အခန်း ၂၃၄

🍋 Chapter 234

ဟွမ်ရှုဝမ်၏ မိသားစုမှာ ချမ်းသာကြွယ်ဝခြင်း မရှိပေ။

ထို့ကြောင့် သူမ လက်ထဲတွင် ကိုင်ဆောင်ထားသည့် ယွမ်တစ်ထောင်ကျော်တန် မျက်နှာလိမ်းခရင်မ်မှာ သူမအနေဖြင့် လပေါင်းများစွာ စုဆောင်းပြီးမှ ဝယ်ယူနိုင်ခဲ့ခြင်း ဖြစ်သည်။

ယခုအခါတွင်မူ အခန်းဖော်ဖြစ်သူ၏ အော်ဟစ်သံကြောင့် လန့်ဖျပ်သွားခဲ့ရပြီး ၎င်း၏ အစိတ်အပိုင်း အများစုမှာ လေလွင့်ဆုံးရှုံးသွားခဲ့ရပြီ ဖြစ်သည်။

သူမသည် ၎င်းကို မျက်နှာပေါ်သို့ပင် မလိမ်းရသေးဘဲ နံရံပေါ်သို့သာ အကုန်အစင် ပန်းထွက်သွားခဲ့ရသည်။

သူမသည် တိုက်ရိုက်ထုတ်လွှင့်မှု များနှင့် အမျိုးမျိုးသော ဈေးဝယ်အက်ပ် များ၏ လွှမ်းမိုးမှုကြောင့် ခေတ်သစ်ကာလရှိ လူငယ်များအတွက် အကြိုသုံးစွဲခြင်း ဆိုသည်မှာ အမှန်ကန်ဆုံးသော သုံးစွဲမှု အယူအဆဖြစ်သည်ဟု ယုံကြည်ထားသူ ဖြစ်သည်။

အလှကုန်ပစ္စည်းများ၊ ဖျော်ဖြေပွဲလက်မှတ်များ၊ ဖုန်းအသစ်များနှင့် ဇိမ်ခံနေ့လည်စာများကို ဝယ်ယူရန်အတွက် သူမသည် အွန်လိုင်းချေးငွေပလက်ဖောင်းတစ်ခုတွင် အရစ်ကျစနစ်ဖြင့် ယွမ်ထောင်ပေါင်းများစွာ အကြွေးတင်နေခဲ့ပြီး ဖြစ်သည်။

၎င်းကို ပြန်လည်ပေးဆပ်ရန်မှာ ပျင်းရိပြီး လယ်ယာစိုက်ပျိုးရေးအကြောင်း ဘာမျှမသိသည့် သူမကဲ့သို့သော ကောလိပ်ကျောင်းသူတစ်ဦးအတွက် မဖြစ်နိုင်သော အလုပ်တစ်ခုပင် ဖြစ်ပေသည်။

သို့သော် သူမ စိုးရိမ်မနေခဲ့ချေ။ အကယ်၍ အခြေအနေများ အလွန်အမင်း ဆိုးရွားလာပါက သူမအနေဖြင့် မိဘများကိုသာ လာရောက်ရှင်းခိုင်းရုံရှိသည်။

ဘာပဲဖြစ်ဖြစ် သူမသည် တစ်ဦးတည်းသောသမီး ဖြစ်သည့်အတွက် သူတို့အနေဖြင့် ကူညီချင်သည်ဖြစ်စေ၊ မကူညီချင်သည်ဖြစ်စေ သေချာပေါက် ကူညီကြရမည်သာ ဖြစ်သည်။

မိဘများ၏ ပိုက်ဆံမှာ သူမ၏ ပိုက်ဆံပင် ဖြစ်ရာ၊ အစောကြီး သုံးလိုက်သည်ဖြစ်စေ၊ နောက်မှ သုံးရသည်ဖြစ်စေ ဘာမျှမထူးခြားပေ။

