အခန်း ၂၂၆

🍋 Chapter 226

ညနေ ၆ နာရီခန့်တွင် လူအားလုံးနီးပါး ရောက်ရှိလာကြပြီး မည်သူမျှ နောက်ကျခြင်း မရှိခဲ့ကြချေ။

အဆုံးသတ်တွင် အချမ်းသာဆုံး ပုဂ္ဂိုလ်ကြီးများပင် ရောက်ရှိနေကြပြီဖြစ်ရာ အခြား အသေးစား စီးပွားရေးလုပ်ငန်းရှင်များမှာမူ မရိုမသေ မလုပ်ရဲကြပေ။

ကျိုးထျန်း ခန့်မှန်းထားခဲ့သည့်အတိုင်းပင် ယနေ့တွင် အတွင်းရေးမှူးကျန်းမှာ ရှိမနေခဲ့သဖြင့် ဝတုတ်အား အဓိကနေရာတွင် ထိုင်ရန် တွန်းပို့ခြင်း ခံခဲ့ရသည်။

ထိုသူဌေးကြီးများက မည်မျှပင် ချမ်းသာကြစေကာမူ ဤအရှက်မရှိသော ကောင်လေးတစ်ယောက်တည်းသာ ထိုနေရာတွင် ထိုင်ရန် အရည်အချင်း ပြည့်မှီပေသည်။

ကျိုးထျန်းနှင့် လျိုမုယန်တို့ကမူ တံခါးအနီးရှိ နေရာတွင်သာ အေးအေးဆေးဆေး ဝင်ထိုင်လိုက်ကြသည်။

အသက်အရွယ်နှင့် စည်းစိမ်ဥစ္စာ အရဆိုပါက သူသည် ထိုသူများကို ယှဉ်နိုင်စွမ်း မရှိသေးသည်မှာ အမှန်ပင် ဖြစ်သည်။

လူတိုင်း ထိုင်မိကြသည်နှင့် တစ်ပြိုင်နက် စားသောက်ဆိုင်ပိုင်ရှင်က တံခါးကို ခေါက်၍ ဝင်ရောက်လာပြီး နှုတ်ဆက်စကား ဆိုခဲ့သည်။

ဆိုင်ပိုင်ရှင်၏ မျက်နှာပေါ်တွင် ပတ်တီးများ ပတ်ထားဆဲဖြစ်သည်ကို မြင်တွေ့ရသဖြင့် မည်သူကမျှ သူ့ကို အပြစ်မတင်ကြတော့ချေ။

ယနေ့တွင်မူ ဟင်းပွဲများကို မှာယူနေရန် မလိုအပ်တော့ဘဲ ဆိုင်ပိုင်ရှင်မှ စားဖိုမှူးအား သူ၏ လက်ရာမွန် ဟင်းလျာအားလုံးကို ချက်ပြုတ်ရန် တိုက်ရိုက် ညွှန်ကြားထားခဲ့သည်။

၎င်းအပြင် သူသည် ထုပ်ပိုးမှုများပင် ဝါးတားတား ဖြစ်နေပြီဖြစ်သော မောက်ထိုင် ဝိုင်နှစ်ပုလင်း တင်ဆောင်ထားသည့် လင်ဗန်းတစ်ခုကို သတိထား၍ သယ်ဆောင်လာခဲ့သည်။

"လူကြီးမင်းတို့ခင်ဗျာ... ဒါက ကျွန်တော် ကိုယ်တိုင် သိမ်းဆည်းထားတဲ့ သက်တမ်း ၄၀ ရှိတဲ့ မောက်ထိုင်ဝိုင် ဖြစ်ပါတယ်။ မနေ့က မနှစ်မြို့ဖွယ်ရာ ဖြစ်ရပ်အတွက် တောင်းပန်ခြင်းအဖြစ် လက်ခံပေးကြပါ"

