းကိုသာ ခေါ်ဆောင်လျက် ယွမ်ပင်းလိုင် စားသောက်ဆိုင်သို့ ထွက်ခွာလာခဲ့သည်။

သူသည် မနေ့ကကဲ့သို့ အချိန်အတိအကျ ရောက်မှ လာခြင်းမျိုး မဟုတ်ဘဲ ၁၅ မိနစ်ခန့် စော၍ ရောက်ရှိလာခဲ့ခြင်း ဖြစ်သည်။

မည်သို့ပင်ဆိုစေကာမူ မတူညီသော လူပုဂ္ဂိုလ်များအတွက် မတူညီသော ဆက်ဆံရေး နည်းလမ်းများကို အသုံးပြုရန် လိုအပ်သည် မဟုတ်ပါလား။

သီးသန့်ခန်းအတွင်းသို့ လှမ်း၍ ဝင်ရောက်လိုက်သည့်အခါ... အိမ်ရှင်ဖြစ်သော ဥက္ကဋ္ဌဟန်မှာ ထိုနေရာသို့ ကြိုတင်ရောက်ရှိနေခဲ့ပြီ ဖြစ်ပြီး သူ၏ ရင်းနှီးလှသော မိတ်ဆွေများ ဖြစ်ကြသည့် ဥက္ကဋ္ဌဟုန်နှင့် ဥက္ကဋ္ဌကျန်းတို့နှင့်အတူ စကားစမြည် ပြောဆိုနေခဲ့ကြသည်။

"အာ... ရှောင်ကျိုး ရောက်လာပြီပဲ။ လာလာ... ဒီမှာ ထိုင်စမ်းပါဦး"

သူသည် ယုံကြည်မှုရှိစွာဖြင့် လှမ်း၍ ထိုင်လိုက်ပြီး ထိုအမှုဆောင်အရာရှိကြီးများနှင့်အတူ ရယ်မောလျက် စကားဆိုလိုက်သည်။

မုရန်သည်လည်း ကြီးကျယ်ခမ်းနားလှသော အခြေအနေများစွာကို ကြုံတွေ့ဖူးသူ ဖြစ်သည်။

မည်သို့ပင်ဆိုစေကာမူ လျိုထျန်းအန်သည်လည်း အဆင့်မြင့် အမှုဆောင်အရာရှိကြီးတစ်ဦး ဖြစ်သဖြင့် သူမသည် သူမ၏ ဖခင်နှင့်အတူ ကြီးမားလှသော ဂုဏ်သရေရှိ ပွဲလမ်းသဘောသဘင် အမြောက်အမြားသို့ တက်ရောက်ဖူးရာ အမှုဆောင်အရာရှိကြီးများ၏ အရှေ့တွင် လုံးဝ လန့်ဖျန့်သွားခြင်း မရှိခဲ့ချေ။

ထိုအသက်လတ်ပိုင်း အမျိုးသားသုံးဦးမှာလည်း ၎င်းတို့နှစ်ယောက်၏ တည်ငြိမ်ပြီး ရင့်ကျက်လှသော အမူအရာများကို မြင်တွေ့လိုက်ရသည့်အခါ လူငယ်နှစ်ယောက်၏ ထူးခြားလှသော အရှိန်အဝါကို စိတ်ထဲမှနေ၍ တိတ်တဆိတ် ချီးကျူးမိသွားကြတော့သည်။

မကြာမီအချိန်အတွင်းမှာတင် ထိုဝဝတုတ်တုတ် အမျိုးသား သည်လည်း သီးသန့်ခန်းအတွင်းသို့ ရောက်ရှိလာခဲ့သည်။

သို့သော်လည်း ယနေ့တွင်မူ မတူညီချေ၊ သူသည် သူ၏ ထူးဆန်းလှသော ဝါသနာကို ထပ်မံ၍ ပြသလိုက်ပြန်ပြီး အိမ်ထောင်ရှိပြီးသား ဖြစ်သော အမျိုးသမီး အနုပညာရှင် တစ်ဦးကို သူ၏ အဖော်အဖြစ် ခေါ်ဆောင်လာခဲ့ခြင်း ဖြစ်သည်။