P2P ချေးငွေပလက်ဖောင်းများကဲ့သို့ပင် သူမ၏ အကြွေးများမှာ နောက်ဆုံးတွင် ပြိုလဲသွားလိမ့်မည် ဖြစ်ကြောင်း သိရှိထားသော်လည်း တစ်ရက်မျှ နောက်ဆွဲထားနိုင်လျှင် တစ်ရက်မျှ အမြတ်ရသည်ဟူသော စိတ်ဓာတ်မျိုးကို ဆုပ်ကိုင်ထားဆဲ ဖြစ်သည်။

ပျက်စီးသွားသော မျက်နှာလိမ်းခရင်မ်ကြောင့် သူမအနေဖြင့် အသစ်တစ်ခု ထပ်မံဝယ်ယူရန်အတွက် ယွမ်တစ်ထောင်ကျော် ထပ်မံအသုံးပြုရဦးမည် ဖြစ်သည်။

ဤသည်မှာ သူမ၏ အကြွေးများ ပိုမိုတိုးပွားလာမည်ဖြစ်ကြောင်း ဖော်ပြနေပြီး၊ ဘဏ္ဍာရေး ပျက်စီးခြင်းဆီသို့ နောက်ထပ်တစ်လှမ်း ပိုမိုနီးကပ်သွားစေခဲ့သည်။

သူမ၏ သုံးစွဲမှုကို လျှော့ချပြီး ဈေးသက်သာသော ပစ္စည်းတစ်ခုကို ပြောင်းလဲဝယ်ယူရန်မှာမူ မည်သို့ ဖြစ်နိုင်ပါမည်နည်း။

ယွမ်ရာဂဏန်းမျှသာ တန်ဖိုးရှိသော အရာတစ်ခုကို သူမ၏ မျက်နှာပေါ်တွင် မတင်နိုင်ပေ။ ၎င်းမှာ တစ်ဘဝလုံး အလုပ်ကြိုးစားရုံသာ တတ်နိုင်သည့် ဆင်းရဲသားများအတွက် အောက်တန်းစား ပစ္စည်းများသာ ဖြစ်ပေသည်။

သူမ၏ မိဘများမှာ ယွမ်အနည်းငယ်ကိုပင် ခြစ်ကုတ်စုဆောင်းနေရသော်လည်း သူမကမူ ကျောင်းဝန်းအတွင်း၌ ပိုက်ဆံကို ရေလိုသုံးနေခဲ့သည်ကို သူမ လုံးဝ မသိရှိခဲ့ချေ။

"မရဘူး... အော်တဲ့လူက ငါ့ကို ပိုက်ဆံပြန်လျော်ပေးရမယ်"

သူမသည် အဝတ်အစားများကို ကမန်းကတန်း ဝတ်ဆင်လိုက်ပြီး၊ ရေချိုးခန်းတံခါးကို စိတ်ဆိုးမာန်ဆိုးဖြင့် တွန်းဖွင့်ကာ အခန်းဖော်၏ ဘေးနားသို့ ပြေးသွားခဲ့တော့သည်။

"ကျောက်ရှန်းရှန်း... နင် ဘာလို့ အော်နေတာလဲ၊ နင် ငါ့ကို လန့်သွားအောင် လုပ်လိုက်တာ သိလား၊ နင် ငါ့ကို..."

သူမသည် စူးရှလှသော အသံကြီးဖြင့် အော်ဟစ်လိုက်ပြီး အခန်းဖော်ကို အပြစ်တင်ရန် ပြင်ဆင်လိုက်သော်လည်း စကားပင် မဆုံးသေးသည့် အချိန်မှာပင် အခန်းဖော်၏ ဖုန်းမျက်နှာပြင်ပေါ်ရှိ ဓါတ်ပုံကို သတိပြုမိသွားခဲ့ရသည်။

ထိုဓါတ်ပုံထဲတွင် တရုတ်ဘာသာစကားနှင့် စာပေဌာနက ပြုံးရွှင်နေသည့် ကျောင်းသူလေးတစ်ဦး ရှိနေပြီး၊ သူမကို ယောကျ်ားလေး အချို့က ဘုရင်မတစ်ပါးအား လုပ်ကျွေးပြုစုနေသည့်အလား ပွေ့ချီထားကြသည်။