ကျိုးထျန်းနှင့် အခြားသူဌေးကြီးများသည် ကျေးဇူးတင်စကား ဆိုရင်း ခေါင်းညိတ်လိုက်ကြရာ ဆိုင်ပိုင်ရှင်၏ ရိုးသားမှုကို ကောင်းစွာ မြင်တွေ့နိုင်ပေသည်။

သက်တမ်း ၄၀ ရှိသော မောက်ထိုင်ဝိုင်တစ်ပုလင်းမှာ အနည်းဆုံး ယွမ် ၅၀,၀၀၀ ခန့် တန်ဖိုးရှိပေသည်။

မကြာသေးမီက ပြုလုပ်ခဲ့သော ခရစ်စတီးစ် ၏ ဆောင်းဦးလေလံပွဲတွင် ၁၉၈၀ ခုနှစ်ထုတ် ၅၃ ဒီဂရီ မောက်ထိုင်ဝိုင် ၁၂ ပုလင်းပါ တစ်သေတ္တာကို ယွမ် ၆၆၀,၀၀၀ ဟူသော မြင့်မားသည့် စျေးနှုန်းဖြင့် ရောင်းချခဲ့ရသည်။

၎င်းကို တွက်ချက်ကြည့်ပါက တစ်ပုလင်းလျှင် ယွမ် ၅၅,၀၀၀ ကျသင့်ခြင်း ဖြစ်သည်။

၎င်းနှင့် နှိုင်းယှဉ်ပါက ၁၉၈၂ ခုနှစ်ထုတ် လာဖစ်ဝိုင်မှာ ဂျူနီယာအဆင့်မျှသာ ရှိပေသည်။

နှစ်ပေါင်းများစွာ စျေးနှုန်းမြှင့်တင်မှုများ ပြုလုပ်ခဲ့ပြီးနောက်တွင်ပင် ၎င်း၏ စျေးနှုန်းမှာ ထိုနှစ်ထုတ် မောက်ထိုင်ဝိုင်ထက် အနည်းငယ်ပင် နိမ့်ကျနေသေးသည်။

၎င်းအပြင် မောက်ထိုင်ဝိုင်မှာ ၅၄၀ မီလီလီတာ ပုလင်းများဖြင့် လာခြင်းဖြစ်ပြီး စပျစ်ဝိုင်မှာမူ အနည်းဆုံး ၇၅၀ မီလီလီတာ ရှိပေသည်။

တစ်မီလီလီတာချင်းစီ၏ စျေးနှုန်းအရဆိုပါက ကွာခြားချက်မှာ ပိုမိုကြီးမားလှပေသည်။

၎င်းအပြင် ၁၉၈၂ ခုနှစ်ထုတ် လာဖစ်ဝိုင်၏ ၉၉ ရာခိုင်နှုန်းမှာ အတုများသာ ဖြစ်ကြသည်။

ထိုနှစ်တွင် ပုလင်းပေါင်း ၂၀၀,၀၀၀ အောက်သာ ထုတ်လုပ်ခဲ့ခြင်းဖြစ်သော်လည်း တရုတ်နိုင်ငံတွင် နှစ်စဉ်နှစ်တိုင်း ၁၉၈၂ ခုနှစ်ထုတ် လာဖစ်ဝိုင် ပုလင်းပေါင်း သောင်းနှင့်ချီ၍ သောက်သုံးနေကြခြင်း ဖြစ်သည်။

လူအများစုမှာ အနှစ်သာရအားဖြင့် ဘာမှမဟုတ်သည်ကို သောက်သုံးနေကြရခြင်းဖြစ်ပြီး လိမ်လည်လှည့်ဖြားခြင်း ခံနေရစဉ်မှာပင် ပျော်ရွှင်နေကြဆဲ ဖြစ်သည်။