ထိုအမျိုးသမီး အနုပညာရှင်မှာ မကြာသေးမီကတင် သူမနှင့်အတူ ရုပ်ရှင်အတူတူ ရိုက်ကူးခဲ့ဖူးသော အမျိုးသားသရုပ်ဆောင်တစ်ဦးနှင့် လက်ထပ်ထိမ်းမြားထားခဲ့ကြောင်း တရားဝင် ကြေညာထားခဲ့သူ ဖြစ်သည်။

သူမ၏ ရုပ်ရည်နှင့် ခန္ဓာကိုယ် အချိုးအစားမှာ ထိုဝဝတုတ်တုတ် အမျိုးသား သဘောကျတတ်သော စံနှုန်းများနှင့် ကောင်းမွန်စွာ ကိုက်ညီလွန်းလှပေသည်။

ကောက်ကြောင်းအလှများ ထင်ရှားပြီး၊ ဆွဲဆောင်မှုရှိသော အဝတ်အစားများကို ဝတ်ဆင်ရဲသည့်အပြင် မျက်နှာမှာလည်း အနည်းငယ် ညို့ဓာတ်ပြင်းလှပေသည်။

ကျိုးထျန်းနှင့် ထိုသူဌေးကြီးသုံးဦးမှာ တစ်ဦးကိုတစ်ဦး လှမ်းကြည့်လျက် ပြုံးလိုက်ကြမိပြီး မုရန်ကမူ သူမ၏ မျက်လုံးများကို အနည်းငယ် ကျဉ်းမြောင်းလိုက်ကာ မျက်မှောင်ကြုတ်လိုက်မိသည်။

"ရှောင်ကျွင်း... မင်း အတွင်းရေးမှူးကျန်း ဒီမှာ မရှိတာနဲ့တင် အပြင်မှာ လာပြီးတော့ ကဲနေတာပေါ့ ဟုတ်လား" ဟု ဥက္ကဋ္ဌဟုန်က စနောက်သော အမူအရာဖြင့် လှမ်း၍ ပြောဆိုလိုက်သည်။

"ဟုတ်ပ... ငါ လောင်းကြေးထပ်ရဲတယ်၊ မင်း မနေ့ညက သေချာပေါက် ကောင်းကောင်း အိပ်ပျော်ခဲ့မှာ မဟုတ်ဘူး"

ဥက္ကဋ္ဌဟန်ကလည်း စကားထဲသို့ ဝင်ရောက်ပြောဆိုလိုက်ပြီးနောက် ကျိုးထျန်းထံသို့ မျက်လုံးလှမ်း၍ ဝှေ့ကြည့်လိုက်သည်။

"ဥက္ကဋ္ဌဟန်ဗျာ... ကျွန်တော့်ကို အဲ့လို မျက်လုံးတွေနဲ့ လာပြီးတော့ မကြည့်ပါနဲ့ဗျာ ကျွန်တော်က ဥက္ကဋ္ဌချောင်နဲ့ လုံးဝ မတူပါဘူး"

ကျိုးထျန်းက ထိုဝဝတုတ်တုတ် အမျိုးသားအား ဘေးစောင်း၍ လှမ်းကြည့်လိုက်ပြီးနောက်

" သူပုန်ကြီး ချောင်ချောင် နဲ့ ဘာများ ကွာခြားလို့လဲဗျာ"

လူတိုင်းက ဤစကားကို ကြားသိလိုက်ရသည့်အခါ တဟားဟားဖြင့် ရယ်မောလိုက်ကြတော့သည်။

မည်သို့ပင်ဆိုစေကာမူ ၎င်းတို့အားလုံးမှာ ‘ချောင်’ ဆိုသော မျိုးရိုးအမည်ချင်း တူညီကြသည့်အပြင် ဝါသနာချင်းလည်း တူညီကြပေသည်။

၎င်းတို့ မိသားစု၏ ရိုးရာအစဉ်အလာတစ်ခု ဖြစ်နေသလားပင် မသိရချေ။

အိမ်ထောင်ရှိ အမျိုးသမီး အနုပညာရှင်မှာမူ လုံးဝ မျက်နှာပျက်သွားခြင်း မရှိဘဲ လုံးဝ ဂရုမစိုက်ဟန်ဖြင့် သူမ ပါးစပ်ကို လက်ဖြင့် ကာကွယ်လျက် တိုးညှင်းစွာဖြင့် လိုက်၍ ရယ်မောနေသည်။