ထိုမိန်းကလေးမှာ ထူးထူးခြားခြား လှပခြင်းမရှိသော်လည်း ဓါတ်ပုံထဲက သူမ၏ တောက်ပလှသော အပြုံးက သူမ မည်မျှအထိ ပျော်ရွှင်နေကြောင်း မြင်တွေ့ရသူတိုင်းကို ကောင်းစွာ သိရှိစေနိုင်သည်။

ဤကဲ့သို့သော ပျော်ရွှင်မှုမျိုးမှာ ပိုက်ဆံ သို့မဟုတ် ရုပ်ဝတ္ထုပစ္စည်းများက ပေးစွမ်းနိုင်သည့် အရာမျိုး မဟုတ်ဘဲ၊ စိတ်နှလုံးထဲက လာသည့် စစ်မှန်သော ကျေနပ်နှစ်သိမ့်မှုမျိုး ဖြစ်သည်။

သို့သော် သူမ၏ အခန်းဖော်နှင့် ဟွမ်ရှုဝမ်တို့ကို မှင်တက်သွားစေခဲ့သည့် အရာမှာ ထိုမိန်းကလေး၏ အပြုံးမဟုတ်ဘဲ၊ သူမကို ဝန်းရံပွေ့ချီထားကြသည့် လူငယ်များ ဖြစ်ကြသည်။

"ဒါ... ထျန်းဟွာရဲ့ သားတော်ခုနစ်ပါး မဟုတ်ဘူးလား"

"ဘာလို့လဲ... ဘာလို့ ဒီလောက် သာမန်လိုဖြစ်နေတဲ့ ကောင်မလေးက ထျန်းဟွာရဲ့ သားတော်ခုနစ်ပါးနဲ့ ဒီလောက်အထိ အနီးကပ် ထိတွေ့ခွင့် ရနေရတာလဲ"

ဟွမ်ရှုဝမ်၏ မျက်လုံးများမှာ ပြူးကျယ်သွားခဲ့ရသည်။

ယခုမှပင် သူမ၏ အခန်းဖော် ဘာ့ကြောင့် ရုတ်တရက် အော်ဟစ်ခဲ့ရသည်ကို နားလည်သွားတော့သည်။

အကယ်၍ သူမသာ ဆိုပါက ဤထက်မက ပိုမို ပြင်းထန်သော တုံ့ပြန်မှုမျိုး ရှိပေလိမ့်မည်။

"နေဦး... ဒီမိန်းကလေးက ပရိုမိုးရှင်း ဗီဒီယို ရိုက်ကူးရေးမှာ ပါဝင်ခဲ့တဲ့ လူတွေထဲက တစ်ယောက် မဟုတ်ဘူးလား၊ သူတို့ လွန်ခဲ့တဲ့ ရက်ပိုင်းက ဟန်တျန်း ရုပ်ရှင်မြို့တော်ကြီးကို သွားကြတာ... ဟုတ်တယ်၊ သူတို့ ဟန်တျန်းကို သွားလည်ကြတာပဲ၊ မဆန်းပါဘူး... သူမ ကံကောင်းသွားတာပဲ"

ဟွမ်ရှုဝမ်သည် မိမိကိုယ်ကို ပြန်လည်၍ နှစ်သိမ့်ရန် ကြိုးစားလိုက်သည်။

သူမသည် ဤလူငယ်များကို အားပေးရန်အတွက် ယွမ်တစ်သောင်းကျော် အသုံးပြုခဲ့ဖူးပြီး၊ ၎င်းတို့ထံသို့ လက်ဆောင်များ ပေးပို့ခြင်းနှင့် ဖန်မီတင် လက်မှတ်များ ဝယ်ယူခြင်းတို့ကြောင့် နှစ်ပေါင်းများစွာ စုဆောင်းထားခဲ့သည့် မုန့်ဖိုးများအားလုံး ကုန်ဆုံးသွားခဲ့ရသည်။

သို့သော် ယခုအခါတွင်မူ ထိုမိန်းကလေးက ဟန်တျန်းသို့ သွားရောက်လည်ပတ်စဉ်အတွင်း ၎င်းတို့နှင့် လူချင်း ကွက်တိ တွေ့ဆုံခဲ့ရုံမျှမက ၎င်းတို့ ခုနစ်ဦးစလုံးက သူမကို ဖက်လဲတကင်း ပြုမူနေကြသည် ဖြစ်ရာ သူမ အလွန်အမင်း မနာလို ဖြစ်မိသွားခဲ့ရသည်။