ဖြူစင်သော အရက်ပုလင်းတစ်ပုလင်းကို ဖွင့်လှစ်လိုက်သောအခါ ကောက်ပဲသီးနှံများ၏ ရနံ့သည် နူးညံ့သော ပိုးချည်မျှင်လေးတစ်ခုကဲ့သို့ လူတိုင်း၏ ဘေးပတ်ဝန်းကျင်တွင် ဖြည်းညှင်းစွာ လွင့်ပျံသွားခဲ့သည်။

အရက်သောက်ရသည်ကို သဘောမကျသော လျိုမုယန်ပင်လျှင် မအောင့်နိုင်ဘဲ ရေရွတ်မိသွားသည်။

"တကယ်ကို မွှေးတာပဲ!"

သူဌေးကြီးများသည် အလားတူ သို့မဟုတ် ယခုထက် ပိုမိုကောင်းမွန်သော အရက်များကို မြည်းစမ်းဖူးကြသော်လည်း ထိုဝိုင်နှစ်ပုလင်းကိုမူ လက်ကနေ မချနိုင်ကြသေးချေ... အမျိုးသားအဆင့် ဝိုင်တစ်ခွက်၏ ဆွဲဆောင်မှု ဖြစ်ပေလိမ့်မည်။

"ကဲ... အားလုံးပဲ၊ ငါတို့ ခွက်ကလေးတွေ မြှောက်လိုက်ကြရအောင်။ ဒီတစ်ခွက်ကတော့ ကံဆိုးမှုတွေကို မောင်းထုတ်ဖို့အတွက်ပေါ့။ မနေ့က ကိစ္စတွေက လုံးဝ ပြီးဆုံးသွားခဲ့ပြီဖြစ်ပြီး အဲဒီကောင်တွေလည်း သင်ခန်းစာ ရသွားကြပြီ.... ချီးယားစ် "

ဝတုတ်က ဦးဆောင်၍ သူ၏ ခွက်ကို မြှောက်ကာ တစ်ကျိုက်တည်းဖြင့် မော့ချလိုက်သည်။

ဥက္ကဋ္ဌဟန်က သူ၏ ခွက်ကို ချလိုက်ပြီး သူ့အား လှမ်းကြည့်ရင်း မေးမြန်းလိုက်သည်။

"ရှောင်ကျွင်း... အဲဒီကောင်နှစ်ယောက်ရဲ့ ကိစ္စက ဘယ်လိုဖြစ်သွားလဲ"

ဥက္ကဋ္ဌဟန်သည် ဟန်တျန်းနယ်မြေတွင် လူအမြောက်အမြားကို သိရှိသော်လည်း ထိုကောင်များကို ပြည်နယ်မြို့တော်သို့ ခေါ်ဆောင်သွားခဲ့ပြီဖြစ်ရာ ဝတုတ်ကိုသာ မေးမြန်းရခြင်းဖြစ်သည်။

"ဟေး... အဲဒီ မိန်းမလျာကတော့ အခု တကယ့်ကို မိန်းမလျာ စစ်စစ် ဖြစ်သွားပြီလေ။ မနေ့က ကန်ချက်ကြောင့် သူက အခု လုံးဝ ကုန်းကုန်း ဖြစ်သွားပြီ၊ လက်ခြေလေးဖက်စလုံး ကျိုးသွားပြီး ဆေးရုံမှာ ရှိနေတုန်းပဲ”

“ သူ ပြန်သက်သာလာရင်တောင်မှ မသန်မစွမ်းဖြစ်သွားမှာမို့ သူ့ဘဝတစ်လျှောက်လုံး ဘယ်လို ပင်ပန်းတဲ့အလုပ်မျိုးကိုမှ လုပ်နိုင်တော့မှာ မဟုတ်ဘူး"