"ဝမ်ဝမ်... ငါ့အထင်တော့ သူတို့က ကံကောင်းရုံတင် မဟုတ်ဘူးထင်တယ်၊ ဒီမှာကြည့်ဦး"

သူမ၏ စကားကို ကြားပြီးနောက် အခန်းဖော်ဖြစ်သူက နှေးကွေးစွာ ပြောလိုက်ပြီး၊ ဖုန်းကို သူမထံသို့ ကမ်းပေးကာ ဓါတ်ပုံအချို့ကို ဆက်လက်၍ ပြသလိုက်သည်။

ထိုအခါမှပင် ဟွမ်ရှုဝမ်သည် ၎င်းမှာ ထိုမိန်းကလေး၏ WeChat Moments ဖြစ်ကြောင်း သိရှိလိုက်ရတော့သည်။

"ဒါက..."

ဓါတ်ပုံအချို့ကို ကြည့်ရှုပြီးနောက် သူမ၏ မျက်လုံးများမှာ ပြူးကျယ်သွားခဲ့ပြီး မျက်တွင်းထဲကနေ ပြုတ်ထွက်လုမတတ် ဖြစ်သွားခဲ့ရသည်။

သူမ၏ မျက်ထောင့်များတွင် အကြောများမှာ ဖောင်းတက်လာခဲ့ပြီး နှုတ်ခမ်းများမှာလည်း ထိန်းချုပ်မရဘဲ တုန်ရီနေခဲ့သည်၊ ဤသည်မှာ ပြင်းထန်လှသော စိတ်လှုံ့ဆော်မှုကို ခံစားလိုက်ရသည့် လက္ခဏာပင် ဖြစ်သည်။

‘ထျန်းဟွာရဲ့ သားတော်ခုနစ်ပါးက သူမကို ဖက်ထားတယ်’

‘ကိုရီးယားကနေ ပြန်လာတဲ့ ကိုရီးယား အိုင်ဒေါ လေးယောက်က သူမကို ဖက်ထားတယ်’

‘စာလုံးလေးလုံးပါတဲ့ မင်းသားလေးက သူမနဲ့ လက်ချင်းချိတ်ထားတယ်’

‘ကျောက်တုံးသုံးတုံးပါတဲ့ မင်းသားလေးက သူမနဲ့ အသည်းပုံစံ လုပ်ပြနေတယ်’

‘ဘာလို့လဲ... ဘာလို့လဲ... ဒါတွေအားလုံးက ဘာကိစ္စကြီးလဲ’

ဟွမ်ရှုဝမ်တစ်ယောက် ရူးသွပ်သွားတော့မလို ခံစားလိုက်ရသည်။ ဤအမျိုးသား အနုပညာရှင်များနှင့် မင်းသားချောလေးများ အားလုံးမှာ သူမ အကြိုက်ဆုံး ပုဂ္ဂိုလ်များ ဖြစ်ကြသည်။

၎င်းတို့မှာ ပိုက်ဆံပေးလျှင်ပင် မြင်တွေ့ရန် ခဲယဉ်းလှသည့် ထိပ်တန်း အနုပညာရှင်ကြီးများ ဖြစ်ကြသည်။

သူမသည် မိမိ၏ အိုင်ဒေါများနှင့် အနည်းငယ်မျှ ပိုမိုနီးကပ်ရန်အတွက် ၎င်းတို့၏ Weibo စာတန်းများအောက်တွင် နေ့စဉ်ရက်ဆက် မှတ်ချက် များ ရေးသားလေ့ရှိပြီး စိတ်ကူးယဉ်နေခဲ့သူ ဖြစ်သည်။

သူမသည် မိမိ၏ အိုင်ဒေါကို ဝေဖန်တိုက်ခိုက်ဝံ့သည့် မည်သည့်အဖွဲ့အစည်းကိုမဆို၊ ၎င်းသည် နိုင်ငံတော်ပိုင် မီဒီယာဖြစ်စေကာမူ ဝိုင်းဝန်းတိုက်ခိုက်သည့် အဓိကအဖွဲ့ထဲတွင် အမြဲတမ်း ပါဝင်လေ့ရှိသည်။

အင်အားအပေါ်တွင်သာ ယုံကြည်ပြီး၊ ၎င်းတို့သည် မိမိတို့ အိုင်ဒေါ၏ အုပ်ထိန်းသူများဖြစ်ရာ ၎င်းတို့ကို ကာကွယ်ရမည်ဟု ထင်မှတ်ထားသည်။

နိုင်ငံတော်ပိုင် မီဒီယာဖြစ်ရင်ကော ဘာဖြစ်လဲ၊ အကယ်၍ မည်သူမဆို မိမိ၏ အိုင်ဒေါကို ဝေဖန်တိုက်ခိုက်ဝံ့လျှင် ဧကရာဇ်မင်းကြီး ဖြစ်ပါစေဦးတော့၊ ဆွဲချပစ်ရမည်သာ ဖြစ်သည်။

သို့သော် သူမ ဤမျှအထိ ကြိုးစားခဲ့သော်လည်း မိမိ၏ အိုင်ဒေါနှင့် တစ်ခါမျှ မဆုံတွေ့ခဲ့ဖူးချေ။

အလွန်အမင်း အေးစက်လှသော ဆောင်းရာသီ ကာလကြီးတွင် လက်မှတ်များကို အဆမတန် ဈေးကြီးပေး၍ ဝယ်ယူခဲ့ရပြီး၊ ပူပြင်းလှသော နွေရာသီ ကာလကြီးတွင် လက်မှတ်ထိုးရန်အတွက် တန်းစီခဲ့ရသည်။

သူမ ဤမျှအထိ ကြိုးစားအားထုတ်ခဲ့သော်လည်း အိုင်ဒေါ၏ အဝတ်စကိုပင် မထိတွေ့ခဲ့ရဖူးချေ။

ဘာ့ကြောင့် ဤကဲ့သို့သော သာမန်ထက်မထူးခြားသည့် ရုပ်ရည်မျိုးရှိသော မိန်းကလေးက မိမိ၏ အိုင်ဒေါများနှင့် ဤမျှအထိ အနီးကပ် ထိတွေ့ခွင့် ရရှိခဲ့ရုံမျှမက ထိပ်တန်း အနုပညာရှင် အားလုံးနှင့် တပြိုင်နက်တည်း ဆုံတွေ့ခွင့် ရရှိနေရပါသနည်း။

"ငါ လုံးဝ လက်မခံနိုင်ဘူး"

ဟွမ်ရှုဝမ်သည် ဒေါသကြောင့် တစ်ကိုယ်လုံး တုန်ရီနေခဲ့ရသည်။ သူမသည် ဓါတ်ပုံထဲက မိန်းကလေးကို မျက်လုံးဖြင့်သာ သတ်ပစ်နိုင်လျှင် သတ်ပစ်လိုက်ချင်တော့သည်။

ကြမ်းတမ်းပြီး ကလဲ့စားချေတတ်သော အမျိုးသမီးတစ်ဦးအဖြစ် ပြောင်းလဲသွားကာ သူမကို အပ်များဖြင့် ထိုးသတ်ပစ်ချင်မိသည်။

"ဟင်..."

"ဘာလို့ ဒီကောင်မလေးက ကြည့်ရတာ တစ်နေရာရာမှာ မြင်ဖူးသလိုမျိုး ဖြစ်နေရတာလဲ"

သူမ ရုတ်တရက် သတိပြုမိသွားသည်မှာ ဤမိန်းကလေးသည် လွန်ခဲ့သည့် ရက်အနည်းငယ်က စစ်သင်တန်း တက်ရောက်နေစဉ်အတွင်း အစားအလွန်အမင်း စားရသဖြင့် ဝလာကြောင်းနှင့် ရေခဲမုန့်များ မကုန်ဆုံးမီ အရည်ပျော်သွားကြောင်း မကျေမနပ် ညည်းတွားခဲ့သည့် မိန်းကလေးပင် ဖြစ်သည်။