"အဲဒီ ထိပ်ပြောင်ကောင်ကတော့ ဘာမှမဖြစ်ပါဘူး။ မနေ့က အရိုက်ခံရပြီး ဒီနေ့တော့ သူ့ရဲ့ မူလပုံစံအတိုင်း ပြန်ဖြစ်သွားပြီ။ ဒါပေမဲ့ သူ့ရဲ့ မိသားစုကတော့ ပြဿနာအကြီးအကျယ် တက်နေပြီလေ"

"သူ့ရဲ့ အဖေ၊ သူ့ရဲ့ ဘကြီး၊ ဦးလေးကြီး၊ ဦးလေးလေး၊ ဦးလေးလတ်၊ ယောက္ခမ၊ ခဲအိုနဲ့ တစ်ခြား ဆွေမျိုး အမြောက်အမြားပါ အားလုံး အဖမ်းခံလိုက်ရတယ်"

"ရှောင်ဝမ်ရွာက လူတွေကတော့ ရွာတွင်း လူမိုက် အဖမ်းခံရတာကို ဒီနေ့မနက် စောစောစီးစီးမှာပဲ ဗျောက်အိုးတွေ ဖောက်ပျော်နေကြတာ။ သူတို့က အဲဒီလူတွေရဲ့ ဖိနှိပ်မှုအောက်မှာ အကြာကြီး ခံစားခဲ့ရပုံပဲ။ ငါတို့က လူထုအတွက် အန္တရာယ်တစ်ခုကို ဖယ်ရှားပေးခဲ့တာမို့ ကုသိုလ်ကောင်းမှုတစ်ခု လုပ်ခဲ့တာပေါ့"

"မနေ့က အတွင်းရေးမှူးကျန်းက ဒီအကြောင်းကို အုပ်ချုပ်ရေးမှူးရှဲ့ကို ပြောပြလိုက်တာ အုပ်ချုပ်ရေးမှူးရှဲ့က ဒေါသထွက်သွားတာ”

“ရှောင်ဝမ်ရွာကို အခုနှစ် နှိမ်နင်းရေးအတွက် စံပြနမူနာအဖြစ် သတ်မှတ်ဖို့ ဆုံးဖြတ်လိုက်ပြီး ဒေသတွင်း ရာဇဝတ်ဂိုဏ်းလို့ တိုက်ရိုက် တံဆိပ်ကပ်လိုက်တယ်တဲ့"

''စံပြနမူနာ အဖမ်းခံရတာရဲ့ အကျိုးဆက်ကို ခင်ဗျားတို့ သိပါတယ်။ သူတို့ရဲ့ တစ်မိသားစုလုံးက သူတို့ဘဝရဲ့ ကျန်ရှိတဲ့ အချိန်တွေကို ထောင်ထဲမှာပဲ ဖြတ်သန်းရဖို့ များပါတယ်''

ထိုစကားကို ကြားလိုက်ရသောအခါ အခန်းထဲရှိ လူတစ်ဦးတစ်ယောက်မျှ ပြစ်ဒဏ်က ပြင်းထန်လွန်းသည်ဟု မခံစားမိကြဘဲ အားလုံးက ကျေနပ်အားရသော အမူအရာများကိုသာ ပြသခဲ့ကြသည်။

ကျိုးထျန်းကမူ ဝတုတ် ပြောလိုက်သော လူများထဲမှ တစ်ဦးကို သတိပြုမိလိုက်သည်။

'အုပ်ချုပ်ရေးမှူးရှဲ့လား...'

'ဒါက မနေ့က အဓိကနေရာမှာ ထိုင်နေခဲ့တဲ့သူ ဖြစ်ဖို့များတယ်'

'အုပ်ချုပ်ရေးမှူးဆိုတာ ပြည်နယ်တစ်ခုရဲ့ နံပါတ်တစ် အရာရှိကြီး ဖြစ်တာမို့... သူက အဓိကနေရာမှာ ထိုင်ဖို့အတွက် လုံလောက်တဲ့ ဂုဏ်ဒြပ် ရှိတာပေါ့'

၎င်းအပြင် ဒီလူက စီးပွားရေးအရ ဖွံ့ဖြိုးတိုးတက်ပြီး လူဦးရေလည်း များပြားတဲ့ အဓိကပြည်နယ်တစ်ခုဖြစ်တဲ့ တုံဟိုင်ပြည်နယ်ရဲ့ နံပါတ်တစ် အရာရှိကြီး ဖြစ်တာမို့... သူ၏ အဆင့်အတန်းက သဘာဝကျစွာပင် ထူးခြားလှပေသည်''

ဝတုတ်ချောင်က ခဏမျှ စဉ်းစားကြည့်ပြီးနောက် ထပ်မံ ဖြည့်စွက်ပြောကြားလိုက်သည်။

"ဒါနဲ့... ဆေးရုံမှာ ရှိနေတဲ့ ချိုးလန်ကလည်း အရင်က အလားတူ အမှုကိစ္စတွေကို လုပ်ဆောင်ခဲ့ဖူးကြောင်း စုံစမ်းသိရှိရတယ်”

“ သူက စာချုပ်သက်တမ်း မတိုးချင်တဲ့ အနုပညာရှင်တွေကို လူငှားပြီး ရိုက်နှက်ခိုင်းခဲ့တယ်၊ ပြီးတော့ အမျိုးသား အနုပညာရှင်တွေကို အမျိုးသမီး သူဌေးကြီးတွေနဲ့အတူ ထမင်းစားဖို့နဲ့... အတူတူ အိပ်ဖို့အတွက် အတင်းအကျပ် စေခိုင်းခဲ့သေးတယ်။ ဘာပဲဖြစ်ဖြစ်... တော်တော်လေးကို သိတဲ့အတိုင်းပဲလေ"

"သူ့ကိုလည်း ဖျော်ဖြေရေးလောကရဲ့ ကင်ဆာဆဲလ်တစ်ခုအဖြစ် တံဆိပ်ကပ်လိုက်ပြီဖြစ်လို့... တစ်လောကလုံးရဲ့ လေထုကို သန့်စင်ဖို့အတွက် သူ့ကို စံပြအဖြစ် အရေးယူတော့မှာ"

"စောင့်ရုံသာ စောင့်ကြည့်လိုက်ပါ... နောက်ရက်အနည်းငယ်အတွင်းမှာ သတင်းစာတွေထဲ ပါလာလိမ့်မယ်။ ဒီကောင်တင်မကဘူး၊ သူ့ရဲ့ လူတွေအားလုံး နာမည်ပျက်စာရင်း သွင်းခံရမှာဖြစ်ပြီး သူ့နဲ့အတူ ပွဲစားလုပ်ခဲ့တဲ့ ကောင်အချို့လည်း သူတို့ရဲ့ လုပ်ရပ်တွေကို ပြန်လည်သုံးသပ်ဖို့အတွက် ထောင်ထဲ သွားရလိမ့်မယ်"

ဥက္ကဋ္ဌဟန်က ပထမဦးစွာ ခေါင်းညိတ်လိုက်သည်။

"တကယ်ပါပဲ... မကြာသေးမီက ဟန်တျန်းရဲ့ လေထုက သိပ်မကောင်းလှဘူး။ လူသစ်အများစုက အထူးသဖြင့် စည်းကမ်းမရှိကြတာမို့... သူတို့ကို ပြင်းပြင်းထန်ထန် သတိပေးရမယ့် အချိန်ရောက်ပြီ"

သို့သော် ထိုသို့ ပြောကြားပြီးနောက် သူက ဝတုတ်အား ဆိုးသွမ်းသော အပြုံးတစ်ခု ပြုံးပြလိုက်သည်။

"လေထုအကြောင်း ပြောရမယ်ဆိုရင်တော့... ‌ရှောင်ကျွင်း၊ ငါ့အထင်တော့ မင်းက ပထမဦးဆုံး ပညာပေးခံရမယ့်သူ ဖြစ်သင့်တယ် ထင်တယ်"

"ဟားဟားဟား!"