ဟွမ်ရှုဝမ်သည် ထိုမိန်းကလေး မည်သည့်စာ တင်ထားသည်ကို ကြည့်ရှုရန်အတွက် ပုံကြီးချဲ့ထားခြင်းမှ ထွက်လိုက်သည်။

"အနုပညာရှင်တွေနဲ့ ဓါတ်ပုံရိုက်ရတာ ဒီလို ခံစားချက်မျိုး ဖြစ်မယ်လို့ မထင်ထားခဲ့ဘူး၊ တကယ့်ကို ပျင်းစရာကောင်းပြီး ငြီးငွေ့ဖို့ကောင်းလိုက်တာ"

ဤကဲ့သို့သော နာကျင်စေသည့် စကားလုံးများကို မြင်တွေ့လိုက်ရသောအခါ ဟွမ်ရှုဝမ်သည် ရာနှုန်းပြည့် သေချာသွားခဲ့ပြီ ဖြစ်သည်။

"သူမပဲ... တကယ့်ကို စိတ်ပျက်စရာကောင်းတဲ့ ဟာပဲ၊ ငါ သူမကို သတ်ပစ်ချင်တယ်..."

သူမ စကားပင် မဆုံးသေးမီမှာပင် ဟွမ်ရှုဝမ်သည် မိမိ၏ နားထင်များ တဒိတ်ဒိတ် တုန်ခါလာပြီး ခေါင်းတစ်ခုလုံး မူးဝေလာကာ မျက်လုံးများမှာ အပေါ်သို့ လန်တက်သွားခဲ့တော့သည်။

ဘုန်း

သူမသည် နောက်သို့ ခြေလှမ်းနှစ်လှမ်းခန့် ဆုတ်လိုက်မိပြီး မိမိ၏ ခုတင်ပေါ်သို့ လဲကျသွားခဲ့တော့သည်။

အကယ်၍ ယခုအချိန်တွင် သူမ၏ သွေးပေါင်ချိန်ကို တိုင်းတာကြည့်ပါက သွေးပေါင်ချိန်တိုင်းစက်မှာ ပေါက်ကွဲသွားလောက်ပေသည်။

သူမသည် ငယ်ရွယ်ပြီး ခန္ဓာကိုယ် ပြန်လည်ကျန်းမာလွယ်သည့် အချက်အပေါ်တွင်သာ အမှီပြု၍ မိနစ်အနည်းငယ် ကြာပြီးနောက်တွင်မှ ခုတင်ပေါ်တွင် မနည်း ပြန်လည် ထိုင်နိုင်ခဲ့တော့သည်။

‘ငါ ဘာဖြစ်သွားတာလဲ၊ ငါ အသက် ၁၈ နှစ်ပဲ ရှိသေးတာကို သွေးတိုးရောဂါ ရှိနေတာလား’

‘ငါ နေလောင်ဒဏ် ခံမိသွားတာလား’

‘ဒါမှမဟုတ် ရေချိုးနေတုန်း အပူဒဏ်ကြောင့် သတိလစ်သွားတာလား’

သူမသည် ခေါင်းကို ခါယမ်းလိုက်ပြီး နောက်ဆုံးတွင် မတ်တပ်ရပ်နိုင်ခဲ့သည်။

‘အဲဒီ ဟာမက ကံကောင်းသွားတာပါ၊ရုပ်ရှင်ရိုက်ကွင်းတစ်ခုခုဆီကို သွားလည်ရင်းနဲ့ အဲဒီ အနုပညာရှင်တွေနဲ့ ကွက်တိ တိုးသွားတာ ဖြစ်ရမယ်’ သူမသည် မိမိကိုယ်ကို အတတ်နိုင်ဆုံး ပြန်လည်၍ နှစ်သိမ့်လိုက်မိသည်။

သို့သော် သူမ၏ အခန်းဖော်မှာမူ အရေးကြီးသည့် အချိန်တိုင်း၌ သူမ၏ ခုခံမှုကို အမြဲတမ်း ဖျက်ဆီးပစ်လေ့ရှိသည်။