လူတိုင်းက တဟားဟား ရယ်မောလိုက်ကြပြီး ဝတုတ်အား သူ့ဘာသာ ပြစ်ဒဏ်အဖြစ် အရက်တစ်ခွက် သောက်ရန် အတင်းအကျပ် တိုက်တွန်းလိုက်ကြသည်၊ သူ၌ ထူးဆန်းသော အကြိုက် တစ်မျိုး ရှိနေသည်မဟုတ်ပါလား။

"ဒါနဲ့... မစ္စတာကျိုး၊ မင်း မနေ့က ပြောတော့ ဂိမ်းကုမ္ပဏီတစ်ခု ထောင်ထားတယ်ဆို။ အဲဒါက ဘယ်ကုမ္ပဏီလဲ။ ငါ့သားက တစ်နေ့လုံး ဂိမ်းဆော့ဖို့ပဲ သိပြီး ငါ့ကို ဘာမှပြန်မပြောဘူး။ ငါလည်း လူငယ်တွေရဲ့ ခေတ်ရေစီးကြောင်းကို လေ့လာချင်လို့ပါ"

အိမ်ခြံမြေကုမ္ပဏီ၏ မန်နေဂျာဖြစ်သူ မစ္စတာဟူက မေးမြန်းလိုက်ခြင်း ဖြစ်သည်။

သူက အသက်သိပ်မကြီးသေးဘဲ အသက် ၄၀ ဝန်းကျင်ခန့်သာ ရှိသေးသဖြင့် သူ၏ ကလေးမှာ ဆယ်ကျော်သက်အရွယ်မျှသာ ရှိဦးမည် ဖြစ်သည်။

"ထျန်းချိုင် နည်းပညာကုမ္ပဏီ ပါ၊ ရှန်ဟိုင်းက ကုမ္ပဏီအသေးလေးတစ်ခုမို့ ထည့်ပြောနေဖို့ မတန်ပါဘူး"

နှိမ့်ချနေခြင်း မဟုတ်ဘဲ ဤလူများနှင့် နှိုင်းယှဉ်ပါက အမှန်တကယ်ပင် အရေးမပါလှခြင်း ဖြစ်သည်။

"ထျန်းချိုင် နည်းပညာ..." ဝတုတ်ချောင်မှ ထိုနာမည်ကို ကြားလိုက်ရသောအခါ စဉ်းစားတွေးတောဟန် ဖြစ်သွားသည်။

အခြားသူများမှာမူ အသက်အရွယ်ကြီးရင့်သူများ ဖြစ်ကြသဖြင့် ထိုကုမ္ပဏီအကြောင်းကို သဘာဝကျစွာပင် မကြားဖူးကြချေ။

ထျန်းချိုင် ကုမ္ပဏီသည် ဆံပင် အစားထိုးစိုက်ပျိုးခြင်း ထောက်ပံ့ကြေးကြောင့် Weibo ပေါ်တွင် တော်တော်လေး နာမည်ကြီးလာခဲ့သော်လည်း ဤသူဌေးကြီးများမှာ ရိုးရာလုပ်ငန်းများတွင်သာ ကျင်လည်နေကြသူများ ဖြစ်သဖြင့် ထိုအရာများကို ဂရုမစိုက်ကြချေ။

အကယ်၍ ၎င်းတို့သည် မီဒီယာအသစ် သို့မဟုတ် အွန်လိုင်း သတင်းအချက်အလက် နည်းပညာလောကမှ လူများ ဖြစ်ကြမည်ဆိုပါက ထျန်းချိုင် ဟူသော နာမည်ကို မှတ်မိကြပေလိမ့်မည်။