"ဝမ်ဝမ်... ငါ မြင်လိုက်ရတယ်၊ အဲ့ကောင်မလေး တစ်ယောက်တည်းတင် မဟုတ်ဘူးနော်၊ ဟန်တျန်းကို သွားခဲ့တဲ့ အတန်းဖော်အားလုံးက အနုပညာရှင် တွေ အများကြီး.. မဟုတ်ဘူး၊ ရာနဲ့ချီတဲ့ အနုပညာရှင်တွေနဲ့ ဓါတ်ပုံရိုက်ခဲ့ကြတာ၊ ဒီမှာကြည့်ဦး"

သူမ၏ အခန်းဖော်က ဖုန်းကို သူမ၏ မျက်နှာရှေ့သို့ ထပ်မံ၍ ထိုးပြပြန်သည်။

အတန်းဖော် အမြောက်အမြား၏ WeChat Moments များတွင် ၎င်းတို့ စိတ်ကြိုက် အနုပညာရှင်များနှင့် ရိုက်ကူးထားသည့် ဆဲလ်ဖီ ဓါတ်ပုံများဖြင့် ပြည့်နှက်နေခဲ့သည်။

အမျိုးမျိုးသော ရင်းနှီးလှသည့် ပုံစံများမှာ ဖော်ပြခြင်း ခံထားရပြီး၊ ၎င်းမှာ အတန်းဖော်များက အနုပညာရှင်ကြီးများ ဖြစ်နေကြပြီး၊ အနုပညာရှင်များကမူ ဦးနှောက်မရှိသည့် ဖန် အသေးစားလေးများ ဖြစ်နေကြသည့်အလား ထင်မှတ်ရသည်။

ဟွမ်ရှုဝမ်၏ ရင်ဘတ်တစ်ခုလုံး နိမ့်ချည်မြင့်ချည် ဖြစ်လာခဲ့ပြီး၊ ယခုမှပင် တည်ငြိမ်စပြုလာသည့် သွေးပေါင်ချိန်မှာ ထပ်မံ၍ အရှိန်အဟုန်ပြင်းစွာ မြင့်တက်လာခဲ့ပြန်သည်။

သူမ၏ မျက်နှာမှာ ပိုမို၍ နီရဲလာခဲ့ပြီး၊ မိတ်ကပ်ပြင်ဆင်ရန် မလိုအပ်ဘဲ ကွမ်ယု အဖြစ် သရုပ်ဆောင်နိုင်လောက်သည့် အခြေအနေသို့ ရောက်ရှိနေခဲ့ပြီ ဖြစ်သည်။

လူသားဟူသည် ထူးဆန်းသော သတ္တဝါ ဖြစ်ပေသည်၊ ပြင်းထန်လှသော စိတ်ဖိစီးမှုများကို ခံစားလိုက်ရသည့် အခါတွင် ဦးနှောက်သည် စိတ်ဝိညာဉ် ပြိုလဲမသွားစေရန်အတွက် ကာကွယ်ရန် ရည်ရွယ်ချက်ဖြင့် ယာယီအားဖြင့် အလုပ်လုပ်ခြင်းကို ရပ်ဆိုင်းပစ်လေ့ရှိသည်။

ထိုအချိန်တွင် ဟွမ်ရှုဝမ်၏ ဦးနှောက်က ကာကွယ်ရေး ယန္တရားကို စတင် လည်ပတ်စေခဲ့ပြီ ဖြစ်သည်။

ဘုန်း

သူမသည် မိမိ၏ ခုတင်ပေါ်သို့ ထပ်မံ၍ လဲကျသွားခဲ့ပြန်တော့သည်။

သို့သော် ပြီးခဲ့သည့်အကြိမ်နှင့် မတူညီသည့်အချက်မှာ ယခုအကြိမ်တွင်မူ သူမသည် လုံးဝဥဿုံ မူးဝေသွားခဲ့ခြင်းဖြစ်ပြီး၊ ဒေါသကြောင့် စကားပင် မဆိုနိုင်တော့ဘဲ သတိလစ် မေ့မြောသွားခဲ့ရခြင်းပင် ဖြစ်ပေသည်။