မည်သူမျှ မသိကြသဖြင့် ၎င်းတို့အားလုံးက တစ်ဦးတည်းသော တုံ့ပြန်မှု ရှိနေသည့် ဝတုတ်ချောင်ထံသို့ လှမ်းကြည့်လိုက်ကြသည်။

"ထျန်းချိုင် နည်းပညာ... ထျန်းချိုင် နည်းပညာ၊ ဘာဖြစ်လို့ ဒီနာမည်က ရင်းနှီးနေရတာလဲ။ ငါ တစ်နေရာရာမှာ ကြားဖူးသလို ခံစားနေရတယ်"

ကျိုးထျန်း မအံ့ဩမိချေ။ သူက အသက်သိပ်မကြီးသေးသဖြင့် သူ၏ ကုမ္ပဏီမှ ဂိမ်းများကို ဆော့ကစားဖူးခြင်းလည်း ဖြစ်နိုင်ပေသည်။

စက္ကန့်ဆယ်ဂဏန်းခန့် စဉ်းစားပြီးနောက်တွင်မူ ဝတုတ်ချောင်သည် ရုတ်တရက် မျက်လုံးများ ပြူးကျယ်သွားခဲ့ပြီး စားပွဲကို လက်ဖြင့် ရိုက်ချလိုက်တော့သည်။

"ထျန်းချိုင် နည်းပညာ!"

သူက အော်ဟစ်လိုက်ပြီးနောက် ကျိုးထျန်းအား လှမ်းကြည့်လိုက်သည်။

"ဟာ... သွားပြီ၊ ဒါဆိုရင် ဒါက မင်းရဲ့ ကုမ္ပဏီပေါ့"

ဝတုတ်ချောင်သည် စိတ်လှုပ်ရှားစွာဖြင့် ထရပ်လိုက်ပြီး သူ၏ မျက်နှာကလည်း ရယ်မောမှုများကြောင့် တုန်ခါနေခဲ့သည်။

"လာပါ... မစ္စတာကျိုး၊ ကျွန်တော် မင်းကို အရက်တစ်ခွက်လောက် တိုက်ပါရစေ။ မင်းက တကယ်ပဲ ကုသိုလ်ကောင်းမှုတစ်ခု လုပ်ခဲ့တာပဲ"

ကျိုးထျန်းမှာ အနည်းငယ် ဝေခွဲမရဖြစ်သွားပြီး သူ၏ ဝိုင်ခွက်ကို ကောက်ကိုင်လိုက်သည်။

အခြားသူများမှာလည်း အလားတူပင် ဝေခွဲမရဖြစ်သွားကြပြီး ကြောင်တောင်တောင်ဖြင့်သာ စိုက်ကြည့်နေခဲ့ကြသည်။

ဝတုတ်ချောင်သည် သူ၏ ခွက်ကို ချလိုက်ပြီးနောက် ကျိုးထျန်း၏ ဘေးနားသို့ တိုက်ရိုက် လျှောက်လှမ်းလာခဲ့ကာ သူ့ဘေးရှိ အလွတ်နေရာတွင် ဝင်ထိုင်လိုက်သည်။

ဤလုပ်ရပ်က အခန်းထဲရှိ ဝါရင့်လူကြီးမင်းများအား မတူညီသော အထင်အမြင်တစ်ခုကို ဖြစ်ပေါ်စေခဲ့သည်။

၎င်းတို့အားလုံးက ထိုနှစ်ဦးထံသို့ လှည့်ကြည့်လိုက်ကြတော့သည်။

"ငါတို့ ဆုံတွေ့ဖို့ ကံပါလာတာပဲ! ဒီညတော့ ငါတို့ မှောက်တဲ့အထိ သောက်ကြရမယ်!"

သူက ကျိုးထျန်း၏ ပုခုံးကို လက်မောင်းဖြင့် ဖက်လိုက်ရင်း စွဲလမ်းနေသော အမူအရာဖြင့် ပြောလိုက်သည်။